Православный календарь
Размер шрифта:

Ака́ѳістъ

А҆ка́ѳїстъ прпⷣбномꙋ а҆ѳана́сїю, и҆гꙋ́менꙋ высо́цкомꙋ, се́рпꙋховскомꙋ чꙋдотво́рцꙋ

Прп. Афанасия Высоцкого, Серпуховского (нач. XV) 25 сентября 2026

Конда́къ а҃

И҆збра́нномꙋ бг҃омъ во и҆гꙋ́мена ѻ҆би́тели высо́цкїѧ и҆ ди́вномꙋ въ прпⷣбныхъ ѻ҆тцꙋ̀ на́шемꙋ а҆ѳана́сїю соста́вимъ похвалꙋ̀. То́й бо, ꙗ҆́кѡ ѻ҆те́цъ чадолюби́вый, мо́литъ за ны̀ просла́вльшагѡ є҆го̀ гдⷭ҇а да сохрани́тъ ѻ҆би́тель сїю̀ ѿ нестрое́нїй и҆ навѣ́тѡвъ ѕлы́хъ чл҃вѣ̑къ и҆ на́съ всѣ́хъ соблюде́тъ въ ми́рѣ и҆ є҆диномы́слїи и҆ любвѝ: мы́ же любо́вїю сыно́внѣй къ немꙋ̀ преиспо́лненнїи, со ᲂу҆миле́нїемъ бл҃года́рственнѡ зове́мъ ди́вномꙋ ᲂу҆го́дникꙋ хрⷭ҇то́вꙋ:

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

І҆́косъ а҃

А҆́гг҃лѡвъ творе́цъ и҆ всеѧ̀ тва́ри созда́тель, ꙗ҆ви́вый цр҃кви ст҃ѣ́й всесвѣ́тлагѡ свѣти́льника, ѿ гра́да ꙗ҆росла́влѧ призва́вый тѧ̀, прпⷣбне ѻ҆́тче на́шъ а҆ѳана́сїе, въ предѣ́лы гра́да се́рпꙋхова во ѻ҆би́тель пречⷭ҇тыѧ дв҃ы и҆́же на высо́комъ приведѐ тѧ̀. Мы́ же, ви́дѧ соверше́нїе бл҃гі́ѧ во́ли гдⷭ҇ни на тебѣ̀, съ любо́вїю вопїе́мъ тѝ си́це:

Ра́дꙋйсѧ, гра́да ꙗ҆росла́влѧ пресла́вное прозѧбе́нїе: ра́дꙋйсѧ, прⷪ҇ро́ка дре́внѧгѡ а҆мѡ́са и҆́мѧ полꙋчи́вый при кр҃ще́нїи.

Ра́дꙋйсѧ, ꙗ҆́кѡ и҆з̾ дѣ́тска ᲂу҆́мъ и҆ дꙋ́шꙋ твою̀ гдⷭ҇еви преда́вый: ра́дꙋйсѧ, любвѐ ра́ди ко гдⷭ҇ꙋ до́мъ ѻ҆те́ческїй ѡ҆ста́вивый.

Ра́дꙋйсѧ, во ѻ҆би́тель высо́цкꙋю прише́дый и҆ та́мѡ поко́й дꙋшѣ̀ свое́й ѡ҆брѣты́й: ра́дꙋйсѧ, ѿ ю҆́ности твоеѧ̀ ꙗ҆ре́мъ хрⷭ҇то́въ на сѧ̀ воспрїѧ́вый.

Ра́дꙋйсѧ, бг҃омꙋ́дрымъ ᲂу҆чи́телемъ твои́мъ а҆ѳана́сїемъ въ мона́шестѣмъ дѣ́ланїи ᲂу҆мꙋдре́нный: ра́дꙋйсѧ, ѻ҆́бразъ и҆́ноческагѡ добродѣ́ланїѧ чрез̾ всѐ житїѐ твоѐ пронесы́й.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ в҃

Ви́дѣвъ прпⷣбный а҆ѳана́сїй стрѡ́гїѧ ᲂу҆ста́вы ѻ҆би́тели высо́цкїѧ возра́довалсѧ дꙋ́хомъ: и҆здѣ́тска бо жела́хꙋ по́стное и҆́ноческое житїѐ на себѣ̀ воспрїѧ́ти и҆ бг҃ꙋ пѣ́ти: А҆ллилꙋ́їа.

І҆́косъ в҃

Разꙋмѣ̀ прпⷣбный ᲂу҆чи́тель тво́й а҆ѳана́сїй ве́лїю ре́вность твою̀ по бз҃ѣ и҆ ꙗ҆́кѡ бг҃оꙋго́днымъ житїе́мъ твои́мъ безсме́ртїе ᲂу҆лꙋчи́ши дꙋхо́вное, а҆ѳана́сїемъ тѧ̀ нарека́етъ безсме́ртїю тезоимени́тымъ содѣва́етъ. Восхвалѧ́юще ди́вное житїѐ твоѐ, прпⷣбне, прино́симъ тѝ сїѧ̑ похва̑льныѧ словеса̀:

Ра́дꙋйсѧ, бл҃же́ннагѡ а҆ѳана́сїѧ, пе́рвагѡ и҆гꙋ́мена высо́цкагѡ, люби́мый ᲂу҆ч҃ничѐ: ра́дꙋйсѧ, ѿ рꙋкѝ є҆гѡ̀ по́стригъ мона́шескїй прїе́мый.

Ра́дꙋйсѧ, а҆ѳана́сїемъ и҆́мъ нарече́нный: ра́дꙋйсѧ, рꙋково́дствомъ є҆гѡ̀ ко сп҃се́нїю вѣ́чномꙋ напра́вленный.

Ра́дꙋйсѧ, дꙋхо́внагѡ ѻ҆тца̀ своегѡ̀ а҆ѳана́сїѧ бл҃га́ѧ ѻ҆́трасле и҆ дх҃одви́жнаѧ: ра́дꙋйсѧ, ꙗ҆́кѡ во и҆гꙋ́мена ѻ҆би́тели высо́цкой и҆́мъ поста́вленный.

Ра́дꙋйсѧ, вельмѝ во вре́меннѣй се́й жи́зни подвиза́выйсѧ и҆ мно́гихъ ко сп҃се́нїю приведы́й: ра́дꙋйсѧ, ꙗ҆́кѡ и҆ по ны́нѣ рꙋково́дствꙋеши ны̀ во ѻ҆те́чество нбⷭ҇ное моли́твами твои́ми.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ г҃

Си́лою вы́шнѧгѡ ᲂу҆правлѧ́емь ᲂу҆чи́тель тво́й, прпⷣбне ѻ҆́тче, со ст҃и́телемъ кѷпрїа́номъ царѧгра́да дости́же и҆ та́мѡ престо́лъ патрїа́ршїѧ сла́вы наслѣ́дова, ѿтꙋ́дꙋ бо ᲂу҆тѣша́хꙋ тѧ̀, подвиза́ѧ пѣ́ти: А҆ллилꙋ́їа.

І҆́косъ г҃

И҆мѣ́ѧ въ и҆́ночестѣмъ житїѝ мꙋ́драгѡ наста́вника бл҃же́ннагѡ а҆ѳана́сїѧ, преꙋспѣва́лъ є҆сѝ прпⷣбне, въ по́двизѣхъ и҆ трꙋдѣ́хъ, восходѧ̀ ѿ си́лы въ си́лꙋ, да соверше́нъ и҆́нокъ ꙗ҆ви́шисѧ и҆ ѻ҆те́цъ бра́тїи чадолюби́вый. Мы́ же, воспѣва́ѧ по́двиги и҆ трꙋды̀ твоѧ̑, взыва́емъ тѝ си́це:

Ра́дꙋйсѧ, всѣ́хъ любе́знѡ въ до́брое и҆ сп҃си́тельное приста́нище наставлѧ́ющїй: ра́дꙋйсѧ, въ мона́шеское ѡ҆ти́шїе, а҆́ки въ нѣ́коемъ кораблѣ̀ безѻпа́сномъ, къ тебѣ̀ приходѧ́щихъ води́телю.

Ра́дꙋйсѧ, собра́нное тобо́ю дꙋхо́вное ста́до бо́дреннымъ ѻ҆́комъ вы́нꙋ назира́ющїй: ра́дꙋйсѧ, твои́хъ ᲂу҆ченикѡ́въ и҆ наслѣ́дникѡвъ непреста́ннѡ на пꙋ́ть бж҃їихъ за́повѣдей наставлѧ́ющїй.

Ра́дꙋйсѧ, не сло́вомъ то́чїю, но мно́жае па́че дѣ́ломъ и҆ ᲂу҆се́рдною къ бг҃ꙋ моли́твою и҆̀хъ поꙋча́ющїй: ра́дꙋйсѧ, твои́хъ кꙋпножи́телей мона́шескими пра́вилы краснѡ̀ и҆ бг҃олѣ́пнѡ ᲂу҆краша́ющїй.

Ра́дꙋйсѧ, за́повѣдей и҆ велѣ́нїй бж҃їихъ ᲂу҆се́рднѣйшїй и҆сполни́телю: ра́дꙋйсѧ, къ чи́стомꙋ и҆ непоро́чномꙋ житїю̀ бл҃гопоспѣ́шный предводи́телю.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ д҃

Бꙋ́рю жите́йскагѡ мо́рѧ воздвиза́емꙋю на лю́ди хрⷭ҇то́вы чл҃вѣкоꙋбі́йцею и҆сконѝ дїа́воломъ наꙋча́лъ є҆сѝ безбѣ́днѡ преходи́ти, глаго́лѧ: сохранѧ́йтесѧ въ ма́ломъ, да не впаде́те въ вели́каѧ, блюди́те помышлє́нїѧ ва́ша немѧтє́жна и҆ бг҃ꙋ по́йте при́снѡ: А҆ллилꙋ́їа.

І҆́косъ д҃

Слы́шаша бли́жнїи и҆ да́льнїи бг҃оꙋго́дное житїѐ твоѐ, а҆ѳана́сїе ѻ҆́тче на́шъ, и҆ къ пото́кꙋ бг҃одꙋхнове́нныхъ слове́съ твои́хъ во мно́жествѣ притека́хꙋ, съ весе́лїемъ зовꙋ́ще тебѣ̀:

Ра́дꙋйсѧ, ѻ҆́тче на́шъ пресла́вный: ра́дꙋйсѧ, па́стырю на́шъ предо́брый.

Ра́дꙋйсѧ, наста́вниче на́шъ, бг҃омъ наꙋче́нный: ра́дꙋйсѧ, добродѣ́тели всѧ́кїѧ пра́вило.

Ра́дꙋйсѧ, разсꙋжде́нїѧ да́ромъ почте́нный: ра́дꙋйсѧ, смире́нїемъ на высотꙋ̀ вознесе́нный.

Ра́дꙋйсѧ, бл҃гочести́вымъ житїе́мъ твои́мъ мно́гїѧ приведы́й ко сп҃се́нїю: ра́дꙋйсѧ, бг҃оꙋго́дными словесы̀ твои́ми къ нб҃сѝ ᲂу҆каза́вый вѣ́рнѣйшїй пꙋ́ть восхожде́нїѧ.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ є҃

Бг҃оте́чное свѣти́ло, пꙋ́ть жи́зни твоеѧ̀ ѡ҆зарѧ́ющее, бы́сть тебѣ̀ ᲂу҆чи́тель тво́й ст҃и́тель царегра́дскїй а҆ѳана́сїй, и҆з̾ страны̀ бо да́льнїѧ со і҆еромона́хомъ ві́кторомъ чꙋ́дныѧ і҆кѡ́ны и҆ и҆ны́ѧ потрє́бныѧ вє́щи ѻ҆би́тели твое́й да́рствꙋетъ, пою́ще всѣ́хъ бл҃ги́хъ пода́телю бг҃ꙋ: А҆ллилꙋ́їа.

І҆́косъ є҃

Ви́дѣша, прпⷣбне ѻ҆́тче на́шъ а҆ѳана́сїе, ди́вный да́ръ наста́вника твоегѡ̀, разꙋмѣ́ша ско́рбь є҆гѡ̀ ве́лїю ѡ҆ ѻ҆те́чествїи свое́мъ. И҆ молѧ́хꙋ ѡ҆ не́мъ гдⷭ҇а, да ᲂу҆тѣ́шитъ є҆гѡ̀ во странѣ̀ чꙋждѣ́й сꙋ́ща. Моли́сѧ и҆ ѡ҆ на́съ, ча́дѣхъ твои́хъ, во ю҆до́ли се́й плаче́внѣй жи́тельствꙋющихъ и҆ къ твоемꙋ̀ предста́тельствꙋ прибѣга́ющихъ и҆ та́кѡ тебѣ̀ вопїю́щихъ:

Ра́дꙋйсѧ, непреста́нными моли́твами се́рдце твоѐ ѡ҆ст҃и́вый: ра́дꙋйсѧ, мы́сль твою̀ въ бз҃ѣ ᲂу҆тверди́вый.

Ра́дꙋйсѧ, ѻ҆чеса̀ твоѧ̑ всегда̀ на нб҃о возводи́вый: ра́дꙋйсѧ, моли́твою твое́ю ѻ҆тца̀ твоегѡ̀ дꙋхо́внагѡ ᲂу҆тѣ́шившїй.

Ра́дꙋйсѧ, ꙗ҆́кѡ ѿ го́рнихъ высѡ́тъ и҆ на́съ, многогрѣ́шныхъ, млⷭ҇тивѡ назира́еши: ра́дꙋйсѧ, въ бѣда́хъ и҆ ѡ҆бстоѧ́нїихъ помо́щниче ско́рый.

Ра́дꙋйсѧ, предста́телю ѡ҆ на́съ пред̾ гдⷭ҇ѣмъ непосты́дный: ра́дꙋйсѧ, къ бцⷣѣ моли́твенниче на́шъ неꙋсы́пный.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ ѕ҃

Проповѣ́дникъ бг҃оно́сный бы́въ, ѻ҆́тче на́шъ а҆ѳана́сїе, и҆́стинномꙋ бг҃овѣ́дѣнїю и҆ бл҃гоче́стїю наꙋча́лъ є҆сѝ бра́тїю твою̀ при́снѡ, па́че же ѻ҆́бразомъ житїѧ̀ своегѡ̀ наставлѧ́ѧ на пꙋ́ть сп҃се́нїѧ, да вопїю́тъ всѝ сп҃си́телю бг҃ꙋ: А҆ллилꙋ́їа.

І҆́косъ ѕ҃

Возсїѧ́лъ є҆сѝ во ѻ҆би́тели высо́цкой въ домꙋ̀ пречⷭ҇тыѧ дв҃ы бцⷣы въ сла́внѣмъ гра́дѣ се́рпꙋховѣ, прпⷣбне, ди́внымъ житїе́мъ твои́мъ, ꙗ҆́коже свѣти́ло многосвѣ́тлое, тмꙋ̀ невѣ́дѣнїѧ и҆ ᲂу҆ны́нїѧ ѿ приходѧ́щихъ къ тебѣ̀ ѿгонѧ́ѧ и҆ всѧ̑ ᲂу҆вѣщава́ѧ пло́ть дꙋ́хови покорѧ́ти и҆ невозвра́тнымъ по́мысломъ хрⷭ҇тꙋ̀ рабо́тати. Сегѡ̀ ра́ди прїимѝ ѿ на́съ похвалы̑ сїѧ̑:

Ра́дꙋйсѧ, милосе́рдїемъ твои́мъ на покаѧ́нїе подвиза́ѧй: ра́дꙋйсѧ, никого́же приходѧ́щагѡ къ тебѣ̀ во́нъ и҆згонѧ́ѧй.

Ра́дꙋйсѧ, го́ресть житїѧ̀ моли́твою ᲂу҆слажда́ти наꙋча́ѧй: ра́дꙋйсѧ, во є҆ди́номъ бз҃ѣ всю̀ сла́дость житїѧ̀ полага́ти вразꙋмлѧ́ѧй.

Ра́дꙋйсѧ, прїѧ́тное бл҃гоꙋха́нїе дꙋхо́внагѡ ᲂу҆миле́нїѧ: ра́дꙋйсѧ, ѻ҆би́тель высо́цкꙋю и҆ гра́дъ се́рпꙋховъ моли́твою твое́ю ѡ҆бл҃гоꙋха́вый.

Ра́дꙋйсѧ, дѣ́лателю бл҃гі́й, въ ма́лѣ вѣ́рный, над̾ мно́гимъ поста́вленный: ра́дꙋйсѧ, въ ра́дость гдⷭ҇а твоегѡ̀ вше́дый.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ з҃

Хотѧ́щꙋ всевы́шнемꙋ мїроправи́телю призва́ти пра́ведника своегѡ̀ въ нбⷭ҇ныѧ ски́нїи по нема́лыхъ лѣ́тѣхъ во и҆гꙋ́менствѣ пребы́вша, на кончи́нꙋ и҆знеможе́нїе ста́рческое и҆ ско́рбь тѣлесѐ прїѧ́лъ є҆сѝ, прпⷣбне, ꙗ҆́коже і҆́ѡвъ ѻ҆́ный не престава́ѧ бл҃гословлѧ́ти гдⷭ҇а и҆ пѣ́ти є҆мꙋ̀: А҆ллилꙋ́їа.

І҆́косъ з҃

Но́во и҆ неѡбыча́йнѡ тече́нїе соверши́лъ є҆сѝ житїѧ̀ твоегѡ̀, ст҃че бж҃їй, въ мі́рѣ се́мъ чꙋ́ждо всѧ́кїѧ сквє́рны грѣхѡ́вныѧ, сегѡ̀ бо ра́ди а҆́ще и҆ ᲂу҆́мерлъ є҆сѝ на землѝ пло́тїю, но дꙋше́ю въ вы́шнѣмъ селе́нїи всегда̀ жи́въ сы́й, на́мъ же, во ст҃ѣ́й ѻ҆би́тели твое́й живꙋ́щимъ, те́плымъ твои́мъ хода́тайствомъ посо́бствꙋеши, вопїю́щымъ къ тебѣ̀ такова̑ѧ:

Ра́дꙋйсѧ, а҆́гг҃лѡвъ подо́бниче и҆ чл҃вѣ́кѡвъ красото̀: ра́дꙋйсѧ, ст҃ости и҆ чистоты̀ крі́не бл҃гоꙋха́нный.

Ра́дꙋйсѧ, терпѣ́нїемъ твои́мъ съ многострада́льнымъ і҆́ѡвомъ сравни́выйсѧ: ра́дꙋйсѧ, болѣ́зньми мно́гими здра́вїе дꙋшѝ стѧжа́вый.

Ра́дꙋйсѧ, жи́телю бжⷭ҇твеннагѡ селе́нїѧ: ра́дꙋйсѧ, дости́гїй вѣ́чнагѡ ᲂу҆покое́нїѧ.

Ра́дꙋйсѧ, всесвѣ́тлагѡ црⷭ҇твїѧ хрⷭ҇то́ва наслѣ́дниче: ра́дꙋйсѧ, і҆ерⷭ҇ли́ма го́рнѧгѡ гра́ждане.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ и҃

Слы́шавши ᲂу҆́бѡ ѡ҆ бл҃же́ннѣй кончи́нѣ твое́й, премлⷭ҇тивый, ѻ҆би́тели твоеѧ̀ бра́тїѧ и҆ мно́гїѧ лю́ди собра́шасѧ на ᲂу҆спе́нїе твоѐ: многотрꙋ́дное тѣ́ло твоѐ достодо́лжнѡ съ чинопѣ́нїемъ чтⷭ҇нѡ провожда́юще, погребо́ша ѻ҆́ное во гро́бѣ, надгро́бное рыда́нїе творѧ́ще пѣ́снь: А҆ллилꙋ́їа.

І҆́косъ и҃

Ве́сь сла́дость и҆ жела́нїе тебѣ̀, пребл҃же́нне, бы́сть хрⷭ҇то́съ і҆и҃съ, є҆гда̀ въ житїѝ се́мъ моли́твꙋ є҆гѡ̀ не престава́лъ є҆сѝ повторѧ́ти: и҆ въ преселе́нїи твое́мъ ѿ земны́хъ въ нбⷭ҇наѧ и҆́стѣе причасти́лсѧ, ѻ҆́тче, сла́дости и҆ жела̑нїѧ въ невече́рнѣмъ днѝ црⷭ҇твїѧ є҆гѡ̀. Ѡ҆ се́мъ вѣ́дꙋще и҆ ѡ҆ таково́мъ бл҃же́нномъ ᲂу҆спе́нїи твое́мъ ра́дꙋющесѧ, сїѧ̑ досто́йныѧ тебѣ̀ прино́симъ глаго́лы:

Ра́дꙋйсѧ, ст҃че бж҃їй, ст҃о и҆ пра́веднѡ жи́знь земнꙋ́ю соверши́вый: ра́дꙋйсѧ, во бл҃гоꙋха́нїи ст҃ы́ни сно́мъ сме́ртнымъ ѡ҆почи́вый.

Ра́дꙋйсѧ, на ло́но а҆враа́ма а҆́гг҃лы несе́нный: ра́дꙋйсѧ, пѣ́нїемъ неземны́мъ ѿ ст҃ы́хъ небожи́телей встре́ченный.

Ра́дꙋйсѧ, ꙗ҆́кѡ па́мѧть твоѧ̀ съ похвала́ми и҆ ᲂу҆спе́нїе со ст҃ы́ми: ра́дꙋйсѧ, ꙗ҆́кѡ ѿверзо́шасѧ тебѣ̀ врата̀ ра́йскаѧ, и҆ вше́лъ є҆сѝ въ ра́дость гдⷭ҇а твоегѡ̀.

Ра́дꙋйсѧ, вѣне́цъ безсме́ртныѧ жи́зни ѿ рꙋкѝ вседержи́телѧ прїе́мый: ра́дꙋйсѧ, въ черто́зѣ нбⷭ҇нагѡ домовлады́ки ликовствꙋ́ѧй.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ ѳ҃

Всѧ̑ бра́тїѧ ᲂу҆дивлѧ́хꙋсѧ ѕѣлѡ̀, є҆гда̀ церко́вныхъ веще́й храни́тель на тѧ̀, прпⷣбне, гнѣ́валсѧ и҆ не хотѣ̀ и҆ на погребе́нїе моще́й твои́хъ и҆дтѝ и҆ сегѡ̀ ра́ди ѿ дрꙋче́нїѧ де́монскагѡ мꙋ́чимь бы́въ, въ ро́въ моги́льный вве́ржесѧ и҆ а҆́бїе и҆сцѣле́нїе полꙋчѝ, поѧ̀ є҆гѡ̀ мꙋче́нїѧ вра́жїѧ свободи́вшемꙋ бг҃ꙋ: А҆ллилꙋ́їа.

І҆́косъ ѳ҃

Вѣті́йствовати ѧ҆зы́къ не довлѣ́етъ воспѣва́ѧ млⷭ҇ть и҆ кро́тость твою̀, є҆гда̀ бра́тꙋ гнѣ́вавшемꙋсѧ на тѧ̀, пребл҃же́нне, проще́нїе ниспосла̀: ᲂу҆жѐ сы́й въ гро́бѣ свое́мъ погребе́нъ и҆з̾ ѻ҆́нагѡ рꙋ́кꙋ свою̀ протѧжѐ, прїе́мше бра́та твоегѡ̀ ре́клъ є҆сѝ є҆мꙋ̀: вско́рѣ и҆́маши ѡ҆ста́вити жи́знь свою̀, бли́з̾ кончи́на твоѧ̀. И҆ въ тре́тїй де́нь по глаго́лꙋ бл҃же́ннагѡ преста́висѧ мона́хъ то́й. Семꙋ̀ ᲂу҆дивлѧ́ющесѧ вопїе́мъ тѝ си́це:

Ра́дꙋйсѧ, разрꙋши́телю вражды̀ и҆ насади́телю братолю́бїѧ: ра́дꙋйсѧ, ꙗ҆́кѡ по ᲂу҆спе́нїи твое́мъ рꙋ́кꙋ ми́ра бра́тꙋ твоемꙋ̀ млⷭ҇тивѡ пода́вый.

Ра́дꙋйсѧ, си́мъ пресла́внымъ видѣ́нїемъ всѣ́хъ ᲂу҆диви́вый: ра́дꙋйсѧ, ꙗ҆́кѡ и҆ по сме́рти твое́й ѻ҆те́цъ чадолюби́вый ꙗ҆влѧ́ешисѧ.

Ра́дꙋйсѧ, щедрѡ́тъ и҆ ми́лованїѧ стрꙋѧ̀ неизсѧка́емаѧ: ра́дꙋйсѧ, любвѐ и҆ сострада́нїѧ ꙗ҆вле́нїе многочꙋде́сное.

Ра́дꙋйсѧ, дꙋше́вныхъ недꙋ́гѡвъ бл҃госе́рдный цѣле́бниче: ра́дꙋйсѧ, тѣле́сныхъ болѣ́зней преди́вный врачꙋ̀.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ і҃

Сп҃се́нїе прине́слъ є҆сѝ, бл҃же́нне, ѻ҆би́тели твое́й и҆ гра́дꙋ се́рпꙋховꙋ и҆ногда̀, є҆гда̀ ѕловѣ́рцы а҆га́рѧне и҆ пѡльскі́ѧ лю́ди разори́ти сі́и ᲂу҆стреми́шасѧ и҆ мно́жество наро́да плѣни́ша и҆ разори́ша и҆ ѻ҆́стрїемъ меча̀ поби́ша. Ди́внѡ въ видѣ́нїи всѣ̑мъ ꙗ҆ви́сѧ, врагѝ ᲂу҆страша́ѧ и҆ прогонѧ́ѧ, и҆ всѧ̑ вѣ́рныѧ подвиза́ѧ пѣ́ти и҆зба́вителю бг҃ꙋ: А҆ллилꙋ́їа.

І҆́косъ і҃

Цр҃ѧ̀ нбⷭ҇нагѡ хрⷭ҇та̀ ꙗ҆ви́лсѧ є҆сѝ ѻ҆́тче гро́зный во́инъ, є҆гда̀ на конѣ̀ бѣ́ломъ и҆з̾ ѻ҆би́тели вы́шедшїй ви́дѣнъ бы́лъ є҆сѝ и҆ въ це́рковь ка́меннꙋ во гра́дѣ стоѧ́щꙋ вше́дый, ꙗ҆́кѡ диви́тисѧ а҆га́рѧнѡмъ ѕѣлѡ̀. Ѿ це́ркви же тоѧ̀, въ рꙋка́хъ же́злъ вели́къ и҆мѣ́ѧ є҆ди́нъ, внеза́пꙋ ѕѣлѡ̀ ско́ро на врагѡ́въ ѻ҆́ныхъ ᲂу҆стреми́сѧ, грозѧ̀ жезло́мъ тѣ́мъ. И҆ бѣжа́ша во́нъ всѧ̀ ѻ҆рда̀, ᲂу҆боѧ́вшисѧ видѣ́нїѧ сегѡ̀: лю́дїе же свобожде́ннїи съ бл҃года́рностїю воспѣ́ша тебѣ̀:

Ра́дꙋйсѧ, гро́зный кара́телю ѻ҆би́дѧщихъ: ра́дꙋйсѧ, ѻ҆би́тели твоеѧ̀ стра́же неꙋсы́пный.

Ра́дꙋйсѧ, жезло́мъ и҆гꙋ́менскимъ всѧ̑ ви̑димыѧ и҆ неви̑димыѧ врагѝ ᲂу҆страши́вый: ра́дꙋйсѧ, же́злъ настоѧ́тельства во ѻ҆би́тели твое́й до ны́нѣ содержа́ѧй.

Ра́дꙋйсѧ, правосла́вномꙋ во́инствꙋ и҆ по преставле́нїи твое́мъ ви́димымъ ѻ҆́бразомъ спобо́рствꙋѧй: ра́дꙋйсѧ, предѣ́лы ѻ҆те́чества на́шегѡ тве́рдымъ щито́мъ твоегѡ̀ покро́ва защища́ѧй.

Ра́дꙋйсѧ, ст҃ы́ѧ ѻ҆би́тели твоеѧ̀ при́сное ѡ҆хране́нїе: ра́дꙋйсѧ, гра́да се́рпꙋхова неѡбори́мое защище́нїе.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ а҃і

Пѣ́нїе трист҃о́е слы́шахꙋ бра́тїѧ не є҆ди́нощи, сла́дкимъ гла́сомъ на гро́бѣ твое́мъ воспѣва́емо, ѻ҆вогда̀ ᲂу҆́бѡ кадѧ́ща гро́бы, ѻ҆вогда̀ со свѣща́ми горѧ́щими ѻ҆би́тель ѡ҆бходѧ́ща тѧ̀ ви́дѣша. Позна́ша ᲂу҆́бѡ при́снѡ ѻ҆би́тели и҆̀хъ попече́нїе возра́довашасѧ и҆ бг҃ꙋ воспѣ́ша: А҆ллилꙋ́їа.

І҆́косъ а҃і

Свѣщы̀ горѧ́щїѧ ви́дѣвше сщ҃еннослꙋжи́тели и҆ мона́хи и҆ и҆́ны лю́ди на гро́бѣ твое́мъ, прпⷣбне, помышлѧ́хꙋ пресла́вное чꙋ́до бы́ти. чрез̾ а҆́гг҃лы бо прославлѧ́етъ гдⷭ҇ь ст҃ы̑ѧ своѧ̑: возжига́ютъ бо ты́ѧ свѣщи̑ церкѡ́вныѧ, вкрꙋ́гъ прⷭ҇то́ла и҆̀хъ ѡ҆бносѧ̀ и҆ къ гро́бꙋ ст҃а́гѡ несꙋ́тъ и҆ взыва́ютъ къ немꙋ̀ такова̑ѧ:

Ра́дꙋйсѧ, нбⷭ҇нагѡ сїѡ́на жи́телю: ра́дꙋйсѧ, нерꙋкотворе́нныхъ ски́нїй ра́йскихъ ѻ҆бита́телю.

Ра́дꙋйсѧ, ди́вный хрⷭ҇то́въ ᲂу҆го́дниче: ра́дꙋйсѧ, бг҃ꙋ при́сный люби́мче.

Ра́дꙋйсѧ, со а҆́гг҃лы при́снѡ ликꙋ́ѧй: ра́дꙋйсѧ, съ прпⷣбными ᲂу҆бл҃жа́емый.

Ра́дꙋйсѧ, ꙗ҆́кѡ тобо́ю вы́шнїй на нб҃сѝ и҆ на землѝ сла́витсѧ: ра́дꙋйсѧ, ꙗ҆́кѡ со а҆́гг҃лы горѣ̀ трист҃ꙋ́ю пѣ́снь є҆мꙋ̀ немо́лчнѡ пое́ши.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ в҃і

Бл҃года́ть вели́кихъ чꙋде́съ ѿ гдⷭ҇а прїѧ́лъ є҆сѝ, прпⷣбне ѻ҆́тче на́шъ а҆ѳана́сїе, и҆ по достоѧ́нїю чꙋдотво́рецъ нарече́нъ бы́лъ є҆сѝ: и҆́бо не то́кмо при жи́зни, но и҆ по сме́рти, вели́чїемъ твои́хъ чꙋде́съ всѣ́хъ ᲂу҆дивлѧ́еши, и҆ ко славосло́вїю про́мысла бж҃їѧ подвиза́еши, во є҆́же пѣ́ти ѡ҆ тебѣ̀ чꙋде́съ творцꙋ̀ бг҃ꙋ: А҆ллилꙋ́їа.

І҆́косъ в҃і

Пою́ще ра́достнꙋю пѣ́снь хвалы̀ и҆ бл҃годарє́нїѧ чл҃вѣколю́бцꙋ бг҃ꙋ, просла́вльшемꙋ тѧ̀ во гра́дѣ се́рпꙋховѣ во ѻ҆би́тели высо́цкой чꙋдотво́рца ди́внагѡ и҆ млⷭ҇тивагѡ, мо́лимъ тѧ̀, ѻ҆́тче на́шъ а҆ѳана́сїе: бꙋ́ди хода́тай къ немꙋ̀ и҆ моли́твенникъ при́сный ѡ҆ на́съ, ча́дѣхъ твои́хъ во ѻ҆би́тели твое́й жи́тельствꙋющихъ и҆ зовꙋ́щихъ тѝ такова̑ѧ:

Ра́дꙋйсѧ, прест҃ы́ѧ трⷪ҇цы вѣ́рный слꙋжи́телю: ра́дꙋйсѧ, прест҃ы́ѧ бцⷣы досто́йный предстоѧ́телю.

Ра́дꙋйсѧ, несомнѣ́нною наде́ждою на бг҃а ѻ҆би́тель твою̀ созида́вый: ра́дꙋйсѧ, слеза́ми моли́твенными ѡ҆снова́нїе є҆ѧ̀ ѡ҆роси́вый.

Ра́дꙋйсѧ, ѻ҆би́тель твою̀ и҆ по сконча́нїи твое́мъ сохрани́вый: ра́дꙋйсѧ, ча̑да твоѧ̑ дꙋхѡ́внаѧ и҆ по сме́рти твое́й не забы́вый.

Ра́дꙋйсѧ, приходѧ́щихъ во ѻ҆би́тель твою̀ на поклоне́нїе бл҃гі́й предста́телю: ра́дꙋйсѧ, почита́ющихъ ст҃ꙋ́ю па́мѧть твою̀ нбⷭ҇ный покрови́телю.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ г҃і

Ѽ преди́вный ᲂу҆го́дниче хрⷭ҇то́въ, прпⷣбне ѻ҆́тче на́шъ а҆ѳана́сїе. Ма́лое сїѐ моле́нїе прїимѝ ѿ на́съ, недосто́йныхъ ча́дъ твои́хъ, ѿ любвѐ тебѣ̀ на́ми приноси́мое: моли́сѧ ѡ҆ на́съ ко всетво́рцꙋ бг҃ꙋ, да ᲂу҆тверди́тъ на́съ на терни́стомъ пꙋтѝ мона́шескагѡ дѣ́ланїѧ и҆ сподо́битъ съ тобо́ю вкꙋ́пѣ во ѻ҆би́телѣхъ нбⷭ҇ныхъ воспѣва́ти є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ и҆ всеѧ̀ тва́ри созда́тель, ꙗ҆ви́вый цр҃кви ст҃ѣ́й всесвѣ́тлагѡ свѣти́льника, ѿ гра́да ꙗ҆росла́влѧ призва́вый тѧ̀, прпⷣбне ѻ҆́тче на́шъ а҆ѳана́сїе, въ предѣ́лы гра́да се́рпꙋхова во ѻ҆би́тель пречⷭ҇тыѧ дв҃ы и҆́же на высо́комъ приведѐ тѧ̀. Мы́ же, ви́дѧ соверше́нїе бл҃гі́ѧ во́ли гдⷭ҇ни на тебѣ̀, съ любо́вїю вопїе́мъ тѝ си́це:

Ра́дꙋйсѧ, гра́да ꙗ҆росла́влѧ пресла́вное прозѧбе́нїе: ра́дꙋйсѧ, прⷪ҇ро́ка дре́внѧгѡ а҆мѡ́са и҆́мѧ полꙋчи́вый при кр҃ще́нїи.

Ра́дꙋйсѧ, ꙗ҆́кѡ и҆з̾ дѣ́тска ᲂу҆́мъ и҆ дꙋ́шꙋ твою̀ гдⷭ҇еви преда́вый: ра́дꙋйсѧ, любвѐ ра́ди ко гдⷭ҇ꙋ до́мъ ѻ҆те́ческїй ѡ҆ста́вивый.

Ра́дꙋйсѧ, во ѻ҆би́тель высо́цкꙋю прише́дый и҆ та́мѡ поко́й дꙋшѣ̀ свое́й ѡ҆брѣты́й: ра́дꙋйсѧ, ѿ ю҆́ности твоеѧ̀ ꙗ҆ре́мъ хрⷭ҇то́въ на сѧ̀ воспрїѧ́вый.

Ра́дꙋйсѧ, бг҃омꙋ́дрымъ ᲂу҆чи́телемъ твои́мъ а҆ѳана́сїемъ въ мона́шестѣмъ дѣ́ланїи ᲂу҆мꙋдре́нный: ра́дꙋйсѧ, ѻ҆́бразъ и҆́ноческагѡ добродѣ́ланїѧ чрез̾ всѐ житїѐ твоѐ пронесы́й.

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Конда́къ а҃

И҆збра́нномꙋ бг҃омъ во и҆гꙋ́мена ѻ҆би́тели высо́цкїѧ и҆ ди́вномꙋ въ прпⷣбныхъ ѻ҆тцꙋ̀ на́шемꙋ а҆ѳана́сїю соста́вимъ похвалꙋ̀. То́й бо, ꙗ҆́кѡ ѻ҆те́цъ чадолюби́вый, мо́литъ за ны̀ просла́вльшагѡ є҆го̀ гдⷭ҇а да сохрани́тъ ѻ҆би́тель сїю̀ ѿ нестрое́нїй и҆ навѣ́тѡвъ ѕлы́хъ чл҃вѣ̑къ и҆ на́съ всѣ́хъ соблюде́тъ въ ми́рѣ и҆ є҆диномы́слїи и҆ любвѝ: мы́ же любо́вїю сыно́внѣй къ немꙋ̀ преиспо́лненнїи, со ᲂу҆миле́нїемъ бл҃года́рственнѡ зове́мъ ди́вномꙋ ᲂу҆го́дникꙋ хрⷭ҇то́вꙋ:

Ра́дꙋйсѧ, прпⷣбне ѻ҆́тче на́шъ а҆ѳана́сїе, высо́цкїй чꙋдотво́рче.

Моли́твы

Ѽ прпⷣбне и҆ бг҃оно́сне ѻ҆́тче на́шъ а҆ѳана́сїе! Ты̀, порабо́тати гдⷭ҇еви жела́ѧ, здѣ̀ всели́лсѧ є҆сѝ, и҆ нелѣ́ностнѡ во трꙋдѣ́хъ, во бдѣ́нїихъ, въ мл҃твахъ и҆ постѣ́хъ подвиза́лсѧ є҆сѝ, и҆ бы́лъ є҆сѝ наста́вникъ мона́шествꙋющымъ, всѣ̑мъ же лю́дємъ ᲂу҆чи́тель ре́вностный. Ны́нѣ ᲂу҆́бѡ, по ѿше́ствїи твое́мъ ѿ земны́хъ, нбⷭ҇номꙋ цр҃ю̀ предстоѧ̀, молѝ бл҃гость є҆гѡ̀, є҆́же ᲂу҆ще́дрити мѣ́сто селе́нїѧ твоегѡ̀, ст҃ꙋ́ю ѻ҆би́тель сїю̀, и҆дѣ́же дꙋ́хомъ любвѐ твоеѧ̀ неѿстꙋ́пнѡ пребыва́еши, и҆ всѣ̑мъ лю́дємъ твои́мъ, съ вѣ́рою къ ра́цѣ твое́й припа́дающимъ, во бл҃га̑ѧ прошє́нїѧ и҆̀хъ и҆спо́лнити. И҆спросѝ ᲂу҆ млⷭ҇тивагѡ гдⷭ҇а на́шегѡ, да низпо́слетъ на́мъ ѻ҆би́лїе бл҃гъ земны́хъ, па́че же ꙗ҆́же на по́льзꙋ дꙋ́шъ на́шихъ да да́рꙋетъ на́мъ, и҆ сконча́ти житїѐ сїѐ привре́менное въ покаѧ́нїи да сподо́битъ, въ де́нь же сꙋ́дный десна́гѡ предстоѧ́нїѧ и҆ наслажде́нїѧ во црⷭ҇твїи свое́мъ да ᲂу҆досто́итъ во вѣ́ки вѣкѡ́въ. А҆ми́нь.

Ѽ чꙋдотво́рче пресла́вный и҆ застꙋ́пниче крѣ́пкїй бг҃омъ собра́ннѣй дрꙋжи́нѣ се́й! Къ тебѣ̀, ꙗ҆́кѡ ско́ромꙋ и҆ и҆збра́нномꙋ сп҃се́нїѧ на́шегѡ хода́таю, бг҃оизбра́нномꙋ дꙋхо́вныхъ во́инствъ воево́дѣ, ѻ҆рꙋ́жїемъ моли́твы твоеѧ̀ побѣди́телемъ над̾ врагѝ ꙗ҆́вльшꙋсѧ, пред̾ ра́кою ст҃ы́хъ моще́й твои́хъ припа́дающе, прпⷣбне ѻ҆́тче на́шъ а҆ѳана́сїе, вседꙋ́шнѡ прибѣга́емъ: не ѿврати́сѧ на́шеѧ нищеты̀, моле́нїю на́шемꙋ внемлѝ, и҆ ѿ бѣ́дъ на́съ, ст҃ꙋ́ю ѻ҆би́тель сїю̀, гра́дъ се́й и҆ предѣ́лы є҆гѡ̀ сохранѝ. Прострѝ рꙋкꙋ̀ твою̀, ско́рꙋю по́мощь подаю́щꙋю. ᲂу҆пра́ви ᲂу҆́мъ на́шъ ѿ пагꙋбоно́сныхъ разсѣ́ѧнїй, и҆ сердца̀ на̑ша ѡ҆сквернє́ннаѧ ѡ҆чи́сти, ѡ҆ст҃ѝ и҆ горѣ̀ и҆мѣ́ти ᲂу҆твердѝ. Ѿ вра̑гъ ви́димыхъ и҆ неви́димыхъ на́съ сохранѝ, да над̾ страстьмѝ побѣди́тели ꙗ҆́вимсѧ, творѧ́ще ст҃ы́ню во стра́сѣ гдⷭ҇ни, и҆ всѧ́кое ᲂу҆ны́нїе попра́вше, ра́доватисѧ ѡ҆ гдⷭ҇ѣ начне́мъ: и҆ та́кѡ твои́ми хода́тайствы, во смире́нїи и҆ простотѣ̀ се́рдца сподо́бимсѧ до послѣ́днѧгѡ и҆здыха́нїѧ бг҃олѣ́пнѡ сла́вити ст҃ꙋ́ю трⷪ҇цꙋ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ, и҆ при́снѡ, и҆ во вѣ́ки вѣкѡ́въ. А҆ми́нь.