Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ првⷣномꙋ сѷмеѡ́нꙋ, верхотꙋ́рскомꙋ чꙋдотво́рцꙋ.

Прав. Симеона Верхотурского (перен. мощ.) (1704) 25 сентября 2026

Конда́къ а҃

И҆збра́нномꙋ и҆ ди́вномꙋ но́вомꙋ сиби́рскїѧ страны̀ чꙋдотво́рцꙋ всера́достнѡ ны́нѣ прино́симъ тѝ, свѧ́те сѷмеѡ́не, хвалє́бнаѧ пѣ̑нїѧ: ты́ же, ꙗ҆́кѡ и҆мѣ́ѧй дерзнове́нїе ко хрⷭ҇тꙋ̀ бг҃ꙋ, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, сѷмеѡ́не, чꙋдотво́рче преди́вный.

І҆́косъ а҃

А҆́гг҃лъ во пло́ти и҆ нбⷭ҇ный человѣ́къ ꙗ҆ви́лсѧ є҆сѝ, бл҃же́нный сѷмеѡ́не, а҆́гг҃льски бо въ мі́рѣ се́мъ пожи́лъ є҆сѝ, тѣ́мже и҆ а҆́гг҃льстїи чи́ни ᲂу҆диви́шасѧ непоро́чности твоегѡ̀ житїѧ̀ и҆, по преставле́нїи твое́мъ, съ весе́лїемъ прїѧ́та првⷣнꙋю твою̀ дꙋ́шꙋ: сегѡ̀ ра́ди и҆ мы̀, чꙋдѧ́щесѧ высотѣ̀ твоеѧ̀ добродѣ́тели, прославлѧ́емъ тѧ̀ си́це:

Ра́дꙋйсѧ, ꙗ҆́кѡ ст҃ѡ и҆ бг҃оꙋго́днѡ на землѝ пожи́лъ є҆сѝ: ра́дꙋйсѧ, ꙗ҆́кѡ по́двигомъ до́брымъ здѣ̀ подвиза́всѧ, тече́нїе своѐ првⷣнѡ сконча́лъ є҆сѝ.

Ра́дꙋйсѧ, ꙗ҆́кѡ ны́нѣ пресели́лсѧ є҆сѝ въ покѡ́ища нбⷭ҇наѧ: ра́дꙋйсѧ, ꙗ҆́кѡ въ ѡ҆би́телехъ премі́рныхъ, ꙗ҆́же ᲂу҆гото́ва бг҃ъ лю́бѧщымъ є҆гѡ̀, на несконча́ємыѧ вѣ́ки водворѧ́ешисѧ.

Ра́дꙋйсѧ, ꙗ҆́кѡ цр҃ь ца́рствꙋющихъ прїѧ́тъ тѧ̀ въ нбⷭ҇ное црⷭ҇твїе: ра́дꙋйсѧ, ꙗ҆́кѡ при́снѡ со а҆́гг҃лы въ нб҃сѝ ѡ҆бита́еши.

Ра́дꙋйсѧ, ꙗ҆́кѡ съ прⷪ҇ро́ки и҆ а҆пⷭ҇лы вселѧ́ешисѧ: ра́дꙋйсѧ, ꙗ҆́кѡ съ по́стники и҆ прпⷣбными торжествова́ти сподо́билсѧ є҆сѝ.

Ра́дꙋйсѧ, ꙗ҆́кѡ предстои́ши ны́нѣ со всѣ́ми ст҃ы́ми прⷭ҇то́лꙋ бж҃їю: ра́дꙋйсѧ, ꙗ҆́кѡ прест҃ꙋ́ю трⷪ҇цꙋ несре́дственнѣ зрѣ́ти сподоблѧ́ешисѧ.

Ра́дꙋйсѧ, ꙗ҆́кѡ неизрече́ннꙋю сла́вꙋ гдⷭ҇ню ꙗ҆́вственнѣ созерца́еши: ра́дꙋйсѧ, ꙗ҆́кѡ тоѧ̀ прича́стника бы́ти ᲂу҆досто́и тѧ̀ гдⷭ҇ь.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ в҃

Ви́дѧ вдови́цꙋ ѕѣлѡ̀ пла́чꙋщꙋю, ꙗ҆́кѡже бо тогда̀ ᲂу҆милосе́рдивсѧ, и҆ и҆знемо́гшꙋ тѣ́ломъ и҆ бы́вшꙋ бли́з̾ коне́чнагѡ и҆здыха́нїѧ и҆ ѻ҆чи́ма нима́лѡ зрѣ́ти могꙋ́щꙋ, ꙗ҆ви́всѧ и҆сцѣли́лъ є҆сѝ, си́це и҆ ѡ҆ мнѣ̀ ᲂу҆милосе́рдисѧ, ᲂу҆го́дниче бж҃їй, и҆ ѿ мно́гихъ грѣхопаде́нїй немощствꙋ́ющее тѣ́ло моѐ и҆сцѣлѝ и҆ дꙋ́шꙋ мою̀ ко сп҃се́нїю наста́ви, да въ ра́дости воззовꙋ̀ къ бг҃ꙋ пѣ́снь: А҆ллилꙋ́їа.

І҆́косъ в҃

Разꙋмѣ́ти хотѧ́щꙋ а҆рхїере́ю сиби́рскїѧ страны̀ и҆́мѧ твоѐ, є҆гда̀ ѡ҆брѣ́тєны бы́ша ст҃ы̑ѧ твоѧ̑ мо́щи, ты̀ въ видѣ́нїи ꙗ҆́вльсѧ є҆мꙋ̀, ѡ҆ и҆́мени свое́мъ возвѣсти́лъ є҆сѝ: ѻ҆́нъ же, ᲂу҆диви́всѧ чꙋдесѝ и҆ просла́вивъ бг҃а, и҆ похва̑льныѧ глаго́лы вѣща́ѧ, вопїѧ́ше тебѣ̀ си́це:

Ра́дꙋйсѧ, вели́кїй првⷣниче бж҃їй, въ чꙋдесѣ́хъ просїѧ́вый: ра́дꙋйсѧ, цѣле́бниче недꙋ́гѡвъ всѣ̑мъ, призыва́ющымъ тѧ̀ съ вѣ́рою.

Ра́дꙋйсѧ, ꙗ҆́кѡ и҆ пре́жде проше́нїѧ по́мощїю предварѧ́еши: ра́дꙋйсѧ, ꙗ҆́кѡ и҆ недоꙋмева́ющыхъ ѡ҆ прославле́нїи нетлѣ́нныхъ моще́й твои́хъ чꙋдесы̀ твои́ми вразꙋми́лъ є҆сѝ.

Ра́дꙋйсѧ, ꙗ҆́кѡ разсла́бленныхъ ᲂу҆крѣпи́лъ є҆сѝ: ра́дꙋйсѧ, ꙗ҆́кѡ слѣпы̑мъ прозрѣ́нїе дарова́лъ є҆сѝ.

Ра́дꙋйсѧ, хрѡмы́мъ хожде́нїе ᲂу҆строѧ́ѧй: ра́дꙋйсѧ, ѿ бѣснꙋ́ющихсѧ бѣсѡ́въ ѿгна́телю.

Ра́дꙋйсѧ, ско́рбныхъ ᲂу҆тѣ́шителю: ра́дꙋйсѧ, ни́щихъ и҆ ᲂу҆бо́гихъ покрови́телю.

Ра́дꙋйсѧ, правосла́вныхъ ᲂу҆твержде́нїе: ра́дꙋйсѧ, є҆ресе́й посрамле́нїе.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ г҃

Си́ла вы́шнѧгѡ ᲂу҆твердѝ тѧ̀ въ житїѝ твое́мъ ст҃о́мъ: и҆ ты̀ подвиза́лсѧ є҆сѝ ѡ҆ сп҃се́нїи дꙋшѝ твоеѧ̀, трꙋда́ми бо и҆ воздержа́нїемъ ᲂу҆вѧди́лъ є҆сѝ плѡтскі́ѧ стра̑сти и҆ въ непреста́нныхъ мл҃твахъ твои́хъ всегда̀ взыва́лъ є҆сѝ къ бг҃ꙋ: А҆ллилꙋ́їа.

І҆́косъ г҃

И҆мѣ́ѧй милосе́рдїе мно́гое, ѡ҆ призыва́ющихъ тѧ̀ съ вѣ́рою при́снѡ мо́лишисѧ къ бг҃ꙋ, ᲂу҆ негѡ́же равноа́гг҃льнымъ житїе́мъ твои́мъ вели́кое дерзнове́нїе стѧжа́лъ є҆сѝ: не пре́зри и҆ на́съ недосто́йныхъ, тре́бꙋющихъ твоеѧ̀ по́мощи, и҆ ꙗ҆́кѡ да́ры, прїимѝ ѿ на́съ пѣ́снь сїю̀:

Ра́дꙋйсѧ, ꙗ҆́кѡ всѧ̑, є҆ли̑ка про́сиши ѿ бг҃а, да́рꙋетъ тѝ гдⷭ҇ь: ра́дꙋйсѧ, ꙗ҆́кѡ мл҃твы твоѝ ѡ҆ на́съ, ꙗ҆́кѡже кади́ло бл҃гово́нное, ѿ бг҃а прїе́млютсѧ.

Ра́дꙋйсѧ, ꙗ҆́кѡ возжада̀ дꙋша̀ твоѧ̀ къ бг҃ꙋ крѣ́пкомꙋ: ра́дꙋйсѧ, хрⷭ҇та̀ є҆ди́наго возлюби́вый.

Ра́дꙋйсѧ, ꙗ҆́кѡ невозвра́тнымъ жела́нїемъ послѣ́довалъ є҆сѝ є҆мꙋ̀: ра́дꙋйсѧ, добродѣ́тельное житїѐ всегда̀ и҆мѣ́вый.

Ра́дꙋйсѧ, возненави́дѣвый стра̑сти мі́ра сегѡ̀: ра́дꙋйсѧ, маловре́меннагѡ ᲂу҆тѣше́нїѧ на землѝ не и҆ска́вый.

Ра́дꙋйсѧ, смиренномꙋ́дрїемъ ᲂу҆краси́выйсѧ: ра́дꙋйсѧ, тве́рдый а҆дама́нте и҆ сто́лпе непоколеби́мый прило́ги вра́жїими.

Ра́дꙋйсѧ, ꙗ҆́кѡ нетлѣ́нїемъ тѣ́ло твоѐ просла́ви гдⷭ҇ь: ра́дꙋйсѧ, ꙗ҆́кѡ ѿ гро́ба твоегѡ̀ и҆ пе́рсть прїе́млющїи и҆сцѣлѧ́ютсѧ.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ д҃

Бꙋ́рѧ недоꙋмѣ́нїѧ смꙋща́етъ мѧ̀, ка́кѡ возмогꙋ̀ досто́йнѡ воспѣ́ти чꙋдеса̀ твоѧ̑, бл҃же́нне сѷмеѡ́не, кто́ бо мно́гихъ чꙋдотворе́нїй твои́хъ да̑ры по досто́инствꙋ и҆зрещѝ мо́жетъ; ѻ҆ба́че и҆ а҆́зъ ди́внѡ въ тебѣ̀ прославлѧ́ющемꙋсѧ бг҃ꙋ вопи́ти дерза́ю: А҆ллилꙋ́їа.

І҆́косъ д҃

Слы́шавше, бл҃же́нне и҆ преди́вне сѷмеѡ́не, ѡ҆ вели́чїи чꙋде́съ твои́хъ, ꙗ҆́кѡ мл҃твами твои́ми сꙋ́щихъ въ бѣда́хъ и҆ ско́рбехъ предварѧ́еши, ско́ро ѿ ни́хъ и҆збавлѧ́ѧ, вопїе́мъ тебѣ̀ такѡва́ѧ:

Ра́дꙋйсѧ, и҆збавле́нїе на́ше ѿ печа́лей и҆ скорбе́й: ра́дꙋйсѧ, ꙗ҆́кѡ твои́мъ предста́тельствомъ да́рꙋетсѧ дꙋхо́внаѧ бл҃года́ть всѣ̑мъ, съ те́плою вѣ́рою къ тебѣ̀ притека́ющымъ.

Ра́дꙋйсѧ, ꙗ҆́кѡ твои́ми мл҃твами ко́зни нечи́стыхъ дꙋхѡ́въ побѣжде́ны: ра́дꙋйсѧ, ꙗ҆́кѡ и҆ невѣ́дꙋщымъ и҆ неслы́шавшымъ ѡ҆ прославле́нїи твое́мъ и҆сцѣле́нїе подае́ши.

Ра́дꙋйсѧ, ꙗ҆́кѡ цѣлє́бныѧ да́ры всю́дꙋ то́чиши: ра́дꙋйсѧ, ꙗ҆́кѡ странꙋ̀ сиби́рскꙋю при́снѡ присѣща́еши.

Ра́дꙋйсѧ, ско́рый ѡ҆би́димыхъ застꙋ́пниче: ра́дꙋйсѧ, сꙋ́щымъ въ лю́тыхъ ѡ҆бстоѧ́нїихъ посо́бниче и҆ предста́телю.

Ра́дꙋйсѧ, малодꙋ́шныѧ ᲂу҆тѣша́ѧй: ра́дꙋйсѧ, недꙋ́жнымъ крѣ́пкое и҆справле́нїе.

Ра́дꙋйсѧ, плѣнє́ннымъ ско́рое свобожде́нїе: ра́дꙋйсѧ, грѣ́шнымъ ко сп҃се́нїю наставле́нїе.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ є҃

Пресвѣ́тлаѧ ѕвѣзда̀ ꙗ҆ви́лсѧ є҆сѝ, првⷣный сѷмеѡ́не: сꙋ́щихъ бо во тьмѣ̀ ᲂу҆́мныѧ ѻ҆́чи ѡ҆зарѧ́ѧ свѣ́томъ є҆ѵⷢ҇лїа хрⷭ҇то́ва и҆ и҆збавлѧ́ѧ заблꙋ́ждшихъ ѿ сѣте́й ѕмі́евыхъ и҆ ѿ всѣ́хъ кова́рствъ є҆гѡ̀, наꙋчи́лъ є҆сѝ ѧ҆̀ бл҃года́рственнѡ и҆ всера́достнѡ съ ли́ки ст҃ы́хъ ко хрⷭ҇тꙋ̀ бг҃ꙋ вопи́ти: А҆ллилꙋ́їа.

І҆́косъ є҃

Ви́дѣвше въ житїѝ твое́мъ, блаже́нне, дꙋхо́вныхъ по́двигѡвъ твои́хъ высѡ́каѧ и҆справлє́нїѧ, всѧ́кїй ра́зꙋмъ ᲂу҆дивлѧ̑ющаѧ, прославлѧ́емъ да́вшагѡ тѝ таковꙋ́ю блгⷣть бг҃а, тебѣ̀ же хвале́бными гла́сы си́це вопїе́мъ:

Ра́дꙋйсѧ, ꙗ҆́кѡ ю҆ро́дъ бы́въ хрⷭ҇та̀ ра́ди, высотꙋ̀ смиренномꙋ́дрїѧ стѧжа́лъ є҆сѝ: ра́дꙋйсѧ, ꙗ҆́кѡ стра́нникъ и҆ пришле́цъ на землѝ ѡ҆брѣ́лсѧ є҆сѝ.

Ра́дꙋйсѧ, ꙗ҆́кѡ ны́нѣ граждани́номъ нбⷭ҇нымъ бы́ти на несконча́ємыѧ вѣ́ки сподо́билсѧ є҆сѝ: ра́дꙋйсѧ, ꙗ҆́кѡ неѕло́бивый а҆́гнєцъ въ терпѣ́нїи твое́мъ бы́лъ є҆сѝ.

Ра́дꙋйсѧ, ꙗ҆́кѡ кро́тостїю ко ѡ҆ѕлоблѧ́ющымъ тѧ̀ зе́млю живы́хъ наслѣ́довалъ є҆сѝ: ра́дꙋйсѧ, чи́стыми дꙋ́шꙋ и҆ тѣ́ло твоѐ сохрани́вый, и҆ ны́нѣ чи́стымъ се́рдцемъ зрѧ́й бг҃а.

Ра́дꙋйсѧ, ꙗ҆́кѡ мꙋ́дрою мы́слїю ᲂу҆тверди́вый дꙋ́шꙋ твою̀ во сп҃се́нїе: ра́дꙋйсѧ, ꙗ҆́кѡ съ невозвра́тною наде́ждою бла̑гъ вѣ́чныхъ преста́вилсѧ є҆сѝ къ бг҃ꙋ.

Ра́дꙋйсѧ, ꙗ҆́кѡ десна́гѡ стоѧ́нїѧ со и҆збра́нными ᲂу҆досто́илсѧ є҆сѝ: ра́дꙋйсѧ, ꙗ҆́кѡ не скры́лъ є҆сѝ тала́нта, ввѣ́реннагѡ тѝ бг҃омъ.

Ра́дꙋйсѧ, благі́й ра́бе и҆ вѣ́рный, вше́дый въ ра́дость гдⷭ҇а своегѡ̀: ра́дꙋйсѧ, ꙗ҆́кѡ ны́нѣ ᲂу҆тѣша́ешисѧ, ꙗ҆́кѡже дре́внїй ѻ҆́ный є҆ѵⷢ҇льскїй ла́зарь, на ло́нѣ а҆враа́мли.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ ѕ҃

Проповѣ́дника бг҃оно́снаго па́ѵла вѣща́нїе и҆ глаго́лы и҆сполнѧ́ѧ, сѷмеѡ́не свѧ́те, ю҆ро́дственное хрⷭ҇та̀ ра́ди на землѝ пожи́лъ є҆сѝ житїѐ, и҆ болѣ̑зни мнѡ́гїѧ претерпѣва́ѧ, всегда̀ бл҃года́рствєнныѧ бг҃ꙋ возсыла́лъ є҆сѝ хвалы̑, си́це глаго́лѧ є҆мꙋ̀: А҆ллилꙋ́їа.

І҆́косъ ѕ҃

Возсїѧ́лъ є҆сѝ ве́лїе просвѣще́нїе свѣ́тлостїю чꙋде́съ твои́хъ, првⷣный сѷмеѡ́не, ѿ ст҃а́гѡ гро́ба твоегѡ̀ непреста́ннѡ и҆стека́ющихъ, и҆ тѣ́мъ дале́че ѿгна́лъ є҆сѝ тьмꙋ̀ є҆ресе́й и҆ раско́лѡвъ ѿ ѡ҆кре́стныхъ мѣ́стъ, и҆дѣ́же въ правовѣ́рїи и҆ бл҃гоче́стїи подвиза́лсѧ є҆сѝ и҆ въ нетлѣ́нїи тѣлесѝ почі́еши: мы́ же, чꙋдѧ́щесѧ си̑мъ, взыва́емъ тѝ си́це:

Ра́дꙋйсѧ, ꙗ҆́кѡ ꙗ҆ви́лсѧ є҆сѝ во странѣ̀ сїби́рстѣй крѣ́пкїй защи́тникъ правосла́вїѧ проти́вꙋ развра́тникѡвъ и҆ хꙋ́льникѡвъ хрⷭ҇то́вы цр҃кве: ра́дꙋйсѧ, ꙗ҆́кѡ и҆ ны́нѣ борю́щымсѧ съ ни́ми ᲂу҆се́рдный посо́бникъ ѡ҆брѣта́ешисѧ.

Ра́дꙋйсѧ, проти́вникѡвъ ст҃ы́ѧ цр҃кви посрами́телю: ра́дꙋйсѧ, ѕлы́хъ волкѡ́въ ѿ ста́да хрⷭ҇то́ва ѿгна́телю.

Ра́дꙋйсѧ, ѡ҆блекі́йсѧ во ѡ҆рꙋ́жїе свѣ́та: ра́дꙋйсѧ, лꙋка́вствꙋющихъ ѡ҆бличи́телю.

Ра́дꙋйсѧ, правосла́вныхъ ти́хое приста́нище: ра́дꙋйсѧ, пꙋтеше́ствꙋющихъ благо́е поспѣше́нїе.

Ра́дꙋйсѧ, ꙗ҆́кѡ и҆ ѿ мнѡ́гїѧ скꙋ́дости твоеѧ̀ разꙋмѣва́лъ є҆сѝ на ни́ща и҆ ᲂу҆бо́га: ра́дꙋйсѧ, ꙗ҆́кѡ ми́лостивъ бы́въ при жи́зни, бл҃готвори́ши всѣ̑мъ тре́бꙋющымъ и҆ по сме́рти.

Ра́дꙋйсѧ, ꙗ҆́кѡ и҆збра́лъ є҆сѝ дѡ́браѧ, є҆́же бг҃а ра́ди трꙋжда́тисѧ: ра́дꙋйсѧ, ꙗ҆́кѡ на тебѣ̀ и҆спо́лнисѧ сло́во подви́жническое: болѣ́зненнѡ, є҆́же трꙋжда́тисѧ, но блаже́ннѡ воспрїѧ́тїе.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ з҃

Хотѧ́щꙋ нѣ́коемꙋ человѣ́кꙋ ѿ мно́гихъ врачє́въ и҆сцѣли́тисѧ ѿ ѻ҆́чныѧ болѣ́зни, и҆ є҆гда̀ ничто́же ᲂу҆спѣ̀, прибѣ́гшꙋ къ тебѣ̀, врачꙋ̀ безме́здномꙋ, ты̀ ѻ҆́чи є҆гѡ̀, напо́лнєны кро́вїю и҆ зрѣ́ти немогꙋ̑щаѧ, пе́рстїю внеза́пꙋ и҆сцѣли́лъ є҆сѝ: ѻ҆́нъ же возра́довавсѧ, бл҃годарѧ́ше тѧ̀ и҆, бг҃а прославлѧ́ѧ, речѐ: А҆ллилꙋ́їа.

І҆́косъ з҃

Ди́вна тѧ̀ показа̀ на́мъ творе́цъ и҆ гдⷭ҇ь всѣ́хъ чꙋдотво́рца: є҆гда́ бо нетлѣ́нїемъ просла́ви тѣ́ло твоѐ, тогда̀ и҆ землѧ̀ не скры̀ гро́бъ тво́й и҆ ꙗ҆вѝ всѣ̑мъ на́мъ, ꙗ҆́кѡ многоце́нное сокро́вище: тѣ́мже и҆ мы̀ чꙋдѧ́щесѧ вопїе́мъ си́це:

Ра́дꙋйсѧ, цвѣ́те нетлѣ́нный, въ странѣ̀ сїби́рстѣй прекра́снѡ процвѣты́й: ра́дꙋйсѧ, до́блїй подви́жниче бл҃гоче́стїѧ, во гра́дѣ верхотꙋ́рстѣмъ возсїѧ́вый.

Ра́дꙋйсѧ, ꙗ҆́кѡ ꙗ҆влѧ́ешисѧ а҆́ки дре́во живо́тное, ѿ негѡ́же недꙋ́гꙋющїи полꙋча́ютъ и҆сцѣле́нїе: ра́дꙋйсѧ, ꙗ҆́кѡ предста́тельствомъ твои́мъ пред̾ бг҃омъ, а҆́ки вѣ́твь бл҃госѣнноли́ственнаѧ, покрыва́еши на́съ.

Ра́дꙋйсѧ, ꙗ҆́кѡ до́брѣ вкорени́лсѧ є҆сѝ въ вертогра́дѣ хрⷭ҇то́вы цр҃кве: ра́дꙋйсѧ, ꙗ҆́кѡ ѡ҆би̑льныѧ плоды̑ добродѣ́телей прине́слъ є҆сѝ бг҃ꙋ.

Ра́дꙋйсѧ, ꙗ҆́кѡ пїе́ши ны́нѣ во́дꙋ живо́тнꙋю ѿ неисчерпа́емагѡ и҆сто́чника безсме́ртїѧ: ра́дꙋйсѧ, заблꙋ́ждшихъ наста́вниче:

Ра́дꙋйсѧ, ꙗ҆́кѡ ка́ющымсѧ въ согрѣше́нїѧхъ и҆спроша́еши ѿ бг҃а проще́нїе: ра́дꙋйсѧ, и҆ всѣ́хъ благи́хъ на́мъ ѿ негѡ̀ хода́таю.

Ра́дꙋйсѧ, ꙗ҆́кѡ свѣ́тлꙋю ѡ҆де́ждꙋ чистоты̀ и҆ цѣломꙋ́дрїѧ до́брѣ сохрани́въ, вше́лъ є҆сѝ въ черто́гъ нбⷭ҇ный: ра́дꙋйсѧ, ꙗ҆́кѡ чи́стаѧ дꙋша̀ твоѧ̀ къ ли́кꙋ є҆ѵⷢ҇льскихъ мꙋ́дрыхъ дѣ́въ сопричте́сѧ и҆ кꙋ́пнѡ съ ни́ми а҆́гг҃льски водворѧ́етсѧ въ нбⷭ҇номъ черто́зѣ жениха̀ хрⷭ҇та̀.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ и҃

Стра́нное на землѝ житїѐ пожи́въ и҆ ᲂу҆дали́всѧ сꙋ́етнагѡ мі́ра, добродѣ́тельми къ бг҃ꙋ прибли́жилсѧ є҆сѝ: сегѡ̀ ра́ди высо́кїй бг҃ъ, ви́дѧ твоѐ смире́нїе, возвели́чи тѧ̀ свое́ю бл҃года́тїю: є҆го́же восхвалѧ́юще, пое́мъ є҆мꙋ̀ кꙋ́пнѡ съ тобо́ю а҆́гг҃льскꙋю пѣ́снь: А҆ллилꙋ́їа.

І҆́косъ и҃

Ве́сь ᲂу҆́мъ тво́й въ вы́шнїй і҆ерⷭ҇ли́мъ при́снѡ простира́ѧ, а҆́ще тѣ́ломъ и҆ на землѝ пребыва́лъ є҆сѝ, всѧ̑ кра̑снаѧ мі́ра сегѡ̀ возненави́дѣлъ и҆ равноа́гг҃льское житїѐ здѣ̀ пожи́лъ є҆сѝ, сѷмеѡ́не блаже́нне, тѣ́мъ и҆ ѿ чтꙋ́щихъ тѧ̀ слы́шиши сїѧ̑:

Ра́дꙋйсѧ, человѣ́че бж҃їй досточꙋ́дный: ра́дꙋйсѧ, зерца́ло добродѣ́телей преизѧ́щныхъ.

Ра́дꙋйсѧ, премѣни́вый тлѣ̑ннаѧ настоѧ̑щаѧ на бꙋ̑дꙋщаѧ вѣ̑чнаѧ: ра́дꙋйсѧ, ᲂу҆подо́бивыйсѧ і҆́ѡвꙋ терпе́нїемъ.

Ра́дꙋйсѧ, селе́нїе честно́е ст҃ы́ѧ трⷪ҇цы: ра́дꙋйсѧ, свѧ́тче бж҃їй, со всѣ́ми ст҃ы́ми прославлѧ́емый.

Ра́дꙋйсѧ, ковче́же, ѿ пото́па грѣхо́внагѡ призыва́ющихъ тѧ̀ сп҃са́ющїй: ра́дꙋйсѧ, ꙗ҆́кѡ ᲂу҆слажда́лъ є҆сѝ се́рдце твоѐ весе́лїемъ бꙋ́дꙋщихъ бла̑гъ.

Ра́дꙋйсѧ, воздержа́нїемъ пло́ть твою̀ и҆знꙋри́вый: ра́дꙋйсѧ, ꙗ҆́кѡ ст҃остїю житїѧ̀ твоегѡ̀ млⷭ҇ть бж҃їю ѡ҆брѣ́лъ є҆сѝ.

Ра́дꙋйсѧ, ꙗ҆́кѡ непреста́нными мл҃твами ѡ҆ на́съ бг҃а ᲂу҆милостивлѧ́еши: ра́дꙋйсѧ, ꙗ҆́кѡ благи̑мъ наде́ждамъ твои̑мъ и҆сполне́нїе прїѧ́лъ є҆сѝ.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ ѳ҃

Всѐ мно́жество человѣ́ческое ᲂу҆диви́сѧ є҆́же на землѝ во пло́ти твоемꙋ̀ терпѣ́нїю и҆ неѕло́бїю, непоро́чна и҆ пра́ведна тѧ̀ зрѧ́ще, и҆ ны́нѣ ми́лостивымъ твои́мъ предста́тельствомъ въ ско́рбехъ на́съ не ѡ҆ставлѧ́юща: тѣ́мже и҆ мы̀, ра́дꙋющесѧ, къ бг҃ꙋ пое́мъ пѣ́снь: А҆ллилꙋ́їа.

І҆́косъ ѳ҃

Виті́и многовѣща̑нныѧ и҆знемого́ша по досто́инствꙋ повѣ́дати мно́гое твоѐ терпѣ́нїе и҆ те́плꙋю ко хрⷭ҇тꙋ̀ любо́вь: а҆́зъ же многогрѣ́шный ка́кѡ возмогꙋ̀ и҆зглаго́лати равноа́гг҃льное твоѐ житїѐ и҆ пресла̑внаѧ чꙋдеса̀! но ѻ҆ба́че дерза́ю, надѣ́ѧсѧ на твоѐ безѕло́бїе, вопи́ти тебѣ̀ си́це:

Ра́дꙋйсѧ, ꙗ҆́кѡ а҆́гг҃лѡмъ подо́бѧсѧ, вы́нꙋ пꙋща́лъ є҆сѝ на нб҃о ѻ҆́чи твоегѡ̀ се́рдца: ра́дꙋйсѧ, ꙗ҆́кѡ до́блими твои́ми по́двиги сп҃се́нїе и҆ вѣне́цъ нетлѣ́нный ѿ хрⷭ҇та̀ бг҃а прїѧ́лъ є҆сѝ.

Ра́дꙋйсѧ, ꙗ҆́кѡ на всѧ́къ де́нь и҆ на всѧ́кꙋ но́щь славосло́вилъ є҆сѝ творца̀ всѧ́ческихъ: ра́дꙋйсѧ, ꙗ҆́кѡ побѣди́лъ є҆сѝ дїа́вола смире́нїемъ свои́мъ.

Ра́дꙋйсѧ, ꙗ҆́кѡ ни́щъ тѣ́ломъ и҆ дꙋ́хомъ бы́лъ є҆сѝ на землѝ, сегѡ̀ ра́ди ᲂу҆гото́ва тѝ гдⷭ҇ь црⷭ҇тво нбⷭ҇ное: ра́дꙋйсѧ, кро́тости ра́ди твоеѧ̀ наслѣ́дивый зе́млю ѡ҆бѣтова́нїѧ.

Ра́дꙋйсѧ, ꙗ҆́кѡ и҆ и҆ны́хъ, зрѧ́щихъ твою̀ ст҃ость, наꙋчи́лъ є҆сѝ првⷣнѡ жи́ти: ра́дꙋйсѧ, ꙗ҆́кѡ дꙋшє́вныѧ стра̑сти и҆сцѣлѧ́еши:

Ра́дꙋйсѧ, ꙗ҆́кѡ тѣлє́сныѧ болѣ̑зни врачꙋ́еши: ра́дꙋйсѧ, ꙗ҆́кѡ и҆ многовре́мєнныѧ недꙋ̑ги ѿ человѣ̑къ ѿгонѧ́еши.

Ра́дꙋйсѧ, ꙗ҆́кѡ сꙋ́щымъ бли́з̾ коне́чнагѡ и҆здыха́нїѧ здра́вїе да́рꙋеши: ра́дꙋйсѧ, ꙗ҆́кѡ и҆ ѿ смертоно́сныхъ ꙗ҆́звъ свобожда́еши.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ і҃

Сп҃се́нїе восхотѣ́въ да́ти гдⷭ҇ь лю́демъ свои́мъ, свѣ́тлагѡ свѣти́льника всѣ̑мъ на́мъ дадѐ тебѣ̀, точа́ща бл҃года́ть цѣльбы̀ всѣ̑мъ, притека́ющымъ къ ра́цѣ моще́й твои́хъ: и҆ мы̀, полꙋчи́вше ми́лость ѿ безме́зднагѡ тѧ̀ врача̀, бл҃года́рными гла́сы восхвалѧ́юще бг҃а, пое́мъ пѣ́снь: А҆ллилꙋ́їа.

І҆́косъ і҃

Стѣна̀ є҆сѝ ты̀ и҆ покро́въ всѣ̑мъ притека́ющымъ къ тебѣ̀, првⷣный сѷмеѡ́не, и҆́бо гдⷭ҇ь просла́ви тѧ̀, ᲂу҆краси́въ нетлѣ́нїемъ и҆ чꙋдесы̀ и҆ приглаша́ти тебѣ̀ наꙋчѝ:

Ра́дꙋйсѧ, сто́лпе непоколеби́мый правосла́вїѧ: ра́дꙋйсѧ, сокро́вище неѡскꙋ́дно мно́гихъ и҆сцѣле́нїй.

Ра́дꙋйсѧ, пода́телю просѧ́щымъ ᲂу҆ тебѣ̀ ꙗ҆́же на по́льзꙋ: ра́дꙋйсѧ, ᲂу҆цѣломꙋ́дривый живꙋ́щыѧ стꙋ́днѡ.

Ра́дꙋйсѧ, наказа́телю помраче́нныхъ ᲂу҆мо́мъ: ра́дꙋйсѧ, ᲂу҆чи́телю смиренномꙋ́дрїѧ и҆ терпѣ́нїѧ.

Ра́дꙋйсѧ, ꙗ҆́кѡ въ со́нїихъ ꙗ҆влѧ́ѧсѧ, наꙋча́еши до́бромꙋ житїю̀: ра́дꙋйсѧ, ѕвѣздо̀, чꙋде́снѡ возсїѧ́вшаѧ въ сїби́рстѣй странѣ̀.

Ра́дꙋйсѧ, ꙗ҆́кѡ лꙋча́ми чꙋдотворе́нїй твои́хъ просвѣща́еши и҆ далеча́йшыѧ страны̑: ра́дꙋйсѧ, ꙗ҆́кѡ нѣ́когда незна́емъ, ны́нѣ же со сла́вою познава́ешисѧ ѿ всѣ́хъ и҆́щꙋщихъ тѧ̀.

Ра́дꙋйсѧ, ꙗ҆́кѡ ры́барь бы́въ, содѣ́лалсѧ є҆сѝ ловце́мъ человѣ́кѡвъ: ра́дꙋйсѧ, ꙗ҆́кѡ хода́тайствомъ твои́мъ къ бг҃ꙋ мꙋ́къ вѣ́чныхъ свобожда́еши на́съ.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ а҃і

Пѣ́нїе ᲂу҆миле́нное приношꙋ̀ тѝ, недосто́йный, и҆ вопїю̀ со слеза́ми: хода́тайствꙋй за мѧ̀ при́снѡ къ бг҃ꙋ, дꙋше́ю и҆ тѣ́ломъ ѿ страсте́й, вою́ющихъ на мѧ̀, лю́тѣ недꙋ́гꙋющагѡ, и҆ пода́ждь мѝ мл҃твами твои́ми и҆сцѣле́нїе и҆ грѣхѡ́въ и҆збавле́нїе, ѿ се́рдца тебѣ̀ сїѧ̑ приносѧ́щемꙋ, да и҆ а҆́зъ въ ра́дости воспою̀ прославлѧ́ющемꙋ тѧ̀ бг҃ꙋ пѣ́снь: А҆ллилꙋ́їа.

І҆́косъ а҃і

Свѣтопрїе́мнꙋю свѣщꙋ̀ зри́мъ тѧ̀, бг҃омꙋ́дре сѷмеѡ́не: невеще́ственнымъ бо любвѐ ѻ҆гне́мъ возже́глсѧ є҆сѝ и҆ наставлѧ́еши къ бжⷭ҇твенномꙋ дѣѧ́нїю всѧ̑, ѡ҆́бразомъ житїѧ̑ твоегѡ̀, ꙗ҆́кѡ заре́ю, просвѣща́ѧ чꙋ̑вства на̑ша: тѣ́мже и҆ досто́инъ є҆сѝ зва́нїемъ почита́тисѧ си́мъ:

Ра́дꙋйсѧ, лꙋчѐ пресвѣ́тлаѧ, ѿ сл҃нца хрⷭ҇та̀ возсїѧ́вшаѧ: ра́дꙋйсѧ, свѣти́ло бл҃гоче́стїѧ немерца́ющее.

Ра́дꙋйсѧ, ꙗ҆́кѡ свѣ́тъ премꙋ́дрости бж҃їѧ просвѣтѝ дꙋ́шꙋ твою̀: ра́дꙋйсѧ, ꙗ҆́кѡ вѣ́чнагѡ сегѡ̀ свѣ́та лꙋче́й чрез̾ тебѣ̀ и҆ мы̀ сподоблѧ́емсѧ.

Ра́дꙋйсѧ, безме́здный врачꙋ̀: ра́дꙋйсѧ, ꙗ҆́кѡ и҆сточа́еши ѻ҆би̑льныѧ стрꙋи̑ и҆сцѣле́нїй.

Ра́дꙋйсѧ, бл҃гонаде́жный ѡ҆ на́съ предста́телю и҆ мл҃твенниче пред̾ прⷭ҇то́ломъ гдⷭ҇нимъ: ра́дꙋйсѧ, сп҃си́тельное приста́нище всѣ̑мъ, притека́ющымъ къ тебѣ̀.

Ра́дꙋйсѧ, ꙗ҆́кѡ сꙋ́щымъ въ пꙋчи́нѣ скорбе́й до́бръ ѡ҆брѣта́ешисѧ ко́рмчїй: ра́дꙋйсѧ, те́плый застꙋ́пниче сꙋ́щымъ во ѡ҆бстоѧ́нїихъ лю́тыхъ.

Ра́дꙋйсѧ, бл҃гоꙋха́нїе дх҃о́вное и҆сточа́ѧй ѿ многоцѣле́бныхъ твои́хъ моще́й: ра́дꙋйсѧ, є҆ле́емъ ра́дованїѧ и҆сцѣлѧ́ѧй скѡ́рби дꙋшє́вныѧ вѣ́рою молѧ́щихсѧ тебѣ̀.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ в҃і

Блгⷣть преве́лїю дадѐ тебѣ̀ гдⷭ҇ь недꙋ́жныхъ болѣ̑зни врачева́ти, де́мѡны прогонѧ́ти и҆ стра̑сти цѣли́ти: тѣ́мже не забꙋ́ди и҆ на́съ, ᲂу҆се́рднѡ призыва́ющихъ тѧ̀ во вре́мѧ тѣ́сныхъ ѡ҆бстоѧ́нїй и҆ тѧ́жкихъ напа́стей, и҆ мл҃твами твои́ми ѿ ѻ҆́ныхъ и҆зба́ви, да бл҃года́рнѡ вопїе́мъ къ бг҃ꙋ: А҆ллилꙋ́їа.

І҆́косъ в҃і

Пою́ще твоѧ̑ чꙋдеса̀, првⷣный сѷмеѡ́не, вѣ́рою несомнѣ́нною притека́емъ къ многоцѣлє́бнымъ и҆ ст҃ы̑мъ моще́мъ твои̑мъ, и҆ припа́даѧ къ ни́мъ, съ любо́вїю и҆ стра́хомъ лобыза́емъ ѻ҆́ныѧ. ты́ же, ѡ҆ свѧ́тче бж҃їй! ꙗ҆́кѡ благоꙋтро́бный, принесѝ моле́нїе ко влⷣцѣ, да сподо́битъ на́съ десна́гѡ стоѧ́нїѧ на сꙋдѣ̀ свое́мъ, вопїю́щихъ къ тебѣ̀ сицєва́ѧ:

Ра́дꙋйсѧ, вели́кїй хрⷭ҇то́въ ᲂу҆го́дниче: ра́дꙋйсѧ, мл҃твенниче ᲂу҆се́рдный ѡ҆ воспѣва́ющихъ тѧ̀.

Ра́дꙋйсѧ, бж҃їй и҆збра́нниче, блгⷣтїю дх҃а ст҃а́гѡ прїѡсѣне́нный: ра́дꙋйсѧ, првⷣниче, возвесели́выйсѧ ѡ҆ гдⷭ҇ѣ.

Ра́дꙋйсѧ, ꙗ҆́кѡ мзда̀ твоѧ̀ мно́га на нб҃сѣ́хъ: ра́дꙋйсѧ, предста́телю на́шъ ско́рый и҆ те́плый.

Ра́дꙋйсѧ, хода́таю неꙋсы́пный ѡ҆ на́съ пред̾ бг҃омъ: ра́дꙋйсѧ, и҆́го благо́е и҆ бре́мѧ ле́гкое понесы́й.

Ра́дꙋйсѧ, за трꙋды̀ твоѧ̑ и҆ по́двиги на землѝ, вѣ́чное ᲂу҆покое́нїе ѡ҆брѣты́й на нб҃сѝ: ра́дꙋйсѧ, ꙗ҆́кѡ вре́менныхъ и҆ вѣ́чныхъ бла̑гъ ѿ бг҃а на́мъ при́снѡ про́сиши.

Ра́дꙋйсѧ, ѡ҆ ка́ющихсѧ спорꙋ́чниче пред̾ бг҃омъ: ра́дꙋйсѧ, кади́ло бл҃гово́нное, ѡ҆бл҃гоꙋха́ющее чтꙋ́щихъ тѧ̀.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ г҃і

Ѽ пречꙋ́дный и҆ ми́лостивый но́вый чꙋдотво́рче, првⷣный сѷмеѡ́не! прїимѝ ны́нѣ ма́лое сїѐ моле́нїе на́ше и҆ принесѝ є҆̀ ко хрⷭ҇тꙋ̀ бг҃ꙋ на́шемꙋ, да сохрани́тъ на́съ ѿ вра̑гъ ви́димыхъ и҆ невиди́мыхъ, ѿ наше́ствїѧ и҆ноплеме́нникъ, ѿ недꙋ́га и҆ гла́да, ѿ всѧ́кїѧ ско́рби и҆ внеза́пныѧ сме́рти и҆ бꙋ́дꙋщагѡ вѣ́чнагѡ мꙋче́нїѧ и҆зба́витъ, мл҃твами твои́ми, всѣ́хъ вопїю́щихъ къ немꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ во пло́ти и҆ нбⷭ҇ный человѣ́къ ꙗ҆ви́лсѧ є҆сѝ, бл҃же́нный сѷмеѡ́не, а҆́гг҃льски бо въ мі́рѣ се́мъ пожи́лъ є҆сѝ, тѣ́мже и҆ а҆́гг҃льстїи чи́ни ᲂу҆диви́шасѧ непоро́чности твоегѡ̀ житїѧ̀ и҆, по преставле́нїи твое́мъ, съ весе́лїемъ прїѧ́та првⷣнꙋю твою̀ дꙋ́шꙋ: сегѡ̀ ра́ди и҆ мы̀, чꙋдѧ́щесѧ высотѣ̀ твоеѧ̀ добродѣ́тели, прославлѧ́емъ тѧ̀ си́це:

Ра́дꙋйсѧ, ꙗ҆́кѡ ст҃ѡ и҆ бг҃оꙋго́днѡ на землѝ пожи́лъ є҆сѝ: ра́дꙋйсѧ, ꙗ҆́кѡ по́двигомъ до́брымъ здѣ̀ подвиза́всѧ, тече́нїе своѐ првⷣнѡ сконча́лъ є҆сѝ.

Ра́дꙋйсѧ, ꙗ҆́кѡ ны́нѣ пресели́лсѧ є҆сѝ въ покѡ́ища нбⷭ҇наѧ: ра́дꙋйсѧ, ꙗ҆́кѡ въ ѡ҆би́телехъ премі́рныхъ, ꙗ҆́же ᲂу҆гото́ва бг҃ъ лю́бѧщымъ є҆гѡ̀, на несконча́ємыѧ вѣ́ки водворѧ́ешисѧ.

Ра́дꙋйсѧ, ꙗ҆́кѡ цр҃ь ца́рствꙋющихъ прїѧ́тъ тѧ̀ въ нбⷭ҇ное црⷭ҇твїе: ра́дꙋйсѧ, ꙗ҆́кѡ при́снѡ со а҆́гг҃лы въ нб҃сѝ ѡ҆бита́еши.

Ра́дꙋйсѧ, ꙗ҆́кѡ съ прⷪ҇ро́ки и҆ а҆пⷭ҇лы вселѧ́ешисѧ: ра́дꙋйсѧ, ꙗ҆́кѡ съ по́стники и҆ прпⷣбными торжествова́ти сподо́билсѧ є҆сѝ.

Ра́дꙋйсѧ, ꙗ҆́кѡ предстои́ши ны́нѣ со всѣ́ми ст҃ы́ми прⷭ҇то́лꙋ бж҃їю: ра́дꙋйсѧ, ꙗ҆́кѡ прест҃ꙋ́ю трⷪ҇цꙋ несре́дственнѣ зрѣ́ти сподоблѧ́ешисѧ.

Ра́дꙋйсѧ, ꙗ҆́кѡ неизрече́ннꙋю сла́вꙋ гдⷭ҇ню ꙗ҆́вственнѣ созерца́еши: ра́дꙋйсѧ, ꙗ҆́кѡ тоѧ̀ прича́стника бы́ти ᲂу҆досто́и тѧ̀ гдⷭ҇ь.

Ра́дꙋйсѧ, сѷмеѡ́не, чꙋдотво́рче преди́вный.

Конда́къ а҃

И҆збра́нномꙋ и҆ ди́вномꙋ но́вомꙋ сиби́рскїѧ страны̀ чꙋдотво́рцꙋ всера́достнѡ ны́нѣ прино́симъ тѝ, свѧ́те сѷмеѡ́не, хвалє́бнаѧ пѣ̑нїѧ: ты́ же, ꙗ҆́кѡ и҆мѣ́ѧй дерзнове́нїе ко хрⷭ҇тꙋ̀ бг҃ꙋ, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, сѷмеѡ́не, чꙋдотво́рче преди́вный.

Моли́твы

Ѽ ст҃ы́й и҆ првⷣный сѷмеѡ́не, чи́стою дꙋше́ю твое́ю въ нбⷭ҇ныхъ ѡ҆би́телехъ въ ли́цѣ ст҃ы́хъ водворѧ́ѧйсѧ, здѣ́ же тѣ́ломъ твои́мъ нетлѣ́ннѡ почива́ѧй: по да́ннѣй тѝ бл҃года́ти ѿ гдⷭ҇а моли́тисѧ ѡ҆ на́съ, млⷭ҇тивнѡ при́зри на на́съ многогрѣ́шныхъ, а҆́ще и҆ недосто́йнѣ, ѻ҆ба́че съ вѣ́рою и҆ ᲂу҆пова́нїемъ притека́ющихъ ко ст҃ы̑мъ и҆ цѣльбонѡ́снымъ моще́мъ твои̑мъ, и҆ и҆спросѝ и҆ на́мъ ѿ бг҃а проще́нїе согрѣше́нїй на́шихъ, въ нѧ́же впа́даемъ мно́жицею во всѧ̑ дни̑ живота̀ на́шегѡ, и҆ ꙗ҆́коже пре́жде ѻ҆́вымъ ᲂу҆́бѡ ѿ ѻ҆чны́ѧ ѕѣ́льныѧ болѣ́зни нима́лѡ зрѣ́ти могꙋ́щымъ и҆сцѣле́нїе ѻ҆че́съ, ѻ҆́вымъ же бли́з̾ сме́рти бы́вшымъ ѿ лю́тыхъ недꙋ́гѡвъ врачева́нїе, и҆ и҆ны̑мъ и҆на̑ѧ мнѡ́гаѧ пресла̑внаѧ бл҃годѣѧ̑нїѧ дарова́лъ є҆сѝ: си́це и҆зба́ви и҆ на́съ ѿ недꙋ́гѡвъ дꙋше́вныхъ и҆ тѣле́сныхъ и҆ ѿ всѧ́кїѧ ско́рби и҆ печа́ли, и҆ всѧ̑ блага̑ѧ къ настоѧ́щемꙋ сп҃се́нїю бл҃гопотрє́бнаѧ на́мъ ѿ гдⷭ҇а и҆спросѝ, да та́кѡ твои́мъ предста́тельствомъ и҆ мл҃твами стѧжа́вше всѧ̑ на́мъ полє́знаѧ, а҆́ще и҆ недосто́йнїи, бл҃года́рнѣ восхвалѧ́юще тѧ̀, просла́вимъ бг҃а, ди́внаго во ст҃ы́хъ свои́хъ: ѻ҆ц҃а̀ и҆ сн҃а, и҆ ст҃а́го дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.