Православный календарь
Размер шрифта:

Канѡ́нъ

Кано́нъ ст҃о́мꙋ првⷣномꙋ сѷмеѡ́нꙋ верхотꙋ́рскомꙋ.

Прав. Симеона Верхотурского (перен. мощ.) (1704) 25 сентября 2026

Пѣ́снь а҃

І҆рмо́съ

Во́ды дре́вле ма́нїемъ бж҃е́ственнымъ во є҆ди́но со́нмище совокꙋпи́вый и҆ раздѣли́вый мо́ре і҆и҃льтєскимъ лю́демъ, се́й бг҃ъ на́шъ, препросла́вленъ є҆́сть. томꙋ̀ є҆ди́номꙋ пои́мъ, ꙗ҆́кѡ просла́висѧ.

Тропа́рь

Ѡ҆мраче́нный грѣхмѝ, недоꙋмѣ́ю, ка́кѡ по достоѧ́нїю восхвали́ти тѧ̀, ст҃е сѷмеѡ́не, сїѧ́юща по бл҃года́ти хрⷭ҇то́вой, пѡ́двигъ и҆ чꙋде́съ твои́хъ свѣтлостьмѝ. ты́ ми, бл҃госе́рде, помозѝ, возсїѧва́ѧ въ дꙋшѝ мое́й свѣ́тъ, и҆́мже ѡ҆сїѧва́ешисѧ, ꙗ҆́кѡ да понѐ є҆ли́ко воспою̀ въ похвале́нїе твоѐ ꙗ҆́вльшаѧсѧ на тебѣ̀ чꙋ̑днаѧ дѣла̀ гдⷭ҇нѧ, воззыва́юща всѣ́хъ, пра́зднꙋющихъ па́мѧть твою̀, пѣ́ти влⷣцѣ хрⷭ҇тꙋ̀: се́й бг҃ъ на́шъ, ди́вный и҆ сла́вимый во ст҃ы́хъ свои́хъ, препросла́вленъ є҆́сть, томꙋ̀ є҆ди́номꙋ пои́мъ, ꙗ҆́кѡ просла́висѧ.

Тропа́рь

Бл҃гоче́стїѧ любо́вїю и҆ спасе́нїѧ ѡ҆б̾ѧ́тъ бы́въ, и҆збѣга́ѧй тогѡ̀ ра́ди треволне́нїй жите́йскихъ, ᲂу҆дали́лсѧ є҆сѝ, бл҃же́нне сѷмеѡ́не, ѿ ро́да твоегѡ̀ и҆ ма́нїемъ бжⷭ҇твеннымъ и҆зведе́нъ бы́лъ є҆сѝ въ малонаселе́ннꙋю и҆ногда̀ странꙋ̀ сиби́рскꙋю, и҆дѣ́же пресе́льникъ бы́въ землѝ ѻ҆те́ческїѧ, подо́бникъ ꙗ҆ви́лсѧ є҆сѝ пра́ѻтцꙋ а҆враа́мꙋ и҆ стѧжа́въ нра́въ є҆гѡ̀, въ хи́жинахъ ᲂу҆̀бо ᲂу҆бо́гихъ вита́ѧй, ꙗ҆́коже ѻ҆́нъ въ кꙋ́щахъ. дꙋ́шꙋ же впери́въ къ нб҃сѝ, въ го́рнїй сїѡ́нъ добродѣ́телей стезе́ю ходи́лъ є҆сѝ, ведꙋ́щею на нб҃о, всю̀ жи́знь твою̀, во сла́вꙋ хрⷭ҇та̀ сп҃са всѣ́хъ, тѝ споспѣшествꙋ́юща. є҆мꙋ́же всѧ̑ сїѧ̑ наꙋча́ютъ на́съ ра́достнѡ дне́сь зва́ти: се́й бг҃ъ на́шъ, препросла́вленъ є҆́сть, томꙋ̀ є҆ди́номꙋ пои́мъ, ꙗ҆́кѡ просла́висѧ.

Тропа́рь

По рожде́нїю твоемꙋ̀, бл҃же́нне, бы́въ ѻ҆́трасль бл҃гонарочи́тыхъ люде́й и҆ сла́вныхъ въ наро́дѣ свое́мъ, є҆гда̀ ма́нїемъ бжⷭ҇твеннымъ сиби́ри доше́лъ є҆сѝ, а҆́бїе ѿгна́лъ є҆сѝ ѿ себѐ самомнѣ́нїѧ пре́лесть, и҆ смире́нїю подклони́лъ є҆сѝ вы́ю, себѐ вмѣнѧ́ѧй послѣ́днѣйша ѿ всѣ́хъ, та́же трꙋды̀ мно́гими тѣ́ло твоѐ ᲂу҆дрꙋчи́лъ є҆сѝ, и҆ ᲂу҆кроти́лъ свирѣ́пое страсте́й мо́ре воздержа́нїемъ, и҆ та́кѡ возше́лъ є҆сѝ на высотꙋ̀ добродѣ́телей, ᲂу҆крѣплѧ́ющꙋ тѧ̀ хрⷭ҇тꙋ̀, прославлѧ́емомꙋ твои́ми бл҃ги́ми дѣ́лы. є҆мꙋ́же велегла́снѡ тогѡ̀ ра́ди вопїе́мъ: се́й бг҃ъ на́шъ, препросла́вленъ є҆́сть, томꙋ̀ є҆ди́номꙋ пои́мъ, ꙗ҆́кѡ просла́висѧ.

Тропа́рь

Въ нищетѣ̀ пожи́лъ є҆сѝ въ сиби́рстѣй странѣ̀, бл҃же́нне сѷмеѡ́не, и҆ ꙗ҆́кѡ ѿ ко́рене благопло́дна пло́дъ благоцвѣтꙋ́щъ, добродѣ́тельми ѡ҆богати́лсѧ є҆сѝ. тѣ́мже, вельмѝ ᲂу҆краси́вша тѧ̀ бжⷭ҇твенными добро́тами толи́кѡ на́мъ вожделѣ́нными, и҆ си́ми просла́вленна, влⷣкꙋ хрⷭ҇та̀, пѣ́сньми славосло́вимъ зовꙋ́ще: се́й бг҃ъ на́шъ, препросла́вленъ є҆́сть, томꙋ̀ є҆ди́номꙋ пои́мъ, ꙗ҆́кѡ просла́висѧ.

Тропа́рь

Сто́лпъ добродѣ́телей непрело́женъ и҆ бл҃гоче́стїѧ жили́ще бы́лъ є҆сѝ, бл҃же́нне, и҆мѣ́ѧй ѡ҆снова́нїе ᲂу҆́бѡ тве́рдое правосла́внꙋю вѣ́рꙋ, посо́бїе же непобѣди́мо содѣ́йствꙋющꙋю тѝ си́лꙋ хрⷭ҇то́вꙋ. и҆ ны́нѣ, и҆мѣ́ѧй дерзнове́нїе ко хрⷭ҇тꙋ̀ сп҃си́телю всѣ́хъ, молѝ є҆го̀, дарова́ти къ прославле́нїю и҆́мени є҆гѡ̀ всѣ̑мъ на́мъ ᲂу҆твержде́нїе си́лою є҆гѡ̀, въ се́й толи́кѡ спаси́тельнѣй вѣ́рѣ, ꙗ҆́кѡ да всѝ є҆ди́ными ᲂу҆сты̀ согла́снѡ зове́мъ є҆мꙋ̀: се́й бг҃ъ на́шъ, препросла́вленъ є҆́сть, томꙋ̀ є҆ди́номꙋ пои́мъ, ꙗ҆́кѡ просла́висѧ.

Богороди́ченъ

Пребл҃гослове́нна є҆сѝ, бг҃оро́дице дв҃о, ꙗ҆́кѡ родила̀ є҆сѝ хрⷭ҇та̀ сп҃са на́шего, є҆го́же славосло́вимъ, ꙗ҆́кѡ є҆диноро́днаго ѿ ѻ҆ц҃а̀, и҆спо́лнь бл҃года́ти и҆ и҆́стины, и҆ є҆мꙋ́же вы́нꙋ взыва́емъ: се́й бг҃ъ на́шъ, препросла́вленъ є҆́сть, томꙋ̀ є҆ди́номꙋ пои́мъ, ꙗ҆́кѡ просла́висѧ.

Пѣ́снь г҃

І҆рмо́съ

Непло́днаѧ дꙋшѐ и҆ безча́днаѧ, стѧжѝ пло́дъ бл҃госла́вный, веселѧ́щисѧ возопі́й: ᲂу҆тверди́хсѧ тобо́ю, бж҃е, нѣ́сть ст҃ъ и҆ нѣ́сть пра́веденъ, па́че тебѐ, гдⷭ҇и.

Тропа́рь

Правосла́вною вѣ́рою ᲂу҆тверди́всѧ, бл҃же́нне сѷмеѡ́не, стѧжа́лъ є҆сѝ благосла́вный пло́дъ є҆ѧ̀, ѡ҆богати́вый тѧ̀ добродѣ́тельми, ѻ҆ба́че николи́же велемꙋ́дрствовалъ є҆сѝ ѡ҆ себѣ̀, и҆ не да́лъ є҆сѝ человѣкоꙋбі́йцѣ и҆сконѝ ѡ҆бꙋѧ́ти тѧ̀ тщесла́вїемъ. но вы́нꙋ води́лсѧ є҆сѝ смиренномꙋ́дрїемъ, ꙗ҆́кѡ ви́дѣти тѧ̀ при́снѡ всѣ̑мъ, а҆́ки бы ᲂу҆сво́иша себѣ̀ пѣ́снь є҆ди́нагѡ ѿ бг҃омꙋ́дрыхъ: ᲂу҆тверди́хсѧ тобо́ю, бж҃е, нѣ́сть ст҃ъ и҆ нѣ́сть пра́веденъ, па́че тебѐ, гдⷭ҇и.

Тропа́рь

Съ нището́ю тѣле́сною соедини́въ нищетꙋ̀ дꙋхо́внꙋю, ꙗ҆́кѡ ко́рень всѣ́хъ бл҃ги́хъ, молчали́вѡ и҆ бл҃гоче́стнѡ твою̀ жи́знь соверши́лъ є҆сѝ, бл҃же́нне сѷмеѡ́не, и҆ ꙗ҆ви́лъ є҆сѝ въ себѣ̀ пло́дъ бл҃госла́вный правосла́вныѧ вѣ́ры, пред̾ꙋкрѣпи́въ пе́рвѣе тѣ́ло твоѐ посто́мъ неѡсла́бнымъ, та́же дꙋ́шꙋ твою̀ хра́мъ бж҃їй прест҃ъ содѣ́лавъ, бжⷭ҇твеннымъ хра́момъ присѣдѧ̀, внегда̀ пѣ́тисѧ та́мѡ сщ҃є́ннымъ пѣснопѣ́нїемъ, всѣ̑мъ и҆мꙋ́щымъ є҆ди́нъ се́й ра́зꙋмъ: нѣ́сть ст҃ъ и҆ нѣ́сть пра́веденъ, па́че тебѐ, гдⷭ҇и.

Тропа́рь

Сꙋгꙋ́бѡ бл҃горо́денъ бы́лъ є҆сѝ, бл҃же́нне сѷмеѡ́не, и҆ ро́домъ и҆ нра́вы: дꙋши́ бо твоеѧ̀ благоро́дїе, бл҃горо́дїѧ свы́ше добро́тами ᲂу҆ѧсни́лъ є҆сѝ, правосла́вїѧ свѣ́томъ блиста́ѧ, и҆ по́стничествомъ, и҆ цѣломꙋ́дрїемъ, и҆ смире́нїемъ и҆ терпѣ́нїемъ, и҆ мꙋ́жествомъ на го́рдаго ѕмі́ѧ, є҆го́же си́ми низложи́лъ є҆сѝ, содѣ́йствꙋющꙋ тѝ хрⷭ҇тꙋ̀, и҆ та́кѡ дости́глъ є҆сѝ бл҃же́нныхъ селе́нїй ст҃ы́хъ. и҆́хже во ᲂу҆стѣ́хъ коего́ждо вы́нꙋ бы́сть пѣ́снь цр҃кве: ᲂу҆тверди́хсѧ тобо́ю, бж҃е, нѣ́сть ст҃ъ и҆ нѣ́сть пра́веденъ, па́че тебѐ, гдⷭ҇и.

Тропа́рь

Дре́во бл҃госѣнноли́ственное, насажде́нное при и҆схо́дищихъ во́дъ, є҆́же дае́тъ плоды̀ во вре́мѧ своѐ, бы́лъ є҆сѝ, бл҃же́нне сѷмеѡ́не. ты́ бо и҆змла́да напое́нъ бы́въ вода́ми бл҃гоче́стїѧ, и҆зрасти́лъ є҆сѝ добродѣ́телей плоды̀ бл҃гопрїѧ̑тны бг҃ꙋ, дарова́вшемꙋ тѝ за та́ѧ живо́тъ вѣ́чный. є҆го́же и҆ на́съ сподо́би моли́твами твои́ми ко гдⷭ҇ꙋ, ꙗ҆́кѡ да и҆ въ грѧдꙋ́щемъ вѣ́цѣ, ꙗ҆́коже дне́сь воспѣва́емъ є҆мꙋ̀: нѣ́сть ст҃ъ и҆ нѣ́сть пра́веденъ, па́че тебѐ, гдⷭ҇и.

Богороди́ченъ

Те́рнїе и҆ волчцы̀ грѣхѡ́въ неплѡ́дны содѣва́ютъ дꙋ́шы на́шѧ, милосе́рдаѧ мт҃и хрⷭ҇та̀ бг҃а на́шегѡ, молѝ съ првⷣнымъ сѷмеѡ́номъ сн҃а твоего̀ сотвори́ти ни́вꙋ дꙋ́шъ на́шихъ, во є҆́же приноси́ти є҆́й пло́дъ бл҃госла́вный и҆́стинныѧ вѣ́ры, несꙋмнѣ́нныѧ наде́жды и҆ нелицемѣ́рныѧ любвѐ. ꙗ҆́кѡ да вы́нꙋ воспѣва́емъ ро́ждшемꙋсѧ ѿ тебѐ: ᲂу҆тверди́хомсѧ тобо́ю, бж҃е, нѣ́сть ст҃ъ и҆ нѣ́сть пра́веденъ, па́че тебѐ, гдⷭ҇и.

Пѣ́снь д҃

І҆рмо́съ

Положи́лъ є҆сѝ къ на́мъ тве́рдꙋю любо́вь, гдⷭ҇и, є҆диноро́днаго бо твоего̀ сн҃а за ны̀ на сме́рть да́лъ є҆сѝ. тѣ́мже тѝ зове́мъ благодарѧ́ще: сла́ва си́лѣ твое́й, гдⷭ҇и.

Тропа́рь

Непосты́днѡ бы́сть твоѐ, бл҃же́нне, на си́лꙋ и҆ по́мощь чл҃вѣколю́бца гдⷭ҇а, преда́вша сн҃а своего̀ за ны̀ на сме́рть, ᲂу҆пова́нїе и҆́мже ᲂу҆крѣ́пль дꙋ́шꙋ твою̀, не ᲂу҆жа́слсѧ є҆сѝ встꙋпи́ти въ по́прище пѡ́двигъ твои́хъ. гдⷭ҇емъ бо помога́емь, пе́рвѣе ᲂу҆держа́лъ є҆сѝ въ постѣ̀ чре́во твоѐ, та́же воздержа́нїѧ росо́ю до́бльственнѣ страсте́й пе́щь погаси́лъ є҆сѝ, и҆ та́кѡ мра́ка и҆́хъ и҆зба́вльсѧ, просїѧ́лъ є҆сѝ безстра́стїѧ свѣ́тлостїю. се́ю же показа́лъ є҆сѝ на́мъ пꙋ́ть, ведꙋ́щїй въ жи́знь и҆́стиннꙋю. тѣ́мже восхвалѧ́юще тѧ̀, гдⷭ҇ꙋ, дарова́вшꙋ тѝ си́лꙋ и҆ крѣ́пость, пое́мъ: сла́ва си́лѣ твое́й, гдⷭ҇и.

Тропа́рь

Насажде́нъ бы́въ при вода́хъ воздержа́нїѧ, бл҃же́нне, лоза̀ ꙗ҆ви́лсѧ є҆сѝ бл҃гора́сленна, бл҃гоче́стїѧ гро́здїе предлага́ющаѧ. къ си̑мъ же показа́лсѧ є҆сѝ всѣ̑мъ и҆ ѻ҆́бразъ трꙋдолю́бїѧ, подо́бѧсѧ бо скинотво́рцꙋ а҆пⷭ҇толꙋ, рꙋка́ми свои́ми прїѡбрѣта́вшемꙋ себѣ̀ и҆ сꙋ́щымъ съ ни́мъ всѧ̑ потрє́бнаѧ къ жи́зни вре́меннѣй, ᲂу҆пражнѧ́лсѧ є҆сѝ въ шве́нїи ѻ҆де́ждъ дрꙋги̑мъ и҆ въ ловле́нїи ры́бъ, на потре́бꙋ къ жи́зни, ꙗ҆́кѡ да не ѡ҆тѧготи́ши ко́его ли́бо пропита́нїемъ тебѐ. тѣ́мже ᲂу҆крѣ́пльшꙋ тѧ̀ ѡ҆ се́мъ хрⷭ҇тꙋ̀ бг҃ꙋ пое́мъ: сла́ва си́лѣ твое́й, гдⷭ҇и.

Тропа́рь

Трꙋжда́ѧсѧ въ шве́нїи ѻ҆де́ждъ, бл҃же́нне, къ смотре́нїю мы́сленныхъ твоѐ хꙋдо́жество ᲂу҆пра́вилъ є҆сѝ, помышлѧ́ѧ ѻ҆дѣѧ́нїе дꙋшѝ твоеѧ̀, въ не́мъ же да вни́деши въ черто́гъ сп҃совъ. та́кожде, ᲂу҆́дицею ры̑бы ловѧ́й, вы́нꙋ мы́сль къ бг҃ꙋ и҆мѣ́лъ є҆сѝ, блюды́й себѐ, ꙗ҆́кѡ да не ᲂу҆́дицею грѣха̀ ᲂу҆ловле́нъ бꙋ́деши ѿ вселꙋка́вагѡ врага̀ сп҃се́нїѧ на́шегѡ. и҆ та́кѡ непрело́женъ и҆мѣ́ѧй по́мыслъ благоче́стїѧ, ᲂу҆стро́илъ є҆сѝ жи́знь твою̀ по бз҃ѣ, хрⷭ҇тꙋ̀ ти споспѣшествꙋ́ющꙋ: є҆мꙋ́же, свѣ́дꙋще сїѧ̑, велегла́снѡ пое́мъ: сла́ва си́лѣ твое́й, гдⷭ҇и.

Тропа́рь

Тезоиме́ннѡ ᲂу҆слы́шанїю, и҆́мже преднаре́клсѧ є҆сѝ въ кр҃ще́нїи, бл҃же́нне, поꙋча́ѧсѧ ст҃о́мꙋ послꙋша́нїю, са́мымъ дѣ́ломъ и҆сполни́тель ѻ҆́нагѡ бы́лъ є҆сѝ, нра́въ соѻбра́зный и҆́мени твоемꙋ̀ стѧжа́въ. гото́въ бо бы́лъ є҆сѝ всегда̀ послꙋжи́ти всѣ̑мъ, тре́бовавшымъ твое́й, бл҃госе́рде, по́мощи въ житїѝ твое́мъ, и҆ слꙋжи́лъ є҆сѝ, є҆ли́кѡ тѝ мо́щно бы́сть, со ᲂу҆се́рдїемъ ᲂу҆вѣ́тливъ ко всѣ̑мъ ве́сь ꙗ҆влѧ́ѧсѧ, и҆ че́стенъ и҆ послꙋшли́въ. Разꙋмѣ́юще ᲂу҆̀бо, ꙗ҆́кѡ и҆ сїѐ дарова́нїе тѝ даде́сѧ ѿ хрⷭ҇та̀ бг҃а, пое́мъ є҆мꙋ̀: сла́ва си́лѣ твое́й, гдⷭ҇и.

Богороди́ченъ

И҆́маши всѧ̀ мощѝ, є҆́же а҆́ще хо́щеши, всебл҃га́ѧ мт҃и хрⷭ҇та̀ бг҃а на́шегѡ, ᲂу҆потреблѧ́ющи мт҃рнее дерзнове́нїе къ немꙋ̀ тѣ́мже мо́лимъ тѧ̀, молѝ съ првⷣнымъ сѷмеѡ́номъ, сн҃а твоего̀, дарова́ти на́мъ си́лꙋ и҆ крѣ́пость ше́ствовати неꙋкло́ннѡ пꙋте́мъ добродѣ́телей, ꙗ҆́кѡ да благода́рнѡ вы́нꙋ зове́мъ тѝ: сла́ва, влⷣчце, всемо́щнѣй си́лѣ твое́й.

Пѣ́снь є҃

І҆рмо́съ

На землѝ неви́димый ꙗ҆ви́лсѧ є҆сѝ, и҆ человѣ́кѡмъ во́лею сожи́лъ є҆сѝ, непостижи́мый. и҆ къ тебѣ̀ ᲂу҆́тренююще, воспѣва́емъ тѧ̀, человѣколю́бче.

Тропа́рь

И҆мѣ́ѧй въ се́рдцы свое́мъ ѻ҆́бразъ восхище́на до тре́тїѧгѡ нб҃сѐ въ ра́й, а҆пⷭ҇ла, ре́кша: мы̀ ю҆ро́ди хрⷭ҇та̀ ра́ди, ты̀, бл҃же́нне сѷмеѡ́не, таково́е ю҆ро́дство во́лею воспрїѧ́лъ є҆сѝ на сѧ̀, ꙗ҆́кѡ бо цвѣтни́къ бл҃гоꙋха́ннѣйшїй и҆ добродѣ́телей ра́й ѡ҆дꙋшевле́нъ, воздержа́нїемъ процвѣ́лъ є҆сѝ. ѻ҆ба́че хотѧ̀ ᲂу҆таи́тисѧ ѿ человѣ́къ, ю҆ро́дъ бы́лъ є҆сѝ мі́рꙋ, са́мъ сѧ̀ небл҃горо́денъ сотво́рь, скꙋдоꙋ́мїѧ притворє́нїи, хрⷭ҇тꙋ́ же премꙋ́дръ бы́лъ є҆сѝ, соверша́ѧ пресла̑внаѧ, безстра́стїѧ дости́глъ є҆сѝ и҆́стиннагѡ. тѣ́мже восхвалѧ́юще тѧ̀, пѣ́сненнѡ прославлѧ́емъ да́вшаго тѝ таковꙋ́ю мꙋ́дрость, хрⷭ҇та̀ чл҃вѣколю́бца.

Тропа́рь

Оу҆мꙋ̀ стра̑сти твоѧ̑ подчини́въ, бл҃же́нне, дꙋхо́внꙋю мꙋ́дрость стѧжа́лъ є҆сѝ. и҆ се́ю ᲂу҆правлѧ́емь, нищетꙋ̀ возлюби́лъ є҆сѝ и҆ воздержа́нїе, и҆ чистотꙋ̀, и҆ смиренномꙋ́дрїе. и҆ та́кѡ си́лѣ хрⷭ҇то́вой тѝ содѣ́йствꙋющей, на высотꙋ̀ добродѣ́телей восте́клъ є҆сѝ, и҆́миже зрѧ́ тѧ хрⷭ҇то́съ ѡ҆богати́вшасѧ, человѣколю́бне призрѣ̀ на тѧ̀, и҆ сла́вы црⷭ҇тва нбⷭ҇нагѡ показа́ тѧ прича́стника пресла́вна: є҆го́же молѝ и҆ на́съ сподо́бити ѻ҆́бщники бы́ти тоѧ̀, ꙗ҆́кѡ да во вѣ́ки воспѣва́емъ є҆гѡ̀ чл҃вѣколю́бца.

Тропа́рь

Ю҆ро́дствꙋѧй хрⷭ҇та̀ ра́ди, бл҃же́нне, и҆ та́кѡ би́серъ многоцѣ́нный добродѣ́телей, въ селѣ̀ се́рдца твоегѡ̀ сокрове́нный и҆мѣ́вый, ꙗ҆́кѡ безпло́тенъ на землѝ пожи́лъ є҆сѝ, и҆ содѣ́лалсѧ є҆сѝ ᲂу҆го́дникъ хрⷭ҇тꙋ̀, и҆́же тѧ̀, въ возме́здїе тогѡ̀, просла́ви нетлѣ́нїемъ и҆ чꙋдесы̀, и҆ поста́ви моли́твенника ѡ҆ лю́дехъ свои́хъ. сегѡ̀ ра́ди ᲂу҆бл҃жа́юще тѧ̀, велича́емъ просла́вльшаго тѧ̀, гдⷭ҇а чл҃вѣколю́бца.

Тропа́рь

Ве́лїю сотвори́лъ є҆́сть гдⷭ҇ь ми́лость свою̀ съ на́ми, дарова́въ на́мъ тебѐ, бл҃же́нне, и҆сто́чника чꙋде́съ и҆ моли́твенника ѡ҆ на́съ. тѣ́мже ᲂу҆бл҃жа́юще тѧ̀ дне́сь въ па́мѧти твое́й, сла́вимъ да́вшаго тѝ и҆ на́мъ таковꙋ́ю бл҃года́ть, вопїю́ще: къ тебѣ̀ ᲂу҆́тренююще, гдⷭ҇и, воспѣва́емъ тѧ̀, чл҃вѣколю́бче.

Богороди́ченъ

А҆рха́гг҃льскїй гла́съ вопїе́мъ тѝ, чⷭ҇таѧ приснодв҃о: ра́дꙋйсѧ, бл҃года́тнаѧ, ꙗ҆́кѡ родила̀ є҆сѝ сп҃си́телѧ мі́рꙋ, хрⷭ҇та̀ чл҃вѣколю́бца.

Пѣ́снь ѕ҃

І҆рмо́съ

Глꙋбина̀ страсте́й воста̀ на мѧ̀ и҆ бꙋ́рѧ проти́вныхъ вѣ́трѡвъ, но предвари́въ мѧ̀ ты̀ сп҃сѝ, сп҃се, и҆ и҆зба́ви ѿ тлѝ, ꙗ҆́кѡ спа́слъ є҆сѝ ѿ ѕвѣ́рѧ прⷪ҇ро́ка.

Тропа́рь

Воздержа́нїѧ вѣтри́ломъ ᲂу҆правлѧ́емь въ житїѝ твое́мъ, бл҃же́нне, дости́глъ є҆сѝ въ безстра́стїѧ сла̑внаѧ приста̑нища, и҆ та́кѡ спа́слсѧ є҆сѝ ѿ тлѝ дꙋшепа́гꙋбныхъ страсте́й. гдⷭ҇ь же, по преставле́нїи твое́мъ и҆зба́ви и҆ тѣ́ло твоѐ ѿ тлѝ, и҆ ꙗ҆вѝ є҆̀ нетлѣ́нно, а҆́ще и҆ мнѡ́га лѣ̑та пребы́сть въ нѣ́дрѣхъ земны́хъ. и҆ ны́нѣ молѝ, бл҃госе́рде, гдⷭ҇а, ꙗ҆́кѡ да спасе́тъ и҆ на́съ ѿ всѧ́кїѧ тлѝ, ꙗ҆́коже спа́слъ є҆́сть тебѐ ѿ тлѝ и҆ ѿ ѕвѣ́рѧ прⷪ҇ро́ка.

Тропа́рь

Вра́гъ сп҃се́нїѧ, и҆скꙋша́ѧй на́съ на грѣхѝ, сластьмѝ пали́тъ, но, ко́ль сїѧ̑ па̑гꙋбна сꙋ́ть, сꙋ́щи тлѧ̀ сме́ртнаѧ. тлѧ́тъ бо добро́тꙋ дꙋшѝ на́шеѧ, тлѧ́тъ и҆ здра́вїе тѣ́ла, и҆ къ си̑мъ гото́вѧтъ на́мъ ѻ҆́гнь неꙋгаса́ющїй, и҆ че́рвь неꙋмира́ющїй. бл҃же́нне сѷмеѡ́не, предстоѧ̀ съ ли́ки а҆́гг҃лѡвъ и҆ ст҃ы́хъ бж҃їихъ человѣ́кѡвъ прⷭ҇то́лꙋ влⷣки, молѝ є҆го̀ съ ни́ми, ꙗ҆́кѡ да и҆зба́витъ ѿ гꙋби́тельства сласте́й и҆ спасе́тъ на́съ, вопїю́щихъ є҆мꙋ̀: спасѝ, сп҃се, и҆ и҆зба́ви ѿ тлѝ, ꙗ҆́кѡ спа́слъ є҆сѝ ѿ ѕвѣ́рѧ прⷪ҇ро́ка.

Тропа́рь

Мно́гѡ согрѣша́юще на всѧ́кїй ча́съ и҆ грѣхмѝ при́снѡ растлѣва́емїи, та́кѡ слѧ́чени є҆смы̀, ꙗ҆́кѡ не мощѝ на́мъ восклони́ти главы̀ и҆ воззрѣ́ти когда̀ къ нбⷭ҇нѣй добро́тѣ, и҆ бꙋ́рею проти́вныхъ вѣ́трѡвъ та́кѡ ᲂу҆носи́ми дале́че ѿ пꙋтѝ добродѣ́телей и҆ ѿ стезѝ покаѧ́нїѧ, ꙗ҆́кѡ колеба́тисѧ въ на́съ ᲂу҆пова́нїю сп҃се́нїѧ. ты́ же, бл҃же́нне, предстоѧ̀ ны́нѣ всест҃о́мꙋ, къ немꙋ́же и҆ бога́тное стѧжа́лъ є҆сѝ дерзнове́нїе, молѝ, и҆зба́вити ны̀ ѿ тлѝ грѣхо́вныѧ и҆ бꙋ́рю тѣ́хъ проти́вныхъ вѣ́трѡвъ ᲂу҆толи́ти, вопїю́щыѧ: спасѝ, сп҃се, и҆ и҆зба́ви ѿ тлѝ, ꙗ҆́кѡ спа́слъ є҆сѝ ѿ ѕвѣ́рѧ прⷪ҇ро́ка.

Тропа́рь

Бл҃же́нъ є҆сѝ, ст҃е сѷмеѡ́не, и҆ добро̀ тебѣ̀ є҆́сть, поне́же гдⷭ҇ь зрѧ́ тѧ пра́ведна, вчинѝ съ ли́ки ст҃ы́хъ во ѻ҆би́телехъ нбⷭ҇ныхъ, и҆зба́вль та́кѡ гее́нны, сꙋ́щыѧ тлѝ вѣ́чныѧ. є҆ѧ́же и҆зба́витисѧ и҆ на́мъ молѝ, хрⷭ҇та̀ бг҃а, пою́щымъ є҆мꙋ̀: спасѝ, сп҃се, и҆ и҆зба́ви ѿ тлѝ, ꙗ҆́кѡ спа́слъ є҆сѝ ѿ ѕвѣ́рѧ прⷪ҇ро́ка.

Богороди́ченъ

Пречⷭ҇таѧ влⷣчце, цр҃и́це нбⷭ҇наѧ, стра́хомъ тлѝ вѣ́чныѧ сме́рти содержи́мїи, мо́лимтисѧ, молѝ съ првⷣнымъ сѷмеѡ́номъ, сн҃а твоего̀ хрⷭ҇та̀ бг҃а на́шего, ꙗ҆́кѡ да и҆зба́витъ на́съ тоѧ̀ вопїю́щихъ: сп҃сѝ, сп҃се, и҆ и҆зба́ви ѿ тлѝ, ꙗ҆́кѡ спа́слъ є҆сѝ ѿ ѕвѣ́рѧ прⷪ҇ро́ка.

Пѣ́снь з҃

І҆рмо́съ

Ꙗ҆́коже дре́вле бл҃гочести̑выѧ трѝ ѻ҆́троки ѡ҆роси́лъ є҆сѝ въ пла́мени халде́йстѣмъ свѣ́тлымъ бжⷭ҇тва̀ ѻ҆гне́мъ, и҆ на́съ ѡ҆зарѝ, бл҃гослове́нъ є҆сѝ, взыва́ющыѧ, бж҃е ѻ҆тє́цъ на́шихъ.

Тропа́рь

Бл҃гоче́стїе трїе́хъ ѻ҆́трѡкъ вавѷлѡ́нскихъ привлечѐ къ ни̑мъ свѣ́тлый бжⷭ҇тва̀ ѻ҆́гнь, сꙋ́щꙋю бл҃года́ть бж҃їю, сохра́ньшꙋю и҆̀хъ въ пла́мени халде́йстѣмъ невреди̑мы. то́ежде бл҃гоче́стїе привлечѐ и҆ къ твоемꙋ̀, бл҃же́нне, тѣ́лꙋ бл҃года́ть, сохра́ньшꙋю є҆̀ невреди́мо ѿ тлѝ въ нѣ́дрѣхъ земны́хъ. и҆ ны́нѣ, пребыва́ѧй съ на́ми, сѷмеѡ́не, ꙗ҆́кѡ прича́стникъ бжⷭ҇твеннагѡ ѻ҆гнѧ̀, возжзѝ въ на́съ ѻ҆́гнь ре́вности по бл҃гоче́стїю, ꙗ҆́кѡ да и҆ мы̀ си́мъ сохра́ньшесѧ пла́мене страсте́й, воспрїи́мемъ пѣ́снь ѻ҆́нѣхъ ѻ҆трокѡ́въ, є҆́же взыва́ти хрⷭ҇тꙋ̀ вы́нꙋ: бл҃гослове́нъ є҆сѝ бж҃е ѻ҆тє́цъ на́шихъ.

Тропа́рь

Чꙋ́дно бы́сть халде́ємъ видѣ́нїе трїе́хъ ѻ҆трокѡ́въ, неѡпали́вшихсѧ пла́менемъ ѻ҆гнѧ̀. та́кожде ᲂу҆диви́шасѧ хрⷭ҇тоимени́тїи лю́дїе и҆ ᲂу҆мили́шасѧ се́рдцемъ, ви́дѣвше тво́й гро́бъ, бл҃же́нне, восходѧ́щь ѿ землѝ. є҆гда́ же ᲂу҆зрѣ́ша въ не́мъ нетлѣ̑нныѧ мо́щи твоѧ̀ и҆ точа́ща чꙋдесы̀ пресла̑вны бж҃е́ственною си́лою, въ ни́хъ ѡ҆бита́ющею, и҆ па́че почꙋди́шасѧ и҆ стра́хомъ и҆ ра́достїю ѡ҆б̾ѧ́ти бы́вше со ᲂу҆миле́нїемъ славосло́вѧхꙋ гдⷭ҇а, ди́внаѧ творѧ́щаго во ст҃ы́хъ свои́хъ. тѣ́мже и҆ мы̀ торжествꙋ́юще дне́сь па́мѧть твою̀, ст҃е, гла́сомъ трїе́хъ ѻ҆́нѣхъ ѻ҆трокѡ́въ, бл҃года́рственнѡ взыва́емъ хрⷭ҇тꙋ̀ сп҃сꙋ всѣ́хъ: бл҃гослове́нъ є҆сѝ, бж҃е ѻ҆тє́цъ на́шихъ.

Тропа́рь

Вои́стиннꙋ ве́лїе, ꙗ҆́коже то̀ трїе́хъ ѻ҆трокѡ́въ въ вавѷлѡ́нѣ, та́кожде и҆ твоѐ, бл҃же́нне, бы́сть ѻ҆́но чꙋ́до, ꙗ҆́кѡ чєстны́ѧ мо́щи твоѧ̑, по толи́цѣхъ лѣ́тѣхъ ѡ҆брѣто́шасѧ цѣ̑лы и҆ неразрꙋши̑мы, сохранѧ́емы въ землѝ бж҃е́ственною бл҃года́тїю, и҆ и҆зда́вшесѧ си́лою є҆ѧ̀ ѿ нѣ́дръ земны́хъ, ꙗ҆́кѡ свѣти́льникъ, є҆гѡ́же гдⷭ҇ь поста́ви не подъ спꙋ́домъ, но на свѣ́щницѣ, да свѣ́титъ всѣ̑мъ сїѧ́нїемъ чꙋде́съ, ѡ҆зари́ша и҆ ѡ҆богати́ша правосла́вныхъ разꙋмѣ́нїемъ бж҃е́ственнымъ. ᲂу҆цѣломꙋ́дритесѧ ны́нѣ, вопїю́щїи, и҆ возлюби́те па́че всѣ́хъ гдⷭ҇а, да бл҃года́ть ѡ҆брѧ́щете вѣ́чнꙋю, є҆ще́ же и҆ подаю́щꙋ всѣ̑мъ и҆сцѣле́нїе притека́ющымъ къ тебѣ̀. тебѣ́ же и҆ мы̀ покланѧ́ющесѧ, ра́достнѡ пое́мъ пѣ́снь трїе́хъ ѻ҆́нѣхъ ѻ҆трокѡ́въ, хрⷭ҇тꙋ̀ сподо́бившꙋ на́съ таковы́ѧ бл҃года́ти. бл҃гослове́нъ є҆сѝ, бж҃е ѻ҆тє́цъ на́шихъ.

Тропа́рь

Ꙗ҆́кѡ фі́нїѯъ процвѣтѐ тѣ́ло твоѐ нетлѣ́нїемъ, бл҃же́нне, и҆ ꙗ҆́кѡ ке́дръ, и҆́же въ лїва́нѣ, ᲂу҆мно́жисѧ чꙋдесы̀, приносѧ́щи бж҃е́ственнꙋю жи́знь. сегѡ̀ ра́ди сиби́рскаѧ страна̀, и҆мꙋ́щи тѧ̀ моли́твенника, ꙗ҆́кѡ бж҃е́ственный зри́тсѧ ра́й, цвѣ́ты разли̑чныѧ приносѧ́ще чꙋде́съ. и҆́миже, ꙗ҆́кѡ дре́вле вавѷлѡ́нѧне чꙋ́домъ трїе́хъ ѻ҆трокѡ́въ вразꙋмлѧ́еми бы́ша въ и҆́стиннѣй си́хъ вѣ́рѣ, та́кѡ лю́дїе спаса́емїи при́снѡ ᲂу҆твержда́ютсѧ въ и҆́стиннѣй вѣ́рѣ бж҃їей, вводѧ́щей въ живо́тъ вѣ́чный, є҆го́же да́рꙋетъ гдⷭ҇ь свои̑мъ ᲂу҆го́дникѡмъ, бл҃гослове́нъ сы́й бг҃ъ ѻ҆тє́цъ на́шихъ.

Богороди́ченъ

Зри́ши, прест҃а́ѧ дв҃о, ꙗ҆́кѡ въ пла́мени грѣхо́внѣмъ и҆счеза́ютъ дні́е на̑ша. мл҃твами твои́ми съ првⷣнымъ сѷмеѡ́номъ сотворѝ, ꙗ҆́кѡ да не погꙋби́тъ сі́й пла́мень на́съ до конца̀, но росо́ю свѣ́тлагѡ бж҃е́ственнагѡ ѻ҆гнѧ̀ ᲂу҆тꙋ́шенъ бꙋ́детъ. и҆ мы̀ та́кѡ невреди́ми ѿ пла́мене є҆гѡ̀ ꙗ҆ви́вшесѧ, пода́телю тогѡ̀ ѻ҆гнѧ̀ сн҃ꙋ твоемꙋ̀ вы́нꙋ взыва́емъ: бл҃гослове́нъ є҆сѝ, бж҃е ѻ҆тє́цъ на́шихъ.

Пѣ́снь и҃

І҆рмо́съ

Нестерпи́момꙋ ѻ҆гню̀ соедини́вшесѧ, бг҃оче́стїѧ предстоѧ́ще ю҆́нѡши, пла́менемъ же неврежде́ни бж҃е́ственнꙋю пѣ́снь поѧ́хꙋ: бл҃гослови́те всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

Тропа́рь

Ꙗ҆́коже бл҃гочести́вїи ѻ҆́троцы въ пещѝ вавѷлѡ́нстѣй пла́менемъ и҆ногда̀ неврежде́ни бы́ша, бж҃е́ственною си́лою та́кѡ сподо́бившїисѧ по́мощи твоеѧ̀, бл҃же́нне, спасе́ни бы́ша, ѿ многоразли́чныхъ ѕѡ́лъ, ꙗ҆́кѡ пла́менемъ ѻ҆гнѧ̀ и҆̀хъ ѡ҆бдержа́щихъ. тѣ́мже ѡ҆бновлѧ́ющїѧсѧ въ дꙋша́хъ вѣ́рныхъ чꙋдеса̀ твоѧ̑ дне́сь въ па́мѧти твое́й, ꙗ҆́коже чꙋ́до въ пещѝ вавѷлѡ́нстѣй ю҆́нѡши ѻ҆́ны, пѣ́ти всѣ́хъ наꙋча́ютъ: бл҃гослови́те всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

Тропа́рь

Бг҃ото́чный и҆сто́чникъ, ѡ҆роша́ющь стра́ждꙋщихъ въ пла́мени нестерпи́мыхъ ѕѡ́лъ, гдⷭ҇ь ꙗ҆ви́ тѧ, бл҃же́нне, ꙗ҆́кѡ вои́стиннꙋ сокро́вище дарова́нїй, мы́ же, моли́твами твои́ми, сподоблѧ́емсѧ бы́ти невреди́ми ѿ ѕлы́хъ. ѿ незави́стныхъ бо во́дъ дх҃о́вныѧ бл҃года́ти всѣ̑мъ, съ те́плою вѣ́рою прибѣга́ющымъ къ тебѣ̀, подае́ши бл҃гопотрє́бнаѧ ко сп҃се́нїю, и҆ та́кѡ твори́ши, ꙗ҆́кѡ да всѝ ра́достнѡ торжествꙋ́юще па́мѧть твою̀, согла́снѡ вопїе́мъ: бл҃гослови́те всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

Тропа́рь

Чꙋде́съ твои́хъ, бл҃же́нне, рѣ́ки и҆злїѧ́вшесѧ и҆сцѣле́нїй, бе́зднꙋ тѧ̀ ꙗ҆ви́ша, точа́щꙋ бл҃года́ть гдⷭ҇а. и҆ні́и бо стражда̀ нестерпи́мою бо́лїю во ѻ҆́чїю своє́ю, пе́рстїю то́кмо ѿ гро́ба твоегѡ̀ ѡ҆бложи́вше ѧ҆̀, и҆ ѡ҆ се́мъ ᲂу҆крѣпи́вшесѧ, прозрѣ́ша, дрꙋзі́и же прикоснове́нїемъ то́кмо къ мощє́мъ твои̑мъ ѡ҆блегче́нїе въ болѣ́зни полꙋчи́ша: пре́жде сꙋ́щїи нѣмі́и глаго́ланїе прїѧ́ша: печа́льнїи крѣ́пкое ᲂу҆тѣше́нїе, хромі́и бл҃готече́нїе, разсла́бленнїи и҆справле́нїе, болѧ́щїи нога́ма здра́вїе: та́кожде мнѡ́ги ᲂу҆трѡ́бы неплѡ́дны содѣ́лашасѧ многоча̑дны, пїю́ще то́кмо во́дꙋ ѿ мѣ́ста ꙗ҆вле́нїѧ твои́хъ моще́й, мнѡ́зи же є҆ле́емъ ѿ канди́ла твоегѡ̀ и҆сцѣли́шасѧ ѿ неисцѣ́льныхъ болѣ́зней. и҆ всѣ̑мъ всѧ́кѡ пролива́еши тꙋ̑чи врачева́нїй, ᲂу҆ставлѧ́ѧ пале́нїе недꙋ́гѡвъ, и҆ лю́ди си́хъ свобо́ждшыѧсѧ ᲂу҆строѧ́еши пѣснопѣ́ти: бл҃гослови́те всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

Тропа́рь

Вельми́ тѧ просла́ви гдⷭ҇ь, бл҃же́нне, въ чꙋдесѣ́хъ, ѿ любве́ бо и҆ вѣ́ры ст҃о́е то́кмо и҆́мѧ твоѐ призыва́ющїи, а҆́бїе ᲂу҆слы́шани быва́ютъ ꙗ҆́коже плѣне́ннїи и҆ногда̀ пога́ными, и҆ стра́ждꙋщїи ѿ дꙋ́хъ нечи́стыхъ, и҆ и҆ні́и мнѡ́зи болѧ́щїи, и҆ николи́же скꙋ́дни по́мощи твоеѧ̀ ѡ҆ставлѧ́ютсѧ. и҆ не то́чїю тща́щымсѧ и҆́мѧ твоѐ нарица́ти, но и҆ ѻ҆́бразъ тво́й, любо́вїю, ꙗ҆́же къ тебѣ̀, написꙋ́ющымъ, вели́къ помо́щникъ ꙗ҆влѧ́ешисѧ. къ си̑мъ же и҆ невѣ́дꙋщымъ тѧ̀ болѧ́щымъ, ꙗ҆́кѡ и҆ во мнѡ́ги стра́ны и҆ вє́си произы́де и҆ слы́шана бы́сть сла́ва и҆́мене твоегѡ̀, въ со́нїихъ ꙗ҆влѧ́ѧсѧ, врачꙋ́еши ѧ҆̀. тѣ́мже па́мѧть твою̀ пра́зднꙋюще, въ прославле́нїе гдⷭ҇а просла́вльшагѡ та́кѡ тѧ̀ велегла́снѡ взыва́емъ: бл҃гослови́те всѧ̑ дѣла̀ гдⷭ҇нѧ, гдⷭ҇а, и҆ превозноси́те во всѧ̑ вѣ́ки.

Богороди́ченъ

Ѻ҆́бразы носѧ́щи дре́вле твоегѡ̀ ржⷭ҇тва̀, ю҆́нѡши не ѡ҆палѧ́етъ, дв҃о, пе́щь, ꙗ҆́коже не ѡ҆палѝ ᲂу҆тро́бꙋ твою̀ ѻ҆́гнь бжⷭ҇твенный. всѧ̑ бо твори́тъ і҆и҃съ сн҃ъ тво́й, бг҃ъ и҆ чл҃вѣ́къ, є҆го́же превозно́симъ во всѧ̑ вѣ́ки.

Пѣ́снь ѳ҃

І҆рмо́съ

Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ сп҃се́нїѧ на́мъ въ домꙋ̀ дв҃да ѻ҆́трока своегѡ̀, милосе́рдїѧ ра́ди млⷭ҇ти, въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.

Тропа́рь

Бл҃гослове́нъ гдⷭ҇ь бг҃ъ, ꙗ҆ви́вый тѧ̀, бл҃же́нне, споспѣ́шника всѣ̑мъ ко сп҃се́нїю житїе́мъ твои́мъ и҆ наста́вника сло́вомъ. лѣ́ствица бо нб҃овосхо́днаѧ житїѐ твоѐ бы́сть, сло́во же твоѐ бл҃года́тїю срастворе́но є҆́сть, наꙋча́юще трезве́нїю дꙋшѝ и҆ тѣ́ла, и҆ воздержа́нїю по бл҃гоче́стїю, и҆ та́кѡ направлѧ́юще всѣ́хъ на пꙋ́ть ми́ра.

Тропа́рь

Бл҃гослове́нъ гдⷭ҇ь бг҃ъ, дарова́вый на́мъ тебѐ, бл҃же́нне, чꙋдотво́рца преди́вна, кꙋ́пнѡ же и҆ стѣ́нꙋ и҆ предгра́дїе ѿ ѧ҆зыкоѕло́бїѧ и҆ ѡ҆ѕлобле́нїѧ заблꙋ́ждшихъ ѿ и҆́стинныѧ вѣ́ры. и҆́хже чꙋдесы̀ ѿ моще́й твои́хъ дале́че ѿгна́лъ є҆сѝ ѿ ѻ҆́бласти верхотꙋ́рскїѧ, не терпѧ̀ рачи́телей є҆ресе́й и҆ хꙋле́нїѧ и҆спо́лненныхъ на правосла́вїе бы́ти та́мѡ, и҆дѣ́же ꙗ҆ви́шасѧ мо́щи твоѧ̑: чꙋ̑днаѧ бо зна́мєнїѧ ѿ си́хъ, ꙗ҆́кѡ ѻ҆́гнь палѧ́щь, ꙗ҆ви́шасѧ въ посрамле́нїе є҆ретїкѡ́мъ, на́мъ же всѣ̑мъ во ᲂу҆твержде́нїе на пꙋ́ть ми́ра.

Тропа́рь

Бл҃гослове́нъ гдⷭ҇ь бг҃ъ, поста́вивый тѧ̀, бл҃же́нне, хода́таѧ на нб҃сѝ и҆ моли́твенника ѡ҆ на́съ. а҆́ще бо и҆ землѧ̀ сокры́ла тѧ̀, но горѣ́ тѧ всѝ бога́тна и҆́мамы предста́телѧ и҆ моли́твенника къ бг҃ꙋ, любо́вїю чтꙋ́щыѧ тѧ̀, ꙗ҆́коже и҆ногда̀ моли́твами твои́ми, спа́слъ є҆сѝ и҆ны̑ѧ ѿ потопле́нїѧ, и҆ны̑ѧ ѿ ѻ҆́гненнагѡ запале́нїѧ, призыва́ющыѧ ст҃о́е и҆́мѧ твоѐ и҆ молѧ́щыѧсѧ тебѣ̀ ѡ҆ по́мощи, и҆ и҆ны̑ѧ ѿ неизбѣ́жныѧ сме́рти въ болѣ́зни и҆́хъ: и҆ та́кѡ всѣ́хъ напра́вилъ є҆сѝ на пꙋ́ть ми́ра.

Тропа́рь

Бл҃гослове́нъ гдⷭ҇ь бг҃ъ, сподо́бивый прославле́нїе твоѐ, бл҃же́нне, свѣтоза́рное и҆ чꙋдеса̀ пресла̑внаѧ воспѣ́ти, є҆ли́кѡ мо́щно є҆́сть на́мъ. ты́ же, бл҃госе́рде, не ѿста́ви по́мощи твоеѧ̀ ѿ на́съ, со ᲂу҆миле́нїемъ про́симъ тѧ̀, и҆ не помѧнѝ беззако́нїй на́шихъ, но ѡ҆брати́сѧ на ми́лость, и҆ молѝ ми́лостиваго бг҃а, дарова́ти ми́ръ мі́рови, и҆ всѣ̑мъ согрѣше́нїй проще́нїе и҆ дꙋша́мъ, и҆ тѣлесє́мъ здра́вїе и҆ напра́вити всѣ́хъ на пꙋ́ть ми́ра.

Богороди́ченъ

Бл҃гослове́нъ гдⷭ҇ь бг҃ъ, тобо́ю, прест҃а́ѧ дв҃о, посѣти́вый на́съ восто́къ свы́ше, просвѣти́ти во тьмѣ̀ и҆ сѣ́ни сѣдѧ́щыѧ, и҆ напра́вити но́ги на́шѧ на пꙋ́ть ми́ра.