Православный календарь
Размер шрифта:

Ака́ѳістъ

А҆ка́ѳїстъ чтⷭ҇но́мꙋ и҆ животворѧ́щемꙋ крⷭ҇тꙋ̀ гдⷭ҇ню

Воздвижение Честного и Животворящего Креста Господня 27 сентября 2026

Конда́къ а҃

Прїиди́те, хрⷭ҇тоимени́тїи лю́дїе, соста́вимъ похвалꙋ̀ чтⷭ҇но́мꙋ крⷭ҇тꙋ̀, на не́мъ же хрⷭ҇то́съ, цр҃ь сла́вы, рꙋ́цѣ распросте́ръ, возведѐ на́съ на пе́рвое бл҃же́нство, и҆з̾ него́же низпадо́хомъ пре́лестїю ѕмі́евою. Ты́ же, ѽ, прест҃ы́й крⷭ҇те, ꙗ҆́кѡ и҆мѣ́ѧй присꙋ́щꙋю тебѣ̀ си́лꙋ распѧ́тагѡ хрⷭ҇та̀, сп҃са́й и҆ сохранѧ́й ѿ всѧ́кихъ бѣ́дъ любо́внѡ зовꙋ́щїѧ тѝ:

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

І҆́косъ а҃

А҆́гг҃лѡвъ ли́цы, ꙗ҆́кѡ бж҃їи слꙋжи́телїе, крⷭ҇тъ ѡ҆бстоѧ́ще, во́льнꙋю стра́сть хрⷭ҇та̀ жизнода́вца прославлѧ́ютъ. Мы́ же страда́ньми тогѡ̀ вѣ́чныѧ сме́рти и҆зба́вльшесѧ, подража́ѧ го́рнимъ си́ламъ, ра́достнѡ взыва́емъ:

Ра́дꙋйсѧ, крⷭ҇те, ꙗ҆́кѡ на тебѣ̀ хрⷭ҇то́съ бг҃ъ на́шъ, во́лею рꙋ́цѣ распросте́ръ, сп҃се́нїе на́ше содѣ́ла: ра́дꙋйсѧ, ꙗ҆́кѡ распросте́ршимсѧ на тебѣ̀ хрⷭ҇то́мъ престꙋпле́нїе а҆да́ма и҆ є҆́ѵы, просте́ршихъ рꙋ́цѣ ко дре́вꙋ запреще́нномꙋ, ᲂу҆праздни́сѧ.

Ра́дꙋйсѧ, ꙗ҆́кѡ воздви́женꙋ бы́вшꙋ на тебѣ̀, а҆́ки престꙋ́пнꙋ, законода́вцꙋ, дре́внѧѧ клѧ́тва, ꙗ҆́же на на́съ бы́вшаѧ, потреби́сѧ: ра́дꙋйсѧ, ꙗ҆́кѡ содѣ́ѧвшимсѧ на тебѣ̀ стра́ннымъ та́инствомъ ро́дъ чл҃вѣ́ческїй ѿ тлѝ сме́ртныѧ свободи́сѧ.

Ра́дꙋйсѧ, ꙗ҆́кѡ пострада́вшимъ и҆ ᲂу҆ме́ршимъ на тебѣ̀ жа́ло сме́рти сокрꙋши́сѧ: ра́дꙋйсѧ, тогѡ̀ ра́ди страда́нїѧ бг҃ъ съ чл҃вѣ́ки примири́сѧ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ в҃

Ви́дѧ па́дшихъ чл҃вѣ́кѡвъ, гдⷭ҇и, ты̀ вочл҃вѣ́чивсѧ, крⷭ҇тъ и҆ сме́рть во́льнѡ пло́тїю претерпѣ́лъ є҆сѝ за ро́дъ на́шъ, да ѿ сме́рти вѣ́чныѧ и҆зба́виши и҆сповѣ́дающыѧ тѧ̀, сн҃а бж҃їѧ и҆ вопїю́щїѧ тѝ: А҆ллилꙋ́їа.

І҆́косъ в҃

Ра́зꙋмъ чл҃вѣ́чъ и҆знемога́етъ въ постиже́нїи ве́лїѧ та́йны твоегѡ̀, хрⷭ҇тѐ, воплоще́нїѧ и҆ во́льнагѡ за ны̀ страда́нїѧ: ка́кѡ ты̀, бг҃ъ сы́й безстра́стный, стра́сть крⷭ҇тнꙋю, ꙗ҆́кѡ чл҃вѣ́къ, претерпѣ́лъ є҆сѝ и҆ сїѐ ѻ҆рꙋ́дїе сме́рти твоеѧ̀ содѣ́лалъ є҆сѝ и҆сто́чникомъ жи́зни и҆ сп҃се́нїѧ всѣ̑мъ бл҃гоче́стнѡ въ тѧ̀ вѣ́рꙋющымъ и҆ хвале́бнѡ воспѣва́ющымъ:

Ра́дꙋйсѧ, крⷭ҇те, на не́мже содѣ́ѧсѧ та́инство, ѿ вѣ́ка предѡпредѣле́нное: ра́дꙋйсѧ, ꙗ҆́кѡ на тебѣ̀ соверши́сѧ на́ше и҆скꙋпле́нїе, многоѻбра́знѣ во ѻ҆́бразѣхъ и҆ сѣ́нѣхъ пред̾ѧвле́нное.

Ра́дꙋйсѧ, ꙗ҆́кѡ ᲂу҆ме́рый на тебѣ̀ жизнода́вецъ, кро́вь и҆ во́дꙋ и҆сточѝ, и҆́миже грѣхѝ на̑ша ѡ҆мыва́ютсѧ: ра́дꙋйсѧ, ꙗ҆́кѡ ка́плѧми ст҃ѣ́йшей кро́вѣ є҆гѡ̀ грѣхѡ́вныѧ стрꙋ́пы дꙋ́шъ на́шихъ ѡ҆чища́ютсѧ.

Ра́дꙋйсѧ, крⷭ҇те, ꙗ҆́коже дре́во живо́тное, є҆́же є҆́сть посредѣ̀ раѧ̀ бж҃їѧ, хрⷭ҇тїа́нѡмъ вожделѣ́нный: ра́дꙋйсѧ, плода́ми безсме́ртїѧ ᲂу҆́мнѡ на́съ пита́ющїй и҆ наде́ждою жи́зни вѣ́чныѧ малодꙋ́шїе на́ше ѡ҆бодрѧ́ющїй.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ г҃

Крⷭ҇тъ тво́й, а҆́ще и҆ дре́во ви́димѡ є҆́сть сꙋщество́мъ, но бжⷭ҇твенною ѡ҆дѣ́ѧно є҆́сть си́лою, и҆ чꙋ́вственное мі́ра выѧвлѧ́емо ᲂу҆́мнѡ на́ше чꙋдотвори́тъ сп҃се́нїе, подвиза́ѧ пѣ́ти тебѣ̀: А҆ллилꙋ́їа.

І҆́косъ г҃

И҆мꙋ́ще пред̾ ѻ҆чи́ма на́шима крⷭ҇тъ прест҃ы́й, ст҃олѣ́пнымъ поклоне́нїемъ то́й почита́емъ распе́ншагосѧ ра́ди на не́мъ сп҃са хрⷭ҇та̀, и҆ лобыза́юще взыва́емъ:

Ра́дꙋйсѧ, крⷭ҇те, просла́вленный послꙋша́нїемъ и҆ страда́нїемъ хрⷭ҇то́вымъ: ра́дꙋйсѧ, возвели́ченный возвыше́нїемъ на тебѣ̀ сн҃а бж҃їѧ, и҆́же ве́сь мі́ръ ѿ паде́нїѧ а҆да́млѧ воздви́же.

Ра́дꙋйсѧ, ꙗ҆́кѡ сбы́вшагосѧ на тебѣ̀ ᲂу҆жа́снагѡ та́инства землѝ ᲂу҆жасе́сѧ и҆ вострепета̀, а҆́ки бы хотѧ́щи поглоти́ти законопрестꙋ́пныѧ: ра́дꙋйсѧ, ꙗ҆́кѡ закла́вшꙋсѧ на тебѣ̀ а҆́гнцꙋ бж҃їю завѣ́са хра́ма раздра́сѧ и҆ же́ртва ветхозавѣ́тнаѧ ᲂу҆праздни́сѧ.

Ра́дꙋйсѧ, крⷭ҇те, ꙗ҆́кѡ распа́дшꙋсѧ под̾ тобо́ю ка́мню, каменносерде́чнїи ро́ди є҆вре́йстїи невѣ́рїемъ ѿ бг҃а ѿпадо́ша, бл҃года́ти же сщ҃е́нства и҆ ца́рства лиши́шасѧ: ра́дꙋйсѧ, ꙗ҆́кѡ ѡ҆мрачи́вшꙋсѧ со́лнцꙋ въ стра́сти хрⷭ҇то́вой но́щь многобо́жїѧ пре́йде и҆ свѣ́тъ вѣ́ры возсїѧ̀.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ д҃

Бꙋ́рею ѕло́бы ды́шꙋще и҆ за́вистїю дви́жими, первосщ҃е́нницы і҆ꙋде́йстїи скры́ша въ зе́млю крⷭ҇тъ тво́й, хрⷭ҇тѐ бж҃е, да не бꙋ́детъ ѡ҆бличе́нїемъ безꙋ́мїе и҆̀хъ: но то́й, ꙗ҆́кѡ сокро́вище драго́е, и҆з̾ нѣ́дръ землѝ возсїѧ̀, тща́нїемъ бл҃гочести́выѧ цари́цы є҆ле́ны ѡ҆брѣ́тенный и҆ на ра́дость всемꙋ̀ мі́рꙋ ꙗ҆вле́нный, съ бг҃окра́сною пѣ́снїю: А҆ллилꙋ́їа.

І҆́косъ д҃

Ви́дѣвше тогда̀ хрⷭ҇тїа́нстїи лю́дїе чтⷭ҇на́гѡ крⷭ҇та̀ ѡ҆брѣ́тенїе, прославлѧ́хꙋ распе́ншагосѧ на не́мъ хрⷭ҇та̀ бг҃а, гдⷭ҇и, поми́лꙋй взыва́юще. Мы́ же ны́нѣ, подража́юще и҆́мъ, прославлѧ́емъ крⷭ҇тъ є҆гѡ̀ ст҃ы́й хвале́ньми сицевы́ми:

Ра́дꙋйсѧ, крⷭ҇те, въ зе́млю сокрове́нный и҆ ѡ҆скверне́нное грѣха́ми на́ше є҆стество̀ земно́е ѡ҆ст҃и́вый: ра́дꙋйсѧ, ꙗ҆вле́нїемъ свои́мъ и҆з̾ нѣ́дръ земны́хъ хꙋли́телей воплоще́нїѧ и҆ бжⷭ҇тва̀ хрⷭ҇то́ва посрами́вый.

Ра́дꙋйсѧ, ꙗ҆́кѡ пострада́вый на тебѣ̀ пло́тїю прїѧ̀ всѧ́кꙋ вла́сть на нб҃сѝ и҆ на землѝ, да всѣ́хъ и҆ всѧ̑ къ бг҃ꙋ ѻ҆ц҃ꙋ̀ приведе́тъ: ра́дꙋйсѧ, ꙗ҆́кѡ ᲂу҆ме́рый на тебѣ̀ ꙗ҆́кѡ чл҃вѣ́къ си́лою бжⷭ҇тва̀ своегѡ̀ сокрꙋшѝ закле́пы а҆́да и҆ и҆зведѐ ѿтꙋ́да дꙋ́ши пра́ведныхъ.

Ра́дꙋйсѧ, крⷭ҇те, ꙗ҆́кѡ разбо́йникъ бл҃горазꙋ́мный, хрⷭ҇тꙋ̀ сраспѧ́выйсѧ, тогѡ̀ и҆сповѣ́давый, тобо́ю, а҆́ки лѣ́ствицею, на нб҃са̀ взы́де: ра́дꙋйсѧ, ꙗ҆́кѡ и҆ всѣ́хъ ѿсѣче́нїемъ стрⷭ҇те́й хрⷭ҇тꙋ̀ сраспина́ющихсѧ возво́диши въ црⷭ҇твїе нбⷭ҇ное.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ є҃

Гдⷭ҇и, при мѡѷсе́е и҆ногда̀ прⷪ҇ро́цѣ то́чїю ѻ҆́бразъ крⷭ҇та̀ твоегѡ̀ ꙗ҆влѧ́емъ побѣжда́ше вразѝ твоѧ̑, ны́нѣ же са́мый крⷭ҇тъ тво́й и҆мꙋ́ще, по́мощи про́симъ: ᲂу҆крѣпѝ цр҃ковь твою̀ и҆ да́рꙋй є҆́й побѣ̑ды на врагѝ, да расточа́тсѧ всѝ вразѝ твоѝ, не вопїю́щїи тѝ: А҆ллилꙋ́їа.

І҆́косъ є҃

Чтⷭ҇на́гѡ крⷭ҇та̀, хрⷭ҇тѐ, дѣ́йство проѡбрази́въ мѡѷсе́й, побѣдѝ а҆мали́ка въ пꙋсты́нѣ сїна́йстѣй: є҆гда́ бо простира́ше рꙋ́цѣ, крⷭ҇та̀ ѻ҆́бразъ творѧ̀, ᲂу҆крѣплѧ́хꙋсѧ лю́дїе: ны́нѣ же всѐ веще́й сбытїѐ въ на́съ и҆спо́лнисѧ: дне́сь крⷭ҇тъ воздвиза́етсѧ, и҆ де́мони бѣ́гаютъ, дне́сь тва́рь всѧ̀ ѿ тлѝ свободи́сѧ, ꙗ҆́кѡ всѧ̑ крⷭ҇та̀ ра́ди возсїѧ́ша на́мъ дарова̑нїѧ. Тѣ́мже, ра́дꙋющесѧ, вопїе́мъ:

Ра́дꙋйсѧ, крⷭ҇те, ѻ҆рꙋ́жїе хрⷭ҇то́во стра́шное, є҆го́же де́мони трепе́щꙋтъ: ра́дꙋйсѧ, ꙗ҆́кѡ си́лою на тебѣ̀ распѧ́тагѡ хрⷭ҇та̀ бѣсо́встїи пѡ́лчища дале́че прогонѧ́ютсѧ.

Ра́дꙋйсѧ, ꙗ҆́кѡ си́лою дѣ́йствꙋющїѧ въ тебѣ̀ бжⷭ҇твенныѧ блгⷣти побѣ̑ды на сопроти̑вныѧ хрⷭ҇толюби̑вымъ лю́дємъ да́рꙋютсѧ: ра́дꙋйсѧ, ꙗ҆́кѡ ѿ тебє̀, ꙗ҆́кѡ высокора́сленнагѡ и҆ многоплодови́тагѡ дре́ва хрⷭ҇то́ва на тебѣ̀ страда́нїѧ, плоды̀ жи́зни и҆ сп҃се́нїѧ на́мъ произраста́ютъ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ ѕ҃

Проповѣ́дникомъ си́лы и҆ бжⷭ҇тва̀ хрⷭ҇то́ва ꙗ҆ви́сѧ и҆ногда̀ животворѧ́щее дре́во крⷭ҇тное, є҆гда̀ прикоснове́нїемъ свои́мъ воскресѝ ме́ртвагѡ и҆ къ жи́зни возведѐ є҆гѡ̀, є҆́же ви́дѣвше, мно́зи ѿ і҆ꙋдє́й и҆ ꙗ҆зы́къ позна́ша ве́лїю бл҃гоче́стїѧ та́йнꙋ: ꙗ҆́кѡ сп҃се́нїѧ ра́ди чл҃вѣ́ческагѡ, бг҃ъ во пло́ти ꙗ҆ви́сѧ и҆ стра́сть крⷭ҇тнꙋю претерпѣ̀, да сп҃се́тъ вопїю́щїѧ є҆мꙋ̀: А҆ллилꙋ́їа.

І҆́косъ ѕ҃

Ꙗ҆́коже дре́во ра́йское преве́лїе, возвы́сисѧ на голго́ѳѣ чтⷭ҇ны́й крⷭ҇тъ хрⷭ҇то́въ, ѿѻнꙋ́дꙋже во всю̀ вселе́ннꙋю распрострѐ мы́слєнныѧ вѣ̑тви блгⷣти и҆ распе́ншагосѧ на не́мъ: под̾ є҆го́же сѣ́нїю ѡ҆брѣта́ютъ прохла́дꙋ пали́мїи зно́емъ страсте́й и҆ хотѧ́щїи бл҃гоче́стнѡ жи́ти ѡ҆ хрⷭ҇тѣ̀ і҆и҃сѣ. Тѣ́мже и҆ мы̀, блгⷣти тогѡ̀ прича́стницы, ве́село взыва́емъ:

Ра́дꙋйсѧ, ст҃ы́й крⷭ҇те, дре́вомъ жи́зни, а҆да́ма ра́ди въ є҆де́мѣ насажде́ннымъ, проѻбраже́нный: ра́дꙋйсѧ, но́вымъ а҆да́момъ, рꙋ́цѣ на тебѣ̀ распросте́ршимъ, мі́рꙋ ꙗ҆вле́нный.

Ра́дꙋйсѧ, ꙗ҆́кѡ под̾ сѣ́нь бл҃года́тнагѡ защище́нїѧ твоегѡ̀ всѝ вѣ́рнїи прибѣга́ютъ: ра́дꙋйсѧ, ꙗ҆́кѡ милосе́рдїемъ дарова́вшагѡ на́мъ тебѐ ка́ющїисѧ грѣ́шницы ѻ҆гнѧ̀ гее́нскагѡ и҆збѣга́ютъ.

Ра́дꙋйсѧ, крⷭ҇те, ᲂу҆тѣше́нїе на́ше въ ско́рбѣхъ и҆ печа́лѣхъ: ра́дꙋйсѧ, живи́тельнаѧ ѿра́до и҆ по́мощь и҆знемога́ющимъ въ борьбѣ̀ съ прило́гами страсте́й, мі́ра и҆ дїа́вола.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ з҃

Хотѧ̀ ꙗ҆ви́ти ро́дꙋ чл҃вѣ́ческомꙋ бл҃гости и҆ млⷭ҇рдїѧ своегѡ̀ неизслѣ́димꙋю пꙋчи́нꙋ, крⷭ҇тъ тво́й, гдⷭ҇и, да́лъ є҆сѝ на́мъ тве́рда блюсти́телѧ и҆ прогони́телѧ де́монѡвъ. Тѣ́мже вси́ мы, и҆̀же въ тѧ̀ вѣ́рꙋющїи, прославлѧ́емъ вели́чїе стра́сти твоеѧ̀, бл҃года́рнѡ пою́ще тебѣ̀: А҆ллилꙋ́їа.

І҆́косъ з҃

Ди́вны дѣла̀ ꙗ҆ви́лъ є҆сѝ, гдⷭ҇и, крⷭ҇то́мъ твои́мъ чтⷭ҇ны́мъ: распе́ншꙋсѧ бо тѝ на то́мъ пло́тїю, всѧ̀ тва́рь и҆змѣни́сѧ: со́лнце лꙋчѝ своѧ̑ сокры̀, ѡ҆снова̑нїѧ землѝ восколеба́хꙋсѧ, а҆́дъ сокрꙋши́сѧ держа́вою вла́сти твоеѧ̀ и҆ и҆зведѐ ю҆́зники, ꙗ҆́же ѿ вѣ́ка содержа́лъ є҆́сть. Сегѡ̀ ра́ди ᲂу҆вѧза́емъ то́й си́ми пѣ́сненными цвѣ́ты:

Ра́дꙋйсѧ, крⷭ҇те, ꙗ҆́кѡ пострада́вшемꙋ на тебѣ̀ всѧ̀ тва́рь сострада́ше, ꙗ҆́кѡ творцꙋ̀ своемꙋ̀ и҆ влⷣцѣ: ра́дꙋйсѧ, ꙗ҆́кѡ си́лꙋ тогѡ̀ и҆ бжⷭ҇тво̀ свидѣ́тельствовахꙋ со́лнце помраче́нїемъ и҆ землѧ̀ колеба́нїемъ.

Ра́дꙋйсѧ, ꙗ҆́кѡ ᲂу҆ме́рый на тебѣ̀ не ᲂу҆держа́нъ бы́сть въ ме́ртвыхъ, но, разрꙋши́въ держа́вꙋ сме́рти, въ тре́тїй де́нь воскре́се: ра́дꙋйсѧ, ꙗ҆́кѡ воскре́сшꙋ томꙋ̀ про́повѣдь є҆ѵⷢ҇льскаѧ, ѿ ли́ка а҆пⷭ҇льскагѡ наче́ншаѧсѧ, во всѧ̑ концы̀ землѝ и҆зы́де.

Ра́дꙋйсѧ, крⷭ҇те, ꙗ҆́кѡ тобо́ю кꙋмїрослꙋже́нїе и҆ многобо́жїе ꙗ҆зы́ческое ᲂу҆праздни́сѧ: ра́дꙋйсѧ, ꙗ҆́кѡ тебє̀ ра́ди пра́ваѧ вѣ́ра во є҆ди́нагѡ бг҃а, въ трⷪ҇цѣ сла́вимагѡ, по все́й землѝ ᲂу҆тверди́сѧ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ и҃

Стра́ннѡ бг҃а вочл҃вѣ́чшасѧ и҆ на крⷭ҇тѣ̀ ра́спѧта бы́вша мы́сленнѡ ви́дѧще, ᲂу҆страни́мсѧ сꙋ́етнагѡ мі́ра, ᲂу҆́мъ на нб҃са̀ прело́жше. Сегѡ̀ ра́ди бг҃ъ на зе́млю сни́де и҆ на крⷭ҇тъ взы́де, да тѣ́мъ, а҆́ки лѣ́ствицею, на нб҃са̀ возведе́тъ вопїю́щїѧ є҆мꙋ̀: А҆ллилꙋ́їа.

І҆́косъ и҃

Дне́сь а҆да́мъ со є҆́ѵою весели́тсѧ, предлежа́щїй ви́дѧще крⷭ҇тъ, и҆́мже пораже́нъ бы́сть сꙋпоста́тъ, и҆̀же дре́вле въ раѝ вкꙋше́нїемъ запреще́ннагѡ пло́да тѣ́хъ прельсти́вый и҆ плѣ́нники себѣ̀ сотвори́вый. Тѣ́мже и҆ мы̀, сра́дꙋющесѧ пра́ѻтцємъ на́шимъ ѡ҆ и҆збавле́нїи ѿ плѣне́нїѧ на́шегѡ дꙋше́внагѡ, бл҃гоговѣ́йнѡ воспѣва́емъ:

Ра́дꙋйсѧ, крⷭ҇те, ꙗ҆́кѡ на тебѣ̀ па́стырь до́брый дꙋ́шꙋ свою̀ положѝ за ѻ҆́вцы своѧ̑ и҆ да́же до а҆́да сни́де, и҆ща̀ заблꙋ́ждшихъ: ра́дꙋйсѧ, ꙗ҆́кѡ то́й не презрѣ̀ дѣ́ло рꙋкꙋ̀ свое́ю, а҆да́ма со є҆́ѵою, но со и҆нѣ́ми пра́ведники и҆схитѝ ѧ҆̀ и҆з̾ а҆́да, ꙗ҆́кѡ и҆з̾ че́люстей ѕвѣ́рѧ крѣ́пкагѡ, и҆ въ ра́й вселѝ и҆̀хъ.

Ра́дꙋйсѧ, ꙗ҆́кѡ на тебѣ̀ пригвожде́нномꙋ хрⷭ҇тꙋ̀ пла́менное ѻ҆рꙋ́жїе плещѝ дадѐ и҆ херꙋві́мъ, є҆де́мъ хранѧ́щїй, ѿстꙋпѝ ѿ дре́ва жи́зни: ра́дꙋйсѧ, ꙗ҆́кѡ мы̀, ны́нѣ кр҃ще́нїемъ возрожде́ннїи, во хрⷭ҇тѣ̀ но́выѧ лю́дїе, невозбра́ннѡ причаща́емсѧ ра́йскїѧ пи́щи.

Ра́дꙋйсѧ, крⷭ҇те, же́зле си́лы хрⷭ҇то́вы, ѿ сїѡ́на по́сланный, и҆́мже мы̀ пасе́мсѧ на па́житехъ є҆ѵⷢ҇льскихъ ᲂу҆че́нїй: ра́дꙋйсѧ, ꙗ҆́кѡ тобо́ю невреди́ми сохранѧ́емсѧ ѿ волкѡ́въ дꙋшегꙋ́бныхъ, ꙗ҆́кѡ льво́ве рыка́ющихъ и҆ и҆́щꙋщихъ, когѡ̀ поглоти́ти.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ ѳ҃

Всѧ́кихъ бѣ́дъ и҆ ко́зней вра́жїихъ и҆зба́ви ны̀, крⷭ҇те треблаже́нный, ꙗ҆́кѡ прїе́мый блгⷣть и҆ си́лꙋ ѿ пригвожде́ннагѡ на тебѣ̀ хрⷭ҇та̀, є҆мꙋ́же ꙗ҆́кѡ бг҃ꙋ и҆ и҆зба́вителю на́шемꙋ бл҃года́рственнѡ и҆ хвале́бнѡ пое́мъ: А҆ллилꙋ́їа.

І҆́косъ ѳ҃

Вѣті́йство всѧ́кое земноро́дныхъ не довлѣ́етъ къ прославле́нїю крⷭ҇та̀ твоегѡ̀, гдⷭ҇и, на не́мже сп҃се́нїе на́ше содѣ́лалъ є҆сѝ: тѣ́мже, недоꙋмѣва́юще восхвали́ти то́й по достоѧ́нїю, взыва́емъ си́це:

Ра́дꙋйсѧ, крⷭ҇те, ꙗ҆́кѡ вознесе́нный на тебѣ̀ сп҃съ мі́ра мнѡ́зи лю́ди въ позна́нїе своѐ призва̀ и҆ до ны́нѣ призыва́етъ.

Ра́дꙋйсѧ, ꙗ҆́кѡ возсїѧ́вый на тебѣ̀, а҆́ки на свѣ́щнице, свѣ́тъ и҆́стинный всѧ̑ концы̀ землѝ свѣ́томъ бг҃овѣ́дѣнїѧ ѡ҆зарѧ́етъ: ра́дꙋйсѧ, ꙗ҆́кѡ ны́нѣ восто́къ и҆ за́падъ пострада́вшагѡ на тебѣ̀ прославлѧ́ютъ.

Ра́дꙋйсѧ, ꙗ҆́кѡ и҆ тѧ̀, ꙗ҆́кѡ подно́жїе хрⷭ҇то́во, всѝ вѣ́рнїи, возносѧ́ще, прославлѧ́ютъ: ра́дꙋйсѧ, ꙗ҆́кѡ ѿ тебє̀, ꙗ҆́кѡ ѿ неизсѧка́емагѡ и҆сто́чника, хрⷭ҇тоимени́тїи лю́дїе ѻ҆би́лїе бл҃гъ вѣ́чныхъ почерпа́ютъ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ і҃

Сп҃сти́сѧ хотѧ́щимъ на́мъ и҆ под̾ сѣ́нь защище́нїѧ твоегѡ̀ прибѣга́ющымъ, бꙋ́ди помо́щникъ, прест҃ы́й крⷭ҇те, сохранѧ́ѧ ны̀ ѿ всѣ́хъ ѕѡ́лъ си́лою на тебѣ̀ распѧ́тагѡ хрⷭ҇та̀, є҆мꙋ́же ꙗ҆́кѡ бг҃ꙋ и҆ и҆зба́вителю на́шемꙋ бл҃года́рственнѡ и҆ хвале́бнѡ пое́мъ: А҆ллилꙋ́їа.

І҆́косъ і҃

Стѣна̀ є҆сѝ, ѡ҆гражда́ющаѧ на́съ ѿ бѣ́дъ и҆ напа́стей, крⷭ҇те всечтⷭ҇ны́й, и҆ сто́лпъ крѣ́пкїй проти́вꙋ лица̀ вра́жїѧ, къ немꙋ́же неви́димїи бори́телїе пристꙋпи́ти не смѣ́ютъ, боѧ́щесѧ взира́ти на си́лꙋ твою̀. Сегѡ̀ ра́ди съ вѣ́рою ѡ҆гражда́емсѧ ст҃ы́мъ твои́мъ зна́менїемъ и҆ ве́селѡ воспѣва́емъ:

Ра́дꙋйсѧ, пречⷭ҇тны́й крⷭ҇те хрⷭ҇то́въ, ѿ нападе́нїѧ дꙋхѡ́въ ѕлѡ́бы на́съ защища́ѧй: ра́дꙋйсѧ, ѿ разли́чныхъ стрѣ́лъ и҆̀хъ невреди́мы ны̀ сохранѧ́ѧй.

Ра́дꙋйсѧ, ꙗ҆́кѡ ѿ зна́менїѧ твоегѡ̀, съ вѣ́рою бл҃гочⷭ҇тнѡ твори́магѡ, всѧ̑ си̑лы а҆́да, ꙗ҆́кѡ ды́мъ ѿ вѣ́тра, и҆счеза́ютъ: ра́дꙋйсѧ, ꙗ҆́кѡ тобо́ю всѧ̑ крѣ́пость и҆̀хъ, ꙗ҆́кѡ во́скъ ѿ лица̀ ѻ҆гнѧ̀, и҆стаѧва́етъ.

Ра́дꙋйсѧ, ꙗ҆́кѡ ст҃і́и мч҃ницы, зна́менїемъ твои́мъ ѡ҆гражда́шесѧ и҆ и҆́мѧ хрⷭ҇то́во призва́вше, всѧ́кїй, ви́дъ мꙋче́нїй мꙋ́жественнѡ претерпѣ́ша: ра́дꙋйсѧ, ꙗ҆́кѡ прпⷣбнїи ѻ҆тцы̀ по́мощїю си́лы бжⷭ҇тва̀, зна́менїю твоемꙋ̀ присꙋ́щїѧ, бѣсѡ́вскаѧ страхова́нїѧ и҆ страсте́й возста̑нїѧ побѣди́ша.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ а҃і

Пѣ́нїе всеꙋмиле́нное прино́симъ тѝ, всечⷭ҇тны́й крⷭ҇те, и҆ смире́ннѡ мо́лимсѧ распѧ́томꙋ на тебѣ̀ хрⷭ҇тꙋ̀ бг҃ꙋ на́шемꙋ, и҆̀же дарова̀ на́мъ тебѐ во ѿра́дꙋ и҆ ᲂу҆тѣше́нїе въ ско́рбѣхъ, да стра́стїю свое́ю и҆зба́витъ на́съ ѿ страсте́й дꙋшевре́дныхъ и҆ наꙋчи́тъ бл҃говѣ́рнѡ воспѣва́ти є҆мꙋ̀: А҆ллилꙋ́їа.

І҆́косъ а҃і

Свѣ́томъ блгⷣти бж҃їей, та́инственнѣ тѝ присꙋ́щїѧ, просвѣтѝ на̑ша дꙋшє́внаѧ чꙋ́вствїѧ, крⷭ҇те прест҃ы́й, да то́ю ѡ҆зарѧ́еми и҆ наставлѧ́еми, не по́ткнемсѧ ѡ҆ ка́мень собла́зна, но да возмо́жемъ пꙋте́мъ за́повѣдей бж҃їихъ пра́вѡ ше́ствовати во все́й жи́зни на́шей, воспѣва́юще тѝ си́це:

Ра́дꙋйсѧ, непрестаю́щихъ чꙋде́съ хрⷭ҇то́выхъ вѣ́стниче и҆ млⷭ҇рдїѧ є҆гѡ̀ къ ро́дꙋ чл҃вѣ́ческомꙋ проповѣ́дниче: ра́дꙋйсѧ, крⷭ҇те, ро́да чл҃вѣ́ча ѡ҆бновле́нїе и҆ но́вагѡ завѣ́та хрⷭ҇то́ва печа́ть и҆ ᲂу҆твержде́нїе.

Ра́дꙋйсѧ, торжество̀ вѣ́ры хрⷭ҇тїа́нскїѧ и҆ бл҃гонаде́жный ꙗ҆́корю ᲂу҆пова́нїѧ на́шегѡ: ра́дꙋйсѧ, ст҃ы́хъ хра́мѡвъ бж҃їихъ ᲂу҆краше́нїе и҆ домѡ́въ бл҃гочести́выхъ ѡ҆гражде́нїе.

Ра́дꙋйсѧ, поле́й и҆ вертогра́дѡвъ бл҃гослове́нїе: ра́дꙋйсѧ всѣ́хъ стїхі́й ѡ҆сщ҃е́нїе.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ в҃і

Блгⷣть твою̀ всемо́щнꙋю пода́ждь на́мъ, гдⷭ҇и, да послѣ́дꙋемъ тебѣ̀, влⷣцѣ на́шемꙋ, взе́мше крⷭ҇тъ на́шъ, не гвоздьмѝ пригвожда́ющесѧ томꙋ̀, но трꙋда́ми, воздержа́нїемъ и҆ смире́нїемъ, да та́кѡ прича́стницы бꙋ́демъ страда́нїй твои́хъ, ѿ ни́хже и҆стека́ютъ пото́цы жи́зни вѣ́чныѧ, напаѧ́ющїѧ всѧ̑ правовѣ̑рныѧ, бл҃гоче́стнѡ пою́щїѧ тѝ: А҆ллилꙋ́їа.

І҆́косъ в҃і

Пою́ще вели́чїе твоѐ, всечтⷭ҇ны́й крⷭ҇те, восхвалѧ́емъ тѧ̀ всѝ, ꙗ҆́кѡ побѣдоно́сный ски́петръ цр҃ѧ̀ нбⷭ҇нагѡ, на́шегѡ же сп҃се́нїѧ всера́достное зна́менїе, тѣ́мже и҆ вопїе́мъ:

Ра́дꙋйсѧ, крⷭ҇те, правосла́вныхъ хрⷭ҇тїа́нъ держа́во и҆ несокрꙋши́мое и҆̀хъ ѡ҆гражде́нїе: ра́дꙋйсѧ, ст҃и́телей ᲂу҆краше́нїе и҆ всѣ́хъ подви́жникѡвъ вѣ́ры и҆ бл҃гоче́стїѧ си́ла и҆ подкрѣпле́нїе.

Ра́дꙋйсѧ, крⷭ҇те, ѿ колыбе́ли и҆ до гро́ба на всѣ́хъ пꙋте́хъ жи́зни на́съ ѡ҆гражда́ѧй и҆ по сме́рти на воздꙋ́шныхъ мыта́рствахъ ѿ дꙋхѡ́въ ѕло́бы на́съ защища́ѧй: ра́дꙋйсѧ, ꙗ҆́кѡ под̾ зна́менїемъ твои́мъ почива́ющїи, ᲂу҆ме́ршїи въ вѣ́рѣ и҆ бл҃гоче́стїи, въ послѣ́днїй де́нь воскре́снꙋтъ въ жи́знь вѣ́чнꙋю.

Ра́дꙋйсѧ, крⷭ҇те, ꙗ҆вле́нїемъ свои́мъ на нб҃сѝ предвари́ти и҆мы́й сла́вное второ́е прише́ствїе хрⷭ҇то́во: ра́дꙋйсѧ, ꙗ҆́кѡ распе́ншїи хрⷭ҇та̀ и҆ всѝ невѣ́рнїи ᲂу҆́зрѧтъ тѧ̀ тогда̀ и҆ го́рцѣ возрыда́ютъ, лю́бѧщїи же гдⷭ҇а, зрѧ́ще тѧ̀, вельмѝ возра́дꙋютсѧ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ г҃і

Ѽ пречтⷭ҇ны́й и҆ животворѧ́щїй крⷭ҇те гдⷭ҇ень, всѣ́хъ хрⷭ҇тїа́нъ ᲂу҆тѣше́нїе. Тѧ̀ ны́нѣ предлежа́ща ви́дѧще, возво́димсѧ мы́слїю къ распѧ́томꙋ на тебѣ̀ хрⷭ҇тꙋ̀, є҆мꙋ́же и҆ мо́лимсѧ смире́ннѡ, да тебє̀ ра́ди поми́лꙋетъ на́съ, грѣ́шныхъ, и҆ сподо́битъ въ селе́нїихъ ра́йскихъ воспѣва́ти є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ ли́цы, ꙗ҆́кѡ бж҃їи слꙋжи́телїе, крⷭ҇тъ ѡ҆бстоѧ́ще, во́льнꙋю стра́сть хрⷭ҇та̀ жизнода́вца прославлѧ́ютъ. Мы́ же страда́ньми тогѡ̀ вѣ́чныѧ сме́рти и҆зба́вльшесѧ, подража́ѧ го́рнимъ си́ламъ, ра́достнѡ взыва́емъ:

Ра́дꙋйсѧ, крⷭ҇те, ꙗ҆́кѡ на тебѣ̀ хрⷭ҇то́съ бг҃ъ на́шъ, во́лею рꙋ́цѣ распросте́ръ, сп҃се́нїе на́ше содѣ́ла: ра́дꙋйсѧ, ꙗ҆́кѡ распросте́ршимсѧ на тебѣ̀ хрⷭ҇то́мъ престꙋпле́нїе а҆да́ма и҆ є҆́ѵы, просте́ршихъ рꙋ́цѣ ко дре́вꙋ запреще́нномꙋ, ᲂу҆праздни́сѧ.

Ра́дꙋйсѧ, ꙗ҆́кѡ воздви́женꙋ бы́вшꙋ на тебѣ̀, а҆́ки престꙋ́пнꙋ, законода́вцꙋ, дре́внѧѧ клѧ́тва, ꙗ҆́же на на́съ бы́вшаѧ, потреби́сѧ: ра́дꙋйсѧ, ꙗ҆́кѡ содѣ́ѧвшимсѧ на тебѣ̀ стра́ннымъ та́инствомъ ро́дъ чл҃вѣ́ческїй ѿ тлѝ сме́ртныѧ свободи́сѧ.

Ра́дꙋйсѧ, ꙗ҆́кѡ пострада́вшимъ и҆ ᲂу҆ме́ршимъ на тебѣ̀ жа́ло сме́рти сокрꙋши́сѧ: ра́дꙋйсѧ, тогѡ̀ ра́ди страда́нїѧ бг҃ъ съ чл҃вѣ́ки примири́сѧ.

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Конда́къ а҃

Прїиди́те, хрⷭ҇тоимени́тїи лю́дїе, соста́вимъ похвалꙋ̀ чтⷭ҇но́мꙋ крⷭ҇тꙋ̀, на не́мъ же хрⷭ҇то́съ, цр҃ь сла́вы, рꙋ́цѣ распросте́ръ, возведѐ на́съ на пе́рвое бл҃же́нство, и҆з̾ него́же низпадо́хомъ пре́лестїю ѕмі́евою. Ты́ же, ѽ, прест҃ы́й крⷭ҇те, ꙗ҆́кѡ и҆мѣ́ѧй присꙋ́щꙋю тебѣ̀ си́лꙋ распѧ́тагѡ хрⷭ҇та̀, сп҃са́й и҆ сохранѧ́й ѿ всѧ́кихъ бѣ́дъ любо́внѡ зовꙋ́щїѧ тѝ:

Ра́дꙋйсѧ, чтⷭ҇ны́й крⷭ҇те, всера́достное зна́менїе на́шегѡ и҆скꙋпле́нїѧ.

Моли́твы

Ѽ пречⷭ҇тны́й и҆ животворѧ́щїй крⷭ҇те гдⷭ҇ень! Дре́вле ᲂу҆́бѡ бы́лъ є҆сѝ ка́зни позо́рныѧ ѻ҆рꙋ́дїе, ны́нѣ же зна́менїе сп҃се́нїѧ на́шегѡ при́снѡ почита́емое и҆ прославлѧ́емое! Ка́кѡ досто́йнѣ возмогꙋ̀ а҆́зъ, недосто́йный, воспѣ́ти тѧ̀ и҆ ка́кѡ дерзнꙋ̀ преклони́ти колѣ̑на се́рдца моегѡ̀ пред̾ и҆скꙋпи́телемъ мои́мъ, и҆сповѣ́даѧ грѣхѝ своѝ! Но млⷭ҇рдїе и҆ неизрече́нное чл҃вѣколю́бїе распе́ншагосѧ на тебѣ̀ смире́нное дерзнове́нїе подае́тъ мѝ, да ѿве́рзꙋ ᲂу҆ста̀ моѧ̑ во є҆́же сла́вити тѧ̀: сегѡ̀ ра́ди вопїю́ ти: ра́дꙋйсѧ, крⷭ҇те, цр҃кве хрⷭ҇то́вы красота̀ и҆ ѡ҆снова́нїе, всеѧ̀ вселе́нныѧ ᲂу҆твержде́нїе, хрⷭ҇тїа́нъ всѣ́хъ ᲂу҆пова́нїе, царе́й держа́ва, вѣ́рныхъ прибѣ́жище, а҆́гг҃лѡвъ сла́ва и҆ воспѣва́нїе, де́монѡвъ стра́хъ, гꙋби́тельство и҆ ѿгна́нїе, нечести́выхъ и҆ невѣ́рныхъ посрамле́нїе, пра́ведныхъ ᲂу҆слажде́нїе, ѡ҆бремене́нныхъ ѡ҆сла́ба, ѡ҆бꙋрева́емыхъ приста́нище, заблꙋ́ждшихъ наста́вниче, ѡ҆держи́мыхъ страстьмѝ раска́ѧнїе, ни́щихъ ѡ҆богаще́нїе, пла́вающихъ ко́рмчїй, сла́быхъ си́ла, во бра́нѣхъ побѣ́да и҆ ѡ҆долѣ́нїе, си́рыхъ вѣ́рное покрове́нїе, вдѡ́въ застꙋ́пниче, дѣ́въ цѣломꙋ́дрїѧ ѡ҆хране́нїе, ненадѣ́ѧнныхъ наде́жда, недꙋ́жныхъ вра́чъ и҆ ме́ртвыхъ воскресе́нїе! Ты̀, проѻбразова́нный чꙋдотворѧ́щимъ жезло́мъ мѡѷсе́а, животво́рный и҆сто́чникъ, напаѧ́ющїй жа́ждꙋщыѧ дх҃о́вныѧ жи́зни и҆ ᲂу҆слажда́ющїй на́ши скѡ́рби: ты̀ ѻ҆́дръ, на не́мже ца́рственнѡ почи́лъ тридне́внѡ воскре́сшїй побѣди́тель а҆́да. Сегѡ̀ ра́ди и҆ ᲂу҆́тро, и҆ въ ве́черъ, и҆ полꙋ́днѣ прославлѧ́ю тѧ̀, требл҃же́нное дре́во, и҆ молю̀ во́лею распе́ншагосѧ на тебѣ̀, да просвѣти́тъ ѻ҆́нъ и҆ ᲂу҆крѣпи́тъ тобо́ю ᲂу҆́мъ мо́й, да ѿкры́етъ въ се́рдцѣ мое́мъ и҆сто́чникъ любвѐ соверше́ннѣй и҆ всѧ̑ дѣѧ́нїѧ моѧ̑ и҆ пꙋтїѐ моѝ тобо́ю ѡ҆сѣни́тъ, да вы́нꙋ велича́ю пригвожде́ннагѡ на тебѣ̀, грѣ̑хъ мои́хъ ра́ди, гдⷭ҇а спⷭ҇телѧ моегѡ̀. А҆ми́нь.

Крⷭ҇те чтⷭ҇ны́й, храни́тель дꙋшѝ и҆ тѣ́лꙋ бꙋ́ди мѝ: ѻ҆́бразомъ свои́мъ бѣ́сы низлага́ѧ, врагѝ ѿгонѧ́ѧ, стра́сти ᲂу҆празднѧ́ѧ и҆ бл҃гоговѣ́нїе да́рꙋѧ мѝ, и҆ жи́знь, и҆ си́лꙋ, содѣ́йствїемъ ст҃а́гѡ дх҃а и҆ чтⷭ҇ны́ми пречⷭ҇тыѧ бцⷣы мольба́ми. А҆ми́нь.