Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ великомч҃нкꙋ нїки́тѣ.

Влкмч. Никиты, Готфского (ок. 372) 28 сентября 2026

Конда́къ а҃

И҆збра́нный страстоте́рпче хрⷭ҇то́въ и҆ до́блїй во́ине цр҃ѧ̀ царе́й, нїки́то пресла́вне, ѻ҆рꙋ́жїемъ крⷭ҇та̀ врагѝ ви́димыѧ и҆ неви́димыѧ крѣ́пцѣ побѣди́вый и҆ во всесожже́нїе тꙋ́чное, ꙗ҆́кѡ же́ртвꙋ бл҃гопрїѧ́тнꙋ, себє̀ сама́гѡ гдⷭ҇еви принесы́й, въ пѣ́снехъ съ любо́вїю восхвалѧ́емъ тѧ̀, ст҃а́го предста́телѧ на́шего, и҆ ра́достнѡ тебѣ̀ вопїе́мъ:

Ра́дꙋйсѧ, великомꙋ́чениче и҆ чꙋдотво́рче нїки́то.

І҆́косъ а҃

А҆́гг҃льски на землѝ пожи́въ, побѣ́ды тезоимени́те великомч҃ниче нїки́то, ты̀ ꙗ҆́кѡ а҆́гг҃лъ бл҃гі́й въ странѣ̀ го́тѳстѣй просїѧ́лъ є҆сѝ, вѣ́рꙋ хрⷭ҇то́вꙋ лю́демъ, тмо́ю невѣ́рїѧ помрачє́ннымъ проповѣ́дꙋѧ, тѣ́мже а҆пⷭ҇лѡмъ ра́вный дѣѧ̑нїи твои́ми показа́лсѧ є҆сѝ. Мы́ же по до́лгꙋ тѧ̀, ꙗ҆́кѡ проповѣ́дника хрⷭ҇то́ва, ᲂу҆блажа́емъ, со ᲂу҆миле́нїемъ зовꙋ́ще тѝ си́це:

Ра́дꙋйсѧ, бл҃говѣ́стниче є҆ѵⷢ҇льскїѧ и҆́стины: ра́дꙋйсѧ, ꙗ҆зы́ческое нече́стїе попра́вый.

Ра́дꙋйсѧ, вѣ́рꙋ хрⷭ҇то́вꙋ возлюби́вый: ра́дꙋйсѧ, странꙋ̀ го́тѳскꙋю дꙋхо́внѡ просвѣти́вый.

Ра́дꙋйсѧ, дїа́вола и҆ слꙋги̑ є҆гѡ̀ ѡ҆бличи́вый: ра́дꙋйсѧ, по и҆́мени твоемꙋ̀ тѣ́хъ побѣдоно́снѡ низложи́вый.

Ра́дꙋйсѧ, да́же до кро́ве во и҆сповѣ́данїи хрⷭ҇то́вѣ послꙋжи́вый: ра́дꙋйсѧ, мꙋчє́нїѧ многови̑днаѧ за хрⷭ҇та̀ до́блестнѡ претерпѣ́вый.

Ра́дꙋйсѧ, ѻ҆гне́мъ всесожже́нный и҆ во ѡ҆би́тєли ра́йскїѧ вознесе́нный: ра́дꙋйсѧ, же́ртва непоро́чнаѧ трⷪ҇цѣ ст҃ѣ́й ꙗ҆ви́выйсѧ.

Ра́дꙋйсѧ, сто́лпе крѣ́пкїй ст҃ы́ѧ цр҃кве: ра́дꙋйсѧ, красото̀ и҆ ѡ҆снова́нїе вѣ́ры хрⷭ҇то́вы.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ в҃

Ви́дѣвъ а҆ѳана́рихъ, лю́тый хрⷭ҇тїа́нъ мꙋчи́тель, ка́кѡ ст҃ы́й нїки́та вѣ́рꙋ хрⷭ҇то́вꙋ въ го́тѳѣхъ побѣдоно́снѡ проповѣ́дꙋетъ, а҆́ки ѕвѣ́рь ди́вїй на́нь ᲂу҆стреми́сѧ и҆ мꙋ́ками лю́тыми содроблѧ́ше тогѡ̀ тѣ́ло. Ѡ҆ба́че мꙋ́жества дꙋшѝ є҆гѡ̀ поколеба́ти не возмо́же, занѐ то́й побѣди́тель мꙋчи́телей ꙗ҆́вльсѧ, побѣдоно́снѡ воспѣва́ше хрⷭ҇тꙋ̀ бг҃ꙋ: А҆ллилꙋ́їа.

І҆́косъ в҃

Разꙋмѣ́въ мꙋ́къ тѣле́сныхъ безбѣ́дность, ꙗ҆́кѡ на пи́ръ, на мꙋче́нїѧ за хрⷭ҇та̀ и҆зше́лъ є҆сѝ, ст҃е нїки́то, і҆кѡ́нꙋ прест҃ы́ѧ бцⷣы съ собо́ю и҆мѣ́ѧ, съ не́юже и҆ во всѣ́хъ мꙋ́кахъ неразлꙋ́ченъ пребы́лъ є҆сѝ и҆, тоѧ̀ си́лою бл҃года́тнѡ ᲂу҆крѣплѧ́емь, побѣдоно́снѡ пꙋ́ть мꙋче́нїй проше́лъ є҆сѝ, и҆ ѿ хрⷭ҇та̀ ᲂу҆вѣнча́лсѧ є҆сѝ. На́съ же наꙋча́еши вопи́ти тебѣ̀ такова̑ѧ:

Ра́дꙋйсѧ, ѡ҆ не́мже возра́довашасѧ а҆́гг҃ли: ра́дꙋйсѧ, є҆мꙋ́же ᲂу҆диви́шасѧ чл҃вѣ́цы.

Ра́дꙋйсѧ, крѣ́пкагѡ терпѣ́нїѧ а҆дама́нте: ра́дꙋйсѧ, соверше́ннагѡ мꙋ́жества ѻ҆́бразе.

Ра́дꙋйсѧ, дїа́вола побѣди́телю: ра́дꙋйсѧ, всѣ́хъ слꙋ́гъ є҆гѡ̀ посрами́телю.

Ра́дꙋйсѧ, во́ине хрⷭ҇то́въ непобѣди́мый: ра́дꙋйсѧ, крⷭ҇тъ хрⷭ҇то́въ во ѻ҆рꙋ́жїе побѣ́ды прїе́мый.

Ра́дꙋйсѧ, тѣ́мъ всѧ̀ врагѝ низложи́вый: ра́дꙋйсѧ, въ броню̀ вѣ́ры хрⷭ҇то́вы ѡ҆блече́нный.

Ра́дꙋйсѧ, ѿ хрⷭ҇то́вой десни́цы свы́ше ᲂу҆вѣнча́нный: ра́дꙋйсѧ, а҆́гг҃льскимъ ликѡ́мъ сопричте́нный.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ г҃

Си́ла бж҃їѧ въ тебѣ̀, нїки́то великомꙋ́чениче добропобѣ́дне, сла́внѡ просла́висѧ, не то́кмо бо мꙋчи́телѧ а҆ѳана́риха, но и҆ сама́гѡ дїа́вола терпѣ́нїемъ твои́мъ побѣди́лъ є҆сѝ, и҆ мꙋ́жество дꙋшѝ твоеѧ̀ ꙗ҆ви́въ, ѻ҆гне́мъ всесожже́гсѧ, ꙗ҆́кѡ фі́нїѯъ, въ вѣ́чной жи́зни ѡ҆бнови́лсѧ є҆сѝ и҆ во ѡ҆би́тєли го́рнїѧ дꙋше́ю твое́ю возлетѣ́лъ є҆сѝ, во є҆́же со а҆́гг҃лы пѣ́ти бг҃ꙋ: А҆ллилꙋ́їа.

І҆́косъ г҃

И҆мѣ́ѧй ве́лїю ѡ҆ хрⷭ҇тѣ̀ крѣ́пость, вре́менныѧ мꙋ́ки, мꙋчи́телемъ тебѣ̀ налага́емыѧ, нїки́то премꙋ́дре, ни во что́же вмѣни́лъ є҆сѝ и҆ ра́дꙋѧсѧ во ѻ҆́гнь вше́лъ є҆сѝ: во ѻ҆гни́ бо, ꙗ҆́кѡ въ цвѣ́тницѣ, сла́вꙋ бж҃їю воспѣ́лъ є҆сѝ. Тѣ́мже и҆ мы̀ тѧ̀ сла́вимъ и҆ воспѣва́емъ гла̑сы таковы́ми:

Ра́дꙋйсѧ, страстоте́рпче хрⷭ҇то́въ, въ чꙋдесѣ́хъ преди́вный: ра́дꙋйсѧ, во ѻ҆гнѝ сме́рть вкꙋси́вый и҆ не ѡ҆пале́нъ пребы́вый.

Ра́дꙋйсѧ, а҆ѳана́риха и҆ клеврє́ты є҆гѡ̀ си́мъ ᲂу҆диви́вый: ра́дꙋйсѧ, всѧ̑ вѣ̑рныѧ ᲂу҆тѣ́шивый.

Ра́дꙋйсѧ, всѣ́мъ ѡ҆ гдⷭ҇ѣ терпѧ́щымъ ᲂу҆твержде́нїе: ра́дꙋйсѧ, лѣни̑вымъ и҆ слабодꙋ́шнымъ ѡ҆бличе́нїе.

Ра́дꙋйсѧ, чꙋдесы̑ мнѡ́гими по сме́рти просла́вленный: ра́дꙋйсѧ, бл҃года́ть цѣле́бнꙋю ѿ гдⷭ҇а прїе́мый.

Ра́дꙋйсѧ, го́тѳскїѧ страны̀ сла́во и҆ похвало̀: ра́дꙋйсѧ, цр҃кви ст҃ы́ѧ ра́дованїе и҆ ᲂу҆тѣше́нїе.

Ра́дꙋйсѧ, ст҃ы́й предста́телю и҆ мл҃твенниче на́шъ ко гдⷭ҇ꙋ: ра́дꙋйсѧ, ѻ҆би́тели сеѧ̀ ст҃ы́ѧ при́сный застꙋ́пниче.

Ра́дꙋйсѧ, во́ине і҆и҃совъ добропобѣ́дный: ра́дꙋйсѧ, люби́миче є҆гѡ̀ преи́скреннїй.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ д҃

Бꙋ́рѧ лю́тыхъ мꙋ́къ не потопѝ кораблѧ̀ дꙋшѝ твоеѧ̀, нїки́то преди́вне, но приведѐ тѧ̀ къ ти́хомꙋ бл҃же́нства вѣ́чнагѡ приста́нищꙋ: крⷭ҇то́мъ бо хрⷭ҇то́вымъ воѻрꙋжи́всѧ, ст҃е, преше́лъ є҆сѝ ѻ҆́гнь мꙋче́нїй невреди́мѡ и҆ дости́глъ є҆сѝ въ вѣ́чный поко́й, и҆дѣ́же сла́дцѣ пое́ши хрⷭ҇тꙋ̀ бг҃ꙋ пѣ́снь: А҆ллилꙋ́їа.

І҆́косъ д҃

Слы́шавше, диви́шасѧ хрⷭ҇тїа́не, ка́кѡ ѕвѣзда̀ лꙋчеза́рнаѧ въ нощѝ дрꙋ́гꙋ твоемꙋ̀ марїа́нꙋ ст҃ы́ѧ мо́щи твоѧ̀, мꙋ́чениче нїки́то, показа̀, ꙗ҆́коже дре́влѣ волхва́мъ въ виѳлее́мѣ хрⷭ҇та̀ ро́ждшагосѧ. Ѡ҆ се́мъ ᲂу҆́бѡ марїа́нъ ра́дꙋѧсѧ, че́стнѡ тѣ́ло твоѐ, страстоте́рпче, въ домꙋ̀ свое́мъ погреба́етъ, си́це къ тебѣ̀ взыва́ѧ:

Ра́дꙋйсѧ, ᲂу҆го́дниче бж҃їй, на нб҃сѝ и҆ на землѝ просла́вленный: ра́дꙋйсѧ, вѣнцено́сче добропобѣ́дный.

Ра́дꙋйсѧ, сокро́вище и҆сцѣле́нїй многоцѣ́нное: ра́дꙋйсѧ, мѷроꙋха́нный ра́йскагѡ прозѧбе́нїѧ цвѣ́те.

Ра́дꙋйсѧ, нбⷭ҇ныхъ ра́дованїе и҆ земны́хъ ᲂу҆тѣше́нїе: ра́дꙋйсѧ, болѧ́щихъ безме́здное врачева́нїе.

Ра́дꙋйсѧ, пресвѣ́тлагѡ мꙋ́ченическагѡ во́инства добро́то: ра́дꙋйсѧ, вѣ́рныхъ некра́домое бога́тство.

Ра́дꙋйсѧ, нбⷭ҇нымъ зна́менїемъ погребе́нїе чтⷭ҇но́е ᲂу҆лꙋчи́вый: ра́дꙋйсѧ, да̑ры бл҃года́тными дрꙋ́гꙋ твоемꙋ̀ возда́вый.

Ра́дꙋйсѧ, и҆з̾ѻби́лїемъ бла̑гъ земны́хъ до́мъ є҆гѡ̀ бл҃гослови́вый: ра́дꙋйсѧ, чꙋдесы̑ мнѡ́гими ѻ҆́ный просла́вивый.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ є҃

Бг҃оте́чный и҆сто́чникъ и҆сцѣле́нїй ꙗ҆ви́сѧ въ домꙋ̀ марїа́на гро́бъ тво́й чтⷭ҇ны́й, ст҃е нїки́то, є҆гда̀ то́й въ странꙋ̀ гре́ческꙋю пресели́всѧ, мо́щи твоѧ̀ ст҃ы́ѧ та́мѡ пренесѐ и҆ въ хра́мѣ бж҃їемъ, во и҆́мѧ твоѐ созда́нномъ, ѻ҆́ныѧ положѝ на ѻ҆́бщее поклоне́нїе вѣ́рнымъ, бг҃ꙋ, тѧ̀ просла́вльшемꙋ, воспѣ́вшимъ: А҆ллилꙋ́їа.

І҆́косъ є҃

Ви́дѣвше чꙋдеса̀ пресла̑внаѧ, нїки́то свѧ́те, ѿ моще́й твои́хъ и҆стека̑ющаѧ, а҆ѵѯе́нтїй є҆пⷭ҇копъ восхотѣ̀ ча́сть и҆̀хъ въ и҆ны́й гра́дъ ѿдѣли́ти. Но тогѡ̀ начина́нїе дерзнове́нное а҆́бїе воспѧти́лъ є҆сѝ и҆ рꙋ́кꙋ, мощє́мъ твои̑мъ прикоснꙋ́вшꙋюсѧ, ѡ҆мертвѣ́нїемъ порази́лъ є҆сѝ, до́ндеже а҆ѵѯе́нтїй ѻ҆́ный съ покаѧ́нїемъ къ тебѣ̀ припадѐ и҆, и҆сцѣле́нїе ѿ тебѣ̀ прїѧ́въ, си́це глаго́лаше:

Ра́дꙋйсѧ, долготерпѣли́вый хрⷭ҇то́въ подража́телю: ра́дꙋйсѧ, съ наказа́нїемъ твои́мъ ми́лость и҆ мнѣ̀ ꙗ҆ви́вый.

Ра́дꙋйсѧ, начина́нїе дерзнове́нное чꙋде́снѡ воспѧти́вый: ра́дꙋйсѧ, ᲂу҆со́хшꙋю рꙋ́кꙋ а҆́бїе и҆сцѣли́вый.

Ра́дꙋйсѧ, и҆ по сме́рти ѡ҆ хрⷭ҇тѣ̀ жи́въ пребыва́ѧй: ра́дꙋйсѧ, и҆ по ᲂу҆ме́ртвїи чꙋдеса̀ соверша́ѧй.

Ра́дꙋйсѧ, нетлѣ́нїемъ просла́вленный на землѝ: ра́дꙋйсѧ, за по́двигъ тво́й вѣнча́нный на нб҃сѝ.

Ра́дꙋйсѧ, и҆звѣ́стный ᲂу҆милостиви́телю цр҃ѧ̀ хрⷭ҇та̀: ра́дꙋйсѧ, за вѣ́рныхъ мо́щный пред̾ ни́мъ предста́телю.

Ра́дꙋйсѧ, и҆ согрѣша́ющїѧ вразꙋмлѧ́ѧй: ра́дꙋйсѧ, и҆ маловѣ̑рныѧ ᲂу҆мꙋдрѧ́ѧй.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ ѕ҃

Проповѣ́дꙋемъ чꙋдеса̀ твоѧ̀, не таи́мъ ми́лостей твои́хъ цѣле́бныхъ, великомꙋ́чениче нїки́то: ѿ лѣ́тъ бо дре́внихъ ѻ҆тцє́мъ на́шимъ сїѧ̀ вѣ́домы бы́ша, и҆ хра́мы бж҃їи во и҆́мѧ твоѐ ст҃о́е въ странѣ̀ на́шей рѡссі́йстѣй созида́хꙋсѧ, и҆дѣ́же и҆ ли́ка твоегѡ̀ ѻ҆́брази чꙋдесы̀ просла́вишасѧ, и҆ всѧ̑ вѣ̑рныѧ въ вѣ́рѣ ᲂу҆твержда́ютъ, къ нб҃сѝ же сердца̀ и҆̀хъ восхища́ютъ, пою́щихъ бг҃ꙋ: А҆ллилꙋ́їа.

І҆́косъ ѕ҃

Возсїѧ́ша чꙋдеса̀ мнѡ́гаѧ ѿ ст҃ы́ѧ і҆кѡ́ны чꙋдотво́рца нїки́ты, во ѡ҆би́тели є҆гѡ̀ пребыва́ющїѧ и҆ всѧ̑ вѣ̑рныѧ къ пѣ́нїю мꙋ́ченика подвиза́ющїѧ. Тѣ́мже и҆ мы̀ съ любо́вїю ст҃ꙋ́ю па́мѧть є҆гѡ̀ чти́мъ и҆ пѣ́сненнѡ є҆мꙋ̀ вопїе́мъ:

Ра́дꙋйсѧ, чꙋде́съ и҆сто́чниче преиз̾ѡби́льный: ра́дꙋйсѧ, ми́лости пода́телю преди́вный.

Ра́дꙋйсѧ, побѣдоно́сче, бг҃омъ просла́вленный: ра́дꙋйсѧ, цѣле́бниче недꙋ́гѡвъ дꙋше́вныхъ и҆ тѣле́сныхъ.

Ра́дꙋйсѧ, болѧ́щихъ младе́нцєвъ при́сный врачева́телю: ра́дꙋйсѧ, скорбѧ́щихъ и҆ ᲂу҆ныва́ющихъ бл҃года́тный посѣти́телю.

Ра́дꙋйсѧ, си́лы дїа́вольстѣй крѣ́пкїй посрами́телю: ра́дꙋйсѧ, на дꙋ́хи нечи́стыѧ вла́сть ѿ гдⷭ҇а прїе́мый.

Ра́дꙋйсѧ, дѣ́йства дїа́вольскагѡ ѿ чл҃вѣ́къ прогони́телю: ра́дꙋйсѧ, ѿ бѣснова́нїѧ лю́тагѡ стра́ждꙋщихъ свободи́телю.

Ра́дꙋйсѧ, а҆пⷭ҇льскихъ дарѡ́въ прїе́мниче: ра́дꙋйсѧ, а҆́гг҃льскїѧ кро́тости подража́телю.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ з҃

Хотѧ́щымъ на́мъ сла́вити пѡ́двиги твоѧ̑ и҆ чꙋдеса̀, великомꙋ́чениче пресла́вне, помозѝ свы́ше да́нною тѝ блгⷣтїю, сердца́ же на̑ша ѿ грѣхо́вныхъ помышле́нїй ѡ҆чи́сти, да досто́йнѡ и҆ неѡсꙋжде́ннѡ просла́вимъ тѧ̀, ѡ҆ тебѣ̀ воспѣва́ѧ хрⷭ҇тꙋ̀ бг҃ꙋ хвале́бнꙋю пѣ́снь: А҆ллилꙋ́їа.

І҆́косъ з҃

Ди́внагѡ побѣдоно́сца и҆ сла́внагѡ во́ина хрⷭ҇то́ва, нїки́тꙋ великоимени́тагѡ кто̀ просла́витъ по достоѧ́нїю ѿ земноро́дныхъ; Се́й бо велїа́ра побѣдѝ и҆ всѧ̑ слꙋги̑ є҆гѡ̀ низложѝ, хрⷭ҇та̀ же, цр҃ѧ̀ и҆ бг҃а, вѣ́рнѡ да́же до сме́рти и҆сповѣ́да и҆ ѿ него̀ просла́вленъ бы́сть. Тѣ́мже, въ хра́мѣ є҆гѡ̀ ст҃ѣ́мъ ликꙋ́юще и҆ пред̾ чꙋдотво́рною і҆кѡ́ною тогѡ̀ молѧ́щесѧ, взыва́емъ та́кѡ:

Ра́дꙋйсѧ, въ ю҆до́ли се́й земно́й на́ше ᲂу҆тѣше́нїе: ра́дꙋйсѧ, по бз҃ѣ и҆ прест҃ѣ́й бцⷣѣ на́ше ᲂу҆пова́нїе.

Ра́дꙋйсѧ, а҆́гг҃льскихъ ликѡ́въ собесѣ́дниче: ра́дꙋйсѧ, ст҃ы́хъ всѣ́хъ соприча́стниче.

Ра́дꙋйсѧ, мꙋ́ченическагѡ пресвѣ́тлагѡ собо́ра сїѧ́ющаѧ ѕвѣздо̀: ра́дꙋйсѧ, ѿ го́рнихъ высо́тъ на́съ, грѣ́шныхъ, посѣща́ѧй.

Ра́дꙋйсѧ, да̑ры цѣлє́бныѧ земнорѡ́днымъ подава́ѧй: ра́дꙋйсѧ, къ бѣ́дствꙋющымъ на по́мощь ᲂу҆скорѧ́ѧй.

Ра́дꙋйсѧ, молѧ́щихсѧ моли̑твы ми́лостивѡ прїе́млѧй: ра́дꙋйсѧ, лю́бѧщымъ тѧ̀ любо́вїю ст҃о́ю воздава́ѧй.

Ра́дꙋйсѧ, всеще́дрый и҆ ми́лостивый на́шъ предста́телю: ра́дꙋйсѧ, всебл҃гі́й и҆ скоропредста́тельный на́шъ покрови́телю.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ и҃

Стра́нствїе земно́е соверши́въ и҆ пꙋ́ть мꙋче́нїй проше́дъ побѣдоно́снѡ, великомꙋ́чениче нїки́то, ѿ дѣ́лъ бл҃готворе́нїѧ не почи́лъ є҆сѝ, но ѿ го́рнихъ высо́тъ ѡ҆би́тель твою̀ и҆ лю́ди, вѣ́рнѡ тебѣ̀ молѧ́щїѧсѧ, назира́ѧ, разли̑чнаѧ на́мъ подае́ши дарова̑нїѧ: даде́сѧ бо тебѣ̀ ѿ гдⷭ҇а ве́лїѧ бл҃года́ть недꙋ́жныѧ врачева́ти, ѡ҆би̑димыѧ застꙋпа́ти, сиро́тствꙋющыѧ младе́нцы ѡ҆кормлѧ́ти. Тѣ́мже бл҃года́рнѡ тѧ̀ сла́вимъ и҆ бг҃ꙋ, тѧ̀ просла́вльшемꙋ, пое́мъ пѣ́снь: А҆ллилꙋ́їа.

І҆́косъ и҃

Ве́сь въ бз҃ѣ бы́въ, страстоте́рпче хрⷭ҇то́въ, ѡ҆ бз҃ѣ чꙋдеса̀ мно́гїѧ соверши́лъ є҆сѝ въ жи́зни и҆ по сме́рти и҆, дерзнове́нїе къ томꙋ̀ полꙋчи́въ, вы́нꙋ мо́лишисѧ за лю́ди хрⷭ҇тоимени̑тыѧ и҆ вѣ́рнѡ тѧ̀ на по́мощь призыва́ющымъ посо́бствꙋеши. Не ѡ҆ста́ви ᲂу҆́бѡ и҆ на́съ блгⷣтною твое́ю по́мощїю и҆ застꙋпле́нїемъ, да бл҃года́рнѡ тебѣ̀ зове́мъ:

Ра́дꙋйсѧ, преди́вный хрⷭ҇тїа́нъ помо́щниче: ра́дꙋйсѧ, пресла́вный вѣ́рꙋющихъ застꙋ́пниче.

Ра́дꙋйсѧ, великоимени́тый во́инѡвъ спобо́рниче: ра́дꙋйсѧ, вдови́цъ, и҆ сиро́тъ прибѣ́жище.

Ра́дꙋйсѧ, въ со́нїихъ и҆ видѣ́нїихъ вѣ́рныѧ посѣща́ѧй: ра́дꙋйсѧ, въ бѣда́хъ и҆ напа́стѣхъ и҆̀хъ на по́мощь ᲂу҆скорѧ́ѧй.

Ра́дꙋйсѧ, побѣ́ды тезоимени́тый: ра́дꙋйсѧ, вѣнцено́сче наро́читый.

Ра́дꙋйсѧ, ст҃ы́ѧ цр҃кве крѣ́пкїй сто́лпе: ра́дꙋйсѧ, правосла́вныхъ щи́те и҆ забра́ло.

Ра́дꙋйсѧ, ца́рскагѡ ски́птра ᲂу҆твержде́нїе: ра́дꙋйсѧ, правосла́внагѡ ца́рства сохране́нїе.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ ѳ҃

Всѝ сы́нове рѡссі́йстїи ѿ лѣ́тъ дре́внихъ проповѣ́дꙋютъ блгⷣтнꙋю твою̀ по́мощь во бра́нѣхъ, нїки́то преди́вный, ꙗ҆́кѡ во́ємъ правосла́внымъ при́снѡ на сꙋпоста́ты посо́бствꙋеши и҆ мл҃твами твои́ми на и҆ноплеме́нники, вою́ющыѧ на на́съ и҆ на вѣ́рꙋ на́шꙋ, пра́вѡ побѣ̑ды на́мъ да́рꙋеши: сїе́ бо во днѝ наше́ствїй тата́рскихъ мно́жицею ѿ лѣ́тъ дре́внихъ ѻ҆тцы̀ на́ша ᲂу҆вѣ́дѣша. Тѣ́мже, тѧ̀ по до́лгꙋ ᲂу҆бл҃жа́юще, пое́мъ ѡ҆ тебѣ̀ бг҃ꙋ: А҆ллилꙋ́їа.

І҆́косъ ѳ҃

Вѣті́йство на́ше не довлѣ́етъ просла́вити тѧ̀ по достоѧ́нїю, великомꙋ́чениче хрⷭ҇то́въ нїки́то, ѻ҆ба́че ты̀, ꙗ҆́кѡ бл҃гі́й и҆ ми́лостивый подража́тель хрⷭ҇то́въ, не возгнꙋша́йсѧ на́шихъ ᲂу҆бо́гихъ пѣсноглаше́нїй, но прїимѝ сїѧ̑ въ бла́го, произволе́нїѧ сердє́цъ на́шихъ вѣ́дый, и҆ неѿстꙋ́пенъ бꙋ́ди на́мъ помо́щникъ, всѧ̑ бл҃га̑ѧ да́рꙋѧ на́мъ твои́ми мл҃твами, да бл҃гоꙋмиле́ннѡ тебѣ̀ зове́мъ:

Ра́дꙋйсѧ, ке́дре бл҃госѣнноли́ственный, и҆́мже покрыва́ютсѧ мно́зи: ра́дꙋйсѧ, цвѣ́те прекра́сный, и҆́мже ᲂу҆тѣша́ютсѧ лю́дїе.

Ра́дꙋйсѧ, ма́слино бл҃гопло́днаѧ, є҆ле́й ми́лости на́мъ ѻ҆би́льнѡ и҆сточа́ющаѧ: ра́дꙋйсѧ, кѷпарі́се са́да хрⷭ҇то́ва, приходѧ́щыѧ къ тебѣ̀ бл҃гоꙋха́ѧй.

Ра́дꙋйсѧ, хрⷭ҇толюби́вомꙋ во́инствꙋ неви́димый воево́до: ра́дꙋйсѧ, и҆новѣ́рныхъ во́євъ стра́хъ и҆ пораже́нїе.

Ра́дꙋйсѧ, страны̀ хрⷭ҇тїа́нскїѧ великоимени́тый покрови́телю: ра́дꙋйсѧ, со ст҃и́телемъ нїкола́емъ при́сный є҆ѧ̀ предста́телю.

Ра́дꙋйсѧ, на нечести́вагѡ мама́ѧ вели́комꙋ кнѧ́зю дими́трїю неви́димѡ посо́бствовавый: ра́дꙋйсѧ, царю̀ і҆ѡа́ннꙋ под̾ каза́нїю бл҃года́тнѡ спобо́рствовавшїй.

Ра́дꙋйсѧ, соиме́ннаго тѝ болѧ́рина рома́нова, твоегѡ̀ ᲂу҆се́рднагѡ чти́телѧ, родонача́льника до́ма ца́рскагѡ ꙗ҆ви́вый: ра́дꙋйсѧ, хра́мъ бж҃їй, во и҆́мѧ твоѐ и҆́мъ созда́нный, бл҃говоле́нїемъ твои́мъ ѡ҆сѣни́вый.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ і҃

Сп҃са хрⷭ҇та̀ за лю́ди, тѧ̀ чтꙋ́щыѧ, ᲂу҆молѝ, нїки́то чꙋдодѣ́йственне, и҆, ꙗ҆́коже ѻ҆тцє́мъ на́шимъ дре́влѣ, та́кѡ и҆ ны́нѣ на́мъ смире́ннымъ во бл҃га́ѧ посо́бствовати не преста́й, страстоте́рпче хрⷭ҇то́въ, побѣ́ды тезоимени́те, но и҆ на врагѝ ѡ҆долѣ́нїе ᲂу҆ гдⷭ҇а наро́дꙋ на́шемꙋ и҆спросѝ, да сла́вимъ тѧ̀ при́снѡ и҆ пое́мъ цр҃ю̀ царе́й побѣ́днꙋю пѣ́снь: А҆ллилꙋ́їа.

І҆́косъ і҃

Стѣно́ю мл҃твъ твои́хъ, великомꙋ́чениче нїки́то, ѡ҆би́тель твою̀ ст҃ꙋ́ю вы́нꙋ сохранѧ́й ѿ всѧ́кагѡ ѕла̀ и҆ въ не́й всѧ̑ живꙋ́щыѧ и҆ подвиза́ющыѧ пꙋте́мъ пра́вымъ во црⷭ҇твїе хрⷭ҇то́во рꙋководѝ, занѐ даде́сѧ тебѣ̀ блгⷣть моли́тисѧ ѡ҆ лю́дѣхъ. Сегѡ̀ ра́ди со ᲂу҆се́рдїемъ тебѣ̀ пое́мъ:

Ра́дꙋйсѧ, дѣ́вственныхъ ликостоѧ́нїй неѿстꙋ́пный храни́телю: ра́дꙋйсѧ, дѣ́въ и҆ вдови́цъ, бл҃гоче́стнѡ и҆́ночествꙋющихъ, нбⷭ҇ный наста́вниче.

Ра́дꙋйсѧ, мл҃твами твои́ми, ꙗ҆́кѡ ко́кошь птенцы̀ своѧ̑, на́съ сохранѧ́ѧй: ра́дꙋйсѧ, ꙗ҆́кѡ ѻ҆ре́лъ крила́ма свои́ма, на́съ покрыва́ѧй и҆ соблюда́ѧй.

Ра́дꙋйсѧ, ста́рымъ сѣди́намъ си́лы ѡ҆бновлѧ́ѧй: ра́дꙋйсѧ, ю҆́нымъ въ бл҃гоче́стїи и҆ цѣломꙋ́дрїи ᲂу҆твержде́нїе.

Ра́дꙋйсѧ, нача́льствꙋющымъ во бл҃го помо́щниче: ра́дꙋйсѧ, всѣ́мъ ревнꙋ́ющымъ ѡ҆ сп҃се́нїи при́сный споспѣ́шниче.

Ра́дꙋйсѧ, чꙋдесы̀ твои́ми на́съ ᲂу҆тѣша́ѧй: ра́дꙋйсѧ, врагѝ неви́димыѧ ѿ на́съ ѿража́ѧй.

Ра́дꙋйсѧ, ца́рствꙋющагѡ гра́да сщ҃е́нное ᲂу҆краше́нїе: ра́дꙋйсѧ, нбⷭ҇нагѡ раѧ̀ свѣ́тлый граждани́не.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ а҃і

Пѣ́нїе моле́бное на́ше, пред̾ чꙋдотво́рною і҆кѡ́ною твое́ю приноси́мое дне́сь, ми́лостивѡ ᲂу҆слы́ши, великомꙋ́чениче хрⷭ҇то́въ нїки́то, и҆ ᲂу҆тро́бꙋ щедрѡ́тъ твои́хъ не затворѝ на́мъ, вы́нꙋ тре́бꙋющымъ твоеѧ̀ блгⷣтныѧ по́мощи, но бꙋ́ди, ꙗ҆́коже и҆ до дне́сь бы́лъ є҆сѝ, бл҃гі́й на́шъ предста́тель и҆ при́сный за ны̀ ко гдⷭ҇ꙋ мл҃твенникъ, да ѡ҆ тебѣ̀ ра́дꙋющесѧ и҆ бг҃а сла́вѧще, пое́мъ є҆мꙋ̀: А҆ллилꙋ́їа.

І҆́косъ а҃і

Свѣтоза́рный свѣти́льникъ и҆ преди́вный чꙋдотво́рецъ великомч҃никъ нїки́та ꙗ҆ви́сѧ, то́й бо ѿ лѣ́тъ дре́внихъ ѻ҆те́чествїе на́ше и҆ ѻ҆би́тель на́шꙋ свои́ми мл҃твами и҆ щедро́тами не ѡ҆ставлѧ́етъ, но ꙗ҆́кѡ побѣди́тель, всѧ̑ врагѝ на̑ша ви́димыѧ же и҆ неви́димыѧ ѿража́етъ и҆ бл҃гоче́стнѡ въ ми́рѣ жи́ти на́съ ᲂу҆строѧ́етъ. Тѣ́мже и҆ ѿ на́съ, ᲂу҆го́дниче бж҃їй, сїѐ бл҃года́рное славосло́вїе прїимѝ:

Ра́дꙋйсѧ, вели́кїй на́шъ предста́телю: ра́дꙋйсѧ, на́шихъ врагѡ́въ неви́димыхъ побѣди́телю.

Ра́дꙋйсѧ, преѡблада́ти и҆́мъ над̾ на́ми не попꙋща́ѧй: ра́дꙋйсѧ, всѧ̑ ко́зни и҆̀хъ, а҆́ки паꙋчи́нꙋ, расторга́ѧй.

Ра́дꙋйсѧ, и҆ въ ча́съ сме́ртный лю́бѧщихъ и҆ чтꙋ́щихъ тѧ̀ не ѡ҆ставлѧ́ѧй: ра́дꙋйсѧ, ѿ наси́лїѧ дїа́вольскагѡ и҆̀хъ мо́щнѡ сохранѧ́ѧй.

Ра́дꙋйсѧ, ѡ҆ сп҃се́нїи на́шемъ бг҃а вы́нꙋ ᲂу҆молѧ́ѧй: ра́дꙋйсѧ, на мыта́рствахъ воздꙋ́шныхъ вѣ̑рнымъ по́мощь твою̀ ꙗ҆влѧ́ѧй.

Ра́дꙋйсѧ, и҆ на землѝ недꙋ́гѡвъ лю́тыхъ прогони́телю: ра́дꙋйсѧ, болѣ́зней неисцѣли́мыхъ цѣли́телю.

Ра́дꙋйсѧ, безнаде́жныхъ наде́ждо: ра́дꙋйсѧ, хрⷭ҇тїа́нъ похвало̀.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ в҃і

Блгⷣть бж҃їю ви́димъ ѿ ст҃ы́ѧ и҆ чꙋдотво́рныѧ і҆кѡ́ны твоеѧ̀ дѣ́йствꙋющꙋю, нїки́то великоимени́те, къ не́й бо съ вѣ́рою притека́ющїи и҆сцѣлє́нїѧ полꙋча́ютъ и҆ здра́вы и҆з̾ хра́ма твоегѡ̀ ѿхо́дѧтъ, тѣ́мже и҆ мы̀ тво́й сщ҃е́нный ѻ҆́бразъ бл҃гоговѣ́йнѡ почита́емъ и҆ съ любо́вїю лобыза́емъ, и҆ пое́мъ тобо́ю чꙋдодѣ́йствꙋющемꙋ хрⷭ҇тꙋ̀ бг҃ꙋ: А҆ллилꙋ́їа.

І҆́косъ в҃і

Пою́ще твоѧ̑ ми́лости и҆ мно́гое къ стра́ждꙋщымъ сострада́нїе, великомч҃ниче нїки́то, сла́вимъ и҆ велича́емъ тѧ̀, бг҃омъ возвели́ченнагѡ, и҆ ѿ любвѐ серде́чныѧ воспѣва́емъ тѝ пѣ̑сни таковы̑ѧ:

Ра́дꙋйсѧ, бѣ́дствꙋющихъ ско́рый помо́щниче: ра́дꙋйсѧ, богатѧ́щихсѧ вразꙋмле́нїе.

Ра́дꙋйсѧ, все́й рѡссі́и бг҃омъ да́нный покрови́телю: ра́дꙋйсѧ, ѡ҆би́тели твоеѧ̀ при́сное ра́дованїе.

Ра́дꙋйсѧ, хода́таю ѡ҆ не́й немо́лчный: ра́дꙋйсѧ, молѧ́щихсѧ врачꙋ̀ безме́здный.

Ра́дꙋйсѧ, ко и҆сцѣле́нїю є҆ди́ныѧ то́кмо вѣ́ры тре́бꙋѧй: ра́дꙋйсѧ, дꙋ́ши и҆ тѣлеса̀ и҆сцѣлѧ́ѧй.

Ра́дꙋйсѧ, вѣ́рнымъ вы́нꙋ помога́ѧй: ра́дꙋйсѧ, маловѣ́рныхъ въ вѣ́рѣ ᲂу҆твержда́ѧй.

Ра́дꙋйсѧ, вѣ́ры ѿвра́щшихсѧ гро́знѡ наказꙋ́ѧй: ра́дꙋйсѧ, стра́ха бж҃їѧ ᲂу҆чи́телю.

Ра́дꙋйсѧ, де́рзости самочи́нныѧ ѡ҆бличи́телю.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ г҃і

Ѽ, вели́кїй ᲂу҆го́дниче бж҃їй, страстоте́рпче хрⷭ҇то́въ и҆ чꙋдотво́рче нїки́то! Вонмѝ моли́твѣ на́шей и҆ ма́лагѡ моле́нїѧ сегѡ̀ на́шегѡ не пре́зри, но хрⷭ҇та̀ бг҃а ᲂу҆молѝ и҆зба́витисѧ на́мъ ѿ мꙋче́нїй вѣ́чныхъ, нбⷭ҇нагѡ же црⷭ҇твїѧ чрез̾ покаѧ́нїе сподо́битисѧ, да съ тобо́ю воспое́мъ на землѝ живы́хъ пѣ́снь бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льски на землѝ пожи́въ, побѣ́ды тезоимени́те великомч҃ниче нїки́то, ты̀ ꙗ҆́кѡ а҆́гг҃лъ бл҃гі́й въ странѣ̀ го́тѳстѣй просїѧ́лъ є҆сѝ, вѣ́рꙋ хрⷭ҇то́вꙋ лю́демъ, тмо́ю невѣ́рїѧ помрачє́ннымъ проповѣ́дꙋѧ, тѣ́мже а҆пⷭ҇лѡмъ ра́вный дѣѧ̑нїи твои́ми показа́лсѧ є҆сѝ. Мы́ же по до́лгꙋ тѧ̀, ꙗ҆́кѡ проповѣ́дника хрⷭ҇то́ва, ᲂу҆блажа́емъ, со ᲂу҆миле́нїемъ зовꙋ́ще тѝ си́це:

Ра́дꙋйсѧ, бл҃говѣ́стниче є҆ѵⷢ҇льскїѧ и҆́стины: ра́дꙋйсѧ, ꙗ҆зы́ческое нече́стїе попра́вый.

Ра́дꙋйсѧ, вѣ́рꙋ хрⷭ҇то́вꙋ возлюби́вый: ра́дꙋйсѧ, странꙋ̀ го́тѳскꙋю дꙋхо́внѡ просвѣти́вый.

Ра́дꙋйсѧ, дїа́вола и҆ слꙋги̑ є҆гѡ̀ ѡ҆бличи́вый: ра́дꙋйсѧ, по и҆́мени твоемꙋ̀ тѣ́хъ побѣдоно́снѡ низложи́вый.

Ра́дꙋйсѧ, да́же до кро́ве во и҆сповѣ́данїи хрⷭ҇то́вѣ послꙋжи́вый: ра́дꙋйсѧ, мꙋчє́нїѧ многови̑днаѧ за хрⷭ҇та̀ до́блестнѡ претерпѣ́вый.

Ра́дꙋйсѧ, ѻ҆гне́мъ всесожже́нный и҆ во ѡ҆би́тєли ра́йскїѧ вознесе́нный: ра́дꙋйсѧ, же́ртва непоро́чнаѧ трⷪ҇цѣ ст҃ѣ́й ꙗ҆ви́выйсѧ.

Ра́дꙋйсѧ, сто́лпе крѣ́пкїй ст҃ы́ѧ цр҃кве: ра́дꙋйсѧ, красото̀ и҆ ѡ҆снова́нїе вѣ́ры хрⷭ҇то́вы.

Ра́дꙋйсѧ, великомꙋ́чениче и҆ чꙋдотво́рче нїки́то.

Конда́къ а҃

И҆збра́нный страстоте́рпче хрⷭ҇то́въ и҆ до́блїй во́ине цр҃ѧ̀ царе́й, нїки́то пресла́вне, ѻ҆рꙋ́жїемъ крⷭ҇та̀ врагѝ ви́димыѧ и҆ неви́димыѧ крѣ́пцѣ побѣди́вый и҆ во всесожже́нїе тꙋ́чное, ꙗ҆́кѡ же́ртвꙋ бл҃гопрїѧ́тнꙋ, себє̀ сама́гѡ гдⷭ҇еви принесы́й, въ пѣ́снехъ съ любо́вїю восхвалѧ́емъ тѧ̀, ст҃а́го предста́телѧ на́шего, и҆ ра́достнѡ тебѣ̀ вопїе́мъ:

Ра́дꙋйсѧ, великомꙋ́чениче и҆ чꙋдотво́рче нїки́то.

Моли́твы

Ѽ, вели́кїй страстоте́рпче хрⷭ҇то́въ и҆ чꙋдотво́рче великомꙋ́чениче нїки́то! Припа́дающе къ ст҃о́мꙋ и҆ чꙋдотво́рномꙋ ѻ҆́бразꙋ твоемꙋ̀, по́двиги же и҆ чꙋдеса̀ твоѧ̑ и҆ мно́гое сострада́нїе твоѐ къ лю́демъ прославлѧ́юще, мо́лимъ тѧ̀ прилѣ́жнѡ: ꙗ҆вѝ на́мъ, смире́ннымъ и҆ грѣ́шнымъ, ст҃о́е и҆ многомо́щное твоѐ застꙋпле́нїе, се́ бо грѣ̑хъ ра́ди на́шихъ не и҆́мамы свобо́ды ча̑дъ бж҃їихъ, є҆́же ѡ҆ потре́бахъ на́шихъ гдⷭ҇а и҆ влⷣкꙋ на́шегѡ дерзнове́ннѡ проси́ти, но тебѐ моли́твенника къ немꙋ̀ бл҃гопрїѧ́тнаго предлага́емъ и҆ ѡ҆ твое́мъ предста́тельствѣ взыва́емъ, и҆спросѝ на́мъ ᲂу҆ гдⷭ҇а бл҃гопотрє́бныѧ да̑ры дꙋша́мъ и҆ тѣлесе́мъ на́шымъ, вѣ́рꙋ пра́вꙋю, сп҃се́нїѧ наде́ждꙋ несꙋмнѣ́ннꙋю, любо́вь же ко всѣ́мъ нелицемѣ́рнꙋю, во и҆скꙋше́нїихъ мꙋ́жество, въ ѕлострада́нїихъ терпѣ́нїе, въ моли́твахъ постоѧ́нство, дꙋ́шъ и҆ тѣле́съ здра́вїе, землѝ плодоно́сїе, воздꙋ́ха бл҃горастворе́нїе, жите́йскихъ потре́бъ дово́льство, ми́рное и҆ бл҃гоче́стное на землѝ житїѐ, хрⷭ҇тїа́нскꙋю житїѧ̀ кончи́нꙋ и҆ до́брый ѿвѣ́тъ на стра́шнѣмъ сꙋди́ще хрⷭ҇то́вомъ. Мо́лимъ тѧ̀, страстоте́рпче хрⷭ҇то́въ, моли́сѧ гдⷭ҇еви: всѣ̑мъ же лю́демъ правосла́внымъ ꙗ҆вѝ твоѐ ст҃о́е застꙋпле́нїе: болѧ́щыѧ и҆сцѣлѝ, скорбѧ́щыѧ ᲂу҆тѣ́ши, бѣ́дствꙋющымъ помозѝ. Є҆́й, ᲂу҆го́дниче бж҃їй и҆ мꙋ́чениче долготерпѣли́вый! Не забꙋ́ди ст҃ꙋ́ю ѻ҆би́тель твою̀ и҆ всѧ̑ живꙋ́щыѧ въ не́й и҆ подвиза́ющыѧсѧ и҆́нокини же и҆ мїрскі̑ѧ, но поспѣшѝ и҆́мъ въ смире́нїи и҆ терпѣ́нїи носи́ти и҆́го хрⷭ҇то́во и҆ ѿ всѧ́кихъ бѣ́дъ и҆ и҆скꙋше́нїй ми́лостивнѣ и҆зба́ви. Всѣ́хъ ᲂу҆́бѡ на́съ приведѝ въ ти́хое приста́нище сп҃се́нїѧ и҆ наслѣ́дники сподо́би бы́ти пресвѣ́тлагѡ црⷭ҇твїѧ хрⷭ҇то́ва ст҃ы́ми твои́ми мл҃твами, да сла́вимъ и҆ пое́мъ вели́кїѧ щедро́ты ѻ҆ц҃а̀ и҆ сн҃а и҆ ст҃а́гѡ дх҃а, въ трⷪ҇цѣ сла́вимагѡ и҆ покланѧ́емагѡ бг҃а, и҆ твоѐ ст҃о́е застꙋпле́нїе во вѣ́ки вѣкѡ́въ. А҆ми́нь.