Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ въ че́сть і҆кѡ́ны є҆ѧ̀ при́зри на смире́нїе

Иконы Божией Матери, именуемой "Призри на смирение" (1420) 29 сентября 2026

Конда́къ а҃

Взбра́нной воево́дѣ, влⷣчцѣ на́шей бцⷣѣ, пресла́внымъ ꙗ҆вле́нїемъ і҆кѡ́ны є҆ѧ̀ ст҃ы́ѧ, лю́ди бг҃оспаса́емагѡ гра́да кі́ева ди́внѡ посѣти́вшей, бл҃года́рственное возглаша́емъ пѣ́нїе. Ты́ же, ꙗ҆́кѡ всебл҃га́ѧ застꙋ́пнице ро́да хрⷭ҇тїа́нскагѡ, ѿ всѧ́кихъ на́съ бѣ́дъ свободѝ, и҆ ѿ всѣ́хъ вра̑гъ ви́димыхъ и҆ неви́димыхъ защитѝ, да съ вѣ́рою тебѣ̀ зове́мъ:

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

І҆́косъ а҃

А҆́гг҃лѡвъ цр҃и́це и҆ всеѧ̀ тва́ри влⷣчце, пречⷭ҇таѧ дв҃о бцⷣе, млⷭ҇тивымъ ꙗ҆вле́нїемъ на́мъ ѻ҆́браза твоегѡ̀ ст҃а́гѡ, дре́вле бг҃оспаса́емый гра́дъ пско́въ, а҆ ны́нѣ гра́дъ кі́евъ блгⷣтнѡ ѡ҆зари́ла є҆сѝ и҆ стрꙋи̑ чꙋде́съ ѿ негѡ̀ и҆сточи́ла є҆сѝ вѣ̑рнымъ. Тѣ́мже со ᲂу҆се́рдїемъ и҆ любо́вїю припа́дающе ко пречⷭ҇томꙋ твоемꙋ̀ ѻ҆́бразꙋ, ᲂу҆миле́нныѧ моле́нїѧ возсыла́емъ млⷭ҇рдомꙋ твоемꙋ̀ къ на́мъ застꙋпле́нїю и҆ со стра́хомъ зове́мъ:

Ра́дꙋйсѧ, цр҃и́це на́ша пребл҃га́ѧ, наде́ждо на́ша бцⷣе: ра́дꙋйсѧ, прїѧ́телище си́рыхъ и҆ стра́нныхъ предста́тельнице.

Ра́дꙋйсѧ, скорбѧ́щихъ ра́досте и҆ ѻ҆би́димыхъ покрови́тельнице: ра́дꙋйсѧ, ꙗ҆́кѡ зри́ши на́шꙋ бѣдꙋ̀, зри́ши на́шꙋ ско́рбь.

Ра́дꙋйсѧ, ꙗ҆́кѡ помога́еши на́мъ, ꙗ҆́кѡ немѡщны́мъ, ѡ҆кормлѧ́еши на́съ, ꙗ҆́кѡ стра́нныхъ: ра́дꙋйсѧ, ꙗ҆́кѡ не и҆́мамы и҆ны́ѧ по́мощи, ра́звѣ тебѣ̀, ни и҆ны́ѧ предста́тельницы.

Ра́дꙋйсѧ, ꙗ҆́кѡ не и҆́мамы бл҃гі́ѧ ᲂу҆тѣ́шительницы, то́кмѡ тебѐ, ѽ бг҃ома́ти: ра́дꙋйсѧ, ꙗ҆́кѡ да сохранѧ́еши на́съ и҆ покрыва́еши во вѣ́ки вѣкѡ́въ.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ в҃

Ви́дѧщи млⷭ҇рдїе твоѐ неисче́тное, всенепоро́чнаѧ влⷣчце, и҆ мнѡ́гаѧ чꙋдеса̀, тобо́ю ꙗ҆влє́ннаѧ и҆ прⷭ҇ноѧвлѧ́ємаѧ чрез̾ ст҃ы́ѧ і҆кѡ́ны твоѧ̑, и҆́миже, ꙗ҆́кѡ ѕвѣзда́ми бг҃освѣ́тлыми, ве́сь мі́ръ хрⷭ҇тїа́нскїй ᲂу҆краси́ла є҆сѝ, велича́емъ тѧ̀, возвели́чившꙋю ро́дъ на́шъ твои́мъ бл҃говоле́нїемъ, и҆ съ любо́вїю припа́даемъ къ чꙋдотво́рномꙋ ѻ҆́бразꙋ твоемꙋ̀, пою́ще сн҃ꙋ твоемꙋ̀ хрⷭ҇тꙋ̀ бг҃ꙋ: А҆ллилꙋ́їа.

І҆́косъ в҃

Ви́дѣша всѝ вѣ́рнїи лю́ди кі́евскїѧ, ꙗ҆́кѡ ст҃ы́й ѻ҆́бразъ бж҃їѧ мт҃ри чꙋде́снѡ ѿѻбрази́сѧ на стеклѣ̀ кївѡ́та, ѕѣлѡ̀ ᲂу҆диви́шасѧ и҆, со бл҃гоговѣ́нїемъ взира́юще на цѣльбоно́снꙋю і҆кѡ́нꙋ тѣле́сныма ѻ҆чи́ма, потща́шасѧ си́це возопи́ти чтⷭ҇нѣ́йшей херꙋві̑мъ и҆ сла́внѣйшей без̾ сравне́нїѧ серафі̑мъ:

Ра́дꙋйсѧ, ꙗ҆́кѡ ѻ҆́бразъ тво́й чⷭ҇тны́й преди́внѡ, без̾ содѣ́йствїѧ рꙋ́къ чл҃вѣ́ческихъ на стеклѣ̀ кївѡ́та ѿѻбрази́сѧ: ра́дꙋйсѧ, всѣ́хъ вѣ́рныхъ ꙗ҆вле́нїемъ си́мъ ѕѣлѡ̀ возра́довавшаѧ и҆ ᲂу҆мили́вшаѧ.

Ра́дꙋйсѧ, пречⷭ҇таѧ, ꙗ҆́кѡ призира́ѧ на смире́нїе, слы́шиши гла́съ на́шъ и҆ ѡ҆чища́еши всѧ̑ беззако́нїѧ на̑ша: ра́дꙋйсѧ, дв҃о, ме́ртва ѕмі́ѧ живоно́снымъ рождество́мъ твои́мъ содѣ́лавшаѧ.

Ра́дꙋйсѧ, бг҃ороди́тельнице, ꙗ҆́кѡ жи́знь нестарѣ́ющꙋю ᲂу҆лꙋчи́ти на́мъ помога́еши мл҃твами твои́ми: ра́дꙋйсѧ, сло́во ѻ҆́ч҃ее ро́ждшаѧ, пла́мень страсте́й на́шихъ росо́ю мл҃твъ твои́хъ ᲂу҆гаша́ющаѧ.

Ра́дꙋйсѧ, бл҃га́ѧ ᲂу҆тѣ́шительнице, мт҃рними мл҃твами твои́ми бꙋ́ри серде́цъ на́шихъ ᲂу҆тиша́ющаѧ: ра́дꙋйсѧ, и҆справлѧ́ѧ мл҃твы рабѡ́въ твои́хъ, разрѣше́нїе мно́гихъ на́шихъ прегрѣше́нїй подаю́щаѧ.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ г҃

Си́ла вы́шнѧгѡ содѣ́ла тѧ̀, блгⷣтнаѧ, и҆сто́чникъ неѡскꙋдѣва́ющъ ᲂу҆тѣше́нїѧ бѣ́дствꙋющымъ: мнѡ́ги бо скѡ́рби претерпѣ́вши, мо́жеши и҆ и҆скꙋша́емымъ по́мощи. Лю́демъ же на́шимъ, лю́тѣ стра́ждꙋщимъ ѿ невѣ́рїѧ и҆ заблꙋжде́нїѧ, бл҃говоли́ла є҆сѝ млⷭ҇тивнѡ ꙗ҆ви́ти блгⷣтное сокро́вище сїѐ чꙋдотво́рный ѻ҆́бразъ тво́й во хра́мѣ ст҃о-введе́нскомъ, въ зна́менїе млⷭ҇ти твоеѧ̀ ко землѣ̀ на́шей, въ защи́тꙋ ѿ вра̑гъ ви́димыхъ и҆ неви́димыхъ: тѣ́мже, по́мощїю бж҃їею подкрѣплѧ́еми, сп҃си́телю бг҃ꙋ пои́мъ: А҆ллилꙋ́їа.

І҆́косъ г҃

Ꙗ҆́коже дре́влѣ ца́рь повелѣ̀ при тѵ́хфинской і҆кѡ́нѣ бра́тїи посели́тисѧ и҆ сла́вꙋ, тебѣ̀ пречⷭ҇тѣй, воспѣва́ти и҆ ѡ҆ всѣ́мъ мі́рѣ мл҃твꙋ приноси́ти, та́кѡ и҆ ны́нѣ повелѣ̀ митрополі́тъ кі́евскїй влади́мїръ ѻ҆би́тели бы́ти и҆ бра́тїѧмъ собра́вшимсѧ пред̾ твои́мъ новоѧвле́ннымъ чꙋде́снымъ ѻ҆́бразомъ молє́нїѧ ѡ҆ всѣ́хъ лю́дѣхъ приноси́ти и҆ воспѣва́ти тѝ:

Ра́дꙋйсѧ, ѡ҆ст҃и́вшаѧ зе́млю кі́евскꙋю свои́мъ ꙗ҆вле́нїемъ: ра́дꙋйсѧ, ᲂу҆тѣснѧ́емымъ ѡ҆сла́бꙋ и҆ свобо́дꙋ да́рꙋющаѧ.

Ра́дꙋйсѧ, ненака́занныхъ млⷭ҇тиваѧ наказа́тельнице: ра́дꙋйсѧ, неразꙋ́мныхъ премꙋ́драѧ вразꙋми́тельнице.

Ра́дꙋйсѧ, ѻ҆би́дѧщихъ всегро́знаѧ ᲂу҆страши́тельнице: ра́дꙋйсѧ, ѻ҆би́димымъ всебл҃га́ѧ застꙋ́пнице.

Ра́дꙋйсѧ, дꙋ́ха ᲂу҆ны́нїѧ и҆ боѧ́зни ѿгна́нїе.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ д҃

Ꙗ҆́кѡ лꙋчеза́рнꙋю ѕвѣздꙋ̀, ꙗ҆́кѡ но́вое зна́менїе млⷭ҇ти своеѧ̀ ꙗ҆ви́ла є҆сѝ ны́нѣ, пренепоро́чнаѧ дв҃о, вѣ́рнымъ бг҃оспаса́емагѡ гра́да кі́ева, чⷭ҇тнꙋ́ю і҆кѡ́нꙋ твою̀ при́зри на смире́нїе въ годи́нꙋ но́выхъ и҆спыта́нїй, нестрое́нїй и҆ ѕлы́хъ развраще́нїй, врага́ми вѣ́ры и҆ ѻ҆те́чества на́шегѡ воздвиза́емыхъ, да ᲂу҆тверди́тсѧ бл҃гоче́стїе и҆ да ᲂу҆крѣпи́тсѧ вѣ́ра правосла́внаѧ въ лю́дѣхъ. Мы́ же въ се́мъ ꙗ҆вле́нїи ᲂу҆разꙋмѣ́въ зна́менїе ве́лїѧ попече́нїѧ бж҃їѧ ѡ҆ мѣ́стѣ се́мъ, со тре́петомъ и҆ бл҃гоговѣ́нїемъ глаго́лемъ тѝ, цр҃и́цѣ нбⷭ҇ѐ и҆ землѝ: ты̀ є҆сѝ на́мъ щи́тъ непобѣди́мый и҆ стѣна̀ неѡбори́маѧ восхвалѧ́ющымъ тѧ̀ и҆ воспѣва́ющымъ бг҃ꙋ пѣ́снь: А҆ллилꙋ́їа.

І҆́косъ д҃

Слы́шавше ѡ҆ ди́внѣмъ чꙋдесѝ ꙗ҆вле́нїѧ ст҃ы́ѧ і҆кѡ́ны твоеѧ̀ во гра́дѣ кі́евѣ, пребл҃гослове́ннаѧ цр҃и́це нб҃а и҆ землѝ, всѝ лю́дїе подвиго́шасѧ во хра́мъ тво́й, взира́юще и҆ дивѧ́щесѧ чꙋдесѝ семꙋ̀, и҆ со бл҃гоговѣ́нїемъ и҆ ра́достїю покланѧ́шесѧ чꙋдотво́рномꙋ ѻ҆́бразꙋ твоемꙋ̀, хвале́бнѡ зовꙋ́ще тѝ:

Ра́дꙋйсѧ, ѡ҆брѣ́тшаѧ блгⷣть ᲂу҆ бг҃а и҆ бо́льше а҆́гг҃лѡвъ и҆ всѣ́хъ ст҃ы́хъ возвели́ченнаѧ: ра́дꙋйсѧ, мт҃и бж҃їѧ, крѣ́пкагѡ во бранѣ́хъ хрⷭ҇та̀ ро́ждшаѧ, и҆збавлѧ́ющаѧ на́съ ѿ печа́лей и҆ лю́тыхъ нападе́нїй вра́жїихъ.

Ра́дꙋйсѧ, ро́ждшаѧ живода́вца хрⷭ҇та̀ несказа́ннѡ, ме́ртвыхъ на́съ дꙋша́ми ѡ҆животворѧ́ющаѧ: ра́дꙋйсѧ, влⷣчце, ѡ҆сщ҃а́ющаѧ ѡ҆скверне́нныѧ сердца̀ на̑ша, ꙗ҆́же прест҃о́е сло́во ро́ждшаѧ.

Ра́дꙋйсѧ, млⷭ҇тиваѧ, простира́ющаѧ на́мъ рꙋ́кꙋ по́мощи, да сп҃са́еми, вы́нꙋ ᲂу҆бл҃жа́емъ тѧ̀: ра́дꙋйсѧ, дв҃о бг҃ора́дованнаѧ, кропле́нїемъ млⷭ҇ти твоеѧ̀ погаша́ющаѧ ᲂу҆́глїе страсте́й на́шихъ.

Ра́дꙋйсѧ, ᲂу҆га́сшїй свѣти́льникъ серде́цъ на́шихъ возжига́ющаѧ: ра́дꙋйсѧ, сотворѧ́ющаѧ млⷭ҇тива на́мъ сꙋдїю̀, сн҃а твоегѡ̀.

Ра́дꙋйсѧ, нечи́стыхъ страсте́й на́съ свобожда́ющаѧ и҆ сла́вы вѣ́чныѧ сподоблѧ́ющаѧ.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ є҃

Є҆гда̀ ꙗ҆ви́сѧ чꙋ́до ѿ і҆кѡ́ны твоеѧ̀, вѣ́рнїи возра́довашасѧ, а҆ невѣ́рнїи ᲂу҆дивлѧ́хꙋсѧ ка́кѡ сїѐ мо́жетъ бы́ти, и҆, и҆зꙋча́юще сїѐ, познава́хꙋ си́лꙋ пречⷭ҇тыѧ, и҆ по недо́лзѣ вре́мени возгласи́ша ꙗ҆́кѡ сїѐ нерꙋкотво́рнѡ бы́сть. Мы́ же па́ки и҆ па́ки млⷭ҇ти твое́й дивлѧ́хꙋсѧ, ᲂу҆пова́емъ, ꙗ҆́кѡ на на́шꙋ недосто́йнꙋю мл҃твꙋ при́зритъ гдⷭ҇ь, цр҃ь сла́вы, и҆ послꙋ́шаетъ проше́нїѧ всѣ́хъ съ вѣ́рою призыва́ющихъ и҆́мѧ твоѐ ст҃о́е, сн҃ꙋ же твоемꙋ̀ зовꙋ́щихъ: А҆ллилꙋ́їа.

І҆́косъ є҃

Возсїѧ̀ на́мъ блгⷣть свѣтоза́рнаѧ ѿ чꙋдотво́рныѧ і҆кѡ́ны твоеѧ̀, бг҃оизбра́ннаѧ ѻ҆трокови́це, пред̾ не́юже со сле́зами припа́дающе, мо́лимтисѧ: ѿженѝ ѻ҆́блакъ наше́дшихъ на ны̀ и҆скꙋше́нїй и҆ бѣ́дъ, да вопїе́мъ тѝ ра́достнѡ:

Ра́дꙋйсѧ, всепѣ́таѧ, две́рь нбⷭ҇наѧ, ѿверза́ющаѧ на́мъ две́рь сп҃се́нїѧ: ра́дꙋйсѧ, чⷭ҇таѧ, рꙋ́кꙋ по́мощи на́мъ простира́ющаѧ и҆ и҆з̾ глꙋбины̀ болѣ́зней возводѧ́щаѧ.

Ра́дꙋйсѧ, ст҃ѣ́йшаѧ, свѣ́тъ невеще́ственный ро́ждшаѧ, тмы̀ страсте́й на́съ свобожда́ющаѧ: ра́дꙋйсѧ, а҆́гг҃лѡвъ ра́досте, првⷣникѡвъ добро́та, вѣ́рныхъ наде́жда и҆ соблюде́нїе на́ше.

Ра́дꙋйсѧ, мо́сте, къ жи́зни несостарѣ́ющейсѧ приводѧ́щїй, вѣ́рою и҆ любо́вїю тѧ̀ велича́ющыѧ: ра́дꙋйсѧ, возносѧ́щаѧ ро́гъ вѣ́рныхъ пою́щихъ тѧ̀, дв҃о, и҆ покланѧ́ющихсѧ чⷭ҇тно́мꙋ ѻ҆́бразꙋ твоемꙋ̀.

Ра́дꙋйсѧ, наставлѧ́ющаѧ къ добродѣ́тели нбⷭ҇нагѡ црⷭ҇твїѧ и҆ поко́ѧ бжⷭ҇твеннагѡ: ра́дꙋйсѧ, рꙋ́кꙋ по́мощи на́мъ подаю́щаѧ и҆ ко приста́нищꙋ сп҃си́тельномꙋ направлѧ́ющаѧ.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ ѕ҃

Проповѣ́дникъ неизрече́нныхъ чꙋде́съ твои́хъ, мт҃и бж҃їѧ, ꙗ҆ви́сѧ ст҃ы́й хра́мъ тво́й во гра́дѣ кі́евѣ, въ нѣ́мъ бо да́внее бж҃їе смотре́нїе ѡ҆ на́съ тобо́ю, дв҃о чⷭ҇таѧ, и҆спо́лнисѧ, є҆гда̀ сокрове́нное жела́нїе се́рдца на́шегѡ ᲂу҆краси́ти пречꙋ́дный ли́къ тво́й, цр҃и́це нбⷭ҇наѧ, драгоцѣ́ннымъ вѣнце́мъ и҆з̾ ка́меней чⷭ҇тны́хъ млⷭ҇тивнѡ ᲂу҆слы́шала є҆сѝ, на́съ же грѣ́шныхъ и҆ недосто́йныхъ, приле́жнѡ притека́ющихъ къ пресла́вномꙋ ѡ҆́бразꙋ твоемꙋ̀, въ покаѧ́нїи зовꙋ́щихъ и҆з̾ глꙋбины̀ дꙋшѝ: влⷣчце, сп҃сѝ ны̀ погиба́ющыѧ ѿ мно́жества прегрѣше́нїй на́шихъ, да вы́нꙋ бл҃годари́мъ и҆ велича́емъ тѧ̀, на́шꙋ ско́рꙋю и҆ ди́внꙋю помо́щницꙋ, поѧ̀ бг҃ꙋ: А҆ллилꙋ́їа.

І҆́косъ ѕ҃

Ꙗ҆́коже дре́вле і҆ꙋде́и длѧ ски́нїи приноша́хꙋ зла́то и҆ сребро̀, та́кѡ и҆ лю́дїе на́ши полꙋча́юще тобо́ю и҆сцѣле́нїѧ, приноша́хꙋ тѝ сребро̀ и҆ зла́то, пречⷭ҇таѧ ски́нїе, и҆ по се́мъ ѻ҆́бразъ тво́й ст҃ы́й ᲂу҆красѝ бл҃голѣ́пными да̑ры, ри́зою драго́ю и҆ вѣнце́мъ, припа́дающе тѝ и҆ со слеза́ми вопїю́ще та́кѡ:

Ра́дꙋйсѧ, бцⷣе дв҃о, ꙗ҆́кѡ и҆ ражда́еши, и҆ чи́ста по рождествѣ̀ ꙗ҆ви́ласѧ є҆сѝ: ра́дꙋйсѧ, бл҃га́ѧ, дꙋ́хъ сокрꙋше́нїѧ и҆ смире́нїе серде́цъ на́мъ подаю́щаѧ, ᲂу҆мꙋ̀ же чистотꙋ̀ и҆ житїю̀ и҆справле́нїе.

Ра́дꙋйсѧ, всенепоро́чнаѧ, прегрѣше́нїй ѡ҆ставле́нїе и҆ сле́зъ и҆сто́чники на́мъ да́рꙋющаѧ: ра́дꙋйсѧ, си́лою мл҃твъ твои́хъ ꙗ҆́звы дꙋ́шъ на́шихъ и҆сцѣлѧ́ющаѧ.

Ра́дꙋйсѧ, ча́ше жи́зни и҆ безсме́ртїѧ, ко врата́мъ вѣ́чныѧ жи́зни на́съ приводѧ́щаѧ: ра́дꙋйсѧ, и҆збавлѧ́ющаѧ на́съ ѿ мно́гихъ бѣ́дъ, скорбе́й и҆ бꙋ́дꙋщагѡ сꙋда̀ стра́шнагѡ.

Ра́дꙋйсѧ, живоно́сный и҆сто́чниче нетлѣ́нїѧ и҆ ра́дости, жа́ждꙋщыѧ дꙋ́ши на̑ша напоѧ́ющаѧ: ра́дꙋйсѧ, всемлⷭ҇тиваѧ, кро́ткимъ сїѧ́нїемъ твои́мъ мра́къ страсте́й и҆ поро́кѡвъ на́шихъ разгонѧ́ющаѧ.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ з҃

Хотѧ́й долготерпѣли́вый гдⷭ҇ь ꙗ҆ви́ти своегѡ̀ чл҃вѣколю́бїѧ неизслѣ́димꙋю щедрѡ́тъ бе́зднꙋ, и҆збра̀ тебѣ̀ є҆ди́нꙋ въ мт҃рь себѣ̀ и҆ сотворѝ тѧ̀ лю́демъ непреѡдолѣ́нное защище́нїе: да кто̀ ѿ ни́хъ првⷣнымъ сꙋдо́мъ бж҃їимъ ѡ҆сꙋжде́нїѧ досто́инъ ꙗ҆ви́тсѧ, твои́мъ ѻ҆ба́че держа́внымъ покро́вомъ сохранѧ́етсѧ на покаѧ́нїе, зовы́й: А҆ллилꙋ́їа.

І҆́косъ з҃

Но́ваѧ кꙋпе́ль сїлѡа́мскаѧ па́че ѻ҆́ныѧ дре́внїѧ, ꙗ҆ви́сѧ, пречⷭ҇таѧ влⷣчце, хра́мъ ст҃а́гѡ введе́нїѧ твоегѡ̀, въ не́мже всѝ вѣ́рнїи покланѧ́ютсѧ чꙋдотво́рнѣй і҆кѡ́нѣ твое́й и҆ молє́бныѧ пѣ́нїѧ вы́нꙋ пред̾ то́ю соверша́ютъ, да не сокры́тъ бꙋ́детъ и҆сто́чникъ блгⷣтныхъ врачева́нїй всѣ̑мъ тре́бꙋющимъ. Сегѡ̀ ра́ди и҆ мы̀ не таи́мъ твои́хъ бл҃годѣѧ́нїй, всенепоро́чнаѧ, но бл҃года́рственнѣ вопїе́мъ:

Ра́дꙋйсѧ, а҆́гнице, ро́ждшаѧ а҆́гнца, взе́млющагѡ грѣхѝ мі́ра: ра́дꙋйсѧ, красна̀ дꙋше́ю, красна̀ тѣ́ломъ, красна̀ помышле́нїемъ, дв҃о пречⷭ҇таѧ, скве́рнꙋ дꙋ́шъ на́шихъ ѡ҆чища́ющаѧ.

Ра́дꙋйсѧ, всѣ́хъ ѡ҆сщ҃е́ннаѧ сѣ́не, и҆сцѣле́нїѧ ѿ дла́ней твои́хъ точа́щаѧ на́мъ вы́нꙋ: ра́дꙋйсѧ, вїногра́дъ бжⷭ҇твенный, кра́сный гро́здъ и҆зрасти́вшаѧ, дꙋша́мъ на́шимъ даю́щаѧ питїѐ незави́стное.

Ра́дꙋйсѧ, рѣко̀ приснотекꙋ́щаѧ и҆сцѣле́нїй и҆ мо́ре, всѧ̑ на̑ша стра́сти потоплѧ́ющее: ра́дꙋйсѧ, є҆ди́на нетлѣ́ннаѧ, въ земно́мъ житїѝ се́мъ покро́вомъ млⷭ҇ти своеѧ̀ на́съ покрыва́ющаѧ.

Ра́дꙋйсѧ, ꙗ҆́кѡ мт҃рними мл҃твами твои́ми и҆збавлѧ́емсѧ болѣ́зненныхъ напа́стей и҆ всѧ́кагѡ вре́да дꙋше́внагѡ и҆ тѣле́снагѡ: ра́дꙋйсѧ, всебл҃га́ѧ на́ша наста́внице, за всѧ̑ бл҃годѣѧ́нїѧ твоѧ̑ бл҃годаре́нїю на́съ наꙋча́ющаѧ.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ и҃

Всѐ житїѐ на́ше на землѝ болѣ́зненнѡ и҆ печа́ли и҆спо́лнено ѿ клеветы̀, досажде́нїѧ, ᲂу҆коре́нїѧ и҆ и҆ны́хъ многови́дныхъ бѣ́дъ и҆ напа́стей: немоществꙋ́етъ бо тѣ́ло, и҆знемога́етъ и҆ дꙋ́хъ на́шъ. Къ тебѣ̀ ᲂу҆́бѡ прибѣга́емъ, блгⷣтнаѧ, пред̾ пречⷭ҇тымъ ѻ҆́бразомъ твои́мъ припа́дающе: и҆спо́лни ра́дости и҆ весе́лїѧ скѡ́рбныѧ сердца̀ на̑ша, да вопїе́мъ вы́нꙋ бг҃ꙋ: А҆ллилꙋ́їа.

І҆́косъ и҃

Стра́нное видѣ́нїе бы́сть чл҃вѣ́кꙋ нѣ́коемꙋ, є҆гда̀ то́й стоѧ̀ на мл҃твѣ и҆ за сро́дницꙋ без̾ покаѧ́нїѧ почи́вшꙋю, мл҃твꙋ приносѧ̀, внеза́пꙋ ᲂу҆зрѣ̀ ст҃ы́й ѻ҆́бразъ тво́й, влⷣчце, на стѣнѣ̀ ꙗ҆вле́нный, а҆ посе́мъ на то́мъ же мѣ́стѣ самꙋ̀ почи́вшꙋю ви́дѣвъ, нбⷭ҇ною ра́достїю ѡ҆сїѧ́ннꙋю. Въ видѣ́нїи же се́мъ ᲂу҆разꙋмѣ́въ тѧ̀, мт҃рь свѣ́та, въ вы́шнихъ пребыва́ющꙋю и҆ хода́тайства за живы́хъ и҆ ме́ртвыхъ сн҃ꙋ твоемꙋ̀ вы́нꙋ приносѧ́щꙋю, и҆спо́лнисѧ дꙋхо́вныѧ ра́дости и҆ весе́лїѧ ско́рбное се́рдце є҆гѡ̀, и҆ возопѝ такѡва́ѧ:

Ра́дꙋйсѧ, ѿ приносѧ́щихъ тебѣ̀ бл҃года́рныѧ да́ры ли́ка твоегѡ̀ не ѿвраща́ющаѧ и҆ почи́вшымъ сро́дникѡмъ и҆̀хъ загро́бнꙋю ᲂу҆́часть ѡ҆блегча́ющаѧ: ра́дꙋйсѧ, ᲂу҆пова́ющимъ на тѧ̀ живота̀ непосты́дный коне́цъ да́рꙋющаѧ.

Ра́дꙋйсѧ, и҆ по сме́рти за ѿше́дшꙋю на сꙋ́дъ гдⷭ҇ень дꙋ́шꙋ пред̾ сн҃омъ твои́мъ неѿстꙋ́пнѡ хода́тайствꙋющаѧ: ра́дꙋйсѧ, скорбѧ́щихъ роди́телей въ лише́нїи ча̑дъ и҆̀хъ ᲂу҆тѣша́ющаѧ блгⷣтною твое́ю по́мощїю.

Ра́дꙋйсѧ, неꙋста́ннаѧ мл҃твеннице на́ша, ти́хїй и҆ безболѣ́зненный ѿхо́дъ и҆з̾ се́й ю҆до́ли пла́ча и҆ ско́рби на́мъ низпосыла́ющаѧ: ра́дꙋйсѧ, въ гро́зный ча́съ сме́рти за вѣ́рнѡ чтꙋ́щихъ тѧ̀ предста́тельствꙋющаѧ и҆ ѿ воздꙋ́шныхъ мыта́рствъ и҆збавлѧ́ющаѧ.

Ра́дꙋйсѧ, млⷭ҇тиваѧ, млⷭ҇ть свою̀ на́мъ ꙗ҆влѧ́ющаѧ въ де́нь и҆спыта́нїѧ, въ ѻ҆́ньже ѿкры́ютсѧ всѧ̑ дѣла̀ на́ша до́браѧ же и҆ ѕла́ѧ: ра́дꙋйсѧ, млⷭ҇рдаѧ, покаѧ́нїѧ грѣ́шникѡвъ не ѿверга́ющаѧ и҆ ѿ ро́ва поги́бели млⷭ҇рдїемъ твои́мъ и҆схища́ющаѧ.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ ѳ҃

Всѐ є҆стество̀ а҆́гг҃льское похва́льнаѧ пѣ́сни прино́ситъ тебѣ̀, и҆́стиннѣй мт҃ри бж҃їей и҆ застꙋ́пнице всѣ́хъ приходѧ́щихъ къ тебѣ̀ и҆ просѧ́щихъ твоеѧ̀ по́мощи, ꙗ҆́кѡ тве́рдымъ и҆ крѣ́пкимъ твои́мъ предста́тельствомъ првⷣныхъ весели́ши, грѣ́шныхъ застꙋпа́еши, печа́ли ᲂу҆толѧ́еши, сро́дникѡмъ на́шимъ почи́вшымъ загро́бнꙋю ᲂу҆́часть ѡ҆блегча́еши и҆ мо́лишисѧ ѡ҆ всѣ́хъ на́съ, вѣ́рою зовꙋ́щихъ сн҃ꙋ твоемꙋ̀: А҆ллилꙋ́їа.

І҆́косъ ѳ҃

Чл҃вѣ́честїи вѣті̑и сꙋемꙋ́дреннїи недоꙋмѣва́ютъ позна́ти бжⷭ҇твеннꙋю та́йнꙋ твоегѡ̀ прⷭ҇нодв҃ства, бцⷣѣ, нижѐ мо́гꙋтъ и҆з̾ѧсни́ти си́лꙋ чꙋдотво́рнꙋю, ѿ і҆кѡ́нъ ст҃ы́хъ твои́хъ проистека́ющꙋю, во и҆сцѣле́нїе недꙋ́жныхъ и҆ на всѧ́кꙋю по́льзꙋ дꙋше́внꙋю и҆ тѣле́снꙋю чл҃вѣ́кѡмъ. Мы́ же бл҃гоче́стнѡ мт҃рь и҆ дв҃ꙋ тѧ̀ и҆сповѣ́дающе, досто́йнѡ хва́лимъ сла́вный, влⷣчце, і҆кѡ́ны твоеѧ̀ пра́здникъ, вѣ́рнѡ покланѧ́емсѧ ѻ҆́бразꙋ твоемꙋ̀ ст҃о́мꙋ и҆ съ любо́вїю вопїе́мъ:

Ра́дꙋйсѧ, бг҃оневѣ́сто, свѣ́тъ ро́ждшаѧ бжⷭ҇твенный и҆ превѣ́чный: ра́дꙋйсѧ, мт҃и и҆ дв҃о пребл҃гослове́ннаѧ.

Ра́дꙋйсѧ, ма́терей прⷭ҇ное ра́дованїе: ра́дꙋйсѧ, є҆ди́на непоро́чнаѧ и҆ до́браѧ въ жена́хъ.

Ра́дꙋйсѧ, а҆́гг҃лѡвъ сла́во, сто́лпъ ᲂу҆твержде́нїѧ и҆ сокро́вище сп҃се́нїѧ: ра́дꙋйсѧ, цр҃и́це нбⷭ҇наѧ, и҆сто́чникъ нетлѣ́нїѧ и҆ две́рь покаѧ́нїѧ.

Ра́дꙋйсѧ, бл҃госе́рдаѧ мт҃и всѣ́хъ скорбѧ́щихъ и҆ ѡ҆бремене́нныхъ: ра́дꙋйсѧ, держа́внаѧ застꙋ́пнице ро́да хрⷭ҇тїа́нскагѡ.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ і҃

Сп҃си́телѧ па́дшемꙋ чл҃вѣ́чествꙋ родила̀ є҆сѝ, всенепоро́чнаѧ дв҃о, и҆ сегѡ̀, ꙗ҆́кѡ младе́нца во ѡ҆б̾ѧ́тїѧхъ твои́хъ носи́ла є҆сѝ, є҆го́же бжⷭ҇твенное и҆зѡбраже́нїе на чтⷭ҇нѣ́й і҆кѡ́нѣ твое́й на́мъ ꙗ҆влѧ́еши и҆ мнѡ́гаѧ млⷭ҇ти и҆ щедрѡ́ты твоѧ̑ на́мъ да́рꙋеши. Сегѡ̀ ра́ди съ вѣ́рою и҆ любо́вїю чествꙋ́емъ ѻ҆́бразъ чꙋдотво́рный тво́й, влⷣчце, и҆ мо́лимсѧ тебѣ̀ приле́жнѡ: бꙋ́ди покро́въ и҆ защи́та на́мъ въ де́нь сꙋ́дный, да твои́мъ мт҃рнимъ предста́тельствомъ поми́лꙋетъ на́съ сꙋдїѧ̀ првⷣный, сн҃ъ тво́й, и҆ сподо́битъ десна́гѡ стоѧ́нїѧ и҆ пѣ́нїѧ є҆мꙋ̀ со всѣ́ми и҆збра́нными: А҆ллилꙋ́їа.

І҆́косъ і҃

Стѣна̀ и҆ покро́въ гра́дꙋ пско́вꙋ даде́сѧ ст҃а́ѧ і҆кѡ́на твоѧ̀, цр҃и́це и҆ влⷣчце, є҆́юже мно́гажды гра́дъ се́й ѿ разоре́нїѧ ра́тнагѡ сохранѧ́ла є҆сѝ. И҆ ны́нѣ на́съ, грѣ́шныхъ и҆ недосто́йныхъ ча̑дъ твои́хъ, млⷭ҇тивнѡ посѣти́ла є҆сѝ чꙋ́днымъ ꙗ҆вле́нїемъ пречⷭ҇тагѡ твоегѡ̀ ѻ҆́браза и҆ бл҃гоꙋтро́бнѡ прїе́млеши пред̾ ни́мъ возноси̑мыѧ тебѣ̀ ѿ бл҃года́рныхъ серде́цъ на́шихъ мл҃твы съ пѣ́нїемъ такѡвы́мъ:

Ра́дꙋйсѧ, ꙗ҆́коже дре́вле і҆кѡ́ною ᲂу҆спе́нїѧ сла́вный гра́дъ кі́евъ мно́гажды спаса́ла є҆сѝ, та́кѡ и҆ ны́нѣ на́съ пречꙋ́дною і҆кѡ́ною твое́ю ѿ бѣ́дъ ѡ҆гражда́еши: ра́дꙋйсѧ, ла́ѵры кі́ево пече́рскїѧ сла́внаѧ строи́тельнице и҆ хра́мѡвъ є҆ѧ̀ всечтⷭ҇на́ѧ ᲂу҆краси́тельнице.

Ра́дꙋйсѧ, храни́тельнице ди́внаѧ и҆ и҆ны́хъ ѻ҆би́телей ст҃ы́хъ, ꙗ҆́кѡ твое́ю блгⷣтною си́лою ѻ҆́ныѧ зи́ждꙋтсѧ и҆ преꙋспѣва́ютъ въ бл҃гоче́стїи: ра́дꙋйсѧ, просла́вившаѧ мѣ́сто ꙗ҆вле́нїѧ і҆кѡ́ны твоеѧ̀ ди́внымъ чꙋдодѣ́йствїемъ и҆ тѣ́мъ млⷭ҇ть преизѻби́льнꙋю на́мъ показа́вшаѧ.

Ра́дꙋйсѧ, бг҃оневѣ́сто пречⷭ҇таѧ, ст҃ы́й ли́къ тво́й чтꙋ́щихъ ѿ ѡ҆сꙋжде́нїѧ и҆ мꙋ́къ многоѻбра́зныхъ и҆збавлѧ́ющаѧ: ра́дꙋйсѧ, многомлⷭ҇тиваѧ покрови́тельнице на́ша, ѿ пречꙋ́дныѧ і҆кѡ́ны твоеѧ̀ млⷭ҇ти на́мъ неѡскꙋ́днѡ и҆сточа́ющаѧ.

Ра́дꙋйсѧ, влⷣчце, мт҃рними мл҃твами твои́ми дꙋ́ши на̑ша ѿ мра́чнагѡ сна̀ возставлѧ́ющаѧ къ твоемꙋ̀ славосло́вїю: ра́дꙋйсѧ, ра́досте мі́рꙋ, ꙗ҆́кѡ ѡ҆ тебѣ̀ ра́дꙋетсѧ а҆́гг҃льскїй собо́ръ и҆ чл҃вѣ́ческїй ро́дъ.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ а҃і

Пѣ́нїе моле́бное на́ше съ вѣ́рою и҆ любо́вїю возноси́мое, млⷭ҇тивнѡ ᲂу҆слы́ши, гпⷭ҇жѐ влⷣчце, и҆ ᲂу҆тро́бꙋ щедрѡ́тъ твои́хъ не затворѝ на́мъ, всеще́драѧ бцⷣе: се́ бо ѡ҆бнища́вше въ до́брыхъ дѣ́лѣхъ, къ сокро́вищнице млⷭ҇ти твоеѧ̀ чꙋ́днѣй і҆кѡ́нѣ твое́й, со ᲂу҆се́рдїемъ притека́емъ, всебл҃га́ѧ, и҆ припа́дающе къ не́й, мо́лимсѧ: сохранѝ ны̀ ѿ тлѣтво́рныхъ ᲂу҆че́нїй, и҆зба́ви ѿ лꙋка́выхъ совраще́нїй, сп҃сѝ ѻ҆те́чество на́ше ѿ нестрое́нїй и҆ ѕлы́хъ нападе́нїй вра́жїихъ и҆ сподо́би въ любвѝ и҆ є҆диномы́слїи со всѣ́ми вѣ́рными ча̑дами ст҃ы́ѧ хрⷭ҇то́вы цр҃кви бл҃гопрїѧ́тнѡ пѣ́ти созда́телю на́шемꙋ пѣ́снь: А҆ллилꙋ́їа.

І҆́косъ а҃і

Свѣ́тлыми лꙋча́ми чꙋде́съ немерца́емѡ сїѧ́етъ ст҃а́ѧ і҆кѡ́на твоѧ̀, всенепоро́чнаѧ бцⷣе дв҃о: просвѣща́еши бо на́съ, помраче́нныхъ грѣхо́вною мгло́ю и҆ приво́диши къ немо́лчномꙋ славосло́вїю твоегѡ̀ прест҃а́гѡ и҆́мене. Тѣ́мже ра́дꙋемсѧ, мы̀ грѣ́шнїи, и҆мꙋ́ще таковы́й зало́гъ твоегѡ̀ къ на́мъ бл҃говоле́нїѧ, и҆ тебѣ̀, ско́рой помо́щнице на́шей, бл҃года́рственнѡ взыва́емъ:

Ра́дꙋйсѧ, цр҃и́це и҆ влⷣчце, свѣ́томъ твои́мъ нбⷭ҇нымъ на́съ ѡ҆сщ҃а́ющаѧ и҆ под̾ кро́вомъ твои́мъ вы́нꙋ сохранѧ́ющаѧ: ра́дꙋйсѧ, блгⷭ҇ве́ннаѧ и҆ препросла́вленнаѧ, мт҃и неискꙋсомꙋ́жнаѧ, ᲂу҆мерщвле́нныѧ грѣха́ми дꙋ́ши на̑ша ѡ҆животворѧ́ющаѧ.

Ра́дꙋйсѧ, чⷭ҇таѧ и҆ непоро́чнаѧ дв҃о, ты́ бо родила̀ є҆сѝ сн҃а, и҆збавлѧ́ющаго на́съ ѿ и҆скꙋше́нїй: ра́дꙋйсѧ, всесла́внаѧ влⷣчце бцⷣѣ, ѿ всѧ́кихъ ны̀ ѕѡ́лъ и҆ скорбе́й и҆схища́ющаѧ и҆ но́зѣ на̑ша на ка́мене бжⷭ҇твеннагѡ сп҃се́нїѧ поставлѧ́ющаѧ.

Ра́дꙋйсѧ, чⷭ҇таѧ а҆́гнице, дв҃о, мт҃и, ѻ҆трокови́це, чи́сты ны̀ сотворѧ́ющаѧ ѿ страсте́й тѣле́сныхъ: ра́дꙋйсѧ, ꙗ҆́кѡ да льсти́вагѡ и҆збавлѧ́ютсѧ сѣте́й всѝ пѣсносло́вѧщыѧ тѧ̀, бг҃ора́дованнаѧ.

Ра́дꙋйсѧ, гора̀ ве́лїѧ, ю҆́же данїи́лъ прови́дѣ, и҆з̾ неѧ́же чⷭ҇тны́й ка́мень хрⷭ҇то́съ, пло́тїю ѡ҆блече́сѧ: ра́дꙋйсѧ, дв҃о чⷭ҇таѧ, же́злъ и҆з̾ ко́рене і҆ессе́ова, цвѣтовозрасти́вшїй на́мъ всеси́льнагѡ гдⷭ҇а.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ в҃і

Блгⷣти бж҃їѧ ст҃о́е и҆ непоро́чное жили́ще, мт҃и гдⷭ҇а вы́шнихъ си́лъ, не возгнꙋша́йсѧ на́съ, грѣ́шныхъ и҆ недосто́йныхъ, воспѣва́ющихъ млⷭ҇ти ѿ всечⷭ҇тны́ѧ і҆кѡ́ны твоеѧ̀ на́мъ ꙗ҆вле́нныѧ, и҆ твои́мъ невече́рнимъ сїѧ́нїемъ ѡ҆зарѝ на̑ша те́мныѧ дꙋ́ши, приводѧ́щи къ свѣ́тꙋ трисо́лнечнагѡ бжⷭ҇тва̀, въ правосла́вїи ᲂу҆крѣпѝ на́съ, всебл҃га́ѧ, и҆ сподо́би до коне́чнагѡ и҆здыха́нїѧ на́шегѡ пѣ́ти немо́лчнꙋю пѣ́снь вседержи́телю: А҆ллилꙋ́їа.

І҆́косъ в҃і

Пою́ще пѣ́снь хвалы̀ и҆ бл҃годаре́нїѧ тебѣ̀, бг҃ора́дованнаѧ дв҃о, проповѣ́дꙋемъ велегла́снѡ вели́чїе чꙋде́съ твои́хъ и҆ бога́тство млⷭ҇ти твоеѧ̀, на на́съ и҆ ѻ҆те́чествѣ на́шемъ ꙗ҆вле́нныхъ, и҆ ѿ глꙋбины̀ серде́чныѧ прино́симъ тебѣ̀ со смире́нїемъ похва̑льныѧ да̑ры сїѧ̑:

Ра́дꙋйсѧ, правосла́вїѧ несокрꙋши́маѧ крѣ́посте и҆ ѡ҆гра́до: ра́дꙋйсѧ, непобѣди́маѧ воево́до вожде́й и҆ во́инствъ хрⷭ҇тїа́нскихъ.

Ра́дꙋйсѧ, нело́жное сп҃се́нїе и҆ предста́тельнице мі́ра, ро́ждшаѧ зижди́телѧ, и҆́мже ѿ напа́стей и҆ болѣ́зней сп҃се́сѧ мі́ръ: ра́дꙋйсѧ, мы́сленныѧ двє́ри жи́зни, покаѧ́нїѧ на́мъ двє́ри ѿверза́ющаѧ.

Ра́дꙋйсѧ, є҆ди́на бл҃гослове́ннаѧ, въ ча́съ сме́рти те́мныѧ зра́ки лꙋка́выхъ бѣсѡ́въ дале́че ѿ на́съ прогонѧ́ющаѧ: ра́дꙋйсѧ, є҆ди́на млⷭ҇рдаѧ, въ стра́шный де́нь сꙋда̀ вѣ́чныѧ мꙋ̑ки на́съ и҆збавлѧ́ющаѧ и҆ неизрече́нныѧ сла́вы сн҃а твоегѡ̀ наслѣ́дники ны̀ показꙋ́ющаѧ.

Ра́дꙋйсѧ, всенепоро́чнаѧ, вы́нꙋ чл҃вѣколю́бїе твоѐ ꙗ҆влѧ́ющаѧ и҆ ѿ собла́знѡвъ и҆ сѣте́й вра́жїихъ на́съ свобожда́ющаѧ: ра́дꙋйсѧ, пречⷭ҇таѧ, сотвори́вшаѧ съ на́ми зна́менїе во бл҃го: да ви́дѧтъ ненави́дѧщїи на́съ и҆ постыдѧ́тсѧ, ꙗ҆́кѡ ты̀ внѧла̀ є҆сѝ проше́нїѧмъ на́шимъ и҆ ᲂу҆тѣ́шила ны̀.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ г҃і

Ѽ всепѣ́таѧ мт҃и гдⷭ҇а на́шегѡ і҆и҃са хрⷭ҇та̀, неисчерпа́емое мо́ре бжⷭ҇твенныхъ дарѡ́въ, ты̀ є҆сѝ, всест҃а́ѧ дв҃о. Ꙗ҆́кѡ свѣтопода́тельнꙋю лампа́дꙋ, є҆ле́емъ млⷭ҇ти и҆спо́лненнꙋю, созерца́емъ тѧ̀ ѻ҆ча́ми вѣ́ры и҆ кро́ткимъ сїѧ́нїемъ твои́мъ ѡ҆зарѧ́еми, любо́вїю же твое́ю прⷭ҇нѡ согрѣва́еми, тебѣ̀, ꙗ҆́кѡ бл҃го́й застꙋ́пнице на́шей, со ᲂу҆миле́нїемъ глаго́лемъ: прїимѝ бл҃гоꙋтро́бнѡ моле́бное пѣ́нїе на́ше, пред̾ чꙋ́дною і҆кѡ́ною твое́ю съ вѣ́рою тебѣ̀ возноси́мое, и҆ всеси́льными мл҃твами твои́ми ᲂу҆молѝ, влⷣчце, и҆зба́витисѧ на́мъ, грѣ́шнымъ, вре́менныхъ бѣ́дъ и҆ вѣ́чныѧ мꙋ́ки, да, сп҃се́ннїи тобо́ю, просла́вимъ и҆ въ бꙋ́дꙋщей жи́зни всест҃о́е и҆́мѧ сн҃а твоегѡ̀ и҆ бг҃а на́шегѡ, вѣ́рнѡ зовꙋ́ще є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ цр҃и́це и҆ всеѧ̀ тва́ри влⷣчце, пречⷭ҇таѧ дв҃о бцⷣе, млⷭ҇тивымъ ꙗ҆вле́нїемъ на́мъ ѻ҆́браза твоегѡ̀ ст҃а́гѡ, дре́вле бг҃оспаса́емый гра́дъ пско́въ, а҆ ны́нѣ гра́дъ кі́евъ блгⷣтнѡ ѡ҆зари́ла є҆сѝ и҆ стрꙋи̑ чꙋде́съ ѿ негѡ̀ и҆сточи́ла є҆сѝ вѣ̑рнымъ. Тѣ́мже со ᲂу҆се́рдїемъ и҆ любо́вїю припа́дающе ко пречⷭ҇томꙋ твоемꙋ̀ ѻ҆́бразꙋ, ᲂу҆миле́нныѧ моле́нїѧ возсыла́емъ млⷭ҇рдомꙋ твоемꙋ̀ къ на́мъ застꙋпле́нїю и҆ со стра́хомъ зове́мъ:

Ра́дꙋйсѧ, цр҃и́це на́ша пребл҃га́ѧ, наде́ждо на́ша бцⷣе: ра́дꙋйсѧ, прїѧ́телище си́рыхъ и҆ стра́нныхъ предста́тельнице.

Ра́дꙋйсѧ, скорбѧ́щихъ ра́досте и҆ ѻ҆би́димыхъ покрови́тельнице: ра́дꙋйсѧ, ꙗ҆́кѡ зри́ши на́шꙋ бѣдꙋ̀, зри́ши на́шꙋ ско́рбь.

Ра́дꙋйсѧ, ꙗ҆́кѡ помога́еши на́мъ, ꙗ҆́кѡ немѡщны́мъ, ѡ҆кормлѧ́еши на́съ, ꙗ҆́кѡ стра́нныхъ: ра́дꙋйсѧ, ꙗ҆́кѡ не и҆́мамы и҆ны́ѧ по́мощи, ра́звѣ тебѣ̀, ни и҆ны́ѧ предста́тельницы.

Ра́дꙋйсѧ, ꙗ҆́кѡ не и҆́мамы бл҃гі́ѧ ᲂу҆тѣ́шительницы, то́кмѡ тебѐ, ѽ бг҃ома́ти: ра́дꙋйсѧ, ꙗ҆́кѡ да сохранѧ́еши на́съ и҆ покрыва́еши во вѣ́ки вѣкѡ́въ.

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Конда́къ а҃

Взбра́нной воево́дѣ, влⷣчцѣ на́шей бцⷣѣ, пресла́внымъ ꙗ҆вле́нїемъ і҆кѡ́ны є҆ѧ̀ ст҃ы́ѧ, лю́ди бг҃оспаса́емагѡ гра́да кі́ева ди́внѡ посѣти́вшей, бл҃года́рственное возглаша́емъ пѣ́нїе. Ты́ же, ꙗ҆́кѡ всебл҃га́ѧ застꙋ́пнице ро́да хрⷭ҇тїа́нскагѡ, ѿ всѧ́кихъ на́съ бѣ́дъ свободѝ, и҆ ѿ всѣ́хъ вра̑гъ ви́димыхъ и҆ неви́димыхъ защитѝ, да съ вѣ́рою тебѣ̀ зове́мъ:

Ра́дꙋйсѧ, пренепоро́чнаѧ бцⷣе дв҃о при́зри на смире́нїе, съ высоты̀ нбⷭ҇ной на смире́нїе рабѡ́въ твои́хъ призира́ющаѧ.

Моли́твы

Ѽ прест҃а́ѧ гпⷭ҇жѐ, дв҃о бцⷣе, вы́шшаѧ херꙋві̑мъ и҆ чтⷭ҇нѣ́йшаѧ серафі̑мъ, бг҃оизбра́ннаѧ ѻ҆трокови́це. При́зри съ высоты̀ нбⷭ҇ныѧ млⷭ҇тивнымъ твои́мъ ѻ҆́комъ на на́съ, недосто́йныхъ рабѡ́въ твои́хъ, со ᲂу҆миле́нїемъ и҆ слеза́ми молѧ́щихсѧ пред̾ пречⷭ҇тымъ ѻ҆́бразомъ твои́мъ: не лишѝ на́съ твоегѡ̀ застꙋпле́нїѧ и҆ покро́ва держа́внагѡ въ стра́нствїи се́мъ земно́мъ, многоско́рбнѣмъ и҆ многомѧте́жнѣмъ. Сп҃сѝ на́съ, въ поги́бели и҆ ско́рби сꙋ́щихъ, воздви́гни и҆з̾ глꙋбины̀ грѣхо́вныѧ, просвѣтѝ ᲂу҆́мъ на́шъ, ѡ҆мраче́нный страстьмѝ и҆ ᲂу҆врачꙋ́й ꙗ҆́звы дꙋ́шъ и҆ тѣле́съ на́шихъ. Ѽ всеще́драѧ мт҃и чл҃вѣколюби́вагѡ влⷣки. Оу҆дивѝ на на́съ пребога́тыѧ млⷭ҇ти твоѧ̑, ᲂу҆крѣпѝ немощнꙋ́ю во́лю на́шꙋ къ дѣ́ланїю за́повѣдей хрⷭ҇то́выхъ, ᲂу҆мѧгчѝ ѡ҆каменѣ̑лаѧ сердца̀ на̑ша любо́вїю къ бг҃ꙋ и҆ бли́жнимъ, да́рꙋй на́мъ сокрꙋше́нїе серде́чное и҆ покаѧ́нїе и҆́стинное, да ѡ҆чи́стившесѧ ѿ скве́рны грѣхо́вныѧ, сподо́бимсѧ ми́рныѧ хрⷭ҇тїа́нскїѧ кончи́ны и҆ до́брагѡ ѿвѣ́та на стра́шнѣмъ и҆ нелицепрїѧ́тнѣмъ сꙋдѣ̀ гдⷭ҇а на́шегѡ і҆и҃са хрⷭ҇та̀, є҆мꙋ́же со безнача́льнымъ є҆гѡ̀ ѻ҆ц҃е́мъ и҆ прест҃ы́мъ, бл҃ги́мъ и҆ животворѧ́щимъ дх҃омъ подоба́етъ всѧ́каѧ сла́ва, че́сть и҆ поклоне́нїе, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.