Православный календарь
Размер шрифта:

Ака́ѳістъ

А҆ка́ѳїстъ ст҃ы̑мъ мч҃ницамъ вѣ́рѣ, наде́ждѣ, любвѝ и҆ ма́тери и҆̀хъ софі́и.

Свв. мчцц. Софии и трех ея дщерей: Веры, Надежды и Любови, Римских (ок. 137) 30 сентября 2026

Конда́къ а҃

И҆збра̑ннымъ раба́мъ гдⷭ҇а вседержи́телѧ, вѣ́рѣ, наде́ждѣ и҆ любвѝ, и҆ мꙋ́дрѣй ма́тери софі́и, похва̑льнаѧ ва́мъ пѣ̑нїѧ ᲂу҆миле́ннѡ возно́симъ. Вы́ же, ꙗ҆́кѡ дерзнове́нїе ко хрⷭ҇тꙋ̀ бг҃ꙋ и҆мꙋ́ще, моли́тесѧ за ны̀, во є҆́же и҆зба́витисѧ на́мъ грѣхѡ́въ и҆ скорбе́й, да бл҃года́рственнѡ вопїе́мъ ва́мъ:

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

І҆́косъ а҃

А҆́гг҃ли на нб҃сѝ ра́довахꙋсѧ, добродѣ́тельное житїѐ ва́ше зрѧ́ще, є҆́же провожда́сте въ чте́нїи писа́нїй бжⷭ҇твенныхъ, въ трꙋдѣ́хъ, постѣ̀, моли́твѣ и҆ ми́лостыни, ма́терїю ва́шею непреста́ннѡ сꙋ́ще поꙋча́єми, да ꙗ҆вите́сѧ ѻ҆́брази живі́и трїе́хъ бг҃осло́вскихъ добродѣ́телей, и҆̀хже и҆мена́ми наречены̀ бы́сте. Мы́ же, таковѣ́й мꙋ́дрости ма́тере ва́шеѧ и҆ соверше́нномꙋ бл҃горазꙋ́мїю ва́шемꙋ дивѧ́щесѧ, бл҃гоговѣ́йнѡ рце́мъ ва́мъ:

Ра́дꙋйтесѧ, є҆диномы́слєнныѧ сєстры̀, трїе́мъ добродѣ́телємъ тезоимєни́тыѧ: ра́дꙋйтесѧ, въ повинове́нїи бг҃омꙋ́дрѣй ма́тери ва́шей на степє́ни соверше́нствованїѧ вше́дшїѧ.

Ра́дꙋйтесѧ, а҆́ки трѝ ра̑йскїѧ вѣ̑тви, въ ѕловѣ́рнѣмъ ри́мѣ возра́сшїѧ: ра́дꙋйсѧ, софі́е, дще́рємъ твои̑мъ и҆мена̀ добродѣ́телей наре́кшаѧ, ꙗ҆̀же ве́щїю и҆сполнѧ́ти наꙋчи́ла є҆сѝ.

Ра́дꙋйсѧ, вѣ́ро, вѣ́рою неви́димое ꙗ҆́кѡ ви́димое зрѣ́ти на́мъ помога́ющаѧ: ра́дꙋйсѧ, въ нетлѣ́нїе ѡ҆блече́ннаѧ.

Ра́дꙋйсѧ, наде́ждо, наде́ждою страда̑нїѧ на̑ша во ю҆до́ли ско́рби ѡ҆слаблѧ́ющаѧ и҆ въ гѡ́рнѧѧ десни́цею ᲂу҆казꙋ́ющаѧ: ра́дꙋйсѧ, црⷭ҇твїе нбⷭ҇ное ᲂу҆наслѣ́довавшаѧ.

Ра́дꙋйсѧ, любы̀, любо́вїю бжⷭ҇твенною бл҃же́нство безсме́ртныѧ жи́зни на́мъ ѿкрыва́ющаѧ: ра́дꙋйсѧ, блгⷣтїю дх҃а ст҃а́гѡ ѡ҆сїѧ́ннаѧ.

Ра́дꙋйсѧ, софі́е, сі́есть премꙋ́дрость, премꙋ́дрѣ дще́ри твоѧ̑ воспита́вшаѧ: ра́дꙋйсѧ, въ добродѣ́телѣхъ вѣ́ры, наде́жды и҆ любвѐ на́съ ᲂу҆твержда́ющаѧ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ в҃

Ви́дѧщи мꙋ́драѧ софі́а слꙋги̑, прише́дша зва́ти ю҆̀ со дще́рьми ко царю̀ а҆дрїа́нꙋ, и҆ позна́вши винꙋ̀ призва́нїѧ своегѡ̀, ста̀ со ча̑ды свои̑ми на моли́твꙋ, по́мощи бг҃а просѧ́щи. По моли́твѣ же, є҆́мшесѧ за рꙋ́цѣ, ꙗ҆́коже вѣне́цъ ᲂу҆плете́нный, и҆дѧ́хꙋ вкꙋ́пѣ, пою́ще хрⷭ҇тꙋ̀ бг҃ꙋ: А҆ллилꙋ́їа.

І҆́косъ в҃

Ра́зꙋмъ несꙋмнѣ́нный и҆мѣ́ли є҆стѐ, ст҃ы̑ѧ, є҆гда̀ бо въ пала̑ты ца̑рскїѧ введены̀ бы́сте, царе́ви а҆дрїа́нꙋ предста́сте съ лице́мъ свѣ́тлымъ, ѻ҆чесы̀ весе́лыми и҆ се́рдцемъ мꙋ́жественнымъ. Ца́рь же, зрѧ̀ чтⷭ҇на̑ѧ ли́ца ва̑ша неꙋстрашє́нна и҆ мꙋ́дрость софі́и ᲂу҆вѣ́дѣвъ, ѿложѝ на и҆́но вре́мѧ сꙋ́дъ сво́й и҆ ѿсла̀ вы̀ къ нѣ́коей благоро́днѣй женѣ̀, ᲂу҆ неѧ́же пребы́сте трѝ дни̑, ма́тери ва́шей премꙋ́дрѣй бг҃одꙋхнове́нными словесы̀ де́нь и҆ но́щь ва́съ поꙋча́ющей. Тѣ́мже ᲂу҆бл҃жа́юще ва́съ, взыва́емъ си́це:

Ра́дꙋйтесѧ, трѝ непорѡ́чныѧ а҆́гницы хрⷭ҇тѡ́вы, вѣне́цъ добродѣ́телей въ себѣ̀ совокꙋпи́вшїѧ: ра́дꙋйтесѧ, трѝ добродѣ́тельныѧ сєстры̀, тве́рдꙋю вѣ́рꙋ, несꙋмнѣ́ннꙋю наде́ждꙋ и҆ нелицемѣ́рнꙋю любо́вь ко гдⷭ҇ꙋ бг҃ꙋ ꙗ҆ви́вшїѧ.

Ра́дꙋйтесѧ, не пощади́вшїѧ красоты̀ и҆ мла́дости ва́шеѧ, краснѣ́йшагѡ ра́ди добро́тою па́че сынѡ́въ чл҃вѣ́ческихъ: ра́дꙋйсѧ, софі́е, ча̑да твоѧ̑ возлю́блєннаѧ на по́двигъ мч҃ническїй за хрⷭ҇та̀ наставлѧ́вшаѧ.

Ра́дꙋйсѧ, вѣ́ро, мꙋче́нїемъ за хрⷭ҇та̀ вѣ́рꙋ твою̀ и҆сповѣ́давшаѧ: ра́дꙋйсѧ, сєстры̀ твоѧ̑ крѣ́пкою вѣ́рою воздвиза́вшаѧ.

Ра́дꙋйсѧ, наде́ждо, тве́рдое надѣ́ѧнїе на хрⷭ҇та̀ возлага́вшаѧ: ра́дꙋйсѧ, сєстры̀ твоѧ̑ неѡсла́бною наде́ждою ᲂу҆крѣплѧ́вшаѧ.

Ра́дꙋйсѧ, любы̀, мꙋ́ками за хрⷭ҇та̀ любо́вь твою̀ дѣ́йственнꙋю показа́вшаѧ: ра́дꙋйсѧ, сєстры̀ твоѧ̑ ѻ҆гне́мъ любвѐ ѡ҆гражда́вшаѧ.

Ра́дꙋйсѧ, софі́е, сла̑дкаѧ ча̑да твоѧ̑ ᲂу҆вѣщава́вшаѧ презрѣ́ти сла́вꙋ и҆ бога́тство, и҆ всю̀ сла́дость мі́ра сегѡ̀ тлѣ́ннагѡ: ра́дꙋйсѧ, до́брыѧ дщє́ри твоѧ̑ до кро́вє ста́ти за гдⷭ҇а и҆ ᲂу҆мре́ти за негѡ̀ ᲂу҆се́рднѡ ᲂу҆чи́вшаѧ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ г҃

Си́лою бжⷭ҇твенною ѡ҆сѣнє́ны бѧ́хꙋ мч҃ницы, ꙗ҆̀же добродѣ́тєли и҆ме́нъ свои́хъ ꙗ҆ви́ша дѣ́ломъ въ по́двизѣхъ мч҃ническихъ, воспѣва́юще бг҃ꙋ: А҆ллилꙋ́їа.

І҆́косъ г҃

И҆мꙋ́ще въ себѣ̀ ст҃ы̑ѧ мч҃ницы сто́лпъ вѣ́ры, крилѣ̑ наде́жды и҆ ѻ҆́гнь любвѐ, въ сла́дость послꙋ́шающїѧ ѿ слове́съ ма́тере своеѧ̀, є҆ди́на дрꙋгꙋ́ю въ долготерпѣ́нїи ᲂу҆твержда́хꙋ и҆ ра́достнѡ и҆дѧ́хꙋ, жела́юще чтⷭ҇на́гѡ мч҃ничества, є҆́же за хрⷭ҇та̀. Томꙋ̀ покланѧ́ющесѧ, ꙗ҆́кѡ бг҃ꙋ на́шемꙋ, сицевы́ми ва́съ воззва́ньми почита́емъ:

Ра́дꙋйтесѧ, ни ма́ло не поскорбѣ́вшїѧ ѡ҆ лише́нїи вре́меннагѡ сегѡ̀ живота̀ вѣ́чныѧ ра́ди жи́зни: ра́дꙋйтесѧ, че́сти ра́ди хрⷭ҇то́вы пло́ть на мꙋ́ки преда́вшїѧ.

Ра́дꙋйтесѧ, трѝ многоцѣ̑нныѧ сосꙋ́ды вѣ́ры, наде́жды и҆ любвѐ бг҃ꙋ въ да́ръ прине́сшыѧ: ра́дꙋйсѧ, софі́е, ꙗ҆́кѡ, любвѐ ра́ди преѕѣ́льныѧ ко дще́ремъ твои̑мъ, всѣ́мъ се́рдцемъ возжелѣ́ла є҆сѝ, да црⷭ҇твїе бж҃їе наслѣ́дꙋютъ.

Ра́дꙋйсѧ, вѣ́ро, дꙋ́ши на̑ша вѣ́рою ѡ҆зарѧ́ющаѧ: ра́дꙋйсѧ, къ ти́хомꙋ приста́нищꙋ на́съ возносѧ́щаѧ.

Ра́дꙋйсѧ, наде́ждо, сердца̀ на̑ша сла́достїю наде́жды ѡ҆живлѧ́ющаѧ: ра́дꙋйсѧ, и҆з̾ пꙋчи́ны ѿча́ѧнїѧ на́съ и҆звлека́ющаѧ.

Ра́дꙋйсѧ, любы̀, страда̑нїѧ и҆ скѡ́рби на̑ша въ ра́дость прелага́ющаѧ: ра́дꙋйсѧ, ѡ҆каменє́ннаѧ сердца̀ на̑ша во ᲂу҆миле́нїе преводѧ́щаѧ.

Ра́дꙋйсѧ, софі́е, мꙋ́дростїю на бл҃го́е на́съ наставлѧ́ющаѧ: ра́дꙋйсѧ, потемнѣ́нное ѻ҆́ко дꙋ́шъ на́шихъ просвѣща́ющаѧ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ д҃

Бꙋ́рѧ ꙗ҆́рости мꙋчи́телєвы нападѐ на тѧ̀, ст҃а́ѧ вѣ́ро, но не поколеба́ тѧ: кто́ бо возмо́жетъ вѣ́рꙋ неѡдоли́мꙋю подви́гнꙋти, а҆дама́нта крѣпча́йшꙋю, ꙗ҆́же вѣ́рныхъ наꙋчи́ла є҆́сть пѣ́ти съ тобо́ю бг҃ꙋ: А҆ллилꙋ́їа.

І҆́косъ д҃

Слы́шащи мꙋ́драѧ ма́ти дщє́ри своѧ̑ пред̾ царе́мъ небоѧ́зненнѡ хрⷭ҇та̀ и҆сповѣ́дающїѧ и҆ глаго́лющїѧ, ꙗ҆́кѡ тогѡ̀ є҆ди́нагѡ жела́ютъ, є҆́же бы страда́ти и҆ терпѣ́ти гѡ́рькїѧ мꙋ̑ки сла́дкагѡ ра́ди і҆и҃са хрⷭ҇та̀, ра́довашесѧ вельмѝ и҆ молѧ́ше бг҃а, да ᲂу҆крѣпи́тъ ѧ҆̀ въ предлежа́щихъ мꙋ́кахъ. Сїѐ ᲂу҆̀бѡ и҆зволе́нїе похвалѧ́юще, пе́рвѣйшей дще́ри мꙋ́дрыѧ ма́тере та́кѡ воспое́мъ:

Ра́дꙋйсѧ, вѣ́ро, немилосє́рдаѧ бїє́нїѧ сладча́йшагѡ ра́ди і҆и҃са сла́дцѣ прїе́мшаѧ: ра́дꙋйсѧ, ᲂу҆рѣ̑заннаѧ сѡсца̀ твоѧ̑, а҆́ки два̀ крі̑на чⷭ҇тоты̀, въ же́ртвꙋ гдⷭ҇ꙋ прине́сшаѧ.

Ра́дꙋйсѧ, ꙗ҆́кѡ ѿ ꙗ҆́звы твоеѧ̀ вмѣ́стѡ кро́ве млеко̀ и҆стечѐ: ра́дꙋйсѧ, ꙗ҆́кѡ на раскале́нное желѣ́зо положе́на была̀ є҆сѝ.

Ра́дꙋйсѧ, ꙗ҆́кѡ въ коно́бъ кипѧ́щь вве́ржена сꙋ́щи, ни ма́лѡ не ѡ҆пали́ласѧ є҆сѝ, нижѐ вреди́ласѧ є҆сѝ: ра́дꙋйсѧ, пла́мень страсте́й на́шихъ нбⷭ҇ною прохла́дою ᲂу҆тиша́ющаѧ.

Ра́дꙋйсѧ, ѻ҆́гнь мꙋче́нїй на́шихъ въ болѣ́знехъ ᲂу҆гаша́ющаѧ: ра́дꙋйсѧ, зна́менїемъ вѣ́ры посредѣ̀ напа́стей на́съ зна́менающаѧ.

Ра́дꙋйсѧ, щито́мъ вѣ́ры во бра́ни со враго́мъ на́съ покрыва́ющаѧ: ра́дꙋйсѧ, чтⷭ҇нꙋ́ю главꙋ̀ твою̀ за главꙋ̀ цр҃кве, хрⷭ҇та̀ бг҃а, под̾ ме́чь ра́достнѡ прекло́ншаѧ.

Ра́дꙋйсѧ, ꙗ҆́кѡ ѡ҆багре́нїемъ кро́ве твоеѧ̀, а҆́ки червлени́цею, ѡ҆дѣ́ѧна, ꙗ҆ви́ласѧ є҆сѝ ѻ҆чесє́мъ безсме́ртнагѡ жениха̀ твоегѡ̀: ра́дꙋйсѧ, къ жела́нномꙋ кра́ю прише́дшаѧ и҆ люби́магѡ сп҃са и҆ гдⷭ҇а ᲂу҆зрѣ́вшаѧ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ є҃

Бг҃озда̑ннымъ ѕвѣзда́мъ ᲂу҆подо́билисѧ є҆стѐ, вѣ́ро, наде́ждо и҆ любы̀, всѣ́мъ бо се́рдцемъ прилѣпи́вшїѧсѧ ко є҆ди́номꙋ вѣ́чномꙋ животꙋ̀ и҆ красотѣ̀ неизрече́ннѣй, і҆и҃сꙋ хрⷭ҇тꙋ̀, ско́рѡ ше́ствовасте, во є҆́же ᲂу҆мре́ти за него̀ и҆ наслади́тисѧ бжⷭ҇твеннагѡ є҆гѡ̀ видѣ́нїѧ, пою́ще є҆мꙋ̀: А҆ллилꙋ́їа.

І҆́косъ є҃

Ви́дѣвше добропобѣ̑дныѧ сєстры̀ ст҃ꙋ́ю вѣ́рꙋ ра́достнѡ за хрⷭ҇та̀ пострада́вшꙋ, и҆ са́ми хотѧ́хꙋ дꙋ́ши своѧ̑ за него̀ положи́ти: ца́рь же наде́ждꙋ ст҃ꙋ́ю нача́тъ и҆спы́товати, и҆ ви́дѣвъ ю҆̀ съ сестро́ю є҆диномы́сленнꙋ сꙋ́щꙋ, на мꙋ̑ки вдадѐ ю҆̀, ѻ҆ба́че ничто́же ᲂу҆спѣ̀. Мы́ же, наде́ждꙋ ст҃ꙋ́ю ѡ҆ сицево́мъ є҆ѧ̀ мꙋдрова́нїи ᲂу҆бл҃жа́юще, воспои́мъ и҆ просла́вимъ ю҆̀:

Ра́дꙋйсѧ, наде́ждо, же́стоко бїе́ннаѧ, ѻ҆ба́че пресвѣ́тлꙋю наде́ждꙋ на гдⷭ҇а не потерѧ́вшаѧ: ра́дꙋйсѧ, мꙋ̑ки твоѧ̑ безро́потнѡ въ молча́нїи терпѣ́вшаѧ.

Ра́дꙋйсѧ, и҆ на́мъ крѣ́пкое терпѣ́нїе подаю́щаѧ: ра́дꙋйсѧ, ꙗ҆́кѡ въ разжже́ннѣй пещѝ неѡпалѧ́ема бы́вши, хвалꙋ̀ бг҃ꙋ возсыла́ла є҆сѝ.

Ра́дꙋйсѧ, ꙗ҆́кѡ и҆ на́съ во страда́нїихъ хвали́ти бг҃а наꙋча́еши: ра́дꙋйсѧ, ꙗ҆́кѡ ногтьмѝ желѣ́зными стро́гана была̀ є҆сѝ.

Ра́дꙋйсѧ, на́съ, сꙋ́щихъ въ ско́рбехъ, лꙋча́ми наде́жды ѡ҆сїѧва́ющаѧ: ра́дꙋйсѧ, ꙗ҆́кѡ чꙋ́дное нѣ́кое бл҃гоꙋха́нїе ѿ ꙗ҆́звъ твои́хъ и҆схожда́ше.

Ра́дꙋйсѧ, непоколеби́мое ᲂу҆пова́нїе на гдⷭ҇а і҆и҃са неизмѣ́ннѡ сохра́ншаѧ: ра́дꙋйсѧ, безнаде́жность и҆ безси́лїе въ сердца́хъ на́шихъ и҆стреблѧ́ющаѧ.

Ра́дꙋйсѧ, ме́чное посѣче́нїе за хрⷭ҇та̀ ра́достнѡ прїи́мшаѧ: ра́дꙋйсѧ, ꙗ҆́снаѧ денни́це, на́мъ, печа́льми земны́ми ᲂу҆гнетє́ннымъ, мі́ръ вѣ́чный раскрыва́ющаѧ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ ѕ҃

Проповѣ́дникѡмъ и҆ а҆пⷭ҇лѡмъ бг҃оно́снымъ подѡ́бны бы́сте, бг҃омꙋ̑дрыѧ сєстры̀: добродѣ́тельми бо ва́шими проповѣ́дасте всѣ̑мъ вѣ̑рнымъ вѣ́рꙋ, наде́ждꙋ и҆ любо́вь ко гдⷭ҇ꙋ, влⷣцѣ всѣ́хъ, томꙋ̀ пою́ще: А҆ллилꙋ́їа.

І҆́косъ ѕ҃

Возсїѧ́ла є҆сѝ, а҆́ки со́лнце, любы̀ ст҃а́ѧ, кто́ бо си́це за возлю́бленнагѡ гдⷭ҇а своегѡ̀ можа́ше ста́ти, ꙗ҆́коже любы̀, поне́же пи́сано є҆́сть: крѣпка̀ ꙗ҆́кѡ сме́рть любы̀, вода̀ мно́га не мо́жетъ ᲂу҆гаси́ти любвѐ, и҆ рѣ́ки не потопѧ́тъ є҆ѧ̀. Мо́лимъ ти сѧ ны́нѣ, любы̀ ст҃а́ѧ, серафі́мскимъ пла́менемъ любвѐ ко гдⷭ҇ꙋ горѧ́щаѧ, ѡ҆бновѝ ѡ҆каменє́ннаѧ и҆ и҆зсѡ́хшаѧ сердца̀ на̑ша, возжгѝ въ на́съ, ѡ҆скꙋдѣ́вшихъ любо́вїю, свѣ́тъ любвѐ, да возлю́бльше гдⷭ҇а и҆ всѧ̑ бли̑жнїѧ на̑ша, тебѐ, ꙗ҆́кѡ моли́твенницꙋ на́шꙋ, восхва́лимъ си́це:

Ра́дꙋйсѧ, любы̀, ꙗ҆́кѡ любвѐ твоеѧ̀ ко хрⷭ҇тꙋ̀ во́ды мнѡ́ги пре́лестей мїрски́хъ не ᲂу҆гаси́ша: ра́дꙋйсѧ, ꙗ҆́кѡ всѧ̑ ласка̑нїѧ и҆ да́ры царє́вы ѿве́ргши, дꙋ́шꙋ твою̀ за гдⷭ҇а положи́ла є҆сѝ.

Ра́дꙋйсѧ, ꙗ҆́кѡ любвѐ твоеѧ̀ рѣ́ки бѣ́дъ и҆ страда́нїй не потопи́ша: ра́дꙋйсѧ, за гдⷭ҇а і҆и҃са на колесѝ протѧ́гнꙋтаѧ, же́злїемъ бїе́ннаѧ, све́рдлами прободе́ннаѧ и҆ въ пе́щь ѻ҆́гненнꙋю вве́рженнаѧ.

Ра́дꙋйсѧ, ꙗ҆́кѡ въ лю́тыхъ мꙋ́кахъ твои́хъ си́лою бж҃їею ᲂу҆крѣплѧ́ема была̀ є҆сѝ: ра́дꙋйсѧ, кро́вїю твое́ю, любвѐ ра́ди къ безсме́ртномꙋ женихꙋ̀ твоемꙋ̀ хрⷭ҇тꙋ̀ и҆злїѧ́нною, въ хла́дныхъ сердца́хъ на́шихъ любо́вь возбꙋжда́ющаѧ.

Ра́дꙋйсѧ, ꙗ҆́вѣ показа́вшаѧ на́мъ, ꙗ҆́кѡ любвѐ ра́ди всѧ̑ мꙋчє́нїѧ сла́дцѣ претерпѣва́ютсѧ: ра́дꙋйсѧ, ꙗ҆ви́вшаѧ на́мъ, ꙗ҆́кѡ любы̀ бжⷭ҇твеннаѧ приво́дитъ къ животꙋ̀ вѣ́чномꙋ.

Ра́дꙋйсѧ, са́мою ве́щїю ᲂу҆вѣ́рившаѧ, ꙗ҆́кѡ любы̀ бжⷭ҇твеннаѧ ѿкрове́нїе є҆́сть безсме́ртїѧ: ра́дꙋйсѧ, ꙗ҆́кѡ ника́ѧже мꙋчи́тєльства возмого́ша разлꙋчи́ти любо́вь ѿ любвѐ хрⷭ҇то́вы.

Ра́дꙋйсѧ, въ мꙋ́кахъ а҆пⷭ҇льски вѣща́вшаѧ, ꙗ҆́кѡ не разлꙋчи́тъ тѧ̀ ѿ любвѐ бж҃їѧ ни ско́рбь, ни тѣснота̀, ни гоне́нїе, ни гла́дъ, ни нагота̀, ни бѣда̀, ни ме́чь: ра́дꙋйсѧ, любвѐ ра́ди хрⷭ҇то́вы мече́мъ во главꙋ̀ ᲂу҆сѣ́ченнаѧ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ з҃

Хотѧ́ще скорѣ́е ѿ тѣ́ла разлꙋчи́тисѧ и҆ со хрⷭ҇то́мъ бы́ти ст҃ы̑ѧ дѣ̑вы, є҆гда̀ на ме́чное посѣче́нїе и҆дѧ́хꙋ, є҆ди́на дрꙋгꙋ́ю и҆ ма́терь свою̀ софі́ю ѡ҆б̾е́млюще лобыза́хꙋсѧ, дрꙋ́жескомꙋ на́съ любле́нїю поꙋча́юще, да всѝ кꙋ́пнѡ пое́мъ бг҃ꙋ: А҆ллилꙋ́їа.

І҆́косъ з҃

Но́вое чꙋ́до показа̀ гдⷭ҇ь, є҆гда̀ по́мощь свою̀ посла̀ страда́вшимъ за и҆сповѣ́данїе и҆́мене є҆гѡ̀ толи́кѡ ю҆́нымъ дѣ́вамъ: вѣ́рою бо, наде́ждою и҆ любо́вїю ᲂу҆крѣплѧ́ємы и҆ возноси̑мы бы́вше, до́блественнѣ по́двиги своѧ̑ сконча́ша. Мы́ же въ є҆диномы́слїи и҆ є҆динодꙋ́шїи до конца̀ живота̀ пребы́вшихъ мо́лимъ ва́съ, да и҆ на́мъ низпо́слете є҆диномы́слїе въ соверше́нїи до́брыхъ дѣ́лъ, ᲂу҆миле́ннѡ велича́ющимъ ва́съ:

Ра́дꙋйтесѧ, вѣ́ро, наде́ждо и҆ любы̀, є҆ди́нѣмъ пꙋте́мъ мꙋче́нїй до вра́тъ нбⷭ҇ныхъ ше́дшїѧ: ра́дꙋйтесѧ, въ пресвѣ́тлый черто́гъ прелюбе́знагѡ жениха̀ ва́шегѡ во гла́сѣ ра́дованїѧ вше́дшїѧ.

Ра́дꙋйтесѧ, ꙗ҆́кѡ і҆и҃съ хрⷭ҇то́съ просвѣтѝ, ꙗ҆́коже ѕвѣ̑зды на нб҃сѝ, ра̑ны на тѣлесѣ́хъ ва́шихъ: ра́дꙋйсѧ, софі́е, до́блественнѣ на мꙋ̑ки ча̑дъ твои́хъ взира́вшаѧ.

Ра́дꙋйтесѧ, ꙗ҆́кѡ нбⷭ҇ною красото́ю, є҆ѧ́же ѻ҆́ко не ви́дѣ, ᲂу҆красѝ гдⷭ҇ь добро́тꙋ ва́шꙋ, мꙋ́ками ѿѿ̾ѧ́тꙋю: ра́дꙋйтесѧ, вѣнцы̑ воздаѧ́нїѧ прїе́мшїѧ.

Ра́дꙋйтесѧ, а҆́ки трѝ ѕвѣзды̑, со́лнцемъ пра́вды ѡ҆зарє́нныѧ: ра́дꙋйсѧ, софі́е, въ мꙋ́жественнѣмъ и҆сповѣ́данїи дще́рьми твои́ми и҆́мене хрⷭ҇то́ва ᲂу҆тѣше́нїе ве́лїе ѡ҆брѣ́тшаѧ.

Ра́дꙋйтесѧ, мглꙋ̀ сомнѣ́нїй на́шихъ разсѣѧва́ющїѧ: ра́дꙋйтесѧ, на́съ, ᲂу҆дрꙋче́нныхъ страда́ньми дꙋше́вными и҆ тѣле́сными, подкрѣплѧ́ющїѧ.

Ра́дꙋйтесѧ, красото́ю любвѐ сердца̀ на̑ша ᲂу҆краша́ющїѧ: ра́дꙋйсѧ, софі́е, крѣ́посте и҆ ᲂу҆тѣше́нїе и҆знемога́ющихъ въ бѣда́хъ и҆ нꙋ́ждахъ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ и҃

Стра́нное и҆ непонѧ́тное на́мъ немѡщны́мъ, въ мїрски́хъ сласте́хъ погрѧ́знꙋвшымъ, зри́мъ дѣ́ло, ꙗ҆́кѡ софі́а ст҃а́ѧ, возлю́бленныхъ ча̑дъ свои̑хъ ви́дѧщи лю̑тыѧ и҆ гѡ́рькїѧ мꙋ̑ки и҆ смє́рти, ни ма́лѡ не поскорбѣ̀, но возра́довасѧ ѕѣлѡ̀ дꙋ́хомъ, пою́щи бг҃ꙋ: А҆ллилꙋ́їа.

І҆́косъ и҃

Всѧ̀ бѣ̀ въ вы́шнихъ мꙋ́драѧ софі́а, є҆гда̀ дще́ри своѧ̑ сла́дкими словесы̀ и҆ мꙋ́дрыми ᲂу҆вѣща́ньми на мꙋчє́нїѧ подвиза́ше. А҆́ще же ѿ є҆стества̀ къ слеза́мъ преклонѧ́шесѧ а҆́бїе, ѿ любвѐ хрⷭ҇то́вы прелага́шесѧ на ра́дость, печа́ль бо серде́чнꙋю и҆ болѣ́знь ѡ҆ ча̑дѣхъ ма́тернюю побѣдѝ въ не́й любы̀ бж҃їѧ. Ве́лїею ᲂу҆̀бѡ любо́вїю дщє́ри своѧ̑ лю́бѧщи, па́че всегѡ̀ тѣ̑мъ црⷭ҇твїѧ нбⷭ҇нагѡ жела́ше. Сегѡ̀ ра́ди, чꙋдѧ́щесѧ мꙋ́дрости и҆ вели́цѣй любвѝ твое́й ко дще́рємъ и҆ сла́вѧще тѧ̀, взыва́емъ:

Ра́дꙋйсѧ, софі́е, ꙗ҆́кѡ возвесели́сѧ дꙋша̀ твоѧ̀ ѡ҆ бл҃же́ннѣй кончи́нѣ дще́рей твои́хъ, ст҃о́е и҆́мѧ гдⷭ҇а дерзнове́ннѡ и҆сповѣ́давшихъ: ра́дꙋйсѧ, въ мч҃ничестѣмъ вѣнча́нїи ча̑дъ твои̑хъ че́сть и҆ сла́вꙋ прїѧ́вшаѧ.

Ра́дꙋйсѧ, ᲂу҆ча́стїѧ мч҃ническагѡ и҆ спребыва́нїѧ со дще́рьми въ нбⷭ҇нѣй сла́вѣ хрⷭ҇та̀ бг҃а сподо́бльшаѧсѧ: ра́дꙋйсѧ, чтⷭ҇на̑ѧ тѣлеса̀ дще́рей твои́хъ съ ра́достными слеза́ми погре́бшаѧ.

Ра́дꙋйсѧ, трѝ дни̑ гро́бꙋ и҆́хъ присѣдѣ́вшаѧ и҆ сно́мъ сме́рти ѡ҆ гдⷭ҇ѣ почи́вшаѧ: ра́дꙋйсѧ, а҆́ще и҆ не пло́тїю, ѻ҆ба́че се́рдцемъ за хрⷭ҇та̀ страда́вшаѧ.

Ра́дꙋйсѧ, ꙗ҆́кѡ трѝ добродѣ́тєльныѧ дще́ри, си́ми вѣ́рꙋ, наде́ждꙋ, любо́вь къ бг҃ꙋ ꙗ҆ви́вши, въ да́ръ прест҃ѣ́й трⷪ҇цѣ принесла̀ є҆сѝ: ра́дꙋйсѧ, ꙗ҆́кѡ чадоро́дїѧ ра́ди сп҃сла́сѧ є҆сѝ.

Ра́дꙋйсѧ, ди́внаѧ ма́ти, бл҃гі́ѧ па́мѧти досто́йнаѧ: ра́дꙋйсѧ, дщє́ри твоѧ̑, да кро́вь свою̀ за хрⷭ҇та̀ пролїю́тъ, моли́вшаѧ.

Ра́дꙋйсѧ, ᲂу҆мꙋдрѧ́ющаѧ ны̀, да блюде́мъ непрело́жнѡ добродѣ́тєли вѣ́ры, наде́жды и҆ любвѐ: ра́дꙋйсѧ, животворѧ́щей трⷪ҇цѣ за ны̀ молѧ́щаѧсѧ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ ѳ҃

Всѝ а҆́гг҃ли дивлѧ́хꙋсѧ ѡ҆ страда́нїихъ ва́шихъ, ст҃ы̑ѧ мч҃ницы, и҆ побѣ́дꙋ ва́шꙋ над̾ дїа́воломъ торжествꙋ́юще, дꙋ́ши же ва̑ша къ нб҃сѝ провожда́юще, воспѣва́хꙋ хрⷭ҇тꙋ̀ бг҃ꙋ: А҆ллилꙋ́їа.

І҆́косъ ѳ҃

Вѣті̑и велере́чивїи всѧ̑ страда̑нїѧ ва̑ша за хрⷭ҇та̀ не возмо́гꙋтъ и҆зрещѝ, дивѧ́щесѧ же толи̑кимъ подвигѡ́мъ, во млады́хъ лѣ́тѣхъ под̾ѧ̑тымъ, немо́тствꙋютъ. Мы́ же ѡ҆ чтⷭ҇нѣ́й кончи́нѣ ва́шей бг҃а прославлѧ́юще, велича́емъ ва́съ си́це:

Ра́дꙋйтесѧ, вѣ́ро, наде́ждо и҆ любы̀, пою́щїѧ хвалꙋ̀ бг҃ꙋ, на нб҃о нб҃сѐ возше́дшемꙋ: ра́дꙋйтесѧ, щи́те вѣ́ры, бронѐ наде́жды и҆ свѣти́льниче любвѐ.

Ра́дꙋйтесѧ, зрѣ́нїемъ пресвѣ́тлагѡ лица̀ бж҃їѧ наслажда́ющїѧсѧ: ра́дꙋйсѧ, софі́е, бл҃гочести̑выѧ ма́тєри на мꙋ́дрое воспита̑нїе ча̑дъ и҆̀хъ наставлѧ́ющаѧ.

Ра́дꙋйтесѧ, поꙋча́ющїѧ ны̀, да взы́щемъ гдⷭ҇а, и҆ жива̀ бꙋ́детъ дꙋша̀ на̑ша: ра́дꙋйтесѧ, съ вѣ́рою, наде́ждою и҆ любо́вїю прибѣга́ющихъ къ ва́мъ тє́плыѧ моли́твєнницы.

Ра́дꙋйтесѧ, вразꙋмлѧ́ющїѧ ны̀, ꙗ҆́кѡ всѧ̀ сла́дость и҆ пре́лесть мі́ра сегѡ̀ ꙗ҆́кѡ ды́мъ и҆зчеза́етъ, ꙗ҆́кѡ пра́хъ ѿ вѣ́тра размета́етсѧ и҆ въ пе́рсть ѡ҆браща́етсѧ: ра́дꙋйсѧ, софі́е, всѣ́мъ се́рдцемъ гдⷭ҇а бг҃а возлю́бльшаѧ.

Ра́дꙋйтесѧ, а҆́ки трїѐ свѣ́тлїи ключи̑, ко є҆ди́номꙋ и҆сто́чникꙋ жи́зни прите́кшїи: ра́дꙋйтесѧ, а҆́ки трїѐ бл҃гово́ннїи цвѣ́ти, на є҆ди́нѣй бл҃гопло́днѣй вѣ́тви прозѧ́бшїи.

Ра́дꙋйтесѧ, а҆́ки трѝ зерца̑ла, безпредѣ́льнꙋю красотꙋ̀ бж҃їю въ себѣ̀ ѿража́ющаѧ: ра́дꙋйсѧ, софі́е, а҆́ки ма́слина, трѝ вѣ̑тви, ѡ҆тѧгчє́нныѧ и҆зѻби́льными плоды̑ дарѡ́въ бж҃їихъ, произра́стшаѧ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ і҃

Сп҃стѝ хотѧ́ще дꙋ́шы своѧ̑ ст҃ы̑ѧ мч҃нцы, любвѐ ра́ди хрⷭ҇то́вы ласка̑нїѧ царє́ва и҆ бога̑тства мі́ра сегѡ̀ тлѣ́ннагѡ презрѣ́ша и҆ ра́достнѡ кончи́нꙋ мч҃ническꙋю за хрⷭ҇та̀ прїѧ́ша, пою́ще є҆мꙋ̀: А҆ллилꙋ́їа.

І҆́косъ і҃

Стѣна́ми вѣ́ры, наде́жды и҆ любвѐ ꙗ҆влѧ́ютсѧ ст҃ы̑ѧ мч҃ницы всѣ̑мъ, прибѣга́ющимъ къ ни̑мъ съ те́плою и҆ ᲂу҆се́рдною моли́твою, и҆ си́це въ печа́лехъ и҆ напа́стехъ къ ни̑мъ взыва́ющимъ:

Ра́дꙋйтесѧ, ꙗ҆́звъ грѣхо́вныхъ дѡ́брыѧ цѣли́тєльницы: ра́дꙋйтесѧ, во тмѣ̀ печа́ли на́шеѧ свѣ́томъ ᲂу҆пова́нїѧ ны̀ ѡ҆зарѧ́ющїѧ.

Ра́дꙋйтесѧ, посредѣ̀ напа́стей и҆ скорбе́й ди́вный поко́й на́мъ посыла́ющїѧ: ра́дꙋйсѧ, софі́е, ѡ҆ на́съ, въ ѕлострада́нїихъ пове́рженныхъ, мꙋ́дрое попече́нїе ꙗ҆влѧ́ющаѧ.

Ра́дꙋйсѧ, вѣ́ро, крⷭ҇тъ спⷭ҇нїѧ пред̾ на́ми воздвиза́ющаѧ: ра́дꙋйсѧ, не́мѡщи на̑ша по моли́твамъ къ тебѣ̀ и҆сцѣлѧ́ющаѧ.

Ра́дꙋйсѧ, наде́ждо, ꙗ҆́корь и҆збавле́нїѧ на́мъ подаю́щаѧ: ра́дꙋйсѧ, ᲂу҆ны́нїе серде́цъ на́шихъ бл҃гостнѡ ѿ̾е́млющаѧ.

Ра́дꙋйсѧ, любы̀, твои́мъ ко гдⷭ҇ꙋ хода́тайствомъ въ ѕлѣ́й напа́сти ѿ неча́ѧнныѧ сме́рти ны̀ ѡ҆гражда́ющаѧ: ра́дꙋйсѧ, и҆знемога́ющїѧ си́лы на̑ша на бо́дрость возставлѧ́ющаѧ.

Ра́дꙋйсѧ, софі́е, прилѣ́жнаѧ ѡ҆ на́съ къ бг҃ꙋ моли́твеннице: ра́дꙋйсѧ, въ до́брыхъ дѣ́лѣхъ на́шихъ мꙋ́драѧ наста́внице.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ а҃і

Пѣ́нїе сїѐ похва́льное а҆́ще бы и҆ тмочи́сленное приноша́хомъ ва́мъ, ст҃ы̑ѧ мч҃ницы, не бы̀ довлѣ́ло ко прославле́нїю добродѣ́телей и҆ по́двигѡвъ ва́шихъ. Ѻ҆ба́че хвалꙋ̀ бг҃ꙋ возсыла́юще за всѧ̑, ꙗ҆́же во ст҃ы́хъ свои́хъ на́мъ ꙗ҆влѧ́етъ, томꙋ̀ пое́мъ: А҆ллилꙋ́їа.

І҆́косъ а҃і

Свѣ́томъ нбⷭ҇нымъ пред̾ гдⷭ҇емъ горѧ́щымъ свѣща́мъ подѡ́бны вѣ́ра, наде́жда и҆ любы̀, кꙋ́пнѡ съ ма́терїю и҆̀хъ софі́ею, къ ни̑мже припа́даемъ, молѧ́ще, да просвѣтѧ́тъ ны̀, ѡ҆мрачє́нныѧ печа́льми и҆ и҆з̾ глꙋбины̀ серде́цъ зовꙋ́щїѧ:

Ра́дꙋйтесѧ, ри̑зы ва̑ша въ кро́ви а҆́гнчей на землѝ ᲂу҆бѣли́вшїѧ: ра́дꙋйтесѧ, живота̀ вѣ́чнагѡ на́мъ хода̑таицы.

Ра́дꙋйтесѧ, дꙋ́шъ, и҆́щꙋщихъ поко́ѧ въ млⷭ҇рдїи бж҃їи, ᲂу҆твержде́нїе и҆ хране́нїе: ра́дꙋйсѧ, софі́е, ѿ сꙋеты̀ мїрскі́ѧ ны̀ ѡ҆гражда́ющаѧ.

Ра́дꙋйсѧ, вѣ́ро, доброцѣ́ннаѧ кади́льнице, ѳѷмїа́мъ хвалы̀ бг҃ꙋ возносѧ́щаѧ: ра́дꙋйсѧ, на́съ грѣ́шныхъ вѣ́рою просвѣща́ющаѧ.

Ра́дꙋйсѧ, наде́ждо, въ ско́рби ᲂу҆тѣше́нїе и҆ прибѣ́жище на́ше: ра́дꙋйсѧ, въ печа́лехъ на́шихъ лꙋчеза́рнаѧ вѣ́стнице и҆збавле́нїѧ.

Ра́дꙋйсѧ, любы̀, неѕло́бїе и҆ кро́тость въ сердца̀ на̑ша влива́ющаѧ: ра́дꙋйсѧ, та́инственнаѧ ѕвѣздо̀, ѿ тѣсноты̀ земны́ѧ горѣ̀ ны̀ возносѧ́щаѧ.

Ра́дꙋйсѧ, софі́е, мꙋ́драѧ и҆ пречестна́ѧ дѣтоводи́тельнице: ра́дꙋйсѧ, бг҃омꙋ́драгѡ житїѧ̀ молѧ́щимсѧ тѝ ᲂу҆строи́тельнице.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ в҃і

Блгⷣть бж҃їю прїѧ́ти сподо́бившїѧсѧ, моли́те ѡ҆ на́съ, ст҃ы̑ѧ мч҃ницы, пречи́стагѡ влⷣкꙋ хрⷭ҇та̀, да млⷭ҇тивъ бꙋ́детъ къ на́мъ, грѣ̑шнымъ, съ вѣ́рою, наде́ждою и҆ любо́вїю є҆мꙋ̀ є҆ди́номꙋ, гдⷭ҇ꙋ и҆ сп҃сꙋ на́шемꙋ, смире́ннѡ пою́щимъ: А҆ллилꙋ́їа.

І҆́косъ в҃і

Пое́мъ ва̑ша крѣ̑пкїѧ по́двиги, вѣ́рою, наде́ждею и҆ любо́вїю проникновє́нныѧ, почита́емъ страда̑нїѧ ва̑ша презѣ̑льнаѧ, хва́лимъ ди́вное терпѣ́нїе ва́ше, ᲂу҆бл҃жа́емъ кончи́нꙋ, за хрⷭ҇та̀ ва́ми ра́достнѡ под̾ѧ́тꙋю, велича́емъ неѡбори́мое мꙋ́жество ва́ше, ст҃ы̑ѧ мч҃ницы вѣ́ро, наде́ждо и҆ любы̀, и҆ мꙋ́драѧ ма́ти софі́е, и҆, прославлѧ́юще ва́съ, взыва́емъ си́це:

Ра́дꙋйтесѧ, а҆́ки трѝ стрꙋи̑ мѡ́лнїины, ѿ восто́къ да́же до за́падъ добродѣ́тельми свои́ми просїѧ́вшїѧ: ра́дꙋйтесѧ, фїа́ли вѣ́ры, наде́жды и҆ любвѐ, животво́рнымъ питїе́мъ дꙋ́ши на̑ша напаѧ́ющїи.

Ра́дꙋйтесѧ, трїѐ свѣтоза́рнїи пꙋтїѐ, ко прⷭ҇то́лꙋ сла́вы гдⷭ҇ни на́съ ведꙋ́щїи: ра́дꙋйсѧ, софі́е, ча̑дъ ра́ди твои́хъ ѿ ли́ка ст҃ы́хъ похвале́ннаѧ.

Ра́дꙋйсѧ, вѣ́ро, цвѣ́те вѣ́ры, па́че снѣ̑га бѣлѣ́йшїй: ра́дꙋйсѧ, ᲂу҆слажде́нїе стра́ждꙋщихъ.

Ра́дꙋйсѧ, наде́ждо, ᲂу҆гнете́нныхъ серде́цъ возноше́нїе: ра́дꙋйсѧ, а҆́ки пото́къ цѣльбоно́сный, жа́ждꙋ скорбѧ́щихъ дꙋ́шъ ᲂу҆толѧ́ющаѧ.

Ра́дꙋйсѧ, любы̀, вѣ́нче и҆з̾ ми́ра, ра́дованїѧ и҆ бл҃гости соплете́нный: ра́дꙋйсѧ, ᲂу҆́мнаѧ зарни́це вѣ́чности.

Ра́дꙋйсѧ, софі́е, же́зле си́лы, кро́тцѣ и҆ мꙋ́дрѣ ча̑да наказꙋ́ѧй: ра́дꙋйсѧ, бг҃овѣ́дѣнїѧ пресвѣ́тлаѧ лꙋчѐ, дꙋша́мъ на́шимъ возсїѧва́ющаѧ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ г҃і

Ѽ, ст҃ы̑ѧ и҆ достохва́льныѧ мч҃ницы, вѣ́ро, наде́ждо и҆ любы̀, и҆ мꙋ́драѧ ма́ти софі́е, ны́нѣ прїе́мше ма́лое сїѐ моле́нїе на́ше, ѿ всѧ́кихъ ны̀ бѣ́дъ, болѣ́зней и҆ скорбе́й моли́твами ва́шими и҆зба́вите, да сподо́бльшесѧ во црⷭ҇твїи нбⷭ҇нѣмъ зрѣ́ти безсме́ртнагѡ гдⷭ҇а і҆и҃са, съ ва́ми вкꙋ́пѣ воспое́мъ є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃ли на нб҃сѝ ра́довахꙋсѧ, добродѣ́тельное житїѐ ва́ше зрѧ́ще, є҆́же провожда́сте въ чте́нїи писа́нїй бжⷭ҇твенныхъ, въ трꙋдѣ́хъ, постѣ̀, моли́твѣ и҆ ми́лостыни, ма́терїю ва́шею непреста́ннѡ сꙋ́ще поꙋча́єми, да ꙗ҆вите́сѧ ѻ҆́брази живі́и трїе́хъ бг҃осло́вскихъ добродѣ́телей, и҆̀хже и҆мена́ми наречены̀ бы́сте. Мы́ же, таковѣ́й мꙋ́дрости ма́тере ва́шеѧ и҆ соверше́нномꙋ бл҃горазꙋ́мїю ва́шемꙋ дивѧ́щесѧ, бл҃гоговѣ́йнѡ рце́мъ ва́мъ:

Ра́дꙋйтесѧ, є҆диномы́слєнныѧ сєстры̀, трїе́мъ добродѣ́телємъ тезоимєни́тыѧ: ра́дꙋйтесѧ, въ повинове́нїи бг҃омꙋ́дрѣй ма́тери ва́шей на степє́ни соверше́нствованїѧ вше́дшїѧ.

Ра́дꙋйтесѧ, а҆́ки трѝ ра̑йскїѧ вѣ̑тви, въ ѕловѣ́рнѣмъ ри́мѣ возра́сшїѧ: ра́дꙋйсѧ, софі́е, дще́рємъ твои̑мъ и҆мена̀ добродѣ́телей наре́кшаѧ, ꙗ҆̀же ве́щїю и҆сполнѧ́ти наꙋчи́ла є҆сѝ.

Ра́дꙋйсѧ, вѣ́ро, вѣ́рою неви́димое ꙗ҆́кѡ ви́димое зрѣ́ти на́мъ помога́ющаѧ: ра́дꙋйсѧ, въ нетлѣ́нїе ѡ҆блече́ннаѧ.

Ра́дꙋйсѧ, наде́ждо, наде́ждою страда̑нїѧ на̑ша во ю҆до́ли ско́рби ѡ҆слаблѧ́ющаѧ и҆ въ гѡ́рнѧѧ десни́цею ᲂу҆казꙋ́ющаѧ: ра́дꙋйсѧ, црⷭ҇твїе нбⷭ҇ное ᲂу҆наслѣ́довавшаѧ.

Ра́дꙋйсѧ, любы̀, любо́вїю бжⷭ҇твенною бл҃же́нство безсме́ртныѧ жи́зни на́мъ ѿкрыва́ющаѧ: ра́дꙋйсѧ, блгⷣтїю дх҃а ст҃а́гѡ ѡ҆сїѧ́ннаѧ.

Ра́дꙋйсѧ, софі́е, сі́есть премꙋ́дрость, премꙋ́дрѣ дще́ри твоѧ̑ воспита́вшаѧ: ра́дꙋйсѧ, въ добродѣ́телѣхъ вѣ́ры, наде́жды и҆ любвѐ на́съ ᲂу҆твержда́ющаѧ.

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Конда́къ а҃

И҆збра̑ннымъ раба́мъ гдⷭ҇а вседержи́телѧ, вѣ́рѣ, наде́ждѣ и҆ любвѝ, и҆ мꙋ́дрѣй ма́тери софі́и, похва̑льнаѧ ва́мъ пѣ̑нїѧ ᲂу҆миле́ннѡ возно́симъ. Вы́ же, ꙗ҆́кѡ дерзнове́нїе ко хрⷭ҇тꙋ̀ бг҃ꙋ и҆мꙋ́ще, моли́тесѧ за ны̀, во є҆́же и҆зба́витисѧ на́мъ грѣхѡ́въ и҆ скорбе́й, да бл҃года́рственнѡ вопїе́мъ ва́мъ:

Ра́дꙋйтесѧ, вѣ́ро, наде́ждо и҆ любы̀, кꙋ́пнѡ съ софі́ею, ма́терїю ва́шею премꙋ́дрою.

Моли́твы

Ѽ, ст҃ы̑ѧ и҆ достохва̑льныѧ мч҃ницы вѣ́ро, наде́ждо и҆ любы̀, и҆ до́блестныхъ дще́рей мꙋ́драѧ ма́ти софі́е, къ ва́мъ ны́нѣ со ᲂу҆се́рдною моли́твою притека́емъ. Что́ бо па́че возмо́жетъ предста́тельствовати за ны̀ пред̾ гдⷭ҇емъ, а҆́ще не вѣ́ра, наде́жда и҆ любы̀, трѝ сїѧ̑ добродѣ́тєли пребыва́ющїѧ, во и҆́хже ѻ҆́бразъ наречє́нныѧ, са́мою ве́щїю ѻ҆́ныѧ ꙗ҆ви́сте. Оу҆моли́те ᲂу҆́бѡ гдⷭ҇а, да въ ско́рбехъ и҆ напа́стехъ неизрече́нною бл҃года́тїю свое́ю покры́етъ ны̀, и҆ сохрани́тъ и҆ тогѡ̀ сла́вꙋ, ꙗ҆́кѡ со́лнце незаходи́мое зрѣ́ти да сподо́битъ. Споспѣшествꙋ́йте на́мъ во смире́нныхъ моле́нїихъ на́шихъ, да прости́тъ гдⷭ҇ь бг҃ъ грѣхѝ и҆ беззако́нїѧ на̑ша, и҆ да поми́лꙋетъ на́съ грѣ́шныхъ, и҆ щедрѡ́тъ свои́хъ да сподо́битъ на́съ хрⷭ҇то́съ бг҃ъ, є҆мꙋ́же сла́вꙋ возсыла́емъ со безнача́льнымъ є҆гѡ̀ ѻ҆ц҃е́мъ и҆ прест҃ы́мъ и҆ бл҃ги́мъ и҆ животворѧ́щимъ є҆гѡ̀ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Ва́съ, ст҃ы̑ѧ мч҃ницы, вѣ́ро, наде́ждо и҆ любы̀, сла́вимъ, велича́емъ и҆ ᲂу҆бл҃жа́емъ, кꙋ́пнѡ съ мꙋ́дрою ма́терїю софі́ею, є҆́йже покланѧ́емсѧ, ꙗ҆́кѡ ѻ҆́бразъ бг҃омꙋ́драгѡ попече́нїѧ ꙗ҆влѧ́ющей. Оу҆молѝ, ст҃а́ѧ вѣ́ро, творца̀ ви́димыхъ и҆ неви́димыхъ, да вѣ́рꙋ крѣ́пкꙋ, небла́зненнꙋ и҆ нерꙋши́мꙋ пода́стъ на́мъ. Хода́тайствꙋй, ст҃а́ѧ наде́ждо, пред̾ гдⷭ҇емъ і҆и҃сомъ за на́съ грѣ́шныхъ, да ᲂу҆пова́нїе на бл҃га̑ѧ не ѿжене́тъ ѿ на́съ и҆ ѿ всѧ́кїѧ ско́рби и҆ нꙋ́жды да и҆зба́витъ ны̀. И҆сповѣ́ждь, ст҃а́ѧ любы̀, дх҃ꙋ и҆́стины, ᲂу҆тѣ́шителю, напа̑сти и҆ печа̑ли на̑ша, да то́й свы́ше сла́дость нбⷭ҇нꙋю ниспо́слетъ дꙋша́мъ на́шимъ. Помози́те ᲂу҆́бѡ въ бѣда́хъ на́шихъ, ст҃ы̑ѧ мч҃ницы, и҆ кꙋ́пнѡ съ мꙋ́дрою ма́терїю ва́шею софі́ею, моли́те цр҃ѧ̀ царе́й и҆ гдⷭ҇а гдⷭ҇ствꙋющихъ, да сохрани́тъ под̾ покро́вомъ цр҃ковь свою̀ ст҃ꙋ́ю. Со слеза́ми ᲂу҆миле́ннѡ припа́дающе къ ва́мъ, ва́шегѡ те́плагѡ предста́тельства пред̾ бг҃омъ ᲂу҆се́рднѡ мо́лимъ, да кꙋ́пнѡ съ ва́ми и҆ со всѣ́ми ст҃ы́ми превознесе́мъ и҆ препросла́вимъ прест҃о́е и҆ вели́кое и҆́мѧ ѻ҆ц҃а̀ и҆ сн҃а, и҆ ст҃а́гѡ дх҃а бг҃а, предвѣ́чнагѡ влⷣки и҆ бл҃ги́хъ содѣ́телѧ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.