Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ въ че́сть є҆ѧ̀ і҆кѡ́ны, и҆менꙋ́емыѧ цѣли́тельница.

Молченской (1405), именуемой "Целительница" (XVIII), и Старорусской икон Божией Матери 1 октября 2026

Конда́къ а҃

И҆збра́ннѣй ѿ всѣ́хъ родѡ́въ прест҃ѣ́й дв҃ѣ бцⷣѣ, ꙗ҆ви́вшейсѧ нѣ́когда кли́рїкꙋ болѧ́щꙋ, во є҆́же и҆сцѣли́ти є҆го̀ ѿ болѣ́зни лю́тыѧ, похва́льное прино́симъ пѣ́нїе: ты́ же, всемлⷭ҇тиваѧ влⷣчце, ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ бѣ́дъ и҆ скорбе́й и҆ болѣ́зней свободи́ ны, зовꙋ́щыѧ тѝ:

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

І҆́косъ а҃

А҆рха́гг҃лъ гаврїи́лъ, возвѣща́ѧ прест҃ѣ́й дв҃ѣ мр҃і́и безсѣ́менное зача́тїе ѿ неѧ̀ сн҃а бж҃їѧ, речѐ: ра́дꙋйсѧ, бл҃года́тнаѧ, гдⷭ҇ь съ тобо́ю, бл҃гослове́нна ты̀ въ жена́хъ: мы́ же грѣ́шнїи, гла́сꙋ а҆рха́гг҃ла подража́ти дерза́юще, съ вѣ́рою, любо́вїю и҆ бл҃гоговѣ́нїемъ вопїе́мъ пѣ̑нїѧ сицева̑ѧ:

Ра́дꙋйсѧ, ѿ нача́ла вѣкѡ́въ во главꙋ̀ на́шегѡ сп҃се́нїѧ пред̾избра́ннаѧ: ра́дꙋйсѧ, многоѻбра́знѣ ѿ прⷪ҇ро́кѡвъ предвозвѣще́ннаѧ.

Ра́дꙋйсѧ, невѣ́сто неневѣ́стнаѧ, заче́ншаѧ сн҃а наше́ствїемъ дх҃а ст҃а́гѡ: ра́дꙋйсѧ, мт҃и, въ ржⷭ҇твѣ̀ и҆ по ржⷭ҇твѣ̀ пребы́вшаѧ дв҃а.

Ра́дꙋйсѧ, ѡ҆дѣ́ющагосѧ свѣ́томъ, ꙗ҆́кѡ ри́зою, пелена́ми пови́вшаѧ: ра́дꙋйсѧ, гѡ́рнѧѧ и҆ дѡ́льнѧѧ бл҃года́тїю свое́ю пита́ющаго млеко́мъ пита́вшаѧ.

Ра́дꙋйсѧ, на рꙋкꙋ̀ твоє́ю вседержи́телѧ носи́вшаѧ: ра́дꙋйсѧ, ѡ҆ промысли́тели всеѧ̀ тва́ри попече́нїе и҆мѣ́вшаѧ.

Ра́дꙋйсѧ, па́че всѣ́хъ сн҃а твоего̀ возлюби́вшаѧ: ра́дꙋйсѧ, па́че всѣ́хъ ѿ негѡ̀ превознесе́ннаѧ.

Ра́дꙋйсѧ, чтⷭ҇нѣ́йшаѧ и҆ сла́внѣйшаѧ без̾ сравне́нїѧ всѣ́хъ нбⷭ҇ныхъ си́лъ: ра́дꙋйсѧ, превы́шшаѧ всѧ́кагѡ созда́нїѧ.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ в҃

Ви́дѧщи, пребл҃га́ѧ влⷣчце, ᲂу҆се́рдїе и҆ бл҃гоговѣ́нїе кли́рїка вїке́нтїа, на всѧ́къ де́нь преклонѧ́ющагѡ колѣ̑на пред̾ чтⷭ҇ны́мъ твои́мъ ѻ҆́бразомъ и҆ а҆рха́гг҃льское привѣ́тствїе тебѣ̀ приносѧ́щагѡ, прїѧ́ла є҆сѝ таково́е є҆гѡ̀ бл҃гоꙋгожде́нїе и҆ дарова́ла є҆сѝ є҆мꙋ̀ во дни̑ болѣ́зни внеза́пное и҆ ди́вное со ѻ҆дра̀ воста́нїе. Тѣ́мже и҆ мы̀ преклонѧ́емъ колѣ̑на дꙋ́шъ и҆ тѣле́съ на́шихъ пред̾ цѣльбоно́снымъ твои́мъ ѻ҆́бразомъ, гпⷭ҇жѐ на́ша бцⷣе, и҆ помина́юще чꙋ́дное ꙗ҆вле́нїе твоѐ кли́рїкꙋ болѧ́щемꙋ, вопїе́мъ сн҃ꙋ твоемꙋ̀ и҆ бг҃ꙋ на́шемꙋ: А҆ллилꙋ́їа.

І҆́косъ в҃

Разꙋмѣ́въ чꙋде́сное и҆сцѣле́нїе ѿ тѧ́жкагѡ недꙋ́га, кли́рїкъ вїке́нтїй воста̀ съ ᲂу҆бо́гагѡ ло́жа своегѡ̀, и҆́де въ цр҃ковь и҆ та́мѡ пѣ́сньми хвале́бными просла́ви тѧ̀, цѣли́тельницꙋ всѣ́хъ болѧ́щихъ. Прїимѝ ᲂу҆́бѡ и҆ ѿ на́съ, мт҃и бж҃їѧ, сїѧ̑ бл҃гохвалє́нїѧ:

Ра́дꙋйсѧ, ѿ вра́тъ сме́ртныхъ неисцѣ́льнѡ болѧ́щихъ къ жи́зни возвраща́ющаѧ: ра́дꙋйсѧ, сострада́нїѧ къ стра́ждꙋщымъ преиспо́лненнаѧ.

Ра́дꙋйсѧ, пораже́нныхъ разли́чными недꙋ̑ги чꙋде́снѡ и҆сцѣлѧ́ющаѧ: ра́дꙋйсѧ, во всѧ́кихъ ско́рбехъ и҆ печа́лехъ нбⷭ҇нꙋю ѿра́дꙋ въ сердца̀ на̑ша и҆злива́ющаѧ.

Ра́дꙋйсѧ, въ хрⷭ҇тїа́нскихъ добродѣ́телехъ преꙋспѣ́ти на́мъ помога́ющаѧ: ра́дꙋйсѧ, любо́вїю къ бг҃ꙋ и҆ бли̑жнимъ на́съ воѡдꙋшевлѧ́ющаѧ.

Ра́дꙋйсѧ, ѿ растлѣва́ющихъ дꙋ́шꙋ и҆ тѣ́ло собла́знѡвъ мі́ра сегѡ̀ сохранѧ́ющаѧ: ра́дꙋйсѧ, ско́раѧ ᲂу҆слы́шательнице ᲂу҆се́рднѡ тебѣ̀ молѧ́щихсѧ.

Ра́дꙋйсѧ, и҆сточа́ющаѧ вели̑кїѧ млⷭ҇ти и҆ щедрѡ́ты лю́бѧщымъ тѧ̀: ра́дꙋйсѧ, всѧ̑ потрє́бнаѧ въ животѣ̀ се́мъ да́рꙋющаѧ ᲂу҆пова́ющымъ на тѧ̀.

Ра́дꙋйсѧ, ᲂу҆бл҃жа́ющихъ тѧ̀ въ гро́зный ча́съ сме́рти не ѡ҆ставлѧ́ющаѧ: ра́дꙋйсѧ, почита́ющихъ тѧ̀ жи́зни вѣ́чныѧ сподоблѧ́ющаѧ.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ г҃

Си́лою, да́нною ѿ тебє̀, гпⷭ҇жѐ цр҃и́це и҆ влⷣчце, ст҃а́ѧ і҆кѡ́на твоѧ̀ и҆сточа́етъ неѡскꙋ́днѡ и҆сцѣлє́нїѧ стра́ждꙋщымъ ѿ недꙋ̑гъ многоразли́чныхъ, съ несꙋмнѣ́нною вѣ́рою къ не́й притека́ющымъ, бг҃ꙋ же вопїю́щымъ: А҆ллилꙋ́їа.

І҆́косъ г҃

И҆мꙋ́щи премно́гꙋю любо́вь къ ро́дꙋ хрⷭ҇тїа́нскомꙋ и҆ мт҃рнее ѡ҆ не́мъ попече́нїе, всѣ̑мъ просѧ́щымъ ᲂу҆ тебє̀ по́мощи и҆ застꙋпле́нїѧ всѧ́кое бл҃го́е проше́нїе ско́рѡ и҆сполнѧ́еши: сегѡ̀ ра́ди тебѣ̀, всемо́щнѣй застꙋ́пницѣ и҆ ско́рой помо́щницѣ на́шей, прино́симъ похвалы̑ сїѧ̑:

Ра́дꙋйсѧ, скорбѧ́щихъ ᲂу҆тѣше́нїе: ра́дꙋйсѧ, безнаде́жныхъ наде́ждо.

Ра́дꙋйсѧ, трꙋжда́ющихсѧ по́моще и҆ ᲂу҆крѣпле́нїе: ра́дꙋйсѧ, ни́щихъ ѡ҆дѣѧ́нїе.

Ра́дꙋйсѧ, а҆́лчꙋщихъ пита́тельнице: ра́дꙋйсѧ, ѡ҆би́димыхъ и҆ гони́мыхъ застꙋ́пнице.

Ра́дꙋйсѧ, ѡ҆би́дѧщихъ ᲂу҆страши́тельнице: ра́дꙋйсѧ, въ хрⷭ҇тїа́нстѣй вѣ́рѣ наста́внице.

Ра́дꙋйсѧ, взыска́нїе поги́бшихъ: ра́дꙋйсѧ, спорꙋ́чнице сп҃се́нїѧ грѣ́шныхъ.

Ра́дꙋйсѧ, і҆ве́рїи прославле́нїе: ра́дꙋйсѧ, землѝ рꙋ́сскїѧ бл҃года́тный покро́ве.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ д҃

Бꙋ́ри страсте́й и҆ похоте́й, и҆ и҆скꙋше́нїй бѣсо́вскихъ и҆зба́ви на́съ, премлⷭ҇рдаѧ бцⷣе, ᲂу҆крѣпѝ и҆ сохранѝ въ на́съ до конца̀ жи́зни на́шеѧ вѣ́рꙋ правосла́внꙋю и҆ пре́данность ст҃ѣ́й цр҃кви, да возмо́жемъ невозбра́ннѡ пѣ́ти гдⷭ҇ꙋ бг҃ꙋ: А҆ллилꙋ́їа.

І҆́косъ д҃

Слы́ша гдⷭ҇ь на нб҃сѝ твоѧ̑ ѡ҆ на́съ молє́нїѧ, пребл҃га́ѧ влⷣчце, и҆сполнѧ́етъ ско́рѡ всѧ́кое проше́нїе твоѐ. Вѣ́дꙋще таково́е мт҃рнее дерзнове́нїе къ сн҃ꙋ твоемꙋ̀, гдⷭ҇ꙋ на́шемꙋ і҆и҃сꙋ хрⷭ҇тꙋ̀, всѝ къ тебѣ̀ прибѣга́емъ и҆ ᲂу҆се́рднѡ мо́лимъ тѧ̀: предста́тельствꙋй ѡ҆ на́съ, многогрѣ́шныхъ рабѣ́хъ твои́хъ, пред̾ всемогꙋ́щимъ созда́телемъ на́шимъ, да не погꙋби́тъ на́съ со беззако́ньми на́шими, но да пода́стъ на́мъ ѡ҆ставле́нїе прегрѣше́нїй, вопїю́щымъ тебѣ̀ и҆з̾ глꙋбины̀ дꙋшѝ:

Ра́дꙋйсѧ, предста́тельнице на́ша пред̾ бг҃омъ, мі́ръ ѿ бѣ́дъ сп҃са́ющаѧ: ра́дꙋйсѧ, сн҃а твоего̀ на млⷭ҇ть къ на́мъ недостѡ́йнымъ преклонѧ́ющаѧ.

Ра́дꙋйсѧ, ѿ запале́нїѧ ѻ҆́гненнагѡ росо́ю мл҃твъ твои́хъ и҆збавлѧ́ющаѧ: ра́дꙋйсѧ, ᲂу҆да́ры мо́лнїи и҆ гро́ма ѿ на́съ ѿводѧ́щаѧ.

Ра́дꙋйсѧ, ю҆ро́дивꙋю мꙋ́дрость вѣ́ка сегѡ̀ посрамлѧ́ющаѧ: ра́дꙋйсѧ, пꙋ́ть сп҃се́нїѧ заблꙋ́ждшымъ показꙋ́ющаѧ.

Ра́дꙋйсѧ, грѣ̑шнымъ къ бг҃ꙋ дерзнове́нїе да́рꙋющаѧ: ра́дꙋйсѧ, и҆знемога́ющымъ въ напа́стехъ, ско́рбехъ и҆ и҆скꙋше́нїихъ ско́рѡ помога́ющаѧ.

Ра́дꙋйсѧ, въ постѣ̀, мл҃твѣ и҆ бг҃омы́слїи пребыва́ющымъ при́снѡ спребыва́ющаѧ: ра́дꙋйсѧ, бла̑га земна̑ѧ, сꙋ́єтнаѧ и҆ скоропреходѧ̑щаѧ, презира́ти на́съ наꙋча́ющаѧ.

Ра́дꙋйсѧ, къ нбⷭ҇нымъ и҆ вѣ̑чнымъ сокро́вищємъ ᲂу҆мы̀ и҆ сердца̀ на́шѧ возводѧ́щаѧ: ра́дꙋйсѧ, є҆ди́ное на потре́бꙋ и҆збира́ти наꙋча́ющаѧ.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ є҃

Свѣ́тъ нбⷭ҇ный ѡ҆зарѝ хра́минꙋ болѧ́щагѡ кли́рїка, є҆гда̀ предста́ла є҆сѝ, пребл҃га́ѧ влⷣчце, дарова́ти є҆мꙋ̀ и҆сцѣле́нїе ѿ лю́тагѡ недꙋ́га. Ѽ прест҃а́ѧ гпⷭ҇жѐ бцⷣе, просвѣтѝ помрачє́нныѧ мно́гими грѣхмѝ дꙋ́шы на́шѧ и҆ пода́ждь и҆сцѣле́нїе болѣ́знꙋющымъ тѣлесє́мъ на́шымъ, да прославлѧ́юще твоѧ̑ млⷭ҇ти, вопїе́мъ ра́достнѡ бг҃ꙋ: А҆ллилꙋ́їа.

І҆́косъ є҃

Ви́дѧще тѧ̀, влⷣчцꙋ бцⷣꙋ, пред̾ ѻ҆гнезра́чнымъ прⷭ҇то́ломъ прест҃ы́ѧ трⷪ҇цы стоѧ́щꙋ и҆ за хрⷭ҇тїа́нъ молѧ́щꙋюсѧ, нбⷭ҇ныѧ си̑лы и҆ всѝ ст҃і́и, ѿ вѣ́ка бг҃ꙋ ᲂу҆годи́вшїи, немо́лчными славослѡ́вїи ᲂу҆бл҃жа́ютъ тѧ̀. Мы́ же грѣ́шнїи, на землѝ, любо́вїю къ тебѣ̀ подвиза́емїи, дерза́емъ воспѣва́ти тебѣ̀ си́це:

Ра́дꙋйсѧ, мт҃рнею любо́вїю ве́сь мі́ръ хрⷭ҇тїа́нскїй ѡ҆б̾е́млющаѧ: ра́дꙋйсѧ, мл҃твами твои́ми къ сн҃ꙋ твоемꙋ̀ и҆ бг҃ꙋ на́съ сп҃са́ющаѧ.

Ра́дꙋйсѧ, ѻ҆́бразомъ ст҃ы́мъ цѣли́тельницы і҆ве́рїю бл҃гослови́вшаѧ: ра́дꙋйсѧ, гра́дъ москвꙋ̀ и҆ ѻ҆би́тель а҆леѯі́евскꙋю подо́бїемъ є҆гѡ̀ ѡ҆ст҃и́вшаѧ.

Ра́дꙋйсѧ, и҆зрѧ́днаѧ спобо́рнице ведꙋ́щымъ бра́нь проти́вꙋ и҆скꙋше́нїй мїрски́хъ и҆ дꙋшевре́дныхъ: ра́дꙋйсѧ, наста́внице цѣломꙋ́дрїѧ и҆ воздержа́нїѧ.

Ра́дꙋйсѧ, всѣ́хъ прибѣга́ющихъ под̾ кро́въ тво́й прїе́млющаѧ: ра́дꙋйсѧ, ѿ всѧ́кїѧ ѕло́бы и҆ вражды̀ ми́ромъ и҆ любо́вїю ѡ҆гражда́ющаѧ.

Ра́дꙋйсѧ, подви́жникѡвъ бл҃гоче́стїѧ къ го́рнемꙋ і҆ерⷭ҇ли́мꙋ пꙋтеводи́тельнице: ра́дꙋйсѧ, дꙋшепа́гꙋбныхъ є҆ресе́й и҆ раско́лѡвъ и҆скорени́тельнице.

Ра́дꙋйсѧ, ско́раѧ въ бѣда́хъ и҆ печа́лехъ ᲂу҆тѣ́шительнице: ра́дꙋйсѧ, всѣ́хъ вѣ́рныхъ бл҃га́ѧ застꙋ́пнице.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ ѕ҃

Проповѣ́дꙋетъ ст҃а́ѧ правосла́внаѧ цр҃ковь мно́жество чꙋде́съ твои́хъ и҆ вели̑кїѧ твоѧ̑ млⷭ҇ти, пребл҃га́ѧ влⷣчце, ꙗ҆́кѡ гра́ды и҆ вє́си ѡ҆гражда́еши, ѻ҆би́тєли и҆́ночєскїѧ и҆ жили̑ща бл҃гочести́выхъ защища́еши, ѡ҆би́димыхъ застꙋпа́еши и҆ всѧ̑ бл҃га̑ѧ и҆ дꙋшеполє́знаѧ низпосыла́еши всѣ̑мъ прославлѧ́ющымъ тѧ̀ и҆ пою́щымъ сн҃ꙋ твоемꙋ̀: А҆ллилꙋ́їа.

І҆́косъ ѕ҃

Свѣ́тлѡ красꙋ́етсѧ здѣ̀, гпⷭ҇жѐ бцⷣе, чꙋдотво́рнаѧ твоѧ̀ і҆кѡ́на, и҆менꙋ́емаѧ цѣли́тельница, прогонѧ́ющи ѿ всѣ́хъ вѣ́рныхъ тьмꙋ̀ и҆скꙋше́нїй и҆ напа́стей и҆ ѻ҆би́льнѡ и҆сцѣлє́нїѧ и҆сточа́ющи. Сегѡ̀ ра́ди во ᲂу҆миле́нїи зове́мъ тѝ:

Ра́дꙋйсѧ, ѻ҆́бразъ тво́й на́мъ млⷭ҇тивнѡ дарова́вшаѧ: ра́дꙋйсѧ, чрез̾ і҆кѡ̑ны твоѧ̑ ст҃ы̑ѧ пресла́внѡ чꙋдодѣ́йствꙋющаѧ.

Ра́дꙋйсѧ, ѿ неисцѣ́льныхъ болѣ́зней ско́рое и҆сцѣле́нїе подаю́щаѧ: ра́дꙋйсѧ, ѿ всѧ́кихъ бѣ́дъ и҆ скорбе́й и҆збавлѧ́ющаѧ.

Ра́дꙋйсѧ, грѣхѡ́вныѧ стра̑сти ᲂу҆кроща́ющаѧ: ра́дꙋйсѧ, коле́блющихсѧ въ вѣ́рѣ правосла́внѣй ᲂу҆крѣплѧ́ющаѧ.

Ра́дꙋйсѧ, ᲂу҆тѣше́нїе бл҃года́тное въ сердца̀ бг҃олюби̑ваѧ и҆злива́ющаѧ: ра́дꙋйсѧ, наде́ждою нбⷭ҇ныхъ бла̑гъ вѣ́рныхъ дꙋ́шы ᲂу҆слажда́ющаѧ.

Ра́дꙋйсѧ, въ до́брыхъ дѣ́лѣхъ преꙋспѣва́ти на́мъ помога́ющаѧ: ра́дꙋйсѧ, ѿ ви́димыхъ и҆ неви́димыхъ вра̑гъ на́съ защища́ющаѧ.

Ра́дꙋйсѧ, бл҃года́тїю твое́ю па́дшихъ возставлѧ́ющаѧ: ра́дꙋйсѧ, стра́хъ бж҃їй въ сердца̀ на̑ша вселѧ́ющаѧ.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ з҃

Хотѧ́щи ꙗ҆ви́ти млⷭ҇рдїе твоѐ неизрече́нное, дарова́ла є҆сѝ на́мъ, пребл҃га́ѧ бцⷣе дв҃о, чꙋдотво́рнꙋю і҆кѡ́нꙋ твою̀, и҆менꙋ́емꙋю цѣли́тельница, да всѝ притека́ющїи къ не́й съ вѣ́рою ѿ болѣ́зней свобожда́ютсѧ и҆ всѧ́кагѡ ᲂу҆тѣше́нїѧ сподоблѧ́ютсѧ. Сегѡ̀ ра́ди вопїе́мъ ѡ҆ тебѣ̀ бг҃ꙋ: А҆ллилꙋ́їа.

І҆́косъ з҃

Ди̑вна и҆ пресла̑вна дѣла̀ твоѧ̑, пренепоро́чнаѧ влⷣчце: всѣ̑мъ бо, бога̑тымъ и҆ ни́щымъ, здра̑вымъ и҆ болѧ́щымъ, съ прилѣ́жною мл҃твою къ цѣльбоно́снѣй і҆кѡ́нѣ твое́й притека́ющымъ, всѧ̑ бл҃га̑ѧ по коегѡ́ждо потре́бѣ и҆ въ мѣ́рꙋ вѣ́ры и҆ любвѐ подае́ши. Тѣ́мже и҆ мы̀ не таи́мъ твои́хъ бл҃годѣѧ́нїй, но бл҃года́рственнѡ прославлѧ́юще млⷭ҇ти твоѧ̑, глаго́лемъ тѝ си́це:

Ра́дꙋйсѧ, глꙋхи́хъ слы́шанїе: ра́дꙋйсѧ, слѣпы́хъ прозрѣ́нїе.

Ра́дꙋйсѧ, нѣмы́хъ глаго́ланїе: ра́дꙋйсѧ, хромы́хъ хожде́нїе.

Ра́дꙋйсѧ, прокаже́нныхъ ѡ҆чище́нїе: ра́дꙋйсѧ, разсла́бленныхъ ᲂу҆крѣпле́нїе.

Ра́дꙋйсѧ, ѿ ѕлы́хъ и҆ лꙋка́выхъ дꙋхѡ́въ свобожде́нїе: ра́дꙋйсѧ, по бз҃ѣ на́ше прибѣ́жище и҆ застꙋпле́нїе.

Ра́дꙋйсѧ, ѿ нꙋ́ждъ, печа́лей и҆ бѣ́дъ непрело́жнѡ и҆збавлѧ́ющаѧ: ра́дꙋйсѧ, пристра́стїе къ тлѣ́нномꙋ бога́тствꙋ и҆скоренѧ́ющаѧ.

Ра́дꙋйсѧ, и҆ска́ти бога́тство нетлѣ́нное на нб҃сѝ наꙋча́ющаѧ: ра́дꙋйсѧ, ᲂу҆́мъ на́шъ въ гѡ́рнѧѧ вперѧ́ющаѧ.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ и҃

Стра́нни и҆ прише́льцы въ мі́рѣ се́мъ ско́рбнѣмъ и҆ многомѧте́жнѣмъ сꙋ́ще, вѣ́чнагѡ нбⷭ҇нагѡ ѻ҆ч҃ества взыскꙋ́емъ, и҆ тебѐ, всемо́щнꙋю цр҃и́цꙋ приснодв҃ꙋ бцⷣꙋ, смире́ннѡ про́симъ: пꙋтево́дствꙋй на́съ по стезѧ́мъ сп҃си́тельныхъ за́повѣдей сн҃а твоегѡ̀, хрⷭ҇та̀ бг҃а на́шегѡ, да и҆збѣ́гше сѣ́тей неви́димагѡ врага̀, возмо́жемъ невозбра́ннѡ воспѣва́ти вседержи́телю бг҃ꙋ пѣ́снь: А҆ллилꙋ́їа.

І҆́косъ и҃

Ве́сь мі́ръ хрⷭ҇тїа́нскїй ᲂу҆бл҃жа́етъ тѧ̀, пренепоро́чнаѧ дв҃о, гла̑сы хвале́бными: всѣ̑мъ бо вѣ̑рнымъ, наипа́че же болѧ́щымъ, ᲂу҆тѣ́шительнѡ є҆́сть взира́ти на всечтⷭ҇нꙋ́ю і҆кѡ́нꙋ твою̀, цѣли́тельница и҆менꙋ́емꙋю. Ѽ пречꙋ́днаѧ гпⷭ҇жѐ бцⷣе, прїимѝ и҆ на̑ша ᲂу҆милє́ннаѧ бл҃гохвалє́нїѧ такова̑ѧ:

Ра́дꙋйсѧ, ра́досте на́ша: ра́дꙋйсѧ, добро́то несказа́ннаѧ.

Ра́дꙋйсѧ, высото̀ добродѣ́телей: ра́дꙋйсѧ, глꙋбино̀ смиренномꙋ́дрїѧ.

Ра́дꙋйсѧ, неистощи́мый и҆сто́чниче млⷭ҇тей и҆ щедро́тъ: ра́дꙋйсѧ, бл҃гоꙋха́нный цвѣ́те двⷭ҇тва и҆ чⷭ҇тоты̀.

Ра́дꙋйсѧ, вѣ́ры хрⷭ҇тїа́нскїѧ ᲂу҆твержде́нїе: ра́дꙋйсѧ, нече́стїѧ ѡ҆бличе́нїе.

Ра́дꙋйсѧ, го́рнихъ си́лъ похвало̀: ра́дꙋйсѧ, првⷣныхъ сла́во.

Ра́дꙋйсѧ, грѣ́шныхъ ᲂу҆пова́нїе: ра́дꙋйсѧ, ненадѣ́емыхъ надѣ́ѧнїе.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ ѳ҃

Всѐ ᲂу҆пова́нїе на тѧ̀ возлага́емъ, мт҃и бж҃їѧ, и҆ въ ско́рбехъ и҆ болѣ́знехъ ко ст҃ѣ́й і҆кѡ́нѣ твое́й съ бл҃гоговѣ́нїемъ и҆ вѣ́рою притека́емъ, ча́юще ѿ неѧ̀ ско́рое ᲂу҆тѣше́нїе и҆ и҆сцѣле́нїе полꙋчи́ти. Ѽ прест҃а́ѧ цр҃и́це бцⷣе, воззрѝ млⷭ҇тивнѡ на на́съ, смире́нныхъ рабѡ́въ твои́хъ, и҆ ᲂу҆скорѝ и҆спо́лнити всѧ̑, ꙗ҆̀же на по́льзꙋ на́мъ, и҆ въ се́й жи́зни, и҆ въ бꙋ́дꙋщей, да прославлѧ́юще твоѐ бл҃гоꙋтро́бїе, воспѣва́емъ творцꙋ̀ бг҃ꙋ: А҆ллилꙋ́їа.

І҆́косъ ѳ҃

Вѣті̑и многовѣща́ннїи не возмо́гꙋтъ досто́йнѡ восхвали́ти тѧ̀, пречⷭ҇таѧ дв҃о, чтⷭ҇нѣ́йшꙋю херꙋві̑мъ и҆ сла́внѣйшꙋю без̾ сравне́нїѧ серафі̑мъ, безсѣ́меннѡ ро́ждшꙋю сп҃са дꙋ́шъ на́шихъ. Мы́ же а҆́ще и҆ не́мощни є҆смы̀, ѻ҆ба́че любо́вїю къ тебѣ̀ побѣжда́еми, ѿверза́емъ недостѡ́йнаѧ ᲂу҆ста̀ своѧ̑ на похвалы̑ тебѣ̀ сицевы̑ѧ:

Ра́дꙋйсѧ, та́йно, ᲂу҆мы̑ человѣ́ческими и҆ а҆́гг҃льскими непостижи́маѧ: ра́дꙋйсѧ, чⷭ҇тото́ю а҆́гг҃лѡвъ превозше́дшаѧ.

Ра́дꙋйсѧ, чꙋде́съ хрⷭ҇то́выхъ нача́ло: ра́дꙋйсѧ, прⷪ҇ро́чествъ дре́внихъ и҆сполне́нїе.

Ра́дꙋйсѧ, двⷭ҇тво и҆ ржⷭ҇тво̀ въ себѣ̀ чꙋ́днѡ сочета́вшаѧ: ра́дꙋйсѧ, во ѻ҆бою̀ непоро́чнѡ и҆ ст҃ѡ себѐ сохра́ньшаѧ.

Ра́дꙋйсѧ, мт҃и сн҃а бж҃їѧ и҆ бг҃а вы́шнѧгѡ: ра́дꙋйсѧ, па́дшемꙋ человѣ́чествꙋ ѿве́рзшаѧ вхо́дъ въ црⷭ҇твїе нбⷭ҇ное.

Ра́дꙋйсѧ, ти́хое приста́нище ѿ бꙋ́рь пла́вающымъ по мо́рю жите́йскомꙋ: ра́дꙋйсѧ, бг҃омъ дарова́ннаѧ ѿра́до стра́ждꙋщымъ.

Ра́дꙋйсѧ, сїѧ́ющаѧ бл҃года́тїю и҆ сла́вою преди́вныхъ зна́менїй и҆ чꙋде́съ: ра́дꙋйсѧ, прїе́млющаѧ похвале́нїе людски́хъ слове́съ.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ і҃

Сп҃стѝ хотѧ̀ ро́дъ человѣ́ческїй ѿ беззако́нїй и҆ вѣ́чныѧ мꙋ́ки, чл҃вѣколю́бецъ гдⷭ҇ь тѧ̀, мт҃рь свою̀, дарова̀ въ по́мощь, покро́въ и҆ защи́тꙋ вѣ́рꙋющымъ въ него̀. Прославлѧ́юще таково́е созда́телѧ на́шегѡ безмѣ́рное млⷭ҇рдїе ѡ҆ на́съ грѣ́шныхъ, бл҃года́рственнымъ се́рдцемъ и҆ ᲂу҆сты̀ вопїе́мъ є҆мꙋ̀: А҆ллилꙋ́їа.

І҆́косъ і҃

Стѣна̀ є҆сѝ неѡбори́маѧ и҆ застꙋпле́нїе крѣ́пкое, бцⷣе дв҃о, всѣ̑мъ съ мл҃твою къ тебѣ̀ прибѣга́ющымъ. Тѣ́мже ᲂу҆̀бо и҆ на́съ недосто́йныхъ ѡ҆градѝ ѿ лю́тыхъ болѣ́зней и҆ ѿ всѧ́кагѡ ѕла́гѡ ѡ҆бстоѧ́нїѧ, и҆ пода́ждь во всѣ́хъ дѣ́лѣхъ бл҃говре́меннꙋю по́мощь и҆ ᲂу҆крѣпле́нїе взыва́ющымъ тѝ:

Ра́дꙋйсѧ, застꙋ́пнице на́ша и҆ похвало̀: ра́дꙋйсѧ, храни́тельнице на́ша и҆ ᲂу҆твержде́нїе.

Ра́дꙋйсѧ, ѿра́до на́ша и҆ ди́вное ѡ҆ на́съ попече́нїе: ра́дꙋйсѧ, и҆звѣ́стное прибѣ́жище на́ше во всѣ́хъ ско́рбныхъ ѡ҆бстоѧ́нїихъ.

Ра́дꙋйсѧ, младе́нцєвъ воспита́нїе: ра́дꙋйсѧ, ю҆́ныхъ наста́внице цѣломꙋ́дрїѧ.

Ра́дꙋйсѧ, сꙋпрꙋ́гѡмъ любо́вь и҆ согла́сїе да́рꙋющаѧ: ра́дꙋйсѧ, бл҃гоговѣ́йныхъ ста́рцєвъ дꙋхо́внѡ ᲂу҆крѣплѧ́ющаѧ.

Ра́дꙋйсѧ, вѣ́рныхъ па́стырей ст҃ы́ѧ цр҃кве вразꙋмлѧ́ющаѧ: ра́дꙋйсѧ, во и҆́ноческомъ ѻ҆́бразѣ подвиза́ющымсѧ въ го́рнїй і҆ерⷭ҇ли́мъ пꙋ́ть ᲂу҆казꙋ́ющаѧ.

Ра́дꙋйсѧ, въ мі́рѣ бл҃гочести́вѡ живꙋ́щихъ не ѡ҆ставлѧ́ющаѧ свои́мъ застꙋпле́нїемъ: ра́дꙋйсѧ, всѣ̑мъ хрⷭ҇тїа́нѡмъ преди́вное вспоможе́нїе.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ а҃і

Пѣ̑нїѧ и҆ мольбы̑ всеꙋмилє́нныѧ, ны́нѣ на́ми приноси̑мыѧ пред̾ цѣльбоно́снымъ твои́мъ ѻ҆́бразомъ, прїимѝ, приснодв҃о бцⷣе, и҆ сподо́би до конца̀ жи́зни на́шеѧ є҆ди́номꙋ бг҃ꙋ воспѣва́ти: А҆ллилꙋ́їа.

І҆́косъ а҃і

Свѣтоза́рнѣ сїѧ́етъ чꙋдотво́рнаѧ і҆кѡ́на твоѧ̀, мт҃и бж҃їѧ, и҆сточа́ющи вѣ̑рнымъ то́ки и҆сцѣле́нїй бл҃года́тныхъ и҆ наставлѧ́ющи блꙋжда́ющихъ во тьмѣ̀ грѣхѡ́въ на свѣ́тлый пꙋ́ть добродѣ́телей и҆ сп҃се́нїѧ. Сегѡ̀ ра́ди вопїе́мъ тѝ хвалє́бныѧ пѣ̑сни таковы̑ѧ:

Ра́дꙋйсѧ, чꙋдесы̀, ѿ ст҃ы́ѧ і҆кѡ́ны и҆стека́ющими, картали́нїю напои́вшаѧ: ра́дꙋйсѧ, ѻ҆би́тель а҆леѯі́евскꙋю ѻ҆́бразомъ си́мъ просла́вльшаѧ.

Ра́дꙋйсѧ, ѡ҆сѣне́нїемъ твоеѧ̀ і҆кѡ́ны си́лꙋ вра́жїю прогонѧ́ющаѧ: ра́дꙋйсѧ, прибѣга́ющымъ въ ско́рбехъ, нꙋ́ждахъ и҆ болѣ́знехъ ско́рое ᲂу҆тѣше́нїе и҆ и҆сцѣле́нїе подава́ющаѧ.

Ра́дꙋйсѧ, чꙋ́до чꙋде́съ, ѻ҆диги́трїе влⷣчце, на пꙋ́ть сп҃се́нїѧ наставлѧ́ющаѧ: ра́дꙋйсѧ, ми́рное ᲂу҆строе́нїе ѡ҆бꙋрева́ємымъ напа́стьми да́рꙋющаѧ.

Ра́дꙋйсѧ, чⷭ҇тото́ю твое́ю чи́стомꙋ житїю̀ на́съ наꙋча́ющаѧ: ра́дꙋйсѧ, лꙋка̑выѧ, гѡ́рдыѧ и҆ гнѣвли̑выѧ лю́ди вразꙋмлѧ́ющаѧ.

Ра́дꙋйсѧ, пра́вꙋю вѣ́рꙋ и҆ стра́хъ бж҃їй въ на́съ вселѧ́ющаѧ: ра́дꙋйсѧ, свѣ́томъ хрⷭ҇то́ва ᲂу҆че́нїѧ тьмꙋ̀ невѣ́рїѧ прогонѧ́ющаѧ.

Ра́дꙋйсѧ, смꙋщє́нїѧ помышле́нїй сꙋмни́тельныхъ ᲂу҆далѧ́ющаѧ: ра́дꙋйсѧ, дх҃ѡ́вныѧ да́ры ще́дрѡ подаю́щаѧ.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ в҃і

Бл҃года́тїю и҆ щедро́тами твои́ми, премлⷭ҇рдаѧ влⷣчце, не ѡ҆ставлѧ́еши хрⷭ҇тїа́нъ правосла́вныхъ, да́рꙋющи скорбѧ́щымъ ᲂу҆тѣше́нїе, ѡ҆би̑димымъ застꙋпле́нїе, болѧ́щымъ и҆сцѣле́нїе и҆ всѣ̑мъ сꙋ́щымъ въ бѣда́хъ многоразли́чныхъ и҆збавле́нїе: сегѡ̀ ра́ди, прославлѧ́юще тѧ̀, бл҃года́рственнѡ вопїе́мъ бг҃ꙋ: А҆ллилꙋ́їа.

І҆́косъ в҃і

Пою́ще твоѧ̑ неизречє́нныѧ млⷭ҇ти и҆ чꙋдеса̀, ꙗ҆влѧ́ємыѧ на́мъ недостѡ́йнымъ, преклонѧ́емъ колѣ̑на пред̾ цѣльбоно́снымъ твои́мъ ѻ҆́бразомъ, бцⷣе приснодв҃о, и҆ мо́лимъ тѧ̀ ᲂу҆се́рднѡ: пода́ждь на́мъ ми́ръ, тишинꙋ̀ и҆ бл҃гꙋ́ю хрⷭ҇тїа́нскꙋю кончи́нꙋ, и҆ не ѡ҆ста́ви без̾ твоеѧ̀ по́мощи и҆ застꙋпле́нїѧ во второ́мъ прише́ствїи сн҃а твоегѡ̀ и҆ бг҃а на́шегѡ всѣ́хъ приносѧ́щихъ тѝ со ᲂу҆миле́нїемъ сїѧ̑ похвалы̑:

Ра́дꙋйсѧ, во ᲂу҆ны́нїе и҆ ѿча́ѧнїе впа́дшихъ наде́ждою сп҃се́нїѧ ᲂу҆крѣплѧ́ющаѧ: ра́дꙋйсѧ, ᲂу҆́зы грѣхѡ́вныѧ разрѣша́ющаѧ.

Ра́дꙋйсѧ, првⷣный на на́съ гнѣ́въ бж҃їй на млⷭ҇ть прелага́ющаѧ: ра́дꙋйсѧ, земно́е житїѐ на́ше до́брѣ ᲂу҆строѧ́ющаѧ.

Ра́дꙋйсѧ, ѿ ѻ҆па́сныхъ ѡ҆бстоѧ́нїй и҆зба́вительнице: ра́дꙋйсѧ, въ ча́съ кончи́ны ско́раѧ помо́щнице.

Ра́дꙋйсѧ, на мыта́рствахъ воздꙋ́шныхъ застꙋпа́ющаѧ чтꙋ́щихъ тѧ̀: ра́дꙋйсѧ, не чтꙋ́щихъ тѧ̀ посрамлѧ́ющаѧ.

Ра́дꙋйсѧ, къ тебѣ̀ любо́вь и҆мꙋ́щымъ ѿверза́ющаѧ ра̑йскаѧ врата̀: ра́дꙋйсѧ, вѣ́чнагѡ бл҃же́нства въ црⷭ҇твїи нбⷭ҇нѣмъ сподоблѧ́ющаѧ прославлѧ́ющихъ тѧ̀.

Ра́дꙋйсѧ, держа́во на́ша, во дни̑ тѧ́жкихъ и҆спыта́нїй на́съ ᲂу҆крѣплѧ́ющаѧ: ра́дꙋйсѧ, ра́досте на́ша, во всѧ̑ дни̑ на́съ ѡ҆сщ҃а́ющаѧ.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ г҃і

Ѽ всепѣ́таѧ мт҃и сладча́йшагѡ гдⷭ҇а на́шегѡ і҆и҃са хрⷭ҇та̀, млⷭ҇тивнѡ прїимѝ сїѐ ма́лое моле́нїе на́ше, и҆зба́ви на́съ ѿ всѧ́кїѧ напа́сти, болѣ́зни и҆ внеза́пныѧ сме́рти, и҆ сподо́би на́съ наслѣ́дники бы́ти црⷭ҇твїѧ нбⷭ҇нагѡ и҆ со всѣ́ми ст҃ы́ми воспѣва́ти сн҃ꙋ твоемꙋ̀ и҆ бг҃ꙋ на́шемꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆рха́гг҃лъ гаврїи́лъ, возвѣща́ѧ прест҃ѣ́й дв҃ѣ мр҃і́и безсѣ́менное зача́тїе ѿ неѧ̀ сн҃а бж҃їѧ, речѐ: ра́дꙋйсѧ, бл҃года́тнаѧ, гдⷭ҇ь съ тобо́ю, бл҃гослове́нна ты̀ въ жена́хъ: мы́ же грѣ́шнїи, гла́сꙋ а҆рха́гг҃ла подража́ти дерза́юще, съ вѣ́рою, любо́вїю и҆ бл҃гоговѣ́нїемъ вопїе́мъ пѣ̑нїѧ сицева̑ѧ:

Ра́дꙋйсѧ, ѿ нача́ла вѣкѡ́въ во главꙋ̀ на́шегѡ сп҃се́нїѧ пред̾избра́ннаѧ: ра́дꙋйсѧ, многоѻбра́знѣ ѿ прⷪ҇ро́кѡвъ предвозвѣще́ннаѧ.

Ра́дꙋйсѧ, невѣ́сто неневѣ́стнаѧ, заче́ншаѧ сн҃а наше́ствїемъ дх҃а ст҃а́гѡ: ра́дꙋйсѧ, мт҃и, въ ржⷭ҇твѣ̀ и҆ по ржⷭ҇твѣ̀ пребы́вшаѧ дв҃а.

Ра́дꙋйсѧ, ѡ҆дѣ́ющагосѧ свѣ́томъ, ꙗ҆́кѡ ри́зою, пелена́ми пови́вшаѧ: ра́дꙋйсѧ, гѡ́рнѧѧ и҆ дѡ́льнѧѧ бл҃года́тїю свое́ю пита́ющаго млеко́мъ пита́вшаѧ.

Ра́дꙋйсѧ, на рꙋкꙋ̀ твоє́ю вседержи́телѧ носи́вшаѧ: ра́дꙋйсѧ, ѡ҆ промысли́тели всеѧ̀ тва́ри попече́нїе и҆мѣ́вшаѧ.

Ра́дꙋйсѧ, па́че всѣ́хъ сн҃а твоего̀ возлюби́вшаѧ: ра́дꙋйсѧ, па́че всѣ́хъ ѿ негѡ̀ превознесе́ннаѧ.

Ра́дꙋйсѧ, чтⷭ҇нѣ́йшаѧ и҆ сла́внѣйшаѧ без̾ сравне́нїѧ всѣ́хъ нбⷭ҇ныхъ си́лъ: ра́дꙋйсѧ, превы́шшаѧ всѧ́кагѡ созда́нїѧ.

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Конда́къ а҃

И҆збра́ннѣй ѿ всѣ́хъ родѡ́въ прест҃ѣ́й дв҃ѣ бцⷣѣ, ꙗ҆ви́вшейсѧ нѣ́когда кли́рїкꙋ болѧ́щꙋ, во є҆́же и҆сцѣли́ти є҆го̀ ѿ болѣ́зни лю́тыѧ, похва́льное прино́симъ пѣ́нїе: ты́ же, всемлⷭ҇тиваѧ влⷣчце, ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ бѣ́дъ и҆ скорбе́й и҆ болѣ́зней свободи́ ны, зовꙋ́щыѧ тѝ:

Ра́дꙋйсѧ, бл҃года́тнаѧ, цѣли́тельнице дꙋ́шъ и҆ тѣле́съ на́шихъ.

Моли́твы

Ѽ прест҃а́ѧ гпⷭ҇жѐ цр҃и́це бцⷣе, вы́шшаѧ всѣ́хъ нбⷭ҇ныхъ си́лъ и҆ ст҃ѣ́йшаѧ всѣ́хъ ст҃ы́хъ! Припа́даемъ и҆ покланѧ́емсѧ тебѣ̀ пред̾ всечⷭ҇тны́мъ и҆ цѣльбоно́снымъ ѻ҆́бразомъ твои́мъ, воспомина́юще ди́вное ꙗ҆вле́нїе твоѐ болѧ́щемꙋ кли́рїкꙋ вїке́нтїю, и҆ ᲂу҆се́рднѡ мо́лимъ тѧ̀, всеси́льнꙋю ро́да на́шегѡ застꙋ́пницꙋ и҆ помо́щницꙋ: ꙗ҆́коже дре́вле подала̀ є҆сѝ и҆сцѣле́нїе томꙋ̀ кли́рїкꙋ, та́кѡ и҆ ны́нѣ и҆сцѣлѝ на́шѧ дꙋ́шы и҆ тѣлеса̀, болѣ́знꙋющыѧ ра́нами грѣхѡ́въ и҆ страсте́й многоразли́чныхъ, и҆зба́ви на́съ ѿ всѧ́кихъ напа́стей, бѣ́дъ, скорбе́й и҆ вѣ́чнагѡ ѡ҆сꙋжде́нїѧ, сохранѝ ѿ дꙋшепа́гꙋбныхъ ᲂу҆че́нїй и҆ безвѣ́рїѧ, ѿ льсти́выхъ и҆ на́глыхъ нападе́нїй неви́димыхъ врагѡ́въ, пода́ждь на́мъ хрⷭ҇тїа́нскꙋю кончи́нꙋ, безболѣ́зненнꙋ, ми́рнꙋ, непосты́днꙋ, ст҃ы́хъ та̑инъ прича́стнꙋ, и҆ сподо́би на́съ на нелицепрїѧ́тнѣмъ сꙋди́щи хрⷭ҇то́вѣ ста́ти ѡ҆деснꙋ́ю всепрвⷣнагѡ сꙋдїѝ и҆ бл҃же́нный гла́съ є҆гѡ̀ ᲂу҆слы́шати: прїиди́те, бл҃гослове́ннїи ѻ҆ц҃а̀ моегѡ̀, наслѣ́дꙋйте ᲂу҆гото́ванное ва́мъ црⷭ҇твїе ѿ сложе́нїѧ мі́ра! А҆ми́нь.

Прїимѝ, ѽ всебл҃гослове́ннаѧ и҆ всемо́щнаѧ гпⷭ҇жѐ влⷣчце бцⷣе дв҃о, сїѧ̑ мл҃твы, со слеза́ми тебѣ̀ ны́нѣ приноси̑мыѧ ѿ на́съ недосто́йныхъ ра̑бъ твои́хъ, ко твоемꙋ̀ цѣльбоно́сномꙋ ѻ҆́бразꙋ пѣ́нїе возсыла́ющихъ со ᲂу҆миле́нїемъ, ꙗ҆́кѡ тебѣ̀ само́й здѣ̀ сꙋ́щей и҆ вне́млющей моле́нїю на́шемꙋ. По коемꙋ́ждо бо проше́нїю и҆сполне́нїе твори́ши, скѡ́рби ѡ҆блегча́еши, немощны̑мъ здра́вїе да́рꙋеши, разсла́блєнныѧ и҆ недꙋ̑жныѧ и҆сцѣлѧ́еши, ѿ бѣ́сныхъ бѣ́сы прогонѧ́еши, ѡ҆би̑димыѧ ѿ ѻ҆би́дъ и҆збавлѧ́еши, прокажє́нныѧ ѡ҆чища́еши и҆ ма̑лыѧ дѣ́ти ми́лꙋеши: є҆ще́ же, гпⷭ҇жѐ влⷣчце бцⷣе, и҆ ѿ ᲂу҆́зъ и҆ темни́цъ свобожда́еши и҆ всѧ́кїѧ многоразли̑чныѧ стра̑сти врачꙋ́еши: всѧ̑ бо сꙋ́ть возмѡ́жна хода́тайствомъ твои́мъ къ сн҃ꙋ твоемꙋ̀, хрⷭ҇тꙋ̀ бг҃ꙋ на́шемꙋ. Ѽ всепѣ́таѧ мт҃и, прест҃а́ѧ бцⷣе! Не преста́й моли́тисѧ ѡ҆ на́съ недосто́йныхъ рабѣ́хъ твои́хъ, сла́вѧщихъ тѧ̀ и҆ почита́ющихъ тѧ̀, и҆ покланѧ́ющихсѧ со ᲂу҆миле́нїемъ пречтⷭ҇омꙋ ѻ҆́бразꙋ твоемꙋ̀, и҆ наде́ждꙋ и҆мꙋ́щихъ невозвра́тнꙋ и҆ вѣ́рꙋ несꙋмнѣ́ннꙋ къ тебѣ̀, приснодв҃ѣ пресла́внѣй и҆ непоро́чнѣй, ны́нѣ и҆ прⷭ҇нѡ, и҆ во вѣ́ки вѣкѡ́въ. А҆ми́нь.