Кондак 1
Избра́ннии чудотво́рцы и вели́ции уго́дницы Госпо́дни, гра́да Яросла́вля небе́снии засту́пницы и усе́рднии о душа́х на́ших моли́твенницы, святи́и благове́рнии кня́зи Фео́доре, Дави́де и Константи́не, похва́льное пе́ние прино́сим ва́м с ве́рою и любо́вию. Вы́ же, я́ко иму́щии дерзнове́ние ко Го́споду, от вся́ких на́с бе́д моли́твами ва́шими при́сно изба́вите, да с умиле́нием зове́м ва́м:
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Икос 1
А́нгели земни́и и челове́цы небе́снии бы́сте, Фео́доре, Дави́де и Константи́не, преблаже́ннии, вся́ за́поведи Госпо́дни ве́рно сохра́ншии и в доброде́телех преуспе́вшии, я́ко бы́ти ва́м еще́ во пло́ти, подража́тели си́л безпло́тных, жития́ чистото́ю и свя́тостию. Те́мже и мы́, гре́шнии, со благогове́нием прино́сим ва́м благохвале́ния такова́я:
Ра́дуйтеся, свети́льницы трисия́ннии Бо́жия благода́ти; ра́дуйтеся, столпи́ кре́пции святы́я Правосла́вныя Це́ркве.
Ра́дуйтеся, во благове́рии утвержде́ннии; ра́дуйтеся, в доброде́телех благоиску́снии.
Ра́дуйтеся, ве́рнии Христо́вы уго́дницы; ра́дуйтеся, многоцеле́бных даро́в незави́стнии пода́тели.
Ра́дуйтеся, нетле́ния цве́ти благоуха́ннии; ра́дуйтеся, рая́ Иису́сова кри́ни неувяда́емии.
Ра́дуйтеся, князе́й Росси́йских све́тлая похвало́; ра́дуйтеся, лю́бящих и чту́щих ва́с при́сное ра́дование.
Ра́дуйтеся, во благоуха́нии свя́тости почива́ющии; ра́дуйтеся, неду́жныя безме́здно исцеля́ющии.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 2
Ви́дев кня́зь Фео́дор, я́ко бра́тия его́ непра́ведно восприя́ша уде́л княже́ния его́, не восхоте́ бра́нию идти́ на ни́х, но ми́р любя́й, ма́лым княже́нием можа́йским удовли́ся, пра́ведно и свя́то княже́ние свое́ исправля́ше, хра́мы Бо́жия созида́я, благоче́стие христиа́нское утвержда́я, суды́ правосу́дны лю́дем свои́м явля́я, и при́сно зовы́й в моли́твах усе́рдных к Бо́гу: Аллилу́иа.
Икос 2
Ра́зумом Боже́ственным преиспо́лненнии, святи́и благове́рнии кня́зи Фео́доре, Дави́де и Константи́не, не прельсти́стеся су́етною сла́вою княже́ния земна́го, но сие́ му́дро сочета́сте со всегда́шним благоугожде́нием Бо́гу, я́ко бы́ти ва́м вои́стинну пра́ведником, досто́йным похва́л сицевы́х:
Ра́дуйтеся, моли́твенницы усе́рднии; ра́дуйтеся, подви́жницы неле́ностнии.
Ра́дуйтеся, целому́дрия храни́тели; ра́дуйтеся, Правосла́вия побо́рницы.
Ра́дуйтеся, незло́бивии в оби́дах; ра́дуйтеся, благоду́шнии во искуше́ниих.
Ра́дуйтеся, милосе́рдия преиспо́лненнии; ра́дуйтеся, кро́тостию зло́бу побежда́вшии.
Ра́дуйтеся, ди́вно о Го́споде сочета́ннии, оте́ц со ча́ды во святы́х; ра́дуйтеся, Тро́ице равночи́сленнии избра́нницы, сыны́ с роди́телем в селе́ниих ра́йских.
Ра́дуйтеся, от го́рних высо́т к земноро́дным ми́лостивно приника́ющии; ра́дуйтеся, исцеле́ния благода́тныя неоску́дно источа́ющии.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 3
Си́лою Бо́жиею осене́нный, кня́же Фео́доре, княже́ние яросла́вское восприя́л еси́, и в не́м благоче́стно о Христе́ потруди́лся еси́, я́ко до́брый во́ин Иису́с Христо́в, гото́вый ду́шу твою́ положи́ти за лю́ди твоя́. Те́мже и к ага́рянскому ха́ну ше́ствовати не убоя́лся еси́, и пред ни́м ве́ру Христо́ву я́сно испове́дал еси́, вопия́ се́рдцем и усты́ ко Го́споду: Аллилу́иа.
Икос 3
Иму́ще еди́но попече́ние в трие́х телесе́х, о е́же Еди́ному Бо́гу благоугожда́ти, святи́и благове́рнии кня́зи Фео́доре, Дави́де и Константи́не, о́браз жития́ пра́веднаго в себе́ на́м явля́ете, си́м подвиза́я на́с в похвала́х достодо́лжных вопи́ти ва́м си́це:
Ра́дуйтеся, богому́дрия преиспо́лненнии; ра́дуйтеся, луча́ми Свята́го Ду́ха озаре́ннии.
Ра́дуйтеся, све́ти у́мнии, но́щь грехо́в на́ших пресека́ющии; ра́дуйтеся, зве́зды путево́дныя, ко Христу́ пу́ть ве́рным я́сно указу́ющия.
Ра́дуйтеся, би́серие драгоце́ннии, в небе́сней сокро́вищнице Христо́вой сохраня́емии; ра́дуйтеся, адама́нты, сия́ющии Бо́жиею благода́тию.
Ра́дуйтеся, диади́му княже́ния земна́го с венце́м Ца́рствия Небе́снаго сочета́вшии; ра́дуйтеся, рая́ жи́тели порфироно́снии.
Ра́дуйтеся, в Бо́зе упокое́ние блаже́нное обре́тшии; ра́дуйтеся, по труде́х и по́двизех земны́х сла́дце на ло́не Авраа́мли опочи́вшии.
Ра́дуйтеся, дре́вних святы́х царе́й ве́рнии подо́бницы; ра́дуйтеся, Царя́ царе́й при́снии дру́зи.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 4
Бу́ря искуше́ний прирази́ся к тебе́, кня́же Фео́доре, пребыва́ющу ти́ при дворе́ ха́на ага́рянскаго, и́же восхоте́ име́ти тя́ супру́га дще́ри своея́. Оба́че ты́ соу́з супру́жества христиа́нскаго нару́шити не восхоте́в, небоя́зненно от бра́ка с неве́рною уклони́лся еси́, до́ндеже сконча́ся супру́га твоя́ зако́нная. По ея́ же кончи́не, дще́рь ха́нскую, во Христа́ уве́ровавшую, креще́нием святы́м просвети́в, бракосочета́лся еси́ с не́ю, зовы́й ко Го́споду: Аллилу́иа.
Икос 4
Слы́шавше лю́дие яросла́встии о вели́ких доброде́телех ва́ших, святи́и благове́рнии кня́зи Фео́доре, Дави́де и Константи́не, зело́ почита́ху ва́с, я́ко избра́нников Бо́жиих. Вы́ же, блаже́ннии, ми́лостивно над ни́ми княжи́вше, отцы́ и́м по Бо́зе бы́сте, учи́тели благоче́стия и наста́вницы во все́х до́брых де́лех. Сего́ ра́ди до дне́сь по́двиги ва́ши незабве́нны во гра́де Яросла́вле, и воспева́ются немо́лчными гла́сы сицевы́ми:
Ра́дуйтеся, благоде́тели ни́щих и убо́гих; ра́дуйтеся, покрови́тели вдо́в и сиро́т.
Ра́дуйтеся, нелицеприя́тнаго суда́ рачи́тели; ра́дуйтеся, милосе́рдия Христо́ва подража́тели.
Ра́дуйтеся, суды́ ва́ша с ми́лостию соедини́вшии; ра́дуйтеся, правосу́дие христиа́нское возлюби́вшии.
Ра́дуйтеся, до́брии ору́жницы Всевы́шняго Царя́; ра́дуйтеся, ве́рнии раби́ Небе́снаго Домовлады́ки.
Ра́дуйтеся, ве́рою правосла́вною воодушевле́ннии; ра́дуйтеся, наде́ждою спасе́ния укрепле́ннии.
Ра́дуйтеся, любо́вию Боже́ственною преиспо́лненнии; ра́дуйтеся, Бо́гом и людьми́ возлю́бленнии.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 5
Боготе́чней звезде́ подо́бствовав, кня́же Фео́доре, от ха́на ага́рянскаго отпуще́нный, кня́жити во гра́д Яросла́вль прише́л еси́, с супру́гою твое́ю и ча́ды Дави́дом и Константи́ном, я́же бы́ша блага́го дре́ва благи́я о́трасли, пло́д мно́г о Христе́ оте́чествию своему́ прине́сшии, с ни́миже ны́не во све́тлостех святы́х водворя́яся, сла́дце пое́ши святы́х святе́йшему Христу́ Бо́гу: Аллилу́иа.
Икос 5
Ви́дим ва́с, святи́и благове́рнии кня́зи Фео́доре, Дави́де и Константи́не, я́ко зве́зды богосве́тлыя, во гра́де Яросла́вле свя́тостию и чудесы́ сия́ющих, и сия́нием сла́вы ва́шея озаря́еми, прославля́ем просла́вльшаго ва́с Царя́ сла́вы Христа́, ва́м же со усе́рдием и любо́вию вопие́м такова́я:
Ра́дуйтеся, блаже́ннии и треблаже́ннии, целому́дрие сохра́ншии; ра́дуйтеся, благове́рнии и богоно́снии, в зако́не Госпо́дни непоро́чно ходи́вшии.
Ра́дуйтеся, за́поведи Христо́вы све́т стезя́м ва́шим име́вшии; ра́дуйтеся, во все́х оправда́ниих Влады́чних неукло́нно пребы́вшии.
Ра́дуйтеся, всю́ жи́знь ва́шу на богоугожде́ние непреста́нное посвяти́вшии; ра́дуйтеся, до сме́рти ве́рность Го́сподеви соблю́дшии.
Ра́дуйтеся, во все́м во́лю Бо́жию твори́вшии; ра́дуйтеся, искуше́ния и ско́рби му́жески терпе́вшии.
Ра́дуйтеся, во искуше́ниих победоно́снии; ра́дуйтеся, в ско́рбех не уныва́вшии.
Ра́дуйтеся, на Бо́га все́ упова́ние ва́ше возложи́вшии; ра́дуйтеся, от Бо́га в упова́нии ва́шем непосрамле́ннии.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 6
Пропове́дник благоче́стия яви́лся еси́, кня́же Фео́доре, егда́ узре́в приближе́ние кончи́ны живота́ твоего́, княже́ние земно́е оста́вль, в оби́тель Преображе́ния Госпо́дня удали́лся еси́, и та́мо во и́ночество постри́женный, схи́му святу́ю на ся́ возложи́л еси́, со все́ми проща́яся, все́х благословля́я и назида́я, в моли́тве усе́рдной ду́шу твою́ в ру́це Бо́жии пре́дал еси́, я́ко и́стинный уго́дник Христа́ Бо́га, Ему́же со а́нгелы пое́ши ны́не: Аллилу́иа.
Икос 6
Возсия́сте мно́гими доброде́тельми ва́шими во гра́де Яросла́вле, и всю́ страну́ Росси́йскую благода́тно озари́сте пресла́вными чудесы́ ва́шими, Фео́доре, Дави́де и Константи́не, благове́рнии. Те́мже па́мять ва́ша с похвала́ми от ве́рных почита́ется, и честна́я имена́ ва́ша моли́твенно призыва́ются, от бли́жних и да́льних, к ва́м вопию́щих и глаго́лющих:
Ра́дуйтеся, во све́те невече́рнем пребыва́ющии; ра́дуйтеся, мра́к ду́ш на́ших чудесы́ ва́шими благода́тно просвеща́ющии.
Ра́дуйтеся, неду́жных безме́зднии вра́чеве; ра́дуйтеся, больны́х цельбопода́тельнии посети́тели.
Ра́дуйтеся, ту́не прия́вшии, и ту́не подаю́щии; ра́дуйтеся, в ми́лости к стра́ждущим никогда́же оскудева́ющии.
Ра́дуйтеся, сосу́ди злати́и ми́ра многоцеле́бнаго; ра́дуйтеся, сокро́вищницы драги́я, на вся́к неду́г врачевство́ содержа́щия.
Ра́дуйтеся, ра́дости печа́льным пода́тели; ра́дуйтеся, скорбя́щих блази́и уте́шители.
Ра́дуйтеся, бе́дствующих ско́рии помо́щницы; ра́дуйтеся, гра́да Яросла́вля небе́снии покрови́тели.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 7
Хотя́ во все́м подража́ти отцу́ твоему́ преподо́бному, преблаже́нне кня́же Дави́де, свя́то и богоуго́дно в Яросла́вле по не́м княжи́л еси́, и толи́ко Бо́гу угоди́л еси́, я́ко ми́ром и благопло́дием княже́ние твое́ Госпо́дь благослови́ и сла́вна тя́ в князе́х Росси́йских показа́, Ему́же ты́ в преподо́бии и свя́тости до́бре послужи́л еси́ до сме́рти, взыва́я к Нему́: Аллилу́иа.
Икос 7
Но́вых ва́с чудотво́рцев яви́ Госпо́дь в стране́ Росси́йстей, святи́и благове́рнии кня́зи Фео́доре, Дави́де и Константи́не, чудесы́ ва́шими святу́ю Правосла́вную ве́ру кре́пко утверди́в во гра́де ва́шем, и́же све́тло красу́ется, име́я ва́с небе́сных засту́пников и предста́телей ко Го́споду, и с любо́вию к ва́м взыва́ет:
Ра́дуйтеся, хла́дную страну́ теплото́ю ве́ры ва́шея согре́вшии; ра́дуйтеся, благоче́стие во гра́де ва́шем возрасти́вшии.
Ра́дуйтеся, до́брии де́латели виногра́да небе́снаго; ра́дуйтеся, мзду́ прие́мшии от Христа́ – чудотворе́ния да́р.
Ра́дуйтеся, дара́ми ми́лости ва́шея ве́рных обогаща́ющии; ра́дуйтеся, Бо́жия благода́ти сосу́ди избра́ннии.
Ра́дуйтеся, сия́ющии, я́ко со́лнце во Ца́рствии небе́снем; ра́дуйтеся, я́ко зве́зды всю́ Росси́ю чудесы́ ва́шими освеща́ющии.
Ра́дуйтеся, трисия́ннии лучи́, Тро́ический Несозда́нный Све́т на́м возсиява́ющии; ра́дуйтеся, тричи́сленнии подви́жницы доброде́телей христиа́нских.
Ра́дуйтеся, на враги́ ви́димыя и неви́димыя на́м всегда́шнии спобо́рницы; ра́дуйтеся, Царя́ Небе́снаго – Христа́ изве́стнии умилостиви́тели.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 8
Стра́нника и прише́льца в ми́ре се́м помышля́я себе́ бы́ти, благове́рный кня́же Константи́не, от ю́ности твоея́ де́вственное житие́ возлюби́л еси́, в посте́ и моли́твах пребыва́я, и благоугожда́я Бо́гу благоугожде́нием вся́ческим, во е́же бы́ти тебе́ освяще́нному сосу́ду Ду́ха Свята́го, все́льшагося в непоро́чное се́рдце твое́, и воздыха́нии неизглаго́ланными научи́вшаго тя́ благоприя́тно пе́ти Пресвяте́й Тро́ице: Аллилу́иа.
Икос 8
Ве́сь гра́д Яросла́вль ра́достию духо́вною подви́жеся, егда́ святы́я и нетле́нныя мо́щи ва́ша, благове́рнии кня́зи Фео́доре, Дави́де и Константи́не, чуде́с благода́тию просия́ша во оби́тели Преображе́ния Госпо́дня. Та́ко бо благоволи́ Госпо́дь, да по ле́тех мно́зех, нетле́ние ва́ших теле́с святы́х все́м явле́но бу́дет, и чудеса́ми мно́гими озна́менуется, во е́же все́м ве́рным вопи́ти ва́м си́це:
Ра́дуйтеся, во умерщвле́нных телесе́х жи́знь благода́тную проявля́ющии; ра́дуйтеся, по ле́тех мно́зех нетле́нни в соста́вех ва́ших пребыва́ющии.
Ра́дуйтеся, во еди́ном гро́бе благоле́пно ми́рно почива́ющии; ра́дуйтеся, вси́ трие́ вку́пе чудоде́йствующии.
Ра́дуйтеся, во увере́ние свя́тости ва́шея чуде́с мно́жество от моще́й ва́ших сотвори́вшии; ра́дуйтеся, неве́ровавшия в свя́тость ва́шу гро́зно покара́вшии.
Ра́дуйтеся, слепы́м зре́ние дарова́вшии; ра́дуйтеся, хромы́м пра́во ходи́ти устро́ившии.
Ра́дуйтеся, глухи́м слу́хи отве́рзшии; ра́дуйтеся, немы́м язы́к разреши́вшии.
Ра́дуйтеся, беснова́тых от наси́лия де́монскаго свободи́вшии; ра́дуйтеся, разсла́бленных благода́тно укрепи́вшии.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 9
Со все́ми небожи́телями ны́не сликовству́ете горе́, во сла́ве Ца́рствия Христо́ва, благове́рнии чудотво́рцы Фео́доре, Дави́де и Константи́не, в не́йже пребыва́юще, помяни́те и на́с, смире́нных, в моли́твах ва́ших к Триипоста́сному Бо́гу, да при по́мощи ва́шей небе́сней, сподо́бимся во вся́ дни́ досто́йно и пра́ведно возглаша́ти Ему́: Аллилу́иа.
Икос 9
Вити́йство челове́ческое не мо́жет восхвали́ти по достоя́нию, мно́гая и пресла́вная чудотворе́ния ва́ша, святи́и благове́рнии чудотво́рцы Фео́доре, Дави́де и Константи́не. Оба́че мы́, любо́вию к ва́м подвиза́емии, дерза́ем благохвали́ти ва́с, засту́пников на́ших, си́ми нехи́тростными, но усе́рдными словесы́:
Ра́дуйтеся, две́ жены́ слепы́я у моще́й ва́ших прозре́ти сотвори́вшии; ра́дуйтеся, беснова́таго и слепа́го му́жа та́можде исцели́вшии.
Ра́дуйтеся, слепу́ю отрокови́цу ви́дети устро́ившии; ра́дуйтеся, беснова́тых му́жа и жену́ от наси́лия де́монскаго изба́вившии.
Ра́дуйтеся, четы́ре немощны́я зело́ жены́ здра́вы возста́вившии; ра́дуйтеся, и́ну жену́, терза́вшую неи́стовно все́ те́ло свое́, от неду́га сего́ свободи́вшии.
Ра́дуйтеся, неве́ровавшаго в свя́тость ва́шу пресви́тера Константи́на, разслабле́нием те́ла наказа́вшии; ра́дуйтеся, святи́теля Три́фона в то́мже благода́тно обличи́вшии.
Ра́дуйтеся, покая́ние его́ ми́лостивно прие́мшии; ра́дуйтеся, во оби́тели ва́шей почи́ти ему́ о Го́споде удосто́ившии.
Ра́дуйтеся, благове́рную цари́цу Анастаси́ю в неду́зе уврачева́вшии; ра́дуйтеся, бли́жним и да́льним ми́лость многоцеле́бную показа́вшии.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 10
Спасти́ся на́м моли́те ми́лостиваго Бо́га, чудотво́рцы святи́и и благове́рнии Фео́доре, Дави́де и Константи́не, к ва́м бо по Бо́зе и Пресвяте́й Богоро́дице, я́ко при́сным на́шим предста́телем и хода́таем, мы́, гре́шнии, усе́рдно прибега́ем и моли́твенно про́сим ва́с о е́же моли́тися за на́с к просла́вльшему ва́с Го́споду, да и мы́ сподо́бимся вку́пе с ва́ми на земли́ живы́х пе́ти Ему́: Аллилу́иа.
Икос 10
Царя́ Небе́снаго Христа́ ве́рнии раби́ и уго́дницы, святи́и благове́рнии кня́зи Фео́доре, Дави́де и Константи́не, покажи́те на на́с, недосто́йных, моли́тв ва́ших благода́тное де́йство, и я́коже мно́гих неду́жных уврачева́ли есте́, с ве́рою приходи́вших к святы́м и многоцеле́бным моще́м ва́шим, та́ко и на́с, с любо́вию к ни́м припа́дающих, не лиши́те небе́снаго ва́шего заступле́ния, в жи́зни, в сме́рти и по сме́рти, да зове́м ва́м хвале́бно:
Ра́дуйтеся, оте́чествия ва́шего земна́го неотсту́пнии храни́тели; ра́дуйтеся, к Оте́чествию го́рнему ве́рнии на́м руководи́тели.
Ра́дуйтеся, исто́чницы многово́днии благода́тных исцеле́ний; ра́дуйтеся, кла́дези неистощи́мии воды́ живы́я.
Ра́дуйтеся, Воскресе́ния Христо́ва си́лу в телесе́х ва́ших нетле́нных ди́вно проявля́ющии; ра́дуйтеся, зарю́ о́бщаго воскресе́ния на́м от ра́ки ва́шея возсиява́ющии.
Ра́дуйтеся, ро́су Бо́жия благода́ти в сердца́ ве́рных одождева́ющии; ра́дуйтеся, блага́я проше́ния на́ша во бла́го исполня́ющии.
Ра́дуйтеся, с ве́рою прося́щих у ва́с исцеле́ния больны́х ско́ро врачу́ющии; ра́дуйтеся, лю́бящим и чту́щим вы́, любо́вию сугу́бою воздаю́щии.
Ра́дуйтеся, в простоте́ душе́вней ва́с на по́мощь призыва́ющих, ми́лостивии услы́шатели; ра́дуйтеся, безнаде́жных страда́льцев боже́ственнии цели́тели.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 11
Пе́ние моле́бное на́ше и похвалу́ сию́ смире́нную благоутро́бно приими́те, святи́и благове́рнии кня́зи Фео́доре, Дави́де и Константи́не: се́ бо а́ще и многогре́шни есмы́, но ве́руем несомне́нно, я́ко вы́, святи́и предста́тели на́ши, мно́го мо́жете пред лице́м всеблага́го Бо́га и я́ко моли́твы ва́ша святы́я си́льны спасти́ на́с от поги́бели ве́чныя. Те́мже мо́лим вы́: не посрами́те ве́ры на́шея во всеси́льное пред Бо́гом хода́тайство ва́ше, но сподо́бите на́с моли́твами ва́шими Ца́рствие Небе́сное улучи́ти, и со святы́ми возглаша́ти Триеди́ному Бо́гу: Аллилу́иа.
Икос 11
Светопода́тельнии свети́льницы и преди́внии чудотво́рцы, святи́и благове́рнии кня́зи Фео́доре, Дави́де и Константи́не, к ва́м от ле́т дре́вних отцы́ на́ши ве́рно приходя́ще, ми́лость мно́гу от ва́с получа́ху, и́х же путе́м и мы́ к ва́м ше́ствуем, и, припа́дающе к святы́м моще́м ва́шим, мо́лим и про́сим вы́: да я́коже отце́м на́шим, та́ко и на́м, убо́гим, ми́лость ва́шу при́сно явля́йте, да благода́рственно ва́м всегда́ вопие́м:
Ра́дуйтеся, ча́да благослове́нная Отца́ Небе́снаго; ра́дуйтеся, бра́тия по благода́ти Христа́ Сы́на Бо́жия.
Ра́дуйтеся, све́тлыя оби́тели Ду́ха Свята́го; ра́дуйтеся, хвале́бницы чудотво́рнии Пресвяты́я Тро́ицы.
Ра́дуйтеся, во све́те лица́ Бо́жия при́сно пребыва́ющии; ра́дуйтеся, по Бо́зе вся́ потре́бная на́м взыску́ющии.
Ра́дуйтеся, от го́рних высо́т на по́мощь к на́м ускоря́ющии; ра́дуйтеся, гре́шники к покая́нию неви́димо направля́ющии.
Ра́дуйтеся, окамене́нная сердца́ прикоснове́нием к моще́м ва́шим умягча́ющии; ра́дуйтеся, плоды́ покая́ния ве́рным приноси́ти помога́ющии.
Ра́дуйтеся, о спасе́нии на́шем усе́рдно Бо́га умоля́ющии; ра́дуйтеся, во вся́ком де́ле бла́зе на́м по ве́ре на́шей помога́ющии.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 12
Благода́ть и ми́лость от Го́спода испроси́те на́м, святи́и кня́зи, Фео́доре преподо́бне, Дави́де и Константи́не, преблаже́ннии, и в ча́с кончи́ны на́шея предста́ните в по́мощь на́м, тре́бующим ва́шего заступле́ния, наси́лия диа́вольскаго на́с избавля́юще, святы́ми и благомо́щными моли́твами ва́шими, да при по́мощи и́х безбе́дно пре́йдем тру́дный пу́ть мыта́рств возду́шных, и сподо́бимся в селе́ниих святы́х пе́ти Созда́телю на́шему: Аллилу́иа.
Икос 12
Пою́ще мно́гая и пресла́вная ва́ша чудеса́, святи́и благове́рнии кня́зи и чудотво́рцы Фео́доре, Дави́де и Константи́не, сла́вим Го́спода, просла́вльшаго ва́с на Небеси́ и на земли́, и от любве́ душе́вныя соверша́юще святу́ю и всера́достную па́мять ва́шу, уми́льно к ва́м глаго́лем:
Ра́дуйтеся, Пресвяты́я Тро́ицы ве́рнии раби́; ра́дуйтеся, Пресвяты́я Богоро́дицы орга́ни хвале́бнии.
Ра́дуйтеся, А́нгельских во́инств собесе́дницы; ра́дуйтеся, все́х святы́х сожи́тели.
Ра́дуйтеся, страны́ Росси́йския духо́вная ле́пото; ра́дуйтеся, гра́да Яросла́вля све́тлая красото́.
Ра́дуйтеся, князе́й Росси́йских к благоче́стию предводи́тели; ра́дуйтеся, княже́ния ва́шего земна́го неусы́пнии блюсти́тели.
Ра́дуйтеся, оби́тели ва́шея святы́я забра́ла несокруши́мая; ра́дуйтеся, подвиза́ющимся в не́й спасе́ния душе́внаго хода́таи.
Ра́дуйтеся, на поклоне́ние к моще́м ва́шим приходя́щих любвеоби́льно прие́млющии; ра́дуйтеся, благослове́ние ва́ше свято́е от ра́ки ва́шея все́м ве́рным подаю́щии.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 13
О, святи́и чудотво́рцы, тричи́сленнии Пресвяты́я Тро́ицы уго́дницы, благове́рнии кня́зи Фео́доре, Дави́де и Константи́не! Ми́лостивно приими́те сие́ ма́лое моле́ние на́ше, в похвалу́ ва́м приноси́мое, и умоли́те Триипоста́снаго Го́спода и Влады́ку на́шего, изба́вити на́с муче́ний ве́чных, гре́шником угото́ванных, и сподо́бити на́с в покая́нии Ему́ благоугоди́ти, и Ца́рствие Небе́сное насле́довати, да с ва́ми вопие́м Ему́ во ве́ки: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгели земни́и и челове́цы небе́снии бы́сте, Фео́доре, Дави́де и Константи́не, преблаже́ннии, вся́ за́поведи Госпо́дни ве́рно сохра́ншии и в доброде́телех преуспе́вшии, я́ко бы́ти ва́м еще́ во пло́ти, подража́тели си́л безпло́тных, жития́ чистото́ю и свя́тостию. Те́мже и мы́, гре́шнии, со благогове́нием прино́сим ва́м благохвале́ния такова́я:
Ра́дуйтеся, свети́льницы трисия́ннии Бо́жия благода́ти; ра́дуйтеся, столпи́ кре́пции святы́я Правосла́вныя Це́ркве.
Ра́дуйтеся, во благове́рии утвержде́ннии; ра́дуйтеся, в доброде́телех благоиску́снии.
Ра́дуйтеся, ве́рнии Христо́вы уго́дницы; ра́дуйтеся, многоцеле́бных даро́в незави́стнии пода́тели.
Ра́дуйтеся, нетле́ния цве́ти благоуха́ннии; ра́дуйтеся, рая́ Иису́сова кри́ни неувяда́емии.
Ра́дуйтеся, князе́й Росси́йских све́тлая похвало́; ра́дуйтеся, лю́бящих и чту́щих ва́с при́сное ра́дование.
Ра́дуйтеся, во благоуха́нии свя́тости почива́ющии; ра́дуйтеся, неду́жныя безме́здно исцеля́ющии.
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Кондак 1
Избра́ннии чудотво́рцы и вели́ции уго́дницы Госпо́дни, гра́да Яросла́вля небе́снии засту́пницы и усе́рднии о душа́х на́ших моли́твенницы, святи́и благове́рнии кня́зи Фео́доре, Дави́де и Константи́не, похва́льное пе́ние прино́сим ва́м с ве́рою и любо́вию. Вы́ же, я́ко иму́щии дерзнове́ние ко Го́споду, от вся́ких на́с бе́д моли́твами ва́шими при́сно изба́вите, да с умиле́нием зове́м ва́м:
Ра́дуйтеся, святи́и благове́рнии кня́зи Фео́доре, Дави́де и Константи́не, пресла́внии чудотво́рцы.
Молитвы
О, вели́ции уго́дницы Бо́жии и чудотво́рцы, святи́и и благове́рнии кня́зи Фео́доре, Дави́де и Константи́не! Припа́дающе к святы́м и многоцеле́бным моще́м ва́шим, мо́лим вы́ со смире́нием, ве́рою и любо́вию: простри́те благоприя́тныя моли́твы ва́ша ко Го́споду и Созда́телю на́шему, и умоли́те Его́ бла́гость, дарова́ти на́м вся́ ну́жная к житию́ сему́ вре́менному, и потре́бная к ве́чному спасе́нию на́шему, ве́руем бо несомне́нно, я́ко вся́ возмо́жна ва́м, я́ко и́стинным Его́ уго́дником. Сего́ ра́ди про́сим вы́: испроси́те на́м у Царя́ ца́рствующих и Го́спода госпо́дствующих стра́ждущую страну́ Росси́йскую от лю́тых безбо́жник и вла́сти и́х Госпо́дь да свободи́т, ве́рных рабо́в Его́, в ско́рби и печа́ли де́нь и но́щь вопию́щих к Нему́, многоболе́зный во́пль да услы́шит, и да изведе́т от поги́бели живо́т на́ш. Испроси́те престо́льным градо́м, гра́ду на́шему и все́м градо́м и ве́сем Росси́йским благополу́чие, изоби́лие и от злы́х сохране́ние, все́м же правове́рным лю́дем, почита́ющим ва́с, и на поклоне́ние моще́м ва́шим святы́м приходя́щим, ми́лость Бо́жию и благи́х проше́ний ско́рое исполне́ние. Е́й, чудотво́рцы святи́и, не посрами́те упова́ния на́шего, но моли́твами ва́шими сотвори́те на́с насле́дники бы́ти Ца́рствия Христо́ва, да прославля́ем человеколю́бие в Тро́ице сла́вимаго и покланя́емаго Бо́га, Отца́ и Сы́на и Свята́го Ду́ха, и ва́ше свято́е заступле́ние во ве́ки веко́в. Ами́нь.
Конда́къ а҃
И҆збра́ннїи чꙋдотво́рцы и҆ вели́цїи ᲂу҆го́дницы гдⷭ҇ни, гра́да ꙗ҆росла́влѧ нбⷭ҇нїи застꙋ́пницы и҆ ᲂу҆се́рднїи ѡ҆ дꙋша́хъ на́шихъ мл҃твенницы, ст҃і́и благовѣ́рнїи кнѧ́зи ѳео́дѡре, даві́де и҆ кѡнстанті́не, похва́льное пѣ́нїе прино́симъ ва́мъ съ вѣ́рою и҆ любо́вїю: вы́ же, ꙗ҆́кѡ и҆мꙋ́щїи дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ мл҃твами ва́шими при́снѡ и҆зба́вите, да съ ᲂу҆миле́нїемъ зове́мъ ва́мъ:
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
І҆́косъ а҃
А҆́гг҃ли земні́и и҆ человѣ́цы нбⷭ҇нїи бы́сте, ѳео́дѡре, даві́де и҆ кѡнстанті́не пребл҃же́ннїи, всѧ̑ за́пѡвѣди гдⷭ҇ни вѣ́рнѡ сохра́ншїи и҆ въ добродѣ́телехъ преꙋспѣ́вшїи, ꙗ҆́кѡ бы́ти ва́мъ є҆щѐ во пло́ти, подража́тели си́лъ безпло́тныхъ, житїѧ̀ чистото́ю и҆ ст҃остїю. тѣ́мже и҆ мы̀ грѣ́шнїи со бл҃гоговѣ́нїемъ прино́симъ ва́мъ бл҃гохвалє́нїѧ такова̑ѧ:
Ра́дꙋйтесѧ, свѣти́льницы трисїѧ́ннїи бж҃їѧ бл҃года́ти: ра́дꙋйтесѧ, столпѝ крѣ́пцыи ст҃ы́ѧ правосла́вныѧ цр҃кве.
Ра́дꙋйтесѧ, во благовѣ́рїи ᲂу҆твержде́ннїи: ра́дꙋйтесѧ, въ добродѣ́телехъ бл҃гоискꙋ́снїи.
Ра́дꙋйтесѧ, вѣ́рнїи хрⷭ҇тѡ́вы ᲂу҆го́дницы: ра́дꙋйтесѧ, многоцѣле́бныхъ дарѡ́въ незави́стнїи пода́тели.
Ра́дꙋйтесѧ, нетлѣ́нїѧ цвѣ́ти бл҃гоꙋха́ннїи: ра́дꙋйтесѧ, раѧ̀ і҆и҃сова крі́ни неꙋвѧда́емїи.
Ра́дꙋйтесѧ, кн҃зе́й рѡссі́йскихъ свѣ́тлаѧ похвало̀: ра́дꙋйтесѧ, лю́бѧщихъ и҆ чтꙋ́щихъ ва́съ при́сное ра́дованїе.
Ра́дꙋйтесѧ, во бл҃гоꙋха́нїи ст҃ости почива́ющїи: ра́дꙋйтесѧ, недꙋ̑жныѧ безме́зднѡ и҆сцѣлѧ́ющїи.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ в҃
Ви́дѣвъ кнѧ́зь ѳео́дѡръ, ꙗ҆́кѡ бра́тїѧ є҆гѡ̀ непра́веднѡ воспрїѧ́ша ᲂу҆дѣ́лъ кнѧже́нїѧ є҆гѡ̀, не восхотѣ̀ бра́нїю и҆дтѝ на ни́хъ, но ми́ръ любѧ́й, ма́лымъ кнѧже́нїемъ можа́йскимъ ᲂу҆довли́сѧ, пра́веднѡ и҆ свѧ́тѡ кнѧже́нїе своѐ и҆справлѧ́ше, хра́мы бж҃їѧ созида́ѧ, бл҃гоче́стїе хрⷭ҇тїа́нское ᲂу҆твержда́ѧ, сꙋды̀ правосꙋ̑дны лю́демъ свои̑мъ ꙗ҆влѧ́ѧ и҆ при́снѡ зовы́й въ мл҃твахъ ᲂу҆се́рдныхъ къ бг҃ꙋ: А҆ллилꙋ́їа.
І҆́косъ в҃
Ра́зꙋмомъ бж҃е́ственнымъ преиспо́лненнїи, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, не прельсти́стесѧ сꙋ́етною сла́вою кнѧже́нїѧ земна́гѡ, но сїѐ мꙋ́дрѡ сочета́сте со всегда́шнимъ бл҃гоꙋгожде́нїемъ бг҃ꙋ, ꙗ҆́кѡ бы́ти ва́мъ вои́стиннꙋ пра́ведникѡмъ, достѡ́йнымъ похва́лъ сицевы́хъ:
Ра́дꙋйтесѧ, мл҃твенницы ᲂу҆се́рднїи: ра́дꙋйтесѧ, подви́жницы нелѣ́ностнїи.
Ра́дꙋйтесѧ, цѣломꙋ́дрїѧ храни́тели: ра́дꙋйтесѧ, правосла́вїѧ побо́рницы.
Ра́дꙋйтесѧ, неѕло́бивїи въ ѡ҆би́дахъ: ра́дꙋйтесѧ, бл҃годꙋ́шнїи во и҆скꙋше́нїихъ.
Ра́дꙋйтесѧ, милосе́рдїѧ преиспо́лненнїи: ра́дꙋйтесѧ, кро́тостїю ѕло́бꙋ побѣжда́вшїи.
Ра́дꙋйтесѧ, ди́внѡ ѡ҆ гдⷭ҇ѣ сочета́ннїи, ѻ҆те́цъ со ча́ды во ст҃ы́хъ: ра́дꙋйтесѧ, трⷪ҇цѣ равночи́сленнїи и҆збра́нницы, сыны̀ съ роди́телемъ въ селе́нїихъ ра́йскихъ.
Ра́дꙋйтесѧ, ѿ го́рнихъ высо́тъ къ земнорѡ́днымъ ми́лостивнѡ приника́ющїи: ра́дꙋйтесѧ, и҆сцѣлє́нїѧ бл҃года́тнаѧ неѡскꙋ́днѡ и҆сточа́ющїи.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ г҃
Си́лою бж҃їею ѡ҆сѣне́нный, кнѧ́же ѳео́дѡре, кнѧже́нїе ꙗ҆росла́вское воспрїѧ́лъ є҆сѝ, и҆ въ не́мъ бл҃гоче́стнѡ ѡ҆ хрⷭ҇тѣ̀ потрꙋди́лсѧ є҆сѝ, ꙗ҆́кѡ до́брый во́инъ і҆и҃съ хрⷭ҇то́въ, гото́вый дꙋ́шꙋ твою̀ положи́ти за лю́ди твоѧ̑. тѣ́мже и҆ къ а҆га́рѧнскомꙋ ха́нꙋ ше́ствовати не ᲂу҆боѧ́лсѧ є҆сѝ, и҆ пред̾ ни́мъ вѣ́рꙋ хрⷭ҇то́вꙋ ꙗ҆́снѡ и҆сповѣ́далъ є҆сѝ, вопїѧ̀ се́рдцемъ и҆ ᲂу҆сты̀ ко гдⷭ҇ꙋ: А҆ллилꙋ́їа.
І҆́косъ г҃
И҆мꙋ́ще є҆ди́но попече́нїе въ трїе́хъ тѣлесѣ́хъ, ѡ҆ є҆́же є҆ди́номꙋ бг҃ꙋ бл҃гоꙋгожда́ти, ст҃і́и благовѣ́рнїи кнѧ́зи ѳео́дѡре, даві́де и҆ кѡнстанті́не, ѡ҆́бразъ житїѧ̀ пра́веднагѡ въ себѣ̀ на́мъ ꙗ҆влѧ́ете, си́мъ подвиза́ѧ на́съ, въ похвала́хъ достодо́лжныхъ вопи́ти ва́мъ си́це:
Ра́дꙋйтесѧ, бг҃омꙋ́дрїѧ преиспо́лненнїи: ра́дꙋйтесѧ, лꙋча́ми ст҃а́гѡ дх҃а ѡ҆заре́ннїи.
Ра́дꙋйтесѧ, свѣ́ти ᲂу҆́мнїи, но́щь грѣхѡ́въ на́шихъ пресѣка́ющїи: ра́дꙋйтесѧ, ѕвѣ́зды пꙋтевѡ́дныѧ, ко хрⷭ҇тꙋ̀ пꙋ́ть вѣ́рнымъ ꙗ҆́снѡ ᲂу҆казꙋ́ющыѧ.
Ра́дꙋйтесѧ, би́серїе драгоцѣ́ннїи, въ нбⷭ҇нѣй сокро́вищницѣ хрⷭ҇то́вой сохранѧ́емїи: ра́дꙋйтесѧ, а҆дама́нты, сїѧ́ющїи бж҃їею бл҃года́тїю.
Ра́дꙋйтесѧ, дїади́мꙋ кнѧже́нїѧ земна́гѡ съ вѣнце́мъ црⷭ҇твїѧ нбⷭ҇нагѡ сочета́вшїи: ра́дꙋйтесѧ, раѧ̀ жи́тели порфѷроно́снїи.
Ра́дꙋйтесѧ, въ бз҃ѣ ᲂу҆покое́нїе бл҃же́нное ѡ҆брѣ́тшїи: ра́дꙋйтесѧ, по трꙋдѣ́хъ и҆ по́двизѣхъ земны́хъ сла́дцѣ на ло́нѣ а҆враа́мли ѡ҆почи́вшїи.
Ра́дꙋйтесѧ, дре́внихъ ст҃ы́хъ цр҃е́й вѣ́рнїи подо́бницы: ра́дꙋйтесѧ, цр҃ѧ̀ царе́й при́снїи дрꙋ́зи.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ д҃
Бꙋ́рѧ и҆скꙋше́нїй прирази́сѧ къ тебѣ̀, кнѧ́же ѳео́дѡре, пребыва́ющꙋ тѝ при дворѣ̀ ха́на а҆га́рѧнскагѡ, и҆́же восхотѣ̀ и҆мѣ́ти тѧ̀ сꙋпрꙋ́га дще́ри своеѧ̀: ѻ҆ба́че ты̀ соꙋ́зъ сꙋпрꙋ́жества хрⷭ҇тїа́нскагѡ нарꙋ́шити не восхотѣ́въ, небоѧ́зненнѡ ѿ бра́ка съ невѣ́рною ᲂу҆клони́лсѧ є҆сѝ, до́ндеже сконча́сѧ сꙋпрꙋ́га твоѧ̀ зако́ннаѧ: по є҆ѧ̀ же кончи́нѣ, дще́рь ха́нскꙋю, во хрⷭ҇та̀ ᲂу҆вѣ́ровавшꙋю, кр҃ще́нїемъ ст҃ы́мъ просвѣти́въ, бракосочета́лсѧ є҆сѝ съ не́ю, зовы́й ко гдⷭ҇ꙋ: А҆ллилꙋ́їа.
І҆́косъ д҃
Слы́шавше лю́дїе ꙗ҆росла́встїи ѡ҆ вели́кихъ добродѣ́телехъ ва́шихъ, ст҃і́и благовѣ́рнїи кнѧ́зи ѳео́дѡре, даві́де и҆ кѡнстанті́не, ѕѣлѡ̀ почита́хꙋ ва́съ, ꙗ҆́кѡ и҆збра́нникѡвъ бж҃їихъ: вы́ же, бл҃же́ннїи, ми́лостивнѡ над̾ ни́ми кнѧжи́вше, ѻ҆тцы̀ и҆̀мъ по бз҃ѣ бы́сте, ᲂу҆чи́тели бл҃гоче́стїѧ и҆ наста́вницы во всѣ́хъ до́брыхъ дѣ́лѣхъ. сегѡ̀ ра́ди до дне́сь по́двиги ва́ши незабве́нны во гра́дѣ ꙗ҆росла́влѣ, и҆ воспѣва́ютсѧ немо́лчными гла́сы сицевы́ми:
Ра́дꙋйтесѧ, бл҃годѣ́тели ни́щихъ и҆ ᲂу҆бо́гихъ: ра́дꙋйтесѧ, покрови́тели вдѡ́въ и҆ сиро́тъ.
Ра́дꙋйтесѧ, нелицепрїѧ́тнагѡ сꙋда̀ рачи́тели: ра́дꙋйтесѧ, милосе́рдїѧ хрⷭ҇то́ва подража́тели.
Ра́дꙋйтесѧ, сꙋды̀ ва́шѧ съ ми́лостїю соедини́вшїи: ра́дꙋйтесѧ, правосꙋ́дие хрїстїа́нское возлюби́вшїи.
Ра́дꙋйтесѧ, до́брїи ѡ҆рꙋ́жницы всевы́шнѧгѡ цр҃ѧ̀: ра́дꙋйтесѧ, вѣ́рнїи рабѝ нбⷭ҇нагѡ домовлады́ки.
Ра́дꙋйтесѧ, вѣ́рою правосла́вною воѡдꙋшевле́ннїи: ра́дꙋйтесѧ, наде́ждою сп҃се́нїѧ ᲂу҆крѣпле́ннїи.
Ра́дꙋйтесѧ, любо́вїю бж҃е́ственною преиспо́лненнїи: Ра́дꙋйтесѧ, бг҃омъ и҆ людьмѝ возлю́бленнїи.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ є҃
Бг҃оте́чнѣй ѕвѣздѣ̀ подо́бствовавъ, кнѧ́же ѳео́дѡре, ѿ ха́на а҆га́рѧнскагѡ ѿпꙋще́нный, кнѧ́жити во гра́дъ ꙗ҆росла́вль прише́лъ є҆сѝ, съ сꙋпрꙋ́гою твое́ю и҆ ча́ды даві́домъ и҆ кѡнстанті́номъ, ꙗ҆́же бы́ша бл҃га́гѡ дре́ва бл҃гі̑ѧ ѻ҆́трасли, пло́дъ мно́гъ ѡ҆ хрⷭ҇тѣ̀ ѻ҆те́чествїю своемꙋ̀ прине́сшїи, съ ни́миже ны́нѣ во свѣ́тлостехъ ст҃ы́хъ водворѧ́ѧсѧ, сла́дцѣ пое́ши ст҃ы́хъ ст҃ѣ́йшемꙋ хрⷭ҇тꙋ̀ бг҃ꙋ: А҆ллилꙋ́їа.
І҆́косъ є҃
Ви́димъ ва́съ, ст҃і́и благовѣ́рнїи кнѧ́зи ѳео́дѡре, даві́де и҆ кѡнстанті́не, ꙗ҆́кѡ ѕвѣ́зды бг҃освѣ̑тлыѧ, во гра́дѣ ꙗ҆росла́влѣ ст҃остїю и҆ чꙋдесы̀ сїѧ́ющихъ, и҆ сїѧ́нїемъ сла́вы ва́шеѧ ѡ҆зарѧ́еми, прославлѧ́емъ просла́вльшаго ва́съ цр҃ѧ̀ сла́вы хрⷭ҇та̀, ва́мъ же со ᲂу҆се́рдїемъ и҆ любо́вїю вопїе́мъ такова̑ѧ:
Ра́дꙋйтесѧ, бл҃же́ннїи и҆ требл҃же́ннїи, цѣломꙋ́дрїе сохра́ншїи: ра́дꙋйтесѧ, благовѣ́рнїи и҆ бг҃оно́снїи, въ зако́нѣ гдⷭ҇ни непоро́чнѡ ходи́вшїи.
Ра́дꙋйтесѧ, за́пѡвѣди хрⷭ҇то́вы свѣ́тъ стезѧ́мъ ва́шымъ и҆мѣ́вшїи: ра́дꙋйтесѧ, во всѣ́хъ ѡ҆правда́нїихъ влⷣчнихъ неꙋкло́ннѡ пребы́вшїи.
Ра́дꙋйтесѧ, всю̀ жи́знь ва́шꙋ на бг҃оꙋгожде́нїе непреста́нное посвѧти́вшїи: ра́дꙋйтесѧ, до сме́рти вѣ́рность гдⷭ҇еви соблю́дшїи.
Ра́дꙋйтесѧ, во все́мъ во́лю бж҃їю твори́вшїи: ра́дꙋйтесѧ, и҆скꙋшє́нїѧ и҆ скѡ́рби мꙋ́жески терпѣ́вшїи.
Ра́дꙋйтесѧ, во и҆скꙋше́нїихъ побѣдоно́снїи: ра́дꙋйтесѧ, въ ско́рбехъ не ᲂу҆ныва́вшїи.
Ра́дꙋйтесѧ, на бг҃а всѐ ᲂу҆пова́нїе ва́ше возложи́вшїи: ра́дꙋйтесѧ, ѿ бг҃а въ ᲂу҆пова́нїи ва́шемъ непосрамле́ннїи.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ ѕ҃
Проповѣ́дникъ бл҃гоче́стїѧ ꙗ҆ви́лсѧ є҆сѝ кнѧ́же ѳео́дѡре, є҆гда̀ ᲂу҆зрѣ́въ приближе́нїе кончи́ны живота̀ твоегѡ̀, кнѧже́нїе земно́е ѡ҆ста́вль, въ ѡ҆би́тель преѡбраже́нїѧ гдⷭ҇нѧ ᲂу҆дали́лсѧ є҆сѝ, и҆ та́мѡ во и҆́ночество постри́женный, схи́мꙋ ст҃ꙋ́ю на сѧ̀ возложи́лъ є҆сѝ, со всѣ́ми проща́ѧсѧ, всѣ́хъ бл҃гословлѧ́ѧ и҆ назида́ѧ, въ мл҃твѣ ᲂу҆се́рдной дꙋ́шꙋ твою̀ въ рꙋ́цѣ бж҃їи пре́далъ є҆сѝ, ꙗ҆́кѡ и҆́стинный ᲂу҆го́дникъ хрⷭ҇та̀ бг҃а, є҆мꙋ́же со а҆́гг҃лы пое́ши ны́нѣ: А҆ллилꙋ́їа.
І҆́косъ ѕ҃
Возсїѧ́сте мно́гими добродѣ́тельми ва́шими во гра́дѣ ꙗ҆росла́влѣ, и҆ всю̀ странꙋ̀ рѡссі́йскꙋю бл҃года́тнѡ ѡ҆зари́сте пресла́вными чꙋдесы̀ ва́шими, ѳео́дѡре, даві́де и҆ кѡнстанті́не благовѣ́рнїи. тѣ́мже па́мѧть ва́ша съ похвала́ми ѿ вѣ́рныхъ почита́етсѧ, и҆ чєстна́ѧ и҆мена̀ ва̑ша мл҃твеннѡ призыва́ютсѧ ѿ бли́жнихъ и҆ да́льнихъ, къ ва́мъ вопїю́щихъ и҆ глаго́лющихъ:
Ра́дꙋйтесѧ, во свѣ́тѣ невече́рнемъ пребыва́ющїи: ра́дꙋйтесѧ, мра́къ дꙋ́шъ на́шихъ чꙋдесы̀ ва́шими бл҃года́тнѡ просвѣща́ющїи.
Ра́дꙋйтесѧ, недꙋ́жныхъ безме́зднїи вра́чеве: ра́дꙋйтесѧ, больны́хъ цѣльбопода́тельнїи посѣти́тели.
Ра́дꙋйтесѧ, тꙋ́не прїѧ́вшїи, и҆ тꙋ́не подаю́щїи: ра́дꙋйтесѧ, въ ми́лости къ стра́ждꙋщымъ никогда́же ѡ҆скꙋдѣва́ющїи.
Ра́дꙋйтесѧ, сосꙋ́ди златі́и мѵ́ра многоцѣле́бнагѡ: ра́дꙋйтесѧ, сокрѡ́вищницы драгі̑ѧ, на всѧ́къ недꙋ́гъ врачевство̀ содержа́щыѧ.
Ра́дꙋйтесѧ, ра́дости печа̑льнымъ пода́тели: ра́дꙋйтесѧ, скорбѧ́щихъ бл҃зі́и ᲂу҆тѣ́шители.
Ра́дꙋйтесѧ, бѣ́дствꙋющихъ ско́рїи помо́щницы: ра́дꙋйтесѧ, гра́да ꙗ҆росла́влѧ нбⷭ҇нїи покрови́тели.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ з҃
Хотѧ̀ во все́мъ подража́ти ѻ҆тцꙋ̀ твоемꙋ̀ прпⷣбномꙋ, пребл҃же́нне кн҃же даві́де, свѧ́тѡ и҆ бг҃оꙋго́днѡ въ ꙗ҆росла́влѣ по не́мъ кнѧжи́лъ є҆сѝ, и҆ толи́кѡ бг҃ꙋ ᲂу҆годи́лъ є҆сѝ, ꙗ҆́кѡ ми́ромъ и҆ бл҃гопло́дїемъ кнѧже́нїе твоѐ гдⷭ҇ь бл҃гословѝ и҆ сла́вна тѧ̀ въ кн҃зѣ́хъ рѡссі́йскихъ показа̀, є҆мꙋ́же ты̀ въ прпⷣбїи и҆ ст҃ости до́брѣ послꙋжи́лъ є҆сѝ до сме́рти, взыва́ѧ къ немꙋ̀: А҆ллилꙋ́їа.
І҆́косъ з҃
Но́выхъ ва́съ чꙋдотво́рцєвъ ꙗ҆вѝ гдⷭ҇ь въ странѣ̀ рѡссі́йстѣй, ст҃і́и благовѣ́рнїи кнѧ́зи ѳео́дѡре, даві́де и҆ кѡнстанті́не, чꙋдесы̀ ва́шими ст҃ꙋ́ю правосла́внꙋю вѣ́рꙋ крѣ́пкѡ ᲂу҆тверди́въ во гра́дѣ ва́шемъ, и҆́же свѣ́тлѡ красꙋ́етсѧ, и҆мѣ́ѧ ва́съ нбⷭ҇ныхъ застꙋ́пникѡвъ и҆ предста́телей ко гдⷭ҇ꙋ, и҆ съ любо́вїю къ ва́мъ взыва́етъ:
Ра́дꙋйтесѧ, хла́днꙋю странꙋ̀ теплото́ю вѣ́ры ва́шеѧ согрѣ́вшїи: ра́дꙋйтесѧ, бл҃гоче́стїе во гра́дѣ ва́шемъ возрасти́вшїи.
Ра́дꙋйтесѧ, до́брїи дѣ́латели вїногра́да нбⷭ҇нагѡ: ра́дꙋйтесѧ, мздꙋ̀ прїе́мшїи ѿ хрⷭ҇та̀ чꙋдотворе́нїѧ да́ръ.
Ра́дꙋйтесѧ, дара́ми ми́лости ва́шеѧ вѣ́рныхъ ѡ҆богаща́ющїи: ра́дꙋйтесѧ, бж҃їѧ бл҃года́ти сосꙋ́ди и҆збра́ннїи.
Ра́дꙋйтесѧ, сїѧ́ющїи, ꙗ҆́кѡ со́лнце во црⷭ҇твїи нбⷭ҇нѣмъ: ра́дꙋйтесѧ, ꙗ҆́кѡ ѕвѣ́зды всю̀ рѡссі́ю чꙋдесы̀ ва́шими ѡ҆свѣща́ющїи.
Ра́дꙋйтесѧ, трисїѧ́ннїи лꙋчѝ трⷪ҇ческїй несозда́нный свѣ́тъ на́мъ возсїѧва́ющїи: ра́дꙋйтесѧ, тричи́сленнїи подви́жницы добродѣ́телей хрⷭ҇тїа́нскихъ.
Ра́дꙋйтесѧ, на врагѝ ви̑димыѧ и҆ неви̑димыѧ на́мъ всегда́шнїи спобо́рницы: ра́дꙋйтесѧ, цр҃ѧ̀ нбⷭ҇нагѡ хрⷭ҇та̀ и҆звѣ́стнїи ᲂу҆милостиви́тели.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ и҃
Стра́нника и҆ прише́льца въ мі́рѣ се́мъ помышлѧ́ѧ себѐ бы́ти, благовѣ́рный кн҃же кѡнстанті́не, ѿ ю҆́ности твоеѧ̀ дѣ́вственное житїѐ возлюби́лъ є҆сѝ, въ постѣ̀ и҆ мл҃твахъ пребыва́ѧ, и҆ бл҃гоꙋгожда́ѧ бг҃ꙋ бл҃гоꙋгожде́нїемъ всѧ́ческимъ, во є҆́же бы́ти тебѣ̀ ѡ҆сщ҃е́нномꙋ сосꙋ́дꙋ дх҃а ст҃а́гѡ, все́льшагѡсѧ въ непоро́чное се́рдце твоѐ, и҆ воздыха̑нїи неизглаго́ланными наꙋчи́вшагѡ тѧ̀ бл҃гопрїѧ́тнѡ пѣ́ти прест҃ѣ́й трⷪ҇цѣ: А҆ллилꙋ́їа.
І҆́косъ и҃
Ве́сь гра́дъ ꙗ҆росла́вль ра́достїю дх҃о́вною подви́жесѧ, є҆гда̀ ст҃ы̑ѧ и҆ нетлѣ̑нныѧ мѡ́щи ва́шѧ, благовѣ́рнїи кнѧ́зи ѳео́дѡре, даві́де и҆ кѡнстанті́не, чꙋде́съ бл҃года́тїю просїѧ́ша во ѡ҆би́тели преѡбраже́нїѧ гдⷭ҇нѧ. та́кѡ бо бл҃говолѝ гдⷭ҇ь, да по лѣ́тѣхъ мно́зѣхъ, нетлѣ́нїе ва́шихъ тѣле́съ ст҃ы́хъ всѣ̑мъ ꙗ҆вле́но бꙋ́детъ, и҆ чꙋдеса́ми мно́гими ѡ҆зна́менꙋетсѧ, во є҆́же всѣ̑мъ вѣ̑рнымъ вопи́ти ва́мъ си́це:
Ра́дꙋйтесѧ, во ᲂу҆мерщвле́нныхъ тѣлесѣ́хъ жи́знь бл҃года́тнꙋю проѧвлѧ́ющїи: ра́дꙋйтесѧ, по лѣ́тѣхъ мно́зѣхъ нетлѣ́нни въ соста́вѣхъ ва́шихъ пребыва́ющїи.
Ра́дꙋйтесѧ, во є҆ди́номъ гро́бѣ бл҃голѣ́пнѡ ми́рнѡ почива́ющїи: ра́дꙋйтесѧ, всѝ трїѐ вкꙋ́пѣ чꙋдодѣ́йствꙋющїи.
Ра́дꙋйтесѧ, во ᲂу҆вѣре́нїе ст҃ости ва́шеѧ чꙋде́съ мно́жество ѿ моще́й ва́шихъ сотвори́вшїи: ра́дꙋйтесѧ, невѣ́ровавшыѧ въ ст҃ость ва́шꙋ гро́знѡ покара́вшїи.
Ра́дꙋйтесѧ, слѣпы̑мъ зрѣ́нїе дарова́вшїи: ра́дꙋйтесѧ, хромы̑мъ пра́вѡ ходи́ти ᲂу҆стро́ившїи.
Ра́дꙋйтесѧ, глꙋхи̑мъ слꙋ́хи ѿве́рзшїи: ра́дꙋйтесѧ, нѣмы̑мъ ѧ҆зы́къ разрѣши́вшїи.
Ра́дꙋйтесѧ, бѣснова́тыхъ ѿ наси́лїѧ де́монскагѡ свободи́вшїи: Ра́дꙋйтесѧ, разсла́бленныхъ бл҃года́тнѡ ᲂу҆крѣпи́вшїи.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ ѳ҃
Со всѣ́ми нб҃ожи́тєли ны́нѣ сликовствꙋ́ете горѣ̀, во сла́вѣ црⷭ҇твїѧ хрⷭ҇то́ва, благовѣ́рнїи чꙋдотво́рцы ѳео́дѡре, даві́де и҆ кѡнстанті́не, въ не́йже пребыва́юще, помѧни́те и҆ на́съ смире́нныхъ въ мл҃твахъ ва́шихъ къ трїѷпоста́сномꙋ бг҃ꙋ, да при по́мощи ва́шей нбⷭ҇нѣй, сподо́бимсѧ во всѧ̑ дни̑, досто́йнѡ и҆ пра́веднѡ возглаша́ти є҆мꙋ̀: А҆ллилꙋ́їа.
І҆́косъ ѳ҃
Виті́йство человѣ́ческое не мо́жетъ восхвали́ти по достоѧ́нїю, мнѡ́гаѧ и҆ пресла̑внаѧ чꙋдотворє́нїѧ ва̑ша, ст҃і́и благовѣ́рнїи чꙋдотво́рцы ѳео́дѡре, даві́де и҆ кѡнстанті́не. ѻ҆ба́че мы̀, любо́вїю къ ва́мъ подвиза́емїи, дерза́емъ бл҃гохвали́ти ва́съ, застꙋ́пникѡвъ на́шихъ, си́ми нехи́тростными, но ᲂу҆се́рдными словесы̀:
Ра́дꙋйтесѧ, двѣ̀ жєны̀ слѣпы̑ѧ ᲂу҆ моще́й ва́шихъ прозрѣ́ти сотвори́вшїи: ра́дꙋйтесѧ, бѣснова́таго и҆ слѣпа́го мꙋ́жа та́мѡжде и҆сцѣли́вшїи.
Ра́дꙋйтесѧ, слѣпꙋ́ю ѻ҆трокови́цꙋ ви́дѣти ᲂу҆стро́ившїи: ра́дꙋйтесѧ, бѣснова́тыхъ мꙋ́жа и҆ женꙋ̀ ѿ наси́лїѧ де́мѡнскагѡ и҆зба́вившїи.
Ра́дꙋйтесѧ, четы́ре немѡщны́ѧ ѕѣлѡ̀ жєны̀ здра́вы возста́вившїи: ра́дꙋйтесѧ, и҆́нꙋ женꙋ̀, терза́вшꙋю неи́стовнѡ всѐ тѣ́ло своѐ, ѿ недꙋ́га сегѡ̀ свободи́вшїи.
Ра́дꙋйтесѧ, невѣ́ровавшаго въ ст҃ость ва́шꙋ пресвѵ́тера кѡнстанті́на, разслабле́нїемъ тѣ́ла наказа́вшїи: ра́дꙋйтесѧ, ст҃и́телѧ трѵ́фѡна въ то́мже бл҃года́тнѡ ѡ҆бличи́вшїи.
Ра́дꙋйтесѧ, покаѧ́нїе є҆гѡ̀ млⷭ҇тивнѡ прїе́мшїи: ра́дꙋйтесѧ, во ѡ҆би́тели ва́шей почи́ти є҆мꙋ̀ ѡ҆ гдⷭ҇ѣ ᲂу҆досто́ившїи.
Ра́дꙋйтесѧ, благовѣ́рнꙋю цари́цꙋ а҆настасі́ю въ недꙋ́зѣ ᲂу҆врачева́вшїи: ра́дꙋйтесѧ, бли̑жнимъ и҆ да̑льнимъ млⷭ҇ть многоцѣле́бнꙋю показа́вшїи.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ і҃
Спасти́сѧ на́мъ моли́те млⷭ҇тиваго бг҃а, чꙋдотво́рцы ст҃і́и и҆ благовѣ́рнїи, ѳео́дѡре, даві́де и҆ кѡнстанті́не: къ ва́мъ бо по бз҃ѣ и҆ прест҃ѣ́й бцⷣѣ, ꙗ҆́кѡ при̑снымъ на́шымъ предста́телємъ и҆ хода́таємъ мы̀ грѣ́шнїи ᲂу҆се́рднѡ прибѣга́емъ и҆ мл҃твеннѡ про́симъ ва́съ ѡ҆ є҆́же моли́тисѧ за на́съ къ просла́вльшемꙋ ва́съ гдⷭ҇ꙋ, да и҆ мы̀ сподо́бимсѧ вкꙋ́пѣ съ ва́ми на землѝ живы́хъ пѣ́ти є҆мꙋ̀: А҆ллилꙋ́їа.
І҆́косъ і҃
Цр҃ѧ̀ нбⷭ҇нагѡ хрⷭ҇та̀, вѣ́рнїи рабѝ и҆ ᲂу҆гѡ́дницы, ст҃і́и благовѣ́рнїи кнѧ́зи ѳео́дѡре, даві́де и҆ кѡнстанті́не, покажи́те на на́съ недосто́йныхъ мл҃твъ ва́шихъ бл҃года́тное дѣ́йство, и҆ ꙗ҆́коже мно́гихъ недꙋ́жныхъ ᲂу҆врачева́ли є҆стѐ, съ вѣ́рою приходѧ́щихъ къ ст҃ы̑мъ и҆ многоцѣлє́бнымъ моще́мъ ва́шымъ, та́кѡ и҆ на́съ, съ любо́вїю къ ни̑мъ припа́дающихъ, не лиши́те нбⷭ҇нагѡ ва́шегѡ застꙋпле́нїѧ, въ жи́зни, въ сме́рти и҆ по сме́рти, да зове́мъ ва́мъ хвале́бнѡ:
Ра́дꙋйтесѧ, ѻ҆те́чествїѧ ва́шегѡ земна́гѡ неѿстꙋ́пнїи храни́тели: ра́дꙋйтесѧ, къ ѻ҆те́чествїю го́рнемꙋ вѣ́рнїи на́мъ рꙋководи́тели.
Ра́дꙋйтесѧ, и҆сто́чницы многово́днїи бл҃года́тныхъ и҆сцѣле́нїй: ра́дꙋйтесѧ, кла́дези неистощи́мїи воды̀ живы́ѧ.
Ра́дꙋйтесѧ, воскрⷭ҇нїѧ хрⷭ҇то́ва си́лꙋ въ тѣлесѣ́хъ ва́шихъ нетлѣ́нныхъ ди́внѡ проѧви́вшїи: ра́дꙋйтесѧ, зарю̀ ѻ҆́бщагѡ воскресе́нїѧ на́мъ ѿ ра́ки ва́шеѧ возсїѧва́ющїи.
Ра́дꙋйтесѧ, ро́сꙋ бж҃їѧ бл҃года́ти въ сердца̀ вѣ́рныхъ ѡ҆дождева́ющїи: ра́дꙋйтесѧ, блага̑ѧ прошє́нїѧ на̑ша во бла́го и҆сполнѧ́ющїи.
Ра́дꙋйтесѧ, съ вѣ́рою просѧ́щихъ ᲂу҆ ва́съ и҆сцѣле́нїѧ больны́хъ ско́рѡ врачꙋ́ющїи: ра́дꙋйтесѧ, лю́бѧщымъ и҆ чтꙋ́щымъ вы̀, любо́вїю сꙋгꙋ́бою воздаю́щїи.
Ра́дꙋйтесѧ, въ простотѣ̀ дꙋше́внѣй на по́мощь призыва́ющихъ ми́лостивїи ᲂу҆слы́шатели: ра́дꙋйтесѧ, безнаде́жныхъ страда́льцєвъ бж҃е́ственнїи цѣли́тели.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ а҃і
Пѣ́нїе моле́бное на́ше и҆ похвалꙋ̀ сїю̀ смире́ннꙋю, бл҃гоꙋтро́бнѡ прїими́те, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не: се́ бо а҆́ще и҆ многогрѣ́шни є҆смы̀, но вѣ́рꙋемъ несомнѣ́ннѡ, ꙗ҆́кѡ вы̀, ст҃і́и предста́тели на́ши, мно́гѡ мо́жете пред̾ лице́мъ всеблага́гѡ бг҃а и҆ ꙗ҆́кѡ мл҃твы ва́шѧ ст҃ы̑ѧ си̑льны спастѝ на́съ ѿ поги́бели вѣ́чныѧ. тѣ́мже мо́лимъ вы̀: не посрами́те вѣ́ры на́шеѧ во всеси́льное пред̾ бг҃омъ хода́тайство ва́ше, но сподо́бите на́съ мл҃твами ва́шими црⷭ҇твїе нбⷭ҇ное ᲂу҆лꙋчи́ти, и҆ со ст҃ы́ми возглаша́ти трїеди́номꙋ бг҃ꙋ: А҆ллилꙋ́їа.
І҆́косъ а҃і
Свѣтопода́тельнїи свѣти́льницы и҆ преди́внїи чꙋдотво́рцы, ст҃і́и благовѣ́рнїи кнѧ́зи ѳео́дѡре, даві́де и҆ кѡнстанті́не, къ ва́мъ ѿ лѣ́тъ дре́внихъ ѻ҆тцы̀ на́ши вѣ́рнѡ приходѧ́ще, ми́лость мно́гꙋ ѿ ва́съ полꙋча́хꙋ, и҆́хъ же пꙋте́мъ и҆ мы̀ къ ва́мъ ше́ствꙋемъ, и҆ припа́дающе къ ст҃ы̑мъ мощє́мъ ва́шымъ, мо́лимъ и҆ про́симъ вы̀: да ꙗ҆́коже ѻ҆тцє́мъ на́шымъ, та́кѡ и҆ на́мъ ᲂу҆бѡ́гимъ млⷭ҇ть ва́шꙋ при́снѡ ꙗ҆влѧ́йте, да бл҃года́рственнѡ ва́мъ всегда̀ вопїе́мъ:
Ра́дꙋйтесѧ, ча̑да бл҃гословє́ннаѧ ѻ҆ц҃а̀ нбⷭ҇нагѡ: ра́дꙋйтесѧ, бра́тїѧ по бл҃года́ти хрⷭ҇та̀ сн҃а бж҃їѧ.
Ра́дꙋйтесѧ, свѣ̑тлыѧ ѡ҆би́тєли дх҃а ст҃а́гѡ: ра́дꙋйтесѧ, хвале́бницы чꙋдотво́рнїи прест҃ы́ѧ трⷪ҇цы.
Ра́дꙋйтесѧ, во свѣ́тѣ лица̀ бж҃їѧ при́снѡ пребыва́ющїи: ра́дꙋйтесѧ, по бз҃ѣ всѧ̑ потрє́бнаѧ на́мъ взыскꙋ́ющїи.
Ра́дꙋйтесѧ, ѿ го́рнихъ высо́тъ на по́мощь къ на́мъ ᲂу҆скорѧ́ющїи: ра́дꙋйтесѧ, грѣ́шники къ покаѧ́нїю неви́димѡ направлѧ́ющїи.
Ра́дꙋйтесѧ, ѡ҆каменє́ннаѧ сердца̀ прикоснове́нїемъ къ моще́мъ ва́шымъ ᲂу҆мѧгча́ющїи: ра́дꙋйтесѧ, плоды̀ покаѧ́нїѧ вѣ́рнымъ приноси́ти помога́ющїи.
Ра́дꙋйтесѧ, ѡ҆ сп҃се́нїи на́шемъ ᲂу҆се́рднѡ бг҃а ᲂу҆молѧ́ющїи: ра́дꙋйтесѧ, во всѧ́комъ дѣ́лѣ бла́зѣ на́мъ по вѣ́рѣ на́шей помога́ющїи.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ в҃і
Бл҃года́ть и҆ млⷭ҇ть ѿ гдⷭ҇а и҆спроси́те на́мъ, ст҃і́и кн҃зи ѳео́дѡре прпⷣбне, даві́де и҆ кѡнстанті́не пребл҃же́ннїи, и҆ въ ча́съ кончи́ны на́шеѧ предста́ните въ по́мощь на́мъ, тре́бꙋющымъ ва́шегѡ застꙋпле́нїѧ, наси́лїѧ дїа́вольскагѡ на́съ и҆збавлѧ́юще, ст҃ы́ми и҆ бл҃гомо́щными мл҃твами ва́шими: да при по́мощи и҆́хъ безбѣ́днѡ пре́йдемъ трꙋ́дный пꙋ́ть мыта́рствъ воздꙋ́шныхъ, и҆ сподо́бимсѧ въ селе́нїихъ ст҃ы́хъ пѣ́ти созда́телю на́шемꙋ: А҆ллилꙋ́їа.
І҆́косъ в҃і
Пою́ще мнѡ́гаѧ и҆ пресла̑внаѧ ва̑ша чꙋдеса̀, ст҃і́и благовѣ́рнїи кн҃зи и҆ чꙋдотво́рцы ѳео́дѡре, даві́де и҆ кѡнстанті́не, сла́вимъ гдⷭ҇а, просла́вльшаго ва́съ на нб҃сѝ и҆ на землѝ, и҆ ѿ любвѐ дꙋше́вныѧ соверша́юще ст҃ꙋ́ю и҆ всера́достнꙋю па́мѧть ва́шꙋ, ᲂу҆ми́льнѡ къ ва́мъ глаго́лемъ:
Ра́дꙋйтесѧ, прест҃ы́ѧ трⷪ҇цы вѣ́рнїи рабѝ: ра́дꙋйтесѧ, прест҃ы́ѧ бцⷣы ѻ҆рга́ни хвале́бнїи.
Ра́дꙋйтесѧ, а҆́гг҃льскихъ во́инствъ собесѣ́дницы: ра́дꙋйтесѧ, всѣ́хъ ст҃ы́хъ сожи́тели.
Ра́дꙋйтесѧ, страны̀ рѡссі́йскїѧ дꙋхо́внаѧ лѣ́пото: ра́дꙋйтесѧ, гра́да ꙗ҆росла́влѧ свѣ́тлаѧ красото̀.
Ра́дꙋйтесѧ, кн҃зе́й рѡссі́йскихъ къ бл҃гоче́стїю предводи́тели: ра́дꙋйтесѧ, кнѧже́нїѧ ва́шегѡ земна́гѡ неꙋсы́пнїи блюсти́тели.
Ра́дꙋйтесѧ, ѡ҆би́тели ва́шеѧ ст҃ы̑ѧ забра̑ла несокрꙋши̑маѧ: ра́дꙋйтесѧ, подвиза́ющымсѧ въ не́й сп҃се́нїѧ дꙋше́внагѡ хода́таи.
Ра́дꙋйтесѧ, на поклоне́нїе къ моще́мъ ва́шымъ приходѧ́щихъ любвеѡби́льнѡ прїе́млющїи: ра́дꙋйтесѧ, бл҃гослове́нїе ва́ше ст҃о́е ѿ ра́ки ва́шеѧ всѣ̑мъ вѣ̑рнымъ подаю́щїи.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ г҃і
Ѽ ст҃і́и чꙋдотво́рцы, тричи́сленнїи прест҃ы́ѧ трⷪ҇цы ᲂу҆го́дницы, благовѣ́рнїи кнѧ́зи ѳео́дѡре, даві́де и҆ кѡнстанті́не! ми́лостивнѡ прїими́те сїѐ ма́лое моле́нїе на́ше, въ похвалꙋ̀ ва́мъ приноси́мое, и҆ ᲂу҆моли́те трїѷпоста́снаго гдⷭ҇а и҆ влⷣкꙋ на́шего, и҆зба́вити на́съ мꙋче́нїй вѣ́чныхъ, грѣ́шникѡмъ ᲂу҆гото́ванныхъ, и҆ сподо́бити на́съ въ покаѧ́нїи є҆мꙋ̀ бл҃гоꙋгоди́ти, и҆ црⷭ҇твїе нбⷭ҇ное наслѣ́довати, да съ ва́ми вопїе́мъ є҆мꙋ̀ во вѣ́ки: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃ли земні́и и҆ человѣ́цы нбⷭ҇нїи бы́сте, ѳео́дѡре, даві́де и҆ кѡнстанті́не пребл҃же́ннїи, всѧ̑ за́пѡвѣди гдⷭ҇ни вѣ́рнѡ сохра́ншїи и҆ въ добродѣ́телехъ преꙋспѣ́вшїи, ꙗ҆́кѡ бы́ти ва́мъ є҆щѐ во пло́ти, подража́тели си́лъ безпло́тныхъ, житїѧ̀ чистото́ю и҆ ст҃остїю. тѣ́мже и҆ мы̀ грѣ́шнїи со бл҃гоговѣ́нїемъ прино́симъ ва́мъ бл҃гохвалє́нїѧ такова̑ѧ:
Ра́дꙋйтесѧ, свѣти́льницы трисїѧ́ннїи бж҃їѧ бл҃года́ти: ра́дꙋйтесѧ, столпѝ крѣ́пцыи ст҃ы́ѧ правосла́вныѧ цр҃кве.
Ра́дꙋйтесѧ, во благовѣ́рїи ᲂу҆твержде́ннїи: ра́дꙋйтесѧ, въ добродѣ́телехъ бл҃гоискꙋ́снїи.
Ра́дꙋйтесѧ, вѣ́рнїи хрⷭ҇тѡ́вы ᲂу҆го́дницы: ра́дꙋйтесѧ, многоцѣле́бныхъ дарѡ́въ незави́стнїи пода́тели.
Ра́дꙋйтесѧ, нетлѣ́нїѧ цвѣ́ти бл҃гоꙋха́ннїи: ра́дꙋйтесѧ, раѧ̀ і҆и҃сова крі́ни неꙋвѧда́емїи.
Ра́дꙋйтесѧ, кн҃зе́й рѡссі́йскихъ свѣ́тлаѧ похвало̀: ра́дꙋйтесѧ, лю́бѧщихъ и҆ чтꙋ́щихъ ва́съ при́сное ра́дованїе.
Ра́дꙋйтесѧ, во бл҃гоꙋха́нїи ст҃ости почива́ющїи: ра́дꙋйтесѧ, недꙋ̑жныѧ безме́зднѡ и҆сцѣлѧ́ющїи.
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Конда́къ а҃
И҆збра́ннїи чꙋдотво́рцы и҆ вели́цїи ᲂу҆го́дницы гдⷭ҇ни, гра́да ꙗ҆росла́влѧ нбⷭ҇нїи застꙋ́пницы и҆ ᲂу҆се́рднїи ѡ҆ дꙋша́хъ на́шихъ мл҃твенницы, ст҃і́и благовѣ́рнїи кнѧ́зи ѳео́дѡре, даві́де и҆ кѡнстанті́не, похва́льное пѣ́нїе прино́симъ ва́мъ съ вѣ́рою и҆ любо́вїю: вы́ же, ꙗ҆́кѡ и҆мꙋ́щїи дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ мл҃твами ва́шими при́снѡ и҆зба́вите, да съ ᲂу҆миле́нїемъ зове́мъ ва́мъ:
Ра́дꙋйтесѧ, ст҃і́и благовѣ́рнїи кн҃зи ѳео́дѡре, даві́де и҆ кѡнстанті́не, пресла́внїи чꙋдотво́рцы.
Моли́твы
Ѽ вели́цыи ᲂу҆го́дницы бж҃їи и҆ чꙋдотво́рцы, ст҃і́и и҆ бл҃говѣ́рнїи кн҃зи, ѳео́дѡре, даві́де и҆ кѡнстанті́не! припа́дающе къ ст҃ы̑мъ и҆ многоцѣлє́бнымъ моще́мъ ва́шымъ, мо́лимъ вы̀ со смире́нїемъ, вѣ́рою и҆ любо́вїю: простри́те бл҃гопрїѧ̑тныѧ мл҃твы ва́шѧ ко гдⷭ҇ꙋ и҆ созда́телю на́шемꙋ, и҆ ᲂу҆моли́те є҆гѡ̀ бл҃гость, дарова́ти на́мъ всѧ̑ нꙋ̑жнаѧ къ житїю̀ семꙋ̀ вре́менномꙋ, и҆ потрє́бнаѧ къ вѣ́чномꙋ сп҃се́нїю на́шемꙋ: вѣ́рꙋемъ бо несомнѣ́ннѡ, ꙗ҆́кѡ всѧ̑ возмѡ́жна ва́мъ, ꙗ҆́кѡ и҆́стиннымъ є҆гѡ̀ ᲂу҆го́дникѡмъ. сегѡ̀ ра́ди про́симъ вы̀: и҆спроси́те на́мъ ᲂу҆ цр҃ѧ̀ ца́рствꙋющихъ и҆ гдⷭ҇а госпо́дствꙋющихъ: стра́ждꙋщꙋю странꙋ̀ рѡссі́йскꙋю ѿ лю́тыхъ безбѡ́жникъ и҆ вла́сти и҆́хъ гдⷭ҇ь да свободи́тъ: вѣ́рныхъ рабѡ́въ є҆гѡ̀, въ ско́рби и҆ печа́ли де́нь и҆ но́щь вопїю́щихъ къ немꙋ̀, многоболѣ́зный во́пль да ᲂу҆слы́шитъ и҆ да и҆зведе́тъ ѿ поги́бели живо́тъ на́шъ. и҆спроси́те престо́льнымъ градѡ́мъ, гра́дꙋ на́шемꙋ и҆ всѣ́мъ градѡ́мъ и҆ ве́семъ рѡссі̑йскимъ бл҃гополꙋ́чїе, и҆з̾ѡби́лїе и҆ ѿ ѕлы́хъ сохране́нїе, всѣ́мъ же правовѣ́рнымъ лю́демъ, почита́ющымъ ва́съ и҆ на поклоне́нїе мощє́мъ ва́шымъ ст҃ы̑мъ приходѧ́щымъ, ми́лость бж҃їю и҆ бл҃ги́хъ проше́нїй ско́рое и҆сполне́нїе. є҆́й, чꙋдотво́рцы ст҃і́и! не посрами́те ᲂу҆пова́нїѧ на́шегѡ, но мл҃твами ва́шими сотвори́те на́съ наслѣ́дники бы́ти црⷭ҇твїѧ хрⷭ҇то́ва: да прославлѧ́емъ чл҃вѣколю́бїе въ трⷪ҇цѣ сла́вимагѡ и҆ покланѧ́емагѡ бг҃а, ѻ҆ц҃а̀ и҆ сн҃а и҆ ст҃а́гѡ дх҃а, и҆ ва́ше ст҃о́е застꙋпле́нїе во вѣ́ки вѣкѡ́въ. А҆ми́нь.