Православный календарь
Размер шрифта:

Ака́ѳістъ

А҆ка́ѳїстъ прпⷣбномꙋ бл҃говѣ́рномꙋ кнѧ́зю ѻ҆ле́гꙋ брѧ́нскомꙋ.

Благов. кн. Олега Брянского (ок.1285) 3 октября 2026

Конда́къ а҃

Возбра́нный воево́до правосла́вныхъ и҆ нбⷭ҇ный застꙋ́пниче брѧ́нскїѧ землѝ, кнѧзе́й рꙋ́сскихъ ᲂу҆краше́нїе и҆ мона́хѡвъ похвало̀, ѻ҆би́тели первоверхо́вныхъ а҆пⷭ҇лъ ѡ҆снова́телю и҆ покрови́телю и҆ ѡ҆ дꙋша́хъ на́шихъ ᲂу҆се́рдный мл҃твенниче, бл҃года́рствєннаѧ пѣ̑нїѧ прино́симъ тѝ глаго́люще:

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

І҆́косъ а҃

А҆́гг҃льскїѧ си̑лы ра́довахꙋсѧ бл҃гоче́стїю твоемꙋ̀, кнѧ́же ѻ҆ле́же, є҆́же и҆змла́да бл҃года́тїю бж҃їею ꙗ҆ви́лъ є҆сѝ, бл҃га́гѡ ко́рене бл҃га́ѧ ѻ҆́трасль бы́въ. Мы́ же сора́дꙋемсѧ и҆̀мъ и҆ ꙗ҆́кѡ бж҃їѧ и҆збра́нника восхвалѧ́емъ тѧ̀ си́це:

Ра́дꙋйсѧ, бл҃гочести́выхъ роди́телей бл҃гослове́нный пло́дъ: ра́дꙋйсѧ, ꙗ҆́кѡ па́мѧть твоѧ̀ почита́етсѧ въ ро́дъ и҆ ро́дъ.

Ра́дꙋйсѧ, ѿ ю҆́ности хрⷭ҇та̀ бг҃а те́плѣ возлюби́вый: ра́дꙋйсѧ, въ се́рдцѣ ѻ҆би́тель ст҃о́мꙋ дх҃ꙋ ᲂу҆гото́вивый.

Ра́дꙋйсѧ, бг҃ослꙋже́нїю ᲂу҆се́рднѡ прилѣжа́вый: ра́дꙋйсѧ, сло́вомъ бж҃їимъ дꙋ́шꙋ свою̀ пита́вый.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ в҃

Ви́дѧ и҆ слы́ша првⷣное житїѐ бл҃говѣ́рныхъ сро́дникѡвъ твои́хъ, черни́говскихъ кнѧзе́й нїко́лы свѧто́ши и҆ и҆́горѧ стрⷭ҇тоте́рпца, мч҃ника мїхаи́ла и҆ роди́телѧ твоегѡ̀ рѡма́на, є҆ще́ же и҆ дще́ре мїхаи́ловы прпⷣбныѧ є҆ѵфросѵ́нїи сꙋ́здальскїѧ, потща́лсѧ є҆сѝ, ст҃е ѻ҆ле́же, подража́ти и҆̀мъ, воспѣва́ѧ бг҃ꙋ: А҆ллилꙋ́їа.

І҆́косъ в҃

Ра́зꙋмъ бг҃опросвѣще́нный ѿ ю҆́ности стѧжа́въ, бл҃говѣ́рне кнѧ́же ѻ҆ле́же, не прельсти́лсѧ є҆сѝ сꙋ́етною сла́вою кнѧже́нїѧ земна́гѡ, почита́ѧ сїѐ ꙗ҆́кѡ сꙋгꙋ́бое слꙋже́нїе лю́демъ бж҃їимъ, врꙋчє́ннымъ попече́нїю твоемꙋ̀. Сегѡ̀ ра́ди прїимѝ ѿ на́съ сицева̑ѧ:

Ра́дꙋйсѧ, любо́вїю ѡ҆ хрⷭ҇тѣ̀ и҆спо́лнивыйсѧ: ра́дꙋйсѧ, ѻ҆те́цъ чадолюби́вый лю́демъ ꙗ҆ви́выйсѧ.

Ра́дꙋйсѧ, печа́льныхъ бл҃гі́й ᲂу҆тѣ́шителю: ра́дꙋйсѧ, въ бѣда́хъ сꙋ́щымъ предста́телю.

Ра́дꙋйсѧ, ни́щихъ и҆ ᲂу҆бо́гихъ пита́телю: ра́дꙋйсѧ, вдѡ́въ и҆ сиро́тъ покрови́телю.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ г҃

Си́лою дх҃а ст҃а́гѡ ᲂу҆крѣплѧ́емь, бл҃же́нне кнѧ́же ѻ҆ле́же, въ мі́рѣ се́мъ живѧ̀, собла́знѡвъ є҆гѡ̀ ᲂу҆далѧ́лсѧ є҆сѝ, ᲂу҆едине́ннѡ въ вертогра́дѣ роди́телей твои́хъ водворѧ́ѧсѧ: тѣ́мже и҆ ᲂу҆твержде́нїю вѣ́ры правосла́вныѧ ревнꙋ́ѧ, пе́рвꙋю въ землѝ брѧ́нстѣй ѻ҆би́тель во и҆́мѧ ст҃ы́хъ а҆пⷭ҇лъ петра̀ и҆ па́ѵла ѡ҆снова́лъ є҆сѝ, да и҆́ноцы є҆ѧ̀ непреста́ннѡ воспѣва́ютъ бг҃ꙋ: А҆ллилꙋ́їа.

І҆́косъ г҃

И҆мѣ́ѧ бг҃опрїѧ́тное жела́нїе ѿ сꙋеты̀ мїрскі́ѧ ᲂу҆дали́тисѧ, ᲂу҆крѣпи́лсѧ є҆сѝ въ не́мъ, є҆гда̀ и҆́ноцы созда́нныѧ тобо́ю ѻ҆би́тели вкꙋ́пѣ съ пече́рскими принесо́ша ѿ кі́ева чꙋдотво́рнꙋю і҆кѡ́нꙋ бг҃омт҃ре, моле́нїѧ ра́ди недꙋ́гꙋющагѡ роди́телѧ твоегѡ̀. Тѣ́мже ᲂу҆бл҃жа́юще и҆зволе́нїе твоѐ, вопїе́мъ тѝ та́кѡ:

Ра́дꙋйсѧ, ᲂу҆́зкїй пꙋ́ть хрⷭ҇то́въ возлюби́вый: ра́дꙋйсѧ, бога́тство и҆ сла́вꙋ мі́ра возненави́дѣвый.

Ра́дꙋйсѧ, рꙋ́цѣ на ра́ло гдⷭ҇не возложи́вый: ра́дꙋйсѧ, вспѧ́ть лица̀ твоегѡ̀ николи́же ѡ҆брати́вый.

Ра́дꙋйсѧ, ѻ҆те́чества го́рнѧгѡ дости́гнꙋти возжелѣ́вый: ра́дꙋйсѧ, кнѧ́жескꙋю дїади́мꙋ ра́ди нбⷭ҇нагѡ вѣнца̀ ѡ҆ста́вивый.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ д҃

Бꙋ́рею напа́стей коле́блемо ѻ҆те́чество твоѐ зрѧ̀, кнѧ́же ѻ҆ле́же, а҆га́рѧны и҆ ѕловѣ́рными разорѧ́емо, є҆ще́ же и҆ междоꙋсо́бными бра́нѧми терза́емо, щито́мъ вѣ́ры правосла́вныѧ ѡ҆гради́всѧ, и҆ мече́мъ мл҃твы воѡрꙋжи́всѧ, на врагѝ и҆зше́лъ є҆сѝ, поѧ̀ сп҃си́телю бг҃ꙋ: А҆ллилꙋ́їа.

І҆́косъ д҃

Слы́шавъ ѻ҆тца̀ твоего̀, бл҃говѣ́рнаго кнѧ́зѧ рѡма́на, во бл҃годаре́нїе за и҆сцѣле́нїе ѻ҆би́тель све́нскꙋю ѡ҆снова́вшаго и҆ всѧ̑, є҆ли̑ки ви́дѣ прозрѣ́вшима ѻ҆чи́ма, зе́мли є҆́й дарова́вшаго, себѐ самаго̀ въ же́ртвꙋ бг҃ꙋ прине́слъ є҆сѝ, ст҃е ѻ҆ле́же, и҆ во ѻ҆би́тель сїю̀ всели́лсѧ є҆сѝ. Сегѡ̀ ра́ди воспѣва́емъ тѧ̀ си́це:

Ра́дꙋйсѧ, взе́мый кре́стъ сво́й и҆ хрⷭ҇тꙋ̀ послѣ́довавый: ра́дꙋйсѧ, земны̑ѧ по́чєсти ни во что́же вмѣни́вый.

Ра́дꙋйсѧ, по за́повѣди хрⷭ҇то́вой смири́выйсѧ: ра́дꙋйсѧ, господи́нъ бы́въ и҆ слꙋжи́тель всѣ̑мъ содѣ́лавыйсѧ.

Ра́дꙋйсѧ, люботрꙋ́дное житїѐ и҆збра́вый: ра́дꙋйсѧ, въ постѣ̀ и҆ мл҃твахъ пребыва́вый.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ є҃

Бг҃оте́чнѣй ѕвѣздѣ̀ ᲂу҆подо́билсѧ є҆сѝ, прпⷣбне ѻ҆ле́же, є҆гда̀ ѿ черто́га кнѧ́жеска во ѻ҆би́тель первоверхо́вныхъ а҆пⷭ҇лъ, ꙗ҆́кѡ въ черто́гъ нбⷭ҇нагѡ жениха̀, преше́лъ є҆сѝ, ѡ҆ бл҃гостоѧ́нїи ст҃ы́ѧ цр҃кве, бл҃гоꙋстрое́нїи ѻ҆те́чества и҆ сп҃се́нїи дꙋ́шъ врꙋче́нныхъ тѝ бг҃омъ люде́й ᲂу҆се́рдно молѧ́сѧ и҆ со ᲂу҆миле́нїемъ поѧ̀: А҆ллилꙋ́їа.

І҆́косъ є҃

Ви́дѣвше бг҃олюби́вїи лю́дїе гра́да брѧ́нска првⷣное житїѐ твоѐ, ѻ҆ле́же бг҃оно́сне, попремно́гꙋ чествова́хꙋ щедрѡ́ты и҆ по́двиги твоѧ̑. Ты́ же смиренномꙋ́дреннѡ бл҃годаре́нїе бг҃ꙋ приноси́лъ є҆сѝ, сегѡ̀ ра́ди и҆ то́й тѧ̀ просла́ви и҆ наꙋчѝ вѣ̑рныѧ воспѣва́ти та́кѡ:

Ра́дꙋйсѧ, дꙋ́хъ пра́выѧ вѣ́ры ᲂу҆крѣплѧ́ѧй: ра́дꙋйсѧ, ре́вность по бз҃ѣ возгрѣва́ѧй.

Ра́дꙋйсѧ, дѣѧ́нїю бг҃омы́слїе приложи́вый: ра́дꙋйсѧ, тщесла́вїе и҆ горды́ню сокрꙋши́вый.

Ра́дꙋйсѧ, дрє́внимъ ѻ҆тцє́мъ є҆динонра́вный: ра́дꙋйсѧ, бг҃омъ и҆ людьмѝ возлю́бленный.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ ѕ҃

Проповѣ́дникъ вѣ́ры правосла́вныѧ и҆ ревни́тель бл҃гоче́стїѧ сло́вомъ и҆ житїе́мъ бы́лъ є҆сѝ, бг҃обл҃же́нне кнѧ́же ѻ҆ле́же, є҆ди́нѣмъ бо жела́нїемъ, подо́бнѡ пра́дѣдꙋ твоемꙋ̀ равноапⷭ҇льномꙋ кнѧ́зю влади́мїрꙋ, горѣ́лъ є҆сѝ, да всѝ лю́дїе землѝ твоеѧ̀ присво́ѧтсѧ хрⷭ҇тꙋ̀ и҆ вкꙋ́пѣ съ тобо́ю воспѣва́ютъ є҆мꙋ̀: А҆ллилꙋ́їа.

І҆́косъ ѕ҃

Возсїѧ́лъ є҆сѝ въ де́брехъ, гра́дъ брѧ́нскъ ѡ҆́крестъ ѡ҆блежа́щихъ, ꙗ҆́кѡ ᲂу҆́треннѧѧ зарѧ̀, и҆ ꙗ҆́кѡ ѕвѣ́зды небє́сныѧ, ѡ҆зари́ша зе́млю на́шꙋ добродѣ́тєли твоѧ̑, и҆́миже и҆ ны́нѣ просвѣща́еши немо́лчнѡ воспѣва́ющихъ тѧ̀ си́ми похва́льными словесы̀:

Ра́дꙋйсѧ, во свѣ́тѣ невече́рнѣмъ пребыва́ѧй: ра́дꙋйсѧ, дꙋ́шы на́шѧ чꙋдесы̀ просвѣща́ѧй.

Ра́дꙋйсѧ, сто́лпе ѻ҆́гненный въ пꙋсты́ни грѣха̀ блꙋжда́ющымъ: ра́дꙋйсѧ, пꙋтево́днаѧ ѕвѣздо̀ на нб҃о ше́ствꙋющымъ.

Ра́дꙋйсѧ, нетлѣ́нїемъ тѣлесѐ ѿ бг҃а почте́нный: ра́дꙋйсѧ, бл҃года́тїю хрⷭ҇то́вою ѡ҆блече́нный.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ з҃

Хотѧ́й по́двигомъ до́брымъ подвиза́тисѧ и҆ вѣ́рꙋ правосла́внꙋю соблюстѝ, прпⷣбне ѻ҆́тче ѻ҆ле́же, ѿ си́лы въ си́лꙋ ше́ствовалъ є҆сѝ, ᲂу҆крѣплѧ́ѧ ᲂу҆́мъ чте́нїемъ бжⷭ҇твенныхъ слове́съ и҆ житі́й ст҃ы́хъ, и҆̀мже подража́ѧ, добродѣ́тєли твоѧ̑ сокры́ти ѿ человѣ̑къ тща́лсѧ є҆сѝ, воспѣва́ѧ сердцевѣ́дцꙋ бг҃ꙋ: А҆ллилꙋ́їа.

І҆́косъ з҃

Но́ваго тѧ̀ чꙋдотво́рца ꙗ҆вѝ гдⷭ҇ь въ землѝ рꙋ́сской, ѻ҆ле́же всечтⷭ҇не, тобо́ю ст҃ꙋ́ю правосла́внꙋю вѣ́рꙋ во гра́дѣ брѧ́нскѣ ᲂу҆твержда́ѧ, и҆́же свѣ́тлѡ красꙋ́етсѧ, и҆мѣ́ѧ тѧ̀ нбⷭ҇наго застꙋ́пника и҆ предста́телѧ ко гдⷭ҇ꙋ, и҆ съ любо́вїю тѝ взыва́етъ:

Ра́дꙋйсѧ, правосла́вныѧ цр҃кве во́ине добропобѣ́дный: ра́дꙋйсѧ, рꙋсѝ ст҃ы́ѧ мл҃твенниче крѣ́пкїй.

Ра́дꙋйсѧ, землѝ брѧ́нскїѧ храни́телю: ра́дꙋйсѧ, петропа́ѵловскїѧ ѻ҆би́тели ѡ҆гражде́нїе.

Ра́дꙋйсѧ, є҆ресе́й и҆ раско́лѡвъ разори́телю: ра́дꙋйсѧ, дꙋ́шъ и҆ тѣле́съ на̑шихъ цѣли́телю.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ и҃

Стра́нно и҆ ди́вно бы́сть житїѐ твоѐ, ѻ҆́тче на́шъ ѻ҆ле́же, во ѻ҆би́тели, є҆гда̀ и҆гꙋ́менъ бы́въ, прпⷣбномꙋ ѳеодо́сїю кі́ево_пече́рскомꙋ подража́лъ є҆сѝ и҆ ѻ҆́бразъ бра́тїи въ подви́жническихъ трꙋдѣ́хъ ꙗ҆влѧ́лъ є҆сѝ, всѧ̑ послꙋша̑нїѧ нелѣ́ностнѡ и҆сполнѧ́ѧ, во вре́тище ѡ҆дѣва́ѧсѧ, вма́лѣ на дре́вѧнѣ ло́жи поко́й и҆мѣ́ѧ, па́че же на всѧ́къ ча́съ неꙋста́ннѡ вопїѧ̀ бг҃ꙋ: А҆ллилꙋ́їа.

І҆́косъ и҃

Всѧ̀ землѧ̀ брѧ́нскаѧ ра́достїю дꙋхо́вною подви́жесѧ, є҆гда̀ ст҃ы̑ѧ мо́щи твоѧ̑, достохва́льне кнѧ́же ѻ҆ле́же, многолѣ́тнѣ во вре́мѧ гоне́нїй бг҃обо́рческихъ под̾ спꙋ́домъ во ѻ҆би́тели твое́й храни̑мыѧ, па́ки ꙗ҆вѝ гдⷭ҇ь вѣ̑рнымъ лю́демъ свои̑мъ, вопїю́щымъ тѝ такова̑ѧ:

Ра́дꙋйсѧ, сѣ́тей тлетво́рнагѡ грѣха̀ и҆збѣжа́вый: ра́дꙋйсѧ, безстра́стїемъ дꙋ́шꙋ ᲂу҆краси́вый.

Ра́дꙋйсѧ, ꙗ҆́кѡ мо́щи твоѧ̀ во ᲂу҆крѣпле́нїе вѣ́ры на́мъ ѡ҆ста́вивый: ра́дꙋйсѧ, ѡ҆сщ҃е́нїе притека́ющымъ къ ни̑мъ подава́ѧй.

Ра́дꙋйсѧ, въ ме́ртвеннѣмъ тѣлесѝ жи́знь бл҃года́тнꙋю ꙗ҆влѧ́ѧй: ра́дꙋйсѧ, ѿ моще́й твои́хъ чꙋдеса̀ и҆сточа́ѧй.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ ѳ҃

Всѧ́кое є҆стество̀ а҆́гг҃льское ᲂу҆диви́сѧ крѣ́пости дꙋшѝ твоеѧ̀, бг҃омꙋ́дре ѻ҆ле́же, ка́кѡ соверше́нъ хотѧ̀ бы́ти, бога́тство ꙗ҆́вѣ и҆ та́йнѣ расточи́лъ є҆сѝ нꙋжда́ющымсѧ, и҆ нището́ю дꙋхо́вною ѡ҆богати́всѧ, ра́достнѡ хрⷭ҇тꙋ̀ сп҃си́телю послѣ́довалъ є҆сѝ, поѧ̀ томꙋ̀: А҆ллилꙋ́їа.

І҆́косъ ѳ҃

Вѣті́йство человѣ́ческое не довлѣ́етъ по достоѧ́нїю восхвали́ти трꙋды̀, болѣ̑зни и҆ по́двиги твоѧ̑, сла́вне кнѧ́же ѻ҆ле́же, ꙗ҆̀же сп҃се́нїѧ ра́ди дꙋше́внагѡ под̾ѧ́лъ є҆сѝ, чрез̾ всѐ житїѐ неѡсла́бнѡ пло́ть распина́ѧ со страстьмѝ и҆ похотьмѝ. Мы́ же ѿ простоты̀ се́рдца любо́вїю ᲂу҆бл҃жа́емъ тѧ̀ си́це:

Ра́дꙋйсѧ, во пло́ти а҆́ки безпло́тенъ на землѝ пожи́вый: ра́дꙋйсѧ, стрꙋѧ́ми сле́зными ѻ҆́гнь страсте́й ᲂу҆гаси́вый.

Ра́дꙋйсѧ, терпѣ́нїемъ и҆ кро́тостїю дїа́вола побѣди́вый: ра́дꙋйсѧ, нището́ю дꙋхо́вною ѻ҆де́ждꙋ нетлѣ́нїѧ стѧжа́вый.

Ра́дꙋйсѧ, си́лꙋ воскрⷭ҇нїѧ хрⷭ҇то́ва ѿ моще́й твои́хъ проѧвлѧ́ѧй: ра́дꙋйсѧ, зарю̀ ѻ҆́бщагѡ воскрⷭ҇нїѧ нетлѣ́нїемъ моще́й показꙋ́ѧй.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ і҃

Сп҃сти́сѧ дꙋша́мъ на́шымъ молѝ чл҃вѣколю́бца бг҃а, ст҃е ѻ҆ле́же, къ тебѣ́ бо по бз҃ѣ и҆ прест҃ѣ́й бцⷣѣ ᲂу҆се́рднѡ прибѣга́емъ, ꙗ҆́кѡ ско́ромꙋ помо́щникꙋ и҆ те́пломꙋ хода́таю ѡ҆ землѝ брѧ́нстѣй и҆ ѡ҆ всѣ́хъ правосла́внѡ въ не́й живꙋ́щихъ и҆ воспѣва́ющихъ гдⷭ҇ꙋ: А҆ллилꙋ́їа.

І҆́косъ і҃

Стѣна̀ тве́рда и҆ покро́въ и҆зрѧ́денъ бы́лъ є҆сѝ въ житїѝ твое́мъ и҆́нокѡмъ ѻ҆би́тели твоеѧ̀: ѻ҆́ваго ᲂу҆́бѡ ѻ҆те́чески назида́ѧ, ѻ҆́ваго кро́тцѣ ѡ҆блича́ѧ, и҆ны̑ѧ же съ любо́вїю ᲂу҆вѣщава́ѧ, нѣ́кїихъ стра́хомъ сп҃са́ѧ, наипа́че же пред̾ кончи́ною твое́ю всѧ̑ ко сп҃се́нїю потрє́бнаѧ заповѣ́далъ є҆сѝ и҆̀мъ. Тѣ́мже и҆ на́съ грѣ́шныхъ ᲂу҆пасѝ, да съ любо́вїю зове́мъ тѝ:

Ра́дꙋйсѧ, слове́сное ста́до ѿ волкѡ́въ ѡ҆хранѧ́ѧй: ра́дꙋйсѧ, заблꙋ́ждшыѧ ѻ҆́вцы ᲂу҆се́рднѡ взыскꙋ́ѧй.

Ра́дꙋйсѧ, мечꙋ̀ бж҃їй, дꙋшеврє́дныѧ стра́сти посѣца́ѧй: ра́дꙋйсѧ, щито́мъ твои́хъ мл҃твъ на́съ ѡ҆гражда́ѧй.

Ра́дꙋйсѧ, мона́хѡмъ въ по́двизѣхъ ᲂу҆крѣпле́нїе: ра́дꙋйсѧ, всѣ̑мъ вѣ̑рнымъ лю́демъ поможе́нїе.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ а҃і

Пѣ́нїе ᲂу҆миле́нное прине́слъ є҆сѝ прест҃ѣ́й трⷪ҇цѣ въ ча́съ кончи́ны твоеѧ̀, досточꙋ́дне кнѧ́же ѻ҆ле́же. Хвала̀ бг҃ꙋ бл҃годѣ́йствꙋющꙋ, глаго́лалъ є҆сѝ, возлежа̀ на сме́ртномъ ѻ҆дрѣ̀, зрю̀ ᲂу҆жѐ бре́гъ мо́рѧ жите́йскагѡ, и҆́мже досе́лѣ ноша́шесѧ моѧ̀ ᲂу҆́тлаѧ ладїѧ̀. И҆ со словесы̀ си́ми ра́достнѡ преше́лъ є҆сѝ во ѻ҆би́тєли гѡ́рнїѧ, и҆дѣ́же со а҆́гг҃льскими ли̑ки пое́ши пѣ́снь вели́кꙋю: А҆ллилꙋ́їа.

І҆́косъ а҃і

Свѣтопрїе́мнꙋю свѣщꙋ̀ ᲂу҆́глемъ бл҃года́ти возжже́ннꙋю, ви́дѣша ᲂу҆ченицы̀ лицѐ твоѐ, ᲂу҆го́дниче бж҃їй, во ст҃о́мъ преставле́нїи свѣ́томъ нбⷭ҇нымъ ѡ҆сїѧ́нное. Сегѡ̀ ра́ди, ско́рбь разлꙋче́нїѧ съ тобо́ю ди́внымъ си́мъ ᲂу҆тѣше́нїемъ раствори́вше, съ тре́петомъ и҆ ра́достїю взира́хꙋ на пречⷭ҇тны̑ѧ мо́щи твоѧ̑ и҆ ѿше́ствїе твоѐ просла́виша зва̑нїи си́ми:

Ра́дꙋйсѧ, земно́е тече́нїе достохва́льнѣ сконча́вый: ра́дꙋйсѧ, по трꙋдѣ́хъ вре́менныхъ поко́й вѣ́чный ᲂу҆лꙋчи́вый.

Ра́дꙋйсѧ, вѣне́цъ безсме́ртныѧ жи́зни прїе́мый: ра́дꙋйсѧ, прⷭ҇то́лꙋ вседержи́телѧ предстоѧ́й.

Ра́дꙋйсѧ, любо́вїю твое́ю на́съ не ѡ҆ставлѧ́ѧй: ра́дꙋйсѧ, чтꙋ́щыѧ тѧ̀ млⷭ҇тивнѡ посѣща́ѧй.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ в҃і

Бл҃года́ть да́ннꙋю тѝ, ѻ҆́тче на́шъ ѻ҆ле́же, и҆ ве́лїе твоѐ дерзнове́нїе пред̾ бг҃омъ вѣ́дꙋще, прилѣ́жнѡ мо́лимъ тѧ̀: молѝ млⷭ҇тиваго бг҃а, да сохрани́тъ ст҃ꙋ́ю цр҃ковь ѿ є҆ресе́й, раско́лѡвъ и҆ нестрое́нїй, ѻ҆те́чествꙋ на́шемꙋ ми́ръ и҆ бл҃годе́нствїе да да́рꙋетъ, вѣ́рныхъ же въ правосла́вїи и҆ є҆диномы́слїи да ᲂу҆тверди́тъ, пою́щихъ є҆мꙋ̀: А҆ллилꙋ́їа.

І҆́косъ в҃і

Пою́ще ди́вное житїѐ твоѐ и҆ чтⷭ҇но́е преставле́нїе, бг҃оно́сне ѻ҆́тче ѻ҆ле́же, чти́мъ ст҃ꙋ́ю па́мѧть твою̀, ꙗ҆́кѡ нбⷭ҇нагѡ предста́телѧ и҆ застꙋ́пника, ѿ бг҃а на́мъ дарова́ннагѡ, и҆ припа́дающе къ чтⷭ҇ны̑мъ моще́мъ твои̑мъ прино́симъ тѝ сицевы̑ѧ хвалы̑:

Ра́дꙋйсѧ, въ житїѝ се́мъ бг҃ꙋ ᲂу҆годи́вый: ра́дꙋйсѧ, црⷭ҇твїе нбⷭ҇ное наслѣ́дивый.

Ра́дꙋйсѧ, ꙗ҆́кѡ съ го́рнихъ высо́тъ на ны̀ призира́еши: ра́дꙋйсѧ, ꙗ҆́кѡ гра́дъ брѧ́нскъ и҆ ѻ҆би́тель твою̀ покрыва́еши.

Ра́дꙋйсѧ, предѣ́лѡвъ ѻ҆те́чества на́шегѡ защи́тниче: ра́дꙋйсѧ, хрⷭ҇толюби́вомꙋ во́инствꙋ побо́рниче.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ г҃і

Ѽ сщ҃е́ннаѧ главо̀, прпⷣбне бл҃говѣ́рне кнѧ́же ѻ҆ле́же, прїимѝ сїѐ ма́лое хвале́нїе ѿ недосто́йныхъ ча̑дъ твои́хъ, и҆ мл҃твами твои́ми бг҃опрїѧ́тными правосла́вїе въ землѝ рꙋ́сской ᲂу҆твердѝ, гра́дъ брѧ́нскъ и҆ ѻ҆би́тель твою̀ сохранѝ и҆ дꙋша́мъ на́шымъ сп҃се́нїе и҆спросѝ, да съ тобо́ю ны́нѣ и҆ во вѣ́ки воспѣва́емъ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льскїѧ си̑лы ра́довахꙋсѧ бл҃гоче́стїю твоемꙋ̀, кнѧ́же ѻ҆ле́же, є҆́же и҆змла́да бл҃года́тїю бж҃їею ꙗ҆ви́лъ є҆сѝ, бл҃га́гѡ ко́рене бл҃га́ѧ ѻ҆́трасль бы́въ. Мы́ же сора́дꙋемсѧ и҆̀мъ и҆ ꙗ҆́кѡ бж҃їѧ и҆збра́нника восхвалѧ́емъ тѧ̀ си́це:

Ра́дꙋйсѧ, бл҃гочести́выхъ роди́телей бл҃гослове́нный пло́дъ: ра́дꙋйсѧ, ꙗ҆́кѡ па́мѧть твоѧ̀ почита́етсѧ въ ро́дъ и҆ ро́дъ.

Ра́дꙋйсѧ, ѿ ю҆́ности хрⷭ҇та̀ бг҃а те́плѣ возлюби́вый: ра́дꙋйсѧ, въ се́рдцѣ ѻ҆би́тель ст҃о́мꙋ дх҃ꙋ ᲂу҆гото́вивый.

Ра́дꙋйсѧ, бг҃ослꙋже́нїю ᲂу҆се́рднѡ прилѣжа́вый: ра́дꙋйсѧ, сло́вомъ бж҃їимъ дꙋ́шꙋ свою̀ пита́вый.

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Конда́къ а҃

Возбра́нный воево́до правосла́вныхъ и҆ нбⷭ҇ный застꙋ́пниче брѧ́нскїѧ землѝ, кнѧзе́й рꙋ́сскихъ ᲂу҆краше́нїе и҆ мона́хѡвъ похвало̀, ѻ҆би́тели первоверхо́вныхъ а҆пⷭ҇лъ ѡ҆снова́телю и҆ покрови́телю и҆ ѡ҆ дꙋша́хъ на́шихъ ᲂу҆се́рдный мл҃твенниче, бл҃года́рствєннаѧ пѣ̑нїѧ прино́симъ тѝ глаго́люще:

Ра́дꙋйсѧ, прпⷣбне кнѧ́же ѻ҆ле́же, брѧ́нскїй чꙋдотво́рче.

Моли́твы

Ѽ, прпⷣбне ѻ҆́тче, бл҃говѣ́рне кнѧ́же ѻ҆ле́же, ᲂу҆го́дниче хрⷭ҇то́въ ᲂу҆се́рдный, мл҃твенниче ко гдⷭ҇ꙋ те́плый, защи́тниче въ бѣда́хъ и҆ ᲂу҆тѣ́шителю въ печа́лехъ неꙋста́нный! воззрѝ, пребл҃же́нне, млⷭ҇тивѡ на гра́дъ тво́й и҆ ви́ждь ча̑да твоѧ̑, смире́ннѡ тѝ припа̑дающаѧ и҆ слꙋжи́ти тебѣ̀ хотѧ̑щаѧ. не ѿве́ргни тре́бꙋющыѧ твоеѧ̀ по́мощи, но ꙗ҆́кѡ бл҃годѣ́тель и҆ хода́тай, молѝ при́снѡ гдⷭ҇а бг҃а и҆ сп҃са на́шего і҆и҃са хрⷭ҇та̀, да бл҃гослови́тъ странꙋ̀ рѡссі́йскꙋю, въ ми́рѣ и҆ бл҃говѣ́рїи ю҆̀ сохранѧ́ѧ, гра́ды ᲂу҆множа́ѧ, достоѧ́нїе своѐ соблюда́ѧ. вознесѝ, бг҃оно́сне ѻ҆́тче на́шъ, сїѐ ма́лое моле́нїе недосто́йныхъ ра̑бъ твои́хъ влⷣцѣ хрⷭ҇тꙋ̀, да ᲂу҆тверди́тъ во ст҃ѣ́й правосла́внѣй цр҃кви живы́й дꙋ́хъ пра́выѧ вѣ́ры и҆ любвѐ, бл҃гоче́стїе непоколеби́мо, любомꙋ́дрїе хрⷭ҇топослѣ́довательно, да да́рꙋетъ па́стырємъ ре́вность попече́нїѧ ѡ҆ сп҃се́нїи люде́й, во є҆́же невѣ́рꙋющыѧ просвѣти́ти, заблꙋ́ждшыѧ наста́вити, ѿпа́дшыѧ ѡ҆брати́ти и҆ привлещѝ. и҆зрѧ́днѣе же, да всѧ̑ ча̑да цр҃кве правосла́вныѧ чи̑сты сохрани́тъ ѿ мїрски́хъ и҆скꙋше́нїй, по́хотей плотски́хъ, сꙋемꙋ́дрїѧ, сꙋевѣ́рїй и҆ наважде́нїй вра́жескихъ. є҆́й, ᲂу҆го́дниче бж҃їй, не пре́зри на́съ, молѧ́щихсѧ тебѣ̀, но помозѝ на́мъ ско́рымъ предста́тельствомъ твои́мъ, да всѧ́кихъ бѣ́дъ, напа́стей и҆ скорбе́й въ се́й жи́зни вре́меннѣй и҆збѣжа́вше, кончи́нꙋ непосты́днꙋ ѡ҆брѣте́мъ, и҆ та́кѡ на землѝ бг҃оꙋго́днѡ пожи́вше, жи́зни ра́йскїѧ на нб҃сѝ сподо́бимсѧ, и҆дѣ́же вкꙋ́пѣ съ тобо́ю просла́вимъ чл҃вѣколю́бїе и҆ щедрѡ́ты въ трⷪ҇цѣ сла́вимагѡ бг҃а, ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.