Песнь 1
Ирмос
Волно́ю морско́ю Скры́вшаго дре́вле гони́теля мучи́теля под земле́ю скры́ша спасе́нных о́троцы, но мы́, я́ко отрокови́цы, Го́сподеви пои́м, сла́вно бо просла́вися.
Тропарь
Прииди́те, все́х ве́рных благочести́вое мно́жество, духо́вно ли́к совоку́пльше, Пречи́стую Ма́терь Сло́ва пе́сньми похва́лим, зря́ще от пречи́стаго Ея́ о́браза зна́мение преди́вное показа́вшееся, е́же и воспои́м боже́ственными пе́сньми.
Тропарь
Я́коже ле́ствицу превысо́кую зри́м Тя́ дне́сь, Де́во Всенепоро́чная, е́юже к Небе́сней высоте́ прехо́дим, Тя́ бо Предста́тельницу и непобеди́мое утвержде́ние стяжа́вше, Пречи́стая, наве́т вра́жиих избавля́емся и спаса́емся, ве́рою к Тебе́ притека́ющии.
Тропарь
В рождестве́ тли́ не прие́мши, тле́ния все́х на́с, Де́во, измени́, печа́ли уставля́ющи, Ма́терним Твои́м дерзнове́нием, Богора́дованная.
Песнь 3
Ирмос
Тобо́ю, Христе́, Небеса́ утвержда́ема вся́, Сло́во Бо́жие и Си́ла, испове́дуют сла́ву неизрече́нну и вседе́тельныя руки́ Твоея́ сотворе́ние, не́сть бо пресвя́т, ра́зве Тебе́, Го́споди.
Тропарь
Умилосе́рдися на ста́до Твое́, Пречи́стая, и ми́р гра́ду Твоему́ да́руй, сопроти́вных че́люсти сокруши́ и те́х не́мощны до конца́ покажи́.
Тропарь
О́бщаго Па́стыря и Влады́ку поро́ждши, Христа́, Де́во Неискусобра́чная, Тому́ помоли́ся настоя́щаго гне́ва изба́витися на́м и проти́внаго обстоя́ния, Влады́чице.
Тропарь
Ми́лостивая, Ми́лостиваго ро́ждши Спа́са, ви́ждь озлобле́ние и воздыха́ние люде́й Твои́х: ускори́, Пречи́стая, уще́дрити ны́.
Песнь 4
Ирмос
Удиви́ся Тво́й ра́зум от мене́, услы́шавшу пресла́вная веле́ния смотре́ния Твоего́, укрепи́ся же возлюбле́нием Твоего́ схожде́ния, Ты́ бо моея́ нищеты́ не отве́рглся еси́.
Тропарь
Почита́ющий Тя́ гра́д, Пречи́стая, и по до́лгу блажа́щий, огражда́й от безбо́жных, Чи́стая, иноплеме́нник, Ты́ бо тому́ еси́, Пречи́стая, бога́тство неотъе́млемо, покро́в же и держа́ва.
Тропарь
Не мо́жет Тя́ сло́во челове́ческое, ни язы́к хвали́ти досто́йно, от Тебе́ бо без се́мене Живода́вец Бо́г воплоти́тися, Пречи́стая, изво́ли.
Тропарь
Помози́, Пречи́стая, спасти́ся пою́щим Тя́ и изба́ви от проти́вных наше́дшаго преще́ния, Богороди́тельнице.
Песнь 5
Ирмос
Сою́зом любве́ связу́еми, апо́столи, влады́чествующему все́ми себе́ Христу́ возло́жше, кра́сны но́ги очища́ху, благовеству́юще все́м ми́р.
Тропарь
Те́плая Засту́пнице к Тебе́ прибега́ющим и ненаде́ющимся наде́жда, ви́ждь озлобле́ния люди́й Твои́х и пода́ждь Твою́ по́мощь, Пречи́стая,
Тропарь
Я́же О́гнь ро́ждшая Боже́ственный, проти́вных, Де́во Пречи́стая, моли́твы Твоея́ огне́м попали́, я́ко су́щи Ма́ти Зижди́теля, Всепе́тая.
Тропарь
Чи́стая Богоневе́сто, недоуме́нныя лю́ди уще́дри Ма́терними Твои́ми моли́твами и е́же на ны́ сопроти́вных обстоя́ние претвори́ вско́ре моли́твами Твои́ми.
Песнь 6
Ирмос
Я́т бы́сть, но не удержа́н в пе́рсех ки́товых Ио́на, Тво́й бо о́браз нося́, страда́вшаго и погребе́нию да́вшагося, я́ко от черто́га, от зве́ря изы́де. Приглаша́ше же кустоди́и: храня́щии су́етная и ло́жная, ми́лость сию́ оста́вили есте́.
Тропарь
Изба́ви на́с язы́ческаго наше́ствия и гра́д Тво́й, Всепе́тая, и не преда́ждь до конца́ поги́бнути насле́дию Твоему́, Пречи́стая, но си́лою Ро́ждшагося из Тебе́, Влады́чице, проти́вных низложи́.
Тропарь
Многосогре́шших к Тебе́ не пре́зри, но приими́ мольбу́ Ма́тере Твоея́ о на́с, Ще́дре, да не похва́лятся сопроти́внии: где́ е́сть Бо́г и́х? глаго́люще, но да разуме́ют вси́, я́ко Ты́, Изба́витель, с на́ми еси́.
Тропарь
Ны́не по́мощи прии́де вре́мя, ны́не премене́нию потре́ба, Чи́стая, к Сы́ну Твоему́ и Бо́гу моли́ся, я́ко да уще́дрит согреши́вших на́с и належа́щаго гне́ва изба́вит.
Песнь 7
Ирмос
Неизрече́нное чу́до: в пещи́ Изба́вивый преподо́бныя о́троки из пла́мене во гро́бе ме́ртв, бездыха́нен полага́ется во спасе́ние на́с, пою́щих: Изба́вителю Бо́же, благослове́н еси́.
Тропарь
Вои́стинну сокро́вище честно́е гра́ду Твоему́ ико́на Твоя́, Пречи́стая, дарова́ся ю́же са́ми зря́ще, чудеси́ удивля́емся и Сы́ну Твоему́ вопие́м: благослове́н Бо́г оте́ц на́ших.
Тропарь
Я́коже иногда́ ниневи́тяны покая́ния ра́ди пощади́л еси́, Сло́ве Бо́жий, про́поведию Ио́ны проро́ка, та́кожде и зде́ показа́ о́бразом Пречи́стыя Твоея́ Ма́тере, Христе́, вопию́щим: благослове́н Бо́г оте́ц на́ших.
Тропарь
Хра́м Тя́ Бо́жий, Влады́чице, ве́дуще, во святе́м хра́ме Твое́м ру́це нечи́стыя дви́жем на моли́тву: ви́ждь озлобле́ние на́ше и пода́ждь Твою́ по́мощь, Богоро́дице.
Песнь 8
Ирмос
Ужасни́ся, боя́йся, Не́бо, и да подви́жатся основа́ния земли́: се́ бо в мертвеце́х вменя́ется в вы́шних Живы́й и во Гро́б ма́л странноприе́млется. Его́же, о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Тропарь
Собезнача́льнаго Сло́ва Отцу́, Де́во Пречи́стая, нетле́нно родила́ еси́, Того́ моли́, Богороди́тельнице, от сопроти́вных напа́стей спасти́ся пою́щим: де́ти, благослови́те, свяще́нницы, по́йте и превозноси́те Его́ во ве́ки.
Тропарь
Его́же пропове́даша на Престо́ле превысо́це Иса́ия, Сего́ в ложесна́х, Де́во, вмести́ла еси́ и нетле́нно породила́ еси́, Того́ моли́ спасти́ся гра́ду Твоему́, пою́щу: де́ти, благослови́те, свяще́нницы, по́йте и превозноси́те Его́ во ве́ки.
Тропарь
Еди́на су́ща Блага́я, Преблага́го Сло́ва умоли́ приле́жно, настоя́щаго гне́ва гра́ду Твоему́ изба́витися, несумне́нною ве́рою Сы́ну Твоему́ зову́щим: де́ти, благослови́те, свяще́нницы, по́йте и превозноси́те Его́ во ве́ки.
Песнь 9
Ирмос
Стра́нствия Влады́чня и безсме́ртныя трапе́зы на го́рнем ме́сте высо́кими умы́, ве́рнии, прииди́те, наслади́мся, возше́дша Сло́ва, от Сло́ва научи́вшеся, Его́же велича́ем.
Тропарь
О́ком милосе́рдым Твои́м свы́ше при́зри на гра́д и лю́ди Твоя́, Пречи́стая, ины́я бо по́мощи не и́мамы, то́кмо Тебе́, Всенепоро́чная, да Тя́ вси́, я́ко Ма́терь Бо́жию, непреста́нно велича́ем.
Тропарь
Еди́на ро́ждши Сло́во воплоще́нно, Де́во Всепе́тая, приснотеку́щий исто́чник исцеле́ний излива́еши ве́рою притека́ющим ко хра́му Твоему́, Пречи́стая.
Тропарь
Раби́ Твои́, вопие́м Ти́, Пречи́стая Ма́ти Бо́жия: обы́чныя ми́лости Твоя́ на гра́д и лю́ди ми́лостивно покажи́, сопроти́вных обстоя́ний на́с измени́, да Тя́ вси́ непреста́нно велича́ем.