Акафист святителю Герману, архиепископу Казанскому и Свияжскому чудотворцу

А́нгелом уподобля́я непоро́чным житие́м святы́я Твоя́, Го́споди, отве́рзи ми́ у́м и язы́к восхвали́ти богоуго́дную жи́знь и преподо́бныя дея́ния святи́теля Твоего́ Ге́рмана, да зове́м ему́, взе́мшему от ю́ности благи́й яре́м Тво́й на ра́мо свое́:

Ра́дуйся, благочести́ваго ко́рене благочести́вая о́трасле; ра́дуйся, от чре́ва ма́терня избра́нный служи́ти в преподо́бии и пра́вде.

Ра́дуйся, от о́троческих ле́т кро́тким и благи́м нра́вом себе́ украси́вый; ра́дуйся, от млада́го во́зраста в посте́ и моли́тве па́че во́зраста преуспе́вый.

Ра́дуйся, с уче́нием кни́жным па́че стра́ху Бо́жию себе́ обуча́вый; ра́дуйся, в ю́ных ле́тах кре́пким подви́жником воздержа́ния себе́ яви́вый.

Ра́дуйся, ма́нием Боже́ственным издале́ча к вели́кому твоему́ избра́нию ведо́мый; ра́дуйся, те́мже вседе́тельным ма́нием испе́рва, я́ко зе́ница о́ка блюдо́мый.

Ра́дуйся, святи́телю Ге́рмане, вели́кий чудотво́рче.

Ра́зумом просвеща́емый свы́ше, и жела́нием влеко́мый к го́рней жи́зни, ты́ вку́пе с богому́дрым роди́телем твои́м, па́че всего́ тща́ся о угожде́нии Бо́гу, отве́ргши кра́сная ми́ра, те́сный и́ноческий пу́ть избра́л еси́. Восхваля́я твое́ благо́е изволе́ние, взыва́ем тебе́:

Ра́дуйся, вне́ мирска́го мяте́жа от мла́дости рабо́тати Бо́гу предложи́вый; ра́дуйся, ю́ность твою́, я́ко же́ртву непоро́чну, отверже́нием от ми́ра Бо́гу принесы́й.

Ра́дуйся, в жи́зни по Бо́зе под духо́вным игу́менством бу́дущаго святи́теля Гу́рия преспева́вый; ра́дуйся, ему́же вку́пе в вели́ком па́стырском служе́нии в споспе́шника и прее́мника благода́тию уготовля́выйся.

Ра́дуйся, в то́йжде (Волокола́мской) оби́тели и са́м в ме́ру духо́внаго вожденача́льства дости́гнувый; ра́дуйся, пе́рвым тща́выйся бы́ти в послуша́нии, а́ще и после́дним во и́ноцех себе́ именова́вый.

Ра́дуйся, я́ко ели́ко смиря́л еси́ себе́, толи́ко па́че благода́тию к возвыше́нию бы́л еси́ уготовля́емь; ра́дуйся, и смире́нным возвраще́нием от нача́льства на пре́жнее послуша́ние но́выя духо́вныя си́лы для после́дующаго служе́ния твоего́ стяжа́вый.

Ра́дуйся, святи́телю Ге́рмане, вели́кий чудотво́рче.

Име́я благо́е помышле́ние ца́рь, новоприобре́тенное си́лою кре́стною ца́рство Каза́нское, па́че всего́ устро́ити во еди́нстве благоче́стия, да еди́ным ду́хом ве́ры приобщи́тся оно́ к вели́кой держа́ве ца́рства Росси́йскаго, а́ки ча́сть к своему́ те́лу, при первосвяти́теле Гу́рии избра́ тя́ собо́ром Це́ркви в сослуже́бника ему́. О се́м ублажа́я тя́, присноблаже́нне, глаго́лем:

Ра́дуйся, собо́рным гла́сом на де́ло апо́стольское досто́йно избра́нный; ра́дуйся, усе́рдный де́лателю Христо́в в новопросвеще́нней стране́ магомета́нскаго заблужде́ния.

Ра́дуйся, я́ко благопло́дный са́д, святу́ю оби́тель во гра́де Свия́жске насади́вый; ра́дуйся, хра́м во сла́ву Успе́ния Богома́тери, а́ки неувяда́емый трудо́в твои́х па́мятник в не́й сооруди́вый.

Ра́дуйся, ту́ю пе́рвее присноцвету́щею ле́потою подвиго́в твои́х украси́вый; ра́дуйся, в богоспаса́емом бра́тстве новонасажде́нной оби́тели твое́й, па́че всего́ плоды́ послуша́ния и стра́ха Бо́жия возраща́вый.

Ра́дуйся, собира́яй слове́сных ове́ц в слове́сный дво́р, все́х и ра́ди спаси́тельнаго жи́тельства, и ра́ди наставле́ния приходи́вших к тебе́, любе́зно приима́вый; ра́дуйся, сла́вою доброде́телей твои́х мно́гих из мра́ка магомета́нскаго нече́стия во све́т и́стиннаго благоче́стия обраща́вый.

Ра́дуйся, святи́телю Ге́рмане, вели́кий чудотво́рче.

Слы́шав богопра́вимый собо́р вели́кия Росси́йския Це́ркви о блаже́нней кончи́не пе́рваго святи́теля вели́кия па́ствы Каза́нския, единогла́сно суди́, я́ко то́кмо ты́ избра́нный Бо́жий досто́ин возсе́сти на седа́лищи блаже́ннаго Гу́рия. Те́мже воззва́нный в ца́рствующий гра́д, а́ще и отрица́лся еси́ по обы́чному тебе́ смире́нию от са́на святи́тельскаго, оба́че повину́яся собо́рному определе́нию, восприя́л еси́ святи́тельский же́зл па́ствы Каза́нския. Те́мже и мы́ в весе́лии приве́тствуем тя́:

Ра́дуйся, благи́й ра́бе Го́спода, ве́рностию в ме́ньшем соде́лавыйся досто́йным бо́льшаго служе́ния; ра́дуйся, свети́льниче, на све́щнице во спасе́ние мно́гим поста́вленный.

Ра́дуйся, наста́вниче, и сло́вом, а па́че приме́ром жи́зни твоея́ наставля́вый ве́рных и неве́рных на пу́ть Христо́в; ра́дуйся, па́стырю до́брый, неусы́пным попече́нием полага́вый ду́шу твою́ о спасе́нии ду́ш пасо́мых.

Ра́дуйся, му́дрый приста́вниче до́ма Госпо́дня, все́м по коего́ждо потре́бе ну́жная устроя́вый; ра́дуйся, ве́рный раздая́телю бла́г Го́спода твоего́, по́мощь бе́дствующим, утеше́ние скорбя́щим, неоску́дно подава́вый.

Ра́дуйся, в благогове́йнем служе́нии твое́м, и се́рдце и преподо́бныя ру́це твоя́ о па́стве ко Го́споду воздева́вый; ра́дуйся, благоприя́тными моли́твами твои́ми ми́р, ми́лость и благода́ть Бо́жию на новопросвеще́нныя лю́ди низводи́вый.

Ра́дуйся, святи́телю Ге́рмане, вели́кий чудотво́рче.

Ви́дев благове́рный ца́рь богоуго́дное твое́ житие́, святи́телю, соизво́ли на вы́шший све́щник Всеросси́йския митропо́лии поста́вити тя́. Ты́ же, блаже́нне, по смиренному́дрию твоему́, явля́я себе́ недосто́йна бы́ти такова́го са́на, досто́йнейшаго поста́вити умоля́л еси́ держа́внаго. Оба́че повину́яся зва́нию, уготовля́лся испо́лнити во́лю царе́ву, но положи́л еси́ в се́рдце пе́рвее изрещи́ царю́ сло́во пра́вды, я́же пра́вда а́ки зло́ вмени́ся, и запя́ тя́ на пути́ вруча́емаго тебе́ первопресто́лия. Сего́ ра́ди сугу́бо ублажа́ем тя́:

Ра́дуйся, и на высоте́ святи́тельства смире́нная о себе́ му́дрствовавый; ра́дуйся, на первопресто́лии Росси́йския Це́ркве па́че бре́мя, не́же че́сть себе́ ви́девый.

Ра́дуйся, я́ко во е́же бо́льшим послужи́ти во спасе́ние, гото́в бы́л еси́ и вы́шшее служе́ние прия́ти; ра́дуйся, пре́жде восше́ствия на высоту́ престо́ла, во смире́нии сло́во царю́ провеща́вый.

Ра́дуйся, пра́вды ра́ди гоне́ние и изгна́ние от предлежа́щия че́сти прия́вый; ра́дуйся, сло́во пра́во пред царе́м, па́че прия́тия вре́менныя сла́вы предсуди́вый.

Ра́дуйся, ве́рою и пра́вдою служи́ти бла́гу Це́ркви и ца́рства, необинове́нно на первосвяти́тельском престо́ле помышля́вый; ра́дуйся, изгна́нием пра́вды ра́ди, блаже́нство небе́сное себе́ угото́вивый.

Ра́дуйся, святи́телю Ге́рмане, вели́кий чудотво́рче.

Возсия́, святи́телю, в но́вом све́те правота́ ду́ха твоего́, егда́ непови́нный святи́тель Фили́пп непра́ведно бы́л суди́м и осужде́н, ты́ еди́н из святи́телей воздви́гл еси́ гла́с в защи́ту страда́льца, благодерзнове́нно веща́я пред царе́м, я́ко блаже́нный о́н от ю́ности ни суда́ ло́жна, ни лицеприя́тия не ве́де. Ублажа́я праволю́бие твое́, веща́ем тебе́:

Ра́дуйся, при а́нгельской кро́тости твое́й, кре́пкий ревни́телю благоче́стия, егда́ зре́л то́е небрего́мым от нече́стия; ра́дуйся, побо́рниче угнета́емой правоты́.

Ра́дуйся, безтре́петный защи́тниче непови́нности; ра́дуйся, ре́вностию твое́ю по и́стине, дре́вним святы́м ревни́телям уподо́бивыйся.

Ра́дуйся, благодерзнове́нием Гро́знаго удиви́вый, но смиренному́дрием того́ на кро́тость премени́вый; ра́дуйся, приме́р любви́ к правоте́ и после́дующим родо́м оста́вивый.

Ра́дуйся, при за́паде жи́зни твое́й, пла́менныя лучи́ све́тлаго ду́ха твоего́ в споборе́нии и́стине показа́вый; ра́дуйся, праволюби́вым защище́нием правоты́, тече́ние пра́ведней жи́зни твое́й увенча́вый.

Ра́дуйся, святи́телю Ге́рмане, вели́кий чудотво́рче.

Но́ваго тя́ ревни́теля по благоче́стии и побо́рника позна́ гро́зный ца́рь и ве́сь сове́т его́, егда́ веща́л еси́ царю́ в па́стырской кро́тости словеса́ правоты́ и стра́ха Бо́жия, и на суде́ святи́теля глаго́лал еси́ пред царе́м во огражде́ние непови́ннаго. Те́мже вне́ па́ствы твоея́, в ца́рствующем гра́де пребыва́я в терпе́нии, та́мо и блаже́нную жи́знь твою́, от посеще́ния Бо́жия гра́да, смертоно́сным посеще́нием сконча́л еси́. Ублажа́я смире́нное в ду́се, но высо́кое в де́лех тече́ние жи́зни твое́й, и смире́нную кончи́ну твою́, такова́я тебе́ прино́сим:

Ра́дуйся, ревни́телю смиренному́дрия, от ю́ности пу́ть смире́ния избра́вый; ра́дуйся, и на свяще́нныя степе́ни зва́ние и избра́ние с смире́нным уклоне́нием приима́вый.

Ра́дуйся, жи́знь твою́ при боговоди́мом ше́ствии, я́коже в смире́нии соверша́вый, та́коже в смире́нии и сконча́вый; ра́дуйся, при кончи́не твое́й очисти́тельною же́ртвою прегреше́ний от посеще́ния Бо́жия уме́рших бы́вый.

Ра́дуйся, я́коже не иска́вый сла́вы челове́ческия в жи́зни, та́ко смире́нное погребе́ние восприя́вый и в сме́рти; ра́дуйся, я́ко вои́стинну стра́нник, вы́ну иска́вый небе́снаго гра́да, в ца́рствующем гра́де из до́льней к го́рней жи́зни преше́дый.

Ра́дуйся, я́ко, иде́же во смире́нии сно́м сме́ртным еси́ опочи́л, та́можде Госпо́дь пресла́вно тя́ чудоде́йствием яви́л; ра́дуйся, я́ко не даде́ Госпо́дь ви́дети тебе́, преподо́бному Своему́, истле́ния.

Ра́дуйся, святи́телю Ге́рмане, вели́кий чудотво́рче.

Вседу́шно, от всея́ любве́, и всенаро́дно, вся́каго чи́на и зва́ния, мона́си и мирсти́и, гра́да Свия́жска жи́телие вожделе́ша име́ти мо́щи твоя́, святи́телю, в созда́нней тобо́ю оби́тели, в ме́сте сла́вы благода́ти, де́йствовавшия тобо́ю в духо́вном созида́нии и́ночества, и назида́нии все́х приходя́щих к тебе́ ра́ди душе́вныя по́льзы. Те́мже испроси́вше соизволе́ние благочести́вейшаго царя́, с неизглаго́ланною ра́достию пренесо́ша святы́я мо́щи твоя́, в созда́нную тобо́ю оби́тель. И мы́, в ра́дости и́х, ве́село приве́тствуем тя́:

Ра́дуйся, я́ко по смире́нней кончи́не, просла́вленным тобо́ю Го́сподом просла́влен еси́; ра́дуйся, я́ко для прия́тия святы́х моще́й твои́х, в благогове́йно срета́вший тя́ гра́д сподви́гся и са́м архипа́стырь, святи́тель Гермоге́н.

Ра́дуйся, я́ко то́йже вели́кий святи́тель, со все́м освяще́нным собо́ром, подоба́ющее твое́й святы́не надгро́бное пе́ние соверши́; ра́дуйся, я́ко, при внесе́нии моще́й твои́х в созда́нный тобо́ю хра́м Богоро́дицы, ди́вное благоуха́ние преиспо́лни хра́м и оби́тель.

Ра́дуйся, я́ко к о́бщей благогове́йней ра́дости, святы́я мо́щи твоя́ це́лы и нетле́нны обрето́шася; ра́дуйся, я́ко многоразли́чными исцеле́ниями зна́меновася сла́ва святы́х моще́й твои́х.

Ра́дуйся, я́ко те́ми же чудоде́йствиями засвиде́тельствовася, я́ко обре́л еси́ благода́ть у Го́спода; ра́дуйся, я́ко и Симби́рстии гра́ждане вожделе́ша име́ти ча́сть моще́й твои́х, во освяще́ние и благода́тную по́мощь.

Ра́дуйся, святи́телю Ге́рмане, вели́кий чудотво́рче.

Вети́йство челове́ческое не мо́жет изрещи́ благода́ти нетле́ния моще́й твои́х, ни пове́дати си́лы чудоде́йствия о́ных. Мы́ же, та́инство ве́рою прие́млюще, благоче́стно веща́ем:

Ра́дуйся, чистото́ю ду́ха от вся́каго бре́ния отреши́выйся; ра́дуйся, посто́м и воздержа́нием, я́ко благово́нною сми́рною, те́ло твое́ тле́ния неприча́стно сотвори́вый.

Ра́дуйся, непреста́нною моли́твою, я́ко небе́сным светоли́тием, то́ежде благода́тныя си́лы испо́лнивый; ра́дуйся, все́льшимся в тя́ Животворя́щим Ду́хом по сме́рти чудоде́йствуяй.

Ра́дуйся, сия́вшим в тебе́ све́том Христо́вым, теле́сныя и душе́вныя о́чи просвеща́яй; ра́дуйся, богодарова́нною тебе́ си́лою, нечи́стыя ду́хи от одержи́мых и́ми отгоня́яй.

Ра́дуйся, в прибега́ющих к тебе́ стра́сти душе́вныя и теле́сныя врачу́юяй; ра́дуйся, я́ко бо́дренно соде́ловавый спасе́ние твое́, и все́х усе́рдно притека́ющих к тебе́ спасе́нию споспе́шествуяй.

Ра́дуйся, святи́телю Ге́рмане, вели́кий чудотво́рче.

Стена́ и огражде́ние на́м святы́я мо́щи твоя́, присноблаже́нне, прибега́я бо с ве́рою под цельбоно́сную се́нь о́ных, никто́же моли́твами твои́ми, из хра́ма твоего́ без благода́тнаго утеше́ния отхо́дит. В не́мже бо са́м искуше́н бы́л еси́, в се́м и искуша́емым испра́шиваеши по́мощи. Предстоя́ще у́бо с любо́вию живоприе́мному гро́бу твоему́, взыва́ем:

Ра́дуйся, при́сный о на́с к Бо́гу хода́таю; ра́дуйся, бе́дствующих предста́телю.

Ра́дуйся, печа́льных уте́шителю, ра́дуйся, нужда́ющихся помо́щниче; ра́дуйся, гони́мых прибе́жище.

Ра́дуйся, обурева́емых злоключе́нии ти́хое приста́нище; ра́дуйся, во мра́це недоуме́ния су́щих богосве́тлое вразумле́ние.

Ра́дуйся, оби́димых засту́пниче; ра́дуйся, изнемога́ющих ду́хом богому́дрое подкрепле́ние.

Ра́дуйся, святи́телю Ге́рмане, вели́кий чудотво́рче.

Светоза́рный свети́льник иму́ще святы́я мо́щи твоя́, пу́ть пра́вый на́м освеща́ющий, и грехо́вный мра́к разгоня́ющий, блажи́м тя́ во оби́телех го́рних веселя́щася, и от неистощи́маго исто́чника благода́ти Бо́жией, блага́я и поле́зная по коего́ждо потре́бе на́м испра́шивающа:

Ра́дуйся, за земны́я по́двиги твои́, пренебе́сными бла́гами от Подвигополо́жника обдарова́нный; ра́дуйся, за нищету́ духо́вную Ца́рство Небе́сное восприе́мый.

Ра́дуйся, за воздыха́ния и сле́зы непреходя́щим весе́лием утеша́яйся; ра́дуйся, за кро́тость твою́ зе́млю ве́чнаго облада́ния насле́дивый.

Ра́дуйся, за а́лчбу и жа́жду от неистощи́маго пото́ка сла́дости насыща́яйся; ра́дуйся, за милосе́рдие твое́, ми́лость от Бо́га получи́вый.

Ра́дуйся, за чистоту́ твою́, лицезре́нием Бо́жиим наслажда́яйся; ра́дуйся, за гоне́ние пра́вды ра́ди, на ме́сте зла́чне преми́рнаго поко́я вселя́яйся.

Ра́дуйся, святи́телю Ге́рмане, вели́кий чудотво́рче.

Пою́ще твое́ христоподража́тельное житие́, богому́дрыя дея́ния, блаже́нную кончи́ну, пресла́вныя по кончи́не чудоде́йствия, и явле́ннейшия до́блести твоя́, я́ко све́тлыя лучи́ соединя́юще вку́пе, от со́бственных твои́х добро́т прино́сим тебе́ хвале́ние таково́е:

Ра́дуйся, от ю́ности твое́й кре́пким по́стником и неосла́бным подви́жником себе́ яви́вый; ра́дуйся, по свяще́нным степе́нем возводи́мый благода́тию, па́че же восхожде́нием в се́рдце, по вну́тренней свя́тости смиренному́дренно возвыша́выйся.

Ра́дуйся, до́бльственный блаже́ннаго Гу́рия в духо́вном созида́нии па́ствы Каза́нския сотру́дниче, ра́дуйся, того́жде досто́йный в пастыренача́льстве прее́мниче; ра́дуйся, име́вый зва́ние свети́ти и на высоте́ Всеросси́йския митропо́лии.

Ра́дуйся, испове́дниче и́стины пред царе́м и защи́тниче страда́льческия правоты́ святи́теля; ра́дуйся, на ме́сте смире́ннаго поко́ища чудоде́йственною благода́тию проявле́нный.

Ра́дуйся, пресла́вно из ца́рствующаго гра́да нетле́нными моща́ми твои́ми во оби́тель твою́ пренесе́нный; ра́дуйся, основа́нныя тобо́ю оби́тели свяще́нное огражде́ние и украше́ние.

Ра́дуйся, я́ко в ско́рбех утеше́ние, в боле́знех исцеле́ние, мо́щи твоя́ на́м дарова́шася; ра́дуйся, благоприя́тный о на́с до́льних и пе́рстных, вку́пе смире́нных и гре́шных, в го́рних к Бо́гу предста́телю, и немо́лчный моли́твенниче.

Ра́дуйся, святи́телю Ге́рмане, вели́кий чудотво́рче.

А҆́гг҃лѡмъ ᲂу҆подоблѧ́ѧ непоро́чнымъ житїе́мъ ст҃ы̑ѧ твоѧ̑ гдⷭ҇и, ѿве́рзи мѝ ᲂу҆́мъ и҆ ѧ҆зы́къ, восхвали́ти бг҃оꙋго́днꙋю жи́знь, и҆ прпⷣбныѧ дѣѧ̑нїѧ ст҃и́телѧ твоегѡ̀ ге́рмана, да зове́мъ є҆мꙋ̀, взе́мшемꙋ ѿ ю҆́ности бл҃гі́й ꙗ҆ре́мъ тво́й на ра́мо своѐ:

Ра́дꙋйсѧ, бл҃гочести́вагѡ ко́рене бл҃гочести́ваѧ ѿрасле: ра́дꙋйсѧ, ѿ чре́ва ма́тернѧ и҆збра́нный слꙋжи́ти въ прпⷣбїи и҆ пра́вдѣ.

Ра́дꙋйсѧ, ѿ ѻ҆́троческихъ лѣ́тъ кро́ткимъ и҆ бл҃ги̑мъ нра́вомъ себѐ ᲂу҆краси́вый: ра́дꙋйсѧ, ѿ млада́гѡ во́зраста въ постѣ̀ и҆ моли́твѣ па́че во́зраста преꙋспѣ́вый.

Ра́дꙋйсѧ, съ ᲂу҆че́нїемъ кни́жнымъ па́че стра́хꙋ бж҃їю себѐ ѡ҆бꙋча́вый: ра́дꙋйсѧ, въ ю҆́ныхъ лѣ́тахъ крѣ́пкимъ подви́жникѡмъ воздержа́нїѧ себѐ ꙗ҆ви́вый.

Ра́дꙋйсѧ, ма́нїемъ бжⷭ҇твеннымъ и҆здале́ча къ вели́комꙋ твоемꙋ̀ и҆збра́нїю ведо́мый: ра́дꙋйсѧ, тѣ́мже вседѣ́тельнымъ ма́нїемъ, и҆спе́рва ꙗ҆́кѡ зѣ́ница ѻ҆́ка блюдо́мый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Ра́зꙋмомъ просвѣща́емый свы́ше, и҆ жела́нїемъ влеко́мый къ го́рнѣй жи́зни, ты̀ вкꙋ́пѣ съ бг҃омꙋ̑дрымъ роди́телемъ твои́мъ, па́че всегѡ̀ тща́сѧ ѡ҆ ᲂу҆гожде́нїи бг҃ꙋ, ѿве́ргши кра́снаѧ мі́ра, тѣ́сный и҆́ноческїй пꙋ́ть и҆збра́лъ є҆сѝ. восхвалѧ́ѧ твоѐ бл҃го́е и҆зволе́нїе, взыва́емъ тебѣ̀:

Ра́дꙋйсѧ, внѣ̀ мїрска́гѡ мѧте́жа, ѿ мла́дости рабо́тати бг҃ꙋ предложи́вый: ра́дꙋйсѧ, ю҆́ность твою̀, ꙗ҆́кѡ же́ртвꙋ непоро́чнꙋ, ѿверже́нїемъ ѿ мі́ра бг҃ꙋ принесы́й.

Ра́дꙋйсѧ, въ жи́зни по бз҃ѣ под̾ дꙋхо́внымъ и҆гꙋ́менствомъ бꙋ́дꙋщагѡ ст҃и́телѧ гꙋ́рїа преспѣва́вый: ра́дꙋйсѧ, є҆мꙋ́же вкꙋ́пѣ въ вели́комъ па́стырскомъ слꙋже́нїи въ споспѣ́шника и҆ прее́мника бл҃года́тїю ᲂу҆готовлѧ́выйсѧ.

Ра́дꙋйсѧ, въ то́йжде (волокола́мской ѡ҆би́тели) и҆ са́мъ въ мѣ́рꙋ дꙋхо́внагѡ вожденача́льства дости́гнꙋвый: ра́дꙋйсѧ, пе́рвымъ тща́выйсѧ бы́ти въ послꙋша́нїи, а҆́ще и҆ послѣ́днимъ во и҆́ноцѣхъ себѐ и҆менова́вый.

Ра́дꙋйсѧ, ꙗ҆́кѡ є҆ли́кѡ смирѧ́лъ є҆сѝ себѐ, толи́ко па́че бл҃года́тїю къ возвыше́нїю бы́лъ є҆сѝ ᲂу҆готовлѧ́емь: ра́дꙋйсѧ, и҆ смире́ннымъ возвраще́нїемъ ѿ нача́льства на пре́жнее послꙋша́нїе, нѡ́выѧ дꙋхѡ́вныѧ си̑лы длѧ послѣ́дꙋющагѡ слꙋже́нїѧ твоегѡ̀ стѧжа́вый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

И҆мѣ́ѧ бл҃го́е помышле́нїе ца́рь, новопрїѡбрѣ́тенное си́лою крⷭ҇тною ца́рство каза́нское, па́че всегѡ̀ ᲂу҆стро́ити во є҆ди́нствѣ бл҃гоче́стїѧ, да є҆ди́нымъ дꙋ́хомъ вѣ́ры прїѡбщи́тсѧ ѻ҆но̀ къ вели́кой держа́вѣ ца́рства рѡссі́йскагѡ, а҆́ки ча́сть къ своемꙋ̀ тѣ́лꙋ, при первост҃и́теле гꙋ́рїи и҆збра̀ тѧ̀ собо́ромъ цр҃кви въ сослꙋже́бника є҆мꙋ̀, ѡ҆ се́мъ ᲂу҆блажа́ѧ тѧ̀, приснобл҃же́нне, глаго́лемъ:

Ра́дꙋйсѧ, собо́рнымъ гла́сомъ на дѣ́ло а҆пⷭ҇льское досто́йнѡ и҆збра́нный: ра́дꙋйсѧ, ᲂу҆се́рдный дѣ́лателю хрⷭ҇то́въ въ новопросвѣще́ннѣй странѣ̀ магомета́нскагѡ заблꙋжде́нїѧ.

Ра́дꙋйсѧ, ꙗ҆́кѡ бл҃гопло́дный са́дъ, ст҃ꙋ́ю ѡ҆би́тель во гра́дѣ свїѧ́жскѣ насади́вый: ра́дꙋйсѧ, хра́мъ во сла́вꙋ ᲂу҆спе́нїѧ бг҃омт҃ри, а҆́ки неꙋвѧда́емый трꙋдѡ́въ твои́хъ па́мѧтникъ въ не́й соѡрꙋди́вый.

Ра́дꙋйсѧ, тꙋ́ю пе́рвѣе присноцвѣтꙋ́щею лѣ́потою подвигѡ́въ твои́хъ ᲂу҆краси́вый: ра́дꙋйсѧ, въ бг҃осп҃са́емомъ бра́тствѣ новонасажде́нной ѡ҆би́тели твое́й, па́че всегѡ̀ плоды̀ послꙋша́нїѧ и҆ стра́ха бж҃їѧ возраща́вый.

Ра́дꙋйсѧ, собира́ѧй слове́сныхъ ѻ҆ве́цъ въ слове́сный дво́ръ всѣ́хъ, и҆ ра́ди спаси́тельнаго жи́тельства, и҆ ра́ди наставле́нїѧ приходи́вшихъ къ тебѣ̀, любе́знѡ прїима́вый.

Ра́дꙋйсѧ, сла́вою добродѣ́телей твои́хъ, мно́гихъ и҆з̾ мра́ка магомета́нскагѡ нечє́стїѧ во свѣ́тъ и҆́стиннагѡ бл҃гоче́стїѧ ѡ҆браща́вый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Слы́шавъ бг҃опра́вимый собо́ръ вели́кїѧ рѡссі́йскїѧ цр҃кви, ѡ҆ блаже́ннѣй кончи́нѣ пе́рвагѡ ст҃и́телѧ вели́кїѧ па́ствы каза́нскїѧ, є҆диногла́снѡ сꙋдѝ, ꙗ҆́кѡ то́кмѡ ты̀ и҆збра́нный бж҃їй досто́инъ возсѣ́сти на сѣда́лищи бл҃же́ннагѡ гꙋ́рїа, тѣ́мже воззва́нный въ ца́рствꙋющїй гра́дъ, а҆́ще и҆ ѿрица́лсѧ є҆сѝ по ѻ҆бы́чномꙋ тебѣ̀ смире́нїю ѿ са́на ст҃и́тельскагѡ, ѻ҆ба́че повинꙋ́ѧсѧ собо́рномꙋ ѡ҆предѣле́нїю, воспрїѧ́лъ є҆сѝ ст҃и́тельскїй же́злъ па́ствы каза́нскїѧ, тѣ́мже и҆ мы̀ въ весе́лїи привѣ́тствꙋемъ тѧ̀:

Ра́дꙋйсѧ, бл҃гі́й ра́бе гдⷭ҇а, вѣ́рностїю въ ме́ньшемъ содѣ́лавыйсѧ досто́йнымъ бо́льшагѡ слꙋже́нїѧ: ра́дꙋйсѧ, свѣти́льниче, на свѣ́щницѣ во сп҃се́нїе мнѡ́гимъ поста́вленный.

Ра́дꙋйсѧ, наста́вниче, и҆ сло́вомъ, а҆ па́че примѣ́ромъ жи́зни твоеѧ̀ наставлѧ́вый вѣ́рныхъ и҆ невѣ́рныхъ на пꙋ́ть хрⷭ҇то́въ: ра́дꙋйсѧ, па́стырю до́брый, неꙋсы́пнымъ попече́нїемъ полага́вый дꙋ́шꙋ твою̀ ѡ҆ сп҃се́нїи дꙋ́шъ пасо́мыхъ.

Ра́дꙋйсѧ, мꙋ́дрый приста́вниче до́ма гдⷭ҇нѧ всѣ̑мъ, по коегѡ́ждо потре́бѣ нꙋ́жнаѧ ᲂу҆строѧ́вый: ра́дꙋйсѧ, вѣ́рный раздаѧ́телю бла́гъ гдⷭ҇а твоегѡ̀, по́мощь бѣ́дствꙋющымъ, ᲂу҆тѣше́нїе скорбѧ́щымъ, неѡскꙋ́днѡ подава́вый.

Ра́дꙋйсѧ, въ бл҃гоговѣ́йнѣмъ слꙋже́нїи твое́мъ, и҆ се́рдце и҆ преподѡ́бныѧ рꙋ́цѣ твоѧ̑ ѡ҆ па́ствѣ ко гдⷭ҇ꙋ воздѣва́вый: ра́дꙋйсѧ, бл҃гопрїѧ́тными мл҃твами твои́ми ми́ръ, ми́лость и҆ бл҃года́ть бж҃їю на новопросвѣщє́нныѧ лю́ди низводи́вый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Ви́дѣвъ бл҃говѣ́рный ца́рь бг҃оꙋго́дное твоѐ житїѐ, ст҃и́телю, соизво́ли на вы́шшїй свѣ́щникъ всерѡссі́йскїѧ митропо́лїи поста́вити тѧ̀: ты̀ же, бл҃же́нне, по смиренномꙋ́дрїю твоемꙋ̀, ꙗ҆влѧ́ѧ себѐ недосто́йна бы́ти такова́гѡ са́на, досто́йнѣйшаго поста́вити ᲂу҆молѧ́лъ є҆сѝ держа́внаго, ѻ҆ба́че повинꙋ́ѧсѧ зва́нїю, ᲂу҆готовлѧ́лсѧ и҆спо́лнити во́лю царе́вꙋ; но положи́лъ є҆сѝ въ се́рдцѣ пе́рвѣе и҆зрещѝ царю̀ сло́во пра́вды, ꙗ҆́же пра́вда а҆́ки ѕло̀ вмѣни́сѧ, и҆ запѧ̀ тѧ̀ на пꙋтѝ врꙋча́емагѡ тебѣ̀ первопресто́лїѧ. сегѡ̀ ра́ди сꙋгꙋ́бо ᲂу҆бл҃жа́емъ тѧ̀:

Ра́дꙋйсѧ, и҆ на высотѣ̀ ст҃и́тельства смирє́ннаѧ ѡ҆ себѣ̀ мꙋ́дрствовавый: ра́дꙋйсѧ, на первопресто́лїи рѡссі́йскїѧ цр҃кве па́че бре́мѧ, не́же че́сть себѣ̀ ви́дѣвый.

Ра́дꙋйсѧ, ꙗ҆́кѡ во є҆́же бо́льшымъ послꙋжи́ти во сп҃се́нїе, гото́въ бы́лъ є҆сѝ и҆ вы́шшее слꙋже́нїе прїѧ́ти: ра́дꙋйсѧ, пре́жде восше́ствїѧ на высотꙋ̀ престо́ла, во смире́нїи сло́во царю̀ провѣща́вый.

Ра́дꙋйсѧ, пра́вды ра́ди гоне́нїе и҆ и҆згна́нїе ѿ предлежа́щїѧ че́сти прїѧ́вый: ра́дꙋйсѧ, сло́во пра́во пред̾ царе́мъ, па́че прїѧ́тїѧ вре́менныѧ сла́вы предсꙋди́вый.

Ра́дꙋйсѧ, вѣ́рою и҆ пра́вдою слꙋжи́ти бла́гꙋ цр҃кви и҆ ца́рства, неѡбинове́ннѡ на первост҃и́тельскомъ престо́лѣ помышлѧ́вый: ра́дꙋйсѧ, и҆згна́нїемъ пра́вды ра́ди, бл҃же́нство нбⷭ҇ное себѣ̀ ᲂу҆гото́вивый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Возсїѧ̀, ст҃и́телю, въ но́вомъ свѣ́тѣ правота̀ дꙋ́ха твоегѡ̀, є҆гда̀ непови́нный ст҃и́тель фїлі́ппъ непра́вѣднѡ бы́лъ сꙋди́мь и҆ ѡ҆сꙋжде́нъ, ты̀ є҆ди́нъ и҆з̾ ст҃и́телей воздви́глъ є҆сѝ гла́съ въ защи́тꙋ страда́льца, бл҃годерзнове́ннѡ вѣща́ѧ пред̾ царе́мъ: ꙗ҆́кѡ бл҃же́нный ѻ҆́нъ ѿ ю҆́ности ни сꙋда̀ ло́жна, ни лицепрїѧ́тїѧ не вѣ́дѣ. ᲂу҆блажа́ѧ праволю́бїе твоѐ вѣща́емъ тебѣ̀:

Ра́дꙋйсѧ, при а҆́гг҃льской кро́тости твое́й, крѣ́пкїй ревни́телю бл҃гоче́стїѧ, є҆гда̀ зрѣ́лъ то́е небрего́мымъ ѿ нече́стїѧ: ра́дꙋйсѧ, побо́рниче ᲂу҆гнета́емой правоты̀.

Ра́дꙋйсѧ, безтре́петный защи́тниче непови́нности: ра́дꙋйсѧ, ре́вностїю твое́ю по и҆́стинѣ, дрє́внимъ ст҃ы̑мъ ревни́телємъ ᲂу҆подо́бивыйсѧ.

Ра́дꙋйсѧ, бл҃годерзнове́нїемъ гро́знаго ᲂу҆диви́вый, но смиренномꙋ́дрїемъ того̀ на кро́тость премѣни́вый: ра́дꙋйсѧ, примѣ́ръ любвѐ къ правотѣ̀ и҆ послѣ́дꙋющымъ родѡ́мъ ѡ҆ста́вивый.

Ра́дꙋйсѧ, при за́падѣ жи́зни твое́й, пла́мєнныѧ лꙋчи̑ свѣ́тлагѡ дꙋ́ха твоегѡ̀ въ споборе́нїи и҆́стинѣ показа́вый: ра́дꙋйсѧ, праволюби́вымъ защище́ниемъ правоты̀, тече́нїе пра́веднѣй жи́зни твое́й ᲂу҆вѣнча́вый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Но́вагѡ тѧ̀ ревни́телѧ по бл҃гоче́стїи, и҆ побо́рника позна̀ гро́зный ца́рь и҆ ве́сь совѣ́тъ є҆гѡ̀, є҆гда̀ вѣща́лъ є҆сѝ царю̀ въ па́стырской кро́тости словеса̀ правоты̀ и҆ стра́ха бж҃їѧ, и҆ на сꙋдѣ̑ ст҃и́телѧ, глаго́лалъ є҆сѝ пред̾ царе́мъ во ѡ҆гражде́нїе непови́ннаго, тѣ́мже внѣ̀ па́ствы твоеѧ̀, въ ца́рствꙋющемъ гра́дѣ пребыва́ѧ въ терпѣ́нїи, та́мѡ и҆ бл҃же́ннꙋю жи́знь твою̀, ѿ посѣще́нїѧ бж҃їѧ гра́да, смертоно́снымъ посѣще́нїемъ сконча́лъ є҆сѝ. ᲂу҆блажа́ѧ смире́нное въ дс҃ѣ, но высо́кое въ дѣ́лѣхъ тече́нїе жи́зни твое́й и҆ смире́ннꙋю кончи́нꙋ твою̀ такова́ѧ тебѣ̀ прино́симъ:

Ра́дꙋйсѧ, ревни́телю смиренномꙋ́дрїѧ ѿ ю҆́ности пꙋ́ть смире́нїѧ и҆збра́вый: ра́дꙋйсѧ, и҆ на сщ҃є́нныѧ степє́ни зва́нїе и҆ и҆збра́нїе съ смире́ннымъ ᲂу҆клоне́нїемъ прїима́вый.

Ра́дꙋйсѧ, жи́знь твою̀ при бг҃оводи́момъ ше́ствїи, ꙗ҆́кѡже въ смире́нїи соверша́вый, та́коже въ смире́нїи и҆ сконча́вый: ра́дꙋйсѧ, при кончи́нѣ твое́й ѡ҆чисти́тельною же́ртвою прегрѣше́нїй ѿ посѣще́нїѧ бж҃їѧ ᲂу҆ме́ршихъ бы́вый.

Ра́дꙋйсѧ, ꙗ҆́кѡже не и҆ска́вый сла́вы человѣ́ческїѧ въ жи́зни, та́кѡ смире́нное погребе́нїе воспрїѧ́вый и҆ въ сме́рти: ра́дꙋйсѧ, ꙗ҆́кѡ вои́стиннꙋ стра́нникъ, вы́нꙋ и҆ска́вый нбⷭ҇нагѡ гра́да, въ ца́рствꙋющемъ гра́дѣ и҆з̾ до́льнѣй къ го́рнѣй жи́зни преше́дый.

Ра́дꙋйсѧ, ꙗ҆́кѡ и҆дѣ́же во смире́нїи сно́мъ сме́ртнымъ є҆сѝ ѡ҆почи́лъ, та́можде гдⷭ҇ь пресла́внѡ тѧ̀ чꙋдодѣ́йствїемъ ꙗ҆ви́лъ: ра́дꙋйсѧ, ꙗ҆́кѡ не дадѐ гдⷭ҇ь ви́дѣти тебѣ̀, прпⷣбномꙋ своемꙋ̀, и҆стлѣ́нїѧ.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Вседꙋ́шнѡ, ѿ всеѧ̀ любвѐ, и҆ всенаро́днѡ, всѧ́кагѡ чи́на и҆ зва́нїѧ, мона́си и҆ мїрсті́и, гра́да свїѧ́жска жи́телїе вожделѣ́ша и҆мѣ́ти мо́щи твоѧ̑, ст҃и́телю, въ созда́ннѣй тобо́ю ѡ҆би́тели, въ мѣ́стѣ сла́вы блгⷣти, дѣ́йствовавшїѧ тобо́ю въ дх҃о́вномъ созида́нїи и҆́ночества, и҆ назида́нїи всѣ́хъ приходѧ́щихъ къ тебѣ̀ ра́ди дꙋше́вныѧ по́льзы. тѣ́мже и҆спроси́вше соизволе́нїе бл҃гочести́вѣйшагѡ царѧ̀, съ неизглаго́ланною ра́достїю пренесо́ша ст҃ы̑ѧ мо́щи твоѧ̑, въ созда́ннꙋю тобо́ю ѡ҆би́тель, и҆ мы̀ въ ра́дости и҆́хъ, ве́селѡ привѣ́тствꙋемъ тѧ̀:

Ра́дꙋйсѧ, ꙗ҆́кѡ по смире́ннѣй кончи́нѣ просла́вленнымъ тобо́ю гдⷭ҇омъ просла́вленъ є҆сѝ: ра́дꙋйсѧ, ꙗ҆́кѡ длѧ прїѧ́тїѧ ст҃ы́хъ моще́й твои́хъ, въ бл҃гоговѣ́йнѡ срета́вшїй тѧ̀ гра́дъ сподви́гсѧ и҆ са́мъ а҆рхїпа́стырь, ст҃и́тель є҆рмоге́нъ.

Ра́дꙋйсѧ, ꙗ҆́кѡ то́йже вели́кїй ст҃и́тель, со всѣ́мъ ѡ҆сщ҃е́ннымъ собо́ромъ, подоба́ющее твое́й ст҃ы́нѣ надгро́бное пѣ́нїе совершѝ: ра́дꙋйсѧ, ꙗ҆́кѡ, при внесе́нїи моще́й твои́хъ въ созда́нный тобо́ю хра́мъ бцⷣы, ди́вное бл҃гоꙋха́нїе преиспо́лни хра́мъ и҆ ѡ҆би́тель.

Ра́дꙋйсѧ, ꙗ҆́кѡ къ ѻ҆́бщей бл҃гоговѣ́йнѣй ра́дости, ст҃ы̑ѧ мо́щи твоѧ̑ цѣ́лы и҆ нетлѣ́нны ѡ҆брѣто́шасѧ: ра́дꙋйсѧ, ꙗ҆́кѡ многоразли́чными и҆сцѣлє́нїи зна́меновасѧ сла́ва ст҃ы́хъ моще́й твои́хъ.

Ра́дꙋйсѧ, ꙗ҆́кѡ тѣ́ми же чꙋдодѣ̑йствїи засвидѣ́тельствовасѧ, ꙗ҆́кѡ ѡ҆брѣ́лъ є҆сѝ блгⷣть ᲂу҆ гдⷭ҇а: ра́дꙋйсѧ, ꙗ҆́кѡ и҆ симби́рстїи гра́ждане вожделѣ́ша и҆мѣ́ти ча́сть моще́й твои́хъ, во ѡ҆сщ҃е́нїе и҆ бл҃года́тнꙋю по́мощь.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Вѣті́йство человѣ́ческое не мо́жетъ и҆зрещѝ бл҃года́ти нетлѣ́нїѧ моще́й твои́хъ, ни повѣ́дати си́лы чꙋдодѣ́йствїѧ ѻ҆́ныхъ. мы̀ же та́инство вѣ́рою прїе́млюще, бл҃гоче́стнѡ вѣща́емъ:

Ра́дꙋйсѧ, чистото́ю дꙋ́ха ѿ всѧ́кагѡ бре́нїѧ ѿрѣши́выйсѧ: ра́дꙋйсѧ, посто́мъ и҆ воздержа́нїемъ, ꙗ҆́кѡ бл҃гово́нною смѵ́рною, тѣ́ло твоѐ тлѣ́нїѧ неприча́стнѡ сотвори́вый.

Ра́дꙋйсѧ, непреста́нною мл҃твою, ꙗ҆́кѡ нбⷭ҇нымъ свѣтоли́тїемъ, то́ежде бл҃года́тныѧ си́лы и҆спо́лнивый: ра́дꙋйсѧ, все́льшимсѧ въ тѧ̀ животворѧ́щимъ дх҃омъ по сме́рти чꙋдодѣ́йствꙋѧй.

Ра́дꙋйсѧ, сїѧ́вшимъ въ тебѣ̀ свѣ́томъ хрⷭ҇то́вымъ, тѣлє́сныѧ и҆ дꙋшє́вныѧ ѻ҆́чи просвѣща́ѧй: ра́дꙋйсѧ, бг҃одарова́нною тебѣ̀ си́лою, нечи̑стыѧ дꙋ́хи ѿ ѡ҆держи́мыхъ и҆́ми ѿгонѧ́ѧй.

Ра́дꙋйсѧ, въ прибега́ющихъ къ тебѣ̀ стра̑сти дꙋшє́вныѧ и҆ тѣлє́сныѧ врачꙋ́ѧй: ра́дꙋйсѧ, ꙗ҆́кѡ бо́дреннѡ содѣ́ловавый сп҃се́нїе твоѐ, и҆ всѣ́хъ ᲂу҆се́рднѡ притека́ющихъ къ тебѣ̀ сп҃се́нїю споспѣ́шествꙋѧй.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Стѣна̀ и҆ ѡ҆гражде́нїе на́мъ ст҃ы̑ѧ мо́щи твоѧ̑, приснобл҃же́нне: прибѣга́ѧ бо съ вѣ́рою под̾ цѣльбоно́снꙋю сѣ́нь ѻ҆́ныхъ, никто́же мл҃твами твои́ми, и҆з̾ хра́ма твоегѡ̀ без̾ бл҃года́тнагѡ ᲂу҆тѣше́нїѧ ѿхо́дитъ. въ не́мже бо са́мъ и҆скꙋше́нъ бы́лъ є҆сѝ, въ се́мъ и҆ и҆скꙋша́ємымъ и҆спра́шиваеши по́мощи. предстоѧ́ще ᲂу҆́бѡ съ любо́вїю живопрїе́мномꙋ гро́бꙋ твоемꙋ̀, взыва́емъ:

Ра́дꙋйсѧ, при́сный ѡ҆ на́съ къ бг҃ꙋ хода́таю: ра́дꙋйсѧ, бѣ́дствꙋющихъ предста́телю.

Ра́дꙋйсѧ, печа́льныхъ ᲂу҆тѣ́шителю: ра́дꙋйсѧ, нꙋжда́ющихсѧ помо́щниче.

Ра́дꙋйсѧ, гони́мыхъ прибѣ́жище: ра́дꙋйсѧ, ѡ҆бꙋрева́емыхъ ѕлоключе́нїи ти́хое приста́нище.

Ра́дꙋйсѧ, во мра́цѣ недоꙋмѣ́нїѧ сꙋ́щихъ бг҃освѣ́тлое вразꙋмле́нїе: ра́дꙋйсѧ, ѡ҆би́димыхъ застꙋ́пниче.

Ра́дꙋйсѧ, и҆знемога́ющихъ дꙋ́хомъ бг҃омꙋ́дрое подкрѣпле́нїе.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Свѣтоза́рный свѣти́льникъ и҆мꙋ́ще ст҃ы̑ѧ мо́щи твоѧ̑, пꙋ́ть пра́вый на́мъ освѣща́ющий, и҆ грѣхо́вный мра́къ разгонѧ́ющїй, блажи́мъ тѧ̀ во ѡ҆би́телехъ го́рнихъ веселѧ́щасѧ, и҆ ѿ неистощи́магѡ и҆сто́чника блгⷣти бж҃їей, бл҃га̑ѧ и҆ полє́знаѧ по коегѡ́ждо потре́бѣ на́мъ и҆спра́шивающа:

Ра́дꙋйсѧ, за земны̑ѧ по́двиги твоѧ̑ пренбⷭ҇ными бл҃гами ѿ подвигополо́жника ѡ҆бдарова́нный: ра́дꙋйсѧ, за нищетꙋ̀ дꙋхо́внꙋю црⷭ҇тво нбⷭ҇ное воспрїе́мый.

Ра́дꙋйсѧ, за воздыха̑нїѧ и҆ слє́зы непреходѧ́щимъ весе́лїемъ ᲂу҆тѣша́ѧйсѧ: ра́дꙋйсѧ, за кро́тость твою̀ зе́млю вѣ́чнагѡ ѡ҆блада́нїѧ наслѣ́дивый.

Ра́дꙋйсѧ, за а҆́лчбꙋ и҆ жа́ждꙋ ѿ неистощи́магѡ пото́ка сла́дости насыща́ѧйсѧ: ра́дꙋйсѧ, за милосе́рдїе твоѐ, млⷭ҇ть ѿ бг҃а полꙋчи́вый.

Ра́дꙋйсѧ, за чистотꙋ̀ твою̀ лицезрѣ́нїемъ бж҃їимъ наслажда́ѧйсѧ: ра́дꙋйсѧ, за гоне́нїе пра́вды ра́ди, на мѣ́стѣ ѕла́чнѣ премі́рнагѡ поко́ѧ вселѧ́ѧйсѧ.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Пою́ще твоѐ хрⷭ҇топодража́тельное житїѐ, бг҃омꙋ̑дрыѧ дѣѧ̑нїѧ, бл҃же́ннꙋю кончи́нꙋ, пресла̑вныѧ по кончи́нѣ чꙋдодѣ́йствїѧ, и҆ ꙗ҆вле́ннѣйшыѧ до́блєсти твоѧ̑, ꙗ҆́кѡ свѣ̑тлыѧ лꙋчѝ соединѧ́юще вкꙋ́пѣ, ѿ со́бственныхъ твои́хъ добро́тъ, прино́симъ тебѣ̀ хвале́нїе таково́е:

Ра́дꙋйсѧ, ѿ ю҆́ности твоеѧ̀ крѣ́пкимъ по́стникомъ и҆ неѡсла́бнымъ подви́жникомъ себѐ ꙗ҆ви́вый: ра́дꙋйсѧ, по сщ҃є́ннымъ степе́нємъ возводи́мый бл҃года́тїю, па́че же восхожде́нїемъ въ се́рдцѣ по внꙋ́треннѣй свѧ́тости смиренномꙋ́дреннѡ возвыша́выйсѧ.

Ра́дꙋйсѧ, до́бльственный бл҃же́ннагѡ гꙋ́рїа въ дх҃о́вномъ созида́нїи па́ствы каза́нскїѧ сотрꙋ́дниче: ра́дꙋйсѧ, тогѡ́жде досто́йный въ пастыренача́льствѣ прее́мниче.

Ра́дꙋйсѧ, и҆мѣ́вый зва́нїе свѣти́ти и҆ на высотѣ̀ всерѡссі́йскїѧ митропо́лїи: ра́дꙋйсѧ, и҆сповѣ́дниче и҆́стины пред̾ царе́мъ, и҆ защи́тниче страда́льческїѧ правоты̀ ст҃и́телѧ.

Ра́дꙋйсѧ, на мѣ́сте смире́ннаго поко́ища чꙋдодѣ́йственною бл҃года́тїю проѧвле́нный: ра́дꙋйсѧ, пресла́внѡ и҆з̾ ца́рствꙋющаго гра́да нетлѣ́нными моща́ми твои́ми во ѡ҆би́тель твою̀ пренесе́нный.

Ра́дꙋйсѧ, ѡ҆снова́нныѧ тобо́ю ѡ҆би́тєли свѧще́нное ѡ҆гражде́нїе и҆ ᲂу҆краше́нїе: ра́дꙋйсѧ, ꙗ҆́кѡ въ ско́рбехъ ᲂу҆тѣше́нїе, въ болѣ́знехъ и҆сцѣле́нїе, мо́щи твоѧ̑ на́мъ дарова́шасѧ.

Ра́дꙋйсѧ, бл҃гопрїѧ́тный ѡ҆ на́съ до́льнихъ и҆ пе́рстныхъ, вкꙋ́пѣ смире́нныхъ и҆ грѣ́шныхъ, въ го́рнихъ къ бг҃ꙋ предста́телю, и҆ немо́лчный мл҃твенниче.

Ра́дꙋйсѧ, ст҃и́телю ге́рмане, вели́кїй чꙋдотво́рче.