Православный календарь
Размер шрифта:

Ака́ѳістъ

А҆ка́ѳїстъ ст҃и́телю ге́рманꙋ, а҆рхїепі́скопꙋ каза́нскомꙋ и҆ свїѧ́жскомꙋ чꙋдотво́рцꙋ.

Свт. Германа, архиеп. Казанского и Свияжского (обрет. мощ.) (1592) 8 октября 2026

Конда́къ а҃

И҆збра́нный ст҃и́телю, те́плый ѡ҆ на́съ къ бг҃ꙋ мл҃твенниче, ᲂу҆го́дниче хрⷭ҇то́въ, прпⷣбне ѻ҆́ч҃е ге́рмане, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ твои́мъ предста́тельствомъ и҆збавлѧ́й, да зове́мъ тѝ:

Ра́дꙋйсѧ, ст҃и́телю ге́рмане, вели́кїй чꙋдотво́рче.

І҆́косъ а҃

А҆́гг҃лѡмъ ᲂу҆подоблѧ́ѧ непоро́чнымъ житїе́мъ ст҃ы̑ѧ твоѧ̑ гдⷭ҇и, ѿве́рзи мѝ ᲂу҆́мъ и҆ ѧ҆зы́къ, восхвали́ти бг҃оꙋго́днꙋю жи́знь, и҆ прпⷣбныѧ дѣѧ̑нїѧ ст҃и́телѧ твоегѡ̀ ге́рмана, да зове́мъ є҆мꙋ̀, взе́мшемꙋ ѿ ю҆́ности бл҃гі́й ꙗ҆ре́мъ тво́й на ра́мо своѐ:

Ра́дꙋйсѧ, бл҃гочести́вагѡ ко́рене бл҃гочести́ваѧ ѿрасле: ра́дꙋйсѧ, ѿ чре́ва ма́тернѧ и҆збра́нный слꙋжи́ти въ прпⷣбїи и҆ пра́вдѣ.

Ра́дꙋйсѧ, ѿ ѻ҆́троческихъ лѣ́тъ кро́ткимъ и҆ бл҃ги̑мъ нра́вомъ себѐ ᲂу҆краси́вый: ра́дꙋйсѧ, ѿ млада́гѡ во́зраста въ постѣ̀ и҆ моли́твѣ па́че во́зраста преꙋспѣ́вый.

Ра́дꙋйсѧ, съ ᲂу҆че́нїемъ кни́жнымъ па́че стра́хꙋ бж҃їю себѐ ѡ҆бꙋча́вый: ра́дꙋйсѧ, въ ю҆́ныхъ лѣ́тахъ крѣ́пкимъ подви́жникѡмъ воздержа́нїѧ себѐ ꙗ҆ви́вый.

Ра́дꙋйсѧ, ма́нїемъ бжⷭ҇твеннымъ и҆здале́ча къ вели́комꙋ твоемꙋ̀ и҆збра́нїю ведо́мый: ра́дꙋйсѧ, тѣ́мже вседѣ́тельнымъ ма́нїемъ, и҆спе́рва ꙗ҆́кѡ зѣ́ница ѻ҆́ка блюдо́мый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ в҃

Ви́дѧ тщетꙋ̀ мїрска́гѡ житїѧ̀, и҆ многомѧте́жность человѣ́ческихъ попече́нїй, бл҃же́нне, жи́знь твою̀ и҆спе́рва посвѧти́лъ є҆сѝ бг҃ꙋ, во є҆́же непреста́ннѡ, и҆ ᲂу҆ста́ми и҆ се́рдцемъ, воспѣва́ти є҆мꙋ̀: А҆ллилꙋ́їа.

І҆́косъ в҃

Ра́зꙋмомъ просвѣща́емый свы́ше, и҆ жела́нїемъ влеко́мый къ го́рнѣй жи́зни, ты̀ вкꙋ́пѣ съ бг҃омꙋ̑дрымъ роди́телемъ твои́мъ, па́че всегѡ̀ тща́сѧ ѡ҆ ᲂу҆гожде́нїи бг҃ꙋ, ѿве́ргши кра́снаѧ мі́ра, тѣ́сный и҆́ноческїй пꙋ́ть и҆збра́лъ є҆сѝ. восхвалѧ́ѧ твоѐ бл҃го́е и҆зволе́нїе, взыва́емъ тебѣ̀:

Ра́дꙋйсѧ, внѣ̀ мїрска́гѡ мѧте́жа, ѿ мла́дости рабо́тати бг҃ꙋ предложи́вый: ра́дꙋйсѧ, ю҆́ность твою̀, ꙗ҆́кѡ же́ртвꙋ непоро́чнꙋ, ѿверже́нїемъ ѿ мі́ра бг҃ꙋ принесы́й.

Ра́дꙋйсѧ, въ жи́зни по бз҃ѣ под̾ дꙋхо́внымъ и҆гꙋ́менствомъ бꙋ́дꙋщагѡ ст҃и́телѧ гꙋ́рїа преспѣва́вый: ра́дꙋйсѧ, є҆мꙋ́же вкꙋ́пѣ въ вели́комъ па́стырскомъ слꙋже́нїи въ споспѣ́шника и҆ прее́мника бл҃года́тїю ᲂу҆готовлѧ́выйсѧ.

Ра́дꙋйсѧ, въ то́йжде (волокола́мской ѡ҆би́тели) и҆ са́мъ въ мѣ́рꙋ дꙋхо́внагѡ вожденача́льства дости́гнꙋвый: ра́дꙋйсѧ, пе́рвымъ тща́выйсѧ бы́ти въ послꙋша́нїи, а҆́ще и҆ послѣ́днимъ во и҆́ноцѣхъ себѐ и҆менова́вый.

Ра́дꙋйсѧ, ꙗ҆́кѡ є҆ли́кѡ смирѧ́лъ є҆сѝ себѐ, толи́ко па́че бл҃года́тїю къ возвыше́нїю бы́лъ є҆сѝ ᲂу҆готовлѧ́емь: ра́дꙋйсѧ, и҆ смире́ннымъ возвраще́нїемъ ѿ нача́льства на пре́жнее послꙋша́нїе, нѡ́выѧ дꙋхѡ́вныѧ си̑лы длѧ послѣ́дꙋющагѡ слꙋже́нїѧ твоегѡ̀ стѧжа́вый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ г҃

Си́лою вы́шнѧгѡ, ᲂу҆готовлѧ́вшею тѧ̀ во сп҃се́нїе твоѐ и҆ мно́гихъ, ты̀, и҆збра́нниче бж҃їй, ведо́мь бы́лъ є҆сѝ ѿ си́лы въ си́лꙋ бг҃оꙋго́дной жи́зни и҆ дѣ́лъ. тѣ́мже и҆ воззва́нъ бы́лъ є҆сѝ бл҃года́тїю на слꙋже́нїе цр҃кви, въ новопросвѣще́ннѣмъ ца́рствѣ каза́нскомъ, во є҆́же наꙋчи́ти и҆ невѣ́дꙋщихъ сп҃си́телѧ мі́ра, зва́ти є҆мꙋ̀: А҆ллилꙋ́їа.

І҆́косъ г҃

И҆мѣ́ѧ бл҃го́е помышле́нїе ца́рь, новопрїѡбрѣ́тенное си́лою крⷭ҇тною ца́рство каза́нское, па́че всегѡ̀ ᲂу҆стро́ити во є҆ди́нствѣ бл҃гоче́стїѧ, да є҆ди́нымъ дꙋ́хомъ вѣ́ры прїѡбщи́тсѧ ѻ҆но̀ къ вели́кой держа́вѣ ца́рства рѡссі́йскагѡ, а҆́ки ча́сть къ своемꙋ̀ тѣ́лꙋ, при первост҃и́теле гꙋ́рїи и҆збра̀ тѧ̀ собо́ромъ цр҃кви въ сослꙋже́бника є҆мꙋ̀, ѡ҆ се́мъ ᲂу҆блажа́ѧ тѧ̀, приснобл҃же́нне, глаго́лемъ:

Ра́дꙋйсѧ, собо́рнымъ гла́сомъ на дѣ́ло а҆пⷭ҇льское досто́йнѡ и҆збра́нный: ра́дꙋйсѧ, ᲂу҆се́рдный дѣ́лателю хрⷭ҇то́въ въ новопросвѣще́ннѣй странѣ̀ магомета́нскагѡ заблꙋжде́нїѧ.

Ра́дꙋйсѧ, ꙗ҆́кѡ бл҃гопло́дный са́дъ, ст҃ꙋ́ю ѡ҆би́тель во гра́дѣ свїѧ́жскѣ насади́вый: ра́дꙋйсѧ, хра́мъ во сла́вꙋ ᲂу҆спе́нїѧ бг҃омт҃ри, а҆́ки неꙋвѧда́емый трꙋдѡ́въ твои́хъ па́мѧтникъ въ не́й соѡрꙋди́вый.

Ра́дꙋйсѧ, тꙋ́ю пе́рвѣе присноцвѣтꙋ́щею лѣ́потою подвигѡ́въ твои́хъ ᲂу҆краси́вый: ра́дꙋйсѧ, въ бг҃осп҃са́емомъ бра́тствѣ новонасажде́нной ѡ҆би́тели твое́й, па́че всегѡ̀ плоды̀ послꙋша́нїѧ и҆ стра́ха бж҃їѧ возраща́вый.

Ра́дꙋйсѧ, собира́ѧй слове́сныхъ ѻ҆ве́цъ въ слове́сный дво́ръ всѣ́хъ, и҆ ра́ди спаси́тельнаго жи́тельства, и҆ ра́ди наставле́нїѧ приходи́вшихъ къ тебѣ̀, любе́знѡ прїима́вый.

Ра́дꙋйсѧ, сла́вою добродѣ́телей твои́хъ, мно́гихъ и҆з̾ мра́ка магомета́нскагѡ нечє́стїѧ во свѣ́тъ и҆́стиннагѡ бл҃гоче́стїѧ ѡ҆браща́вый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ д҃

Бꙋ́рю мїрска́гѡ житїѧ̀, многоѡбра́зными превра́тностьми ѕлоключе́нїй вы́нꙋ воздвиза́емꙋю, бл҃гоѡти́шнѡ, ꙗ҆́кѡ мꙋ́дрый ко́рмчїй, преше́дъ ст҃и́тель гꙋ́рїй, въ приста́нище безмо́лвнагѡ поко́ѧ дости́же: на по́прищѣ бо новопросвѣще́нныѧ па́ствы, средѣ̀ непреры́вныхъ трꙋдѡ́въ подвиза́ѧсѧ, первост҃и́тель каза́нскїй ᲂу҆спѐ ми́рнымъ сно́мъ безсме́ртїѧ, ты̀ же, блаже́нне, ꙗ҆́кѡ пе́рвый сослꙋжи́тель и҆ ре́вностный сотрꙋ́дникъ сконча́вшагѡсѧ ꙗ҆ви́лсѧ, и҆ досто́йный прее́мникъ є҆мꙋ̀, да на престо́лѣ ст҃и́тельства пастыренача́льственнѣ вѣща́еши бг҃ꙋ: А҆ллилꙋ́їа.

І҆́косъ д҃

Слы́шавъ бг҃опра́вимый собо́ръ вели́кїѧ рѡссі́йскїѧ цр҃кви, ѡ҆ блаже́ннѣй кончи́нѣ пе́рвагѡ ст҃и́телѧ вели́кїѧ па́ствы каза́нскїѧ, є҆диногла́снѡ сꙋдѝ, ꙗ҆́кѡ то́кмѡ ты̀ и҆збра́нный бж҃їй досто́инъ возсѣ́сти на сѣда́лищи бл҃же́ннагѡ гꙋ́рїа, тѣ́мже воззва́нный въ ца́рствꙋющїй гра́дъ, а҆́ще и҆ ѿрица́лсѧ є҆сѝ по ѻ҆бы́чномꙋ тебѣ̀ смире́нїю ѿ са́на ст҃и́тельскагѡ, ѻ҆ба́че повинꙋ́ѧсѧ собо́рномꙋ ѡ҆предѣле́нїю, воспрїѧ́лъ є҆сѝ ст҃и́тельскїй же́злъ па́ствы каза́нскїѧ, тѣ́мже и҆ мы̀ въ весе́лїи привѣ́тствꙋемъ тѧ̀:

Ра́дꙋйсѧ, бл҃гі́й ра́бе гдⷭ҇а, вѣ́рностїю въ ме́ньшемъ содѣ́лавыйсѧ досто́йнымъ бо́льшагѡ слꙋже́нїѧ: ра́дꙋйсѧ, свѣти́льниче, на свѣ́щницѣ во сп҃се́нїе мнѡ́гимъ поста́вленный.

Ра́дꙋйсѧ, наста́вниче, и҆ сло́вомъ, а҆ па́че примѣ́ромъ жи́зни твоеѧ̀ наставлѧ́вый вѣ́рныхъ и҆ невѣ́рныхъ на пꙋ́ть хрⷭ҇то́въ: ра́дꙋйсѧ, па́стырю до́брый, неꙋсы́пнымъ попече́нїемъ полага́вый дꙋ́шꙋ твою̀ ѡ҆ сп҃се́нїи дꙋ́шъ пасо́мыхъ.

Ра́дꙋйсѧ, мꙋ́дрый приста́вниче до́ма гдⷭ҇нѧ всѣ̑мъ, по коегѡ́ждо потре́бѣ нꙋ́жнаѧ ᲂу҆строѧ́вый: ра́дꙋйсѧ, вѣ́рный раздаѧ́телю бла́гъ гдⷭ҇а твоегѡ̀, по́мощь бѣ́дствꙋющымъ, ᲂу҆тѣше́нїе скорбѧ́щымъ, неѡскꙋ́днѡ подава́вый.

Ра́дꙋйсѧ, въ бл҃гоговѣ́йнѣмъ слꙋже́нїи твое́мъ, и҆ се́рдце и҆ преподѡ́бныѧ рꙋ́цѣ твоѧ̑ ѡ҆ па́ствѣ ко гдⷭ҇ꙋ воздѣва́вый: ра́дꙋйсѧ, бл҃гопрїѧ́тными мл҃твами твои́ми ми́ръ, ми́лость и҆ бл҃года́ть бж҃їю на новопросвѣщє́нныѧ лю́ди низводи́вый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ є҃

Бг҃оте́чнѣй ѕвѣздѣ̀ ᲂу҆подо́билсѧ є҆сѝ, всехва́льне ст҃и́телю; восходѧ̀ бо бл҃года́тїю бж҃їею ѿ си́лы въ си́лꙋ, по свѧще́ннымъ степе́нємъ і҆ера́рхїи, воззва́нъ бы́лъ є҆сѝ ѿ па́ствы каза́нскїѧ на высотꙋ̀ престо́ла митропо́лїи моско́вскїѧ, да со все́ю цр҃ковїю воспѣва́еши бг҃ꙋ: А҆ллилꙋ́їа.

І҆́косъ є҃

Ви́дѣвъ бл҃говѣ́рный ца́рь бг҃оꙋго́дное твоѐ житїѐ, ст҃и́телю, соизво́ли на вы́шшїй свѣ́щникъ всерѡссі́йскїѧ митропо́лїи поста́вити тѧ̀: ты̀ же, бл҃же́нне, по смиренномꙋ́дрїю твоемꙋ̀, ꙗ҆влѧ́ѧ себѐ недосто́йна бы́ти такова́гѡ са́на, досто́йнѣйшаго поста́вити ᲂу҆молѧ́лъ є҆сѝ держа́внаго, ѻ҆ба́че повинꙋ́ѧсѧ зва́нїю, ᲂу҆готовлѧ́лсѧ и҆спо́лнити во́лю царе́вꙋ; но положи́лъ є҆сѝ въ се́рдцѣ пе́рвѣе и҆зрещѝ царю̀ сло́во пра́вды, ꙗ҆́же пра́вда а҆́ки ѕло̀ вмѣни́сѧ, и҆ запѧ̀ тѧ̀ на пꙋтѝ врꙋча́емагѡ тебѣ̀ первопресто́лїѧ. сегѡ̀ ра́ди сꙋгꙋ́бо ᲂу҆бл҃жа́емъ тѧ̀:

Ра́дꙋйсѧ, и҆ на высотѣ̀ ст҃и́тельства смирє́ннаѧ ѡ҆ себѣ̀ мꙋ́дрствовавый: ра́дꙋйсѧ, на первопресто́лїи рѡссі́йскїѧ цр҃кве па́че бре́мѧ, не́же че́сть себѣ̀ ви́дѣвый.

Ра́дꙋйсѧ, ꙗ҆́кѡ во є҆́же бо́льшымъ послꙋжи́ти во сп҃се́нїе, гото́въ бы́лъ є҆сѝ и҆ вы́шшее слꙋже́нїе прїѧ́ти: ра́дꙋйсѧ, пре́жде восше́ствїѧ на высотꙋ̀ престо́ла, во смире́нїи сло́во царю̀ провѣща́вый.

Ра́дꙋйсѧ, пра́вды ра́ди гоне́нїе и҆ и҆згна́нїе ѿ предлежа́щїѧ че́сти прїѧ́вый: ра́дꙋйсѧ, сло́во пра́во пред̾ царе́мъ, па́че прїѧ́тїѧ вре́менныѧ сла́вы предсꙋди́вый.

Ра́дꙋйсѧ, вѣ́рою и҆ пра́вдою слꙋжи́ти бла́гꙋ цр҃кви и҆ ца́рства, неѡбинове́ннѡ на первост҃и́тельскомъ престо́лѣ помышлѧ́вый: ра́дꙋйсѧ, и҆згна́нїемъ пра́вды ра́ди, бл҃же́нство нбⷭ҇ное себѣ̀ ᲂу҆гото́вивый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ ѕ҃

Проповѣ́дникъ и҆́стины бы́лъ є҆сѝ, ст҃и́телю ге́рмане: є҆гда̀ ѕло́бнїи ѻ҆при́чницы воста́ша на ст҃и́телѧ фїлі́ппа, ты̀ є҆ди́нъ на сꙋдѣ̀ непра́веднѣмъ глаго́лалъ є҆сѝ пред̾ царе́мъ ѡ҆ непра́вдѣ, возводи́мой на мꙋ́жа непови́ннаго, вѣща́ѧ въ непоколеби́мѣй пра́вдѣ бг҃ꙋ: А҆ллилꙋ́їа.

І҆́косъ ѕ҃

Возсїѧ̀, ст҃и́телю, въ но́вомъ свѣ́тѣ правота̀ дꙋ́ха твоегѡ̀, є҆гда̀ непови́нный ст҃и́тель фїлі́ппъ непра́вѣднѡ бы́лъ сꙋди́мь и҆ ѡ҆сꙋжде́нъ, ты̀ є҆ди́нъ и҆з̾ ст҃и́телей воздви́глъ є҆сѝ гла́съ въ защи́тꙋ страда́льца, бл҃годерзнове́ннѡ вѣща́ѧ пред̾ царе́мъ: ꙗ҆́кѡ бл҃же́нный ѻ҆́нъ ѿ ю҆́ности ни сꙋда̀ ло́жна, ни лицепрїѧ́тїѧ не вѣ́дѣ. ᲂу҆блажа́ѧ праволю́бїе твоѐ вѣща́емъ тебѣ̀:

Ра́дꙋйсѧ, при а҆́гг҃льской кро́тости твое́й, крѣ́пкїй ревни́телю бл҃гоче́стїѧ, є҆гда̀ зрѣ́лъ то́е небрего́мымъ ѿ нече́стїѧ: ра́дꙋйсѧ, побо́рниче ᲂу҆гнета́емой правоты̀.

Ра́дꙋйсѧ, безтре́петный защи́тниче непови́нности: ра́дꙋйсѧ, ре́вностїю твое́ю по и҆́стинѣ, дрє́внимъ ст҃ы̑мъ ревни́телємъ ᲂу҆подо́бивыйсѧ.

Ра́дꙋйсѧ, бл҃годерзнове́нїемъ гро́знаго ᲂу҆диви́вый, но смиренномꙋ́дрїемъ того̀ на кро́тость премѣни́вый: ра́дꙋйсѧ, примѣ́ръ любвѐ къ правотѣ̀ и҆ послѣ́дꙋющымъ родѡ́мъ ѡ҆ста́вивый.

Ра́дꙋйсѧ, при за́падѣ жи́зни твое́й, пла́мєнныѧ лꙋчи̑ свѣ́тлагѡ дꙋ́ха твоегѡ̀ въ споборе́нїи и҆́стинѣ показа́вый: ра́дꙋйсѧ, праволюби́вымъ защище́ниемъ правоты̀, тече́нїе пра́веднѣй жи́зни твое́й ᲂу҆вѣнча́вый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ з҃

Хотѧ̀ непоро́чнꙋю жи́знь твою̀, ꙗ҆́кѡ до́брый по́двигъ сконча́ти, потща́лсѧ є҆сѝ и҆ царю̀ въ смиренномꙋ́дрїи сло́во бла́го рещѝ и҆ пред̾ царе́мъ въ защи́тꙋ мꙋ́жа пра́веднагѡ пра́вое сло́во провѣща́ти, тѣ́мже соверши́въ тече́нїе твоѐ, ꙗ҆́кѡ ревни́тель бл҃гоче́стїѧ и҆ побо́рникъ и҆́стины, стѧжа́лъ є҆сѝ дерзнове́нїе во и҆схо́дѣ твое́мъ взыва́ти бг҃ꙋ: А҆ллилꙋ́їа.

І҆́косъ з҃

Но́вагѡ тѧ̀ ревни́телѧ по бл҃гоче́стїи, и҆ побо́рника позна̀ гро́зный ца́рь и҆ ве́сь совѣ́тъ є҆гѡ̀, є҆гда̀ вѣща́лъ є҆сѝ царю̀ въ па́стырской кро́тости словеса̀ правоты̀ и҆ стра́ха бж҃їѧ, и҆ на сꙋдѣ̑ ст҃и́телѧ, глаго́лалъ є҆сѝ пред̾ царе́мъ во ѡ҆гражде́нїе непови́ннаго, тѣ́мже внѣ̀ па́ствы твоеѧ̀, въ ца́рствꙋющемъ гра́дѣ пребыва́ѧ въ терпѣ́нїи, та́мѡ и҆ бл҃же́ннꙋю жи́знь твою̀, ѿ посѣще́нїѧ бж҃їѧ гра́да, смертоно́снымъ посѣще́нїемъ сконча́лъ є҆сѝ. ᲂу҆блажа́ѧ смире́нное въ дс҃ѣ, но высо́кое въ дѣ́лѣхъ тече́нїе жи́зни твое́й и҆ смире́ннꙋю кончи́нꙋ твою̀ такова́ѧ тебѣ̀ прино́симъ:

Ра́дꙋйсѧ, ревни́телю смиренномꙋ́дрїѧ ѿ ю҆́ности пꙋ́ть смире́нїѧ и҆збра́вый: ра́дꙋйсѧ, и҆ на сщ҃є́нныѧ степє́ни зва́нїе и҆ и҆збра́нїе съ смире́ннымъ ᲂу҆клоне́нїемъ прїима́вый.

Ра́дꙋйсѧ, жи́знь твою̀ при бг҃оводи́момъ ше́ствїи, ꙗ҆́кѡже въ смире́нїи соверша́вый, та́коже въ смире́нїи и҆ сконча́вый: ра́дꙋйсѧ, при кончи́нѣ твое́й ѡ҆чисти́тельною же́ртвою прегрѣше́нїй ѿ посѣще́нїѧ бж҃їѧ ᲂу҆ме́ршихъ бы́вый.

Ра́дꙋйсѧ, ꙗ҆́кѡже не и҆ска́вый сла́вы человѣ́ческїѧ въ жи́зни, та́кѡ смире́нное погребе́нїе воспрїѧ́вый и҆ въ сме́рти: ра́дꙋйсѧ, ꙗ҆́кѡ вои́стиннꙋ стра́нникъ, вы́нꙋ и҆ска́вый нбⷭ҇нагѡ гра́да, въ ца́рствꙋющемъ гра́дѣ и҆з̾ до́льнѣй къ го́рнѣй жи́зни преше́дый.

Ра́дꙋйсѧ, ꙗ҆́кѡ и҆дѣ́же во смире́нїи сно́мъ сме́ртнымъ є҆сѝ ѡ҆почи́лъ, та́можде гдⷭ҇ь пресла́внѡ тѧ̀ чꙋдодѣ́йствїемъ ꙗ҆ви́лъ: ра́дꙋйсѧ, ꙗ҆́кѡ не дадѐ гдⷭ҇ь ви́дѣти тебѣ̀, прпⷣбномꙋ своемꙋ̀, и҆стлѣ́нїѧ.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ и҃

Стра́нное и҆ пресла́вное сотворѝ ѡ҆ тебѣ̀, прпⷣбне, прославлѧ́ѧй прпⷣбныѧ своѧ̑ гдⷭ҇ь. слы́шавше бо при̑снаѧ твоѧ̑ ча̑да, новосажде́нной тобо́ю ѡ҆би́тели и҆́ноцы, и҆ бл҃гочести́вїи бг҃осп҃са́емыѧ па́ствы твоеѧ̀ лю́дїе, гра́да свїѧ́жска жи́телїе, ѿ ст҃ы́хъ моще́й твои́хъ въ ца́рствꙋющемъ гра́дѣ москвѣ̀ и҆злива́ющыѧсѧ и҆сцѣлє́нїѧ, потща́шасѧ возврати́ти тѧ̀ во гра́дъ сво́й, въ мѣ́сто пе́рвыхъ подвигѡ́въ твои́хъ на по́прищѣ просвѣще́нїѧ вѣ́рою новопрїобрѣ́тенныѧ страны̀, во є҆́же бл҃гопрїѧ́тнѣе при нетлѣ́нныхъ моще́хъ твои́хъ пѣ́ти бг҃ꙋ: А҆ллилꙋ́їа.

І҆́косъ и҃

Вседꙋ́шнѡ, ѿ всеѧ̀ любвѐ, и҆ всенаро́днѡ, всѧ́кагѡ чи́на и҆ зва́нїѧ, мона́си и҆ мїрсті́и, гра́да свїѧ́жска жи́телїе вожделѣ́ша и҆мѣ́ти мо́щи твоѧ̑, ст҃и́телю, въ созда́ннѣй тобо́ю ѡ҆би́тели, въ мѣ́стѣ сла́вы блгⷣти, дѣ́йствовавшїѧ тобо́ю въ дх҃о́вномъ созида́нїи и҆́ночества, и҆ назида́нїи всѣ́хъ приходѧ́щихъ къ тебѣ̀ ра́ди дꙋше́вныѧ по́льзы. тѣ́мже и҆спроси́вше соизволе́нїе бл҃гочести́вѣйшагѡ царѧ̀, съ неизглаго́ланною ра́достїю пренесо́ша ст҃ы̑ѧ мо́щи твоѧ̑, въ созда́ннꙋю тобо́ю ѡ҆би́тель, и҆ мы̀ въ ра́дости и҆́хъ, ве́селѡ привѣ́тствꙋемъ тѧ̀:

Ра́дꙋйсѧ, ꙗ҆́кѡ по смире́ннѣй кончи́нѣ просла́вленнымъ тобо́ю гдⷭ҇омъ просла́вленъ є҆сѝ: ра́дꙋйсѧ, ꙗ҆́кѡ длѧ прїѧ́тїѧ ст҃ы́хъ моще́й твои́хъ, въ бл҃гоговѣ́йнѡ срета́вшїй тѧ̀ гра́дъ сподви́гсѧ и҆ са́мъ а҆рхїпа́стырь, ст҃и́тель є҆рмоге́нъ.

Ра́дꙋйсѧ, ꙗ҆́кѡ то́йже вели́кїй ст҃и́тель, со всѣ́мъ ѡ҆сщ҃е́ннымъ собо́ромъ, подоба́ющее твое́й ст҃ы́нѣ надгро́бное пѣ́нїе совершѝ: ра́дꙋйсѧ, ꙗ҆́кѡ, при внесе́нїи моще́й твои́хъ въ созда́нный тобо́ю хра́мъ бцⷣы, ди́вное бл҃гоꙋха́нїе преиспо́лни хра́мъ и҆ ѡ҆би́тель.

Ра́дꙋйсѧ, ꙗ҆́кѡ къ ѻ҆́бщей бл҃гоговѣ́йнѣй ра́дости, ст҃ы̑ѧ мо́щи твоѧ̑ цѣ́лы и҆ нетлѣ́нны ѡ҆брѣто́шасѧ: ра́дꙋйсѧ, ꙗ҆́кѡ многоразли́чными и҆сцѣлє́нїи зна́меновасѧ сла́ва ст҃ы́хъ моще́й твои́хъ.

Ра́дꙋйсѧ, ꙗ҆́кѡ тѣ́ми же чꙋдодѣ̑йствїи засвидѣ́тельствовасѧ, ꙗ҆́кѡ ѡ҆брѣ́лъ є҆сѝ блгⷣть ᲂу҆ гдⷭ҇а: ра́дꙋйсѧ, ꙗ҆́кѡ и҆ симби́рстїи гра́ждане вожделѣ́ша и҆мѣ́ти ча́сть моще́й твои́хъ, во ѡ҆сщ҃е́нїе и҆ бл҃года́тнꙋю по́мощь.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ ѳ҃

Всѧ̑кїѧ болѣ̑зни, живꙋ́щею въ тебѣ̀ блгⷣтїю ст҃а́гѡ дх҃а, ты̀ ст҃и́телю врачꙋ́еши съ вѣ́рою притека́ющихъ къ цѣльбонѡ́снымъ моще́мъ твои̑мъ. сегѡ̀ ра́ди прїе́млюще тобо́ю блгⷣть и҆сцѣле́нїй, бл҃года́рнѣ прїѧ́вшемꙋ на себѐ недꙋ̑ги на́шѧ сп҃си́телю пое́мъ: А҆ллилꙋ́їа.

І҆́косъ ѳ҃

Вѣті́йство человѣ́ческое не мо́жетъ и҆зрещѝ бл҃года́ти нетлѣ́нїѧ моще́й твои́хъ, ни повѣ́дати си́лы чꙋдодѣ́йствїѧ ѻ҆́ныхъ. мы̀ же та́инство вѣ́рою прїе́млюще, бл҃гоче́стнѡ вѣща́емъ:

Ра́дꙋйсѧ, чистото́ю дꙋ́ха ѿ всѧ́кагѡ бре́нїѧ ѿрѣши́выйсѧ: ра́дꙋйсѧ, посто́мъ и҆ воздержа́нїемъ, ꙗ҆́кѡ бл҃гово́нною смѵ́рною, тѣ́ло твоѐ тлѣ́нїѧ неприча́стнѡ сотвори́вый.

Ра́дꙋйсѧ, непреста́нною мл҃твою, ꙗ҆́кѡ нбⷭ҇нымъ свѣтоли́тїемъ, то́ежде бл҃года́тныѧ си́лы и҆спо́лнивый: ра́дꙋйсѧ, все́льшимсѧ въ тѧ̀ животворѧ́щимъ дх҃омъ по сме́рти чꙋдодѣ́йствꙋѧй.

Ра́дꙋйсѧ, сїѧ́вшимъ въ тебѣ̀ свѣ́томъ хрⷭ҇то́вымъ, тѣлє́сныѧ и҆ дꙋшє́вныѧ ѻ҆́чи просвѣща́ѧй: ра́дꙋйсѧ, бг҃одарова́нною тебѣ̀ си́лою, нечи̑стыѧ дꙋ́хи ѿ ѡ҆держи́мыхъ и҆́ми ѿгонѧ́ѧй.

Ра́дꙋйсѧ, въ прибега́ющихъ къ тебѣ̀ стра̑сти дꙋшє́вныѧ и҆ тѣлє́сныѧ врачꙋ́ѧй: ра́дꙋйсѧ, ꙗ҆́кѡ бо́дреннѡ содѣ́ловавый сп҃се́нїе твоѐ, и҆ всѣ́хъ ᲂу҆се́рднѡ притека́ющихъ къ тебѣ̀ сп҃се́нїю споспѣ́шествꙋѧй.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ і҃

Сп҃стѝ хотѧ̀ дꙋ́шꙋ твою̀, ѿне́лѣже нача́лъ є҆сѝ рабо́тати гдⷭ҇еви, всѧ́кїѧ ско́рби, лишє́нїѧ и҆ ᲂу҆ничижє́нїѧ до́бльственнѡ терпѧ̀, по блаже́ннѣй кончи́нѣ твое́й, содѣ́лалсѧ є҆сѝ прибѣ́жище всѣ̑мъ скорбьмѝ жите́йскими ѡ҆бꙋрева́ємымъ, во є҆́же со всѣ́ми взыва́ти бл҃года́рнѡ и҆зба́вителю всѣ́хъ: А҆ллилꙋ́їа.

І҆́косъ і҃

Стѣна̀ и҆ ѡ҆гражде́нїе на́мъ ст҃ы̑ѧ мо́щи твоѧ̑, приснобл҃же́нне: прибѣга́ѧ бо съ вѣ́рою под̾ цѣльбоно́снꙋю сѣ́нь ѻ҆́ныхъ, никто́же мл҃твами твои́ми, и҆з̾ хра́ма твоегѡ̀ без̾ бл҃года́тнагѡ ᲂу҆тѣше́нїѧ ѿхо́дитъ. въ не́мже бо са́мъ и҆скꙋше́нъ бы́лъ є҆сѝ, въ се́мъ и҆ и҆скꙋша́ємымъ и҆спра́шиваеши по́мощи. предстоѧ́ще ᲂу҆́бѡ съ любо́вїю живопрїе́мномꙋ гро́бꙋ твоемꙋ̀, взыва́емъ:

Ра́дꙋйсѧ, при́сный ѡ҆ на́съ къ бг҃ꙋ хода́таю: ра́дꙋйсѧ, бѣ́дствꙋющихъ предста́телю.

Ра́дꙋйсѧ, печа́льныхъ ᲂу҆тѣ́шителю: ра́дꙋйсѧ, нꙋжда́ющихсѧ помо́щниче.

Ра́дꙋйсѧ, гони́мыхъ прибѣ́жище: ра́дꙋйсѧ, ѡ҆бꙋрева́емыхъ ѕлоключе́нїи ти́хое приста́нище.

Ра́дꙋйсѧ, во мра́цѣ недоꙋмѣ́нїѧ сꙋ́щихъ бг҃освѣ́тлое вразꙋмле́нїе: ра́дꙋйсѧ, ѡ҆би́димыхъ застꙋ́пниче.

Ра́дꙋйсѧ, и҆знемога́ющихъ дꙋ́хомъ бг҃омꙋ́дрое подкрѣпле́нїе.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ а҃і

Пѣ́нїе похва́льное приносѧ́ще тебѣ̀ ст҃и́телю, вѣ́мы, ꙗ҆́кѡ ни ст҃а́гѡ житїѧ̀ твоегѡ̀, ни прпⷣбныхъ дѣѧ́нїй, ни чꙋде́съ, бл҃года́тїю бж҃їею ѿ моще́й твои́хъ ѡ҆би́льнѡ на́мъ подава́емыхъ, по достоѧ́нїю не то́кмѡ восхвали́ти, но нижѐ, ꙗ҆́кѡже подоба́етъ, и҆звѣсти́ти возмого́хомъ. ѻ҆ба́че вѣ́дꙋще тѧ̀ превы́ше всѣ́хъ похва́лъ сꙋ́ща, во свѣ́тлостехъ ст҃ы́хъ, веселѧ́щесѧ простира́емъ моле́бный гла́съ ѡ҆ тебѣ̀, прославлѧ́ющемꙋ ст҃ы̑ѧ своѧ̑: А҆ллилꙋ́їа.

І҆́косъ а҃і

Свѣтоза́рный свѣти́льникъ и҆мꙋ́ще ст҃ы̑ѧ мо́щи твоѧ̑, пꙋ́ть пра́вый на́мъ освѣща́ющий, и҆ грѣхо́вный мра́къ разгонѧ́ющїй, блажи́мъ тѧ̀ во ѡ҆би́телехъ го́рнихъ веселѧ́щасѧ, и҆ ѿ неистощи́магѡ и҆сто́чника блгⷣти бж҃їей, бл҃га̑ѧ и҆ полє́знаѧ по коегѡ́ждо потре́бѣ на́мъ и҆спра́шивающа:

Ра́дꙋйсѧ, за земны̑ѧ по́двиги твоѧ̑ пренбⷭ҇ными бл҃гами ѿ подвигополо́жника ѡ҆бдарова́нный: ра́дꙋйсѧ, за нищетꙋ̀ дꙋхо́внꙋю црⷭ҇тво нбⷭ҇ное воспрїе́мый.

Ра́дꙋйсѧ, за воздыха̑нїѧ и҆ слє́зы непреходѧ́щимъ весе́лїемъ ᲂу҆тѣша́ѧйсѧ: ра́дꙋйсѧ, за кро́тость твою̀ зе́млю вѣ́чнагѡ ѡ҆блада́нїѧ наслѣ́дивый.

Ра́дꙋйсѧ, за а҆́лчбꙋ и҆ жа́ждꙋ ѿ неистощи́магѡ пото́ка сла́дости насыща́ѧйсѧ: ра́дꙋйсѧ, за милосе́рдїе твоѐ, млⷭ҇ть ѿ бг҃а полꙋчи́вый.

Ра́дꙋйсѧ, за чистотꙋ̀ твою̀ лицезрѣ́нїемъ бж҃їимъ наслажда́ѧйсѧ: ра́дꙋйсѧ, за гоне́нїе пра́вды ра́ди, на мѣ́стѣ ѕла́чнѣ премі́рнагѡ поко́ѧ вселѧ́ѧйсѧ.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ в҃і

Бл҃года́ть, все́льшꙋюсѧ въ тѧ̀ ст҃а́гѡ дх҃а, ꙗ҆ви́въ въ жи́зни, въ сме́рти и҆ по сме́рти твое́й, ст҃и́телю, ѡ҆бл҃годатѝ на́шꙋ мы́сль: недоꙋмѣ́емъ бо, ка́кѡ соверши́мъ скꙋ́днꙋю пѣ́снь на́шꙋ въ похвалꙋ̀ тебѣ̀, ра́звѣ запечатлѣ́емъ тꙋ́ю совокꙋпле́нїемъ во є҆ди́но, ꙗ҆́кѡ раздѣле́нныхъ лꙋче́й, воспѣ́тыхъ на́ми до́блестей твои́хъ, да хва́лѧще тѧ̀ вы́нꙋ ᲂу҆сты̀ и҆ се́рдцемъ пое́мъ бг҃ꙋ: А҆ллилꙋ́їа.

І҆́косъ в҃і

Пою́ще твоѐ хрⷭ҇топодража́тельное житїѐ, бг҃омꙋ̑дрыѧ дѣѧ̑нїѧ, бл҃же́ннꙋю кончи́нꙋ, пресла̑вныѧ по кончи́нѣ чꙋдодѣ́йствїѧ, и҆ ꙗ҆вле́ннѣйшыѧ до́блєсти твоѧ̑, ꙗ҆́кѡ свѣ̑тлыѧ лꙋчѝ соединѧ́юще вкꙋ́пѣ, ѿ со́бственныхъ твои́хъ добро́тъ, прино́симъ тебѣ̀ хвале́нїе таково́е:

Ра́дꙋйсѧ, ѿ ю҆́ности твоеѧ̀ крѣ́пкимъ по́стникомъ и҆ неѡсла́бнымъ подви́жникомъ себѐ ꙗ҆ви́вый: ра́дꙋйсѧ, по сщ҃є́ннымъ степе́нємъ возводи́мый бл҃года́тїю, па́че же восхожде́нїемъ въ се́рдцѣ по внꙋ́треннѣй свѧ́тости смиренномꙋ́дреннѡ возвыша́выйсѧ.

Ра́дꙋйсѧ, до́бльственный бл҃же́ннагѡ гꙋ́рїа въ дх҃о́вномъ созида́нїи па́ствы каза́нскїѧ сотрꙋ́дниче: ра́дꙋйсѧ, тогѡ́жде досто́йный въ пастыренача́льствѣ прее́мниче.

Ра́дꙋйсѧ, и҆мѣ́вый зва́нїе свѣти́ти и҆ на высотѣ̀ всерѡссі́йскїѧ митропо́лїи: ра́дꙋйсѧ, и҆сповѣ́дниче и҆́стины пред̾ царе́мъ, и҆ защи́тниче страда́льческїѧ правоты̀ ст҃и́телѧ.

Ра́дꙋйсѧ, на мѣ́сте смире́ннаго поко́ища чꙋдодѣ́йственною бл҃года́тїю проѧвле́нный: ра́дꙋйсѧ, пресла́внѡ и҆з̾ ца́рствꙋющаго гра́да нетлѣ́нными моща́ми твои́ми во ѡ҆би́тель твою̀ пренесе́нный.

Ра́дꙋйсѧ, ѡ҆снова́нныѧ тобо́ю ѡ҆би́тєли свѧще́нное ѡ҆гражде́нїе и҆ ᲂу҆краше́нїе: ра́дꙋйсѧ, ꙗ҆́кѡ въ ско́рбехъ ᲂу҆тѣше́нїе, въ болѣ́знехъ и҆сцѣле́нїе, мо́щи твоѧ̑ на́мъ дарова́шасѧ.

Ра́дꙋйсѧ, бл҃гопрїѧ́тный ѡ҆ на́съ до́льнихъ и҆ пе́рстныхъ, вкꙋ́пѣ смире́нныхъ и҆ грѣ́шныхъ, въ го́рнихъ къ бг҃ꙋ предста́телю, и҆ немо́лчный мл҃твенниче.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ г҃і

Ѽ вели́кїй ᲂу҆го́дниче бж҃їй, ст҃и́телю ге́рмане, прїимѝ сїѐ ᲂу҆се́рдное къ тебѣ̀ моле́нїе на́ше, и҆ бл҃гопрїѧ́тнымъ твои́мъ пред̾ прⷭ҇то́ломъ ст҃ы́ѧ трⷪ҇цы предста́тельствомъ, молѝ ѡ҆ на́съ недосто́йныхъ рабѣ́хъ твои́хъ, є҆́же и҆зба́витисѧ на́мъ ѿ належа́щихъ бѣ́дъ, внеза́пныѧ сме́рти и҆ вѣ́чнагѡ ѡ҆сꙋжде́нїѧ, да сподо́бимсѧ вкꙋ́пѣ съ тобо́ю, въ ли́цѣ ст҃ы́хъ, вы́нꙋ є҆ди́номꙋ въ трⷪ҇цѣ бг҃ꙋ, сп҃си́телю на́шемꙋ, воспѣва́ти: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡмъ ᲂу҆подоблѧ́ѧ непоро́чнымъ житїе́мъ ст҃ы̑ѧ твоѧ̑ гдⷭ҇и, ѿве́рзи мѝ ᲂу҆́мъ и҆ ѧ҆зы́къ, восхвали́ти бг҃оꙋго́днꙋю жи́знь, и҆ прпⷣбныѧ дѣѧ̑нїѧ ст҃и́телѧ твоегѡ̀ ге́рмана, да зове́мъ є҆мꙋ̀, взе́мшемꙋ ѿ ю҆́ности бл҃гі́й ꙗ҆ре́мъ тво́й на ра́мо своѐ:

Ра́дꙋйсѧ, бл҃гочести́вагѡ ко́рене бл҃гочести́ваѧ ѿрасле: ра́дꙋйсѧ, ѿ чре́ва ма́тернѧ и҆збра́нный слꙋжи́ти въ прпⷣбїи и҆ пра́вдѣ.

Ра́дꙋйсѧ, ѿ ѻ҆́троческихъ лѣ́тъ кро́ткимъ и҆ бл҃ги̑мъ нра́вомъ себѐ ᲂу҆краси́вый: ра́дꙋйсѧ, ѿ млада́гѡ во́зраста въ постѣ̀ и҆ моли́твѣ па́че во́зраста преꙋспѣ́вый.

Ра́дꙋйсѧ, съ ᲂу҆че́нїемъ кни́жнымъ па́че стра́хꙋ бж҃їю себѐ ѡ҆бꙋча́вый: ра́дꙋйсѧ, въ ю҆́ныхъ лѣ́тахъ крѣ́пкимъ подви́жникѡмъ воздержа́нїѧ себѐ ꙗ҆ви́вый.

Ра́дꙋйсѧ, ма́нїемъ бжⷭ҇твеннымъ и҆здале́ча къ вели́комꙋ твоемꙋ̀ и҆збра́нїю ведо́мый: ра́дꙋйсѧ, тѣ́мже вседѣ́тельнымъ ма́нїемъ, и҆спе́рва ꙗ҆́кѡ зѣ́ница ѻ҆́ка блюдо́мый.

Ра́дꙋйсѧ, ст҃и́телю ге́рмане, вели́кїй чꙋдотво́рче.

Конда́къ а҃

И҆збра́нный ст҃и́телю, те́плый ѡ҆ на́съ къ бг҃ꙋ мл҃твенниче, ᲂу҆го́дниче хрⷭ҇то́въ, прпⷣбне ѻ҆́ч҃е ге́рмане, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ твои́мъ предста́тельствомъ и҆збавлѧ́й, да зове́мъ тѝ:

Ра́дꙋйсѧ, ст҃и́телю ге́рмане, вели́кїй чꙋдотво́рче.

Моли́твы

Ѽ ст҃и́телю хрⷭ҇то́въ ге́рмане, бг҃омꙋ́дрый ѡ҆би́тели сеѧ̀ ѡ҆снова́телю, дꙋхо́вный и҆́ночествꙋющихъ вождю̀, приме́ромъ хрⷭ҇топодража́тельной жи́зни твое́й наставлѧ́ѧй! къ тебѣ̀ прибѣга́емъ и҆ тебѣ̀ ᲂу҆се́рднѡ мо́лимъ: содѣ́лай ст҃ы́ми твои́ми мл҃твами, да и҆ мы̀ бл҃года́тїю бж҃їею сози́ждемсѧ во ѡ҆би́тель дх҃а ст҃а́гѡ, послѣ́дованїемъ жи́зни твое́й воѡбража́емсѧ во ѡ҆́бразъ хрⷭ҇то́въ, во ѡ҆́бразъ преподо́бїѧ и҆ пра́вды и҆ ѡ҆сѣнѧ́емїи си́лою бг҃опрїѧ́тныхъ мл҃твъ твои́хъ, прино́симъ плоды̀ бл҃ги́хъ дѣ́лъ; бл҃гоꙋгожда́юще гдⷭ҇ꙋ, да тщи́мсѧ ходи́ти во свѣ́тѣ лица̀ є҆гѡ̀, па́че всегѡ̀ люби́ти є҆гѡ̀, слꙋжи́ти во бла́го бли́жнихъ на́шихъ: и҆ всемѣ́рнѡ содѣ́ловати сп҃се́нїе своѐ, на пꙋтѝ многопремѣ́нчивыѧ жи́зни, терпе́нїемъ всѧ́кїѧ тѣсноты̀, скорбе́й, лише́нїй. а҆ дабы̀ возмощѝ на́мъ понестѝ бл҃го́е и҆́го хрⷭ҇то́во, молѝ, свѧ́тче бж҃їй, ѡ҆ ᲂу҆крѣпле́нїи не́мощи на́шеѧ по́мощїю свы́ше, да и҆зба́витъ на́съ гдⷭ҇ь ѿ вра̑гъ ви́димыхъ и҆ неви́димыхъ, ѿ ѻ҆́гненнагѡ и҆ во́днагѡ потребле́нїѧ, ѿ неблагорастворе́нїѧ воздꙋ́ха и҆ тлетво́рныхъ вѣ̑тръ, а҆ па́че ѿ дꙋшепа́гꙋбнагѡ пла́мени, потопле́нїѧ и҆ ѡ҆бꙋрева́нїѧ страсте́й на́шихъ, да под̾ кро́вомъ бл҃гости и҆ млⷭ҇рдїѧ бж҃їѧ, ти́хое и҆ безмо́лвное житїѐ поживе́мъ, ждꙋ́ще бл҃же́ннагѡ ꙗ҆вле́нїѧ гдⷭ҇а и҆ сп҃са на́шегѡ і҆и҃са хрⷭ҇та̀: є҆мꙋ́же со ѻ҆ц҃е́мъ и҆ ст҃ы́мъ дх҃омъ че́сть и҆ сла́ва, во вѣ́ки вѣкѡ́въ. А҆ми́нь.