Песнь 1
Ирмос
Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Тропарь
Лику́им дне́сь, ве́рнии, ра́достно, све́тлыми душа́ми пою́ще Спа́са на па́мять пречу́дную Христо́ва служи́теля Вячесла́ва.
Тропарь
Влады́чним Страсте́м сла́вне уподо́бился еси́, я́ко а́гня непоро́чно, без пра́вды убива́емь, те́м с ли́ки му́ченик, богоблаже́нне, ны́не весели́шися.
Тропарь
Сме́рть хода́таицу жи́зни прии́м, вся́ческим Влады́це ны́не в сла́ве предстои́ши, ея́же и на́м улучи́ти умоли́, свя́те, творя́щим твою́ па́мять пречу́дную.
Тропарь
Кто́ испове́сть твоя́ чудеса́, сла́вне, я́же твори́ши в ми́ре без числа́? Вы́ну бо все́м ве́рным оби́льно дае́ши исцеле́ние.
Богородичен
Впа́дша мя́ в разбо́йники душегу́бными де́лы и сме́ртию потопле́на воздви́гни, молю́ Ти́ ся́, Госпоже́: Сы́ну Своему́ и Бо́гу за мене́ помоли́ся.
Песнь 3
Ирмос
Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Тропарь
Любо́вию Христо́вою при́сно разжиза́емь к це́ркви святе́й, та́мо, преблаже́нне, я́ко а́гнец незло́бив, непра́ведное претерпе́л еси́ убие́ние.
Тропарь
Кро́вию ти́ пресве́тлою Це́рковь твоя́ укра́шшися, све́тлы лучи́ испуща́ет чуде́с, пою́щи па́мять ти́, достосла́вне.
Тропарь
Заря́ми Тро́ичными измла́да просве́щся, Христу́ насле́дник, свя́те, бы́сть, Его́же моли́ посла́ти ми́р душа́м на́шим.
Богородичен
Чу́до Бо́жия Рождества́ Ти́, Чи́стая, вся́каго естества́ прехо́дит чи́н: Бо́га бо Пресу́щна зача́т во чре́ве и, ро́ждши, пребыва́еши Присноде́ва.
Песнь 4
Ирмос
Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Тропарь
Благоде́тельно измла́да в ве́ре чи́сте воспита́н, чи́стыми свои́ми труды́ любо́вию Влады́це после́довал еси́, наде́ждею На́нь льсти́ваго врага́ посрами́в.
Тропарь
Све́тлостию сия́я, свя́те Вячесла́ве, грехи́ омраче́ны су́щия просвети́ твои́ми моли́твами, с ли́ки му́ченик имы́й дерзнове́ние за на́с моли́тися.
Тропарь
Мечи́ ссека́емь, свя́те, непобеди́ме, врага́ лука́ваго мече́м терпе́ния ссе́кл еси́, те́м и вене́ц прия́т из руки́ Вседержи́теля.
Богородичен
Неизглаго́ланы и непостижи́мы, богоподо́бны вои́стину су́ть Твоего́, Богоро́дице, Рождества́ земны́м и небе́сным, Присноде́во, та́йны.
Песнь 5
Ирмос
Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Тропарь
Твои́ми страстьми́, прехва́льне, неболе́зненную жи́знь восприя́в, свя́те Вячесла́ве, стра́ждущим все́м яви́ся заступле́ние, на по́мощь ве́рно тя́ зову́щим.
Тропарь
Па́че со́лнца, блаже́нне, просвети́л еси́ се́вера, и ю́га, и за́пада концы́ пресве́тлыми заря́ми чуде́с твои́х. Те́м на́с озари́, свя́те, па́мять твою́ пра́зднующих.
Тропарь
Су́щим в беда́х помо́щник ты́ бы́сть, ни́щим кормле́ние, печа́льным уте́ха, те́м и по сме́рти, свя́те, вся́ избавля́еши ве́рно тя́ зову́щия на по́мощь.
Богородичен
Богоро́дицу Тя́ от души́ испове́дующия, Влады́чице ми́ру Блага́я, спаса́й, Тя́ бо заступле́ние, Непоро́чная, и́мамы, су́щую вои́стину Богоро́дицу.
Песнь 6
Ирмос
Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.
Тропарь
Житие́ чи́сто поще́нием стяжа́в, Вячесла́ве преди́вне, и а́нгелом сограждани́н яви́вся, с ни́миже моли́ о спасе́нии ду́ш на́ших.
Тропарь
Княже́ние земно́е оста́вил еси́ вре́менное и ца́рское украше́ние прия́т из десни́цы Влады́чни, тле́нными ве́чная, я́ко му́др, стяжа́в.
Тропарь
Приими́ похвале́ние из окая́нных усте́н, свя́те, не могу́ща похвале́ния ти́ досто́йна исплести́ и моли́ Ми́лостиваго Бо́га дарова́ти на́м ве́лию ми́лость.
Богородичен
Пречи́стая Влады́чице, ро́ждшая земны́м Ко́рмчию и Го́спода, по́хотем ми́ злолю́тым устро́й смуще́ние и тишину́ пода́ждь се́рдцу моему́.
Песнь 7
Ирмос
Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Тропарь
Ста́рый злоде́й зави́де свято́му твоему́ житию́ и науща́ет на убие́ние безу́мнаго ти́ собра́та. Ты́ же чи́стою со́вестию немо́лчно Творцу́ своему́ вопия́ше: благослове́н Бо́г оте́ц на́ших.
Тропарь
Ве́село лику́ет Пра́га дне́сь, пресла́вный ти́ гра́д, почита́я па́мять твою́, и, чудесы́ твои́ми озаря́я све́тло, вся́ страны́ созыва́ет вопи́ти: благослове́н Бо́г оте́ц на́ших.
Тропарь
Ле́стию прелука́ваго дре́вле очервлена́ бы́сть земля́ твоя́ братоуби́йственною руко́ю; ны́не же, кро́вию ти́ окропи́вшися, благоуха́ния же́ртву Христо́ви приноша́ет, вопию́щи: благослове́н Бо́г оте́ц на́ших.
Богородичен
Тобо́ю на́м, Деви́це, Све́т возсия́, те́мным, Ты́ бо родила́ еси́ Зижди́теля все́м и Бо́га, у Него́же проси́, Пречи́стая, при́сно посыла́ти на́м, ве́рным, ве́лию ми́лость.
Песнь 8
Ирмос
Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Тропарь
Весе́лия добро́тами на́с озаря́еши, пресла́вне, па́че со́лнца в земли́ Боге́мстей благода́тными заря́ми свы́ше освяще́н, превозноша́я Христа́ во ве́ки.
Тропарь
Те́ло твое́ свято́е, блаже́нне, прии́м, Пра́га дне́сь, прехва́льный ти́ гра́д, преди́вная чудеса́ ми́рови провозвеща́ет, превозноша́я Христа́ во ве́ки.
Тропарь
Кро́тостию укра́шен, преди́вне, и ра́зумом благове́рия просве́щся, Тро́ицы Пресвяте́й яви́лся еси́ вои́стину пропове́дник, превозноша́я Христа́ во ве́ки.
Богородичен
От Све́та Светода́вца Словесе́ зача́т и неизрече́нно родила́ еси́ Пресу́щаго: Ду́х бо Бо́жий, Деви́це, в Тя́ всели́ся, те́м Тя́ пое́м, Чи́стая, во ве́ки вся́.
Песнь 9
Ирмос
Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Тропарь
Ве́лия благода́ти сподо́бився, сла́вне, просвети́л еси́ всю́ вселе́нную, исцеле́ния все́м оби́льно подава́я.
Тропарь
Приими́, свя́те, ра́дость а́нгельскую и, предстоя́ Зижди́телю своему́, о на́с помоли́ся, тебе́ велича́ющих.
Тропарь
Прии́м ны́не блаже́нный поко́й, не преста́й моля́ся, пресла́вне, свята́го блаже́нства причасти́тися вы́ну тя́ велича́ющим.
Богородичен
Богоро́дице, ро́ждшая Сло́во па́че словесе́, Зижди́теля Своего́, Де́во, Того́ умоли́ спасти́ся душа́м на́шим.