Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ прпⷣбномꙋ григо́рїю пе́льшемскомꙋ, во́логодскомꙋ чꙋдотво́рцꙋ.

Прп. Григория Пельшемского, Вологодского (1441) 13 октября 2026

Конда́къ а҃

Возбра́нный ᲂу҆го́дниче хрⷭ҇то́въ, свѧ́те григо́рїе, ꙗ҆́кѡ бл҃гі́й ра́бъ вше́дый въ ра́дость гдⷭ҇а твоегѡ̀, молѝ влⷣкꙋ нб҃сѐ и҆ землѝ пода́ти на́мъ бл҃года́ть свы́ше, съ терпѣ́нїемъ до конца̀ понестѝ бл҃го́е и҆ ле́гкое и҆́го є҆гѡ̀, да зове́мъ тѝ, ꙗ҆́кѡже ча̑да ко ѻ҆тцꙋ̀:

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

І҆́косъ а҃

А҆́гг҃лѡвъ ли́цы твоемꙋ̀ вели́комꙋ во сп҃си́тельныхъ по́двизѣхъ терпѣ́нїю ᲂу҆диви́шасѧ: и҆ мы̀, ᲂу҆блажа́юще бл҃года́тное зва́нїе твоѐ на слꙋже́нїе гдⷭ҇ꙋ, ра́достнѡ возглаша́емъ тебѣ̀:

Ра́дꙋйсѧ, ѿ пеле́нъ и҆збра́нный бг҃ꙋ: ра́дꙋйсѧ, добро́тами дꙋ́ха и҆з̾дѣ́тска ᲂу҆краше́нный.

Ра́дꙋйсѧ, чистото́ю дꙋше́вною возсїѧ́вый: ра́дꙋйсѧ, зна́мєнїѧ блгⷣти ꙗ҆́вѣ въ себѣ̀ носи́вый.

Ра́дꙋйсѧ, дре́во, насажде́нное посредѣ̀ цр҃кве бж҃їѧ: ра́дꙋйсѧ, цвѣ́те бжⷭ҇твеннагѡ са́да.

Ра́дꙋйсѧ, бл҃говоздѣ́ланнаѧ лозо̀ вїногра́да хрⷭ҇то́ва: ра́дꙋйсѧ, ѿ ю҆́нагѡ во́зраста тѣ́снымъ пꙋте́мъ ше́ствовати и҆збра́вый.

Ра́дꙋйсѧ, ѿ мла́дости себѐ хрⷭ҇тꙋ̀ возложи́вый.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ в҃

Ви́дѧ бл҃га̑ѧ мі́ра сегѡ̀ скоротє́чна и҆ непостоѧ́нна, ᲂу҆́мъ тво́й ко творцꙋ̀ возложи́въ, пренебре́глъ є҆сѝ ро́да свѣ́тлость, ле́сть бога́тства вре́меннагѡ, и҆ ѿ ю҆́ности возлюби́лъ є҆сѝ возлюби́вшаго тѧ̀, є҆́же взыва́ти къ немꙋ̀: А҆ллилꙋ́їа.

І҆́косъ в҃

Ра́зꙋмъ лжеиме́ненъ ко сп҃се́нїю вѣ́дѧ, ѡ҆зари́тисѧ свы́ше восхотѣ́лъ є҆сѝ: сегѡ̀ ра́ди съ ра́зꙋмомъ и҆ во́лю въ послꙋша́нїе плѣнѧ́ѧ вѣ́рѣ, въ терпѣ́нїи восхотѣ́лъ є҆сѝ стѧжа́ти дꙋ́шꙋ твою̀. Тѣ́мъ и҆ мы̀, ѿ ѻ҆́трочества тѧ̀ и҆збра́нный сосꙋ́дъ бл҃года́ти вѣ́дѧще, вопїе́мъ къ тебѣ̀:

Ра́дꙋйсѧ, дх҃а ст҃а́гѡ бл҃гопрїѧ́тное ѡ҆бита́лище: ра́дꙋйсѧ, бл҃года́тный пло́дъ въ дꙋшѝ твое́й воздѣ́лавый.

Ра́дꙋйсѧ, насажде́нїе во дво́рѣхъ до́мꙋ бг҃а на́шегѡ краснѡ̀ процвѣ́тшее: ра́дꙋйсѧ, а҆́гг҃льское житїѐ возлюби́вый.

Ра́дꙋйсѧ, ѿ млады́хъ ногте́й стезѧ́мъ подвигополо́жника послѣ́довавый и҆ дꙋ́шꙋ твою̀ бг҃ꙋ сочета́вый: ра́дꙋйсѧ, сла́дости плотска́гѡ сожи́тїѧ бг҃омꙋ́дре презрѣ́вый.

Ра́дꙋйсѧ, ꙗ҆́кѡ и҆зволе́нїемъ бж҃їимъ и҆ роди́телїе твоѝ соизво́лиша, да рабо́таеши хрⷭ҇тꙋ̀: ра́дꙋйсѧ, ꙗ҆́кѡ возлюби́въ нищетꙋ̀ некра́домꙋ, бг҃а́тство роди́телей твои́хъ ѡ҆ста́вилъ є҆сѝ.

Ра́дꙋйсѧ, ꙗ҆́кѡ рабы̑ твоѧ̀ и҆ рабы̑ни свободи́въ, всегѡ̀ себѐ хрⷭ҇тꙋ̀ порабо́тилъ є҆сѝ:

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ г҃

Си́лою неви́димою веде́нъ бы́лъ є҆сѝ въ незна́ємаѧ и҆ непроходи̑маѧ мѣста̀, є҆гда̀ ᲂу҆бѣга́ѧ сла̑вы человѣ́ческїѧ, че́сть и҆ достоѧ́нїе земно́е ѡ҆ста́вилъ є҆сѝ, прише́лъ же є҆сѝ во ѡ҆бита́лище невѣ́домо, хотѧ̀ въ ско́рбехъ наꙋчи́тисѧ пѣ́ти: А҆ллилꙋ́їа.

І҆́косъ г҃

И҆мѣ́ѧ тве́рдое предложе́нїе до конца̀ ѡ҆ста́вити мі́ръ, по преставле́нїи честны́хъ роди́телей твои́хъ, всѧ̑ и҆мѣ̑нїѧ твоѧ̑ ни́щымъ и҆ ᲂу҆бѡ́гимъ разда́лъ є҆сѝ, да стѧ́жеши себѣ̀ сокро́вище на нб҃сѝ, є҆го́же ѡ҆брѣстѝ сподо́би и҆ на́съ, пѣсносло́вѧщихъ тѧ̀:

Ра́дꙋйсѧ, сла́внаѧ мі́ра сегѡ̀ во ᲂу҆ме́ты вмѣни́вый: ра́дꙋйсѧ, ꙗ҆́кѡ дꙋше́ю твое́ю предложи́вый собра́ти бога́тство нетлѣ́нное.

Ра́дꙋйсѧ, въ весе́лїи се́рдца крⷭ҇тъ хрⷭ҇то́въ на ра́мо твоѐ взе́мый: ра́дꙋйсѧ, хрⷭ҇толюби́выми трꙋда́ми крѣ́пость дꙋ́ха стѧжа́вый.

Ра́дꙋйсѧ, слеза́ми, ꙗ҆́кѡ росо́ю, дꙋше́внꙋю ни́вꙋ напои́вый: ра́дꙋйсѧ, тща́выйсѧ не себѣ̀, но хрⷭ҇тꙋ̀ жи́ти безстра́стїемъ.

Ра́дꙋйсѧ, со́вѣстїю чи́стою въ мл҃твахъ а҆́ки безпло́тенъ бы́вый: ра́дꙋйсѧ, на бг҃окра́снꙋю добро́тꙋ взира́ѧ, ѿ плотскі́ѧ добро́ты ѻ҆́ко твоѐ ѿврати́вый.

Ра́дꙋйсѧ, посто́мъ, бдѣ́нїемъ, воздержа́нїемъ ле́сть мі́ра и҆ пло́ти низложи́вый.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ д҃

Бꙋ́рю страсте́й, во пло́ти человѣ́честѣй волнꙋ́ющꙋюсѧ, ѿ ю҆́на во́зраста ᲂу҆кроти́ти тщи́лсѧ є҆сѝ, є҆гда̀ въ се́рдце твоѐ нача́ло премꙋ́дрости стра́хъ бж҃їй всади́въ, и҆ бы́въ и҆спо́лненъ и҆́мъ, николи́же дѣ̑тскимъ глꙋмле́нїємъ примѣша́лсѧ є҆сѝ, но во днѝ и҆ въ нощѝ зако́нꙋ бж҃їю поꙋча́лсѧ, пѣ́сненнѡ глаго́лалъ є҆сѝ: А҆ллилꙋ́їа.

І҆́косъ д҃

Слы́ша трꙋды̀ и҆ по́двиги бг҃оно́снагѡ дїонѵ́сїа, ᲂу҆чени́къ бы́лъ є҆сѝ є҆гѡ̀: преꙋспѣ́въ же въ добродѣ́телѣхъ є҆гѡ̀, ѡ҆би́тель но́вꙋ назда́ти восхотѣ́лъ є҆сѝ. и҆ мы̀, вкꙋша́юще ны́нѣ плоды̀ трꙋдѡ́въ твои́хъ, въ весе́лїи воспѣва́емъ:

Ра́дꙋйсѧ, въ по́двизѣхъ вели́комꙋ дїонѵ́сїю соревнова́вый: ра́дꙋйсѧ, въ си́лѣ хрⷭ҇то́вѣ є҆ѵⷢ҇льскимъ пꙋте́мъ ше́ствовавый.

Ра́дꙋйсѧ, бдѣ́нїемъ и҆ мл҃твою дꙋ́шꙋ твою̀ ѡ҆чи́стивый: ра́дꙋйсѧ, лѣ́ствицею добродѣ́телей на мы́сленное нб҃о востекі́й.

Ра́дꙋйсѧ, смире́нїемъ высо́каѧ, нището́ю бога̑таѧ стѧжа́вый: ра́дꙋйсѧ, ѡ҆би́тель ꙗ҆́кѡ са́дъ нбⷭ҇ный насади́вый.

Ра́дꙋйсѧ, въ по́двизѣхъ ѡ҆́бразъ и҆́нокѡмъ бы́вый: ра́дꙋйсѧ, пꙋсты́нный жи́телю, въ тѣлесѝ а҆́гг҃лѡмъ подо́бивыйсѧ.

Ра́дꙋйсѧ, безмо́лвїѧ люби́телю, дꙋ́хомъ твои́мъ въ вы́шнихъ ѡ҆бита́вый:

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ є҃

Бг҃отѣ́чное къ црⷭ҇твїю нбⷭ҇номꙋ соверша́ѧ ше́ствїе, потща́лсѧ є҆сѝ въ любвѝ хрⷭ҇то́вѣ и҆ и҆ны́хъ на стєзѝ пра̑выѧ къ несконча́емѣй жи́зни направлѧ́ти, да ᲂу҆мꙋдре́ннїи тобо́ю во сп҃се́нїе зове́мъ: А҆ллилꙋ́їа.

І҆́косъ є҃

Ви́дѣвше влады́цы и҆ кнѧ̑зи лю́дстїи бл҃горазсꙋ́дливость и҆ добродѣ́тєли твоѧ̑, прпⷣбне, и҆ска́хꙋ просвѣти́тисѧ и҆ по́льзоватисѧ ѿ тебѣ̀, ꙗ҆́коже сотворѝ кнѧ́зь ѻ҆те́чественныѧ страны̀ ю҆́рїй, є҆го́же ча́дъ кр҃ще́нїемъ просвѣти́лъ є҆сѝ. тѣ́мже восхвалѧ́емъ тѧ̀:

Ра́дꙋйсѧ, и҆́стиннагѡ ра́зꙋма ᲂу҆чи́телю: ра́дꙋйсѧ, пꙋтѝ, вводѧ́щагѡ въ жи́знь, наста́вниче.

Ра́дꙋйсѧ, прилѣ́жнѡ ѡ҆бꙋча́выйсѧ и҆ ѡ҆бꙋча́вый бл҃гоче́стїю: ра́дꙋйсѧ, вѣ́рнѡ ᲂу҆твержда́выйсѧ и҆ ᲂу҆твержда́вый въ правосла́вїи.

Ра́дꙋйсѧ, покланѧ́выйсѧ бг҃ꙋ дꙋ́хомъ и҆ и҆́стиною: ра́дꙋйсѧ, слꙋжи́вый є҆мꙋ̀ во и҆сповѣ́данїи ᲂу҆сте́нъ и҆ се́рдца.

Ра́дꙋйсѧ, вѣ́ры и҆́стинныѧ блюсти́телю: ра́дꙋйсѧ, ᲂу҆ста́вѡвъ и҆ законоположе́нїй цр҃кве храни́телю.

Ра́дꙋйсѧ, и҆́нокѡвъ бг҃освѣ́тлый вождю̀.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ ѕ҃

Проповѣ́дꙋютъ вѣ́рнїи миротворе́ние твоѐ, прпⷣбне, є҆гда̀ ᲂу҆слы́шавъ нестрое́нїе двꙋ́хъ кнѧзе́й, є҆ди́нагѡ низве́ржена со престо́ла, дрꙋга́гѡ же на́глѡ похи́тивша чꙋ́ждое наслѣ́дїе, потща́лсѧ є҆сѝ ше́ствовати въ ца́рственный гра́дъ москвꙋ̀ и҆ примире́нїю кнѧ́жескꙋ послꙋжи́ти, да при воспрїѧ́тїи кі́имждо своегѡ̀ воспѣва́еши съ ни́ми: А҆ллилꙋ́їа.

І҆́косъ ѕ҃

Возсїѧ̀ ре́вность твоѧ̀ по достоѧ́нїи хрⷭ҇то́вѣ бл҃госе́рде, є҆гда̀ стропти́вый кнѧ́зь дими́трїй прїи́де ѕло́бнѡ на гра́дъ во́логдꙋ со ра́тїю и҆ мнѡ́га ѕла̑ лю́демъ сотворѝ: ты̀ же небоѧ́зненнѡ ѡ҆бличи́въ неи́стовство є҆гѡ̀, ꙗ҆́кѡ миротво́рецъ, безче́стїе и҆ порꙋга́нїе претерпѣ́лъ є҆сѝ. сегѡ̀ ра́ди ви́дѧще миролю́бный по́двигъ тво́й, досто́йнѡ восхвалѧ́емъ тѧ̀:

Ра́дꙋйсѧ, ми́ра и҆ правоты̀ въ лю́дехъ блюсти́телю: ра́дꙋйсѧ, мще́нїѧ и҆ ѕло́бы ѿ серде́цъ и҆скорени́телю.

Ра́дꙋйсѧ, тве́рдый защи́тниче неви́нности и҆ непра́ведныхъ ᲂу҆мышле́нїй ѡ҆бличи́телю: ра́дꙋйсѧ, градѡ́въ и҆ гра́жданъ ᲂу҆мири́телю.

Ра́дꙋйсѧ, гото́вый въ напа́стехъ защи́тниче: ра́дꙋйсѧ, властолю́бїѧ прогони́телю.

Ра́дꙋйсѧ, ѿ смꙋ́тъ и҆ треволне́нїй жите́йскихъ и҆схити́телю: ра́дꙋйсѧ, хода́таю ѡ҆ лю́дехъ пред̾ бг҃омъ и҆ пред̾ кнѧ́зи люді́й.

Ра́дꙋйсѧ, ꙗ҆́кѡ тобо́ю познае́мъ, ко́ль красно̀ бы́ти въ ми́рѣ.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ з҃

Хотѧ́щꙋ тѝ сп҃стѝ ча́дъ, тобо́ю со́бранныхъ, любо́вь, ко́рень всѣ́хъ бл҃ги́хъ, заповѣ́далъ є҆сѝ и҆мѣ́ти и҆́мъ междꙋ̀ собо́ю, ю҆́же хранѧ́щымъ ѡ҆бѣща́лъ є҆сѝ ни въ чесо́мже и҆мѣ́ти ѡ҆скꙋде́нїе. и҆спросѝ и҆ на́мъ ᲂу҆ человѣколю́бца хрⷭ҇та̀ бл҃года́ть братолю́бїѧ, да пое́мъ: А҆ллилꙋ́їа.

І҆́косъ з҃

Но́ва тѧ̀ показа̀ гдⷭ҇ь ᲂу҆го́дника и҆ все́й рѡссі́йстѣй, па́че же во́логодстѣй, странѣ̀: ѡ҆би́тель бо ᲂу҆гото́вавъ себѐ дх҃ꙋ ст҃о́мꙋ, ѡ҆би́тель длѧ сп҃се́нїѧ и҆́ночествꙋющихъ созда́лъ є҆сѝ, въ не́йже трꙋды̀ ко трꙋдѡ́мъ прилага́ѧ, хрⷭ҇топодража́тельный примѣ́ръ ᲂу҆ченикѡ́мъ твои̑мъ ѡ҆ста́вилъ є҆сѝ, на́нь же взира́юще, тебѣ̀ вѣ́рнаго наста́вника восхвалѧ́емъ:

Ра́дꙋйсѧ, бл҃года́ти жили́ще въ себѣ̀ ᲂу҆гото́вавый: ра́дꙋйсѧ, до́ме дх҃а ст҃а́гѡ, до́мъ длѧ примета́ющихсѧ къ до́мꙋ бж҃їю ᲂу҆стро́ивый.

Ра́дꙋйсѧ, пꙋстынолю́бный ѻ҆́рле, длѧ птенцє́въ твои́хъ пꙋсты́ню ми́ра и҆збра́вый: ра́дꙋйсѧ, наста́вниче безмо́лвствꙋющихъ.

Ра́дꙋйсѧ, на водѣ̀ поко́йнѣ сле́зъ и҆ ᲂу҆миле́нїѧ воспита́выйсѧ: ра́дꙋйсѧ, то́южде пи́щею поста̀ и҆ воздержа́нїѧ и҆ послѣ́дователей твои́хъ пита́вый.

Ра́дꙋйсѧ, си́лꙋ хрⷭ҇то́вꙋ въ не́мощи ꙗ҆ви́вый и҆ то́юже си́лою бл҃годꙋ́шнѡ не́мощи немощны́хъ носи́вый: ра́дꙋйсѧ, мл҃твенниче, мл҃твы твоѧ̑ ѡ҆ врꙋче́нныхъ тебѣ̀ прилѣ́жнѡ возноси́вый.

Ра́дꙋйсѧ, тѣ́миже мл҃твами ста́до твоѐ ᲂу҆твержда́вый.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ и҃

Стра́ннѡ и҆ прише́льчески жи́тельствовати на землѝ хрⷭ҇та̀ ра́ди и҆зво́ливый, стра́нное длѧ сꙋ́щихъ ѿ мі́ра житїѐ пожи́лъ є҆сѝ: до́лꙋ бо гѡ́рнѧѧ мы́слѧ, и҆ на землѝ нбⷭ҇наѧ дѣ́ѧ, и҆ въ мі́рѣ сы́й не бы́лъ є҆сѝ ѿ мі́ра. тѣ́мже мы̀, ᲂу҆блажа́юще нбⷭ҇ное на землѝ жи́тельство твоѐ, глаго́лемъ бг҃ꙋ: А҆ллилꙋ́їа.

І҆́косъ и҃

Всѣ́мъ се́рдцемъ пре́данъ бы́лъ є҆сѝ хрⷭ҇тꙋ̀ бг҃ꙋ въ животѣ̀ твое́мъ, бг҃оно́се, є҆мꙋ́же и҆ рабо́талъ є҆сѝ въ преподо́бїи и҆ пра́вдѣ: сегѡ̀ ра́ди и҆ гдⷭ҇ь, ви́дѧ трꙋды̀ твоѧ̀, бдѣ́нїе же и҆ поще́нїе, є҆щѐ въ жи́зни просла́ви тѧ̀ по́двигами свѧ́тости, ꙗ҆̀же воспѣва́юще, тебѣ̀ глаго́лемъ:

Ра́дꙋйсѧ, та́йнъ бж҃їихъ вѣ́рный строи́телю: ра́дꙋйсѧ, вѣ́рный сщ҃еннодѣ́йствователю слꙋже́нїѧ гдⷭ҇нѧ.

Ра́дꙋйсѧ, свѣти́льниче, на свѣ́щницѣ бл҃года́тнѣмъ поста́вленный: ра́дꙋйсѧ, бо́дренный дѣ́лателю вертогра́да хрⷭ҇то́ва.

Ра́дꙋйсѧ, мꙋ́дрствовавый ꙗ҆́же во хрⷭ҇тѣ̀ і҆и҃сѣ: ра́дꙋйсѧ, ꙗ҆́кѡ дѣ́ѧ ᲂу҆чи́лъ є҆сѝ презира́ти пло́ть, прилежа́ти же ѡ҆ дꙋшѝ, ве́щи безсме́ртнѣй.

Ра́дꙋйсѧ, пло́ть ᲂу҆мꙋ̀, а҆ ᲂу҆́мъ дꙋ́хꙋ покори́вый: ра́дꙋйсѧ, дꙋ́хомъ ходи́вый и҆ по́хѡти плотскі̑ѧ ѿгна́вый.

Ра́дꙋйсѧ, разли́чными страстьмѝ бори́мымъ помо́щниче.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ ѳ҃

Всѧ́кое тща́нїе прилага́лъ є҆сѝ, бг҃обл҃же́нне, є҆́же возгражде́ннꙋю ѿ тебє̀ ѡ҆би́тель содѣ́лати вертогра́домъ благопло́днымъ, да дѣ́лателїе є҆гѡ̀, наслажда́ющесѧ во вре́мѧ своѐ плода́ми трꙋдѡ́въ твои́хъ, воспѣва́ютъ согла́снѡ бг҃ꙋ въ де́нь вѣ́чнагѡ весе́лїѧ: А҆ллилꙋ́їа.

І҆́косъ ѳ҃

Виті́и многовѣща́ннїи сꙋ́ть дѣѧ́нїѧ житїѧ̀ твоегѡ̀, и҆́миже, ꙗ҆́кѡ бл҃гоглаго́ливыми ᲂу҆ста́ми, наꙋча́еши на́съ возвѣща́ти хвалꙋ̀ гдⷭ҇ню и҆ глаго́лати къ тебѣ̀:

Ра́дꙋйсѧ, бг҃омꙋ́драѧ добро́то: ра́дꙋйсѧ, нбⷭ҇ный человѣ́че и҆ земны́й а҆́гг҃ле.

Ра́дꙋйсѧ, смиренномꙋ́дрїѧ рачи́телю: ра́дꙋйсѧ, свѣти́льниче, въ но́щи мі́ра сегѡ̀ на́съ ѡ҆зарѧ́ѧй.

Ра́дꙋйсѧ, за́повѣдїй влⷣчнихъ бо́дрственный блюсти́телю: ра́дꙋйсѧ, ше́ствꙋющихъ пꙋте́мъ хрⷭ҇то́вымъ спꙋ́тниче и҆ води́телю.

Ра́дꙋйсѧ, коле́блющихсѧ въ вѣ́рѣ ᲂу҆твержде́нїе: ра́дꙋйсѧ, ѡ҆слабѣва́ющихъ въ по́двизѣхъ ᲂу҆крѣпле́нїе.

Ра́дꙋйсѧ, свѣтоводи́телю блꙋжда́ющихъ въ стезѧ́хъ стро́потныхъ.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ і҃

Спастѝ хотѧ̀ во ѡ҆би́тель твою̀ прите́кшихъ, є҆гда̀ позна́лъ є҆сѝ ѿше́ствїе твоѐ ѿ мі́ра къ премі́рнѣй жи́зни и҆ ѿ трꙋдѡ́въ къ поко́ю, призва́лъ є҆сѝ бра́тїю твою̀, ю҆́же, ꙗ҆́кѡ до́брый па́стырь, наста́вивъ рабо́тати въ ми́рѣ гдⷭ҇ꙋ, врꙋчи́лъ є҆сѝ и҆́хъ но́вꙋ и҆гꙋ́менꙋ, дꙋ́шꙋ же твою̀ бг҃ꙋ пре́далъ є҆сѝ, воспѣва́ѧ: А҆ллилꙋ́їа.

І҆́косъ і҃

Стѣ́нꙋ крѣ́пкꙋ въ не́мощехъ и҆ забра́ло неѡбори́мо ѿ всѧ́кихъ навѣ́тѡвъ вра́жїихъ, показа̀ тѧ̀ вседѣ́тель чꙋдодѣ́йствїемъ во ст҃ѣ́мъ преставле́нїи твое́мъ: нача́вшꙋ бо соверша́тисѧ ѡ҆бы́чномꙋ надгро́бномꙋ ѡ҆ тебѣ̀ пѣ́нїю и҆ цѣлова́нїю послѣ́днемꙋ, бѣ́сный и҆сцѣлѣ̀, и҆ ѡ҆держи́мый болѣ́знїю ѻ҆че́съ и҆́нокъ тогда̀ же и҆сповѣ́да пред̾ всѣ́ми внеза́пное своѐ и҆сцѣле́нїе: ѡ҆бра́дѡваннаѧ же бра́тїѧ и҆ ᲂу҆ченицы̀, ви́дѣвше таково́е прославле́нїе свы́ше своегѡ̀ па́стырѧ, воспѣ́ша є҆ди́нѣми ᲂу҆сты̀:

Ра́дꙋйсѧ, а҆́вво всебл҃же́нне, бо́дрственнѡ соверши́вый до́брый по́двигъ: ра́дꙋйсѧ, къ премі́рномꙋ возше́дый пребыва́нїю.

Ра́дꙋйсѧ, кла́сы присноживо́тїѧ пожа́вый: ра́дꙋйсѧ, блгⷣть чꙋде́съ ѿ бг҃а прїе́мый.

Ра́дꙋйсѧ, бѣсѡ́вскїѧ полкѝ побѣди́вый: ра́дꙋйсѧ, всѧ̑ стрѣ́лы лꙋка́вагѡ разжжє́нныѧ ᲂу҆гаси́вый.

Ра́дꙋйсѧ, мо́ре жите́йское бл҃гоѡти́шно преплы́вый: ра́дꙋйсѧ, къ нестарѣ́ющейсѧ жи́зни преше́дый.

Ра́дꙋйсѧ, нбⷭ҇ный поко́й ѻ҆́нагѡ вѣ́ка ᲂу҆лꙋчи́вый.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ а҃і

Пѣ́нїе бл҃года́рственное въ се́рдцы вы́нꙋ приносѧ̀ хрⷭ҇тꙋ̀, приве́дшемꙋ тѧ̀ непреткнове́нна посредѣ̀ сѣте́й мно́гихъ: ѻ҆ба́че ѿ мно́гагѡ смиренномꙋ́дрїѧ, во ѡ҆чище́нїе дꙋшѝ и҆ тѣ́ла твоегѡ̀, ди̑внаѧ пред̾ ѿше́ствїемъ твои́мъ завѣща́лъ є҆сѝ: да тѣ́ло твоѐ, на не́мже носи́лъ є҆сѝ ꙗ҆́звы хрⷭ҇то́вы, є҆гда̀ сконча́ешисѧ, вле́кше вве́ргнꙋтъ въ бла́то. Бл҃гоговѣ̑ющаѧ же ко ѻ҆ц҃ꙋ̀ ча̑да, по преставле́нїи твое́мъ, че́стнѣ преда́ша землѝ тѣ́ло твоѐ, провожда́юще дꙋ́хъ на нб҃са̀ свѣ́тлою пѣ́снїю бг҃ꙋ: А҆ллилꙋ́їа.

І҆́косъ а҃і

Свѣтоза́рнꙋю лꙋчꙋ̀ дꙋ́ха ꙗ҆́вѣ показа́лъ є҆сѝ и҆ въ бг҃оно́снѣмъ тѣ́лѣ твое́мъ, є҆гда̀ въ преставле́нїи бл҃гоꙋха́нїе разлїѧ́сѧ ѿ моще́й твои́хъ и҆ цѣльбоно́снаѧ си́ла и҆стечѐ, ꙗ҆́кѡ ѿ и҆сто́чника, послѣдѝ же и҆ мо́щи твоѧ̑ нетлѣ̑нны ꙗ҆ви́шасѧ. и҆ ны́нѣ, въ невече́рнемъ свѣ́те съ првⷣными ликовствꙋ́ѧ, по досто́инствꙋ слы́шиши ѿ на́съ:

Ра́дꙋйсѧ, вѣ́рный ра́бе и҆ дрꙋ́же бж҃їй: ра́дꙋйсѧ, за вѣ́рность твою̀ вше́дый въ ра́дость гдⷭ҇а твоегѡ̀.

Ра́дꙋйсѧ, и҆звѣсти́вый зва́нїе дѣ́лы: ра́дꙋйсѧ, пра́веднымъ житїе́мъ твои́мъ собра́вый ли́къ ше́ствꙋющихъ по тебѣ̀ къ бг҃ꙋ.

Ра́дꙋйсѧ, свѣти́льниче, свѣтѧ́й и҆ горѧ́й ѡ҆ на́съ пред̾ бг҃омъ: ра́дꙋйсѧ, возносѧ̀ къ бг҃ꙋ мл҃твы на́шѧ, ꙗ҆́кѡ кади́ло.

Ра́дꙋйсѧ, пꙋтевождю̀ къ црⷭ҇твꙋ сла́вы: ра́дꙋйсѧ, денни́цѣ, ꙗ҆влѧ̑ющаѧ зрѧ́щымъ горѣ̀ со́лнце пра́вды.

Ра́дꙋйсѧ, приста́нище взыска́ющымъ бл҃гоѡти́шїѧ нбⷭ҇нагѡ.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ в҃і

Бл҃года́ть гдⷭ҇а і҆и҃са и҆спо́лни се́рдце твоѐ да́ры дх҃а ст҃а́гѡ въ житїѝ твое́мъ, а҆ по сме́рти ѡ҆сїѧ̀ тѧ̀ сла́вою безсме́ртїѧ. мы̀ же, ѿ ра́ки моще́й твои́хъ воспрїе́млюще то́ки блгⷣти, напаѧ́ющыѧ дꙋ́шы на́ша во сп҃се́нїе, всеконе́чнѣ вопїе́мъ ѡ҆ тебѣ̀ бг҃ꙋ: А҆ллилꙋ́їа.

І҆́косъ в҃і

Пою́ще твоѐ досточꙋ́дное житїѐ, бг҃обл҃же́нне, восхвали́ти тебє̀ недоꙋмѣва́емъ по достоѧ́нїю: ѻ҆ба́че горѧ́ще любо́вїю къ присноживо́тнѣй па́мѧти твое́й, не ᲂу҆молчи́мъ вопи́ти тебѣ̀:

Ра́дꙋйсѧ, тече́нїе по́стническое до́брѣ сконча́вый: ра́дꙋйсѧ, пꙋте́мъ пра́вымъ непреткнове́ннѡ ше́ствовавый.

Ра́дꙋйсѧ, ꙗ҆́кѡ сѣ́ѧвый слеза́ми, ны́нѣ плоды̀ сп҃се́нїѧ въ ра́дости пожина́еши: ра́дꙋйсѧ, земны́ми по́двиги нбⷭ҇наѧ дарова̑нїѧ стѧжа́вый.

Ра́дꙋйсѧ, ꙗ҆́кѡ въ ми́рѣ жи́знь сконча́вый, въ землѝ кро́ткихъ досто́йнѡ водворѧ́ешисѧ: ра́дꙋйсѧ, ꙗ҆́кѡ сщ҃е́нникъ во сщ҃е́нницѣхъ и҆ пꙋстынножи́тель въ пꙋстынножи́телехъ жре́бїй тво́й воспрїѧ́лъ є҆сѝ.

Ра́дꙋйсѧ, зрѣ́нїемъ лица̀ бж҃їѧ веселѧ́йсѧ: ра́дꙋйсѧ, во сла́вѣ нбⷭ҇нѣй прⷭ҇то́лꙋ прест҃ы́ѧ трⷪ҇цы предстоѧ́й.

Ра́дꙋйсѧ, ѡ҆ ѡ҆би́тели и҆ ста́дѣ твое́мъ, є҆́же трꙋдолю́бнѡ собра́лъ є҆сѝ, молѧ́йсѧ: ра́дꙋйсѧ, ꙗ҆́кѡ ѡ҆ все́й правосла́внѣй це́ркви и҆ бл҃гочести́вѣмъ ца́рствѣ рѡссі́йстѣмъ вы́нꙋ предста́тельствꙋѧй.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ г҃і

Ѽсвѧщє́ннаѧ главо̀, прпⷣбне ѻ҆́ч҃е григо́рїе! молѝ непреста́ннѡ хрⷭ҇та̀ гдⷭ҇а, да не ѡ҆скꙋдѣ́етъ въ на́съ вѣ́ра и҆ ст҃і́и по́двизи твоѝ, да бꙋ́детъ ми́ръ въ бра́тїи твое́й и҆ ѡ҆би́лїе во ѻ҆гра́дѣ ѡ҆би́тели твоеѧ̀ и҆ во все́мъ мі́рѣ гдⷭ҇ни: тогда̀ и҆спо́лнѧтсѧ ра́дости сердца̀ на́ша и҆ ѧ҆зы́къ на́шъ весе́лїѧ, и҆ всѝ воспое́мъ є҆ди́нѣми ᲂу҆сты̑ влⷣцѣ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ ли́цы твоемꙋ̀ вели́комꙋ во сп҃си́тельныхъ по́двизѣхъ терпѣ́нїю ᲂу҆диви́шасѧ: и҆ мы̀, ᲂу҆блажа́юще бл҃года́тное зва́нїе твоѐ на слꙋже́нїе гдⷭ҇ꙋ, ра́достнѡ возглаша́емъ тебѣ̀:

Ра́дꙋйсѧ, ѿ пеле́нъ и҆збра́нный бг҃ꙋ: ра́дꙋйсѧ, добро́тами дꙋ́ха и҆з̾дѣ́тска ᲂу҆краше́нный.

Ра́дꙋйсѧ, чистото́ю дꙋше́вною возсїѧ́вый: ра́дꙋйсѧ, зна́мєнїѧ блгⷣти ꙗ҆́вѣ въ себѣ̀ носи́вый.

Ра́дꙋйсѧ, дре́во, насажде́нное посредѣ̀ цр҃кве бж҃їѧ: ра́дꙋйсѧ, цвѣ́те бжⷭ҇твеннагѡ са́да.

Ра́дꙋйсѧ, бл҃говоздѣ́ланнаѧ лозо̀ вїногра́да хрⷭ҇то́ва: ра́дꙋйсѧ, ѿ ю҆́нагѡ во́зраста тѣ́снымъ пꙋте́мъ ше́ствовати и҆збра́вый.

Ра́дꙋйсѧ, ѿ мла́дости себѐ хрⷭ҇тꙋ̀ возложи́вый.

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Конда́къ а҃

Возбра́нный ᲂу҆го́дниче хрⷭ҇то́въ, свѧ́те григо́рїе, ꙗ҆́кѡ бл҃гі́й ра́бъ вше́дый въ ра́дость гдⷭ҇а твоегѡ̀, молѝ влⷣкꙋ нб҃сѐ и҆ землѝ пода́ти на́мъ бл҃года́ть свы́ше, съ терпѣ́нїемъ до конца̀ понестѝ бл҃го́е и҆ ле́гкое и҆́го є҆гѡ̀, да зове́мъ тѝ, ꙗ҆́кѡже ча̑да ко ѻ҆тцꙋ̀:

Ра́дꙋйсѧ, ᲂу҆го́дниче хрⷭ҇то́въ, григо́рїе бг҃омꙋ́дре.

Моли́твы

Ѽсщ҃е́ннаѧ главо̀, прпⷣбне ѻ҆́ч҃е, пребл҃же́нне а҆́вво григо́рїе! не забꙋ́ди ча̑дъ твои́хъ, и҆̀хже породи́лъ є҆сѝ бг҃оꙋго́дными трꙋда́ми и҆ мл҃твенными по́двиги, помина́й во ст҃ы́хъ твои́хъ бл҃гопрїѧ́тныхъ мл҃твахъ и҆ назида́й предста́тельствомъ твои́мъ ста́до твоѐ, є҆́же са́мъ па́слъ є҆сѝ: молѝ за ны̀, ѻ҆́ч҃е сщ҃е́нный, дѣ́ти твоѧ̑ дꙋхѡ́вныѧ, ꙗ҆́кѡ и҆мѣ́ѧ дерзнове́нїе къ нбⷭ҇номꙋ цр҃ю̀, не премолчѝ за ны̀ ко хрⷭ҇тꙋ̀ и҆ не пре́зри на́съ, вѣ́рою и҆ любо́вїю чтꙋ́щихъ тѧ̀. помина́й недосто́йныхъ на́съ пред̾ прⷭ҇то́ломъ вседержи́телѧ, тебѣ̀ бо даде́сѧ блгⷣть моли́тисѧ за ны̀. а҆́ще бо тѣ́ломъ преста́вилсѧ є҆сѝ ѿ на́съ, но и҆ по сме́рти жи́въ во хрⷭ҇тѣ̀ пребыва́еши. не ѿстꙋпѝ ѿ на́съ дꙋ́хомъ, сохранѧ́й на́съ ѿ стрѣ́лъ вра́жїихъ, ѿ пре́лести бѣсѡ́вскїѧ и҆ ко́зней дїа́вольскихъ, па́стырю на́шъ до́брый. се́ бо, ра́кою моще́й твои́хъ пребыва́ѧ съ на́ми, ст҃о́ю твое́ю дꙋше́ю съ нбⷭ҇ными си́лами ᲂу҆ прⷭ҇то́ла вседержи́телева предстоѧ̀, досто́йнѡ сла́виши гдⷭ҇а. тѣ́мже, припа́дающе со ᲂу҆миле́нїемъ, мо́лимсѧ тебѣ̀ ѡ҆ сп҃се́нїи дꙋ́шъ на́шихъ: и҆спросѝ на́мъ вре́мѧ на покаѧ́нїе и҆ невозбра́ннѡ прейтѝ ѿ землѝ на нб҃о чрез̾ мыта̑рства го́рькихъ бѣсѡ́въ, да твои́мъ предста́тельствомъ вѣ́чныѧ мꙋ́ки и҆зба́вльшесѧ. нбⷭ҇ное црⷭ҇твїе наслѣ́довати сподо́бимсѧ со всѣ́ми првⷣными, ѿ вѣ́ка ᲂу҆годи́вшими хрⷭ҇тꙋ̀ гдⷭ҇ꙋ на́шемꙋ, є҆мꙋ́же подоба́етъ всѧ́каѧ сла́ва, че́сть и҆ поклоне́нїе, ны́нѣ и҆ въ безконє́чныѧ вѣ́ки вѣкѡ́въ. А҆ми́нь.

Ѽдо́брый на́шъ па́стырю и҆ бг҃омꙋ́дрый наста́вниче, прпⷣбне ѻ҆́ч҃е григо́рїе! ᲂу҆слы́ши на́съ молѧ́щихсѧ тебѣ̀ и҆ призыва́ющихъ въ по́мощь ско́рое предста́тельство твоѐ. ви́ждь на́съ грѣ́шныхъ въ толи́цѣхъ ѡ҆бстоѧ́нїихъ сꙋ́щихъ, ви́ждь на́съ немощны́хъ ѿвсю́дꙋ ᲂу҆ловлѧ́емыхъ и҆ всѧ́кагѡ бл҃га лише́нныхъ, и҆ ᲂу҆мо́мъ ѿ малодꙋ́шїѧ помраче́нныхъ. потщи́сѧ, ᲂу҆го́дниче бж҃їй, не ѡ҆ста́вити на́съ во грѣхо́внѣмъ плѣнꙋ̀ бы́ти, да не бꙋ́демъ въ ра́дость врагѡ́мъ на́шимъ и҆ не ᲂу҆́мремъ въ лꙋка́выхъ дѣѧ́нїихъ на́шихъ. молѝ ѡ҆ на́съ недосто́йныхъ сп҃са гдⷭ҇а, є҆мꙋ́же ты̀ со безпло́тными ли́ки предстои́ши. ми́лостива къ на́мъ сотворѝ содѣ́телѧ на́шего въ ны́нѣшнемъ вѣ́цѣ и҆ въ бꙋ́дꙋщемъ, да не возда́стъ на́мъ по дѣлѡ́мъ на́шимъ и҆ по нечистотѣ̀ серде́цъ на́шихъ, но по свое́й, бл҃гости да возда́стъ на́мъ. на твое́ бо хода́тайство ᲂу҆пова́юще, твои́мъ предста́тельствомъ хва́лимсѧ, твоѐ застꙋпле́нїе на по́мощь призыва́емъ, и҆ къ цѣльбоно́сномꙋ гро́бꙋ твоемꙋ̀ припа́дающе недосто́йнїи, и҆сцѣле́нїѧ про́симъ. и҆зба́ви на́съ, ᲂу҆го́дниче хрⷭ҇то́въ, ѿ ѕлы́хъ, находѧ́щихъ на ны̀, и҆ ᲂу҆кротѝ во́лны страсте́й и҆ бѣ́дъ возстаю́щихъ на на́съ, да ра́ди ст҃ы́хъ твои́хъ мл҃твъ не ѡ҆бы́метъ на́съ напа́сть, и҆ не погрѧ́знемъ въ пꙋчи́нѣ грѣхо́внѣй и҆ въ ти́нѣ страсте́й на́шихъ. молѝ, прпⷣбне ѻ҆́ч҃е на́шъ григо́рїе, хрⷭ҇та̀ бг҃а на́шего, да пода́стъ на́мъ ми́рное. жи́тельство, ѡ҆ставле́нїе грѣхѡ́въ и҆ дꙋша́мъ на́шимъ сп҃се́нїе и҆ ве́лїю млⷭ҇ть, ны́нѣ и҆ во вѣ́ки вѣкѡ́въ. А҆ми́нь.