Православный календарь
Размер шрифта:

Ака́ѳістъ

А҆ка́ѳїстъ прпⷣбномꙋ рѡма́нꙋ сладкопѣ́вцꙋ.

Прп. Романа Сладкопевца (творца песнопений) (ок. 556) 14 октября 2026

Конда́къ а҃

И҆збра́нный подви́жниче и҆ земны́й а҆́гг҃ле хрⷭ҇то́въ, бж҃е́ственными добродѣ́тельми дх҃а и҆змла́да ᲂу҆краси́всѧ, рѡма́не премꙋ́дре, пѣ́нїемъ прекра́снымъ цр҃кве хрⷭ҇то́вы слꙋжи́тель бы́лъ є҆сѝ, ꙗ҆́кѡ да вопїе́мъ тѝ:

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

І҆́косъ а҃

А҆́гг҃льское житїѐ возлюби́лъ є҆сѝ ѿ ю҆́ности, ᲂу҆́мъ на бж҃е́ственнаѧ возве́лъ, вре́меннаѧ и҆ земна́ѧ пренебре́глъ є҆сѝ, тѣ́мъ ᲂу҆́бѡ всели́сѧ въ тѧ̀ ст҃ы́й дх҃ъ, є҆го́же блгⷣтїю ᲂу҆кра́шенъ є҆сѝ, сегѡ̀ ра́ди съ любо́вїю вопїе́мъ тѝ си́це:

Ра́дꙋйсѧ, чистото́ю а҆́гг҃ломъ ᲂу҆подо́билсѧ є҆сѝ: ра́дꙋйсѧ, посто́мъ и҆ бдѣ́нїемъ безстра́стїѧ дости́глъ є҆сѝ.

Ра́дꙋйсѧ, свѣти́льниче бж҃е́ственнагѡ свѣ́та: ра́дꙋйсѧ, мл҃твъ бл҃гово́нное кади́ло.

Ра́дꙋйсѧ, гра́мотѣ неѡбꙋче́нный, ра́зꙋмомъ стреми́выйсѧ къ бг҃ꙋ: ра́дꙋйсѧ, до́брыми дѣ́лы премꙋ́дрыѧ превосходи́вый.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ в҃

Ви́дѧ се́рдца твоегѡ̀ бл҃го́е намѣ́ренїе, гдⷭ҇ь предначерта̀ ᲂу҆́зкїй и҆ терни́стый пꙋ́ть твоегѡ̀ сп҃се́нїѧ. Тѣ́мже и҆́го хрⷭ҇то́во бл҃го́е и҆ ле́гкое ᲂу҆се́рднѣ воспрїѧ́въ, смире́нъ и҆ послꙋшли́въ бы́лъ є҆сѝ, воспѣва́ѧ всѣ́хъ творцꙋ̀ и҆ бг҃ꙋ: А҆ллилꙋ́їа.

І҆́косъ в҃

Ра́зꙋмъ бж҃е́ственныхъ писа́нїй и҆́стинною премꙋ́дростїю стѧжа́въ, что̀ по а҆пⷭ҇лꙋ пе́рвѣе чи́ста є҆́сть, пото́мъ же ми́рна, кро́тка, благопокорли́ва, и҆спо́лнисѧ млⷭ҇ти и҆ плодѡ́въ бл҃ги́хъ, несꙋмнѣ́ннѡ и҆ нелицемѣ́рнѡ. Мы́ же, дивѧ́щесѧ чистотѣ̀ твое́й, воспѣва́емъ:

Ра́дꙋйсѧ, на бг҃а промысли́телѧ всю̀ наде́ждꙋ возложи́вый: ра́дꙋйсѧ, то́кмѡ є҆гѡ̀ бл҃говоле́нїѧ взыска́вый.

Ра́дꙋйсѧ, въ послꙋша́нїи ᲂу҆се́рднѡ трꙋди́выйсѧ: ра́дꙋйсѧ, въ се́рдцѣ и҆мѣ́вый стра́хъ бж҃їй.

Ра́дꙋйсѧ, житїе́мъ добродѣ́тельнымъ на землѝ просвѣти́выйсѧ: ра́дꙋйсѧ, за сїѐ любо́вь бж҃їю на нб҃сѣ́хъ сниска́вый.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ г҃

Си́лою любвѐ ᲂу҆твержда́ѧсѧ, поревнова́лъ є҆сѝ є҆ѵⷢ҇льское житїѐ стѧжа́ти по ѻ҆́бразꙋ прпⷣбныхъ ѻ҆тцє́въ. Є҆гда̀ же дадѐ тѝ гдⷭ҇ь разꙋмѣ́нїе сегѡ̀ бл҃гоꙋгожде́нїѧ, воспѣ́лъ є҆сѝ со ᲂу҆миле́нїемъ: А҆ллилꙋ́їа.

І҆́косъ г҃

И҆мѣ́ѧ крѣ́пкꙋю вѣ́рꙋ во бл҃го́е промышле́нїе бж҃їе ѡ҆ сп҃се́нїи чл҃вѣ́ка, прите́клъ є҆сѝ къ чⷭ҇тно́мꙋ ѻ҆́бразꙋ прест҃ы́ѧ бцⷣы, сопредста́ша въ цр҃кви влахе́рнстѣй, и҆ смире́ннѡ моли́лъ є҆сѝ влⷣчцꙋ, да ᲂу҆пра́витъ пꙋ́ть тво́й. Мы́ же, ви́дѧще твоѐ неѿстꙋ́пное ᲂу҆пова́нїе на млⷭ҇ть цр҃и́цы нбⷭ҇ныѧ, пое́мъ тѝ:

Ра́дꙋйсѧ, бж҃їѧ мт҃ре вѣ́рное и҆ возлю́бленное ча́до: ра́дꙋйсѧ, си́лы є҆ѧ̀ сщ҃е́ннагѡ покро́ва та́йное постиже́нїе.

Ра́дꙋйсѧ, застꙋ́пницы ᲂу҆се́рдныѧ бл҃гоговѣ́йный почита́телю: ра́дꙋйсѧ, те́плыѧ въ нощѝ мл҃твы къ не́й сле́знѡ возноси́вый.

Ра́дꙋйсѧ, та́кѡ ᲂу҆тѣше́нїе въ се́рдцѣ свое́мъ ѡ҆брѣты́й.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ д҃

Бꙋ́рю мно́гихъ бѣ́дъ, за́висти ра́ди за ᲂу҆се́рдїе къ послꙋша́нїю претерпѣ́лъ є҆сѝ, бл҃гі́й. Ѡ҆ба́че за поноше́нїе и҆ ᲂу҆ничиже́нїе воздава́лъ є҆сѝ кро́тостїю и҆ смире́нїемъ, мы́ же мно́зѣ дивѧ́щесѧ неѕло́бїю и҆ терпѣ́нїю твоемꙋ̀ взыва́емъ: А҆ллилꙋ́їа.

І҆́косъ д҃

Слы́ша и҆ ви́дѧ премно́гꙋю добродѣ́тель твою̀, возлюбѝ тѧ̀ ст҃ѣ́йшїй патрїа́рхъ, дадѐ съ кли́ромъ тѝ ра́внꙋю ча́сть, мы́ же ѡ҆ се́мъ веселѧ́щесѧ глаго́лемъ си́це:

Ра́дꙋйсѧ, всѣ́мъ се́рдцемъ гдⷭ҇а возлюби́вый: ра́дꙋйсѧ, посрамле́нїе зави́стное прїе́мый въ на́вечерїе рождества̀ хрⷭ҇то́ва.

Ра́дꙋйсѧ, пред̾ і҆кѡ́ною прест҃ы́ѧ бцⷣы ᲂу҆тѣше́нїе взыска́вый: ра́дꙋйсѧ, кро́тостїю ᲂу҆ничиже́нїе побѣди́вый.

Ра́дꙋйсѧ, ꙗ҆ви́вый серде́чныѧ простоты̀ ѻ҆́бразъ свѣ́тлый: ра́дꙋйсѧ, ᲂу҆мѧгчи́вый сердца̀ ѻ҆би́дчикѡвъ твои́хъ.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ є҃

Бг҃опѣ́сненнꙋю любо́вь и҆ се́рдце чи́стое къ достиже́нїю нбⷭ҇нагѡ ѻ҆те́чества, ꙗ҆́кѡ свѣти́льникъ, во ᲂу҆мѣ̀ твое́мъ вы́нꙋ содержа̀, то́ю просла́вилъ є҆сѝ нбⷭ҇нагѡ ѻ҆ц҃а̀, воспѣва́ѧ є҆мꙋ̀: А҆ллилꙋ́їа.

І҆́косъ є҃

Ви́дѧще, ѽ пречꙋ́дне рѡма́не, любо́вь твою̀ къ бг҃ꙋ, ю҆́же въ се́рдцѣ твое́мъ вы́нꙋ храни́мꙋ, сїю̀ созерца́юще си́це рце́мъ всѝ:

Ра́дꙋйсѧ, тро́сть пѣснопи́сца послꙋ́шнаѧ, въ рꙋцѣ̀ хрⷭ҇то́вѣ содержи̑маѧ: ра́дꙋйсѧ, є҆ди́нагѡ хрⷭ҇та̀ ѿ се́рдца возлюби́вый.

Ра́дꙋйсѧ, въ ра́дость гдⷭ҇а вше́дый: ра́дꙋйсѧ, томꙋ̀ є҆ди́номꙋ все́ю дꙋше́ю прилѣпи́выйсѧ.

Ра́дꙋйсѧ, сла́достьми дꙋхо́вными на́съ насыща́ѧй: ра́дꙋйсѧ, возлю́бленный къ бг҃ꙋ ѡ҆ на́съ предста́телю.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ ѕ҃

Проповѣ́дникъ неѡскꙋдѣва́емыѧ блгⷣти и҆ млⷭ҇ти бж҃їѧ ꙗ҆ви́лсѧ є҆сѝ ты̀, бл҃же́нне, є҆гда̀ ѿ цр҃и́цы нбⷭ҇ныѧ во снѣ̀ прїѧ́лъ сви́токъ кни́жный на снѣде́нїе: тѣ́мъ ᲂу҆́бѡ ᲂу҆мꙋдре́нъ, нача̀ разꙋ́мнѡ пѣ́ти во сла́вꙋ бж҃їю, ст҃ы́мъ же писа́ти похва́льнаѧ, взыва́ѧ съ вѣ́рою: А҆ллилꙋ́їа.

І҆́косъ ѕ҃

Возсїѧ́лъ є҆сѝ а҆́ки ѕвѣзда̀ многосвѣ́тлаѧ, и҆спо́лнившисѧ премꙋ́дрости вели́кїѧ, и҆́бо влⷣчца, ꙗ҆́кѡ нѣ́когда сн҃ъ є҆ѧ̀ свои́мъ а҆пⷭ҇лѡмъ, ѿве́рзла тебѣ̀ ᲂу҆́мъ къ разꙋмѣ́нїю писа́нїй, сегѡ̀ ра́ди ᲂу҆бл҃жа́емъ тѧ̀, зовꙋ́ще:

Ра́дꙋйсѧ, любвѐ є҆ѵⷢ҇льскїѧ сокро́вище: ра́дꙋйсѧ, дх҃а ст҃а́гѡ вмѣсти́лище.

Ра́дꙋйсѧ, ѿ дв҃ы бг҃обл҃года́тныѧ дерзнове́нїе прїе́мый: ра́дꙋйсѧ, бл҃годаре́нїе ѿ се́рдца чи́стагѡ наста́вницѣ свое́й возноси́вый.

Ра́дꙋйсѧ, сла́дость ѿрече́нїѧ во́ли своеѧ̀ позна́вый: ра́дꙋйсѧ, за кро́тость и҆ смире́нїе вели́кїй да́ръ бж҃їй прїѧ́вый.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ з҃

Хотѧ́ще вознестѝ досто́йное бл҃годаре́нїе цр҃и́цѣ нбⷭ҇нѣй, возше́лъ є҆сѝ, рѡма́не бл҃же́нне, на а҆мвѡ́нъ цр҃ко́вный и҆ воспѣ́лъ гла́сомъ сла́дкимъ конда́къ сво́й, глаго́лѧ: дв҃а дне́сь пресꙋ́щественнагѡ ражда́етъ. Тѣ́мъ и҆ мы̀ пречⷭ҇тѣй воспѣва́емъ: А҆ллилꙋ́їа.

І҆́косъ з҃

Ди́внаѧ ѕвѣзда̀ ꙗ҆ви́лсѧ є҆сѝ ты̀, сладкопѣ́вче пребл҃гі́й, ᲂу҆краше́нїе и҆зѧ́щное цр҃кве хрⷭ҇то́вы. Дв҃довꙋ кро́тость, і҆а́кѡвле безѕло́бїе и҆ терпѣ́нїе і҆́ѡвле стѧжа́лъ є҆сѝ, мы́ же вопїе́мъ тѝ:

Ра́дꙋйсѧ, млⷭ҇ти бж҃їѧ стѧжа́телю: ра́дꙋйсѧ, къ бг҃ꙋ при́сный ѡ҆ на́съ предста́телю.

Ра́дꙋйсѧ, а҆́гг҃льскимъ пѣ́нїемъ просвѣти́выйсѧ: ра́дꙋйсѧ, лꙋчеза́рный свѣти́льниче.

Ра́дꙋйсѧ, непоколеби́мый сто́лпе вѣ́ры хрⷭ҇то́вы.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ и҃

Всѝ же ви́дѧще и҆ слы́шаще, ᲂу҆диви́шасѧ, ꙗ҆́кѡ теча́ше ѿ ᲂу҆́стъ твои́хъ, а҆́ки рѣка̀, премꙋ́дрость. Постыдѣ́шасѧ же кли́рїцы, ѡ҆скорби́вшїе тѧ̀, досажда́хꙋ ѡ҆ простотѣ̀ и҆ невѣ́жествїи, и҆ пока́ѧвшесѧ припадо́ша къ нога́мъ твои́мъ, проще́нїѧ просѧ́ще и҆ сла́вѧще бг҃а, поѧ̀ є҆мꙋ̀: А҆ллилꙋ́їа.

І҆́косъ и҃

Ве́сь ѻ҆гне́мъ бж҃е́ственныѧ любвѐ и҆спо́лненный, въ терпѣ́нїи стѧжа́въ дх҃ъ ст҃ы́й, по сло́вꙋ є҆ѵⷢ҇лїѧ хрⷭ҇то́ва. Мы́ же, любо́вїю твое́ю побѣжда́еми, дерза́емъ зва́ти тебѣ̀ такова́ѧ:

Ра́дꙋйсѧ, ꙗ҆́кѡ ди́вный ѻ҆́бразъ ѻ҆ц҃а̀ нбⷭ҇нагѡ въ себѣ̀ ꙗ҆ви́вый: ра́дꙋйсѧ, бра́тїю враждова́вшꙋю на тѧ̀, любо́вїю хрⷭ҇то́вою возлюби́вый.

Ра́дꙋйсѧ, бл҃га́ѧ за ѕла́ѧ воздава́вый: ра́дꙋйсѧ, примѣ́ръ братолю́бїѧ хрⷭ҇тїа́нскагѡ всѣ́мъ на́мъ ѡ҆ста́вивый.

Ра́дꙋйсѧ, ѕлы́хъ приводѧ́й къ постыже́нїю: ра́дꙋйсѧ, скорбѧ́щимъ подаѧ́й ᲂу҆тѣше́нїе.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ ѳ҃

Всѐ є҆стество̀ чл҃вѣ́ческое и҆ ли̑ки а҆́гг҃лѡвъ восхвалѧ́ютъ тѧ̀, премꙋ́дре ѻ҆́тче, ꙗ҆́кѡ послꙋ́шникъ, смире́нїѧ и҆спо́лненный, прїѧ́лъ є҆сѝ бл҃же́нный пꙋ́ть хрⷭ҇то́въ, водвори́сѧ въ црⷭ҇твїи нбⷭ҇нѣмъ, пою́ще: А҆ллилꙋ́їа.

І҆́косъ ѳ҃

Вѣті̑ѧ многовѣща́нныѧ не довлѣ́ютъ и҆зглаго́лати чистотꙋ̀ дꙋхо́внꙋю, ю҆́же и҆мѣ́лъ ты̀, бл҃же́нне рѡма́не: и҆ на́съ наꙋчѝ вѣ́рѣ крѣ́пцѣй и҆ безро́потномꙋ послꙋша́нїю, съ любо́вїю зовꙋ́щихъ тѝ:

Ра́дꙋйсѧ, па́ствы твоеѧ̀ и҆зрѧ́дный послꙋ́шниче: ра́дꙋйсѧ, а҆́гг҃лѡвъ собесѣ́дниче.

Ра́дꙋйсѧ, а҆́лчꙋщихъ жи́зни вѣ́чныѧ пита́телю: ра́дꙋйсѧ, мꙋ́дрыхъ слове́съ насади́телю.

Ра́дꙋйсѧ, ᲂу҆ми́льнѡ бж҃їю сла́вꙋ воспѣ́вый: ра́дꙋйсѧ, сладкогла́снꙋю стрꙋнꙋ̀ бж҃е́ственнагѡ да́ра прїе́мый.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ і҃

Сп҃стѝ хотѧ̀ ро́дъ чл҃вѣ́ческїй, вѣ́рный пꙋтеводи́тель ꙗ҆ви́лсѧ є҆сѝ, ди́внѡ возглаша́ѧ сла́вꙋ бж҃їю. Мы́ же, внима́ѧ сло́вꙋ мꙋ́дрости твоеѧ̀, съ весе́лїемъ прославлѧ́емъ гдⷭ҇а, воспѣва́ѧ: А҆ллилꙋ́їа.

І҆́косъ і҃

Цр҃ѧ̀ нбⷭ҇нагѡ, є҆го́же славосло́вѧтъ херꙋві́мы и҆ серафі́мы, житїе́мъ, вѣ́рою и҆ любо́вїю всеꙋсе́рднѣйшїй слꙋжи́тель бы́лъ є҆сѝ, прпⷣбне, ꙗ҆́кѡ крі́нъ бл҃гоꙋха́нный, со всѣ́ми и҆збра́нниками пречⷭ҇тыѧ бцⷣы ᲂу҆ прⷭ҇то́ла всест҃ы́ѧ трⷪ҇цы предста́лъ є҆сѝ, тѣ́мъ ра́достнѡ зове́мъ тѝ:

Ра́дꙋйсѧ, бл҃гі́й хода́таю ѡ҆ на́съ ко гдⷭ҇ꙋ: ра́дꙋйсѧ, мл҃твенниче пресвѣ́тлый и҆ прелюби́мый.

Ра́дꙋйсѧ, ꙗ҆́кѡ равноа́гг҃льнꙋю красотꙋ̀ стѧжа́лъ є҆сѝ: ра́дꙋйсѧ, ꙗ҆́кѡ нището́ю дꙋхо́вною ѡ҆богати́лсѧ є҆сѝ.

Ра́дꙋйсѧ, ꙗ҆́кѡ ра́зꙋмъ сво́й ко гдⷭ҇ꙋ ѿве́рзлъ є҆сѝ.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ а҃і

Пѣ́нїе ᲂу҆миле́нное прино́симъ тѝ, ско́ромꙋ помо́щникꙋ въ нꙋ́ждахъ и҆ печа́лѣхъ всѣ́мъ, къ тебѣ̀ съ вѣ́рою и҆ любо́вїю притека́ющихъ. Тѣ́мъ же твои́ми пѣснопѣ́ньми въ цр҃кви бж҃їей прославлѧ́етсѧ бг҃ъ, ди́вный во ст҃ы́хъ свои́хъ, зовꙋ́щихъ непреста́ннѡ: А҆ллилꙋ́їа.

І҆́косъ а҃і

Ꙗ҆́кѡ свѣтлѣ́йшїй свѣти́льникъ и҆ мл҃твенникъ ꙗ҆ви́лсѧ є҆сѝ, рѡма́не бг҃обл҃же́нне. Ны́нѣ влⷣцѣ всѣ́хъ предстоѧ̀ и҆ дерзнове́нїе къ немꙋ̀ стѧжа́въ, молѝ ѡ҆ на́съ, соверша́ющихъ свѣ́тлꙋю па́мѧть твою̀, зовꙋ́ще:

Ра́дꙋйсѧ, бг҃ꙋ є҆ди́номꙋ послꙋжи́вый: ра́дꙋйсѧ, всѧ̀ за́повѣди бж҃їѧ и҆спо́лнивый.

Ра́дꙋйсѧ, ѻ҆би́телей нбⷭ҇ныхъ ᲂу҆досто́ивыйсѧ: ра́дꙋйсѧ, го́рнїѧ сла́вы прїѡбщи́выйсѧ.

Ра́дꙋйсѧ, гла́се благознамени́тыхъ слове́съ: ра́дꙋйсѧ, въ пѣснопѣ́нїи бг҃осло́ве сладкозвꙋ́чный.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ в҃і

Блгⷣти бж҃їѧ сокро́вища наслѣ́довалъ є҆сѝ, бцⷣꙋ мр҃і́ю бг҃омꙋ́дра и҆мѣ́лъ є҆сѝ ᲂу҆чи́телѧ, вразꙋмлѧ́ющꙋ тѧ̀ и҆ наꙋча́ющꙋ пѣ́ти: А҆ллилꙋ́їа.

І҆́косъ в҃і

Пою́ще твоѐ достохва́льное житїѐ на землѝ, ра́достнѡ сла́вимъ ди́внагѡ во ст҃ы́хъ свои́хъ цр҃ѧ̀ нбⷭ҇нагѡ. Тогѡ̀ блгⷣтїю въ селе́нїихъ првⷣныхъ ны́нѣ ликꙋ́еши, и҆дѣ́же зри́ши сла́вꙋ бж҃їю несконча́емꙋю. Мы́ же ᲂу҆ми́льнѡ воспѣва́емъ тѝ:

Ра́дꙋйсѧ, ꙗ҆́кѡ красотꙋ̀ и҆ сла́вꙋ мі́ра сегѡ̀ ѡ҆трѧ́слъ є҆сѝ: ра́дꙋйсѧ, ꙗ҆́кѡ дꙋ́шꙋ твою̀ впери́лъ є҆сѝ къ го́рнемꙋ зва́нїю.

Ра́дꙋйсѧ, ꙗ҆́кѡ твои́хъ глаго́лъ вѣща́нїе вселе́ннꙋю и҆спо́лни: ра́дꙋйсѧ, наꙋча́ѧй зна́нїю сп҃си́тельномꙋ всѣ́хъ.

Ра́дꙋйсѧ, златокова́ннаѧ трꙋбо̀, сла́вꙋ бж҃їю со а҆́гг҃лы возвѣща́ющаѧ: ра́дꙋйсѧ, бг҃омъ ᲂу҆вѣнча́нный, въ мл҃твахъ свои́хъ на́съ не ѡ҆ставлѧ́ющїй.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ г҃і

Ѽ, пребл҃же́нне и҆ бг҃оно́сне ѻ҆́тче рѡма́не. Прїимѝ сїѐ ма́лое мл҃твенное приноше́нїе на́ше, и҆ съ прест҃о́ю влⷣчцею принесѝ мл҃твꙋ ко гдⷭ҇ꙋ бг҃ꙋ, да и҆зба́витъ на́съ ѿ всѧ́кагѡ вре́да и҆ ско́рби, и҆ сподо́битъ своегѡ̀ нбⷭ҇нагѡ црⷭ҇твїѧ, и҆дѣ́же всѝ, при́снѡ торжествꙋ́юще, немо́лчнѡ воспѣва́ютъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льское житїѐ возлюби́лъ є҆сѝ ѿ ю҆́ности, ᲂу҆́мъ на бж҃е́ственнаѧ возве́лъ, вре́меннаѧ и҆ земна́ѧ пренебре́глъ є҆сѝ, тѣ́мъ ᲂу҆́бѡ всели́сѧ въ тѧ̀ ст҃ы́й дх҃ъ, є҆го́же блгⷣтїю ᲂу҆кра́шенъ є҆сѝ, сегѡ̀ ра́ди съ любо́вїю вопїе́мъ тѝ си́це:

Ра́дꙋйсѧ, чистото́ю а҆́гг҃ломъ ᲂу҆подо́билсѧ є҆сѝ: ра́дꙋйсѧ, посто́мъ и҆ бдѣ́нїемъ безстра́стїѧ дости́глъ є҆сѝ.

Ра́дꙋйсѧ, свѣти́льниче бж҃е́ственнагѡ свѣ́та: ра́дꙋйсѧ, мл҃твъ бл҃гово́нное кади́ло.

Ра́дꙋйсѧ, гра́мотѣ неѡбꙋче́нный, ра́зꙋмомъ стреми́выйсѧ къ бг҃ꙋ: ра́дꙋйсѧ, до́брыми дѣ́лы премꙋ́дрыѧ превосходи́вый.

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Конда́къ а҃

И҆збра́нный подви́жниче и҆ земны́й а҆́гг҃ле хрⷭ҇то́въ, бж҃е́ственными добродѣ́тельми дх҃а и҆змла́да ᲂу҆краси́всѧ, рѡма́не премꙋ́дре, пѣ́нїемъ прекра́снымъ цр҃кве хрⷭ҇то́вы слꙋжи́тель бы́лъ є҆сѝ, ꙗ҆́кѡ да вопїе́мъ тѝ:

Ра́дꙋйсѧ, сладкопѣ́вче рѡма́не, красото̀ цр҃ко́внаѧ.

Моли́твы

Ѽ, пребл҃же́нне ѻ҆́тче на́шъ, рѡма́не сладкопѣ́вче. При́зри ѿ го́рнїѧ сла́вы на на́съ, смире́нныхъ и҆ немощны́хъ, твоеѧ̀ по́мощи и҆ ᲂу҆тѣше́нїѧ просѧ́щихъ. Прини́кни къ на́мъ бл҃госе́рдїемъ твои́мъ и҆ помозѝ за́повѣди гдⷭ҇ни непоро́чнѡ сохранѧ́ти, вѣ́рꙋ правосла́внꙋю крѣ́пкѡ содержа́ти, покаѧ́нїе во грѣсѣ́хъ на́шихъ ᲂу҆се́рднѡ бг҃ꙋ приноси́ти.

Наꙋчѝ на́съ, ᲂу҆невѣ́стившихсѧ хрⷭ҇тꙋ̀, рабо́тати є҆мꙋ̀ со стра́хомъ и҆ ра́доватисѧ съ тре́петомъ. И҆зба́ви на́съ ѿ печа́ли и҆ ᲂу҆ны́нїѧ, ѿженѝ ѿ на́съ го́рдость и҆ славолю́бїе, да воспое́мъ сла́вꙋ бж҃їю, да восхо́щемъ то́кмѡ сла́вы нбⷭ҇ныѧ.

Ѽ, ст҃ы́й ѻ҆́тче, вселѝ въ на́съ любо́вь нелицемѣ́рнꙋю къ бли́жнимъ, послꙋша́нїе безро́потное нача́льникѡмъ и҆ стра́хъ бж҃їй въ сердца̀ на́ша. Да́рꙋй позна́ти сла́дость ѿрече́нїѧ во́ли своеѧ̀, вѣ́рою крѣ́пкою во бл҃го́е промышле́нїе бж҃їе ѡ҆ сп҃се́нїи чл҃вѣ́ка ѡ҆ст҃ѝ дꙋ́ши на́ша. Низпослѝ на́мъ бл҃гослове́нїе ѿ гдⷭ҇а, да понесе́мъ бл҃го́е и҆́го хрⷭ҇то́во въ долготерпѣ́нїи до конца̀ дне́й на́шихъ, да сподо́бимсѧ съ мꙋ́дрыми дѣ́вами вни́ти во бра́чный черто́гъ жениха̀ своегѡ̀ нбⷭ҇нагѡ и҆ кꙋ́пнѡ со а҆́гг҃лами воспѣва́ти сла́вꙋ вели́чїѧ є҆гѡ̀, ѻ҆ц҃а̀ и҆ сн҃а и҆ ст҃а́гѡ дх҃а во вѣ́ки вѣкѡ́въ. А҆ми́нь.