Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ прпⷣбномꙋ са́ввѣ, ви́шерскомꙋ чꙋдотво́рцꙋ.

Прп. Саввы Вишерского (1461) 14 октября 2026

Конда́къ а҃

И҆збра́нный и҆ ди́вный ѻ҆́ч҃е са́вво, просвѣще́нный ѿ трисїѧ́ннагѡ свѣ́та, ты̀ на́съ ѡ҆мраче́нныхъ грѣхо́вными страстьмѝ просвѣтѝ и҆ твои́ми мл҃твами ѿ всѣ́хъ бѣ́дъ и҆зба́ви, да зове́мъ тебѣ̀:

Ра́дꙋйсѧ, са́вво, новгоро́дскїй чꙋдотво́рче.

І҆́косъ а҃

А҆́гг҃льскїѧ чи́ни возра́довашасѧ твои̑мъ подвигѡ́мъ, и҆́миже въ пꙋсты́ни ᲂу҆пражнѧ́лсѧ є҆сѝ въ постѣ̀ и҆ мл҃твахъ: и҆ ны́нѣ мы̀, почита́ѧ тѧ̀ собесѣ́дника а҆́гг҃лѡвъ, сицєва́ѧ вопїе́мъ тебѣ̀:

Ра́дꙋйсѧ, нбⷭ҇ный жи́телю: ра́дꙋйсѧ, страсте́й разрꙋши́телю.

Ра́дꙋйсѧ, воздержа́нїе ꙗ҆ви́вый: ра́дꙋйсѧ, ви́шерскꙋю пꙋсты́ню просвѣти́вый.

Ра́дꙋйсѧ, на сп҃се́нїе ᲂу҆чи́телю: ра́дꙋйсѧ, безмо́лвїѧ рачи́телю.

Ра́дꙋйсѧ, ско́рый помо́щниче: ра́дꙋйсѧ, на пꙋ́ть пра́вый наставлѧ́ѧй.

Ра́дꙋйсѧ, црⷭ҇твїе нбⷭ҇ное возвѣща́ѧй: ра́дꙋйсѧ, ᲂу҆ныва́ющихъ ᲂу҆тѣше́нїе.

Ра́дꙋйсѧ, грѣ́шныхъ и҆справле́нїе.

Ра́дꙋйсѧ, са́вво, новгоро́дскїй чꙋдотво́рче.

Конда́къ в҃

Ви́дѧщи наро́дъ стра́нный и҆ чꙋ́дный житїѧ̀ твоегѡ̀ ѡ҆́бразъ, прпⷣбне ѻ҆́ч҃е са́вво, вельмѝ ᲂу҆диви́сѧ: тѣ́мже и҆ мы̀, размышлѧ́ѧ твоѧ̑ по́двиги, пое́мъ бг҃ꙋ: А҆ллилꙋ́їа.

І҆́косъ в҃

Ра́зꙋмꙋ пода́тисѧ на́мъ бжⷭ҇твенномꙋ помоли́сѧ, прпⷣбне са́вво: ты́ бо, бжⷭ҇твеннымъ сїѧ́ющи свѣ́томъ, со а҆́гг҃лы водворѧ́ешисѧ, прїимѝ ра́достнѡ похвалы̑ тебѣ̀ приносѧ́щихъ:

Ра́дꙋйсѧ, добродѣ́тельми просїѧ́вый: ра́дꙋйсѧ, бл҃года́ть стѧжа́вый.

Ра́дꙋйсѧ, чистоты̀ храни́телю: ра́дꙋйсѧ, безмо́лвїѧ люби́телю.

Ра́дꙋйсѧ, бж҃їихъ дарова́нїй и҆сполне́нїе: ра́дꙋйсѧ, въ человѣ́цѣхъ чꙋ́дное ᲂу҆дивле́нїе.

Ра́дꙋйсѧ, трⷪ҇чнагѡ свѣ́та зри́телю: ра́дꙋйсѧ, бѣсѡ́въ ᲂу҆страши́телю.

Ра́дꙋйсѧ, къ подвигѡ́мъ проповѣ́дниче: ра́дꙋйсѧ, нбⷭ҇ный и҆сповѣ́дниче.

Ра́дꙋйсѧ, ꙗ҆́кѡ печа̑ли ѿгонѧ́еши: ра́дꙋйсѧ, ꙗ҆́кѡ по́мощь подава́еши.

Ра́дꙋйсѧ, са́вво, новгоро́дскїй чꙋдотво́рче.

Конда́къ г҃

Си́ла вы́шнѧгѡ ѡ҆сѣнѝ тѧ̀, прпⷣбне са́вво, и҆ показа̀ селе́нїе и҆ жили́ще ст҃а́гѡ дх҃а, є҆го́же и҆ мы̀ почита́юще, пое́мъ бг҃ꙋ: А҆ллилꙋ́їа.

І҆́косъ г҃

И҆мꙋ́ще тѧ̀ вели́ка, ѻ҆́ч҃е, застꙋ́пника и҆ ско́раго въ напа́стехъ помо́щника, твою̀ ст҃ꙋ́ю па́мѧть торжествꙋ́юще, сїѧ̑ тебѣ̀ вопїе́мъ:

Ра́дꙋйсѧ, скорбѧ́щихъ ᲂу҆тѣше́нїе: ра́дꙋйсѧ, ст҃а́гѡ дх҃а селе́нїе.

Ра́дꙋйсѧ, ст҃ы́ѧ трⷪ҇цы слꙋжи́телю: ра́дꙋйсѧ, ᲂу҆ныва́ющихъ посѣти́телю.

Ра́дꙋйсѧ, бѣсо́вскїѧ си́лы прогна́нїе: ра́дꙋйсѧ, болѧ́щихъ здра́вїе и҆ врачева́нїе.

Ра́дꙋйсѧ, сто́лпе вѣ́ры ᲂу҆твержде́нный: ра́дꙋйсѧ, ᲂу҆чи́телю соверше́нный.

Ра́дꙋйсѧ, къ сп҃се́нїю предводи́телю: ра́дꙋйсѧ, бѣ́дствꙋющихъ защи́тителю.

Ра́дꙋйсѧ, добродѣ́тель ᲂу҆крѣпи́вый: ра́дꙋйсѧ, бога́тство ни во что́же вмѣни́вый.

Ра́дꙋйсѧ, са́вво, новгоро́дскїй чꙋдотво́рче.

Конда́къ д҃

Бꙋ́рю страсте́й многомѧте́жнагѡ мі́ра возненави́дѣвый, ѻ҆́ч҃е прпⷣбный са́вво, ᲂу҆страни́лсѧ є҆сѝ сꙋе́тъ, ны́нѣ же бг҃ꙋ предстои́ши съ нбⷭ҇ными си́лами и҆ пое́ши кꙋ́пнѡ съ ни́ми: А҆ллилꙋ́їа.

І҆́косъ д҃

Свѣтоза́рнꙋю лꙋчꙋ̀ и҆мꙋ́ще тѧ̀ вѣ́рнїи, бг҃оно́сный ѻ҆́ч҃е са́вво, просвѣтѝ и҆ вразꙋмѝ на̑ша сердца̀, мы́ же вопїе́мъ тебѣ̀ си́це:

Ра́дꙋйсѧ, новꙋгра́дꙋ ᲂу҆краше́нїе: ра́дꙋйсѧ, ви́шерскїѧ пꙋсты́ни ᲂу҆добре́нїе.

Ра́дꙋйсѧ, хрⷭ҇тїа́нскаѧ красото̀: ра́дꙋйсѧ, рѡссі́йскаѧ добро́то.

Ра́дꙋйсѧ, бл҃года́тїю ѡ҆зарѧ́ющїй: ра́дꙋйсѧ, чꙋдеса́ми просвѣща́ющїй.

Ра́дꙋйсѧ, и҆сцѣле́нїѧ и҆сто́чниче: ра́дꙋйсѧ, бѣ́дствꙋющихъ помо́щниче.

Ра́дꙋйсѧ, въ болѣ́знехъ врачꙋ̀ и҆ цѣли́телю: ра́дꙋйсѧ, ско́рый послꙋ́шателю.

Ра́дꙋйсѧ, ᲂу҆че́нїемъ мі́ръ просвѣти́вый: ра́дꙋйсѧ, сла́вꙋ бж҃їю ᲂу҆множа́ѧй.

Ра́дꙋйсѧ, са́вво, новгоро́дскїй чꙋдотво́рче.

Конда́къ є҃

Бг҃оте́чнꙋю зарю̀ ᲂу҆ви́дѣвше тѧ̀, ѻ҆́ч҃е, въ пꙋсты́ни, лю́дїе ꙗ҆́кѡ ᲂу҆чи́телѧ свѣтоно́сна придержа́ша ѡ҆ тебѣ̀ и҆ ѡ҆ се́мъ воспѣ́ша бг҃ꙋ: А҆ллилꙋ́їа.

І҆́косъ є҃

Ви́дѧ твоѐ житїѐ, наро́дъ вели́кагѡ нова́града, са́вво прпⷣбне, нача̀ бл҃гоговѣ́йнѡ тебѣ̀ почита́ти, и҆ мы̀ тебѣ̀ вопїе́мъ:

Ра́дꙋйсѧ, въ сѣ́верѣ сїѧ́ющїй: ра́дꙋйсѧ, чꙋдеса́ми просвѣща́ющїй.

Ра́дꙋйсѧ, наста́вниче вели́кїй сп҃се́нїѧ: ра́дꙋйсѧ, послꙋ́шателю є҆ѵⷢ҇льскагѡ ᲂу҆че́нїѧ.

Ра́дꙋйсѧ, и҆́го хрⷭ҇то́во воспрїѧ́вый: ра́дꙋйсѧ, добродѣ́тельми возсїѧ́вый.

Ра́дꙋйсѧ, неꙋсы́пный предста́телю: ра́дꙋйсѧ, ѡ҆ всѣ́хъ вѣ́рныхъ хода́таю.

Ра́дꙋйсѧ, вѣща́телю сладкослове́сный: ра́дꙋйсѧ, из̾ѧвлѧ́ѧй та́инства нбⷭ҇наѧ.

Ра́дꙋйсѧ, хрⷭ҇тїа́нское похвале́нїе: ра́дꙋйсѧ, проти́вныхъ побѣжде́нїе.

Ра́дꙋйсѧ, са́вво, новгоро́дскїй чꙋдотво́рче.

Конда́къ ѕ҃

Про́повѣди є҆ѵⷢ҇льскїѧ творца̀, ꙗ҆́же не пещи́сѧ ѡ҆ тѣ́хъ, ꙗ҆̀же въ мі́рѣ сꙋ́ть, послꙋ́шавый, прпⷣбный ѻ҆́ч҃е са́вво, и҆ на́мъ ѿ хрⷭ҇та̀ полꙋчи́ти безстра́стїе ᲂу҆молѝ, вопїю́щымъ бг҃ꙋ: А҆ллилꙋ́їа.

І҆́косъ ѕ҃

Возсїѧ́лъ є҆сѝ ѿ тферскі́ѧ страны̀, прпⷣбный ѻ҆́ч҃е са́вво, и҆ ѡ҆ст҃и́лъ є҆сѝ новогра̑дскїѧ пꙋсты̑ни, и҆зба́ви на́съ ѿ вра́жїихъ навѣ́тѡвъ, вопїю́щихъ си́це:

Ра́дꙋйсѧ, кре́стъ тво́й носи́вый: ра́дꙋйсѧ, дꙋ̑хи лꙋка́вствїѧ покори́вый.

Ра́дꙋйсѧ, сла́вы вѣ́чныѧ хода́таю: ра́дꙋйсѧ, сп҃си́тельныхъ бла́гъ пода́телю.

Ра́дꙋйсѧ, почита́емый на землѝ: ра́дꙋйсѧ, ᲂу҆вѣнча́нный на нб҃сѝ.

Ра́дꙋйсѧ, страсте́й и҆збавлѧ́ѧй: ра́дꙋйсѧ, ᲂу҆́зъ грѣхо́вныхъ свобожда́ѧй.

Ра́дꙋйсѧ, ꙗ҆́кѡ мзда̀ твоѧ̀ вѣ́чнаѧ: ра́дꙋйсѧ, ꙗ҆́кѡ ра́дость твоѧ̀ безконе́чнаѧ.

Ра́дꙋйсѧ, вы́шнѧгѡ сїѡ́на дости́гшїй: ра́дꙋйсѧ, вѣне́цъ нбⷭ҇ный полꙋчи́вшїй.

Ра́дꙋйсѧ, са́вво, новгоро́дскїй чꙋдотво́рче.

Конда́къ з҃

И҆зше́дшꙋ а҆рхїепⷭ҇копꙋ і҆ѡа́ннꙋ въ пꙋсты́ню, є҆́же ви́дѣти тебѐ, прпⷣбне са́вво, позна́въ тѧ̀, ѻ҆́ч҃е, при́снѡ бг҃ꙋ рабо́тающа, возгласѝ: А҆ллилꙋ́їа.

І҆́косъ з҃

Но́вый вои́стиннꙋ подви́жникъ на стра̑сти ꙗ҆ви́лсѧ є҆сѝ, прпⷣбный ѻ҆́ч҃е са́вво: кто̀ и҆зочте́тъ твоѧ̑ по́стничєскїѧ по́двиги: мы́ же, почита́юще тебѐ, вопїе́мъ:

Ра́дꙋйсѧ, посто́мъ стра̑сти покори́вый: ра́дꙋйсѧ, тмы̀ кнѧ́зѧ побѣди́вый.

Ра́дꙋйсѧ, всѧ́кое жела́нїе ᲂу҆вѧди́лъ є҆сѝ: ра́дꙋйсѧ, ꙗ҆́кѡ безстра́стенъ ꙗ҆ви́лсѧ є҆сѝ.

Ра́дꙋйсѧ, по́двигѡвъ соверше́нїе: ра́дꙋйсѧ, пꙋсты́ни ᲂу҆краше́нїе.

Ра́дꙋйсѧ, по́стникѡвъ сла́во: ра́дꙋйсѧ, воздержа́нїѧ зерца́ло.

Ра́дꙋйсѧ, всѧ́кꙋю добродѣ́тель и҆з̾ѡбрази́вый: ра́дꙋйсѧ, и҆́го хрⷭ҇то́во возлюби́вый.

Ра́дꙋйсѧ, и҆́стиннꙋю вѣ́рꙋ ᲂу҆твержда́ѧй: ра́дꙋйсѧ, въ невече́рнемъ днѝ пребыва́ѧй.

Ра́дꙋйсѧ, са́вво, новгоро́дскїй чꙋдотво́рче.

Конда́къ и҃

Стра́нное твоѐ житїѐ бы́сть, прпⷣбный ѻ҆́ч҃е са́вво, ты̀, на нб҃о показꙋ́ѧ пꙋ́ть, на высотꙋ̀ столпа̀ возше́лъ є҆сѝ и҆ ᲂу҆чи́лъ мꙋ́дрствовати гѡ́рнѧѧ, а҆ не дѡ́льнаѧ, ны́нѣ же въ вы́шнѣмъ селе́нїи пое́ши бг҃ꙋ: А҆ллилꙋ́їа.

І҆́косъ и҃

Ве́сь бы́лъ є҆сѝ въ вы́шнихъ и҆ горѣ̀ ѻ҆́комъ твоеѧ̀ дꙋшѝ взира́лъ є҆сѝ непреста́ннѡ, и҆ ны́нѣ застꙋпа́еши всѣ́хъ вопїю́щихъ сицєва́ѧ:

Ра́дꙋйсѧ, вели́кїй пꙋстынножи́телю: ра́дꙋйсѧ, прⷪ҇ро́кѡмъ ревни́телю.

Ра́дꙋйсѧ, стопа́мъ хрⷭ҇то́вымъ подража́вый: ра́дꙋйсѧ, въ пꙋсты́ни просїѧ́вый.

Ра́дꙋйсѧ, соверше́нства ᲂу҆чи́телю: ра́дꙋйсѧ, врагѡ́въ прогони́телю.

Ра́дꙋйсѧ, хрⷭ҇тꙋ̀ ᲂу҆годи́вый: ра́дꙋйсѧ, равноа́гг҃льнѡ пожи́вый.

Ра́дꙋйсѧ, ꙗ҆́кѡ бл҃года́ти всѣ̑мъ про́сиши: ра́дꙋйсѧ, ꙗ҆́кѡ мл҃твы ѡ҆ всѣ́хъ прино́сиши.

Ра́дꙋйсѧ, ꙗ҆́кѡ всѧ́кꙋю добродѣ́тель и҆з̾ѡбрази́лъ є҆сѝ: ра́дꙋйсѧ, ꙗ҆́кѡ равноа́гг҃льскꙋю че́сть полꙋчи́лъ є҆сѝ.

Ра́дꙋйсѧ, са́вво, новгоро́дскїй чꙋдотво́рче.

Конда́къ ѳ҃

Всѧ́кое є҆стество̀ ᲂу҆диви́сѧ тебѣ̀, прпⷣбный ѻ҆́ч҃е са́вво: мі́ра бо кра̑снаѧ ѿ се́рдца возненави́дѣвый и҆ є҆ди́наго бг҃а возлюби́вый, ꙗ҆ви́лсѧ є҆сѝ ꙗ҆́кѡ а҆́гг҃лъ, поѧ̀ бг҃ꙋ: А҆ллилꙋ́їа.

І҆́косъ ѳ҃

Вѣті́йстїи ѧ҆зы́цы восхвали́ти тѧ̀ по достоѧ́нїю не мо́гꙋтъ, ѻ҆́ч҃е бг҃омꙋ́дре са́вво, ты́ бо ѿ ю҆́ности бг҃ꙋ прибли́жилсѧ є҆сѝ, мы́ же сицєва́ѧ вопїе́мъ тебѣ̀:

Ра́дꙋйсѧ, бл҃гоче́стїѧ ᲂу҆твержде́нїе: ра́дꙋйсѧ, крѣ́пкое застꙋпле́нїе.

Ра́дꙋйсѧ, недꙋ́гѡвъ тмꙋ̀ ѿгонѧ́ѧй: ра́дꙋйсѧ, на пꙋ́ть пра́вый наставлѧ́ѧй.

Ра́дꙋйсѧ, ꙗ҆́кѡ къ бж҃їю хотѣ́нїю ᲂу҆правлѧ́еши: ра́дꙋйсѧ, бл҃годѣѧ̑нїѧ всѣ̑мъ подава́еши.

Ра́дꙋйсѧ, молє́нїѧ вы́шнемꙋ приносѧ́й: ра́дꙋйсѧ, ѡ҆ всѣ́хъ стра́ждꙋщихъ просѧ́й.

Ра́дꙋйсѧ, па́дшихъ грѣха́ми возста́нїе: ра́дꙋйсѧ, ѿча́ѧнныхъ воззва́нїе.

Ра́дꙋйсѧ, пꙋстынножи́телей ᲂу҆добре́нїе: ра́дꙋйсѧ, мона́шествꙋющихъ ᲂу҆крѣпле́нїе.

Ра́дꙋйсѧ, са́вво, новгоро́дскїй чꙋдотво́рче.

Конда́къ і҃

Сп҃сти́сѧ хотѧ́ще, вѣ́рнїи ѿ напа́стей разли́чныхъ, ѻ҆́ч҃е прпⷣбный са́вво, тѧ̀ предста́телѧ поставлѧ́ютъ, ты́ бо ко сп҃се́нїю наставлѧ́еши вопїю́щихъ бг҃ꙋ: А҆ллилꙋ́їа.

І҆́косъ і҃

Стѣ́нꙋ тѧ̀, застꙋ́пника и҆ мл҃твенника те́пла ѡ҆брѣ́тше, прпⷣбне ѻ҆́ч҃е са́вво, тебѣ̀ же при́сномꙋ сꙋ́щꙋ мл҃твенникꙋ сицєва́ѧ прино́симъ пѣ̑нїѧ:

Ра́дꙋйсѧ, въ бѣда́хъ сꙋ́щымъ посѣти́телю: ра́дꙋйсѧ, бж҃їихъ повелѣ́нїй и҆сполни́телю.

Ра́дꙋйсѧ, ꙗ҆́кѡ мл҃твою врагѡ́въ и҆знꙋри́лъ є҆сѝ: ра́дꙋйсѧ, ꙗ҆́кѡ пꙋти̑ гдⷭ҇ни сохрани́лъ є҆сѝ.

Ра́дꙋйсѧ, стра̑сти ᲂу҆мертви́вый: ра́дꙋйсѧ, равноа́гг҃льскꙋю чистотꙋ̀ сохрани́вый.

Ра́дꙋйсѧ, ѿ ю҆́ности мі́ра ѿрекі́йсѧ: ра́дꙋйсѧ, безпло́тнымъ подо́бенъ ꙗ҆ви́выйсѧ.

Ра́дꙋйсѧ, ꙗ҆́кѡ кре́стъ на ра́мѣ поне́слъ є҆сѝ: ра́дꙋйсѧ, ꙗ҆́кѡ нбⷭ҇нꙋю ра́дость прїѧ́лъ є҆сѝ.

Ра́дꙋйсѧ, рѡссі́йскїй свѣти́льниче: ра́дꙋйсѧ, крѣ́пкїй на́шъ защи́тниче.

Ра́дꙋйсѧ, са́вво, новгоро́дскїй чꙋдотво́рче.

Конда́къ а҃і

Пѣ́нїе по достоѧ́нїю возда́ти тебѣ̀ нѣ́сть возмо́жнѡ, прпⷣбный ѻ҆́ч҃е са́вво, ты́ бо бжⷭ҇твеннꙋю блгⷣть на́мъ хода́тайствꙋеши и҆ бг҃ꙋ со а҆́гг҃лы пое́ши: А҆ллилꙋ́їа.

І҆́косъ а҃і

Свѣтопрїе́мный свѣти́льниче и҆ вели́кїй ᲂу҆го́дниче са́вво, ты̀, мно́гими добродѣ́тельми сїѧ́ющь, вше́лъ є҆сѝ въ нбⷭ҇наѧ ст҃а́ѧ и҆ предста́лъ є҆сѝ ко гдⷭ҇ꙋ, и҆дѣ́же и҆ на́съ помина́й, вопїю́щихъ тебѣ̀ си́це:

Ра́дꙋйсѧ, ꙗ҆́кѡ бжⷭ҇твенный зако́нъ соблю́лъ є҆сѝ: ра́дꙋйсѧ, ꙗ҆́кѡ бг҃ꙋ посвѧти́лсѧ є҆сѝ.

Ра́дꙋйсѧ, прїѧ́тый въ гѡ́рнѧѧ селє́нїѧ: ра́дꙋйсѧ, наслажда́ющїйсѧ нбⷭ҇нагѡ весе́лїѧ.

Ра́дꙋйсѧ, хрⷭ҇тїа́ны ᲂу҆твержда́ющїй: ра́дꙋйсѧ, ѿ врагѡ́въ ѡ҆свобожда́ющїй.

Ра́дꙋйсѧ, ꙗ҆́кѡ безпло́тенъ пожи́вый: ра́дꙋйсѧ, ꙗ҆́кѡ безплѡ́тнымъ причте́нъ є҆сѝ.

Ра́дꙋйсѧ, бл҃года́ти на́мъ хода́таю: ра́дꙋйсѧ, бл҃годѣѧ́нїй пода́телю.

Ра́дꙋйсѧ, ꙗ҆́кѡ врагѝ на́шѧ посрамлѧ́еши: ра́дꙋйсѧ, ꙗ҆́кѡ навѣ́ты и҆́хъ разрꙋша́еши.

Ра́дꙋйсѧ, са́вво, новгоро́дскїй чꙋдотво́рче.

Конда́къ в҃і

Бл҃года́ть, да́ннꙋю тебѣ̀, прпⷣбне ѻ҆́ч҃е са́вво, и҆ по́двиги твоѧ̑ и҆зрещѝ не мо́жемъ, въ пꙋсты́ни бо нестѧжа́тельнѡ пожи́въ, сегѡ̀ ра́ди на нб҃сѣ́хъ ра́дꙋешисѧ и҆ пое́ши пѣ́снь: А҆ллилꙋ́їа.

І҆́косъ в҃і

Пое́мъ до́блествєнныѧ по́двиги твоѧ̑, ᲂу҆блажа́емъ достохва́льнꙋю кончи́нꙋ твою̀, почита́емъ сщ҃е́ннꙋю па́мѧть твою̀, прпⷣбне ѻ҆́ч҃е са́вво, и҆ похва̑льнаѧ си́це вопїе́мъ:

Ра́дꙋйсѧ, въ черто́гъ нбⷭ҇ный введе́нный: ра́дꙋйсѧ, въ число̀ ст҃ы́хъ ᲂу҆чине́нный.

Ра́дꙋйсѧ, правосла̑внымъ побо́рниче: ра́дꙋйсѧ, хрⷭ҇тїа́нѡмъ помо́щниче.

Ра́дꙋйсѧ, вражды̀ разрꙋши́телю: ра́дꙋйсѧ, врагѡ́въ и҆стреби́телю.

Ра́дꙋйсѧ, вѣ̑рнымъ ми́ръ и҆ ᲂу҆твержде́нїе: ра́дꙋйсѧ, ско́рое ѿ врагѡ́въ ѡ҆свобожде́нїе.

Ра́дꙋйсѧ, ѕло́бы земны̑ѧ гꙋби́телю: ра́дꙋйсѧ, ѿча́ѧнныхъ посѣти́телю.

Ра́дꙋйсѧ, въ сожи́тельство чинѡ́въ нбⷭ҇ныхъ ᲂу҆чине́нный: ра́дꙋйсѧ, ѿ ст҃ы́хъ ликѡ́въ въ черто́гъ введе́нный.

Ра́дꙋйсѧ, са́вво, новгоро́дскїй чꙋдотво́рче.

Конда́къ г҃і

Ѽ всехва́льный и҆ преди́вный ᲂу҆го́дниче хрⷭ҇то́въ, са́вво прпⷣбный, мо́лимсѧ и҆ вопїе́мъ тебѣ̀ всеꙋсе́рднѡ: прїимѝ ма́лое сїѐ ѿ на́съ моле́нїе, ᲂу҆молѝ ми́лостивагѡ бг҃а, да и҆зба́витъ на́съ ѿ всѧ́кихъ бѣ́дъ и҆ бꙋ́дꙋщихъ и҆́зметъ мꙋ́къ, вопїю́щихъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льскїѧ чи́ни возра́довашасѧ твои̑мъ подвигѡ́мъ, и҆́миже въ пꙋсты́ни ᲂу҆пражнѧ́лсѧ є҆сѝ въ постѣ̀ и҆ мл҃твахъ: и҆ ны́нѣ мы̀, почита́ѧ тѧ̀ собесѣ́дника а҆́гг҃лѡвъ, сицєва́ѧ вопїе́мъ тебѣ̀:

Ра́дꙋйсѧ, нбⷭ҇ный жи́телю: ра́дꙋйсѧ, страсте́й разрꙋши́телю.

Ра́дꙋйсѧ, воздержа́нїе ꙗ҆ви́вый: ра́дꙋйсѧ, ви́шерскꙋю пꙋсты́ню просвѣти́вый.

Ра́дꙋйсѧ, на сп҃се́нїе ᲂу҆чи́телю: ра́дꙋйсѧ, безмо́лвїѧ рачи́телю.

Ра́дꙋйсѧ, ско́рый помо́щниче: ра́дꙋйсѧ, на пꙋ́ть пра́вый наставлѧ́ѧй.

Ра́дꙋйсѧ, црⷭ҇твїе нбⷭ҇ное возвѣща́ѧй: ра́дꙋйсѧ, ᲂу҆ныва́ющихъ ᲂу҆тѣше́нїе.

Ра́дꙋйсѧ, грѣ́шныхъ и҆справле́нїе.

Ра́дꙋйсѧ, са́вво, новгоро́дскїй чꙋдотво́рче.

Конда́къ а҃

И҆збра́нный и҆ ди́вный ѻ҆́ч҃е са́вво, просвѣще́нный ѿ трисїѧ́ннагѡ свѣ́та, ты̀ на́съ ѡ҆мраче́нныхъ грѣхо́вными страстьмѝ просвѣтѝ и҆ твои́ми мл҃твами ѿ всѣ́хъ бѣ́дъ и҆зба́ви, да зове́мъ тебѣ̀:

Ра́дꙋйсѧ, са́вво, новгоро́дскїй чꙋдотво́рче.

Моли́твы

Ѽ вели́кїй ᲂу҆го́дниче, пресла́вный чꙋдотво́рче и҆ ѡ҆би́тели сеѧ̀ бг҃одꙋхнове́нный наста́вниче, са́вво всебл҃же́нне, дꙋше́ю на нб҃сѝ прⷭ҇то́лꙋ всѣ́хъ цр҃ѧ̀ предстоѧ́й, тѣ́ломъ же во ст҃ѣ́й ѡ҆би́тели се́й почива́ѧй, и҆ разли̑чнаѧ чꙋдеса̀ повсю́дꙋ мл҃твами твои́ми соверша́ѧй. при́зри ми́лостивнѡ на лю́ди предстоѧ́щыѧ и҆ твоегѡ̀ ко гдⷭ҇ꙋ бг҃ꙋ хода́тайства во ѡ҆бдержа́щихъ нꙋ́ждахъ просѧ́щыѧ: вси́ бо мы̀, по мно́жествꙋ грѣхѡ́въ на́шихъ, не то́чїю смѣ́емъ принестѝ когда̀ моле́бный гла́съ, но нижѐ возвѣстѝ ѻ҆че́съ свои́хъ на нб҃о: ты́ же, ꙗ҆́кѡ стѧжа́вый дерзнове́нїе, принесѝ за всѣ́хъ, къ честнѣ́й ра́цѣ твое́й притека́ющихъ, тє́плыѧ мл҃твы къ гдⷭ҇ꙋ, є҆́же и҆зба́витисѧ на́мъ ѿ гла́да, пото́па, трꙋ́са, ѻ҆гнѧ̀, меча̀ и҆ бра́ни, ѿ люде́й и҆ ѿ дїа́вола быва́ющїѧ, и҆ ѿ всѧ́кїѧ дꙋше́вныѧ и҆ тѣле́сныѧ болѣ́зни: да и҆зба́вившесѧ си́хъ и҆ рабо́тающе гдⷭ҇ꙋ, є҆мꙋ̀ же предстои́ши, вни́демъ въ неконча́емый поко́й и҆ просла́вимъ та́мѡ съ тобо́ю всѣ́хъ благи́хъ пода́телѧ бг҃а, всегда̀, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѽ преизѧ́щный и҆ вели́кїй ᲂу҆го́дниче гдⷭ҇ень са́вво, похвалѧ́емъ твоѧ̑ сла̑внаѧ чꙋдотворє́нїѧ, прославлѧ́емъ житїѐ твоѐ ст҃о́е: никто́же возмо́жетъ и҆счестѝ терпѣ́нїе и҆ по́двиги твоѧ̑ ст҃ы̑ѧ: ты́ бо ѻ҆те́чество и҆ ро́дъ ѡ҆ста́вилъ є҆сѝ, въ пꙋсты́ню дости́гъ и҆, ᲂу҆ченикѝ собра́въ, соста́вилъ ѡ҆би́тель, воздви́гнꙋвъ сто́лпъ, и҆ на не́мъ подвиза́лсѧ є҆сѝ, сохранѧ́ѧ ста́до твоѐ слове́сное: и҆́же непра́веднѡ и҆ногда̀ наше́дшихъ разбо́йнически на ѡ҆би́тель твою̀ ᲂу҆ви́дѣлъ є҆сѝ и҆ то́кмѡ жезла̀ ᲂу҆даре́нїемъ ᲂу҆страши́лъ є҆сѝ, и҆ ны́нѣ ᲂу҆страшѝ, ѻ҆́ч҃е прпⷣбный, всѣ́хъ врагѡ́въ, возстаю́щихъ на на́съ: ᲂу҆молѝ ми́лостивагѡ бг҃а, да ѿпꙋ́ститъ на́мъ прегрѣшє́нїѧ на̑ша и҆ сподо́битъ на́съ кꙋ́пнѡ ра́дости вѣ́чныѧ наслажда́тисѧ со всѣ́ми ст҃ы́ми, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.