Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃и́телю варсоно́фїю, є҆пⷭ҇кпꙋ тферско́мꙋ, каза́нскомꙋ чꙋдотво́рцꙋ.

Свтт. Гурия, I-го архиеп. Казанского и Варсонофия, еп. Тверского (обрет. мощ.) (1595) 17 октября 2026

Конда́къ а҃

Возбра́нномꙋ ст҃и́телю и҆ чꙋдотво́рцꙋ варсоно́фїю соста́вимъ похвалꙋ̀, ꙗ҆́кѡ ᲂу҆се́рдномꙋ моли́твенникꙋ на́шемꙋ и҆ ско́ромꙋ помо́щникꙋ. ты́ же, ст҃и́телю, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ᲂу҆молѝ є҆го̀ и҆збавлѧ́ти на́съ ѿ всѧ́кихъ бѣ́дъ и҆ скорбе́й, да съ ра́достїю зове́мъ тѝ:

Ра́дꙋйсѧ, варсоно́фїе, каза́нскїй чꙋдотво́рче.

І҆́косъ а҃

А҆́гг҃лѡвъ творе́цъ и҆ всеѧ̀ тва́ри содѣ́тель ꙗ҆вѝ тѧ̀ цр҃кви свое́й ст҃ѣ́й но́ваго ст҃и́телѧ и҆ чꙋдотво́рца, и҆мꙋ́щаго къ немꙋ̀ дерзнове́нїе моли́ти ѡ҆б̾ и҆збавле́нїи на́съ ѿ всѧ́кихъ бѣ́дъ и҆ скорбе́й. сегѡ̀ ра́ди восхвалѧ́емъ тѧ̀ си́це:

Ра́дꙋйсѧ, бл҃гослове́нное ча́до бл҃гочести́вагѡ ѻ҆тца̀, сподо́бившагосѧ благода́ти сщ҃е́нства: ра́дꙋйсѧ, бл҃года́тный воспи́танниче бл҃гоговѣ́йнагѡ ᲂу҆чи́телѧ.

Ра́дꙋйсѧ, ѡ҆роше́нный блгⷣтїю, лїѧ́вшеюсѧ ѿ є҆гѡ̀ наставле́нїй: ра́дꙋйсѧ, ѻ҆́троче, прїѧ́вшїй въ се́рдце твоѐ нача́ло премꙋ́дрости.

Ра́дꙋйсѧ, ꙗ҆́кѡ то́ю всѧ̑ бꙋ́ѧѧ ю҆́ности ѿ се́рдца твоегѡ̀ ѿгна́лъ є҆сѝ: ра́дꙋйсѧ, ско́рѡ и҆ спѣ́шнѡ навы́кнꙋвый наказа́нїю зако́на бж҃їѧ.

Ра́дꙋйсѧ, ра́зꙋмомъ и҆ добродѣ́тельнымъ житїе́мъ пресвѧто́е и҆́мѧ бж҃їе просла́вивый: ра́дꙋйсѧ, ра́досте и҆ ᲂу҆тѣше́нїе твои̑мъ роди́телємъ.

Ра́дꙋйсѧ, крі́не, возраще́нный на землѝ длѧ ра́йскихъ селе́нїй: ра́дꙋйсѧ, мл҃твенниче на́шъ ᲂу҆се́рдный.

Ра́дꙋйсѧ, крѣ́пкїй на́шъ застꙋ́пниче: ра́дꙋйсѧ, мꙋ́дрый и҆ кро́ткїй на́шъ наста́вниче.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ в҃

Ви́дѧ сꙋетꙋ̀ мі́ра и҆ привре́менныхъ бла̑гъ є҆гѡ̀, ты̀, ст҃и́телю варсоно́фїе, є҆ди́наго бо́га крѣ́пкѡ ѿ ю҆́ности твоеѧ̀ возлюби́лъ є҆сѝ и҆ слеза́ми мл҃твенными ра́дость нбⷭ҇нꙋю на землѝ сѣ́ѧлъ є҆сѝ. тѣ́мже мы̀, ра́дꙋѧсѧ, вопїе́мъ съ тобо́ю бг҃ꙋ: А҆ллилꙋ́їа.

І҆́косъ в҃

Разꙋ́мнѡ ᲂу҆разꙋмѣ́въ попꙋще́нїе премꙋ́драгѡ про́мысла, хотѧ́щагѡ пред̾ꙋгото́вати и҆з̾ тебѣ̀ но́вагѡ проповѣ́дника вѣ́ры хрⷭ҇то́вы длѧ невѣ́рꙋющихъ а҆га́рѧнъ, ты̀, ст҃и́телю хрⷭ҇то́въ, бл҃годꙋ́шнѡ въ ю҆́ности твое́й кре́стъ плѣ́на поне́слъ є҆сѝ и҆ въ странѣ̀ плѣне́нїѧ вѣ́дѣнїю ꙗ҆зы́ка а҆га́рѧнскагѡ наꙋчи́лсѧ є҆сѝ. сегѡ̀ ра́ди прїимѝ ѿ на́съ похвалы̑ сїѧ̑:

Ра́дꙋйсѧ, пред̾ꙋгото́ванный сосꙋ́де мѵ́ра хрⷭ҇то́ва, и҆злїѧ́ннагѡ на невѣ́ровавшихъ: ра́дꙋйсѧ, па́стырю, воспита́нный посредѣ̀ волкѡ́въ.

Ра́дꙋйсѧ, свѣти́льниче цр҃кве, пред̾ꙋгото́ванный под̾ спꙋ́домъ: ра́дꙋйсѧ, сто́лпе цр҃кве правосла́вныѧ, ᲂу҆крѣпле́нный крⷭ҇то́мъ.

Ра́дꙋйсѧ, смире́нїемъ, кро́тостїю и҆ послꙋша́нїемъ плени́вшихъ тѧ̀ ᲂу҆диви́вый: ра́дꙋйсѧ, тѣ́ми любо́вь и҆́хъ къ тебѣ̀ прїѡбрѣты́й.

Ра́дꙋйсѧ, сле́зный сѣ́ѧтелю ра́дости нбⷭ҇ныѧ: ра́дꙋйсѧ, всего̀ себѐ во́лѣ бж҃їей преда́вый.

Ра́дꙋйсѧ, ра́йскїй крі́не, посредѣ̀ те́рнїй на землѝ произра́стшїй: ра́дꙋйсѧ, би́сере многоцѣ́нный, зла́томъ ѿ плѣ́на и҆скꙋпле́нный.

Ра́дꙋйсѧ, ѻ҆тца̀ и҆ ма́терь ра́ди хрⷭ҇та̀ ѡ҆ста́вивый: ра́дꙋйсѧ, дѣ́вства и҆ чистоты̀ храни́телю.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ г҃

Си́лꙋ хрⷭ҇та̀ спⷭ҇телѧ, влекꙋ́щꙋю къ немꙋ̀, ᲂу҆разꙋмѣ́въ, ст҃и́телю, ты̀ дꙋше́ю и҆ тѣ́ломъ семꙋ̀ влече́нїю послѣ́довалъ є҆сѝ, и҆ ꙗ҆́кѡ а҆́гг҃лъ, на крилѣ́хъ поста̀ и҆ моли́твы къ немꙋ̀ воспари́лъ є҆сѝ, непреста́ннѡ воспѣва́ѧ бг҃ꙋ: А҆ллилꙋ́їа.

І҆́косъ г҃

И҆мѣ́ѧ во ᲂу҆мѣ̀ и҆ се́рдцѣ твое́мъ є҆ди́наго бг҃а, ты̀, ст҃и́телю, всѧ̑ кра̑снаѧ мі́ра сегѡ̀ презрѣ́лъ є҆сѝ и҆ ᲂу҆едине́нїе съ нестѧжа́нїемъ крѣ́пкѡ возлюби́лъ є҆сѝ, слꙋжа̀ бг҃ꙋ посто́мъ и҆ мл҃твою. тѣ́мже вопїе́мъ тѝ:

Ра́дꙋйсѧ, гдⷭ҇а бг҃а вѣ́рный слꙋжи́телю: ра́дꙋйсѧ, ве́сь ᲂу҆́мъ тво́й бг҃омы́слїемъ ѡ҆свѧти́вый.

Ра́дꙋйсѧ, ᲂу҆се́рдный и҆ вѣ́рный во́ли хрⷭ҇то́вой и҆сполни́телю: ра́дꙋйсѧ, премꙋ́дрый мона́хѡвъ наста́вниче.

Ра́дꙋйсѧ, до́брый ѡ҆ ни́хъ попечи́телю: ра́дꙋйсѧ, дѣ́вства и҆ чистоты̀ храни́телю.

Ра́дꙋйсѧ, люби́миче бра́тїи твоеѧ̀: ра́дꙋйсѧ, ѡ҆́бразе и҆ подви́жниче добродѣ́телей.

Ра́дꙋйсѧ, зерца́ло є҆ѵⷢ҇льскагѡ соверше́нства: ра́дꙋйсѧ, живы́й сви́тче зако́на бж҃їѧ.

Ра́дꙋйсѧ, вѣ́рный подража́телю хрⷭ҇то́въ.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ д҃

Бꙋ́рѧ внꙋ́треннихъ ско́рбныхъ помышле́нїй ѡ҆бы́де тѧ̀, ст҃и́телю, є҆гда̀ внеза́пꙋ въ чꙋждꙋ́ю зе́млю плѣне́нъ бы́лъ є҆сѝ, и҆дѣ́же и҆ го́рькїѧ сле́зы пролива́лъ є҆сѝ. Е҆гда́же всецѣ́лѡ во́лѣ бж҃їей преда́лсѧ є҆сѝ, тогда̀ непреста́ннѡ ди́вномꙋ въ сꙋдьба́хъ свои́хъ бг҃ꙋ вопїѧ́лъ є҆сѝ: А҆ллилꙋ́їа.

І҆́косъ д҃

Слы́шавъ ѡ҆ свѧто́мъ житїѝ твое́мъ, ца́рь і҆ѡа́ннъ ра́довасѧ, ꙗ҆́кѡ рѡссі́ѧ и҆мѧ́ше такѡвы́ѧ потає́нныѧ ᲂу҆гѡ́дники бж҃їѧ, и҆ не таѧ́й свѣти́льника под̾ спꙋ́домъ, ᲂу҆стро́и тебѣ̀ бы́ти и҆гꙋ́мена пѣсно́шскїѧ ѡ҆би́тели. мы́ же, ра́дꙋѧсѧ, вопїе́мъ тѝ:

Ра́дꙋйсѧ, свѣти́льниче, и҆з̾ под̾ спꙋ́да на свѣ́щникъ поста́вленный: ра́дꙋйсѧ, мл҃твенниче неꙋсы́пный.

Ра́дꙋйсѧ, врачꙋ̀ ра́нъ серде́чныхъ прозорли́вый: ра́дꙋйсѧ, цѣли́телю грѣхо́вныхъ недꙋ́гѡвъ.

Ра́дꙋйсѧ, великодꙋ́шный стропти́вости препобѣди́телю: ра́дꙋйсѧ, сострада́тельный и҆ терпѣли́вый бра́тїи твоеѧ̀ люби́телю.

Ра́дꙋйсѧ, неви́димыхъ врагѡ́въ мꙋ́дрый прогони́телю: ра́дꙋйсѧ, бл҃гоговѣ́йный бж҃їй слꙋжи́телю.

Ра́дꙋйсѧ, бл҃гочи́нїѧ монасты́рскагѡ мꙋ́дрый ᲂу҆строи́телю: ра́дꙋйсѧ, ѡ҆бра́дованный посѣще́нїемъ твоеѧ̀ ѡ҆би́тели ѿ цр҃ѧ̀ держа́внагѡ.

Ра́дꙋйсѧ, ѡ҆бра́довавый є҆го̀ твои́мъ бл҃гоговѣ́нїемъ и҆ смире́нїемъ: ра́дꙋйсѧ, а҆́гг҃ле во ѡ҆́бразѣ человѣ́честѣмъ.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ є҃

Бг҃оте́чнѣй ѕвѣздѣ̀ подо́бенъ бы́лъ є҆сѝ, ст҃и́телю, въ восхожде́нїи твое́мъ на тве́рдь цр҃ко́внꙋю, и҆ послѣ́дꙋѧ, ꙗ҆́кѡ со́лнцꙋ, ст҃и́телю гꙋ́рїю, по во́лѣ царѧ̀ держа́внагѡ ше́ствовалъ є҆сѝ въ бг҃оспаса́емый гра́дъ каза́нь, поѧ̀ бг҃ꙋ: А҆ллилꙋ́їа.

І҆́косъ є҃

Ви́дѣша тѧ̀, ст҃и́телю, правосла́внїи жи́тели гра́да каза́ни ᲂу҆строѧ́ющаго въ не́й пе́рвꙋю ѡ҆би́тель во и҆́мѧ бг҃олѣ́пнагѡ сп҃сова преѡбраже́нїѧ, и҆ въ бл҃гоговѣ́йнѣй ра́дости ѡ҆ гдⷭ҇ѣ, творѧ́щемъ ди́внаѧ дѣла̀ своѧ̑, вопїѧ́хꙋ тебѣ̀ си́це:

Ра́дꙋйсѧ, нече́стїѧ ре́вностный и҆скорени́телю: ра́дꙋйсѧ, бл҃гоче́стїѧ ᲂу҆се́рдный ревни́телю.

Ра́дꙋйсѧ, магоме́довы тмы̀ ди́вный прогони́телю: ра́дꙋйсѧ, свѣ́та хрⷭ҇то́ва ре́вностный распространи́телю.

Ра́дꙋйсѧ, пе́рвыѧ ѡ҆би́тели въ каза́ни ᲂу҆строи́телю: ра́дꙋйсѧ, ди́вный и҆збра́нниче бж҃їй.

Ра́дꙋйсѧ, блгⷣть и҆ млⷭ҇ть гдⷭ҇ню въ бра́тїи твое́й водвори́вый: ра́дꙋйсѧ, число̀ и҆́нокѡвъ ᲂу҆мно́живый.

Ра́дꙋйсѧ, благочи́нїѧ цр҃ко́внагѡ блюсти́телю: ра́дꙋйсѧ, пѣ́нїѧ бжⷭ҇твеннагѡ и҆скꙋ́сный ᲂу҆чи́телю.

Ра́дꙋйсѧ, безчи́нїѧ и҆ нече́стїѧ мꙋ́дрый ѡ҆бличи́телю.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ ѕ҃

Проповѣ́дникъ бг҃оно́сный ꙗ҆ви́лсѧ є҆сѝ, ст҃и́телю, во гра́дѣ каза́ни, ѡ҆блича́ѧ нечести́выхъ покло́нникѡвъ лжепроро́ка самѣ́мъ и҆́хъ ѧ҆зы́комъ, и҆ не могꙋ́щихъ ничто́же рещѝ проти́вꙋ тебє̀ ѡ҆браща́ѧ къ є҆ди́номꙋ въ трⷪ҇цѣ сла́вимомꙋ бг҃ꙋ, поѧ̀ є҆мꙋ̀: А҆ллилꙋ́їа.

І҆́косъ ѕ҃

Возсїѧ̀ въ каза́ни просвѣще́нїе и҆́стины и҆ ѿгна̀ ѿ неѧ̀ тмꙋ̀ нече́стїѧ хрⷭ҇то́съ, и҆́стинный бг҃ъ на́шъ, є҆мꙋ́же въ се́мъ ᲂу҆се́рднѡ послꙋжи́лъ є҆сѝ, ст҃и́телю. тѣ́мже взыва́емъ тѝ си́це:

Ра́дꙋйсѧ, насади́телю ни́вы хрⷭ҇то́вы въ странѣ̀ нече́стїѧ: ра́дꙋйсѧ, напои́телю ѻ҆́ной живы́ми вода́ми хрⷭ҇то́ва ᲂу҆че́нїѧ.

Ра́дꙋйсѧ, ничто́же себѣ̀ восписꙋ́ѧй, но всѧ̑ къ є҆ди́номꙋ бг҃ꙋ ѿносѧ́й: ра́дꙋйсѧ, вождю̀ вѡ́инства хрⷭ҇тѡ́ва, посека́ющагѡ всѧ̑ проти̑вныѧ си́лы нечє́стїѧ.

Ра́дꙋйсѧ, а҆́гг҃ле, по́сланный ѿ бг҃а ко и҆стребле́нїю пле́велъ на ни́вѣ є҆гѡ̀: ра́дꙋйсѧ, дрꙋ́же бж҃їй, жела́ющїй всѣ̑мъ сп҃се́нїѧ.

Ра́дꙋйсѧ, бл҃года́тный врачꙋ̀ дꙋ́шъ и҆ тѣле́съ: ра́дꙋйсѧ, кро́ткїй ᲂу҆каза́телю лжи́вости магомета́нскїѧ вѣ́ры держа́щымсѧ є҆ѧ̀.

Ра́дꙋйсѧ, мꙋ́дрый ᲂу҆достовери́телю въ бжⷭ҇твенности вѣ́ры хрⷭ҇тїа́нскїѧ: ра́дꙋйсѧ, невѣ́рныхъ ᲂу҆чи́телю вѣ́ры въ прест҃ꙋ́ю трⷪ҇цꙋ.

Ра́дꙋйсѧ, свѣти́ло, сїѧ́ющее на тве́рди каза́нскїѧ ѻ҆́бласти: ра́дꙋйсѧ, теплото̀, согрѣва́ющаѧ всѣ́хъ, притека́ющихъ къ тебѣ̀, любо́вїю.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ з҃

Хотѧ́й ᲂу҆стро́ити сп҃се́нїе каза́нскихъ тата́ръ, наꙋчѝ тѧ̀, ст҃и́телю, враче́бнѣй хи́трости, да бꙋ́деши и҆́мъ вра́чъ дꙋ́шъ и҆ тѣле́съ. ты́ же, и҆мѣ́ѧ любо́вь бг҃оподо́бнꙋю, принима́лъ є҆сѝ всѧ̑ недꙋ́жныѧ, притека́ющыѧ къ тебѣ̀, ᲂу҆казꙋ́ѧ коемꙋ́ждо на бл҃гопотре́бное врачевство̀, па́че же на всецѣли́телѧ гдⷭ҇а і҆и҃са хрⷭ҇та̀, поѧ̀ є҆мꙋ̀: А҆ллилꙋ́їа.

І҆́косъ з҃

Но́вое и҆ ди́вное сре́дство къ ѡ҆браще́нїю невѣ́рныхъ показа̀ гдⷭ҇ь въ твое́мъ, ст҃и́телю, врачева́нїи тѣле́сныхъ болѣ́зней, привлека́ѧ къ тебѣ̀ мно́жество недꙋ́жныхъ всѧ́кагѡ ро́да, и҆́хже кꙋ́пнѡ съ при́сными и҆́хъ ко хрⷭ҇тꙋ̀ приводи́лъ є҆сѝ. тѣ́мже, безме́здный врачꙋ̀, прїимѝ ѿ на́съ такѡва́ѧ:

Ра́дꙋйсѧ, безмє́зднымъ врачє́мъ мꙋ́дрый подража́телю: ра́дꙋйсѧ, ꙗ҆́кѡ позна́лъ є҆сѝ бл҃года́тнꙋю си́лꙋ и҆́хъ безме́зднагѡ врачева́нїѧ.

Ра́дꙋйсѧ, врачева́вый недꙋ̑жныѧ привлече́нїѧ ра́ди къ вѣ́рѣ невѣ́рꙋющихъ: ра́дꙋйсѧ, ᲂу҆потреблѧ́вый врачева́нїе тѣле́сное къ сла́вѣ и҆́мене бж҃їѧ и҆ ко сп҃се́нїю бли́жнихъ.

Ра́дꙋйсѧ, ре́вностный сотрꙋ́дниче ст҃и́телѧ гꙋ́рїа: ра́дꙋйсѧ, и҆́скреннїй и҆ вѣ́рный є҆гѡ̀ дрꙋ́же.

Ра́дꙋйсѧ, ᲂу҆спокои́телю є҆гѡ̀ на ѻ҆дрѣ̀ сме́ртномъ: ра́дꙋйсѧ, и҆ по сме́рти съ ни́мъ не разлꙋчи́выйсѧ.

Ра́дꙋйсѧ, мл҃твенниче на́шъ ᲂу҆се́рдный: ра́дꙋйсѧ, храни́телю ѡ҆би́тели твоеѧ̀ неꙋсы́пный.

Ра́дꙋйсѧ, гра́дꙋ каза́ни похвало̀ и҆ ᲂу҆твержде́нїе: ра́дꙋйсѧ, свѣти́ло, сїѧ́ющее на тве́рди правосла́вныѧ це́ркве.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ и҃

Стра́нное бѣ̀ предсказа́нїе ѡ҆ тебѣ̀, ст҃и́телю, прозорли́вагѡ ст҃и́телѧ а҆ка́кїа, и҆́же є҆щѐ во вре́мѧ твоегѡ̀ і҆еродїа́конства предречѐ, ꙗ҆́кѡ бꙋ́деши въ бг҃оспаса́емомъ гра́дѣ тфе́ри ᲂу҆правлѧ́ти людьмѝ бж҃їими. мы́ же, бл҃гогове́ѧ пред̾ бг҃омъ, ди́внѡ ᲂу҆стро́ившемъ твоѐ є҆мꙋ̀ слꙋже́нїе, пое́мъ є҆мꙋ̀: А҆ллилꙋ́їа.

І҆́косъ и҃

Ве́сь бы́лъ є҆сѝ бж҃їй, ст҃и́телю, є҆гда̀ поста́вленъ бы́лъ є҆сѝ во є҆пⷭ҇копа бг҃оспаса́емомꙋ гра́дꙋ тфе́ри, слꙋжа̀ бг҃ꙋ тѣ́ломъ и҆ дꙋше́ю: тѣ́ло и҆знꙋрѧ́ѧ посто́мъ и҆ непреста́ннымъ трꙋдо́мъ, дꙋ́шꙋ же пита́ѧ мл҃твою и҆ сло́вомъ бж҃їимъ. тѣ́мже прїимѝ ѿ на́съ сицєва́ѧ:

Ра́дꙋйсѧ, свѣти́льниче тферскі́ѧ цр҃кве: ра́дꙋйсѧ, до́брый є҆ѧ̀ па́стырю.

Ра́дꙋйсѧ, слове́сныхъ ѻ҆ве́цъ мꙋ́дрый пита́телю: ра́дꙋйсѧ, вѣ́рный хрⷭ҇то́въ подража́телю.

Ра́дꙋйсѧ, а҆пⷭ҇лѡвъ наслѣ́дниче: ра́дꙋйсѧ, неꙋтоми́мый дѣ́лателю ни́вы бж҃їѧ.

Ра́дꙋйсѧ, бл҃говре́менный є҆ѧ̀ напои́телю: ра́дꙋйсѧ, ѻ҆ч҃ескихъ преда́нїй храни́телю.

Ра́дꙋйсѧ, вѣ́ры хрⷭ҇то́вы правосла́вный ᲂу҆чи́телю: ра́дꙋйсѧ, стро́гїй поста̀ блюсти́телю.

Ра́дꙋйсѧ, ѻ҆́бразъ вѣ́рꙋющымъ въ тебѣ̀ само́мъ написа́вый: ра́дꙋйсѧ, неꙋсы́пный мл҃твенниче ѡ҆ ста́дѣ твое́мъ.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ ѳ҃

Всѝ а҆́гг҃ли нбⷭ҇нїи восхвали́ша бг҃а, дарова́вшаго тебѣ̀, ст҃и́телю, чꙋ́дный да́ръ врачева́нїѧ тѣле́сныхъ и҆ дꙋше́вныхъ болѣ́зней, и҆́мже всѣ́хъ привлека́лъ є҆сѝ, поѧ̀ бг҃ꙋ: А҆ллилꙋ́їа.

І҆́косъ ѳ҃

Виті́и многовѣща́ннїи ри́торскими свои́ми ꙗ҆зы̑ки не возмо́гꙋтъ и҆зрещѝ па́стырскихъ твои́хъ подвигѡ́въ, ст҃и́телю: ка́кѡ бо мо́щно всѧ̑ повѣ́дати ѡ҆ стро́гости поста̀ твоегѡ̀ и҆лѝ ѡ҆ неꙋсы́пномъ препровожде́нїи ноще́й въ моли́твѣ; мы́ же бл҃гоговѣ́йнѡ взыва́емъ тѝ си́це:

Ра́дꙋйсѧ, па́стырю, въ стро́гомъ постѣ̀ себє̀ содержа́вый: ра́дꙋйсѧ, подви́жниче бл҃гоче́стїѧ, но́щи въ мл҃твѣ без̾ сна̀ препроводи́вый.

Ра́дꙋйсѧ, собесѣ́дниче бж҃їй: ра́дꙋйсѧ, сѣ́ѧтелю нбⷭ҇ныѧ ра́дости твои́ми мл҃твенными слеза́ми.

Ра́дꙋйсѧ, пло́ть твою̀ всецѣ́ло дꙋ́хови порабо́тивый: ра́дꙋйсѧ, со страстьмѝ и҆ похотьмѝ ю҆̀ распѧ́вый.

Ра́дꙋйсѧ, тферскꙋ́ю па́ствꙋ твою̀ ѿ зара́зы мл҃твами сохрани́вый: ра́дꙋйсѧ, сердобо́льный ѡ҆ вѣ́рныхъ попечи́телю.

Ра́дꙋйсѧ, во всѣ́хъ ско́рбѧхъ и҆́хъ ᲂу҆тѣ́шителю: ра́дꙋйсѧ, па́стырю милосе́рдный ко всѣ̑мъ бѣ́дствꙋющымъ.

Ра́дꙋйсѧ, ᲂу҆ча́стниче во всѣ́хъ ско́рбехъ и҆ нꙋ́ждахъ бли́жнихъ твои́хъ: ра́дꙋйсѧ, сострада́телю всѣ̑мъ стра́ждꙋщымъ.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ і҃

Сп҃стѝ хотѧ̀ дꙋ́шꙋ твою̀, ст҃и́телю, ты̀, возжелѣ́въ поко́ѧ дꙋхо́внагѡ, тферскꙋ́ю па́ствꙋ твою̀ въ ста́рости ѡ҆ста́вилъ є҆сѝ и҆ пересели́лсѧ є҆сѝ па́ки въ ᲂу҆стро́еннꙋю тобо́ю каза́нскꙋю ѡ҆би́тель бг҃олѣ́пнагѡ сп҃сова преѡбраже́нїѧ, поѧ̀ въ не́й до конца̀ земна́гѡ житїѧ̀ твоегѡ̀ бг҃ꙋ: А҆ллилꙋ́їа.

І҆́косъ і҃

Стѣна̀ и҆ крѣ́пкое ѡ҆гражде́нїе бы́лъ є҆сѝ, ст҃и́телю, каза́нскїѧ твоеѧ̀ ѡ҆би́тели, ѿвраща́ѧ ѿ неѧ̀ всѐ бѣ́ды и҆ напа̑сти ст҃ы́ми твои́ми мл҃твами, и҆ примѣ́ромъ свои́мъ ᲂу҆твержда́ѧ въ бра́тїи бл҃гоче́стїе и҆ ст҃ость. тѣ́мже по до́лгꙋ вопїе́мъ тѝ:

Ра́дꙋйсѧ, сто́лпе благоче́стїѧ: ра́дꙋйсѧ, трꙋдолюби́вый мл҃твенниче.

Ра́дꙋйсѧ, поста̀ и҆ моли́твы ᲂу҆чи́телю: ра́дꙋйсѧ, ми́лостыни ще́дрый раздаѧ́телю.

Ра́дꙋйсѧ, благочи́нїѧ цр҃ко́внагѡ ревни́телю: ра́дꙋйсѧ, наста́вниче мона́хѡвъ предо́брый.

Ра́дꙋйсѧ, неопꙋсти́тельный посѣти́телю є҆жеднє́вныѧ слꙋ̑жбы бж҃їѧ: ра́дꙋйсѧ, земны́й а҆́гг҃ле и҆ нбⷭ҇ный человѣ́че.

Ра́дꙋйсѧ, ѿ землѝ на нб҃о возлетѣ́вый: ра́дꙋйсѧ, и҆ по сме́рти твое́й на́съ не ѡ҆ставлѧ́ѧй.

Ра́дꙋйсѧ, при́сный на́шъ благодѣ́телю: ра́дꙋйсѧ, всегда́шнїй на́шъ во хрⷭ҇тѣ̀ наста́вниче и҆ попечи́телю.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ а҃і

Пѣ́нїе всеꙋмиле́нное прино́симъ тѝ, ст҃и́телю, и҆ мо́лимъ тѧ̀ ᲂу҆моли́ти хрⷭ҇та̀ бг҃а, да да́рꙋетъ всѣ̑мъ на́мъ блгⷣть и҆ си́лꙋ ко сп҃се́нїю, да вы́нꙋ съ тобо́ю пое́мъ є҆мꙋ̀: А҆ллилꙋ́їа.

І҆́косъ а҃і

Свѣтопрїе́мный свѣти́льникъ и҆́стиннагѡ свѣ́та сꙋ́щымъ на землѝ ꙗ҆влѧ́ешисѧ, ст҃и́телю варсоно́фїе, просвѣща́еши бо сердца̀ вѣ́рныхъ и҆ ра́зꙋмꙋ бжⷭ҇твенномꙋ всѧ̑ наставлѧ́еши, поꙋча́ѧ и҆ на́съ ра́достнѡ взыва́ти тебѣ̀:

Ра́дꙋйсѧ, ст҃и́телю, предстоѧ́й прⷭ҇то́лꙋ бж҃їю: ра́дꙋйсѧ, прест҃ы́ѧ трⷪ҇цы присноблаже́нный слꙋжи́телю.

Ра́дꙋйсѧ, предстоѧ́й и҆ послѣ́дꙋѧй а҆́гнцꙋ бж҃їю: ра́дꙋйсѧ, мт҃ре бж҃їѧ собесѣ́дниче.

Ра́дꙋйсѧ, херꙋві́мѡвъ и҆ серафі́мѡвъ соѻ́бщниче: ра́дꙋйсѧ, а҆рха́гг҃лѡвъ и҆ а҆́гг҃лѡвъ сослꙋжи́телю.

Ра́дꙋйсѧ, предте́чи гдⷭ҇нѧ спредстоѧ́телю: ра́дꙋйсѧ, а҆пⷭ҇лѡвъ подража́телю.

Ра́дꙋйсѧ, мч҃нкѡвъ соревнова́телю: ра́дꙋйсѧ, ст҃и́телей равностоѧ́телю.

Ра́дꙋйсѧ, прпⷣбныхъ ᲂу҆краше́нїе: ра́дꙋйсѧ, всѣ́хъ ст҃ы́хъ сожи́телю.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ в҃і

Блгⷣть, да́ннꙋю тѝ ѿ бг҃а, вѣ́дꙋще, притека́емъ къ ра́цѣ моще́й твои́хъ, ст҃и́телю варсоно́фїе, ᲂу҆се́рднѡ ᲂу҆молѧ́юще тѧ̀ ѡ҆ неѡставле́нїи на́съ ст҃ы́ми твои́ми мл҃твами, да и҆ мы̀ по ѡ҆конча́нїи на́шегѡ земна́гѡ жи́тельства съ тобо́ю воспое́мъ бг҃ꙋ: А҆ллилꙋ́їа.

І҆́косъ в҃і

Пою́ще бл҃же́ннꙋю кончи́нꙋ твою̀, є҆́юже, ꙗ҆́кѡ ѻ҆ре́лъ, въ гѡ́рнѧѧ воспари́лъ є҆сѝ, мо́лимъ тѧ̀, ст҃и́телю варсоно́фїе, бы́ти на́мъ во всѣ̑мъ ко бла́гꙋ помо́щникѡмъ и҆ всегда̀ слы́шати ны̀, ᲂу҆се́рднѡ взыва́ющихъ тѝ:

Ра́дꙋйсѧ, ст҃и́телей похвало̀: ра́дꙋйсѧ, ско́рый помо́щниче съ вѣ́рою къ тебѣ̀ притека́ющымъ.

Ра́дꙋйсѧ, неꙋсы́пный храни́телю и҆́нокѡвъ твоеѧ̀ ѡ҆би́тели: ра́дꙋйсѧ, защи́тниче гра́дꙋ каза́ни.

Ра́дꙋйсѧ, ᲂу҆се́рдный мл҃твенниче ѡ҆ всѣ́хъ, къ тебѣ̀ притека́ющихъ: ра́дꙋйсѧ, врачꙋ̀ недꙋ́гꙋющихъ.

Ра́дꙋйсѧ, па́стырю, соблюда́ѧй слове́сное ста́до твоѐ: ра́дꙋйсѧ, помо́щниче и҆ защи́тниче ѡ҆би́димыхъ.

Ра́дꙋйсѧ, дарова́телю ра́дости пла́чꙋщымъ: ра́дꙋйсѧ, ѡ҆бꙋрева́емыхъ наста́вниче.

Ра́дꙋйсѧ, ско́рбныхъ ᲂу҆тѣше́нїе: ра́дꙋйсѧ, сп҃са́емыхъ ѡ҆бодри́телю и҆ подкрѣпи́телю.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ г҃і

Ѽ всебл҃же́нный и҆ ст҃ы́й ст҃и́телю ѻ҆́ч҃е варсоно́фїе, ст҃ы́ми твои́ми мл҃твами ᲂу҆молѝ гдⷭ҇а бг҃а, є҆́же и҆зба́вити всѣ́хъ на́съ, притека́ющихъ къ тебѣ̀, ѿ всѧ́кїѧ ско́рби, ѿ всѧ́кихъ бѣ́дъ и҆ напа́стей, и҆ ѿ всѧ́кагѡ ѕла̀, дꙋше́внагѡ и҆ тѣле́снагѡ, да вы́нꙋ съ тобо́ю пое́мъ є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ и҆ всеѧ̀ тва́ри содѣ́тель ꙗ҆вѝ тѧ̀ цр҃кви свое́й ст҃ѣ́й но́ваго ст҃и́телѧ и҆ чꙋдотво́рца, и҆мꙋ́щаго къ немꙋ̀ дерзнове́нїе моли́ти ѡ҆б̾ и҆збавле́нїи на́съ ѿ всѧ́кихъ бѣ́дъ и҆ скорбе́й. сегѡ̀ ра́ди восхвалѧ́емъ тѧ̀ си́це:

Ра́дꙋйсѧ, бл҃гослове́нное ча́до бл҃гочести́вагѡ ѻ҆тца̀, сподо́бившагосѧ благода́ти сщ҃е́нства: ра́дꙋйсѧ, бл҃года́тный воспи́танниче бл҃гоговѣ́йнагѡ ᲂу҆чи́телѧ.

Ра́дꙋйсѧ, ѡ҆роше́нный блгⷣтїю, лїѧ́вшеюсѧ ѿ є҆гѡ̀ наставле́нїй: ра́дꙋйсѧ, ѻ҆́троче, прїѧ́вшїй въ се́рдце твоѐ нача́ло премꙋ́дрости.

Ра́дꙋйсѧ, ꙗ҆́кѡ то́ю всѧ̑ бꙋ́ѧѧ ю҆́ности ѿ се́рдца твоегѡ̀ ѿгна́лъ є҆сѝ: ра́дꙋйсѧ, ско́рѡ и҆ спѣ́шнѡ навы́кнꙋвый наказа́нїю зако́на бж҃їѧ.

Ра́дꙋйсѧ, ра́зꙋмомъ и҆ добродѣ́тельнымъ житїе́мъ пресвѧто́е и҆́мѧ бж҃їе просла́вивый: ра́дꙋйсѧ, ра́досте и҆ ᲂу҆тѣше́нїе твои̑мъ роди́телємъ.

Ра́дꙋйсѧ, крі́не, возраще́нный на землѝ длѧ ра́йскихъ селе́нїй: ра́дꙋйсѧ, мл҃твенниче на́шъ ᲂу҆се́рдный.

Ра́дꙋйсѧ, крѣ́пкїй на́шъ застꙋ́пниче: ра́дꙋйсѧ, мꙋ́дрый и҆ кро́ткїй на́шъ наста́вниче.

Ра́дꙋйсѧ, варсоно́фїе, каза́нскїй чꙋдотво́рче.

Конда́къ а҃

Возбра́нномꙋ ст҃и́телю и҆ чꙋдотво́рцꙋ варсоно́фїю соста́вимъ похвалꙋ̀, ꙗ҆́кѡ ᲂу҆се́рдномꙋ моли́твенникꙋ на́шемꙋ и҆ ско́ромꙋ помо́щникꙋ. ты́ же, ст҃и́телю, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ᲂу҆молѝ є҆го̀ и҆збавлѧ́ти на́съ ѿ всѧ́кихъ бѣ́дъ и҆ скорбе́й, да съ ра́достїю зове́мъ тѝ:

Ра́дꙋйсѧ, варсоно́фїе, каза́нскїй чꙋдотво́рче.

Моли́твы

Прини́кни, ст҃и́телю варсоно́фїе, съ го́рнихъ селе́нїй на притека́ющихъ къ ра́цѣ моще́й твои́хъ и҆ вонмѝ моле́нїю и҆́хъ: ᲂу҆молѝ гдⷭ҇а бг҃а дарова́ти всѣ̑мъ на́мъ, є҆́же ко сп҃се́нїю на́шемꙋ мы̀ про́симъ ᲂу҆ негѡ̀ при ст҃ы́хъ мощѣ́хъ твои́хъ. бꙋ́ди всѣ̑мъ на́мъ застꙋ́пникъ и҆ хода́тай въ нꙋ́ждахъ на́шихъ и҆ проше́нїихъ. Оу҆молѝ гдⷭ҇а бг҃а дарова́ти крѣ́пкїй и҆ ненарꙋши́мый ми́ръ, благочи́нїе, просвѣще́нїе ᲂу҆мѡ́въ и҆ серде́цъ, и҆ землѝ плодоно́сїе, па́стырємъ ст҃ы́ню, зако́нѡмъ пра́вдꙋ и҆ си́лꙋ, военача́льникѡмъ мꙋ́дрость и҆ непобѣди́мое мꙋ́жество, градонача́льникѡмъ сꙋ́дъ, во́инствꙋ пре́данность вѣ́рѣ и҆ ѻ҆те́чествꙋ, и҆ неѡдоли́мꙋю хра́брость, всѣ̑мъ же правосла̑внымъ хрⷭ҇тїа́нѡмъ здра́вїе и҆ бл҃гоче́стїе. сохранѧ́й ѡ҆би́тель твою̀ ст҃ꙋ́ю ѿ всѣ́хъ навѣ́тѡвъ вра́жїихъ, да сло́вомъ и҆ дѣ́ломъ прославлѧ́етсѧ въ не́й всест҃о́е и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.