Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃о́мꙋ а҆пⷭ҇лꙋ ѳѡмѣ̀.

Св. ап. Фомы (I) 19 октября 2026

Конда́къ а҃

И҆збра́нный самови́дче сло́ва и҆ свидѣ́телю є҆гѡ̀ сла́вный, да́же до послѣ́днихъ землѝ бл҃говѣсти́лъ є҆сѝ вѣ́рꙋ твою̀: є҆гѡ́же ра̑ны а҆́зъ ѡ҆сѧза́хъ, се́й є҆́сть гдⷭ҇ь и҆ бг҃ъ. тѣ́мже и҆ ны́нѣ, созерца́ѧй на́ми незри̑маѧ, за взыскꙋ́ющыѧ вѣ́ры моли́сѧ, да зове́мъ тѝ:

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

І҆́косъ а҃

А҆́гг҃лѡмъ невѣ́домое та́инство позна́лъ є҆сѝ, пло́ть бг҃а жи́ва дерзнове́нною десни́цею ѡ҆сѧза́ѧ, тѣ́мже, ᲂу҆жаса́ющесѧ и҆ дивѧ́щесѧ, зове́мъ тѝ:

Ра́дꙋйсѧ, ꙗ҆́кѡ дерзнове́нїе твоѐ бг҃ъ пред̾ꙋвѣ́де: ра́дꙋйсѧ, ꙗ҆́кѡ на слꙋже́нїе своѐ тѧ̀ пред̾ꙋста́ви.

Ра́дꙋйсѧ, ꙗ҆́кѡ невѣ́рїе твоѐ не ѡ҆сꙋди́сѧ: ра́дꙋйсѧ, ꙗ҆́кѡ вѣ́ра твоѧ̀ ᲂу҆тверди́сѧ.

Ра́дꙋйсѧ, ꙗ҆́кѡ хрⷭ҇то́съ въ ли́къ а҆пⷭ҇льскїй тѧ̀ и҆збра̀: ра́дꙋйсѧ, ꙗ҆́кѡ стѡпы̀ твоѧ̑ по словесѝ своемꙋ̀ напра́ви.

Ра́дꙋйсѧ, ꙗ҆́кѡ ᲂу҆ста̀ ко ᲂу҆стѡ́мъ тебѣ̀ бы́сть бж҃їе вѣща́нїе: ра́дꙋйсѧ, ꙗ҆́кѡ приклони́сѧ гдⷭ҇ь къ любопы́тнагѡ пе́рста ѡ҆сѧза́нїю.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ в҃

Словеса̀ ва̑ша ѡ҆ ꙗ҆вле́нїи воскрⷭ҇шагѡ неꙋдобопрїѧ̑тельна мѝ ꙗ҆влѧ́ютсѧ, вопїѧ́ше ѳѡма̀ и҆ны̑мъ ᲂу҆ченикѡ́мъ: а҆́ще не ви́ждꙋ на рꙋкꙋ̀ є҆гѡ̀ ꙗ҆́звы гвѡзди́нныѧ, и҆ не вложꙋ̀ пе́рста моегѡ̀ въ ꙗ҆́звы гвѡзди́нныѧ, и҆ вложꙋ̀ рꙋ́кꙋ мою̀ въ ре́бра є҆гѡ̀, не дерзнꙋ̀ взыва́ти семꙋ̀: А҆ллилꙋ́їа.

І҆́косъ в҃

Ра́зꙋмъ недоразꙋмева́емый догма́тѡвъ вѣ́ры разꙋмѣ́ти и҆́щꙋще, вопроша́емъ въ смѧте́нїи: во двою̀ є҆стєствꙋ̀ є҆ди́но лицѐ ка́кѡ цр҃ковь мꙋ́дрствꙋетъ и҆ воспѣва́етъ; ѻ҆ба́че невѣ́рїемъ твои́мъ, а҆пⷭ҇ле, ᲂу҆вѣрѧ́еми въ се́мъ, взыва́емъ:

Ра́дꙋйсѧ, ꙗ҆́кѡ хрⷭ҇то́съ є҆ди́нъ хлѣ́бъ съ тобо́ю вкꙋсѝ: ра́дꙋйсѧ, ꙗ҆́кѡ є҆ди́но со́лнце над̾ ва́ма возсїѧ̀.

Ра́дꙋйсѧ, ꙗ҆́кѡ хлѣ́бомъ и҆́стины мнѡ́ги насы́тилъ є҆сѝ: ра́дꙋйсѧ, ꙗ҆́кѡ сл҃нце пра́вды возлюби́лъ є҆сѝ.

Ра́дꙋйсѧ, ꙗ҆́кѡ є҆ди́нъ и҆сто́чникъ вы̀ напоѝ: ра́дꙋйсѧ, ꙗ҆́кѡ є҆ди́на смоко́вница ва́ма сѣ́нь дадѐ.

Ра́дꙋйсѧ, ꙗ҆́кѡ рѣ́ки бл҃года́ти и҆сточи́лъ є҆сѝ: ра́дꙋйсѧ, ꙗ҆́кѡ не безпло́днаѧ смоко́вница показа́лсѧ є҆сѝ.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ г҃

Си́лѣ вы́шнѧгѡ всѧ̑ возмѡ́жна сꙋ́ть, вопїѧ́ше ѳѡма̀: мо́жетъ бо и҆ ᲂу҆ме́ршыѧ воскреша́ти, ѻ҆ба́че ка́кѡ сме́рти прїѡбщи́сѧ се́й, є҆мꙋ́же подоба́етъ воспѣва́ти: А҆ллилꙋ́їа.

І҆́косъ г҃

Бг҃опрїѧ́тнꙋ дв҃ꙋ прозрѣ̀ младе́нецъ, во чре́вѣ є҆лїсаве́тиномъ сы́й: мы́ же, ѻ҆́чи и҆мꙋ́ще, не зри́мъ бл҃га̑ѧ дѣла̀ гдⷭ҇нѧ, ѻ҆ба́че сло́во хрⷭ҇то́во, а҆пⷭ҇лꙋ рече́нное: бл҃же́ни не ви́дѣвшїи и҆ вѣ́ровавшїи, помина́емъ съ наде́ждою, и҆ та́кѡ семꙋ̀ взыва́емъ:

Ра́дꙋйсѧ, сп҃се́нїѧ возжела́вый: ра́дꙋйсѧ, ꙗ҆́кѡ прⷪ҇рѡ́ки ча̑ѧннаѧ ᲂу҆зрѣ́лъ є҆сѝ.

Ра́дꙋйсѧ, а҆да́момъ ᲂу҆тра́чєннаѧ взыска́вый: ра́дꙋйсѧ, ꙗ҆́кѡ сп҃си́телѧ ѡ҆брѣ́лъ є҆сѝ.

Ра́дꙋйсѧ, свѣ́томъ мі́ра просвѣще́нный: ра́дꙋйсѧ, ꙗ҆́кѡ нб҃о ѿве́рзесѧ тѝ.

Ра́дꙋйсѧ, сло́вомъ ѻ҆́ч҃имъ ᲂу҆мꙋдре́нный: ра́дꙋйсѧ, ꙗ҆́кѡ та̑йны црⷭ҇твїѧ ѿкры́шасѧ тѝ.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ д҃

Бꙋ́рю внꙋ́трь и҆мѣ́ю помышле́нїй сꙋмни́тельныхъ, вопїѧ́ше ѳѡма̀: ка́кѡ бо во гро́бъ положе́нъ бы́сть по вода́мъ ходи́вый и҆ ла́зарѧ воскреси́вый, є҆мꙋ́же а҆́зъ жела́ю воспѣ́ти: А҆ллилꙋ́їа.

І҆́косъ д҃

Слы́шаша ᲂу҆́бѡ па́стырїе а҆́гг҃лѡвъ, пою́щихъ млⷣнца сп҃са, и҆ ше́дше, поклони́шасѧ є҆мꙋ̀: мы́ же, ᲂу҆́ши и҆мꙋ́ще, не вне́млемъ гла́сꙋ гдⷭ҇ню, ѻ҆ба́че на твоѐ предста́тельство, а҆пⷭ҇ле, ᲂу҆пова́емъ и҆ зове́мъ тѝ:

Ра́дꙋйсѧ, въ кораблѝ со хрⷭ҇то́мъ ходи́вый: ра́дꙋйсѧ, по волна́мъ ходѧ́щꙋ поклони́выйсѧ.

Ра́дꙋйсѧ, мре́жею хрⷭ҇то́вою ᲂу҆ловле́нный: ра́дꙋйсѧ, въ ковче́гъ сп҃се́нїѧ стꙋпи́вый.

Ра́дꙋйсѧ, ꙗ҆́кѡ во́ды невѣ́рствїѧ не поглоти́ша тѧ̀: ра́дꙋйсѧ, ꙗ҆́кѡ бꙋ́рѧ сомнѣ́нїй тѧ̀ не потопѝ.

Ра́дꙋйсѧ, ꙗ҆́кѡ хрⷭ҇то́съ над̾ бе́здною тѧ̀ ᲂу҆держа̀: ра́дꙋйсѧ, ꙗ҆́кѡ десни́цꙋ съ ꙗ҆́звою тѝ прострѐ.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ є҃

Бг҃оте́чной ѕвѣздѣ̀ послѣ́доваша волсвѝ, вопїѧ́ше ѳѡма̀: та́кѡ и҆ а҆́зъ вожделѣ́ю слѣ́довати тебѣ̀, гдⷭ҇и и҆ бж҃е мо́й: да́ждь мѝ то́кмѡ прикоснꙋ́тисѧ тѝ, да и҆ а҆́зъ воспою̀: А҆ллилꙋ́їа.

І҆́косъ є҃

Да́ры принесо́ша халде́йстїи ѻ҆́троцы сѣдѧ́щꙋ на рꙋкꙋ̀ дв҃и̑чꙋ созда́телю тва́ри, мы́ же, рꙋ́цѣ и҆мꙋ́ще пра́здны ѿ дѣ́лъ бл҃ги́хъ, ка́кѡ пристꙋ́пимъ къ семꙋ̀, вѣ́ры просѧ́ще, а҆́ще не а҆пⷭ҇ла ѳѡмꙋ̀ помина́юще и҆ та́кѡ є҆мꙋ̀ зовꙋ́ще:

Ра́дꙋйсѧ, ꙗ҆́кѡ гдⷭ҇и́нъ жа́твы призва́ тѧ: ра́дꙋйсѧ, ꙗ҆́кѡ въ вертогра́дѣ тогѡ̀ до́брѣ потрꙋди́лсѧ є҆сѝ.

Ра́дꙋйсѧ, ꙗ҆́кѡ дѣ́латель и҆ ни́ва ꙗ҆ви́лсѧ є҆сѝ: ра́дꙋйсѧ, ꙗ҆́кѡ пло́дъ стори́цею прине́слъ є҆сѝ.

Ра́дꙋйсѧ, ꙗ҆́кѡ со влⷣкою дне́й ᲂу҆́треневалъ є҆сѝ: ра́дꙋйсѧ, ꙗ҆́кѡ ча́шꙋ хрⷭ҇то́вꙋ и҆спи́лъ є҆сѝ.

Ра́дꙋйсѧ, ꙗ҆́кѡ и҆ но́щь просвѣще́нїе тѝ бы́сть: ра́дꙋйсѧ, ꙗ҆́кѡ гдⷭ҇ꙋ сла́вы спросла́вилсѧ є҆сѝ.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ ѕ҃

Проповѣ́дницы бг҃оно́сни бы́вше волсвѝ, вопїѧ́ше ѳѡма̀: и҆сповѣ́даша тѧ̀, хрⷭ҇тѐ, ꙗ҆́кѡ сп҃са всѣ́хъ: а҆́ще ᲂу҆̀бо не ᲂу҆вѣ́рꙋю въ воскрⷭ҇нїе твоѐ, не ꙗ҆влю́сѧ ли и҆ а҆́зъ ꙗ҆́кѡ и҆́рѡдъ, не вѣ́дый пѣ́ти: А҆ллилꙋ́їа.

І҆́косъ ѕ҃

Возсїѧ́вый во є҆гѵ́птѣ свѣ́тъ и҆́стины да разсѣ́етъ, ꙗ҆́кѡ ды́мъ, всѧ̑ сомнѣ̑нїѧ на̑ша: вѣ́рꙋемъ бо, гдⷭ҇и, помозѝ невѣ́рїю на́шемꙋ: ты́ же, а҆пⷭ҇ле, ᲂу҆крѣпѝ свидѣ́тельствомъ твои́мъ зовꙋ́щыѧ тѝ:

Ра́дꙋйсѧ, въ сла́дость хрⷭ҇та̀ послꙋ́шавый: ра́дꙋйсѧ, во сла́вꙋ є҆гѡ̀ пожи́вый.

Ра́дꙋйсѧ, съ терпѣ́нїемъ томꙋ̀ послꙋжи́вый: ра́дꙋйсѧ, съ весе́лїемъ за негѡ̀ ᲂу҆ме́рый.

Ра́дꙋйсѧ, ра́нꙋ прободе́ннагѡ ѡ҆сѧза́вый: ра́дꙋйсѧ, кро́вїю хрⷭ҇то́вою и҆скꙋпле́нный.

Ра́дꙋйсѧ, копїе́мъ мꙋчи́тельскимъ прободе́нный: ра́дꙋйсѧ, кро́вь за хрⷭ҇та̀ пролїѧ́вый.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ з҃

Хотѧ́щꙋ сѷмеѡ́нꙋ првⷣномꙋ ᲂу҆мре́ти, вопїѧ́ше ѳѡма̀, вда́лсѧ є҆сѝ ꙗ҆́кѡ младе́нецъ томꙋ̀, но позна́лсѧ є҆сѝ є҆мꙋ̀ и҆ бг҃ъ соверше́нный: сотворѝ ᲂу҆̀бо, гдⷭ҇и, и҆ мнѣ̀ та́кѡ, да а҆́бїе воззовꙋ́ ти: А҆ллилꙋ́їа.

І҆́косъ з҃

Но́вое показа̀ творе́цъ снисхожде́нїе на́мъ, на безсме́ртнѣмъ тѣ́лѣ смє́ртныѧ ꙗ҆́звы ꙗ҆ви́ти и҆зво́ливый а҆пⷭ҇лꙋ своемꙋ̀, є҆мꙋ́же съ любо́вїю взыва́емъ:

Ра́дꙋйсѧ, ѿ премⷣрости мꙋ́дрость прїе́мый: ра́дꙋйсѧ, ѿ любвѐ любвѝ наꙋчи́выйсѧ.

Ра́дꙋйсѧ, ᲂу҆ смире́нїѧ смире́нїю навы́кшїй: ра́дꙋйсѧ, бл҃гомъ во бл҃зѣ ᲂу҆твержде́нный.

Ра́дꙋйсѧ, терпѣ́нїемъ въ терпѣ́нїи наста́вленный: ра́дꙋйсѧ, кро́тости въ кро́тости подража́вый.

Ра́дꙋйсѧ, послꙋша́нїемъ къ послꙋша́нїю приведе́нный: ра́дꙋйсѧ, сн҃омъ ѻ҆ц҃ꙋ̀ ᲂу҆сыновле́нный.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ и҃

Стра́нное чꙋ́до ви́ждꙋ, вопїѧ́ше ѳѡма̀: две́ремъ затворє́ннымъ, ꙗ҆́кѡ дꙋ́хъ, вхо́дитъ хрⷭ҇то́съ. ѡ҆сѧза́ю ѻ҆ба́че ра̑ны и҆ ꙗ҆́звы є҆гѡ̀: и҆ что̀ ᲂу҆̀бо рекꙋ̀; то́кмѡ: гдⷭ҇ь мо́й и҆ бг҃ъ мо́й. что̀ ᲂу҆̀бо воспою̀; то́кмѡ: А҆ллилꙋ́їа.

І҆́косъ и҃

Всѝ є҆смы̀ въ ни́жнихъ, и҆ вы́шнихъ ника́коже достига́емъ, ѻ҆ба́че вѣ́рꙋемъ, ꙗ҆́кѡ ѻ҆боѧ̀ соединѝ въ себѣ̀ гдⷭ҇ь, ꙗ҆́коже ꙗ҆вѝ сїѐ а҆пⷭ҇лꙋ своемꙋ̀, ѿ на́съ воспѣва́емꙋ си́це:

Ра́дꙋйсѧ, съ четверодне́внымъ ла́заремъ вечерѧ́вый: ра́дꙋйсѧ, ᲂу҆вѣре́нїѧ во и҆́стинѣ ре́вностнѡ взыска́вый.

Ра́дꙋйсѧ, ѡ҆са́нна въ вы́шнихъ, возгласи́вый: ра́дꙋйсѧ, любо́вїю ᲂу҆вѣре́нїе сїѐ ᲂу҆лꙋчи́вый.

Ра́дꙋйсѧ, воплоще́нїе сло́ва ᲂу҆вѣ́дѣвый: ра́дꙋйсѧ, мі́ромъ гони́мый.

Ра́дꙋйсѧ, безсловє́снаѧ пло́ти попра́вый: ра́дꙋйсѧ, ми́ръ ѿ хрⷭ҇та̀ прїе́мый.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ ѳ҃

Всѧ́кое є҆стество̀ тва́рное вмѣсти́ти бжⷭ҇твенное ника́коже возмога́етъ, вопїѧ́ше ѳѡма̀: ты̀ є҆ди́ный ѻ҆́ба несли́тнѡ и҆ нераздѣ́льнѡ въ себѣ̀ сочета́лъ є҆сѝ, тебѣ̀ пою̀: А҆ллилꙋ́їа.

І҆́косъ ѳ҃

Вѣті̑и многовѣща́ннїи ничесо́же приложи́ти дерза́ютъ, а҆пⷭ҇ле, до́бромꙋ и҆сповѣ́данїю твоемꙋ̀: гдⷭ҇ь мо́й и҆ бг҃ъ мо́й: за сїѐ и҆ ѿ на́съ прїимѝ сицева̑ѧ:

Ра́дꙋйсѧ, ꙗ҆́кѡ но́зѣ ко ᲂу҆мове́нїю хрⷭ҇тꙋ̀ просте́рлъ є҆сѝ: ра́дꙋйсѧ, ꙗ҆́кѡ до́ма на землѝ не и҆мѣ́лъ є҆сѝ.

Ра́дꙋйсѧ, ꙗ҆́кѡ но́зѣ на пꙋ́ть ми́ренъ напра́вилъ є҆сѝ: ра́дꙋйсѧ, ꙗ҆́кѡ ѻ҆би́тель въ домꙋ̀ ѻ҆́ч҃и сниска́лъ є҆сѝ.

Ра́дꙋйсѧ, ꙗ҆́кѡ строи́тель ца́рскїй наре́клсѧ є҆сѝ: ра́дꙋйсѧ, ꙗ҆́кѡ а҆рхїте́ктѡнъ премꙋ́дрый ѡ҆брѣ́лсѧ є҆сѝ.

Ра́дꙋйсѧ, ꙗ҆́кѡ зла́то ни́щымъ разда́лъ є҆сѝ: ра́дꙋйсѧ, ꙗ҆́кѡ черто́гъ нбⷭ҇ный царю̀ воздви́глъ є҆сѝ.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ і҃

Спастѝ хотѧ̀ мі́ръ, вопїѧ́ше ѳѡма̀, животворѧ́щею кро́вїю и҆з̾ прободе́нныхъ ре́бръ, гдⷭ҇и бж҃е мо́й, напои́лъ є҆сѝ всѧ̑, ꙗ҆̀же ѡ҆сѧза́въ, тебѣ̀ пою̀: А҆ллилꙋ́їа.

І҆́косъ і҃

Стѣ́ны і҆ерⷭ҇ли́ма нбⷭ҇нагѡ на двана́десѧти ѡ҆снова́нїихъ ᲂу҆тверди́шасѧ. ꙗ҆́коже є҆ди́но ѿ си́хъ тѧ̀ почита́емъ, а҆пⷭ҇ле сла́вне, и҆ та́кѡ тѝ восписꙋ́емъ:

Ра́дꙋйсѧ, ꙗ҆́кѡ ѧ҆зы́къ ѻ҆́гненъ на тебѣ̀ почѝ: ра́дꙋйсѧ, ꙗ҆́кѡ сла́ва хрⷭ҇то́ва ѡ҆сїѧ́ тѧ.

Ра́дꙋйсѧ, ꙗ҆́кѡ ꙗ҆зы́ки мнѡ́ги просвѣти́лъ є҆сѝ: ра́дꙋйсѧ, ꙗ҆́кѡ и҆́мѧ хрⷭ҇то́во просла́вилъ є҆сѝ.

Ра́дꙋйсѧ, ꙗ҆́кѡ недꙋ́жныхъ и҆сцѣлѧ́лъ є҆сѝ: ра́дꙋйсѧ, ꙗ҆́кѡ ме́ртвыхъ возставлѧ́лъ є҆сѝ.

Ра́дꙋйсѧ, ꙗ҆́кѡ и҆ дꙋ́си повинова́хꙋсѧ тѝ: ра́дꙋйсѧ, ꙗ҆́кѡ и҆́мѧ твоѐ написа́сѧ на нб҃сѝ.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ а҃і

Пѣ́нїе всѧ́кое побѣжда́етсѧ, вопїѧ́ше ѳѡма̀, тща́щеесѧ воспѣ́ти сла́вꙋ воскрⷭ҇нїѧ твоегѡ̀, гдⷭ҇и: ѻ҆ба́че сїѐ возвѣщꙋ̀ до послѣ́днихъ землѝ, да всѧ́къ ꙗ҆зы́къ и҆́стинномꙋ бг҃ꙋ зове́тъ: А҆ллилꙋ́їа.

І҆́косъ а҃і

Свѣтопрїе́мнꙋю свѣщꙋ̀ зри́мъ тѧ̀, а҆пⷭ҇ле сла́вный, прикоснове́нїемъ къ ѡ҆бж҃енной пло́ти возжже́ннꙋю, тѣ́мже прино́симъ тѝ сицева̑ѧ:

Ра́дꙋйсѧ, би́сере ри́зы цр҃ко́вныѧ: ра́дꙋйсѧ, вертогра́дарю и҆́стины.

Ра́дꙋйсѧ, ко́реню бг҃осло́вїѧ: ра́дꙋйсѧ, цвѣ́те бл҃гоче́стїѧ.

Ра́дꙋйсѧ, ро́ждїе лозы̀ бжⷭ҇твенныѧ: ра́дꙋйсѧ, бл҃гоꙋха́нїе, прїѧ́тно бг҃ови.

Ра́дꙋйсѧ, злати́це, ѻ҆гне́мъ ѡ҆чище́ннаѧ: ра́дꙋйсѧ, весно̀ цѣломꙋ́дрїѧ.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ в҃і

Бл҃года́ть и҆ жи́знь прише́дый да́ти всѧ́кой пло́ти, вопїѧ́ше ѳѡма̀ и҆ны̑мъ ᲂу҆ч҃нкѡ́мъ, не возда́стъ ли сїѧ̑ пода́вшей є҆мꙋ̀ пло́ть; ѻ҆ба́че ᲂу҆кажи́те мнѣ̀ гро́бъ є҆ѧ̀, да со слеза́ми воззовꙋ̀ бг҃ови: А҆ллилꙋ́їа.

І҆́косъ в҃і

Пою́ще ᲂу҆спе́нїе бцⷣы а҆пⷭ҇ли, проводи́ша тѧ̀ ко гро́бꙋ є҆ѧ̀, и҆ вше́дъ и҆ ѡ҆брѣ́тъ се́й пꙋ́стъ, возда́лъ є҆сѝ хвалꙋ̀ гдⷭ҇ꙋ. тѣ́мже зове́мъ тѝ:

Ра́дꙋйсѧ, бж҃їею мт҃рїю возлю́бленный: ра́дꙋйсѧ, ко проща́нїю то́ю призва́нный.

Ра́дꙋйсѧ, ꙗ҆́кѡ ма́терь ю҆̀ возлюби́вый: ра́дꙋйсѧ, бж҃їимъ про́мысломъ ᲂу҆держа́нный.

Ра́дꙋйсѧ, на гро́бъ є҆ѧ̀ пла́кати прише́дый: ра́дꙋйсѧ, ка́мень ѿ негѡ̀ ѿвали́вый.

Ра́дꙋйсѧ, ра́дость ве́лїю лю́демъ ѿкры́вый: ра́дꙋйсѧ, воста́нїе пречⷭ҇тыѧ возвѣсти́вый.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ г҃і

Ѽ пресла́вный а҆пⷭ҇ле хрⷭ҇то́въ ѳѡмо̀, ма́лое сїѐ прїимѝ ѿ на́съ приноше́нїе и҆ ᲂу҆молѝ за ны̀ гдⷭ҇а сла́вы, да ᲂу҆тверди́вшесѧ по́мощїю твое́ю, ѡ҆брѧ́щемъ и҆ мы̀ вѣ́ры плоды̀ бл҃гі̑ѧ, творцꙋ̀ всѧ́ческихъ пою́ще: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡмъ невѣ́домое та́инство позна́лъ є҆сѝ, пло́ть бг҃а жи́ва дерзнове́нною десни́цею ѡ҆сѧза́ѧ, тѣ́мже, ᲂу҆жаса́ющесѧ и҆ дивѧ́щесѧ, зове́мъ тѝ:

Ра́дꙋйсѧ, ꙗ҆́кѡ дерзнове́нїе твоѐ бг҃ъ пред̾ꙋвѣ́де: ра́дꙋйсѧ, ꙗ҆́кѡ на слꙋже́нїе своѐ тѧ̀ пред̾ꙋста́ви.

Ра́дꙋйсѧ, ꙗ҆́кѡ невѣ́рїе твоѐ не ѡ҆сꙋди́сѧ: ра́дꙋйсѧ, ꙗ҆́кѡ вѣ́ра твоѧ̀ ᲂу҆тверди́сѧ.

Ра́дꙋйсѧ, ꙗ҆́кѡ хрⷭ҇то́съ въ ли́къ а҆пⷭ҇льскїй тѧ̀ и҆збра̀: ра́дꙋйсѧ, ꙗ҆́кѡ стѡпы̀ твоѧ̑ по словесѝ своемꙋ̀ напра́ви.

Ра́дꙋйсѧ, ꙗ҆́кѡ ᲂу҆ста̀ ко ᲂу҆стѡ́мъ тебѣ̀ бы́сть бж҃їе вѣща́нїе: ра́дꙋйсѧ, ꙗ҆́кѡ приклони́сѧ гдⷭ҇ь къ любопы́тнагѡ пе́рста ѡ҆сѧза́нїю.

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Конда́къ а҃

И҆збра́нный самови́дче сло́ва и҆ свидѣ́телю є҆гѡ̀ сла́вный, да́же до послѣ́днихъ землѝ бл҃говѣсти́лъ є҆сѝ вѣ́рꙋ твою̀: є҆гѡ́же ра̑ны а҆́зъ ѡ҆сѧза́хъ, се́й є҆́сть гдⷭ҇ь и҆ бг҃ъ. тѣ́мже и҆ ны́нѣ, созерца́ѧй на́ми незри̑маѧ, за взыскꙋ́ющыѧ вѣ́ры моли́сѧ, да зове́мъ тѝ:

Ра́дꙋйсѧ, а҆пⷭ҇ле ѳѡмо̀, невѣ́рїемъ до́брымъ вѣ́рꙋ ᲂу҆тверди́вый.

Моли́твы

Ѽ бл҃гознамени́тый и҆ сла́вный а҆пⷭ҇ле хрⷭ҇то́въ ѳѡмо̀! є҆гда̀ на коне́цъ вѣкѡ́въ къ человѣ́кѡмъ прише́дый бг҃ъ и҆збра́ тѧ въ ᲂу҆ченикѝ своѧ̑ и҆ даде́ ти вла́сть болѧ́щыѧ и҆сцѣлѧ́ти, прокажє́нныѧ ѡ҆чища́ти, мє́ртвыѧ воскреша́ти, бѣ́сы и҆згонѧ́ти, тогда̀ не си́хъ ра́ди, но наипа́че любо́вїю прилѣпи́лсѧ є҆сѝ ко хрⷭ҇тꙋ̀, жела́нїемъ вожделѣ́въ да́же до сме́рти слѣ́довати по не́мъ. сегѡ̀ ра́ди, а҆́ще попꙋще́нїемъ бжⷭ҇твеннымъ и҆ не зрѣ́лъ є҆сѝ со и҆ны́ми ᲂу҆чєникѝ воскрⷭ҇шагѡ сп҃са, а҆́ще и҆ ѿре́клсѧ є҆сѝ вѣ́ровати семꙋ̀, до́ндеже вложи́ши пе́рстъ сво́й въ ꙗ҆́звы гвозди̑нныѧ, и҆ вложи́ши рꙋ́кꙋ свою̀ въ ре́бра є҆гѡ̀, ѻ҆ба́че и҆спо́лни гдⷭ҇ь проше́нїе се́рдца твоегѡ̀, и҆ непрело́жнѡ па́ки вѣ́рꙋ твою̀ ᲂу҆твердѝ. тѣ́мже мо́лимъ тѧ̀: ѿве́рзи на́мъ ѻ҆́чи вѣ́ры, да плотски̑мъ неви̑димаѧ ꙗ҆вѧ́тсѧ на́мъ: пода́ждь на́мъ наде́ждꙋ на снисхожде́нїе бж҃їе, да ѿча́ѧнїе грѣхо́вное не пожре́тъ ны̀: ѿкры́й на́мъ бл҃же́нство любвѐ, ꙗ҆́же крѣпка̀ є҆́сть, ꙗ҆́кѡ сме́рть, и҆ є҆ди́на возмога́етъ над̾ то́ю, да порабо́тавше хрⷭ҇тꙋ̀ на землѝ, воздви́гнемъ и҆ мы̀ себѣ̀ кро́вы нбⷭ҇ныѧ, и҆ съ тобо́ю и҆ всѣ́ми ст҃ы́ми просла́вимъ пречтⷭ҇но́е и҆ великолѣ́пое и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а. А҆ми́нь.