Перейти к основному содержанию
Православный календарь

Ака́ѳістъ

А҆ка́ѳїстъ прпⷣбномꙋ се́ргїю нꙋ́ромскомꙋ, во́логодскомꙋ чꙋдотво́рцꙋ.

Конда́къ а҃

И҆збра́нный ᲂу҆го́дниче хрⷭ҇то́въ, прпⷣбне ѻ҆́ч҃е се́ргїе, бл҃гохва̑льнаѧ пѣ̑нїѧ ѡ҆ вели́кихъ твои́хъ чꙋдесѣ́хъ приносѧ́ще тѝ моли́твенницы твоѝ, прославлѧ́емъ просла́вльшагосѧ въ тебѣ̀ бг҃а на́шего. ты́ же, ꙗ҆́кѡ и҆мѣ́ѧй ве́лїе дерзнове́нїе къ немꙋ̀, ѿ всѧ́кихъ на́съ вре́менныхъ и҆ вѣ́чныхъ бѣ́дъ твои́ми къ немꙋ̀ мл҃твами свободѝ, да зове́мъ тѝ:

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

І҆́косъ а҃

А҆́гг҃лъ земны́й и҆ человѣ́къ нбⷭ҇ный бы́лъ є҆сѝ, прпⷣбне ѻ҆́ч҃е се́ргїе: ѿ ю҆́ности бо твоеѧ̀ гдⷭ҇еви рабо́тати и҆зво́ливый, дости́глъ є҆сѝ бл҃же́нства нбⷭ҇нагѡ, и҆ ны́нѣ со а҆́гг҃лы прⷭ҇то́лꙋ прест҃ы́ѧ трⷪ҇цы предстои́ши. сегѡ̀ ра́ди тебѐ, на нб҃сѝ и҆ на землѝ просла́вленномꙋ, вопїе́мъ си́це:

Ра́дꙋйсѧ, ѿ ю҆́ности твоеѧ̀ всѣ́мъ се́рдцемъ твои́мъ гдⷭ҇а возлюби́вый: ра́дꙋйсѧ, и҆ са́мъ ѿ негѡ̀ возлю́бленъ бы́вый.

Ра́дꙋйсѧ, поꙋча́выйсѧ въ зако́нѣ гдⷭ҇ни де́нь и҆ но́щь: ра́дꙋйсѧ, поꙋче́нїемъ си́мъ ꙗ҆́кѡ дре́во плодоно́сное, при и҆схо́дищихъ во́дъ бл҃года́тныхъ насажде́нное, показа́выйсѧ.

Ра́дꙋйсѧ, чистоты̀ вмести́лище: ра́дꙋйсѧ, до́ме всѧ́ческїѧ свѧты́ни.

Ра́дꙋйсѧ, блгⷣти бж҃їѧ во всѧ̑ дни̑ житїѧ̑ и҆спо́лненный: ра́дꙋйсѧ, наслѣ́дниче нбⷭ҇ныхъ дарова́нїй.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ в҃

Ви́дѣвъ, прпⷣбне ѻ҆́ч҃е, ꙗ҆́кѡ всѧ̑, ꙗ҆́же въ мі́рѣ, сꙋ́єтна сꙋ́ть и҆ скороги̑бнꙋща, и҆зво́лилъ є҆сѝ всеꙋсе́рдное твоѐ попече́нїе и҆мѣ́ти ѡ҆ є҆́же ка́кѡ сп҃стѝ дꙋ́шꙋ твою̀. мы́ же, ѡ҆ таковѣ́мъ твое́мъ сп҃си́тельнѣмъ произволе́нїи прославлѧ́юще бг҃а, зове́мъ є҆мꙋ̀: А҆ллилꙋ́їа.

І҆́косъ в҃

Ра́зꙋмъ бжⷭ҇твенный и҆мѣ́ѧ и҆ теплѣ́йшее ко гдⷭ҇ꙋ произволе́нїе, позна́лъ є҆сѝ, прпⷣбне, ꙗ҆́кѡ бла́го є҆́сть человѣ́кꙋ, и҆́же во́зметъ ꙗ҆ре́мъ гдⷭ҇ень на сѧ̀ ѿ ю҆́ности своеѧ̀, и҆ сегѡ̀ ра́ди, ѿве́ргсѧ мі́ра, бы́лъ є҆сѝ мона́хъ. тѣ́мже зове́мъ тѝ:

Ра́дꙋйсѧ, и҆́го крⷭ҇тоноше́нїѧ хрⷭ҇то́ва возлюби́вый: ра́дꙋйсѧ, вослѣ́дъ гдⷭ҇а твоегѡ̀ нелѣ́ностнѡ ᲂу҆стреми́выйсѧ.

Ра́дꙋйсѧ, рꙋ́кꙋ твою̀ на ра́ло сп҃се́нїѧ возложи́вый, никогда́же вспѧ́ть ѡ҆браща́ѧсѧ: ра́дꙋйсѧ, за̑днѧѧ забыва́ѧ, въ прє́днѧѧ ᲂу҆се́рднѡ простира́выйсѧ.

Ра́дꙋйсѧ, бл҃годꙋ́шнымъ терпе́нїемъ скорбе́й ѡ҆би́тели нбⷭ҇ныѧ дости́гнꙋвый: ра́дꙋйсѧ, ны́нѣ ѡ҆ всѣ́хъ въ печа́лехъ сꙋ́щихъ мл҃твенниче теплѣ́йшїй.

Ра́дꙋйсѧ, скорбѧ́щихъ ско́рое ᲂу҆тѣше́нїе: ра́дꙋйсѧ, ᲂу҆ныва́ющихъ ᲂу҆тѣ́шителю бл҃года́тный.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ г҃

Си́ла вы́шнѧгѡ ѡ҆сѣнѝ тѧ̀, прпⷣбне, и҆ препоѧ́са тѧ̀ на врагѝ ви̑димыѧ и҆ неви̑димыѧ, и҆́хже побѣди́въ, ᲂу҆тверди́лъ є҆сѝ на ка́мени недви́жимѣмъ за́повѣдей хрⷭ҇то́выхъ мы́слєнныѧ но́зѣ твоѝ, и҆ вше́дъ въ нбⷭ҇ныѧ ѡ҆би́тєли, ра́достнѡ зове́ши бг҃ꙋ: А҆ллилꙋ́їа.

І҆́косъ г҃

И҆мѣ́ѧ въ се́рдцѣ твое́мъ всесоверше́нное жела́нїе рабо́тати гдⷭ҇еви со стра́хомъ и҆ ра́доватисѧ є҆мꙋ̀ со тре́петомъ, ѡ҆ста́вилъ є҆сѝ ѻ҆те́чество твоѐ и҆ прише́лъ є҆сѝ въ го́рꙋ а҆ѳѡ́нскꙋю, и҆дѣ́же со ѿѧ́тїемъ власѡ́въ главы̀ твоеѧ̀, ѿложи́лъ є҆сѝ вѣ́тхагѡ своегѡ̀ человѣ́ка со страстьмѝ и҆ похотьмѝ є҆гѡ̀. тѣ́мже прїимѝ ѿ на́съ пѣ̑нїѧ сицєва́ѧ:

Ра́дꙋйсѧ, ра́бе бж҃їй, бл҃гі́й и҆ вѣ́рный: ра́дꙋйсѧ, ни́вꙋ дꙋше́внꙋю твою̀ нелѣ́ностнѡ воздѣ́лавый.

Ра́дꙋйсѧ, горы̀ а҆ѳѡ́нскїѧ все́льниче: ра́дꙋйсѧ, добродѣ́телей ѻ҆тє́цъ прпⷣбныхъ горы̀ тоѧ̀, пре́жде тебѣ̀ бы́вшихъ, сонаслѣ́дниче.

Ра́дꙋйсѧ, мона́хѡмъ бг҃одꙋхнове́нное свѣти́ло: ра́дꙋйсѧ, ко гра́дꙋ нбⷭ҇номꙋ всѣ́хъ пꙋтевождю̀ бл҃гонаде́жный.

Ра́дꙋйсѧ, пꙋстынножи́телей ᲂу҆краше́нїе: ра́дꙋйсѧ, безмо́лвїѧ рачи́телю теплѣ́йшїй.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ д҃

Бꙋ́рю многомѧте́жнагѡ мі́ра страсте́й возненави́дѣвъ, ѻ҆́ч҃е, ᲂу҆страни́лсѧ є҆сѝ всѣ́хъ є҆гѡ̀ красо́тъ: въ пꙋсты́ню же все́льсѧ, прпⷣбне, крⷭ҇ти́телю въ житїѝ послѣ́довалъ є҆сѝ, и҆ и҆лїѝ поревнова́лъ є҆сѝ прⷪ҇ро́кꙋ. ны́нѣ ᲂу҆̀бо и҆́стиннѡ вѣ́чнꙋю въ нбⷭ҇ныхъ дво́рѣхъ полꙋчи́въ сла́вꙋ, съ ни́ми предстои́ши бг҃ꙋ, поѧ̀ томꙋ̀: А҆ллилꙋ́їа.

І҆́косъ д҃

Слы́шавъ, ꙗ҆́кѡ бг҃охрани́мѣй держа́вѣ рѡссі́йстѣй возсїѧ̀ свѣтоза́рное свѣти́ло вели́кїй а҆́вво се́ргїй, восхотѣ́лъ є҆сѝ ᲂу҆чени́къ є҆гѡ̀ бы́ти, и҆ сегѡ̀ ра́ди ѡ҆ста́вль го́рꙋ а҆ѳѡ́нскꙋю, ᲂу҆стреми́лсѧ є҆сѝ къ ца́рствꙋющемꙋ гра́дꙋ москвѣ̀, да возмо́жеши жела́нїе твоѐ и҆спо́лнити. мы́ же, мы́сленнѡ тѧ̀ на пꙋтѝ се́мъ срѣта́юще, зове́мъ:

Ра́дꙋйсѧ, смире́нїѧ бл҃га́гѡ ревни́телю: ра́дꙋйсѧ, мꙋ́дрости дꙋхо́вныѧ и҆ска́телю неꙋсы́пный.

Ра́дꙋйсѧ, и҆́ноче бл҃гоискꙋ́сный: ра́дꙋйсѧ, стра́нниче бг҃оизбра́нный.

Ра́дꙋйсѧ, сподви́жникъ соиме́нномꙋ тѝ вели́комꙋ се́ргїю бы́ти сподо́бивыйсѧ: ра́дꙋйсѧ, ѿ негѡ̀ вселюбе́знѡ прїѧ́тый.

Ра́дꙋйсѧ, вели́каго ᲂу҆чи́телѧ ѡ҆сщ҃е́нный ᲂу҆ченичѐ: ра́дꙋйсѧ, соѡбита́телю є҆гѡ̀ на нб҃сѣ́хъ.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ є҃

Бг҃оте́чнѣй ѕвѣздѣ̀ подо́бѧсѧ, ꙗ҆́кѡже є҆ле́нь на и҆сто́чники водны̑ѧ, си́це ты̀, прпⷣбне, поте́клъ є҆сѝ въ предѣ́лы во́логодскїѧ, и҆скі́й безмо́лвїѧ. дости́гъ же пꙋсты́ни нꙋ́ромскїѧ и҆ тꙋ̀ водрꙋзи́въ крⷭ҇тъ хрⷭ҇то́въ, воспѣ́лъ є҆сѝ є҆мꙋ̀ бл҃года́рственнѡ: А҆ллилꙋ́їа.

І҆́косъ є҃

Ви́дѣвше тѧ̀ прпⷣбне ѻ҆́ч҃е, є҆ди́наго на є҆ди́нѣ гдⷭ҇еви въ пꙋсты́ни рабо́тающа, и҆ мнѣ́вше ᲂу҆ тебє̀ ѡ҆брѣстѝ мнѡ́гаѧ веще́ствєннаѧ сокрѡ́вища, лю́тѣ нападо́ша на тѧ̀ разбо́йницы, ѿ ни́хже и҆ ра̑ны мнѡ́ги под̾ѧ́лъ є҆сѝ, но а҆́бїе хрⷭ҇то́съ и҆сцѣлѝ тѧ̀. сегѡ̀ ра́ди мы̀ взыва́емъ тѝ такѡва́ѧ:

Ра́дꙋйсѧ, крі́не ра́йскагѡ прозѧбе́нїѧ, во ᲂу҆до́лїихъ нꙋ́ромскихъ произрасты́й: ра́дꙋйсѧ, пꙋсты́ни во́логодскїѧ цвѣ́те бл҃гоꙋха́нный.

Ра́дꙋйсѧ, мч҃никѡвъ соприча́стниче: ра́дꙋйсѧ, гдⷭ҇еви твоемꙋ̀ неѕло́бїемъ ᲂу҆подо́бивыйсѧ.

Ра́дꙋйсѧ, нището́ю твое́ю бога́тъ бы́вый: ра́дꙋйсѧ, смире́нїемъ твои́мъ Хрⷭ҇то́ви подража́вый.

Ра́дꙋйсѧ, пꙋсты́ни бл҃года́тное ᲂу҆краше́нїе: ра́дꙋйсѧ, мі́рови свѣти́льниче пресвѣ́тлый.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ ѕ҃

Проповѣ́дꙋетъ да́ннꙋю тѝ ѿ бг҃а блгⷣть цѣле́бнꙋю человѣ́къ мно́жество: разсла́бленныѧ бо и҆сцѣлѧ́еши, недꙋ́гꙋющымъ, ᲂу҆ма̀ лишє́ннымъ и҆ бѣсны̑мъ здра́вїе подава́еши, слѣпы̑ѧ просвѣща́еши и҆ хрѡмы́ѧ твори́ши ходи́ти. прославлѧ́юще ᲂу҆́бѡ ѻ҆би́льнꙋю бл҃года́ть въ тебѣ̀ ѡ҆бита́ющꙋю, бл҃гоговѣ́йнѣ вопїе́мъ бг҃ꙋ: А҆ллилꙋ́їа.

І҆́косъ ѕ҃

Возсїѧ́лъ є҆сѝ ꙗ҆́кѡ ѕвѣзда̀ пресвѣ́тлаѧ ѿ а҆ѳѡ́на и҆ ѿ ѡ҆би́тели вели́кагѡ тезоимени́тагѡ тебѣ̀ ѻ҆ц҃а̀ сѣ́вернѣй странѣ̀ се́й, свѧ́те се́ргїе: бѣсо́встїи же полцы̀, не терпѧ́ще тѧ̀ въ пꙋсты́ни, мно́жицею ᲂу҆страши́ти тѧ̀ ᲂу҆стремлѧ́хꙋсѧ, но ѻ҆ба́че, си́лою мл҃твъ твои́хъ прогонѧ́еми, бѣжа́ша. ѿ и҆́хже навѣ́тѡвъ и҆ на́съ и҆зба́ви мл҃твами твои́ми, да зове́мъ тѝ си́це:

Ра́дꙋйсѧ, бѣсѡ́мъ стра́шный прогони́телю: ра́дꙋйсѧ, пре́лести и҆́хъ потреби́телю.

Ра́дꙋйсѧ, главꙋ̀ ѕмі́евꙋ ᲂу҆ѧзви́вый мл҃твами твои́ми: ра́дꙋйсѧ, кѡва́рства врагѡ́въ сп҃се́нїѧ на́шегѡ ни во что̀ же ѡ҆браща́ѧй.

Ра́дꙋйсѧ, во́ине хрⷭ҇то́въ непобѣди́мый: ра́дꙋйсѧ, дꙋ́хи лꙋка́вствїѧ смиренномꙋ́дрїемъ покори́вый.

Ра́дꙋйсѧ, вѣ̑рнымъ на врагѝ посо́бствꙋѧй: ра́дꙋйсѧ, ᲂу҆се́рднѡ къ застꙋпле́нїю твоемꙋ̀ притека́ющымъ во бра́ни мы́сленнѣй ско́рѡ помога́ѧй.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ з҃

Хотѧ́щꙋ тѝ, прпⷣбне, є҆ди́номꙋ въ безмо́лвїи житїѐ твоѐ сконча́ти, гдⷭ҇ь ᲂу҆строѧ́етъ тѧ̀ па́стырѧ и҆ ᲂу҆чи́телѧ мона́шескомꙋ собо́рꙋ: совокꙋпи́въ бо и҆́нокѡвъ ли́ки и҆ воздви́гъ хра́мъ сп҃сꙋ хрⷭ҇тꙋ̀, нелѣ́ностнѡ є҆мꙋ̀ порабо́талъ є҆сѝ, во днѝ и҆ въ но́щи со ᲂу҆ченикѝ твои́ми зовы́й: А҆ллилꙋ́їа.

І҆́косъ з҃

Но́вый вои́стиннꙋ побѣдоно́сецъ на плѡтскі́ѧ стра̑сти ꙗ҆ви́лсѧ є҆сѝ, прпⷣбне: и҆ кто̀ возмо́жетъ воспѣ́ти борє́нїѧ твоѧ̑, и҆счестѝ трꙋды̀, болѣ̑зни и҆ по́двиги, въ ни́хже тече́нїе по́стничества соверши́лъ є҆сѝ; къ си́хъ похвале́нїю не дово́льни сꙋ́ще, любо́вїю па́че почита́емъ тѧ̀ и҆ вѣ́рнѡ тѝ сицєва́ѧ прино́симъ:

Ра́дꙋйсѧ, гла́домъ и҆ жа́ждою пло́ть твою̀ ᲂу҆дрꙋчи́вый: ра́дꙋйсѧ, всѧ́кѡ сладостра́стїе всено́щными бдѣ̑нїи ᲂу҆вѧди́вый.

Ра́дꙋйсѧ, въ мл҃твахъ и҆ поще́нїихъ подвиза́выйсѧ и҆ въ безстра́стїе ѡ҆блекі́йсѧ: ра́дꙋйсѧ, преди́вное воздержа́нїѧ зерца́ло.

Ра́дꙋйсѧ, ꙗ҆́кѡ, стра́ждꙋщей ѿ мра́за пло́ти твое́й, теплото́ю любвѐ хрⷭ҇то́вы согрѣва́шесѧ дꙋ́хъ тво́й: ра́дꙋйсѧ, ꙗ҆́кѡ зно́емъ ѡ҆палѧ́ема тѧ̀ роса̀ бжⷭ҇твенныѧ блгⷣти прохлажда́ше.

Ра́дꙋйсѧ, прпⷣбныхъ ли́кꙋ вели́каѧ сла́во: ра́дꙋйсѧ, подвигѡ́въ и҆ совершє́нства ѡ҆́бразе достоподража́емый.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ и҃

Стра́нное и҆ пачеесте́ственное житїѐ прпⷣбнаго па́ѵла ви́дѣвъ, блаже́нне, бы́лъ є҆сѝ тогѡ̀ спо́стникъ и҆ собесѣ́дникъ: во ѻ҆бои́хъ бо ва́съ бѧ́ше є҆ди́нъ и҆ то́йжде дꙋ́хъ, и҆ сегѡ̀ ра́ди два̀, ꙗ҆́кѡ є҆ди́нъ, теко́сте ко гдⷭ҇ꙋ, пою́ще: А҆ллилꙋ́їа.

І҆́косъ и҃

Ве́сь є҆сѝ въ вы́шнихъ, но и҆ ни́жнихъ не ѡ҆ставлѧ́еши, прпⷣбне ѻ҆́ч҃е се́ргїе, при́снѡ со хрⷭ҇то́мъ ца́рствꙋеши, и҆ ѿ на́съ грѣ́шныхъ мл҃твы къ немꙋ̀ возсыла́еши: не то́чїю бо припа́дающыѧ къ цѣльбоно́сномꙋ твоемꙋ̀ гро́бꙋ, но и҆ дале́че ѿстоѧ́щыѧ, призыва́ющыѧ же всечестно́е и҆́мѧ твоѐ, предста́тельствомъ твои́мъ соблюда́еши ѿ всѧ́кагѡ ѕла̀. тѣ́мже во ᲂу҆миле́нїи зове́мъ тѝ:

Ра́дꙋйсѧ, прибѣ́жище на́ше въ ско́рбехъ: ра́дꙋйсѧ, приста́нище на́ше во ѡ҆бстоѧ́нїихъ.

Ра́дꙋйсѧ, цѣли́телю болѣ́зней дꙋше́вныхъ вкꙋ́пѣ и҆ тѣле́сныхъ: ра́дꙋйсѧ, посѣти́телю въ не́мощехъ лежа́щихъ.

Ра́дꙋйсѧ, ꙗ҆́кѡ призыва́емый ско́рѡ на по́мощь предварѧ́еши: ра́дꙋйсѧ, ꙗ҆́кѡ печа̑ли житє́йскїѧ ѿ человѣ̑къ ѿе́млеши.

Ра́дꙋйсѧ, а҆́гг҃льскагѡ житїѧ̀ ревни́телю: ра́дꙋйсѧ, ликѡ́въ ст҃ы́хъ всѣ́хъ соприча́стниче.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ ѳ҃

Ѿ всѧ́кихъ бѣ́дъ, скорбе́й и҆ напа́стей и҆збавлѧ́й на́съ, прпⷣбне, твои́ми ко гдⷭ҇ꙋ многомо́щными мл҃твами, и҆ да́рꙋй на́мъ и҆ вре́мєннаѧ блага̑ѧ и҆ вѣ́чное ра́дованїе полꙋчи́ти, да кꙋ́пнѡ съ тобо́ю воззове́мъ: А҆ллилꙋ́їа.

І҆́косъ ѳ҃

Виті́йство человѣ́ческое не возмо́жетъ и҆зрещѝ, ка́кѡ по мно́зѣхъ лѣ́тѣхъ преставле́нїѧ твоегѡ̀ и҆́нокꙋ нїки́форꙋ ꙗ҆ви́лсѧ є҆сѝ, глаго́лѧ: рцы̀ и҆гꙋ́менꙋ и҆ бра́тїи, да ѡ҆чи́стѧтъ гро́бъ мо́й, не хо́щетъ бо гдⷭ҇ь є҆мꙋ̀ въ забве́нїи бы́ти. мы́ же, благода́рни сꙋ́ще бг҃ꙋ, дарова́вшемꙋ на́мъ тебѐ своегѡ̀ ᲂу҆го́дника, вопїе́мъ тѝ сицєва́ѧ:

Ра́дꙋйсѧ, подви́жниче всеꙋсе́рднѣйшїй, во врата̀ ра́йскїѧ вше́дый: ра́дꙋйсѧ, и҆ ѡ҆ сп҃се́нїи земны́хъ бра́тїй твои́хъ пещи́сѧ не престаѧ́й.

Ра́дꙋйсѧ, гро́бъ тво́й и҆ тѣ́ло твоѐ, ꙗ҆́кѡже сосꙋ́дъ бл҃года́ти, на́мъ ѡ҆ста́вивый: ра́дꙋйсѧ, ѿ ни́хъ стрꙋи̑ и҆сцѣле́нїѧ и҆злива́ти не прекраща́ѧй.

Ра́дꙋйсѧ, хрⷭ҇то́вымъ словесє́мъ послѣ́дователю, съ ни́мъ ны́нѣ на нб҃сѣ́хъ ца́рствꙋѧй: ра́дꙋйсѧ, сѣ́ѧвый слеза́ми, да съ ра́достїю рꙋкоѧ̑ти твоѧ̑ пожне́ши во вре́мѧ своѐ.

Ра́дꙋйсѧ, пꙋтѝ же́стѡки за словеса̀ ᲂу҆сте́нъ гдⷭ҇а твоегѡ̀ сохрани́вый: ра́дꙋйсѧ, ѿ пе́рвагѡ и҆ до є҆динонадесѧ́тагѡ часа̀ жи́зни твоеѧ̀ є҆мꙋ̀ то́чїю є҆ди́номꙋ слꙋжи́вый.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ і҃

Сп҃сти́сѧ хотѧ́ще вѣ́рнїи ѿ грѣхѡ́въ и҆ страсте́й многоѡбра́зныхъ, ѻ҆́ч҃е, предста́телѧ тѧ̀ себѣ̀ и҆ побо́рника поставлѧ́ютъ и҆ не лиша́ютсѧ ᲂу҆пова́нїѧ своегѡ̀: наставлѧ́еши бо на сп҃се́нїѧ стезѝ ᲂу҆се́рднѡ къ тебѣ̀ притека́ющыѧ и҆ бг҃ꙋ вѣ́рнѡ вопїю́щыѧ: А҆ллилꙋ́їа.

І҆́косъ і҃

Стѣ́нꙋ тѧ̀ застꙋ́пника и҆ мл҃твенника те́пла ѡ҆брѣ́тше, прпⷣбне, и҆з̾ глꙋбины̀ се́рдца, ꙗ҆́кѡ бл҃гоꙋха́нное кади́ло, со воздыха́нїемъ бг҃ꙋ возсыла́емъ хвалы̑: тебѣ́ же при́сномꙋ сꙋ́щꙋ мл҃твенникꙋ, сицєва́ѧ прино́симъ пѣ̑нїѧ:

Ра́дꙋйсѧ, плодѡ́въ добродѣ́тельныхъ бл҃гопроцвѣ́тшаѧ ни́во: ра́дꙋйсѧ, бл҃гочести́выхъ дꙋ́шъ преизрѧ́дное ᲂу҆краше́нїе.

Ра́дꙋйсѧ, земны́мъ застꙋ́пниче крѣ́пкїй: ра́дꙋйсѧ, послꙋ́шателю ско́рый притека́ющихъ къ тебѣ̀.

Ра́дꙋйсѧ, свѣти́льниче, мра́къ де́мѡнскїй дале́че ѿрѣва́ѧй: ра́дꙋйсѧ, дꙋшетлѣ́нныхъ недꙋ́гѡвъ тмꙋ̀ ѿгонѧ́ѧй.

Ра́дꙋйсѧ, ꙗ҆́кѡ многоразли̑чнаѧ благодѣѧ̑нїѧ тобо́ю свы́ше подава́єма быва́ютъ: ра́дꙋйсѧ, ꙗ҆́кѡ всѣ́хъ молє́нїѧ дерзнове́ннѡ вы́шнемꙋ прино́сиши.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ а҃і

Пѣ́нїе всеꙋмиле́нное гдⷭ҇еви воспѣва́лъ є҆сѝ во всѧ̑ дни̑ житїѧ̀ твоегѡ̀, прпⷣбне, непреста́ннѡ и҆́мѧ хрⷭ҇то́во носѧ̀ во ᲂу҆стна́хъ и҆ се́рдцѣ твое́мъ: сегѡ̀ ра́ди ѡ҆чи́стивъ внꙋ́треннѧгѡ твоегѡ̀ человѣ́ка, слико́вникъ ꙗ҆ви́лсѧ є҆сѝ а҆́гг҃льскимъ чинѡ́мъ, съ ни́ми поѧ̀ вседержи́телю: А҆ллилꙋ́їа.

І҆́косъ а҃і

Свѣти́ло ꙗ҆ви́лсѧ є҆сѝ свѣтоза́рное, прпⷣбне се́ргїе, во странѣ̀ во́логодстѣй: свѣ́тлостїю бо житїѧ̀ и҆ дѣ́лъ твои́хъ и҆ зна́меньми чꙋде́съ ѡ҆зарѧ́еши дꙋ́шы на́шѧ. сегѡ̀ ра́ди мы̀, притека́юще къ ра́цѣ моще́й твои́хъ, глаго́лемъ тѝ такѡва́ѧ:

Ра́дꙋйсѧ, свѣ́тлое со́лнце, блиста́нїи твои́ми просвѣща́ющее вѣ́рныхъ: ра́дꙋйсѧ, сосꙋ́де мѵ́ра бжⷭ҇твеннагѡ, ѡ҆бл҃гоꙋха́ѧй припа́дающихъ къ тебѣ̀ со ᲂу҆се́рдїемъ.

Ра́дꙋйсѧ, во страна́хъ є҆́ллинскихъ роди́выйсѧ, бг҃охрани́мѣй же держа́вѣ рѡссі́йстѣй бг҃омъ да́нный: ра́дꙋйсѧ, сѣ́верныѧ страны̀ на́шеѧ ᲂу҆краше́нїе велелѣ́пное.

Ра́дꙋйсѧ, гра́дꙋ во́логдѣ похвало̀ высо́каѧ: ра́дꙋйсѧ, хра́мꙋ, въ не́мже почива́ютъ мо́щи твоѧ̑, ᲂу҆твержде́нїе непоколеби́мое.

Ра́дꙋйсѧ, бл҃гоꙋкраси́телю пꙋсты́ни нꙋ́ромскїѧ: ра́дꙋйсѧ, мнѡ́гїѧ и҆́ноки па́стырскимъ жезло́мъ твои́мъ ко хрⷭ҇тꙋ̀ приведы́й.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ в҃і

Бл҃года́ть, да́ннꙋю тѝ и҆ по́двиги твоѧ̑ никто́же и҆зрещѝ возмо́жетъ, ѻ҆́ч҃е се́ргїе: въ пꙋсты́ни бо нестѧжа́тельнѡ жи́вый, съ бг҃омъ и҆ а҆́гг҃лы бесѣ́довалъ є҆сѝ, ѿ человѣ̑къ бѣ́гаѧ. ны́нѣ ᲂу҆̀бо въ нбⷭ҇ныхъ черто́зѣхъ ра́дꙋѧсѧ, пое́ши гдⷭ҇ꙋ бг҃ꙋ: А҆ллилꙋ́їа.

І҆́косъ в҃і

Пое́мъ до́блествєнныѧ по́двиги твоѧ̑, ᲂу҆бл҃жа́емъ достохва́льнꙋю кончи́нꙋ твою̀, почита́емъ и҆ сщ҃е́ннꙋю па́мѧть твою̀, прпⷣбне, въ не́йже, ꙗ҆́кѡ є҆ди́номꙋ ѿ дрꙋгѡ́въ бж҃їихъ, похва̑льнаѧ тѝ си́це вопїе́мъ:

Ра́дꙋйсѧ, ꙗ҆́кѡ свѣ́тлыми по́двиги твои́ми ко свѣ́тꙋ невече́рнемꙋ вше́лъ є҆сѝ: ра́дꙋйсѧ, ꙗ҆́кѡ со безпло́тными трист҃ꙋ́ю пѣ́снь немо́лчнѡ взыва́еши.

Ра́дꙋйсѧ, неизрече́нныхъ бла̑гъ наслѣ́дниче: ра́дꙋйсѧ, ликова́нїѧ во црⷭ҇твїи нбⷭ҇нѣмъ при́снѡ наслажда́ешисѧ.

Ра́дꙋйсѧ, ꙗ҆́кѡ предстои́ши во сла́вѣ прест҃ѣ́й трⷪ҇цѣ: ра́дꙋйсѧ, ꙗ҆́кѡ въ па́мѧти твое́й хрⷭ҇то́вꙋ цр҃ковь весели́ши неизрече́ннѡ.

Ра́дꙋйсѧ, ꙗ҆́кѡ тобо́ю по́стницы и҆ пꙋстынножи́телїе въ по́двизѣхъ ᲂу҆крѣплѧ́ютсѧ: ра́дꙋйсѧ, ꙗ҆́кѡ вѣ́рнїи бл҃гоправле́нїемъ твои̑мъ по стопа́мъ за́повѣдей бж҃їихъ ше́ствовати наꙋча́ютсѧ.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ г҃і

Ѽ вели́кїй и҆ пресла́вный ᲂу҆го́дниче хрⷭ҇то́въ, прпⷣбне ѻ҆́ч҃е се́ргїе! прїимѝ сїѐ ма́лое ѿ на́съ приноси́мое тебѣ̀ пѣ́нїе, и҆ потщи́сѧ ско́ро ᲂу҆моли́ти ми́лостивагѡ бг҃а и҆ влⷣкꙋ, да твои́мъ хода́тайствомъ и҆зба́витъ на́съ ѿ вра̑гъ ви́димыхъ и҆ неви́димыхъ, ѿ всѧ́кїѧ напа́сти и҆ ско́рби, ѿ внеза́пныѧ сме́рти и҆ бꙋ́дꙋщїѧ мꙋ́ки, да съ тобо́ю и҆ со всѣ́ми ст҃ы́ми сподо́бимсѧ непреста́ннѡ пѣ́ти є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ земны́й и҆ человѣ́къ нбⷭ҇ный бы́лъ є҆сѝ, прпⷣбне ѻ҆́ч҃е се́ргїе: ѿ ю҆́ности бо твоеѧ̀ гдⷭ҇еви рабо́тати и҆зво́ливый, дости́глъ є҆сѝ бл҃же́нства нбⷭ҇нагѡ, и҆ ны́нѣ со а҆́гг҃лы прⷭ҇то́лꙋ прест҃ы́ѧ трⷪ҇цы предстои́ши. сегѡ̀ ра́ди тебѐ, на нб҃сѝ и҆ на землѝ просла́вленномꙋ, вопїе́мъ си́це:

Ра́дꙋйсѧ, ѿ ю҆́ности твоеѧ̀ всѣ́мъ се́рдцемъ твои́мъ гдⷭ҇а возлюби́вый: ра́дꙋйсѧ, и҆ са́мъ ѿ негѡ̀ возлю́бленъ бы́вый.

Ра́дꙋйсѧ, поꙋча́выйсѧ въ зако́нѣ гдⷭ҇ни де́нь и҆ но́щь: ра́дꙋйсѧ, поꙋче́нїемъ си́мъ ꙗ҆́кѡ дре́во плодоно́сное, при и҆схо́дищихъ во́дъ бл҃года́тныхъ насажде́нное, показа́выйсѧ.

Ра́дꙋйсѧ, чистоты̀ вмести́лище: ра́дꙋйсѧ, до́ме всѧ́ческїѧ свѧты́ни.

Ра́дꙋйсѧ, блгⷣти бж҃їѧ во всѧ̑ дни̑ житїѧ̑ и҆спо́лненный: ра́дꙋйсѧ, наслѣ́дниче нбⷭ҇ныхъ дарова́нїй.

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Конда́къ а҃

И҆збра́нный ᲂу҆го́дниче хрⷭ҇то́въ, прпⷣбне ѻ҆́ч҃е се́ргїе, бл҃гохва̑льнаѧ пѣ̑нїѧ ѡ҆ вели́кихъ твои́хъ чꙋдесѣ́хъ приносѧ́ще тѝ моли́твенницы твоѝ, прославлѧ́емъ просла́вльшагосѧ въ тебѣ̀ бг҃а на́шего. ты́ же, ꙗ҆́кѡ и҆мѣ́ѧй ве́лїе дерзнове́нїе къ немꙋ̀, ѿ всѧ́кихъ на́съ вре́менныхъ и҆ вѣ́чныхъ бѣ́дъ твои́ми къ немꙋ̀ мл҃твами свободѝ, да зове́мъ тѝ:

Ра́дꙋйсѧ, се́ргїе прпⷣбне, нꙋ́ромскїй чꙋдотво́рче.

Моли́твы

Ѽ вели́кїй чꙋдотво́рче, прпⷣбне ѻ҆́ч҃е на́шъ се́ргїе! ᲂу҆слы́ши на́съ грѣ́шныхъ молѧ́щихсѧ тебѣ̀ и҆ и҆́мѧ твоѐ ст҃о́е на по́мощь призыва́ющихъ, не пре́зри на́съ чтꙋ́щихъ тѧ̀: молѝ ѡ҆ на́съ грѣ́шныхъ содѣ́телѧ на́шего гдⷭ҇а бг҃а, тебѣ̀ бо даде́сѧ бл҃года́ть моли́тисѧ за на́съ. не мни́мъ бо тѧ̀ ме́ртва сꙋ́ща: а҆́ще бо тѣ́ломъ и҆ преста́вилсѧ є҆сѝ ѿ на́съ, и҆ ра́ка твоѧ̀ пред̾ ѻ҆чи́ма на́шима ви́дима є҆́сть, но ст҃а́ѧ твоѧ̀ дꙋша̀ со а҆́гг҃льскими ли́ки предстои́тъ ᲂу҆ прⷭ҇то́ла вседержи́телева. ѽ па́стырю на́шъ, прпⷣбне ѻ҆́ч҃е се́ргїе! потщи́сѧ сохрани́ти на́съ ѿ па́гꙋбныѧ сме́рти и҆ ѿ бѣсо́вскагѡ и҆скꙋше́нїѧ, ᲂу҆мо́мъ ѿ малодꙋ́шїѧ помраче́нныхъ. не ѡ҆ста́ви на́съ, свѣти́льниче хрⷭ҇то́въ, плѣне́нныхъ бы́ти, но помозѝ на́мъ мл҃твами твои́ми ѿ вѣ́чныѧ мꙋ́ки и҆зба́витисѧ и҆ наслѣ́дники црⷭ҇твїѧ нбⷭ҇нагѡ бы́ти со всѣ́ми ст҃ы́ми ѿ вѣ́ка ᲂу҆годи́вшими гдⷭ҇ꙋ бг҃ꙋ на́шемꙋ і҆и҃сꙋ хрⷭ҇тꙋ̀, є҆мꙋ́же подоба́етъ че́сть, поклоне́нїе, сла́ва и҆ держа́ва, со безнача́льнымъ є҆гѡ̀ ѻ҆ц҃е́мъ и҆ прест҃ы́мъ и҆ бл҃ги́мъ и҆ животворѧ́щимъ є҆гѡ̀ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Ѽ прпⷣбне и҆ достобл҃же́нне ѻ҆́ч҃е се́ргїе, до́брый на́шъ па́стырю и҆ ᲂу҆чи́телю! ты̀ є҆щѐ на землѝ се́й ра́бъ преи́скреннїй сп҃са хрⷭ҇та̀ показа́лсѧ є҆сѝ, и҆ мнѡ́гїѧ да́ры бл҃года̑тныѧ ѿ негѡ̀ прїѧ́ти сподо́билсѧ є҆сѝ: по бл҃же́ннѣмъ же твое́мъ ᲂу҆спе́нїи прⷭ҇то́лꙋ непристꙋ́пныѧ є҆гѡ̀ сла́вы предстоѧ̀, ве́лїе къ немꙋ̀ дерзнове́нїе и҆́маши. сего̀ ра́ди молѝ и҆ ѡ҆ на́съ, вла́ющихсѧ въ пꙋсты́ни мі́ра сегѡ̀ и҆ сꙋе́тъ є҆гѡ̀. ѡ҆градѝ на́съ предста́тельствомъ твои́мъ ѿ всѣ́хъ вра̑гъ ви́димыхъ и҆ неви́димыхъ, ѿ тлетво́рныхъ вѣ̑тръ, смертоно́сныѧ ꙗ҆́звы, ѿ гла́да, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нныхъ и҆ ѿ всѧ́кагѡ ѕла̀. наипа́че же, ст҃че бж҃їй, проле́й те́плое твоѐ моле́нїе ко гдⷭ҇ꙋ ѡ҆ бг҃охрани́мѣй держа́вѣ рѡссі́йстѣй, да въ ми́рѣ, тишинѣ̀ и҆ бл҃годе́нствїи жи́тельствꙋемъ. ѡ҆гражда́й же моле́нїемъ твои́мъ, прпⷣбне, цр҃ковь хрⷭ҇то́вꙋ правосла́внꙋю ѿ є҆ресе́й и҆ раско́лѡвъ, ри́зꙋ хрⷭ҇то́вꙋ раздра́ти тща́щихсѧ: и҆спросѝ па́стырємъ свѧты́ню, па́ствѣ ѡ҆ сп҃се́нїи ре́вность, ста́рцємъ крѣ́пость и҆ бл҃го́е напꙋ́тствїе въ жи́знь вѣ́чнꙋю, срє́днимъ лꙋ́чшымъ бы́ти, ю҆́ныѧ ᲂу҆цѣломꙋ́дри и҆ послꙋша́нїю наꙋчѝ. на́мъ же всѣ̑мъ, ᲂу҆го́дниче бж҃їй, вре́мѧ на покаѧ́нїе и҆спросѝ, да не во грѣсѣ́хъ на́шихъ ᲂу҆́мремъ, но да мл҃твами твои́ми, плоды̀ достѡ́йны покаѧ́нїѧ прине́сшымъ, вѣ́чнꙋю приснобл҃же́ннꙋю жи́знь и҆ сопребыва́нїе со ст҃ы́ми є҆гѡ̀ да́рꙋетъ на́мъ гдⷭ҇ь, да прославлѧ́емъ гла́сы немо́лчными є҆гѡ̀ неизрече́нное милосе́рдїе въ безконє́чныѧ вѣ́ки вѣкѡ́въ. А҆ми́нь.