Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ прпⷣбномꙋ и҆ бг҃оно́сномꙋ львꙋ̀, ста́рцꙋ ѻ҆́птинскомꙋ.

Прп. Льва Оптинского (1841) 24 октября 2026

Конда́къ а҃

И҆збра́нномꙋ нача́льникꙋ прпⷣбныхъ ѻ҆тцє́въ, бг҃омꙋ́дромꙋ львꙋ̀ ѻ҆́птинскомꙋ, ста́рчество въ ѻ҆́птиной пꙋ́стынѣ насади́вшемꙋ и҆ дїа́вола всеконе́чнѣ побѣди́вшемꙋ, похва́льнаѧ принесе́мъ пѣ́нїе, ты́ же ѿ бѣ́дъ и҆зба́ви на́съ, ѻ҆́тче прпⷣбне, любо́вїю тебѣ̀ зовꙋ́щихъ:

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

І҆́косъ а҃

Съ прпⷣбнымъ прпⷣбенъ бꙋ́деши и҆ со и҆збра́ннымъ и҆збра́нъ ꙗ҆ви́шисѧ, сїѐ помы́сливъ, ѻ҆́тче львѐ, мі́ра ѿре́клсѧ є҆сѝ и҆ ѡ҆брꙋчи́лсѧ и҆́ноческомꙋ зва́нїю. Таково́е произволе́нїе твоѐ похвалѧ́юще си́це тебѣ̀ вопїе́мъ:

Ра́дꙋйсѧ, хрⷭ҇то́въ послѣ́дователю и҆збра́нный: ра́дꙋйсѧ, ве́чери та́инственныѧ рачи́телю.

Ра́дꙋйсѧ, є҆ле́й ᲂу҆гото́вивый и҆зрѧ́днымъ добродѣ́ланїемъ: ра́дꙋйсѧ, свѣти́льникъ дꙋше́вный возже́гъ бг҃олю́бїемъ.

Ра́дꙋйсѧ, ꙗ҆́кѡ въ бра́чнꙋю ри́зꙋ ѡ҆бле́клсѧ є҆сѝ смире́нїемъ: ра́дꙋйсѧ, ꙗ҆́кѡ рꙋ́бища страсте́й совле́клсѧ є҆сѝ послꙋша́нїемъ.

Ра́дꙋйсѧ, ꙗ҆́кѡ мїрскꙋ́ю возненави́дѣлъ є҆сѝ сꙋетꙋ̀ безпло́днꙋю: ра́дꙋйсѧ, ꙗ҆́кѡ и҆́ноческꙋю возлюби́лъ є҆сѝ тишинꙋ̀ многопло́днꙋю.

Ра́дꙋйсѧ, ꙗ҆́кѡ а҆́гг҃льскагѡ дѣ́ланїѧ ꙗ҆ви́лсѧ є҆сѝ прича́стникъ: ра́дꙋйсѧ, ꙗ҆́кѡ а҆пⷭ҇льскагѡ преда́нїѧ ꙗ҆ви́лсѧ є҆сѝ храни́телю.

Ра́дꙋйсѧ, на бра́кѣ а҆́гнчемъ вкꙋси́вый трапе́зꙋ сладча́йшꙋю: ра́дꙋйсѧ, вїно́мъ ᲂу҆миле́нїѧ напои́вый дꙋ́шꙋ безстра́стнꙋю.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ в҃

На бг҃а всю̀ наде́ждꙋ возложи́въ и҆ крⷭ҇тъ тво́й взе́мъ, ѻ҆́тче львѐ, житїѐ сопротивобѣсо́вское дерзнꙋ́лъ є҆сѝ проходи́ти прпⷣбне, мꙋ́жествомъ дꙋшѝ твоеѧ̀ сласте́й стра́стныѧ во́лны ᲂу҆смири́лъ є҆сѝ, хрⷭ҇тꙋ̀ моли́твеннѡ поѧ̀: А҆ллилꙋ́їа.

І҆́косъ в҃

Терпѣ́нїемъ ѡ҆бле́клсѧ є҆сѝ, бг҃омꙋ́дре ѻ҆́тче, и҆́ноческое житїѐ ꙗ҆́кѡ а҆́гг҃льскїй чи́нъ воспрїѧ́лъ є҆сѝ, трꙋды̀ и҆ болѣ̑зни, тѧготы̑ и҆ бѣды̑ ле́гцѣ поне́слъ є҆сѝ ѡ҆крилѧ́емь послꙋша́нїемъ, сегѡ̀ ра́ди зове́мъ тѝ:

Ра́дꙋйсѧ, мона́шескагѡ любомꙋ́дрїѧ присносвѣ́тлый свѣти́льниче: ра́дꙋйсѧ, безмо́лвническагѡ житїѧ̀ и҆́стовый люби́телю.

Ра́дꙋйсѧ, свѣ́тлаѧ свѣщѐ мл҃твъ неꙋсыпа́емыхъ: ра́дꙋйсѧ, лампа́до неꙋгаси́маѧ бдѣ́нїй непреста́нныхъ.

Ра́дꙋйсѧ, ꙗ҆́кѡ ѻ҆́гнь ко ѻ҆гню̀ прилага́лъ є҆сѝ раче́нїе: ра́дꙋйсѧ, ꙗ҆́кѡ неѡсла́бнѡ восходи́лъ є҆сѝ по лѣ́ствицѣ дꙋхо́внагѡ восхожде́нїѧ.

Ра́дꙋйсѧ, по́стничества постоѧ́нное жела́нїе: ра́дꙋйсѧ, трꙋдолю́бїѧ тве́рдое понꙋжде́нїе.

Ра́дꙋйсѧ, ѱалмопѣ́нїѧ всегда́шнее любле́нїе: ра́дꙋйсѧ, ᲂу҆ма̀ непреста́нное хране́нїе.

Ра́дꙋйсѧ, ꙗ҆́кѡ на высотꙋ̀ столпа̀ возше́лъ є҆сѝ самоѿверже́нїѧ: ра́дꙋйсѧ, ꙗ҆́кѡ во глꙋбинꙋ̀ снизше́лъ є҆сѝ самоꙋкоре́нїѧ.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ г҃

Ѻ҆гнедохнове́нное є҆ѵⷢ҇льское сло́во слы́шалъ є҆сѝ ѻ҆́тче, ꙗ҆́кѡ ᲂу҆чени́къ въ мѣ́рꙋ ᲂу҆чи́телѧ прихо́дитъ, потща́лсѧ є҆сѝ взыска́ти ᲂу҆чи́телѧ мл҃твы ᲂу҆́мныѧ, да къ соверше́нномꙋ є҆дине́нїю съ бг҃омъ приведе́тъ тѧ̀, и҆ ѡ҆брѣ́тъ ѳео́дѡра ꙗ҆́кѡ да́ръ бж҃їй, бл҃года́рнѣ возопи́лъ є҆сѝ бг҃ꙋ: А҆ллилꙋ́їа.

І҆́косъ г҃

А҆дама́нта крѣпча́йшее житїѐ ѳео́дѡра, бы́сть тебѣ̀, ѻ҆́тче львѐ, ꙗ҆́кѡ ѡ҆брѣ́тенїе сокро́вища многоцѣ́ннагѡ, є҆мꙋ́же послѣ́дꙋѧ житїю̀ и҆ ᲂу҆че́нїю дꙋ́шꙋ снабди́лъ є҆сѝ дара́ми блгⷣти многоцѣле́бныѧ. Сегѡ̀ ра́ди цѣли́ши и҆ богати́ши вопїю́щїѧ тебѣ̀ такова̑ѧ:

Ра́дꙋйсѧ, бога́тство тлѣ́нное ни во что́ же вмѣни́вый: ра́дꙋйсѧ, сокро́вище непреходѧ́щее на нб҃сѝ стѧжа́вый.

Ра́дꙋйсѧ, златоꙋкра́шеннаѧ две́ре та́инъ цр҃ко́вныхъ: ра́дꙋйсѧ, златокова́нный ключꙋ̀ та́инствъ дꙋхо́вныхъ.

Ра́дꙋйсѧ, ѿверза́ѧй вхо́дъ мл҃твѣ ᲂу҆́мнѣй: ра́дꙋйсѧ, затворѧ́ѧй вхо́дъ страстє́мъ безꙋ́мнымъ.

Ра́дꙋйсѧ, ᲂу҆ч҃ничѐ бл҃гі́й и҆ вѣ́рный: ра́дꙋйсѧ, храни́телю паі́сїевыхъ ᲂу҆че́нїй.

Ра́дꙋйсѧ, благоꙋмиле́нное къ мл҃твѣ прилежа́нїе: ра́дꙋйсѧ, бл҃годерзнове́нное страсте́й ᲂу҆мерщвле́нїе.

Ра́дꙋйсѧ, свѣ́точе добродѣ́телей бжⷭ҇твенныхъ: ра́дꙋйсѧ, и҆сто́чниче дарѡ́въ дꙋхо́вныхъ.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ д҃

Ко и҆сто́чникꙋ прите́клъ є҆сѝ бжⷭ҇твенныхъ писа́нїй, ꙗ҆́кѡ є҆ле́нь жа́ждꙋщїй, и҆ стрꙋѧ́ми ст҃оѻте́ческихъ ᲂу҆че́нїй напои́лъ є҆сѝ дꙋ́шꙋ твою̀, бг҃омꙋ́дре львѐ. Сегѡ̀ ра́ди жа́ждꙋ ᲂу҆толи́лъ є҆сѝ мно́гихъ люде́й, приходѧ́щихъ къ тебѣ̀, въ бл҃года́рности зовꙋ́щихъ бг҃ꙋ, А҆ллилꙋ́їа.

І҆́косъ д҃

Разꙋ́мнѡ вше́лъ є҆сѝ въ приста́нище безмо́лвїѧ ꙗ҆́кѡ въ бжⷭ҇твенное поко́ище, и҆дѣ́же со бл҃же́ннымъ ѳео́дѡромъ ꙗ҆́кѡ земны́й а҆́гг҃лъ непреста́ннѡ бесѣ́довалъ є҆сѝ ко хрⷭ҇тꙋ̀. Мы́ же зрѧ́ще тѧ̀ ꙗ҆́кѡ нбⷭ҇нагѡ чл҃вѣ́ка, прино́симъ тебѣ̀ похвалꙋ̀ сїю̀:

Ра́дꙋйсѧ, го́рлице пꙋстыннолюби́ваѧ, хрⷭ҇та̀ взыскꙋ́ющаѧ: ра́дꙋйсѧ, пте́нче ѻ҆рли́ный, ѡ҆бнови́вый ю҆́ность твою̀.

Ра́дꙋйсѧ, бг҃озво́нкꙋю возлюби́вый тишинꙋ̀ а҆́гг҃льскꙋю: ра́дꙋйсѧ, ѕлошꙋ́мнагѡ ᲂу҆дали́выйсѧ мѧте́жа страсте́й.

Ра́дꙋйсѧ, ꙗ҆́кѡ херꙋві́мъ носи́лъ є҆сѝ бг҃а, въ тебѣ̀ почива́ющагѡ: ра́дꙋйсѧ, ꙗ҆́кѡ серафі́мъ зрѣ́лъ є҆сѝ та́йны, въ се́рдцѣ твое́мъ ꙗ҆влѧ́ющїѧсѧ.

Ра́дꙋйсѧ, ꙗ҆́кѡ со́лнце возше́лъ є҆сѝ, въ пꙋсты́нѣ и҆зсꙋша́ѧй корє́нїѧ страсте́й: ра́дꙋйсѧ, всено́щными бдѣ́нїи твои́ми ꙗ҆́кѡ по́лнаѧ лꙋна̀ разто́рглъ є҆сѝ тмꙋ̀ вра́жїихъ сѣ́тей.

Ра́дꙋйсѧ, безмо́лвїѧ сто́лпе непоколеби́мый: ра́дꙋйсѧ, подви́жничества ѡ҆снова́нїе неиспровержи́мое.

Ра́дꙋйсѧ, по́стничества похвало̀ и҆зрѧ́днаѧ: ра́дꙋйсѧ, пꙋстынножи́тельства тишино̀ домови́таѧ.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ є҃

Ѻ҆́стровъ валаа́мъ ꙗ҆́кѡ приста́нище ѿ мїрскі́ѧ молвы̀ и҆збра́лъ є҆сѝ, ѻ҆́тче, во́ньже всели́лсѧ є҆сѝ со бл҃же́ннымъ ѳео́дѡромъ, и҆дѣ́же кꙋ́плю дꙋхо́внꙋю дѣ́ѧвъ, зла́томъ смиренномꙋ́дрїѧ мно́гихъ богатѧ̀. Тѣ́мже ѡ҆бнища́вшїѧ ны̀ смире́нїемъ ко ѻ҆́стровꙋ покаѧ́нїѧ приведѝ твои́ми моли́твами, бг҃ꙋ вопи́ти: А҆ллилꙋ́їа.

І҆́косъ є҃

Цѣломꙋ́дрїемъ ᲂу҆краси́лсѧ є҆сѝ ѻ҆́тче львѐ, ꙗ҆́кѡ препоѧ́санъ бы́лъ є҆сѝ подви́жничествомъ, въ схи́мꙋ же вели́кꙋю ꙗ҆́кѡ въ а҆гг҃лоподо́бнꙋю си́лꙋ ѡ҆бле́клсѧ є҆сѝ, а҆́гг҃льскїѧ ѡ҆бвеселѧ́ѧ чи̑ны. Сегѡ̀ ра́ди мона́шества красота̀ на тебѣ̀ и҆зѻбрази́сѧ, мы́ же тѧ̀ ꙗ҆́кѡ наста́вника и҆́ноческихъ чинѡ́въ похвалѧ́емъ си́це:

Ра́дꙋйсѧ, кꙋ́колемъ неѕло́бїѧ покры́выйсѧ: ра́дꙋйсѧ, въ ма́нтїю любомꙋ́дрїѧ ѡ҆блекі́йсѧ.

Ра́дꙋйсѧ, парама́нъ на себѣ̀ возложи́въ терпѣ́нїѧ: ра́дꙋйсѧ, препоѧса́выйсѧ по́ѧсомъ сꙋгꙋ́багѡ раче́нїѧ.

Ра́дꙋйсѧ, санда́лїи ѡ҆бꙋ́вый бл҃говѣствова́нїѧ мі́рꙋ: ра́дꙋйсѧ, щито́мъ послꙋша́нїѧ стрѣ̑лы вра́жїѧ ѿрази́вый.

Ра́дꙋйсѧ, мече́мъ мл҃твеннымъ по́лчища де́монскїѧ сокрꙋши́вый: ра́дꙋйсѧ, бг҃одарова́нное разсꙋжде́нїе ꙗ҆́кѡ свѣщꙋ̀ неꙋгаси́мꙋю вже́глъ є҆сѝ.

Ра́дꙋйсѧ, ꙗ҆́кѡ на крⷭ҇тъ сꙋгꙋ́бымъ ѿрече́нїемъ ѿ мі́ра возше́лъ є҆сѝ: ра́дꙋйсѧ, ꙗ҆́кѡ въ нищетѣ̀ дꙋхо́вной пожи́лъ є҆сѝ.

Ра́дꙋйсѧ, бога́тство нестѧжа́нїѧ: ра́дꙋйсѧ, мі́ра попра́нїе.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ ѕ҃

Мона́хѡвъ наста́вника и҆ мїрѧ́нъ ᲂу҆тѣ́шителѧ, ꙗ҆вѝ тѧ̀ бг҃ъ въ странѣ̀ рѡссі́йстѣй, ѻ҆́тче прпⷣбне львѐ, и҆ стра́ждꙋщимъ цѣли́телѧ и҆ бѣсѡ́въ прогони́телѧ и҆ ѿ всѧ́кихъ ѕѡ́лъ и҆зба́вителѧ люде́й къ тебѣ̀ съ вѣ́рою притека́ющихъ и҆ пою́щихъ бг҃ꙋ: А҆ллилꙋ́їа.

І҆́косъ ѕ҃

Є҆гда̀ въ ѻ҆́птинꙋ пꙋ́стынь прише́лъ є҆сѝ ѻ҆́тче львѐ, ꙗ҆́коже въ вертогра́дъ бг҃онасажде́нный, тогда̀ ꙗ҆́кѡ дѣ́латель премꙋ́дрый водрꙋзи́лъ є҆сѝ сто́лпъ ста́рческагѡ ѡ҆кормле́нїѧ и҆ моли́твеннꙋю ѡ҆гра́дꙋ и҆ точи́ло смире́нїѧ по є҆ѵⷢ҇льскомꙋ сло́вꙋ, сегѡ̀ ра́ди пꙋ́стынь процвѣтѐ хвала́ми тебѣ̀ славосло́вѧщи:

Ра́дꙋйсѧ, мѡѷсе́ю и҆ а҆нтѡ́нїю сподви́жниче бг҃одарова́нный: ра́дꙋйсѧ, фїларе́тꙋ і҆ера́рхꙋ дрꙋ́же и҆ наста́вниче и҆збра́нный.

Ра́дꙋйсѧ, мака́рїю смиренномꙋ́дромꙋ вождю̀ бг҃овдохнове́нный: ра́дꙋйсѧ, і҆саа́кїю препро́стомꙋ прⷪ҇ро́че бг҃оѿкрове́нный.

Ра́дꙋйсѧ, ѳео́дѡра бл҃же́ннагѡ ᲂу҆ч҃ничѐ бл҃гопослꙋ́шный: ра́дꙋйсѧ, паі́сїева любомꙋ́дрїѧ лѵ́ро вдохнове́ннаѧ.

Ра́дꙋйсѧ, ѻ҆те́ческихъ и҆зрече́нїй кни́го ѡ҆дꙋшевле́ннаѧ: ра́дꙋйсѧ, а҆мвро́сїа бл҃гослове́ннагѡ и҆з̾ по́лы въ полꙋ̀ мака́рїю преда́вый.

Ра́дꙋйсѧ, ст҃оѻте́ческими наставле́ньми є҆гѡ̀ ꙗ҆́кѡ ѻ҆те́цъ чадолюби́вый наказа́вый: ра́дꙋйсѧ, ст҃и́телѧ і҆гна́тїѧ бг҃омꙋ́дрый воспита́телю.

Ра́дꙋйсѧ, въ новонача́лїи є҆гѡ̀ ᲂу҆ро́кѡвъ смире́нїѧ пода́телю: ра́дꙋйсѧ, мно́гїѧ ча̑да твоѧ̑ къ бг҃ꙋ приведы́й.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ з҃

Посѣли́лсѧ є҆сѝ въ пче́льницѣ скита̀ ꙗ҆́кѡ пчела̀ люботрꙋ́днаѧ, некта́ръ подви́жническихъ трꙋдѡ́въ твои́хъ въ дѣ́лѣхъ и҆ чꙋдесѣ́хъ ꙗ҆влѧ́ѧ и҆ поꙋче́нїи свои́ми ча̑да твоѧ̑ пита́ѧ, любо́вїю вопїю́щїѧ бг҃ꙋ: А҆ллилꙋ́їа.

І҆́косъ з҃

Ме́дъ ᲂу҆́мнагѡ дѣ́ланїѧ въ се́рдцѣ твое́мъ собра́лъ є҆сѝ бг҃омꙋ́дре ѻ҆́тче, ꙗ҆́кѡ і҆и҃сово сла́дкое и҆́мѧ бы́сть тебѣ̀ ᲂу҆тѣше́нїѧ и҆сто́чникъ, и҆́мже го́речь страсте́й на сла́дость добродѣ́телей преложи́лъ є҆сѝ, понꙋжде́нїемъ дꙋхо́внымъ. Сегѡ̀ ра́ди сла̑дкїѧ со́ты похвалы̀ тебѣ̀ прино́симъ:

Ра́дꙋйсѧ, а҆́гг҃лѡмъ сла́дкое пѣ́нїе: ра́дꙋйсѧ, де́монѡмъ го́рькое воспомина́нїе.

Ра́дꙋйсѧ, цвѣтничѐ цѣломꙋ́дрїѧ дꙋхо́внагѡ: ра́дꙋйсѧ, раю̀ мл҃твосло́вїѧ цр҃ко́внагѡ.

Ра́дꙋйсѧ, ᲂу҆́мныѧ мл҃твы дѣ́лателю бг҃овдохнове́нный: ра́дꙋйсѧ, серде́чнагѡ ᲂу҆миле́нїѧ носи́телю всебл҃гоговѣ́йный.

Ра́дꙋйсѧ, ꙗ҆́кѡ сле́зныѧ стрꙋи̑ и҆сточи́лъ є҆сѝ всецѣлє́бныѧ: ра́дꙋйсѧ, ꙗ҆́кѡ бл҃года́тїю просвѣти́лъ є҆сѝ дꙋшѝ вожделѣ́нїе.

Ра́дꙋйсѧ, непреста́нное па́мѧтованїе ѡ҆ бз҃ѣ: ра́дꙋйсѧ, пламенѣ́ющаѧ любы̀ въ дꙋ́сѣ.

Ра́дꙋйсѧ, медотѡ́чнаѧ словеса̀ и҆сточа́ѧй: ра́дꙋйсѧ, сладкозрѣ́нїе ча́дѡмъ твои́мъ.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ и҃

Ѻ҆́птинскомꙋ ста́рчествꙋ ꙗ҆ви́лсѧ є҆сѝ ꙗ҆́кѡ бл҃гома́сленный ко́реню, є҆ле́емъ намаща́ѧ ᲂу҆че́нїй твоѧ̑ ᲂу҆ченикѝ и҆ ѿ лампа́ды присногорѧ́щїѧ пома́занїемъ цѣлѧ̀ недꙋ́жныѧ, въ ра́дости пою́щїѧ бл҃года́рнѡ бг҃ꙋ: А҆ллилꙋ́їа.

І҆́косъ и҃

Сла́ва по́двигѡвъ твои́хъ промча́сѧ по лицꙋ̀ землѝ рѡссі́йскїѧ и҆ зарѧ̀ чꙋде́съ твои́хъ ѡ҆блиста̀ концы̀ є҆ѧ̀, сегѡ̀ ра́ди притека́хꙋ цѣли́тисѧ къ тебѣ̀ бѣсны̑ѧ и҆ недꙋ́жныѧ, вопїю́ще тебѣ̀ сїѧ̀:

Ра́дꙋйсѧ, недꙋ́гѡвъ и҆збавле́нїе: ра́дꙋйсѧ, грѣхѡ́въ разрѣше́нїе.

Ра́дꙋйсѧ, врачева́нїе болѣ́зней неꙋдобоисцѣли́мыхъ: ра́дꙋйсѧ, ѡ҆свобожде́нїе ѿ вери́гъ неꙋдобоно́сныхъ.

Ра́дꙋйсѧ, бы́строе премѣне́нїе ско́рби на ра́дость: ра́дꙋйсѧ, ско́рое и҆сцѣле́нїе ра́ковыѧ ꙗ҆́звы.

Ра́дꙋйсѧ, ѡ҆держи́мыхъ ѿ бѣсѡ́въ и҆збавлѧ́ѧй: ра́дꙋйсѧ, ѿча̑ѧннымъ ѿра́дꙋ подава́ѧй.

Ра́дꙋйсѧ, безнадє́жнымъ вѣ́рꙋ возраща́ѧй: ра́дꙋйсѧ, є҆ле́емъ ѿ лампа́ды и҆сцѣлѧ́ѧй.

Ра́дꙋйсѧ, ꙗ҆́кѡ тобо́ю здра́вїе полꙋча́емъ: ра́дꙋйсѧ, ꙗ҆́кѡ тобо́ю ᲂу҆ны́нїе побѣжда́емъ.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ ѳ҃

Ходѧ́й ꙗ҆́кѡ ле́въ дїа́волъ и҆ рыка́ѧй когѡ̀ поглоти́ти, ꙗ҆́кѡ ви́дѣ тѧ̀ ѻ҆́тче львѐ, ѡ҆блече́ннагѡ блгⷣтїю прест҃а́гѡ дх҃а, ᲂу҆жасе́сѧ и҆ тре́петенъ бы́сть и҆ ꙗ҆́кѡ пе́съ хꙋды́й ѿ ста́да твоегѡ̀ ѿбѣжѐ, си́лою гони́мый твоегѡ̀ къ бг҃ꙋ дерзнове́нїѧ, и҆́мже взыва́лъ є҆сѝ: А҆ллилꙋ́їа.

І҆́косъ ѳ҃

Лꙋка́вый совѣ́тъ сотворѝ де́монъ и҆ гоне́нїѧ на тѧ̀ воздви́же ѻ҆́тче львѐ, ты́ же бѣды̑ до́бльственнѣ всѧ̑ претерпѣ́лъ є҆сѝ, глаго́лѧ: а҆́ще въ ссы́лкꙋ пойдꙋ̀, а҆́ще во ѻ҆́гнь, а҆́зъ бꙋ́дꙋ то́йже леѡні́дъ, при́снѡ велича́ѧй бг҃а. Мы́ же мꙋ́жествꙋ твоемꙋ̀ дивѧ́щесѧ си́це вопїе́мъ:

Ра́дꙋйсѧ, несокрꙋши́мый а҆дама́нте: ра́дꙋйсѧ, небоѧвле́нный сто́лпе.

Ра́дꙋйсѧ, горо̀ несѣко́маѧ скорбѧ́ми: ра́дꙋйсѧ, высото̀ неземны́ѧ ра́дости.

Ра́дꙋйсѧ, пра́вды ра́ди гони́мый без̾ пра́вды: ра́дꙋйсѧ, лжесвидѣ́тели ѡ҆клевета́нный.

Ра́дꙋйсѧ, кленꙋ́щыѧ тѧ̀ бл҃гословлѧ́ѧй: ра́дꙋйсѧ, ѡ҆би́дѧщымъ тѧ̀ бл҃готворѧ́й.

Ра́дꙋйсѧ, неѕло́бїемъ твои́мъ хрⷭ҇тꙋ̀ подража́ѧй: ра́дꙋйсѧ, ѕло́бныхъ де́монѡвъ въ бе́зднꙋ вверга́ѧй.

Ра́дꙋйсѧ, смире́нный ле́въ ѿ ѳео́дѡра нарече́нный: ра́дꙋйсѧ, бл҃же́нства гони́мыхъ за бг҃а прича́стниче.

Ра́дꙋйсѧ, вы́шнѧгѡ і҆ерⷭ҇ли́ма досто́йный наслѣ́дниче.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ і҃

Вѣ́ренъ бг҃ꙋ пребы́лъ є҆сѝ ѻ҆́тче львѐ да́же до сме́рти, ѻ҆те́ческїѧ завѣ́ты со ѡ҆па́ствомъ хранѧ̀, а҆́ще и҆ ѡ҆клевета́нъ бы́лъ є҆сѝ ꙗ҆́кѡ невѣ́ренъ, но чи́стымъ и҆сповѣ́данїе твоѐ правосла́внымъ показа̀. Сегѡ̀ ра́ди ꙗ҆́кѡ и҆збра́нный сосꙋ́дъ цр҃кве рꙋ́сскїѧ ꙗ҆ви́лсѧ є҆сѝ и҆ гꙋ́сль бг҃ꙋ пою́щаѧ прⷭ҇нѡ: А҆ллилꙋ́їа.

І҆́косъ і҃

А҆гг҃лоподо́бное житїѐ твоѐ, ѻ҆́тче львѐ, вписа́ тѧ въ нб҃ожи́тели и҆ бг҃одарова́нное разсꙋжде́нїе твоѐ над̾ мно́гими людьмѝ поста́ви тѧ̀ въ рꙋководи́телѧ. Сегѡ̀ ра́ди ѿ мно́гихъ бѣ́дъ и҆ заблꙋжде́нїй и҆зба́вилъ є҆сѝ па́ствꙋ твою̀, любо́вїю тебѣ̀ пою́щꙋю:

Ра́дꙋйсѧ, па́стырю на́шъ до́брый: ра́дꙋйсѧ, слове́сныхъ пита́телю ѻ҆ве́цъ.

Ра́дꙋйсѧ, неꙋдобореши́мыхъ вопро́сѡвъ раз̾ѧсне́нїе: ра́дꙋйсѧ, неꙋдободержи́мыхъ страсте́й ᲂу҆смире́нїе.

Ра́дꙋйсѧ, ꙗ҆́кѡ пре́лести пꙋ́ты ꙗ҆́кѡ паꙋчи́нꙋ растерза́лъ є҆сѝ: ра́дꙋйсѧ, ꙗ҆́кѡ ра́зꙋма дꙋхо́внагѡ стезѝ сказа́лъ є҆сѝ.

Ра́дꙋйсѧ, смиренномꙋ́дрый врагѡ́въ примири́телю: ра́дꙋйсѧ, заматорѣ́вшїѧ горды́ни и҆скорени́телю.

Ра́дꙋйсѧ, забы́тыхъ грѣхѡ́въ ѡ҆бнарꙋже́нїе: ра́дꙋйсѧ, сокры́тыхъ тала́нтѡвъ ꙗ҆вле́нїе.

Ра́дꙋйсѧ, ꙗ҆́кѡ тобо́ю и҆сцѣлѧ́ютсѧ ꙗ҆́звы неисцѣ́льныѧ: ра́дꙋйсѧ, ꙗ҆́кѡ тобо́ю и҆зсꙋша́ютсѧ сле́зъ и҆сто́чницы.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ а҃і

А҆рома́тами мл҃твы твоеѧ̀ ᲂу҆мносерде́чныѧ ѡ҆бл҃гово́ни ча̑да твоѧ̑, тебѣ̀ пою́щїѧ, и҆ вложѝ въ на́ша сердца̀ мл҃твꙋ бг҃одарова́ннꙋю, да сла́вимъ гдⷭ҇а і҆и҃са хрⷭ҇та̀, непреста́ннѡ вопїю́ще: А҆ллилꙋ́їа.

І҆́косъ а҃і

Возже́глъ є҆сѝ въ дꙋшѝ твое́й свѣти́льникъ мл҃твы ᲂу҆́мныѧ, ѿ неѧ́же всѧ̑ бл҃га̑ѧ прїѧ́лъ є҆сѝ, ꙗ҆́кѡ дѣ́латель бы́лъ є҆сѝ смиренномꙋ́дрый. Тѣ́мже наста́ви и҆ на́съ на стезю̀ сїю̀ тѣ́снꙋю ѻ҆ба́че блгⷣти и҆спо́лненнꙋю, вопїю́щихъ тебѣ̀ сїѧ̀:

Ра́дꙋйсѧ, дѣ́лателю непреле́стный: ра́дꙋйсѧ, подви́жниче нелѣ́ностный.

Ра́дꙋйсѧ, свѣ́тлаѧ стезѐ ᲂу҆́мнагѡ дѣ́ланїѧ: ра́дꙋйсѧ, сла́дкаѧ стрꙋѐ серде́чнагѡ ᲂу҆миле́нїѧ.

Ра́дꙋйсѧ, сто́лпе, восходѧ́й терпѣ́нїемъ къ нб҃ꙋ: ра́дꙋйсѧ, же́зле, поража́ѧй де́монѡвъ въ бе́зднѣ.

Ра́дꙋйсѧ, чи́стагѡ се́рдца ѻ҆би́телище: ра́дꙋйсѧ, бл҃гі́ѧ со́вѣсти поко́ище.

Ра́дꙋйсѧ, бжⷭ҇твеннагѡ свѣ́та таи́нниче: ра́дꙋйсѧ, преле́стныѧ тмы̀ прогони́телю.

Ра́дꙋйсѧ, зри́тельныѧ мл҃твы достиже́нїе: ра́дꙋйсѧ, слѣпо́тствꙋющихъ серде́цъ просвѣще́нїе.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ в҃і

Лꙋча́ми сла́вы твоеѧ̀ ѡ҆блиста́й, ѻ҆́тче львѐ, пою́щихъ твоѧ̑ добропобѣ̑дныѧ по́двиги, ꙗ҆́же въ тѣ́лѣ на землѝ совершѝ, на́мъ же ѡ҆землени́вшимъ сво́й ᲂу҆́мъ жите́йскимъ попече́нїемъ пода́ждь ра́зꙋмъ дꙋхо́вный бг҃ꙋ непреста́ннѡ пѣ́ти: А҆ллилꙋ́їа.

І҆́косъ в҃і

А҆гг҃лолѣ́пнѡ сконча́лъ є҆сѝ пꙋ́ть земны́й, ѻ҆́тче львѐ, и҆ въ ра́йскїѧ кꙋ́щи пресели́лсѧ є҆сѝ присносла́вне, на землѝ ѡ҆ста́вль ꙗ҆́коже дрꙋгі́й ра́й ѻ҆́птинскїй ски́тъ, трꙋда́ми воздѣ́ланный твои́хъ подвигѡ́въ, въ не́мже плоды̀ дꙋхо́вныѧ вкꙋша́юще, ны́нѣ вопїе́мъ тѝ:

Ра́дꙋйсѧ, дре́во плодоносѧ́щее вожделѣ́нное безстра́стїе: ра́дꙋйсѧ, ни́во гобзꙋ́ющаѧ мно́жество спаса́ющихсѧ.

Ра́дꙋйсѧ, ке́дре въ є҆го́же вѣ́твехъ ᲂу҆кры́шасѧ нбⷭ҇нїи ѻ҆рлѝ: ра́дꙋйсѧ, кѷпарі́се бл҃гоꙋха́ѧй по́стничества а҆рѡма́ты.

Ра́дꙋйсѧ, лозо̀ точа́щаѧ вїно̀ ᲂу҆миле́нїѧ: ра́дꙋйсѧ, гро́зде и҆спо́лненный бжⷭ҇твеннагѡ ᲂу҆тѣше́нїѧ.

Ра́дꙋйсѧ, крі́не а҆́гг҃льскагѡ цѣломꙋ́дрїѧ: ра́дꙋйсѧ, медото́чивый ѧ҆зы́че ѻ҆те́ческихъ и҆зрече́нїй.

Ра́дꙋйсѧ, мѷровѡ́ннаѧ ᲂу҆стнѣ̀ и҆спо́лнь ᲂу҆тѣше́нїѧ: ра́дꙋйсѧ, миротво́рче преди́вный серде́цъ непокори́выхъ.

Ра́дꙋйсѧ, ꙗ҆́кѡ тобо́ю сла́дости дꙋхо́вныѧ наслажда́емсѧ: ра́дꙋйсѧ, ꙗ҆́кѡ тобо́ю го́речи страсте́й и҆збавлѧ́емсѧ.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ г҃і

Ѽ бг҃омꙋ́дре ѻ҆́тче львѐ! Ста́рчества ѻ҆́птинскагѡ бг҃овдохнове́нный вождю̀, и҆зба́ви на́съ тѧ̀ воспѣва́ющихъ ѿ плѣ́на грѣхо́внагѡ, да́ждь на́мъ незаблꙋ́дный пꙋ́ть, ведꙋ́щїй внꙋ́трь се́рдца, и҆дѣ́же є҆́сть црⷭ҇твїе бж҃їе, да вше́дше въ ѻ҆́ное, непреста́ннѡ пое́мъ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

Съ прпⷣбнымъ прпⷣбенъ бꙋ́деши и҆ со и҆збра́ннымъ и҆збра́нъ ꙗ҆ви́шисѧ, сїѐ помы́сливъ, ѻ҆́тче львѐ, мі́ра ѿре́клсѧ є҆сѝ и҆ ѡ҆брꙋчи́лсѧ и҆́ноческомꙋ зва́нїю. Таково́е произволе́нїе твоѐ похвалѧ́юще си́це тебѣ̀ вопїе́мъ:

Ра́дꙋйсѧ, хрⷭ҇то́въ послѣ́дователю и҆збра́нный: ра́дꙋйсѧ, ве́чери та́инственныѧ рачи́телю.

Ра́дꙋйсѧ, є҆ле́й ᲂу҆гото́вивый и҆зрѧ́днымъ добродѣ́ланїемъ: ра́дꙋйсѧ, свѣти́льникъ дꙋше́вный возже́гъ бг҃олю́бїемъ.

Ра́дꙋйсѧ, ꙗ҆́кѡ въ бра́чнꙋю ри́зꙋ ѡ҆бле́клсѧ є҆сѝ смире́нїемъ: ра́дꙋйсѧ, ꙗ҆́кѡ рꙋ́бища страсте́й совле́клсѧ є҆сѝ послꙋша́нїемъ.

Ра́дꙋйсѧ, ꙗ҆́кѡ мїрскꙋ́ю возненави́дѣлъ є҆сѝ сꙋетꙋ̀ безпло́днꙋю: ра́дꙋйсѧ, ꙗ҆́кѡ и҆́ноческꙋю возлюби́лъ є҆сѝ тишинꙋ̀ многопло́днꙋю.

Ра́дꙋйсѧ, ꙗ҆́кѡ а҆́гг҃льскагѡ дѣ́ланїѧ ꙗ҆ви́лсѧ є҆сѝ прича́стникъ: ра́дꙋйсѧ, ꙗ҆́кѡ а҆пⷭ҇льскагѡ преда́нїѧ ꙗ҆ви́лсѧ є҆сѝ храни́телю.

Ра́дꙋйсѧ, на бра́кѣ а҆́гнчемъ вкꙋси́вый трапе́зꙋ сладча́йшꙋю: ра́дꙋйсѧ, вїно́мъ ᲂу҆миле́нїѧ напои́вый дꙋ́шꙋ безстра́стнꙋю.

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Конда́къ а҃

И҆збра́нномꙋ нача́льникꙋ прпⷣбныхъ ѻ҆тцє́въ, бг҃омꙋ́дромꙋ львꙋ̀ ѻ҆́птинскомꙋ, ста́рчество въ ѻ҆́птиной пꙋ́стынѣ насади́вшемꙋ и҆ дїа́вола всеконе́чнѣ побѣди́вшемꙋ, похва́льнаѧ принесе́мъ пѣ́нїе, ты́ же ѿ бѣ́дъ и҆зба́ви на́съ, ѻ҆́тче прпⷣбне, любо́вїю тебѣ̀ зовꙋ́щихъ:

Ра́дꙋйсѧ, ѻ҆́тче львѐ, ста́рчества ѻ҆́птинскагѡ глави́зно.

Моли́твы

Ѽ пречтⷭ҇на́ѧ бг҃омꙋ́драѧ главо̀ и҆ собо́ра ста́рцєвъ ѻ҆́птинскихъ и҆зрѧ́дное и҆ перволѣ́пное ᲂу҆краше́нїе, бг҃опросвѣще́нне ѻ҆́тче львѐ! Тебѣ̀, ꙗ҆́кѡ ча̑да ѻ҆тцꙋ̀, дерза́емъ приноси́ти сїѐ а҆ка́ѳїстное пѣ́нїе, ты́ же не пренебрезѝ ма́лагѡ сегѡ̀ приноше́нїѧ, ꙗ҆́кѡ па́че до́лжни мы̀ не то́кмо пѣ́нїи, но дѣ̑лы тѧ̀ почестви́ти. Ты́ бо ѡ҆ста́вилъ є҆сѝ на́мъ бога́тство твоегѡ̀ житїѧ̀ бг҃оꙋго́днагѡ, въ не́мже ꙗ҆́кѡ въ зерца́лѣ зри́тсѧ ѻ҆́бразъ бг҃оше́ственныхъ ѻ҆тцє́въ въ по́двизѣ бг҃ꙋ ᲂу҆годи́вшихъ. А҆́ще и҆ не́мощны є҆́сть мы̀ тебѣ̀ подража́ти, но жела́нїемъ лꙋ́чшагѡ ѿ тебє̀ не ѿстꙋпа́емъ и҆ под̾ крила̀ мл҃твъ твои́хъ прибѣга́емъ и҆ ꙗ҆́кѡ неключи́мїи тебѣ̀ вопїе́мъ: и҆згонѝ ѿ на́съ всѧ́кое нерадѣ́нїе, и҆скоренѝ ѕлы́ѧ стра́сти въ сердца́хъ на́шихъ гнездѧ́щїѧсѧ, проженѝ бѣсѡ́въ на ны̀ непреста́ннѡ вою́ющихъ, да́ждь по́мощь бл҃года́тнꙋю, ꙗ҆́кѡ си́ленъ є҆́сть и҆ є҆щѐ при жи́зни твое́й бѣсѡ́въ прогонѧ́лъ є҆сѝ и҆ цѣли́лъ є҆сѝ всѧ́кꙋю болѣ́знь и҆ не́мощь таѧ́щꙋюсѧ. Си́це и҆ въ пре́днее вре́мѧ посѣща́й ны̀ дꙋ́хомъ твои́мъ и҆ жезло́мъ па́стырскїѧ мл҃твы твоеѧ̀ поразѝ волкѡ́въ мы́сленныхъ ста́до твоѐ и҆́щꙋщихъ расхи́тити. На́съ же ꙗ҆́кѡ па́стырь до́брый, прⷭ҇нѡ зовѝ свирѣ́лїю поꙋче́нїй твои́хъ въ црⷭ҇твїе бж҃їе и҆дѣ́же съ тобо́ю по преставле́нїи на́шемъ вкꙋ́пѣ да ѡ҆брѧ́щемсѧ, прославлѧ́ѧ ѻ҆ц҃а̀ и҆ сн҃а и҆ ст҃а́гѡ дх҃а въ безконе́чныѧ вѣ́ки. А҆ми́нь.