Кондак 1
Избра́нной от все́х родо́в Пречи́стой Де́ве Богоро́дице благода́рственная пе́ния вседу́шне прино́сим о дарова́нии на́м преди́вныя Ея́ ико́ны, мно́гая чудеса́ излива́ющия, неду́гов исцеле́ние, отра́ду и утеше́ние ве́рным подаю́щия. Ты́ же, всеблага́я Засту́пнице на́ша, от все́х напа́стей и бе́д свободи́ на́с, зову́щих Ти́:
Ра́дуйся, Ра́досте на́ша, изба́ви на́с от вся́кия ну́жды и печа́ли.
Икос 1
Арха́нгелов и А́нгелов ли́цы на Небеси́ и челове́ков мно́жество на земли́ сла́вят Тя́, Цари́цу все́х и Богоро́дицу, я́ко дарова́ла еси́ на́м ве́лию ра́дость и утеше́ние, о́браз Тво́й святы́й, пред ни́мже благогове́йно предстоя́ще, умиле́нно Тебе́ зове́м:
Ра́дуйся, Царе́м сла́вы от ве́ка предусмо́тренная; ра́дуйся, чрез ро́ды пра́ведников предочище́нная.
Ра́дуйся, Бо́гом Отце́м избра́нная в Ма́терь Сы́ну Своему́; ра́дуйся, благоуха́нный пло́де безпоро́чных Твои́х роди́телей.
Ра́дуйся, воспита́нная в земно́м дому́ Царя́ Небе́снаго; ра́дуйся, Ду́хом Пресвяты́м изде́тска освяще́нная.
Ра́дуйся, благове́стием Арха́нгела обра́дованная; ра́дуйся, Рабу́ Госпо́дню Себе́ именова́вшая.
Ра́дуйся, Преве́чнаго Сове́та соверше́ние; ра́дуйся, о́гнь Божества́ в Себе́ вмести́вшая.
Ра́дуйся, Мари́е, Ма́ти Христа́ Бо́га на́шего; ра́дуйся, Пита́теля жи́зни на́шея ро́ждшая.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 2
Ви́дяще честни́и Херуви́ми и сла́внии Серафи́ми Тя́, Богома́ти, во Ца́рствии Небе́снем предстоя́щую и моля́щуюся Бо́гу за ро́д христиа́нский, благогове́йно взира́ют на Тя́; мы́ же на земли́ покланя́ющеся Тебе́ в святе́й ико́не Твое́й, ра́достно взыва́ем ко Всевы́шнему: Аллилу́иа.
Икос 2
Проразуме́вше Ду́хом Бо́жиим апо́столи Христо́вы, ко́ль вожделе́нно бу́дет ве́рующим изображе́ние пречи́стаго ли́ка Твоего́, Богоро́дице, проси́ша ева́нгельских та́ин благове́стника боже́ственнаго Луку́, я́ко живопи́сца преди́вна, и то́й прия́т от Тебе́ благослове́ние написа́ти пе́рвую ико́ну Твою́, Влады́чице, о не́йже Сама́ рекла́ еси́: с си́м о́бразом благода́ть Моя́ и си́ла. Сего́ ра́ди со умиле́нием зове́м Ти́:
Ра́дуйся, написа́тися о́бразу Твоему́ благоволи́вшая; ра́дуйся, в зало́г любве́ Твоея́ на́м се́й оста́вльшая.
Ра́дуйся, от земли́ к Небе́сным возше́дшая; ра́дуйся, с высоты́ Небе́сныя земна́я назира́ющая.
Ра́дуйся, я́ко ико́на Твоя́ в Гефсима́нии пребыва́ше; ра́дуйся, я́ко мно́зи христиа́не та́мо к Тебе́ притека́ху.
Ра́дуйся, Тебе́ моли́вшимся утеше́ние дарова́вшая; ра́дуйся, и ны́не моле́ния на́ша слы́шащая.
Ра́дуйся, от ди́вныя ико́ны Твоея́ чудеса́ источа́ющая; ра́дуйся, чту́щим о́браз Тво́й ми́лости подаю́щая.
Ра́дуйся, благода́ть на на́с оби́льно излива́ющая; ра́дуйся, покро́вом Твои́м ве́рных покрыва́ющая.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 3
Си́ла благода́тная, дарова́нная первопи́санней ико́не Твое́й, та́кожде прояви́ся и во мно́зех подо́биих ея́, егда́ умно́жишася ико́ны Твоя́, да вся́ пре́данная ча́да Твоя́ и́мут и́х ки́йждо в дому́ свое́м, и прославля́ют Тя́, Пречи́стая, воспева́юще ро́ждшемуся от Тебе́ Спаси́телю ми́ра: Аллилу́иа.
Икос 3
Иму́щи ве́лию любо́вь к богодарова́нным Ти́ ча́дом Бо́жиим, благоволи́ла еси́, Всеми́лостивая, живописа́ти изображе́ния ли́ка Твоего́ пречи́стаго во утеше́ние и ра́дость все́м ве́рою и любо́вию покланя́ющимся Сы́ну Твоему́ и Бо́гу. Те́мже благода́рственныя пе́сни воспева́ем Ти́:
Ра́дуйся, от А́нгелов хвали́мая; ра́дуйся, от Серафи́мов воспева́емая.
Ра́дуйся, ве́ры правосла́вныя огражде́ние; ра́дуйся, ми́ру всему́ ро́ждшая спасе́ние.
Ра́дуйся, Твои́ми о́бразы вселе́нную просвети́вшая; ра́дуйся, и в се́й ико́не си́лу благода́тную яви́вшая.
Ра́дуйся, ико́ны Твоя́ на поклоне́ние моли́твенное на́м да́вшая; ра́дуйся, чрез ни́х благодея́ния ми́ру источа́ющая.
Ра́дуйся, ико́нами Твои́ми в до́мы ве́рных входя́щая; ра́дуйся, благослове́ние и ра́дость те́м принося́щая.
Ра́дуйся, подо́бий ико́ны сея́ списа́тели благослови́вшая; ра́дуйся, подо́бия сия́ мно́гими чудесы́ просла́вившая.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 4
Бу́рями жите́йскими обурева́еми и собла́зны грехо́вными одолева́еми, смире́ннии и гре́шнии раби́ Твои́, под ми́лостивый покро́в Тво́й прибега́юще, я́ко в ти́хое и безмо́лвное приста́нище, приле́жно мо́лим Тя́: проле́й живи́тельную благода́ть в ду́ши на́ша и умири́ жи́знь на́шу, да чи́стым умо́м и нескве́рными усты́ вопие́м при́сно Бо́гу: Аллилу́иа.
Икос 4
Слы́шав ца́рь гре́ческий Ле́в, я́ко чуде́с мно́жество и благодея́ния неисче́тная исхо́дят от ико́ны Богома́тере, я́же во Иерусали́ме, восхоте́ име́ти ю́ во стране́ свое́й, и егда́ принесе́н бы́сть о́браз пресла́вный в ца́рствующий гра́д, источи́ то́й ве́лия чудеса́. Лю́дие же, ви́девше такову́ю ми́лость Бо́жию, ра́достно взыва́ху ко Благослове́нней:
Ра́дуйся, свята́го о́браза прише́ствием гра́д Тво́й осени́вшая; ра́дуйся, ми́лости Твоя́ на бли́жних и да́льних простира́ющая.
Ра́дуйся, всенепоро́чная Де́во, христиа́ном все́м всеми́лостивая Ма́ти; ра́дуйся, ро́ду челове́ческому всемо́щная Засту́пнице.
Ра́дуйся, две́ри милосе́рдия Бо́жия Твои́м хода́тайством отверза́ющая; ра́дуйся, моли́твами Твои́ми ве́сь ми́р спаса́ющая.
Ра́дуйся, о вся́кой души́ христиа́нской проше́ния прие́млющая; ра́дуйся, моли́твенныя гла́сы отвсю́ду во вселе́нней слы́шащая.
Ра́дуйся, христиа́н покро́вом Твои́м огражда́ющая; ра́дуйся, рабы́ Твоя́ от вся́кия ско́рби избавля́ющая.
Ра́дуйся, во благо́е жела́ний на́ших ди́вное исполне́ние; ра́дуйся, Тобо́ю бо и́мамы ве́лие к Бо́гу дерзнове́ние.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 5
Боготе́чная звезда́ яви́ся ико́на Твоя́, Влады́чице, сия́нием пресла́вных чуде́с зе́млю озаря́ющая, вся́ бо ча́да Твоя́, искупле́нная Кро́вию Сы́на Твоего́, прибега́ют к Тебе́ в ну́ждах и печа́лех. О́вии у́бо мо́лят Тя́ утоли́ти ско́рби и́х душе́вныя и теле́сныя; ини́и же на путе́х свои́х благослове́ние и благопоспеше́ние прия́ти от Тебе́ ча́ют; друзи́и ми́ра семе́йнаго, согла́сия и любве́ дарова́ти и́м про́сят; угнета́емии же от злы́х челове́к защи́ты и покро́ва у Тебе́ и́щут; и о́ных ча́яний исполне́ние прие́млюще, ра́достно вопию́т Бо́гу: Аллилу́иа.
Икос 5
Ви́девше лю́дие страны́ гре́ческия, я́ко ико́на Твоя́ не то́кмо пучи́на чуде́с и неисчерпа́емый исто́чник исцеле́ний и́м бы́сть, но и всемо́щное одоле́ние на супоста́ты, мно́гажды изноша́ху ю́ пред полки́ вра́жиими, и ти́и бя́ху побежда́еми; вси́ же правосла́внии ра́дости исполня́хуся, сла́вяще и воспева́юще Тя́:
Ра́дуйся, взбра́нная Воево́до, враги́ Христо́вы побежда́ющая; ра́дуйся, си́лою Бо́жиею гони́телей ве́ры посрамля́ющая.
Ра́дуйся, от во́инств Небе́сных почита́ние прие́млющая; ра́дуйся, благоуха́нный са́де, веселя́й сердца́ ве́рных.
Ра́дуйся, лука́вых духо́в Прогони́тельнице; ра́дуйся, от наше́ствия иноплеме́нных Изба́вительнице.
Ра́дуйся, стено́ю неруши́мою лю́ди Твоя́ огражда́ющая; ра́дуйся, лю́бящия Тя́ от вся́ких бе́д спаса́ющая.
Ра́дуйся, во бране́х побе́ду те́м подаю́щая; ра́дуйся, стра́х и тре́пет на неве́рныя наводя́щая.
Ра́дуйся, от разжже́нных стре́л лука́ваго на́с защища́ющая; ра́дуйся, одержи́мых от духо́в нечи́стых исцеля́ющая.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 6
Пропове́дует ми́р ве́сь ми́лости, от ико́ны Твоея́ излива́емыя, Влады́чице, Ты́ бо Царьгра́д от наше́ствия ски́фов спасла́ еси́ и во́инству христолюби́вому побе́ду на сопроти́вныя дарова́ла еси́. Те́мже мо́лим Тя́: укрепи́ во бране́х во́ины, сла́вящия Тя́ и пою́щия Сы́ну Твоему́ и Бо́гу: Аллилу́иа.
Икос 6
Возсия́ пречу́дная ико́на Бо́жия Ма́тере все́й земли́ Ру́сской, егда́ Влади́мир, вели́кий кня́зь, со во́инством свои́м прии́де в зе́млю Таври́ческую, оба́че благода́тию Бо́жиею просвеще́нный, прия́т ве́ру правосла́вную во гра́де Корсу́не. Тогда́ даде́ся ему́ в благослове́ние ико́на пречу́дная Иерусали́мская я́ко да́р безце́нен, с не́юже прии́де кня́зь в сто́льный гра́д сво́й Ки́ев. Лю́дие же ру́сския, све́том Христо́вым просвеща́еми, со умиле́нием взыва́ху Богоро́дице:
Ра́дуйся, Цари́це Небе́сная, честне́йшая Херуви́м; ра́дуйся, сла́внейшая без сравне́ния Серафи́м.
Ра́дуйся, го́рняго ми́ра украше́ние; ра́дуйся, до́льняго ми́ра заступле́ние.
Ра́дуйся, ико́ною Твое́ю на Ру́сь прише́дшая; ра́дуйся, страны́ на́шея покро́ве и Засту́пнице.
Ра́дуйся, ди́вная зна́мения ико́ною Твое́ю содева́ющая; ра́дуйся, чудесы́ мно́гими о́браз Тво́й просла́вившая.
Ра́дуйся, све́том Боже́ственным ду́ши на́ша просвеща́ющая; ра́дуйся, ко Христу́ Бо́гу вся́ ны́ приводя́щая.
Ра́дуйся, почита́нию святы́х ико́н на́с науча́ющая; ра́дуйся, две́ри ра́йския ве́рным отверза́ющая.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 7
Хотя́ привести́ ко Христу́ вся́ лю́ди в держа́ве свое́й и вся́ концы́ земли́ Ру́сския просвети́ти све́том и́стиннаго богове́дения, благове́рный Влади́мир кня́зь повеле́ пренести́ святу́ю ико́ну Иерусали́мскую из гра́да Ки́ева в Вели́кий Но́вград, и бе́ та́мо ико́на сия́ ле́та мно́га, до́ндеже принесе́на бы́сть в сто́льный гра́д Москву́, да источа́ет чудеса́ все́й Руси́ правосла́вней, да вси́ лю́дие ея́, ми́лостей Цари́цы Небе́сныя испо́лненнии, хвале́бную пе́снь Бо́гу воспева́ют: Аллилу́иа.
Икос 7
Но́вая и ди́вная чудеса́ явля́еши, Ма́ти Бо́жия, умно́живши чудотво́рныя ико́ны Твоя́ во оте́чествии на́шем, и́хже я́ко зве́зды небе́сныя разсе́яла еси́ по всему́ лицу́ земли́ Ру́сския, подаю́щи чрез ни́х вели́кая и неисчисли́мая благодея́ния лю́дем ея́. Те́мже благогове́юще пред вели́чеством сла́вы Твоея́, предстоя́ще пред пречи́стым о́бразом Твои́м, Преблагослове́нная, вопие́м Ти́:
Ра́дуйся, страны́ Росси́йския Защи́тнице; ра́дуйся, земли́ Ру́сския огражде́ние.
Ра́дуйся, правосла́вную Ру́сь возлюби́вшая; ра́дуйся, чудотво́рными ико́нами сию́ обогати́вшая.
Ра́дуйся, ико́ну Твою́ Иерусали́мскую в насле́дие на́м дарова́вшая; ра́дуйся, а́ки о́блаком, благода́тию все́х покрыва́ющая.
Ра́дуйся, Твоея́ бо ико́ны принесе́нием вся́ко ме́сто освяща́ется; ра́дуйся, я́ко иде́же о́браз Тво́й, та́мо лю́дие обновля́ются.
Ра́дуйся, чуде́с луча́ми страну́ Росси́йскую све́тло озари́вшая; ра́дуйся, ду́ши ве́рных сия́нием любве́ Твоея́ ди́вно просвети́вшая.
Ра́дуйся, земна́го оте́чества на́шего благонаде́жное утвержде́ние; ра́дуйся, ко Оте́честву Небе́сному нело́жное превожде́ние.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 8
Стра́нно е́сть уму́ челове́ческому, но ра́достно се́рдцу ве́рою ви́дети, ка́ко от о́браза Твоего́ пречи́стаго чудотво́рное де́йство явля́ется: долгонеду́жнии и разсла́бленнии исцеля́ются, ду́си тьмы́ прогоня́ются, в ско́рбех и печа́лех су́щим утеше́ние подае́тся. Вси́ же ви́девшии чудеса́ сия́ вку́пе с исцеле́нными ра́достно воспева́ют всеще́дрому Бо́гу: Аллилу́иа.
Икос 8
Ве́сь ми́р любо́вию Твое́ю объе́млющи, Пречи́стая, и ко все́м сострада́ние иму́щи, благоволи́ла еси́ просла́вити ико́ну Твою́ Иерусали́мскую во дни́ мо́ра, егда́ стра́хом ве́лиим сердца́ люде́й одержи́ми бя́ху, те́мже в покая́нии приходи́вшии и со слеза́ми моли́вшиися Тебе́ во хра́ме и в до́мех пред ико́ною Твое́ю, лю́тыя сме́рти избега́ху и ра́достно вопия́ху Тебе́ такова́я:
Ра́дуйся, си́лою Сы́на Твоего́ чи́н естества́ побежда́ющая; ра́дуйся, пред милосе́рдым Бо́гом те́пле о на́с хода́тайствующая.
Ра́дуйся, я́ко Тобо́ю серде́чное сокруше́ние на́м да́руется; ра́дуйся, я́ко Тобо́ю ка́ющимся гре́шником проще́ние подае́тся.
Ра́дуйся, от все́х неду́гов врачу́ющая; ра́дуйся, из глубины́ поги́бели спаса́ющая.
Ра́дуйся, ра́достию духо́вною на́с ди́вно насыща́ющая; ра́дуйся, утеше́ние Небе́сное ро́ду христиа́нскому низпосыла́ющая.
Ра́дуйся, пред Сы́ном Твои́м за ны́ хода́тайствующая; ра́дуйся, моли́твами Твои́ми от пра́веднаго гне́ва Его́ на́с свобожда́ющая.
Ра́дуйся, все́м су́щим в беда́х ско́рое избавле́ние; ра́дуйся, все́м подвиза́ющимся от земли́ на Не́бо восхожде́ние.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 9
Вся́кое естество́ А́нгельское похва́льная прино́сит Тебе́, Влады́чице, челове́ческий же ро́д сла́вит Тя́ и почита́ет святу́ю Твою́ ико́ну, сию́ бо в покро́в и заступле́ние дарова́ла еси́ на́м. Мы́ же, пречи́стому Твоему́ о́бразу предстоя́ще, мо́лим Тя́, о Ма́ти всеблага́я: сохрани́ ми́р и тишину́ в стране́ на́шей, изба́ви на́с от волне́ний и сму́т, от междоусо́бныя бра́ни и смертоно́сныя я́звы, да вся́ ча́да Твоя́ в ра́дости воспева́ют Спаси́телю и Бо́гу на́шему: Аллилу́иа.
Икос 9
Вети́и челове́честии недоумева́ют позна́ти та́йну служе́ния Твоего́ ро́ду христиа́нскому, ниже́ мо́гут изъясни́ти си́лу благода́ти, ико́не Твое́й дарова́нную, и́бо принесе́нием ея́ благодея́ния источа́ются: иде́же зно́й, та́мо дожди́ оби́льни пролива́ются, а иде́же па́губное безве́дрие, та́мо со́лнце возсиява́ет и благорастворе́ние возду́хов водворя́ется. Лю́дие же, Тобо́ю поми́лованнии, велича́ют Тя́, Пречи́стая, та́ко:
Ра́дуйся, трапе́зо свята́я, Хле́бом жи́зни на́с пита́ющая; ра́дуйся, от гла́да душе́внаго же и теле́снаго ве́рных соблюда́ющая.
Ра́дуйся, от наше́ствия иноплеме́нных на́с спаса́ющая; ра́дуйся, от междоусо́бныя бра́ни и́стинным ми́ром охраня́ющая.
Ра́дуйся, от огня́ паля́щаго росо́ю моли́тв Твои́х на́с огражда́ющая; ра́дуйся, дожди́ благовре́менны и благорастворе́ние возду́хов на́м низпосыла́ющая.
Ра́дуйся, принесе́нием ико́ны Твоея́ от сме́ртныя я́звы на́с исцеля́ющая; ра́дуйся, от все́х бе́д любо́вию Твое́ю на́с заступа́ющая.
Ра́дуйся, от меча́ смертоно́снаго си́лою Твое́ю на́с избавля́ющая; ра́дуйся, от пото́па грехо́внаго на́с возводя́щая.
Ра́дуйся, са́де земли́ обетова́нныя; ра́дуйся, все́й вселе́нней кре́пкая Храни́тельнице.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 10
Спаси́тельное приста́нище дарова́ся на́м свята́я и ди́вная ико́на Твоя́, Богоро́дице Де́во, с не́ю бо и доны́не си́ла Твоя́ благода́тная пребыва́ет, ве́ру в на́с утвержда́ет и на пу́ть покая́ния наставля́ет. Сего́ ра́ди предстоя́ще пред не́ю, мо́лим Тя́, Пречи́стая, помози́ на́м безпоро́чно проити́ пу́ть жи́зни сея́ вре́менныя, соблюди́ на́с в чистоте́ и свя́тости и приведи́ на́с в Ца́рство Сы́на Твоего́, да и мы́, Тобо́ю спасе́ннии, возмо́жем та́мо со А́нгелы и ли́ки святы́х ве́чно воспева́ти хвале́бную пе́снь Бо́гу: Аллилу́иа.
Икос 10
Стена́ еси́ и прибе́жище все́м челове́ком, Влады́чице, к Твоему́ о́бразу чудотво́рному притека́ющим. Те́мже мо́лим Тя́: огради́ на́с от искуше́ний и бе́д, от ополче́ний враго́в на́ших ви́димых и неви́димых заступи́, покры́й, соблюди́ от вся́каго зла́ все́х пою́щих Ти́ с любо́вию такова́я:
Ра́дуйся, к све́ту и́стины на́с возводя́щая; ра́дуйся, в до́брых де́лех утвержде́ние и по́моще.
Ра́дуйся, жела́ния на́ша ко бла́гу направля́ющая; ра́дуйся, на стезя́х жи́зни ми́лостивно на́с охраня́ющая.
Ра́дуйся, от ко́зней бесо́вских неви́димо на́с огражда́ющая; ра́дуйся, злы́х челове́к кова́рство прему́дро разруша́ющая.
Ра́дуйся, заблужда́ющихся до́брое вразумле́ние; ра́дуйся, от огня́ гее́нскаго лю́бящих Тя́ сохране́ние.
Ра́дуйся, моли́тве серде́чней на́с науча́ющая; ра́дуйся, вся́кия ско́рби рабы́ Твоя́ избавля́ющая.
Ра́дуйся, ти́хое приста́нище к Тебе́ прибега́ющих; ра́дуйся, благода́тию о́браза Твоего́ на́с осеня́ющая.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 11
Пе́ние хвале́бное немо́лчно воспева́ем пред пречи́стым о́бразом Твои́м, Богоро́дице, я́ко моли́твами Твои́ми к Сы́ну Твоему́ и Бо́гу на́шему гра́ды и ве́си от злы́х обстоя́ний сохраня́еши, ми́р и изоби́лие и вся́ блага́я в жи́зни все́м чту́щим Тя́ подае́ши, вся́к во́зраст на пу́ть спасе́ния наставля́еши и все́х призыва́еши воспева́ти милосе́рдному Человеколю́бцу Бо́гу: Аллилу́иа.
Икос 11
Светоза́рную ико́ну Твою́, о Ма́ти всеблага́я, зри́м в боже́ственных хра́мех и до́мех земли́ на́шея, та́ бо све́тлыми луча́ми чуде́с просвеща́ет на́с, помраче́нных мгло́ю грехо́вною, и прогоня́ет вся́кое вра́жие де́йство си́лою Бо́жиею. Сего́ ра́ди и ста́рии, и млади́и ра́дуются, иму́ще таково́е утеше́ние, и благода́рственно взыва́ют:
Ра́дуйся, Ма́ти Све́та, ду́ши ве́рных просвеща́ющаго; ра́дуйся, пресве́тлое благода́ти позна́ние.
Ра́дуйся, младе́нцев воспита́ние и благода́тное хране́ние; ра́дуйся, ю́ности Охрани́тельнице и Наста́внице.
Ра́дуйся, супру́гом любо́вь и согла́сие подава́ющая; ра́дуйся, отра́ду и утеше́ние в сердца́ ста́рым пролива́ющая.
Ра́дуйся, чудесы́ Твои́ми умы́ на́ша к го́рнему возвыша́ющая; ра́дуйся, хра́мы и до́мы на́ша ико́ною Твое́ю ди́вно освяща́ющая.
Ра́дуйся, и́щущих Христо́ва просвеще́ния све́том богове́дения озаря́ющая; ра́дуйся, све́том ра́дости ду́ши на́ша ободря́ющая.
Ра́дуйся, держа́вы на́шея све́тлое просвеще́ние; ра́дуйся, скорбя́щих ра́досте и пла́чущих ве́лие утеше́ние.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 12
Благода́ть ве́лия свы́ше дарова́ся святе́й ико́не Твое́й, преблагослове́нная Ма́ти Бо́жия, е́же убо́гих назира́ти, боля́щих исцеля́ти, бе́дствующим помога́ти, скорбя́щих утеша́ти и все́х заблу́ждших на пу́ть и́стины обраща́ти. Те́мже вси́ тружда́ющиися и обремене́ннии, иму́ще Тебе́ благу́ю Ма́терь и чрез Тебе́ неизглаго́ланныя ми́лости прие́млюще, уми́льно вопию́т Бо́гу: Аллилу́иа.
Икос 12
Пою́ще чудеса́ Твоя́, Богороди́тельнице, и́миже явля́еши на́м мно́гую любо́вь Твою́ и милосе́рдие, восхваля́ем чудоде́йственную си́лу Твою́, всеми́лостивая Влады́чице на́ша: умири́ жи́знь на́шу, отжени́ от на́с вся́каго врага́ и супоста́та, простри́ на́м ру́ку по́мощи и приими́ на́с в Ца́рство Небе́сное, да всегда́ моли́твами Твои́ми в любви́ Твое́й пребыва́юще, со умиле́нием серде́чным зове́м Ти́:
Ра́дуйся, наде́ждо ве́чнаго спасе́ния; ра́дуйся, ны́нешняго ско́рбнаго ве́ка утеше́ние.
Ра́дуйся, святы́ни незави́стный исто́чниче; ра́дуйся, ро́да челове́ческаго возвыше́ние.
Ра́дуйся, неистощи́мое сокро́вище даро́в духо́вных; ра́дуйся, неча́янную ра́дость ве́рным да́рующая.
Ра́дуйся, в ско́рбех и боле́знех долготерпе́нию на́с науча́ющая; ра́дуйся, стопы́ на́ша на пу́ть за́поведей Госпо́дних направля́ющая.
Ра́дуйся, Всеми́лостивая, в напа́стех ско́рая Засту́пнице; ра́дуйся, слеза́ми Твои́ми грехи́ на́ша омыва́ющая.
Ра́дуйся, и́скренне ка́ющимся спасе́ние; ра́дуйся, си́м да́рующая душе́вное утеше́ние.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 13
О всепе́тая Ма́ти, Пречи́стая Госпоже́ Де́во Богоро́дице, приими́ сие́ ма́лое моле́ние на́ше и всеси́льным Твои́м предста́тельством сохрани́ на́с от вся́ких бе́д и напа́стей, и ве́чныя изми́ му́ки все́х пред свято́ю ико́ною Твое́ю с ве́рою и любо́вию покланя́ющихся и о Тебе́ благода́рно пою́щих Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
Арха́нгелов и А́нгелов ли́цы на Небеси́ и челове́ков мно́жество на земли́ сла́вят Тя́, Цари́цу все́х и Богоро́дицу, я́ко дарова́ла еси́ на́м ве́лию ра́дость и утеше́ние, о́браз Тво́й святы́й, пред ни́мже благогове́йно предстоя́ще, умиле́нно Тебе́ зове́м:
Ра́дуйся, Царе́м сла́вы от ве́ка предусмо́тренная; ра́дуйся, чрез ро́ды пра́ведников предочище́нная.
Ра́дуйся, Бо́гом Отце́м избра́нная в Ма́терь Сы́ну Своему́; ра́дуйся, благоуха́нный пло́де безпоро́чных Твои́х роди́телей.
Ра́дуйся, воспита́нная в земно́м дому́ Царя́ Небе́снаго; ра́дуйся, Ду́хом Пресвяты́м изде́тска освяще́нная.
Ра́дуйся, благове́стием Арха́нгела обра́дованная; ра́дуйся, Рабу́ Госпо́дню Себе́ именова́вшая.
Ра́дуйся, Преве́чнаго Сове́та соверше́ние; ра́дуйся, о́гнь Божества́ в Себе́ вмести́вшая.
Ра́дуйся, Мари́е, Ма́ти Христа́ Бо́га на́шего; ра́дуйся, Пита́теля жи́зни на́шея ро́ждшая.
Ра́дуйся, Ра́досте на́ша, изба́ви на́с от вся́кия ну́жды и печа́ли.
Кондак 1
Избра́нной от все́х родо́в Пречи́стой Де́ве Богоро́дице благода́рственная пе́ния вседу́шне прино́сим о дарова́нии на́м преди́вныя Ея́ ико́ны, мно́гая чудеса́ излива́ющия, неду́гов исцеле́ние, отра́ду и утеше́ние ве́рным подаю́щия. Ты́ же, всеблага́я Засту́пнице на́ша, от все́х напа́стей и бе́д свободи́ на́с, зову́щих Ти́:
Ра́дуйся, Ра́досте на́ша, изба́ви на́с от вся́кия ну́жды и печа́ли.
Молитвы
О пресвята́я и преблагослове́нная Ма́ти Го́спода и Спа́са на́шего Иису́са Христа́, Пречи́стая Присноде́во Богоро́дице Мари́е, держа́вная Покрови́тельнице и Засту́пнице на́ша! Припа́даем и покланя́емся Тебе́ пред свято́ю и чудотво́рною Иерусали́мскою ико́ною Твое́ю и смире́нно мо́лимся Тебе́, благо́й и милосе́рдой: вонми́ гла́су моли́тв на́ших, от души́ приноси́мых Ти́, ви́ждь ско́рби и искуше́ния на́ша, и я́ко вои́стину любвеоби́льная Ма́ти, потщи́ся помощи́ на́м, безпомо́щным, уны́лым, во мно́гия грехи́ впа́дающим и при́сно прогневля́ющим Го́спода и Созда́теля на́шего, Его́же умоли́, Влады́чице, да не погуби́т на́с со беззако́нии на́шими, но ра́ди Твоего́ предста́тельства да яви́т на́м человеколю́бную Свою́ ми́лость. Испроси́ на́м, Всеблага́я, здра́вие душе́вное и теле́сное, и́стинное покая́ние во гресе́х, преспе́яние в доброде́телех христиа́нских благода́тное, ми́рное и благоче́стное житие́, земли́ плодоно́сие, возду́ха благорастворе́ние, дожди́ благовре́менны и благослове́ние свы́ше на вся́ блага́я дела́ и начина́ния на́ша. Гра́д се́й [или́: ве́сь сию́, или́: оби́тель сию́] сохрани́, и соблюди́ все́х в ми́ре и благоустрое́нии, и споспеши́ все́м нести́ и́го Христо́во благо́е и ле́гкое в терпе́нии и смире́нии, во спасе́ние ду́ш на́ших, огражда́ющи на́с Ма́терним покро́вом Твои́м от искуше́ний диа́вольских и вся́каго зла́.
О Цари́це всепе́тая, Ма́ти Бо́жия всеблага́я, простри́ богоно́снеи ру́це Твои́ на умоле́ние возлю́бленному Сы́ну Твоему́, Го́споду на́шему Иису́су Христу́, и прие́мши сомоли́твенники к Нему́ вку́пе с Тобо́ю на ико́не Твое́й изображе́нныя пра́ведныя роди́тели Твоя́ Иоаки́ма и А́нну, с ни́ми умоли́ Его́ поми́ловати на́с и изба́вити от поги́бели ве́чныя. И я́коже иногда́ в ско́рби вели́цей пред се́ю ико́ною Твое́ю моли́вшемуся Ни́лу утеше́ние и обетова́ние благо́е дарова́ла еси́, та́ко и ны́не на́с, смире́нных и гре́шных, моля́щихся услы́ши и яви́ на́м вели́кия щедро́ты Твоя́: боля́щия исцели́, скорбя́щия уте́ши, бе́дствующия от бе́д изба́ви, путеше́ствующия и в мо́ри пла́вающия невреди́мы сохрани́, и вся́ ны́ сподо́би благоче́стно житие́ на́ше земно́е сконча́ти, Святы́х Та́ин прича́стными благу́ю христиа́нскую кончи́ну получи́ти и Небе́сное Ца́рствие унасле́довати, да во све́те и ра́дости святы́х пое́м и велича́ем милосе́рдие Твое́, и ве́чно сла́вим ро́ждшагося от Тебе́ Го́спода на́шего Иису́са Христа́, Ему́же со безнача́льным Его́ Отце́м и Пресвяты́м Ду́хом подоба́ет вся́кая сла́ва, че́сть и поклоне́ние, во ве́ки веко́в. Ами́нь.
Пресвята́я Госпоже́, Влады́чице Богоро́дице, упова́ние все́х притека́ющих к Тебе́, Засту́пнице печа́льных, прибе́жище отча́янных, вдо́в и сиро́т Пита́тельнице! Услы́ши и поми́луй ны́, гре́шныя и недосто́йныя рабы́ Твоя́, со умиле́нием ко пречи́стому Твоему́ о́бразу припа́дающия; умоли́, милосе́рдая Влады́чице, Сы́на Твоего́ и Го́спода на́шего Иису́са Христа́, да отврати́т от на́с пра́ведный гне́в Сво́й, да прости́т грехи́ и беззако́ния на́ша, я́ко да сподо́бимся благоче́стно сконча́ти житие́ на́ше в покая́нии и получи́ти ми́лость Его́ со все́ми избра́нными Его́, я́ко благослове́на и препросла́влена еси́ во ве́ки веко́в. Ами́нь.
Конда́къ а҃
И҆збра́нной ѿ всѣ́хъ родѡ́въ пречⷭ҇той дв҃ѣ бцⷣѣ бл҃года́рствєннаѧ пѣ̑нїѧ вседꙋ́шнѣ прино́симъ ѡ҆ дарова́нїи на́мъ преди́вныѧ є҆ѧ̀ і҆кѡ́ны, мнѡ́гаѧ чꙋдеса̀ и҆злива́ющїѧ, недꙋ́гѡвъ и҆сцѣле́нїе, ѿра́дꙋ и҆ ᲂу҆тѣше́нїе вѣ̑рнымъ подаю́щїѧ. Ты́ же, всебл҃га́ѧ застꙋ́пнице на́ша, ѿ всѣ́хъ напа́стей и҆ бѣ́дъ свободѝ на́съ, зовꙋ́щихъ тѝ:
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
І҆́косъ а҃
А҆рха́гг҃лѡвъ и҆ а҆́гг҃лѡвъ ли́цы на нб҃сѝ и҆ человѣ́кѡвъ мно́жество на землѝ сла́вѧтъ тѧ̀, цр҃и́цꙋ всѣ́хъ и҆ бцⷣꙋ, ꙗ҆́кѡ дарова́ла є҆сѝ на́мъ ве́лїю ра́дость и҆ ᲂу҆тѣше́нїе, ѻ҆́бразъ тво́й ст҃ы́й, пред̾ ни́мже бл҃гоговѣ́йнѡ предстоѧ́ще, ᲂу҆миле́ннѡ тебѣ̀ зове́мъ:
Ра́дꙋйсѧ, цр҃е́мъ сла́вы ѿ вѣ́ка пред̾ꙋсмо́треннаѧ: ра́дꙋйсѧ, чрез̾ ро́ды првⷣникѡвъ пред̾ѡчи́щеннаѧ.
Ра́дꙋйсѧ, бг҃омъ ѻ҆ц҃е́мъ и҆збра́ннаѧ въ мт҃рь сн҃ꙋ своемꙋ̀: ра́дꙋйсѧ, бл҃гоꙋха́нный пло́де безпоро́чныхъ твои́хъ роди́телей.
Ра́дꙋйсѧ, воспита́ннаѧ въ земно́мъ домꙋ̀ цр҃ѧ̀ нбⷭ҇нагѡ: ра́дꙋйсѧ, дх҃омъ прест҃ы́мъ и҆здѣ́тска ѡ҆сщ҃е́ннаѧ.
Ра́дꙋйсѧ, бл҃говѣ́стїемъ а҆рха́гг҃ла ѡ҆бра́дованнаѧ: ра́дꙋйсѧ, рабꙋ̀ гдⷭ҇ню себѐ и҆менова́вшаѧ.
Ра́дꙋйсѧ, превѣ́чнагѡ совѣ́та соверше́нїе: ра́дꙋйсѧ, ѻ҆́гнь бжⷭ҇тва̀ въ себѐ вмѣсти́вшаѧ.
Ра́дꙋйсѧ, мр҃і́е, мт҃и хрⷭ҇та̀ бг҃а на́шегѡ: ра́дꙋйсѧ, пита́телѧ жи́зни на́шеѧ ро́ждшаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ в҃
Ви́дѧще чтⷭ҇ні́и херꙋві́ми и҆ сла́внїи серафі́ми тѧ̀, бг҃омт҃и, во црⷭ҇твїи нбⷭ҇нѣмъ предстоѧ́щꙋю и҆ молѧ́щꙋюсѧ бг҃ꙋ за ро́дъ хрⷭ҇тїа́нскїй, бл҃гоговѣ́йнѡ взира́ютъ на тѧ̀: мы́ же на землѝ покланѧ́ющесѧ тебѣ̀ въ ст҃ѣ́й і҆кѡ́нѣ твое́й, ра́достнѡ взыва́емъ ко всевы́шнемꙋ: А҆ллилꙋ́їа.
І҆́косъ в҃
Проразꙋмѣ́вше дх҃омъ бж҃їимъ а҆пⷭ҇ли хрⷭ҇тѡ́вы, ко́ль вожделѣ́нно бꙋ́детъ вѣ́рꙋющымъ и҆з̾ѡбраже́нїе пречⷭ҇тагѡ ли́ка твоегѡ̀, бцⷣе, проси́ша є҆ѵⷢ҇льскихъ та̑инъ бл҃говѣ́стника бжⷭ҇твеннаго лꙋкꙋ̀, ꙗ҆́кѡ живопи́сца преди́вна, и҆ то́й прїѧ́тъ ѿ тебє̀ бл҃гослове́нїе написа́ти пе́рвꙋю і҆кѡ́нꙋ твою̀, влⷣчце, ѡ҆ не́йже сама̀ рекла̀ є҆сѝ: съ си́мъ ѻ҆́бразомъ бл҃года́ть моѧ̀ и҆ си́ла. Сегѡ̀ ра́ди со ᲂу҆миле́нїемъ зове́мъ тѝ:
Ра́дꙋйсѧ, написа́тисѧ ѻ҆́бразꙋ твоемꙋ̀ бл҃говоли́вшаѧ: ра́дꙋйсѧ, въ зало́гъ любвѐ твоеѧ̀ на́мъ се́й ѡ҆ста́вльшаѧ.
Ра́дꙋйсѧ, ѿ землѝ къ нбⷭ҇нымъ возше́дшаѧ: ра́дꙋйсѧ, съ высоты̀ нбⷭ҇ныѧ земна̑ѧ назира́ющаѧ.
Ра́дꙋйсѧ, ꙗ҆́кѡ і҆кѡ́на твоѧ̀ въ геѳсима́нїи пребыва́ше: ра́дꙋйсѧ, ꙗ҆́кѡ мно́зи хрⷭ҇тїа́не та́мѡ къ тебѣ̀ притека́хꙋ.
Ра́дꙋйсѧ, тебѣ̀ моли́вшымсѧ ᲂу҆тѣше́нїе дарова́вшаѧ: ра́дꙋйсѧ, и҆ ны́нѣ молє́нїѧ на̑ша слы́шащаѧ.
Ра́дꙋйсѧ, ѿ ди́вныѧ і҆кѡ́ны твоеѧ̀ чꙋдеса̀ и҆сточа́ющаѧ: ра́дꙋйсѧ, чтꙋ́щымъ ѻ҆́бразъ тво́й млⷭ҇ти подаю́щаѧ.
Ра́дꙋйсѧ, бл҃года́ть на на́съ ѻ҆би́льнѡ и҆злива́ющаѧ: ра́дꙋйсѧ, покро́вомъ твои́мъ вѣ́рныхъ покрыва́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ г҃
Си́ла бл҃года́тнаѧ, дарова́ннаѧ первопи́саннѣй і҆кѡ́нѣ твое́й, та́кожде проѧви́сѧ и҆ во мно́зѣхъ подо́бїихъ є҆ѧ̀, є҆гда̀ ᲂу҆мно́жишасѧ і҆кѡ̑ны твоѧ̑, да всѧ̑ прє́даннаѧ ча̑да твоѧ̑ и҆́мꙋтъ и҆̀хъ кі́йждо въ домꙋ̀ свое́мъ, и҆ прославлѧ́ютъ тѧ̀, пречтⷭ҇аѧ, воспѣва́юще ро́ждшемꙋсѧ ѿ тебє̀ сп҃си́телю мі́ра: А҆ллилꙋ́їа.
І҆́косъ г҃
И҆мꙋ́щи ве́лїю любо́вь къ бг҃одарова̑ннымъ тѝ ча́дѡмъ бж҃їимъ, бл҃говоли́ла є҆сѝ, всемлⷭ҇тиваѧ, живописа́ти и҆з̾ѡбражє́нїѧ ли́ка твоегѡ̀ пречⷭ҇тагѡ во ᲂу҆тѣше́нїе и҆ ра́дость всѣ̑мъ вѣ́рою и҆ любо́вїю покланѧ́ющымсѧ сн҃ꙋ твоемꙋ̀ и҆ бг҃ꙋ. Тѣ́мже бл҃года́рствєнныѧ пѣ̑сни воспѣва́емъ тѝ:
Ра́дꙋйсѧ, ѿ а҆́гг҃лѡвъ хвали́маѧ: ра́дꙋйсѧ, ѿ серафі́мѡвъ воспѣва́емаѧ.
Ра́дꙋйсѧ, вѣ́ры правосла́вныѧ ѡ҆гражде́нїе: ра́дꙋйсѧ, мі́рꙋ всемꙋ̀ ро́ждшаѧ сп҃се́нїе.
Ра́дꙋйсѧ, твои́ми ѻ҆́бразы вселе́ннꙋю просвѣти́вшаѧ: ра́дꙋйсѧ, и҆ въ се́й і҆кѡ́нѣ си́лꙋ бл҃года́тнꙋю ꙗ҆ви́вшаѧ.
Ра́дꙋйсѧ, і҆кѡ̑ны твоѧ̑ на поклоне́нїе мл҃твенное на́мъ да́вшаѧ: ра́дꙋйсѧ, чрез̾ ни́хъ бл҃годѣѧ̑нїѧ мі́рꙋ и҆сточа́ющаѧ.
Ра́дꙋйсѧ, і҆кѡ́нами твои́ми въ до́мы вѣ́рныхъ входѧ́щаѧ: ра́дꙋйсѧ, бл҃гослове́нїе и҆ ра́дость тѣ̑мъ приносѧ́щаѧ.
Ра́дꙋйсѧ, подо́бїй і҆кѡ́ны сеѧ̀ списа́тєли бл҃гослови́вшаѧ: ра́дꙋйсѧ, подѡ́бїѧ сїѧ̑ мно́гими чꙋдесы̀ просла́вившаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ д҃
Бꙋ́рѧми жите́йскими ѡ҆бꙋрева́еми и҆ собла̑зны грѣхо́вными ѡ҆долѣва́еми, смире́ннїи и҆ грѣ́шнїи рабѝ твоѝ, под̾ млⷭ҇тивый покро́въ тво́й прибѣга́юще, ꙗ҆́кѡ въ ти́хое и҆ безмо́лвное приста́нище, прилѣ́жнѡ мо́лимъ тѧ̀: проле́й живи́тельнꙋю бл҃года́ть въ дꙋ́шы на́шѧ и҆ ᲂу҆мирѝ жи́знь на́шꙋ, да чи́стымъ ᲂу҆мо́мъ и҆ нескве́рными ᲂу҆сты̀ вопїе́мъ при́снѡ бг҃ꙋ: А҆ллилꙋ́їа.
І҆́косъ д҃
Слы́шавъ ца́рь гре́ческїй ле́въ, ꙗ҆́кѡ чꙋде́съ мно́жество и҆ бл҃годѣѧ̑нїѧ неисчє́тнаѧ и҆схо́дѧтъ ѿ і҆кѡ́ны бг҃омт҃ре, ꙗ҆́же во і҆ерⷭ҇ли́мѣ, восхотѣ̀ и҆мѣ́ти ю҆̀ во странѣ̀ свое́й, и҆ є҆гда̀ принесе́нъ бы́сть ѻ҆́бразъ пресла́вный въ ца́рствꙋющїй гра́дъ, и҆сточѝ то́й вє́лїѧ чꙋдеса̀. Лю́дїе же, ви́дѣвше таковꙋ́ю млⷭ҇ть бж҃їю, ра́достнѡ взыва́хꙋ ко бл҃гослове́ннѣй:
Ра́дꙋйсѧ, ст҃а́гѡ ѻ҆́браза прише́ствїемъ гра́дъ тво́й ѡ҆сѣни́вшаѧ: ра́дꙋйсѧ, млⷭ҇ти твоѧ̑ на бли́жнихъ и҆ да́льнихъ простира́ющаѧ.
Ра́дꙋйсѧ, всенепоро́чнаѧ дв҃о, хрⷭ҇тїа́нѡмъ всѣ̑мъ всемлⷭ҇тиваѧ мт҃и: ра́дꙋйсѧ, ро́дꙋ человѣ́ческомꙋ всемо́щнаѧ застꙋ́пнице.
Ра́дꙋйсѧ, двє́ри млⷭ҇рдїѧ бж҃їѧ твои́мъ хода́тайствомъ ѿверза́ющаѧ: ра́дꙋйсѧ, мл҃твами твои́ми ве́сь мі́ръ сп҃са́ющаѧ.
Ра́дꙋйсѧ, ѡ҆ всѧ́кой дꙋшѝ хрⷭ҇тїа́нской прошє́нїѧ прїе́млющаѧ: ра́дꙋйсѧ, мл҃твєнныѧ гла́сы ѿвсю́дꙋ во вселе́ннѣй слы́шащаѧ.
Ра́дꙋйсѧ, хрⷭ҇тїа́нъ покро́вомъ твои́мъ ѡ҆гражда́ющаѧ: ра́дꙋйсѧ, рабы̑ твоѧ̑ ѿ всѧ́кїѧ ско́рби и҆збавлѧ́ющаѧ.
Ра́дꙋйсѧ, во бл҃го́е жела́нїй на́шихъ ди́вное и҆сполне́нїе: ра́дꙋйсѧ, тобо́ю бо и҆́мамы ве́лїе къ бг҃ꙋ дерзнове́нїе.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ є҃
Бг҃оте́чнаѧ ѕвѣзда̀ ꙗ҆ви́сѧ і҆кѡ́на твоѧ̀, влⷣчце, сїѧ́нїемъ пресла́вныхъ чꙋде́съ зе́млю ѡ҆зарѧ́ющаѧ, всѧ̑ бо ча̑да твоѧ̑, и҆скꙋплє́ннаѧ кро́вїю сн҃а твоегѡ̀, прибѣга́ютъ къ тебѣ̀ въ нꙋ́ждахъ и҆ печа́лехъ. Ѻ҆́вїи ᲂу҆́бѡ мо́лѧтъ тѧ̀ ᲂу҆толи́ти скѡ́рби и҆́хъ дꙋшє́вныѧ и҆ тѣлє́сныѧ: и҆ні́и же на пꙋте́хъ свои́хъ бл҃гослове́нїе и҆ бл҃гопоспѣше́нїе прїѧ́ти ѿ тебє̀ ча́ютъ: дрꙋзі́и ми́ра семе́йнагѡ, согла́сїѧ и҆ любвѐ дарова́ти и҆̀мъ про́сѧтъ: ᲂу҆гнета́емїи же ѿ ѕлы́хъ человѣ̑къ защи́ты и҆ покро́ва ᲂу҆ тебє̀ и҆́щꙋтъ: и҆ ѻ҆́ныхъ ча́ѧнїй и҆сполне́нїе прїе́млюще, ра́достнѡ вопїю́тъ бг҃ꙋ: А҆ллилꙋ́їа.
І҆́косъ є҃
Ви́дѣвше лю́дїе страны̀ гре́ческїѧ, ꙗ҆́кѡ і҆кѡ́на твоѧ̀ не то́кмѡ пꙋчи́на чꙋде́съ и҆ неисчерпа́емый и҆сто́чникъ и҆сцѣле́нїй и҆̀мъ бы́сть, но и҆ всемо́щное ѡ҆долѣ́нїе на сꙋпоста́ты, мно́гажды и҆зноша́хꙋ ю҆̀ пред̾ полки̑ вра́жїими, и҆ ті́и бѧ́хꙋ побѣжда́еми: вси́ же правосла́внїи
ра́дости и҆сполнѧ́хꙋсѧ, сла́вѧще и҆ воспѣва́юще тѧ̀:
Ра́дꙋйсѧ, взбра́ннаѧ воево́до, врагѝ хрⷭ҇тѡ́вы побѣжда́ющаѧ: ра́дꙋйсѧ, си́лою бж҃їею гони́телей вѣ́ры посрамлѧ́ющаѧ.
Ра́дꙋйсѧ, ѿ во́инствъ нбⷭ҇ныхъ почита́нїе прїе́млющаѧ: ра́дꙋйсѧ, бл҃гоꙋха́нный са́де, веселѧ́й сердца̀ вѣ́рныхъ.
Ра́дꙋйсѧ, лꙋка́выхъ дꙋхѡ́въ прогони́тельнице: ра́дꙋйсѧ, ѿ наше́ствїѧ и҆ноплеме́нныхъ и҆зба́вительнице.
Ра́дꙋйсѧ, стѣно́ю нерꙋши́мою лю́ди твоѧ̑ ѡ҆гражда́ющаѧ: ра́дꙋйсѧ, лю́бѧщыѧ тѧ̀ ѿ всѧ́кихъ бѣ́дъ сп҃са́ющаѧ.
Ра́дꙋйсѧ, во бране́хъ побѣ́дꙋ тѣ̑мъ подаю́щаѧ: ра́дꙋйсѧ, стра́хъ и҆ тре́петъ на невѣ̑рныѧ наводѧ́щаѧ.
Ра́дꙋйсѧ, ѿ разжже́нныхъ стрѣ́лъ лꙋка́вагѡ на́съ защища́ющаѧ: ра́дꙋйсѧ, ѡ҆держи́мыхъ ѿ дꙋхѡ́въ нечи́стыхъ и҆сцѣлѧ́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ ѕ҃
Проповѣ́дꙋетъ мі́ръ ве́сь млⷭ҇ти, ѿ і҆кѡ́ны твоеѧ̀ и҆злива́ємыѧ, влⷣчце, ты́ бо царьгра́дъ ѿ наше́ствїѧ скѵ́ѳѡвъ спасла̀ є҆сѝ и҆ во́инствꙋ хрⷭ҇толюби́вомꙋ побѣ́дꙋ на сопроти̑вныѧ дарова́ла є҆сѝ. Тѣ́мже мо́лимъ тѧ̀: ᲂу҆крѣпѝ во бране́хъ во́ины, сла́вѧщыѧ тѧ̀ и҆ пою́щыѧ сн҃ꙋ твоемꙋ̀ и҆ бг҃ꙋ: А҆ллилꙋ́їа.
І҆́косъ ѕ҃
Возсїѧ̀ пречꙋ́днаѧ і҆кѡ́на бж҃їѧ мт҃ре все́й землѝ рꙋ́сской, є҆гда̀ влади́мїръ, вели́кїй кнѧ́зь, со во́инствомъ свои́мъ прїи́де въ зе́млю таѵри́ческꙋю, ѻ҆ба́че бл҃года́тїю бж҃їею просвѣще́нный, прїѧ́тъ вѣ́рꙋ правосла́внꙋю во гра́дѣ корсꙋ́нѣ. Тогда̀ даде́сѧ є҆мꙋ̀ въ бл҃гослове́нїе і҆кѡ́на пречꙋ́днаѧ і҆ерⷭ҇ли́мскаѧ ꙗ҆́кѡ да́ръ безцѣ́ненъ, съ не́юже прїи́де кнѧ́зь въ сто́льный гра́дъ сво́й кі́евъ. Лю́дїе же рꙋ́сскїѧ, свѣ́томъ хрⷭ҇то́вымъ просвѣща́еми, со ᲂу҆миле́нїемъ взыва́хꙋ бцⷣѣ:
Ра́дꙋйсѧ, цр҃и́це нбⷭ҇наѧ, чтⷭ҇нѣ́йшаѧ херꙋві̑мъ: ра́дꙋйсѧ, сла́внѣйшаѧ без̾ сравне́нїѧ серафі̑мъ.
Ра́дꙋйсѧ, го́рнѧгѡ мі́ра ᲂу҆краше́нїе: ра́дꙋйсѧ, до́льнѧгѡ мі́ра застꙋпле́нїе.
Ра́дꙋйсѧ, і҆кѡ́ною твое́ю на рꙋ́сь прише́дшаѧ: ра́дꙋйсѧ, страны̀ на́шеѧ покро́ве и҆ застꙋ́пнице.
Ра́дꙋйсѧ, ди̑внаѧ зна́мєнїѧ і҆кѡ́ною твое́ю содѣва́ющаѧ: ра́дꙋйсѧ, чꙋдесы̀ мно́гими ѻ҆́бразъ тво́й просла́вившаѧ.
Ра́дꙋйсѧ, свѣ́томъ бжⷭ҇твеннымъ дꙋ́шы на́шѧ просвѣща́ющаѧ: ра́дꙋйсѧ, ко хрⷭ҇тꙋ̀ бг҃ꙋ всѧ̑ ны̀ приводѧ́щаѧ.
Ра́дꙋйсѧ, почита́нїю ст҃ы́хъ і҆кѡ́нъ на́съ наꙋча́ющаѧ: ра́дꙋйсѧ, двє́ри ра̑йскїѧ вѣ̑рнымъ ѿверза́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ з҃
Хотѧ̀ привестѝ ко хрⷭ҇тꙋ̀ всѧ̑ лю́ди въ держа́вѣ свое́й и҆ всѧ̑ концы̀ землѝ рꙋ́сскїѧ просвѣти́ти свѣ́томъ и҆́стиннагѡ бг҃овѣ́дѣнїѧ, бл҃говѣ́рный влади́мїръ кнѧ́зь повелѣ̀ пренестѝ ст҃ꙋ́ю і҆кѡ́нꙋ і҆ерⷭ҇ли́мскꙋю и҆з̾ гра́да кі́ева въ вели́кїй но́вградъ, и҆ бѣ̀ та́мѡ і҆кѡ́на сїѧ̀ лѣ̑та мнѡ́га, до́ндеже принесе́на бы́сть въ сто́льный гра́дъ москвꙋ̀, да и҆сточа́етъ чꙋдеса̀ все́й рꙋсѝ правосла́внѣй, да всѝ лю́дїе є҆ѧ̀, млⷭ҇тей цр҃и́цы нбⷭ҇ныѧ и҆спо́лненнїи, хвале́бнꙋю пѣ́снь бг҃ꙋ воспѣва́ютъ: А҆ллилꙋ́їа.
І҆́косъ з҃
Нѡ́ваѧ и҆ ди̑внаѧ чꙋдеса̀ ꙗ҆влѧ́еши, мт҃и бж҃їѧ, ᲂу҆мно́живши чꙋдотвѡ́рныѧ і҆кѡ̑ны твоѧ̑ во ѻ҆те́чествїи на́шемъ, и҆̀хже ꙗ҆́кѡ ѕвѣ́зды небє́сныѧ разсѣ́ѧла є҆сѝ по всемꙋ̀ лицꙋ̀ землѝ рꙋ́сскїѧ, подаю́щи чрез̾ ни́хъ вели̑каѧ и҆ неисчисли̑маѧ бл҃годѣѧ̑нїѧ лю́демъ є҆ѧ̀. Тѣ́мже бл҃гоговѣ́юще пред̾ вели́чествомъ сла́вы твоеѧ̀, предстоѧ́ще пред̾ пречⷭ҇тымъ ѻ҆́бразомъ твои́мъ, пребл҃гослове́ннаѧ, вопїе́мъ тѝ:
Ра́дꙋйсѧ, страны̀ рѡссі́йскїѧ защи́тнице: ра́дꙋйсѧ, землѝ рꙋ́сскїѧ ѡ҆гражде́нїе.
Ра́дꙋйсѧ, правосла́внꙋю рꙋ́сь возлюби́вшаѧ: ра́дꙋйсѧ, чꙋдотво́рными і҆кѡ́нами сїю̀ ѡ҆богати́вшаѧ.
Ра́дꙋйсѧ, і҆кѡ́нꙋ твою̀ і҆ерⷭ҇ли́мскꙋю въ наслѣ́дїе на́мъ дарова́вшаѧ: ра́дꙋйсѧ, а҆́ки ѻ҆́блакомъ, бл҃года́тїю всѣ́хъ покрыва́ющаѧ.
Ра́дꙋйсѧ, твоеѧ́ бо і҆кѡ́ны принесе́нїемъ всѧ́ко мѣ́сто ѡ҆сщ҃а́етсѧ: ра́дꙋйсѧ, ꙗ҆́кѡ и҆дѣ́же ѻ҆́бразъ тво́й, та́мѡ лю́дїе ѡ҆бновлѧ́ютсѧ.
Ра́дꙋйсѧ, чꙋде́съ лꙋча́ми странꙋ̀ рѡссі́йскꙋю свѣ́тлѡ ѡ҆зари́вшаѧ: ра́дꙋйсѧ, дꙋ́шы вѣ́рныхъ сїѧ́нїемъ любвѐ твоеѧ̀ ди́внѡ просвѣти́вшаѧ.
Ра́дꙋйсѧ, земна́гѡ ѻ҆те́чества на́шегѡ бл҃гонаде́жное ᲂу҆твержде́нїе: ра́дꙋйсѧ, ко ѻ҆ч҃ествꙋ нбⷭ҇номꙋ нело́жное превожде́нїе.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ и҃
Стра́нно є҆́сть ᲂу҆мꙋ̀ человѣ́ческомꙋ, но ра́достно се́рдцꙋ вѣ́рою ви́дѣти, ка́кѡ ѿ ѻ҆́браза твоегѡ̀ пречⷭ҇тагѡ чꙋдотво́рное дѣ́йство ꙗ҆влѧ́етсѧ: долгонедꙋ́жнїи и҆ разсла́бленнїи и҆сцѣлѧ́ютсѧ, дꙋ́си тьмы̀ прогонѧ́ютсѧ, въ ско́рбехъ и҆ печа́лехъ сꙋ́щымъ ᲂу҆тѣше́нїе подае́тсѧ. Вси́ же ви́дѣвшїи чꙋдеса̀ сїѧ̑ вкꙋ́пѣ съ и҆сцѣле́нными ра́достнѡ воспѣва́ютъ всеще́дромꙋ бг҃ꙋ: А҆ллилꙋ́їа.
І҆́косъ и҃
Ве́сь мі́ръ любо́вїю твое́ю ѡ҆б̾е́млющи, пречⷭ҇таѧ, и҆ ко всѣ̑мъ сострада́нїе и҆мꙋ́щи, бл҃говоли́ла є҆сѝ просла́вити і҆кѡ́нꙋ твою̀ і҆ерⷭ҇ли́мскꙋю во дни̑ мо́ра, є҆гда̀ стра́хомъ ве́лїимъ сердца̀ люде́й ѡ҆держи́ми бѧ́хꙋ, тѣ́мже въ покаѧ́нїи приходи́вшїи и҆ со слеза́ми моли́вшїисѧ тебѣ̀ во хра́мѣ и҆ въ до́мѣхъ пред̾ і҆кѡ́ною твое́ю, лю́тыѧ сме́рти и҆збѣга́хꙋ и҆ ра́достнѡ вопїѧ́хꙋ тебѣ̀ такова̑ѧ:
Ра́дꙋйсѧ, си́лою сн҃а твоегѡ̀ чи́нъ є҆стества̀ побѣжда́ющаѧ: ра́дꙋйсѧ, пред̾ млⷭ҇рдымъ бг҃омъ те́плѣ ѡ҆ на́съ хода́тайствꙋющаѧ.
Ра́дꙋйсѧ, ꙗ҆́кѡ тобо́ю серде́чное сокрꙋше́нїе на́мъ да́рꙋетсѧ: ра́дꙋйсѧ, ꙗ҆́кѡ тобо́ю ка́ющымсѧ грѣ́шникѡмъ проще́нїе подае́тсѧ.
Ра́дꙋйсѧ, ѿ всѣ́хъ недꙋ́гѡвъ врачꙋ́ющаѧ: ра́дꙋйсѧ, и҆з̾ глꙋбины̀ поги́бели сп҃са́ющаѧ.
Ра́дꙋйсѧ, ра́достїю дꙋхо́вною на́съ ди́внѡ насыща́ющаѧ: ра́дꙋйсѧ, ᲂу҆тѣше́нїе нбⷭ҇ное ро́дꙋ хрⷭ҇тїа́нскомꙋ низпосыла́ющаѧ.
Ра́дꙋйсѧ, пред̾ сн҃омъ твои́мъ за ны̀ хода́тайствꙋющаѧ: ра́дꙋйсѧ, мл҃твами твои́ми ѿ првⷣнагѡ гнѣ́ва є҆гѡ̀ на́съ свобожда́ющаѧ.
Ра́дꙋйсѧ, всѣ̑мъ сꙋ́щымъ въ бѣда́хъ ско́рое и҆збавле́нїе: ра́дꙋйсѧ, всѣ̑мъ подвиза́ющымсѧ ѿ землѝ на нб҃о восхожде́нїе.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ ѳ҃
Всѧ́кое є҆стество̀ а҆́гг҃льское похва̑льнаѧ прино́ситъ тебѣ̀, влⷣчце, человѣ́ческїй же ро́дъ сла́витъ тѧ̀ и҆ почита́етъ ст҃ꙋ́ю твою̀ і҆кѡ́нꙋ, сїю́ бо въ покро́въ и҆ застꙋпле́нїе дарова́ла є҆сѝ на́мъ. Мы́ же пречтⷭ҇омꙋ твоемꙋ̀ ѻ҆́бразꙋ предстоѧ́ще, мо́лимъ тѧ̀, ѽ мт҃и всебл҃га́ѧ: сохранѝ ми́ръ и҆ тишинꙋ̀ въ странѣ̀ на́шей, и҆зба́ви на́съ ѿ волне́нїй и҆ смꙋ́тъ, ѿ междоꙋсо́бныѧ бра́ни и҆ смертоно́сныѧ ꙗ҆́звы, да всѧ̑ ча̑да твоѧ̑ въ ра́дости воспѣва́ютъ сп҃си́телю и҆ бг҃ꙋ на́шемꙋ: А҆ллилꙋ́їа.
І҆́косъ ѳ҃
Вѣті̑и человѣ́честїи недоꙋмѣва́ютъ позна́ти та́йнꙋ слꙋже́нїѧ твоегѡ̀ ро́дꙋ хрⷭ҇тїа́нскомꙋ, нижѐ мо́гꙋтъ и҆з̾ѧсни́ти си́лꙋ бл҃года́ти, і҆кѡ́нѣ твое́й дарова́ннꙋю, и҆́бо принесе́нїемъ є҆ѧ̀ бл҃годѣѧ̑нїѧ и҆сточа́ютсѧ: и҆дѣ́же зно́й, та́мѡ дожди̑ ѻ҆би́льни пролива́ютсѧ, а҆ и҆дѣ́же па́гꙋбное безве́дрїе, та́мѡ со́лнце возсїѧва́етъ и҆ бл҃горастворе́нїе воздꙋ́хѡвъ водворѧ́етсѧ. Лю́дїе же, тобо́ю поми́лованнїи, велича́ютъ тѧ̀, пречтⷭ҇аѧ, та́кѡ:
Ра́дꙋйсѧ, трапе́зо ст҃а́ѧ, хлѣ́бомъ жи́зни на́съ пита́ющаѧ: ра́дꙋйсѧ, ѿ гла́да дꙋше́внагѡ же и҆ тѣле́снагѡ вѣ́рныхъ соблюда́ющаѧ.
Ра́дꙋйсѧ, ѿ наше́ствїѧ и҆ноплеме́нныхъ на́съ спаса́ющаѧ: ра́дꙋйсѧ, ѿ междоꙋсо́бныѧ бра́ни и҆́стиннымъ ми́ромъ ѡ҆хранѧ́ющаѧ.
Ра́дꙋйсѧ, ѿ ѻ҆гнѧ̀ палѧ́щагѡ росо́ю мл҃твъ твои́хъ на́съ ѡ҆гражда́ющаѧ: ра́дꙋйсѧ, дожди̑ бл҃говре́мєнны и҆ бл҃горастворе́нїе воздꙋ́хѡвъ на́мъ низпосыла́ющаѧ.
Ра́дꙋйсѧ, принесе́нїемъ і҆кѡ́ны твоеѧ̀ ѿ сме́ртныѧ ꙗ҆́звы на́съ и҆сцѣлѧ́ющаѧ: ра́дꙋйсѧ, ѿ всѣ́хъ бѣ́дъ любо́вїю твое́ю на́съ застꙋпа́ющаѧ.
Ра́дꙋйсѧ, ѿ меча̀ смертоно́снагѡ си́лою твое́ю на́съ и҆збавлѧ́ющаѧ: ра́дꙋйсѧ, ѿ пото́па грѣхо́внагѡ на́съ возводѧ́щаѧ.
Ра́дꙋйсѧ, са́де землѝ ѡ҆бѣтова́нныѧ: ра́дꙋйсѧ, все́й вселе́ннѣй крѣ́пкаѧ храни́тельнице.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ і҃
Сп҃си́тельное приста́нище дарова́сѧ на́мъ ст҃а́ѧ и҆ ди́внаѧ і҆кѡ́на твоѧ̀, бцⷣе дв҃о, съ не́ю бо и҆ доны́нѣ си́ла твоѧ̀ бл҃года́тнаѧ пребыва́етъ, вѣ́рꙋ въ на́съ ᲂу҆твержда́етъ и҆ на пꙋ́ть покаѧ́нїѧ наставлѧ́етъ. Сегѡ̀ ра́ди предстоѧ́ще пред̾ не́ю, мо́лимъ тѧ̀, пречⷭ҇таѧ, помозѝ на́мъ безпоро́чнѡ проитѝ пꙋ́ть жи́зни сеѧ̀ вре́менныѧ, соблюдѝ на́съ въ чистотѣ̀ и҆ ст҃ости и҆ приведѝ на́съ въ црⷭ҇тво сн҃а твоегѡ̀, да и҆ мы̀, тобо́ю сп҃се́ннїи, возмо́жемъ та́мѡ со а҆́гг҃лы и҆ ли̑ки ст҃ы́хъ вѣ́чнѡ воспѣва́ти хвале́бнꙋю пѣ́снь бг҃ꙋ: А҆ллилꙋ́їа.
І҆́косъ і҃
Стѣна̀ є҆сѝ и҆ прибѣ́жище всѣ̑мъ человѣ́кѡмъ, влⷣчце, къ твоемꙋ̀ ѻ҆́бразꙋ чꙋдотво́рномꙋ притека́ющымъ. Тѣ́мже мо́лимъ тѧ̀: ѡ҆градѝ на́съ ѿ и҆скꙋше́нїй и҆ бѣ́дъ, ѿ ѡ҆полче́нїй врагѡ́въ на́шихъ ви́димыхъ и҆ неви́димыхъ застꙋпѝ, покры́й, соблюдѝ ѿ всѧ́кагѡ ѕла̀ всѣ́хъ пою́щихъ тѝ съ любо́вїю такова̑ѧ:
Ра́дꙋйсѧ, къ свѣ́тꙋ и҆́стины на́съ возводѧ́щаѧ: ра́дꙋйсѧ, въ до́брыхъ дѣ́лѣхъ ᲂу҆твержде́нїе и҆ по́моще.
Ра́дꙋйсѧ, жела̑нїѧ на̑ша ко бл҃гꙋ направлѧ́ющаѧ: ра́дꙋйсѧ, на стезѧ́хъ жи́зни млⷭ҇тивнѡ на́съ ѡ҆хранѧ́ющаѧ.
Ра́дꙋйсѧ, ѿ ко́зней бѣсо́вскихъ неви́димѡ на́съ ѡ҆гражда́ющаѧ: ра́дꙋйсѧ, ѕлы́хъ человѣ̑къ кова́рство премꙋ́дрѡ разрꙋша́ющаѧ.
Ра́дꙋйсѧ, заблꙋжда́ющихсѧ до́брое вразꙋмле́нїе: ра́дꙋйсѧ, ѿ ѻ҆гнѧ̀ гее́нскагѡ лю́бѧщихъ тѧ̀ сохране́нїе.
Ра́дꙋйсѧ, мл҃твѣ серде́чнѣй на́съ наꙋча́ющаѧ: ра́дꙋйсѧ, всѧ́кїѧ ско́рби рабы̑ твоѧ̑ и҆збавлѧ́ющаѧ.
Ра́дꙋйсѧ, ти́хое приста́нище къ тебѣ̀ прибѣга́ющихъ: ра́дꙋйсѧ, бл҃года́тїю ѻ҆́браза твоегѡ̀ на́съ ѡ҆сѣнѧ́ющаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ а҃і
Пѣ́нїе хвале́бное немо́лчнѡ воспѣва́емъ пред̾ пречтⷭ҇ымъ ѻ҆́бразомъ твои́мъ, бцⷣе, ꙗ҆́кѡ мл҃твами твои́ми къ сн҃ꙋ твоемꙋ̀ и҆ бг҃ꙋ на́шемꙋ гра́ды и҆ вє́си ѿ ѕлы́хъ ѡ҆бстоѧ́нїй сохранѧ́еши, ми́ръ и҆ и҆з̾ѻби́лїе и҆ всѧ̑ бл҃га̑ѧ въ жи́зни всѣ̑мъ чтꙋ́щымъ тѧ̀ подае́ши, всѧ́къ во́зрастъ на пꙋ́ть сп҃се́нїѧ наставлѧ́еши и҆ всѣ́хъ призыва́еши воспѣва́ти млⷭ҇рдномꙋ чл҃вѣколю́бцꙋ бг҃ꙋ: А҆ллилꙋ́їа.
І҆́косъ а҃і
Свѣтоза́рнꙋю і҆кѡ́нꙋ твою̀, ѽ мт҃и всебл҃га́ѧ, зри́мъ въ бжⷭ҇твенныхъ хра́мѣхъ и҆ до́мѣхъ землѝ на́шеѧ, та́ бо свѣ́тлыми лꙋча́ми чꙋде́съ просвѣща́етъ на́съ, помраче́нныхъ мгло́ю грѣхо́вною, и҆ прогонѧ́етъ всѧ́кое вра́жїе дѣ́йство си́лою бж҃їею. Сегѡ̀ ра́ди и҆ ста́рїи, и҆ младі́и ра́дꙋютсѧ, и҆мꙋ́ще таково́е ᲂу҆тѣше́нїе, и҆ бл҃года́рственнѡ взыва́ютъ:
Ра́дꙋйсѧ, мт҃и свѣ́та, дꙋ́шы вѣ́рныхъ просвѣща́ющагѡ: ра́дꙋйсѧ, пресвѣ́тлое бл҃года́ти позна́нїе.
Ра́дꙋйсѧ, младе́нцєвъ воспита́нїе и҆ бл҃года́тное хране́нїе: ра́дꙋйсѧ, ю҆́ности ѡ҆храни́тельнице и҆ наста́внице.
Ра́дꙋйсѧ, сꙋпрꙋ́гѡмъ любо́вь и҆ согла́сїе подава́ющаѧ: ра́дꙋйсѧ, ѿра́дꙋ и҆ ᲂу҆тѣше́нїе въ сердца̀ ста̑рымъ пролива́ющаѧ.
Ра́дꙋйсѧ, чꙋдесы̀ твои́ми ᲂу҆мы̀ на́шѧ къ го́рнемꙋ возвыша́ющаѧ: ра́дꙋйсѧ, хра́мы и҆ до́мы на́шѧ і҆кѡ́ною твое́ю ди́внѡ ѡ҆сщ҃а́ющаѧ.
Ра́дꙋйсѧ, и҆́щꙋщихъ хрⷭ҇то́ва просвѣще́нїѧ свѣ́томъ бг҃овѣ́дѣнїѧ ѡ҆зарѧ́ющаѧ: ра́дꙋйсѧ, свѣ́томъ ра́дости дꙋ́шы на́шѧ ѡ҆бодрѧ́ющаѧ.
Ра́дꙋйсѧ, держа́вы на́шеѧ свѣ́тлое просвѣще́нїе: ра́дꙋйсѧ, скорбѧ́щихъ ра́досте и҆ пла́чꙋщихъ ве́лїе ᲂу҆тѣше́нїе.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ в҃і
Бл҃года́ть ве́лїѧ свы́ше дарова́сѧ ст҃ѣ́й і҆кѡ́нѣ твое́й, пребл҃гослове́ннаѧ мт҃и бж҃їѧ, є҆́же ᲂу҆бо́гихъ назира́ти, болѧ́щихъ и҆сцѣлѧ́ти, бѣ́дствꙋющымъ помога́ти, скорбѧ́щихъ ᲂу҆тѣша́ти и҆ всѣ́хъ заблꙋ́ждшихъ на пꙋ́ть и҆́стины ѡ҆браща́ти. Тѣ́мже всѝ трꙋжда́ющїисѧ и҆ ѡ҆бремене́ннїи, и҆мꙋ́ще тебѐ бл҃гꙋ́ю мт҃рь и҆ чрез̾ тебѐ неизглагѡ́ланныѧ млⷭ҇ти прїе́млюще, ᲂу҆ми́льнѡ вопїю́тъ бг҃ꙋ: А҆ллилꙋ́їа.
І҆́косъ в҃і
Пою́ще чꙋдеса̀ твоѧ̑, бг҃ороди́тельнице, и҆́миже ꙗ҆влѧ́еши на́мъ мно́гꙋю любо́вь твою̀ и҆ млⷭ҇рдїе, восхвалѧ́емъ чꙋдодѣ́йственнꙋю си́лꙋ твою̀, всемлⷭ҇тиваѧ влⷣчце на́ша: ᲂу҆мирѝ жи́знь на́шꙋ, ѿженѝ ѿ на́съ всѧ́каго врага̀ и҆ сꙋпоста́та, прострѝ на́мъ рꙋ́кꙋ по́мощи и҆ прїимѝ на́съ въ црⷭ҇тво нбⷭ҇ное, да всегда̀ мл҃твами твои́ми въ любвѝ твое́й пребыва́юще, со ᲂу҆миле́нїемъ серде́чнымъ зове́мъ тѝ:
Ра́дꙋйсѧ, наде́ждо вѣ́чнагѡ сп҃се́нїѧ: ра́дꙋйсѧ, ны́нѣшнѧгѡ ско́рбнагѡ вѣ́ка ᲂу҆тѣше́нїе.
Ра́дꙋйсѧ, ст҃ы́ни незави́стный и҆сто́чниче: ра́дꙋйсѧ, ро́да человѣ́ческагѡ возвыше́нїе.
Ра́дꙋйсѧ, неистощи́мое сокро́вище дарѡ́въ дх҃о́вныхъ: ра́дꙋйсѧ, неча́ѧннꙋю ра́дость вѣ̑рнымъ да́рꙋющаѧ.
Ра́дꙋйсѧ, въ ско́рбехъ и҆ болѣ́знехъ долготерпѣ́нїю на́съ наꙋча́ющаѧ: ра́дꙋйсѧ, стѡпы̀ на́шѧ на пꙋ́ть за́повѣдей гдⷭ҇нихъ направлѧ́ющаѧ.
Ра́дꙋйсѧ, всемлⷭ҇тиваѧ, въ напа́стехъ ско́раѧ застꙋ́пнице: ра́дꙋйсѧ, слеза́ми твои́ми грѣхѝ на́шѧ ѡ҆мыва́ющаѧ.
Ра́дꙋйсѧ, и҆́скреннѣ ка́ющымсѧ сп҃се́нїе: ра́дꙋйсѧ, си̑мъ да́рꙋющаѧ дꙋше́вное ᲂу҆тѣше́нїе.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ г҃і
Ѽ всепѣ́таѧ мт҃и, пречⷭ҇таѧ гпⷭ҇жѐ дв҃о бцⷣе, прїимѝ сїѐ ма́лое моле́нїе на́ше и҆ всеси́льнымъ твои́мъ предста́тельствомъ сохранѝ на́съ ѿ всѧ́кихъ бѣ́дъ и҆ напа́стей, и҆ вѣ́чныѧ и҆змѝ мꙋ́ки всѣ́хъ пред̾ ст҃о́ю і҆кѡ́ною твое́ю съ вѣ́рою и҆ любо́вїю покланѧ́ющихсѧ и҆ ѡ҆ тебѣ̀ бл҃года́рнѡ пою́щихъ бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆рха́гг҃лѡвъ и҆ а҆́гг҃лѡвъ ли́цы на нб҃сѝ и҆ человѣ́кѡвъ мно́жество на землѝ сла́вѧтъ тѧ̀, цр҃и́цꙋ всѣ́хъ и҆ бцⷣꙋ, ꙗ҆́кѡ дарова́ла є҆сѝ на́мъ ве́лїю ра́дость и҆ ᲂу҆тѣше́нїе, ѻ҆́бразъ тво́й ст҃ы́й, пред̾ ни́мже бл҃гоговѣ́йнѡ предстоѧ́ще, ᲂу҆миле́ннѡ тебѣ̀ зове́мъ:
Ра́дꙋйсѧ, цр҃е́мъ сла́вы ѿ вѣ́ка пред̾ꙋсмо́треннаѧ: ра́дꙋйсѧ, чрез̾ ро́ды првⷣникѡвъ пред̾ѡчи́щеннаѧ.
Ра́дꙋйсѧ, бг҃омъ ѻ҆ц҃е́мъ и҆збра́ннаѧ въ мт҃рь сн҃ꙋ своемꙋ̀: ра́дꙋйсѧ, бл҃гоꙋха́нный пло́де безпоро́чныхъ твои́хъ роди́телей.
Ра́дꙋйсѧ, воспита́ннаѧ въ земно́мъ домꙋ̀ цр҃ѧ̀ нбⷭ҇нагѡ: ра́дꙋйсѧ, дх҃омъ прест҃ы́мъ и҆здѣ́тска ѡ҆сщ҃е́ннаѧ.
Ра́дꙋйсѧ, бл҃говѣ́стїемъ а҆рха́гг҃ла ѡ҆бра́дованнаѧ: ра́дꙋйсѧ, рабꙋ̀ гдⷭ҇ню себѐ и҆менова́вшаѧ.
Ра́дꙋйсѧ, превѣ́чнагѡ совѣ́та соверше́нїе: ра́дꙋйсѧ, ѻ҆́гнь бжⷭ҇тва̀ въ себѐ вмѣсти́вшаѧ.
Ра́дꙋйсѧ, мр҃і́е, мт҃и хрⷭ҇та̀ бг҃а на́шегѡ: ра́дꙋйсѧ, пита́телѧ жи́зни на́шеѧ ро́ждшаѧ.
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Конда́къ а҃
И҆збра́нной ѿ всѣ́хъ родѡ́въ пречⷭ҇той дв҃ѣ бцⷣѣ бл҃года́рствєннаѧ пѣ̑нїѧ вседꙋ́шнѣ прино́симъ ѡ҆ дарова́нїи на́мъ преди́вныѧ є҆ѧ̀ і҆кѡ́ны, мнѡ́гаѧ чꙋдеса̀ и҆злива́ющїѧ, недꙋ́гѡвъ и҆сцѣле́нїе, ѿра́дꙋ и҆ ᲂу҆тѣше́нїе вѣ̑рнымъ подаю́щїѧ. Ты́ же, всебл҃га́ѧ застꙋ́пнице на́ша, ѿ всѣ́хъ напа́стей и҆ бѣ́дъ свободѝ на́съ, зовꙋ́щихъ тѝ:
Ра́дꙋйсѧ, ра́досте на́ша, и҆зба́ви на́съ ѿ всѧ́кїѧ нꙋ́жды и҆ печа́ли.
Моли́твы
Ѽ прест҃а́ѧ и҆ пребл҃гослове́ннаѧ мт҃и гдⷭ҇а и҆ сп҃са на́шегѡ і҆и҃са хрⷭ҇та̀, пречⷭ҇таѧ приснодв҃о бцⷣе мр҃і́е, держа́внаѧ покрови́тельнице и҆ застꙋ́пнице на́ша! Припа́даемъ и҆ покланѧ́емсѧ тебѣ̀ пред̾ ст҃о́ю и҆ чꙋдотво́рною і҆ерⷭ҇ли́мскою і҆кѡ́ною твое́ю и҆ смире́ннѡ мо́лимсѧ тебѣ̀, бл҃го́й и҆ млⷭ҇рдой: вонмѝ гла́сꙋ мл҃твъ на́шихъ, ѿ дꙋшѝ приноси́мыхъ тѝ, ви́ждь скѡ́рби и҆ и҆скꙋшє́нїѧ на̑ша, и҆ ꙗ҆́кѡ вои́стиннꙋ любвеѻби́льнаѧ мт҃и, потщи́сѧ помощѝ на́мъ, безпомѡ́щнымъ, ᲂу҆ны̑лымъ, во мнѡ́гїѧ грѣхѝ впа́дающымъ и҆ при́снѡ прогнѣвлѧ́ющымъ гдⷭ҇а и҆ созда́телѧ на́шего, є҆го́же ᲂу҆молѝ, влⷣчце, да не погꙋби́тъ на́съ со беззакѡ́нїи на́шими, но ра́ди твоегѡ̀ предста́тельства да ꙗ҆ви́тъ на́мъ чл҃вѣколю́бнꙋю свою̀ млⷭ҇ть. И҆спросѝ на́мъ, всебл҃га́ѧ, здра́вїе дꙋше́вное и҆ тѣле́сное, и҆́стинное покаѧ́нїе во грѣсѣ́хъ, преспѣ́ѧнїе въ добродѣ́телехъ хрⷭ҇тїа́нскихъ бл҃года́тное, ми́рное и҆ бл҃гоче́стное житїѐ, землѝ плодоно́сїе, воздꙋ́ха бл҃горастворе́нїе, дожди̑ бл҃говре́мєнны и҆ бл҃гослове́нїе свы́ше на всѧ̑ бл҃га̑ѧ дѣла̀ и҆ начина̑нїѧ на̑ша. Гра́дъ се́й [и҆лѝ: ве́сь сїю̀, и҆лѝ: ѻ҆би́тель сїю̀] сохранѝ, и҆ соблюдѝ всѣ́хъ въ ми́рѣ и҆ бл҃гоꙋстрое́нїи, и҆ споспѣшѝ всѣ̑мъ нестѝ и҆́го хрⷭ҇то́во бл҃го́е и҆ ле́гкое въ терпѣ́нїи и҆ смире́нїи, во сп҃се́нїе дꙋ́шъ на́шихъ, ѡ҆гражда́ющи на́съ мт҃рнимъ покро́вомъ твои́мъ ѿ и҆скꙋше́нїй дїа́вольскихъ и҆ всѧ́кагѡ ѕла̀.
Ѽ цр҃и́це всепѣ́таѧ, мт҃и бж҃їѧ всебл҃га́ѧ, прострѝ бг҃оно́снѣи рꙋ́цѣ твоѝ на ᲂу҆моле́нїе возлю́бленномꙋ сн҃ꙋ твоемꙋ̀, гдⷭ҇ꙋ на́шемꙋ і҆и҃сꙋ хрⷭ҇тꙋ̀, и҆ прїе́мши сомл҃твенники къ немꙋ̀ вкꙋ́пѣ съ тобо́ю на і҆кѡ́нѣ твое́й и҆з̾ѡбражє́нныѧ првⷣныѧ роди́тєли твоѧ̑ і҆ѡакі́ма и҆ а҆́ннꙋ, съ ни́ми ᲂу҆молѝ є҆го̀ поми́ловати на́съ и҆ и҆зба́вити ѿ поги́бели вѣ́чныѧ. И҆ ꙗ҆́коже и҆ногда̀ въ ско́рби вели́цѣй пред̾ се́ю і҆кѡ́ною твое́ю моли́вшемꙋсѧ ні́лꙋ ᲂу҆тѣше́нїе и҆ ѡ҆бѣтова́нїе бл҃го́е дарова́ла є҆сѝ, та́кѡ и҆ ны́нѣ на́съ, смире́нныхъ и҆ грѣ́шныхъ, молѧ́щихсѧ ᲂу҆слы́ши и҆ ꙗ҆вѝ на́мъ вели̑кїѧ щедрѡ́ты твоѧ̑: болѧ́щыѧ и҆сцѣлѝ, скорбѧ́щыѧ ᲂу҆тѣ́ши, бѣ́дствꙋющыѧ ѿ бѣ́дъ и҆зба́ви, пꙋтеше́ствꙋющыѧ и҆ въ мо́ри пла́вающыѧ невреди̑мы сохранѝ и҆ всѧ̑ ны̀ сподо́би бл҃гоче́стнѡ житїѐ на́ше земно́е сконча́ти, ст҃ы́хъ та̑инъ прича́стными бл҃гꙋ́ю хрⷭ҇тїа́нскꙋю кончи́нꙋ полꙋчи́ти и҆ нбⷭ҇ное црⷭ҇твїе ᲂу҆наслѣ́довати, да во свѣ́тѣ и҆ ра́дости ст҃ы́хъ пое́мъ и҆ велича́емъ млⷭ҇рдїе твоѐ и҆ вѣ́чнѡ сла́вимъ ро́ждшагосѧ ѿ тебє̀ гдⷭ҇а на́шего і҆и҃са хрⷭ҇та̀, є҆мꙋ́же со безнача́льнымъ є҆гѡ̀ ѻ҆ц҃е́мъ и҆ прест҃ы́мъ дх҃омъ подоба́етъ всѧ́каѧ сла́ва, че́сть и҆ поклоне́нїе, во вѣ́ки вѣкѡ́въ. А҆ми́нь.
Прест҃а́ѧ гпⷭ҇жѐ, влⷣчце бцⷣе, ᲂу҆пова́нїе всѣ́хъ притека́ющихъ къ тебѣ̀, застꙋ́пнице печа́льныхъ, прибѣ́жище ѿча́ѧнныхъ, вдѡ́въ и҆ сиро́тъ пита́тельнице! Оу҆слы́ши и҆ поми́лꙋй ны̀, грѣ̑шныѧ и҆ недостѡ́йныѧ рабы̑ твоѧ̑, со ᲂу҆миле́нїемъ ко пречⷭ҇томꙋ твоемꙋ̀ ѻ҆́бразꙋ припа́дающыѧ: ᲂу҆молѝ, млⷭ҇рдаѧ влⷣчце, сн҃а твоего̀ и҆ гдⷭ҇а на́шего і҆и҃са хрⷭ҇та̀, да ѿврати́тъ ѿ на́съ првⷣный гнѣ́въ сво́й, да прости́тъ грѣхѝ и҆ беззакѡ́нїѧ на̑ша, ꙗ҆́кѡ да сподо́бимсѧ бл҃гоче́стнѡ сконча́ти житїѐ на́ше въ покаѧ́нїи и҆ полꙋчи́ти млⷭ҇ть є҆гѡ̀ со всѣ́ми и҆збра́нными є҆гѡ̀, ꙗ҆́кѡ бл҃гослове́на и҆ препросла́влена є҆сѝ во вѣ́ки вѣкѡ́въ. А҆ми́нь.