Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃о́й параске́ѵѣ се́рбской.

Прп. Параскевы (Петки) Сербской (1050) 27 октября 2026

Конда́къ а҃

И҆збра́ннаѧ ѿ гдⷭ҇а на тве́рди цр҃кве возсїѧ́ти, прпⷣбнаѧ мт҃и параске́ѵо, а҆гг҃лоподо́бнымъ твои́мъ житїе́мъ возсїѧ́ла є҆сѝ всемꙋ̀ мі́рꙋ ꙗ҆́кѡ сл҃нце пресвѣ́тлое, и҆ сꙋ́щымъ въ болѣ́знехъ дꙋше́вныхъ и҆ тѣле́сныхъ цѣли́тельница ꙗ҆ви́ласѧ є҆сѝ. Сегѡ̀ ра́ди вѣ́рою тѝ зове́мъ:

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

І҆́косъ а҃

А҆́гг҃льскꙋю ре́вность показа́вши, досточꙋ́днаѧ, житїѐ своѐ добродѣ́тельми ᲂу҆краси́ла є҆сѝ на землѝ, а҆́гг҃льскагѡ же ликостоѧ́нїѧ сподо́биласѧ є҆сѝ на нб҃сѝ: съ ни́мъ ᲂу҆̀бо молѝ прилѣ́жнѡ чл҃вѣколю́бца и҆зба́вити ѿ бѣ́дъ и҆ напа́стей всѧ̑ вопїю́щыѧ тѝ си́це:

Ра́дꙋйсѧ, во́лею свое́ю бл҃го́е и҆́го за́повѣдей хрⷭ҇то́выхъ под̾ѧ́вшаѧ: ра́дꙋйсѧ, житїе́мъ твои́мъ сꙋетꙋ̀ мі́ра ѡ҆бличи́вшаѧ.

Ра́дꙋйсѧ, пло́ть свою̀ страстьмѝ попра́вшаѧ: ра́дꙋйсѧ, срⷣце своѐ чи́сто ѿ всѧ́кїѧ стра́сти дꙋшевре́дныѧ сохрани́вшаѧ.

Ра́дꙋйсѧ, соверше́нїемъ за́повѣдей любо́вь бж҃їю къ себѣ̀ стѧжа́вшаѧ: ра́дꙋйсѧ, ноше́нїю крⷭ҇та̀ на́съ въ послѣ́дованїи хрⷭ҇тꙋ̀ наꙋчи́вшаѧ.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ в҃

Ви́дѧщи жите́йскихъ веще́й и҆змѣне́нїе, мїрскі́й мѧте́жъ ѡ҆ста́вила є҆сѝ, и҆ въ пꙋсты́ню всели́ласѧ є҆сѝ, и҆дѣ́же мно́гимъ поще́нїемъ и҆ мл҃твами, ꙗ҆́кѡ бл҃гово́нною пи́щею, дꙋ́шꙋ свою̀ пита́ла є҆сѝ бл҃гоговѣ́йнѡ пою́щи бг҃ꙋ: А҆ллилꙋ́їа.

І҆́косъ в҃

Ра́зꙋмъ и҆ вѣ́рꙋ пра́вꙋ и҆ соверше́ннꙋю любо́вь стѧжа́вши, бг҃омꙋ́драѧ мт҃и, воздержа́нїемъ и҆ смире́нїемъ себѐ ᲂу҆краси́ла є҆сѝ: тѣ́мже и҆ была̀ є҆сѝ хра́мъ бж҃їй и҆ чꙋде́съ и҆сто́чникъ неѡскꙋ́дный. Сегѡ̀ ра́ди бл҃гоговѣ́йнѡ тѝ пое́мъ:

Ра́дꙋйсѧ, є҆ѵⷢ҇льскагѡ самоѿверже́нїѧ ѻ҆́бразе соверше́нный: ра́дꙋйсѧ, ꙗ҆́кѡ нището́ю вре́менныхъ бога́тство вѣ́чное и҆ сла́вꙋ стѧжа́ла є҆сѝ.

Ра́дꙋйсѧ, ꙗ҆́кѡ ѻ҆бѣ́томъ нестѧжа́нїѧ высотꙋ̀ дꙋ́ха своегѡ̀ показа́ла є҆сѝ: ра́дꙋйсѧ, смире́нїѧ свѣ́тлаѧ высото̀.

Ра́дꙋйсѧ, ꙗ҆́кѡ пѡ́двиги твои́ми дꙋшетлѣ̑нныѧ си̑лы попра́ла є҆сѝ: ра́дꙋйсѧ, ꙗ҆́кѡ высото́ю подвигѡ́въ твои́хъ всѧ̑ ᲂу҆диви́ла є҆сѝ.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ г҃

Си́лою дх҃а ст҃а́гѡ ᲂу҆крѣплѧ́ема, мꙋ́жески претерпѣ́ла є҆сѝ пѡ́стныѧ по́двиги, прпⷣбнаѧ, слеза́ми же твои́ми велича́ваго врага̀ попра́ла є҆сѝ, воспѣва́ющи съ бл҃годаре́нїемъ бг҃ꙋ: А҆ллилꙋ́їа.

І҆́косъ г҃

И҆з̾ѡбраже́нїе бꙋ́дꙋщагѡ сꙋда̀ хрⷭ҇то́ва всегда̀ во ᲂу҆мѣ̀ и҆мꙋ́щи, и҆ тє́плыѧ слє́зы пролїѧ́ющи, пребл҃же́ннаѧ, ᲂу҆краси́ла є҆сѝ свѣти́льникъ дꙋшѝ твоеѧ̀, гото́ва сꙋ́щи ᲂу҆срѣ́сти сꙋдїю̀ првⷣнѣйшаго. Того̀ ᲂу҆̀бо молѝ десна́гѡ предстоѧ́нїѧ да сподо́битъ и҆ на́съ вѣ́рою пою́щыѧ тѝ си́це:

Ра́дꙋйсѧ, ѻ҆би́телище прест҃а́гѡ дх҃а: ра́дꙋйсѧ, ꙗ҆́кѡ всѐ житїѐ своѐ ѡ҆сщ҃а́ла є҆сѝ непреста́ннымъ призыва́нїемъ и҆́мене бж҃їѧ.

Ра́дꙋйсѧ, ꙗ҆́кѡ преꙋспѣ́ла є҆сѝ въ нелѣ́ностныхъ ꙗ҆̀же къ бг҃ꙋ мл҃твенныхъ предстоѧ́нїй: ра́дꙋйсѧ, ꙗ҆́кѡ си́лою мл҃твы препобѣди́ла є҆сѝ дїа́вѡльскаѧ и҆скꙋшє́нїѧ.

Ра́дꙋйсѧ, ꙗ҆́кѡ послѣ́днимъ воспомина́нїемъ ѿ грѣха̀ себѐ сохрани́ла є҆сѝ: ра́дꙋйсѧ, ꙗ҆́кѡ бг҃ꙋ соверше́ннѡ ᲂу҆годи́ла є҆сѝ.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ д҃

Бꙋ́рю настоѧ́щагѡ житїѧ̀ ѿве́ргла є҆сѝ, прпⷣбнаѧ: нищетꙋ̀ самово́льнꙋю хрⷭ҇та̀ ра́ди стѧжа́вши, добродѣ́тельми вельмѝ ѡ҆богати́ласѧ є҆сѝ, и҆ мнѡ́гїѧ къ ре́вности, ѻ҆́бразомъ житїѧ̀ своегѡ̀ воздви́гла є҆сѝ, ᲂу҆ча́щи и҆̀хъ пѣ́ти хрⷭ҇тꙋ̀ бг҃ꙋ: А҆ллилꙋ́їа.

І҆́косъ д҃

Оу҆слы́шавъ гдⷭ҇ь мл҃твы и҆ воздыха̑нїѧ твоѧ̑ наединѣ̀ твори̑мыѧ въ та́йнѣ, бл҃же́ннаѧ мт҃и, на нб҃си́ же предъ а҆́гг҃лы просла́ви болѣ̑зни и҆ трꙋды̀ твоѧ̑ ꙗ҆́вѣ: ны́нѣ же, бжⷭ҇твеннагѡ раѧ̀ проходѧ́щи нетлѣ̑нныѧ па̑жити, помина́й и҆ на́съ пою́щыѧ тѝ си́це:

Ра́дꙋйсѧ, достохва́льнаѧ, а҆́гг҃лѡмъ соприча́стнице: ра́дꙋйсѧ, ст҃и́телей велелѣ́пнаѧ красото̀.

Ра́дꙋйсѧ, прпⷣбныхъ соверше́ннаѧ и҆ высо́каѧ похвало̀: ра́дꙋйсѧ, првⷣныхъ ᲂу҆добре́нїе и҆ по́стникѡвъ пра́вило и҆звѣ́стнѣйшее.

Ра́дꙋйсѧ, дв҃ствєнникъ и҆ мона́хинь сла́во и҆ бг҃освѣ́тлый вѣ́нче: ра́дꙋйсѧ, хрⷭ҇тїа́нѡмъ стѣно̀ и҆ тве́рдое застꙋпле́нїе.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ є҃

Безмо́лвнѡ соверши́ла є҆сѝ жи́знь свою̀, бл҃же́ннаѧ мт҃и параске́ѵо, нестѧжа́нїемъ ᲂу҆краша́ющисѧ и҆ воздержа́нїемъ просвѣща́ющисѧ, бы́лїемъ же то́чїю пита́ющисѧ, и҆ пою́щи со ᲂу҆миле́нїемъ влⷣцѣ: А҆ллилꙋ́їа.

І҆́косъ є҃

Ви́дѧ прест҃ы́й дх҃ъ чи́стое житїѐ твоѐ, къ семꙋ́ же и҆ безмѣ́рное смире́нїе твоѐ, сла́внꙋ тѧ̀ въ чꙋдесѣ́хъ показа̀, пребл҃же́ннаѧ. Тѣ́мже ѿ сегѡ̀ житїѧ̀ ѿше́дъ ко ѻ҆́номꙋ бл҃же́нствꙋ, съ прпⷣбными ли̑ки хода́тайствꙋеши ѡ҆ всѣ́хъ пою́щихъ тѝ со ᲂу҆миле́нїемъ:

Ра́дꙋйсѧ, пꙋсты́нный ши́пче бл҃гово́нный: ра́дꙋйсѧ, добрѣ́йшее пꙋсты́нное воспита́нїе.

Ра́дꙋйсѧ, ꙗ҆́кѡ серпо́мъ мл҃твъ твои́хъ те́рнїе страсте́й и҆зсѣкла̀ є҆сѝ: ра́дꙋйсѧ, ꙗ҆́кѡ пролїѧ́нїемъ сле́зъ твои́хъ грѣхо́вный ѻ҆́гнь погаси́ла є҆сѝ.

Ра́дꙋйсѧ, ꙗ҆́кѡ всѧ́кое вра́жїе наше́ствїе ѿгна́ла є҆сѝ: ра́дꙋйсѧ, ꙗ҆́кѡ ѻ҆́бразомъ добродѣ́тельнагѡ житїѧ̀ твоегѡ̀ лѣни̑выѧ къ покаѧ́нїю воздвиза́еши.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ ѕ҃

Проповѣ́дникꙋ пра́вды, и҆лїѝ досточꙋ́дномꙋ, и҆ і҆ѡа́ннꙋ прⷣте́чи, свѣти́льникꙋ покаѧ́нїѧ, подо́бѧщисѧ, прпⷣбнаѧ мт҃и, всѐ ѿложи́вши жите́йское попече́нїе, молча́ти въ гора́хъ, бдѣ́нїю же и҆ па́мѧти сме́ртнѣй всегда̀ поꙋча́ющисѧ, пѣ́ла є҆сѝ бг҃ꙋ: А҆ллилꙋ́їа.

І҆́косъ ѕ҃

Возсїѧ̀ нбⷭ҇ный свѣ́тъ стоѧ́щей тѝ со ᲂу҆миле́нїемъ на всено́щнѣй мл҃твѣ, и҆ сѐ а҆́гг҃лъ гдⷭ҇ень предста̀ предъ тобо́ю возвѣща́ѧ тѝ бж҃їе бл҃говоле́нїе да возврати́шисѧ во ѻ҆ч҃ество твоѐ, та́мѡ бо подоба́етъ тебѣ̀ тѣ́ло землѝ ѿда́ти, дꙋ́хомъ же преитѝ въ небє́снаѧ селє́нїѧ. Сегѡ̀ ра́ди пое́мъ тебѣ̀ такѡва́ѧ:

Ра́дꙋйсѧ, ꙗ҆́кѡ, є҆щѐ сꙋ́щей тѝ въ жи́зни се́й, сподо́биласѧ є҆сѝ а҆́гг҃льскагѡ лицезрѣ́нїѧ: ра́дꙋйсѧ, ꙗ҆́кѡ бл҃гоговѣ́йнѡ и҆спо́лнила є҆сѝ бж҃їе повелѣ́нїе.

Ра́дꙋйсѧ, ꙗ҆́кѡ въ цр҃кви влахе́рнстѣй бж҃їей мт҃ри те́плѣ моли́ласѧ є҆сѝ: ра́дꙋйсѧ, ꙗ҆́кѡ те́пломꙋ є҆ѧ̀ застꙋпле́нїю себѐ врꙋчи́ла є҆сѝ.

Ра́дꙋйсѧ, ꙗ҆́кѡ при и҆схо́дѣ твое́мъ ѡ҆ всѣ́мъ мі́рѣ прилѣ́жнѡ моли́ласѧ є҆сѝ: ра́дꙋйсѧ, ꙗ҆́кѡ по и҆схо́дѣ твое́мъ ѡ҆брѣла̀ є҆сѝ жи́знь присносꙋ́щнꙋю.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ з҃

Хотѧ́щи тѝ ѿ ны́нѣшнѧгѡ вѣ́ка преста́витисѧ, зашла̀ є҆сѝ ꙗ҆́кѡ ѕвѣзда̀ ѿ мі́ра сегѡ̀, прехва́льнаѧ, и҆ возсїѧ́ла є҆сѝ въ премі́рнѣй жи́зни, ѡ҆ста́вльши на́мъ ꙗ҆́кѡ зари̑ добродѣ̑тели и҆ и҆справлє́нїѧ житїѧ̀ твоегѡ̀ ѡ҆зарѧ́ющыѧ срⷣца̀ всѣ́хъ съ вѣ́рою пою́щихъ бг҃ꙋ: А҆ллилꙋ́їа.

І҆́косъ з҃

Но́выѧ блгⷣти зако́нъ и҆спо́лнивши, на нб҃о текꙋ́щею добродѣ́телей возше́дъ колесни́цею, досточꙋ́днаѧ, ны́нѣ съ нбⷭ҇ными ра́дꙋешисѧ чинонача̑лїи. Съ ни́ми ᲂу҆̀бо моли́сѧ сп҃сꙋ хрⷭ҇тꙋ̀ ѡ҆ всѣ́хъ пою́щихъ тѝ си́це:

Ра́дꙋйсѧ, ꙗ҆́кѡ къ невече́рнемꙋ свѣ́тꙋ прешла̀ є҆сѝ: ра́дꙋйсѧ, ꙗ҆́кѡ сподо́биласѧ є҆сѝ жили́ща красо́тъ хрⷭ҇то́выхъ.

Ра́дꙋйсѧ, ꙗ҆́кѡ прїѧ́ла є҆сѝ ѿ гдⷭ҇а многосꙋгꙋ́бꙋю мздꙋ̀ трꙋдѡ́въ твои́хъ: ра́дꙋйсѧ, ꙗ҆́кѡ свы́ше прїѧ́ла є҆сѝ вѣне́цъ неꙋвѧда́емый.

Ра́дꙋйсѧ, ꙗ҆́кѡ чи́стѡ зри́ши трїѷпоста́сное бжⷭ҇тво̀: ра́дꙋйсѧ, ꙗ҆́кѡ со а҆́гг҃лы на нб҃сѝ ѡ҆бита́еши.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ и҃

Стра́нное и҆ ди́вное видѣ́нїе ᲂу҆зрѣ̀ хрⷭ҇толюби́вый геѡ́ргїй: мнѧ́сѧ бо зрѣ́ти нѣ́кꙋю цр҃и́цꙋ, на пресвѣ́тлѣмъ прⷭ҇то́лѣ сѣдѧ́щꙋю, и҆ мно́жество свѣ́тлыхъ во́инѡвъ ѻ҆́крестъ тоѧ̀ стоѧ́щихъ, ᲂу҆слы́ша гл҃го́лы є҆мꙋ̀: геѡ́ргїе, вско́рѣ и҆з̾е́мше мо́щи моѧ̑ въ наро́читѣмъ положи́те мѣ́стѣ пою́ще бг҃ꙋ: А҆ллилꙋ́їа.

І҆́косъ и҃

Ве́сь хрⷭ҇тїа́нскїй собо́ръ, ᲂу҆слы́шавъ гл҃го́лы геѡ́ргїа, потечѐ къ моще́мъ прпⷣбныѧ параске́ѵи, и҆ ты̑ѧ со мно́гимъ ᲂу҆се́рдїемъ и҆з̾е́мъ, ꙗ҆́коже ѡ҆ нѣ́коемъ сокро́вищи многоцѣ́ннѣмъ ра́дꙋѧсѧ, че́стнѡ положѝ въ цр҃кви, воспѣва́ѧ съ любо́вїю си́це:

Ра́дꙋйсѧ, ра́достное правосла́вныхъ слы́шанїе: ра́дꙋйсѧ, свѣ́тлаѧ вѣ́ры ѕвѣздо̀, вѣ̑рныѧ просвѣща́ющаѧ.

Ра́дꙋйсѧ, бл҃гово́ннаѧ смѵ́рно, цр҃ковь хрⷭ҇то́вꙋ ѡ҆бл҃гоꙋха́ющаѧ: ра́дꙋйсѧ, сокро́вище бж҃їихъ дарова́нїй неиждива́емое.

Ра́дꙋйсѧ, и҆сто́чниче бг҃ото́чный, и҆сточа́ѧй вѣ̑рнымъ цѣли́тєльныѧ во́ды: ра́дꙋйсѧ, ꙗ҆́кѡ всѣ̑мъ вѣ̑рнымъ, блгⷣтїю хрⷭ҇то́вою, ꙗ҆́звы и҆сцѣлѧ́еши.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ ѳ҃

Ве́лїе тща́нїе и҆мѣ́ѧ бл҃говѣ́рный ца́рь і҆ѡа́ннъ а҆се́нь, прїѧ́въ вѣ́сть гдѣ̀ лежа́тъ чꙋдотвѡ́рныѧ и҆ ст҃ы̑ѧ мо́щи твоѧ̑, прпⷣбнаѧ параске́ѵо, пренесѐ ѧ҆̀ во гра́дъ сво́й те́рновъ, и҆ съ че́стїю ве́лїею положѝ въ цр҃кви свое́й, и҆дѣ́же и҆сточа́хꙋ разли̑чныѧ цѣльбы̑ съ вѣ́рою притека́ющымъ и҆ пою́щымъ бг҃ꙋ: А҆ллилꙋ́їа.

І҆́косъ ѳ҃

Виті́йствꙋетъ ѻ҆́трокъ, и҆́же де́вѧть лѣ́тъ ѿ рожде́нїѧ не гл҃го́лаше, прише́дъ же съ вѣ́рою въ хра́мъ тво́й, а҆́бїе полꙋчѝ и҆сцѣле́нїе. Сегѡ̀ ра́ди пое́мъ тѝ со ᲂу҆миле́нїемъ:

Ра́дꙋйсѧ, мо́щнаѧ застꙋ́пнице на́ша и҆ ѿ бѣ́дъ и҆зба́вительнице: ра́дꙋйсѧ, ѕлостра́ждꙋщихъ ѿ дꙋхѡ́въ ѕло́бы ско́раѧ помо́щнице.

Ра́дꙋйсѧ, ꙗ҆́кѡ мл҃твою твое́ю зрѣ́нїе слѣпы̑мъ возвраща́еши: ра́дꙋйсѧ, ꙗ҆́кѡ непло́дствꙋющымъ блгⷭ҇ве́нный пло́дъ ѿ бг҃а низпосыла́еши.

Ра́дꙋйсѧ, ꙗ҆́кѡ разсла́блєнныѧ ѿ ѻ҆дра̀ возставлѧ́еши: ра́дꙋйсѧ, немо́лчнаѧ хода́таице съ вѣ́рою къ тебѣ̀ притека́ющымъ.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ і҃

Сп҃сла̀ є҆сѝ ѿ лю́тыѧ болѣ́зни женꙋ̀ ѡ҆бѣща́ющꙋю храни́ти бж҃їѧ повелѣ̑нїѧ: ѻ҆ба́че, солга́вшꙋю и҆ не сохрани́вшꙋю ѡ҆бѣ́ты своѧ̑, а҆́бїе наказа́ла є҆сѝ болѣ́знїю и҆ сме́ртїю, да и҆ и҆́ны поꙋча́ютсѧ не солга́ти бг҃ꙋ, но во и҆́стинѣ пребыва́ти и҆ пѣ́ти є҆мꙋ̀: А҆ллилꙋ́їа.

І҆́косъ і҃

Стѣна̀ была̀ є҆сѝ и҆ сп҃си́тельное прибѣ́жище правосла̑внымъ лю́демъ сꙋ́щымъ въ плѣне́нїи, притека́ющымъ въ ско́рби свое́й къ цѣлє́бнымъ и҆ чꙋдотвѡ́рнымъ моще́мъ твои̑мъ, и҆ вопїю́щымъ тѝ всеꙋми́льнѡ такѡва́ѧ:

Ра́дꙋйсѧ, всѣ̑мъ вѣ̑рнымъ приста́нище бл҃гоꙋти́шное: ра́дꙋйсѧ, ѡ҆би́димыхъ те́плаѧ предста́тельнице и҆ покрови́тельнице.

Ра́дꙋйсѧ, ꙗ҆́кѡ плѣнє́ннымъ въ ско́рбехъ и҆́хъ ᲂу҆тѣше́нїе подава́еши: ра́дꙋйсѧ, ꙗ҆́кѡ чꙋдесы̑ и҆ а҆га́рѧны ᲂу҆страша́еши и҆ вразꙋмлѧ́еши.

Ра́дꙋйсѧ, ꙗ҆́кѡ и҆́мѧ твоѐ и҆ въ и҆ноплеме́нныхъ прославлѧ́етсѧ: ра́дꙋйсѧ, ꙗ҆́кѡ тобо́ю правосла́вїе возвыша́етсѧ.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ а҃і

Пѣ̑нїѧ и҆ мл҃твы приносѧ́щи бл҃говѣ́рнаѧ цр҃и́ца ми́лица предъ ковче́гомъ твои́хъ чꙋдотво́рныхъ моще́й, съ ве́лїимъ тща́нїемъ пренесѐ ѧ҆̀ ѿ и҆ноплеме́нныхъ во гра́дъ сво́й прⷭ҇то́льный на ѡ҆хране́нїе всегѡ̀ ро́да на́шегѡ пою́щагѡ бг҃ꙋ: А҆ллилꙋ́їа.

І҆́косъ а҃і

Свѣ́тлаѧ и҆ новопросїѧ́вшаѧ ѕвѣзда̀ ꙗ҆ви́ласѧ є҆сѝ на за́падѣ, свѣ́тлыми лꙋча́ми чꙋдотво́рныхъ моще́й твои́хъ всѣ̑мъ вѣ̑рнымъ сїѧ́ющи, па́че же ѻ҆ч҃ествꙋ твоемꙋ̀, привлека́ющи сїѐ пресвѣ́тломꙋ сїѧ́нїю твои́хъ пѡ́двигъ, и҆ и҆збавлѧ́ющи ѿ бѣ́дъ и҆ напа́стей, пою́щемꙋ тѝ си́це:

Ра́дꙋйсѧ, всѧ́кихъ и҆сцѣле́нїй и҆сто́чниче: ра́дꙋйсѧ, лю́тѣ стра́ждꙋщихъ помо́щнице.

Ра́дꙋйсѧ, ꙗ҆́кѡ ско́рбный мра́къ разгонѧ́еши: ра́дꙋйсѧ, ꙗ҆́кѡ ѿ бе́здны грѣхо́вныѧ чл҃вѣ́ки и҆збавлѧ́еши.

Ра́дꙋйсѧ, ꙗ҆́кѡ тобо́ю дерзнове́ннѡ бе́зднꙋ млⷭ҇рдїѧ бж҃їѧ призыва́емъ: ра́дꙋйсѧ, ꙗ҆́кѡ тобо́ю ѿ пото́па гнѣ́ва и҆зба́вльшесѧ ми́ръ съ бг҃омъ ѡ҆брѣта́емъ.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ в҃і

Блгⷣтїю хрⷭ҇то́вою и҆сцѣлѧ́еши болѣ̑зни, и҆ прогонѧ́еши лꙋка̑выѧ дꙋ́хи и҆ стра̑сти, сла́внаѧ параске́ѵо, и҆ просвѣща́еши вѣ̑рныѧ блиста́ньми чꙋде́съ твои́хъ да вопїю́тъ бл҃года́рнѡ бг҃ꙋ: А҆ллилꙋ́їа.

І҆́косъ в҃і

Пою́ще мо́лимъ тѧ̀ прилѣ́жнѡ, прпⷣбнаѧ мт҃и параске́ѵо, ѡ҆ хрⷭ҇то́вѣ цр҃кви моли́сѧ, правосла́внѣй вѣ́рѣ крѣ́пость и҆ ѡ҆долѣ́нїе на є҆́рєси, на́мъ же сп҃се́нїе и҆ ми́ръ и҆спросѝ, да съ любо́вїю велича́емъ тѧ̀ си́це:

Ра́дꙋйсѧ, хрⷭ҇то́вы цр҃кве свѣ́тлое ᲂу҆краше́нїе: ра́дꙋйсѧ, правосла́вныѧ вѣ́ры защище́нїе.

Ра́дꙋйсѧ, ѻ҆ч҃ества на́шегѡ стѣно̀ и҆ ѿ и҆ноплеме́нныхъ и҆зба́вительнице: ра́дꙋйсѧ, ѻ҆би́тели твоеѧ̀ покро́ве.

Ра́дꙋйсѧ, хрⷭ҇тїа́нскагѡ ро́да застꙋпле́нїе: ра́дꙋйсѧ, всѣ̑мъ съ вѣ́рою предста́тельства твоегѡ̀ и҆́щꙋщымъ ско́раѧ помо́щнице.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ г҃і

Ѽ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе и҆ дѣ́въ ᲂу҆краше́нїе, прїимѝ ны́нѣ ѿ хꙋды́хъ ᲂу҆́стъ сїѐ пѣснопѣ́нїе, и҆ ѿ гее́нны и҆зба́витисѧ на́мъ гдⷭ҇а ᲂу҆молѝ, да съ тобо́ю, въ нбⷭ҇нѣмъ ѻ҆те́чествїи на́шемъ, безконе́чнѡ пое́мъ є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льскꙋю ре́вность показа́вши, досточꙋ́днаѧ, житїѐ своѐ добродѣ́тельми ᲂу҆краси́ла є҆сѝ на землѝ, а҆́гг҃льскагѡ же ликостоѧ́нїѧ сподо́биласѧ є҆сѝ на нб҃сѝ: съ ни́мъ ᲂу҆̀бо молѝ прилѣ́жнѡ чл҃вѣколю́бца и҆зба́вити ѿ бѣ́дъ и҆ напа́стей всѧ̑ вопїю́щыѧ тѝ си́це:

Ра́дꙋйсѧ, во́лею свое́ю бл҃го́е и҆́го за́повѣдей хрⷭ҇то́выхъ под̾ѧ́вшаѧ: ра́дꙋйсѧ, житїе́мъ твои́мъ сꙋетꙋ̀ мі́ра ѡ҆бличи́вшаѧ.

Ра́дꙋйсѧ, пло́ть свою̀ страстьмѝ попра́вшаѧ: ра́дꙋйсѧ, срⷣце своѐ чи́сто ѿ всѧ́кїѧ стра́сти дꙋшевре́дныѧ сохрани́вшаѧ.

Ра́дꙋйсѧ, соверше́нїемъ за́повѣдей любо́вь бж҃їю къ себѣ̀ стѧжа́вшаѧ: ра́дꙋйсѧ, ноше́нїю крⷭ҇та̀ на́съ въ послѣ́дованїи хрⷭ҇тꙋ̀ наꙋчи́вшаѧ.

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Конда́къ а҃

И҆збра́ннаѧ ѿ гдⷭ҇а на тве́рди цр҃кве возсїѧ́ти, прпⷣбнаѧ мт҃и параске́ѵо, а҆гг҃лоподо́бнымъ твои́мъ житїе́мъ возсїѧ́ла є҆сѝ всемꙋ̀ мі́рꙋ ꙗ҆́кѡ сл҃нце пресвѣ́тлое, и҆ сꙋ́щымъ въ болѣ́знехъ дꙋше́вныхъ и҆ тѣле́сныхъ цѣли́тельница ꙗ҆ви́ласѧ є҆сѝ. Сегѡ̀ ра́ди вѣ́рою тѝ зове́мъ:

Ра́дꙋйсѧ, прпⷣбнаѧ мт҃и параске́ѵо, скорбѧ́щихъ ᲂу҆тѣше́нїе.

Моли́твы

Ѽ, прпⷣбнаѧ мт҃и параске́ѵо, те́плаѧ на́ша застꙋ́пнице, и҆ вездѣ̀ въ ско́рбехъ ско́раѧ помо́щнице, помозѝ на́мъ грѣ̑шнымъ и҆ ᲂу҆ны̑лымъ въ настоѧ́щемъ се́мъ житїѝ, ᲂу҆молѝ гдⷭ҇а бг҃а дарова́ти на́мъ ѡ҆ставле́нїе всѣ́хъ грѣхѡ́въ на́шихъ, ꙗ҆̀же содѣ́ѧхомъ во все́мъ житїѝ на́шемъ дѣ́ломъ, сло́вомъ, помышле́нїемъ и҆ всѣ́ми на́шими чꙋ̑вствы, во и҆схо́дѣ же дꙋшѝ на́шеѧ помозѝ на́мъ недостѡ́йнымъ и҆зба́витисѧ ѿ воздꙋ́шныхъ мыта́рствъ и҆ вѣ́чнагѡ мꙋче́нїѧ, да велича́юще млⷭ҇тивное предста́тельство твоѐ, всегда̀ прославлѧ́емъ ѻ҆ц҃а̀ и҆ сн҃а и҆ ст҃а́го дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.