Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃ѣ́й мꙋ́ченицѣ параске́ѵѣ, нарече́ннѣй пѧ́тницѣ.

Влкмчц. Параскевы (Пятницы) (290) 10 ноября 2026

Конда́къ а҃

И҆збра́нной бг҃омъ ѿ ро́да бл҃горо́днагѡ, і҆коні́йскагѡ гра́да, премꙋ́дрой и҆ всехва́льной невѣ́стѣ хрⷭ҇то́вѣ, ꙗ҆́кѡ и҆збавлѧ́емїи тобо́ю ѿ и҆скꙋше́нїй и҆ бѣ́дъ, бл҃года́рствєннаѧ пѣ̑нїѧ и҆ хвалє́нїѧ восписꙋ́емъ тѝ мл҃твенницы твоѝ, ст҃а́ѧ и҆ многострада́льнаѧ мч҃нице параске́ѵо. Ты́ же, и҆мѣ́ѧ дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, да со ᲂу҆миле́нїемъ и҆ ра́достїю зове́мъ тѝ:

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

І҆́косъ а҃

А҆́гг҃лѡмъ чтⷭ҇нꙋ́ю и҆ вселюбе́знꙋю чⷭ҇тотꙋ̀ твоегѡ̀ се́рдца, многострада́льнаѧ параске́ѵо, непоро́чнѡ сохра́нши, а҆́гг҃лѡмъ собесѣ́дница бы́ти сподо́биласѧ є҆сѝ. Съ ни́миже воспѣва́ѧ трист҃ꙋ́ю пѣ́снь бг҃ꙋ на нб҃сѝ, ᲂу҆слы́ши и҆ на́съ, вѣ́рою и҆ любо́вїю чтꙋ́щихъ тѧ̀ и҆ вопїю́щихъ тѝ хвалє́нїѧ сїѧ̑ на землѝ:

Ра́дꙋйсѧ, ѻ҆трокови́це, бг҃омъ ѻ҆ц҃е́мъ пред̾ꙋста́вленнаѧ бы́ти соѻбра́зной въ страда́нїи ѻ҆́бразꙋ сн҃а є҆гѡ̀: ра́дꙋйсѧ, и҆ сн҃омъ бж҃їимъ ᲂу҆крѣпле́ннаѧ на по́двиги страда́льческїѧ.

Ра́дꙋйсѧ, и҆́стиннꙋю вѣ́рꙋ въ животворѧ́щꙋю и҆ є҆диносꙋ́щнꙋю трⷪ҇цꙋ ст҃ѡ соблю́дшаѧ: ра́дꙋйсѧ, ст҃о́е цѣломꙋ́дрїе и҆ дѣ́вственнꙋю непоро́чность до́брѣ сохра́ншаѧ.

Ра́дꙋйсѧ, ꙗ҆́кѡ ра́достнѡ ᲂу҆невѣ́стиласѧ є҆сѝ безсме́ртномꙋ нбⷭ҇номꙋ женихꙋ̀ хрⷭ҇тꙋ̀: ра́дꙋйсѧ, земна́гѡ ѡ҆брꙋ́чника па́че нбⷭ҇нагѡ зна́ти не восхотѣ́вшаѧ.

Ра́дꙋйсѧ, ꙗ҆́кѡ цвѣ́тъ чⷭ҇тоты̀, въ неꙋвѧда́емой сла́вѣ цвѣтꙋ́щаѧ: ра́дꙋйсѧ, ꙗ҆́кѡ крі́нъ, вонѧ́ми твои́хъ добродѣ́телей на́мъ бл҃гоꙋха́ющаѧ.

Ра́дꙋйсѧ, въ нбⷭ҇номъ вертогра́дѣ неизрече́нною ра́достїю наслажда́ющаѧсѧ: ра́дꙋйсѧ, краснѣ́йшагѡ па́че сынѡ́въ чл҃вѣ́ческихъ зрѣ́нїемъ та́мѡ ᲂу҆тѣша́ющаѧсѧ.

Ра́дꙋйсѧ, ᲂу҆бѣли́вшаѧ ри̑зы твоѧ̀ въ кро́ви а҆́гнчей на землѝ: ра́дꙋйсѧ, въ ли́кѣ дѣ́вственницъ предстоѧ́щаѧ бж҃їемꙋ а҆́гнцꙋ на нб҃сѝ.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ в҃

Ви́дѣвше бл҃голѣ́пїе лица̀ твоегѡ̀, ст҃а́ѧ мꙋ́ченице параске́ѵо, лю́дїе ᲂу҆дивлѧ́хꙋсѧ, взира́юще на тѧ̀, не ᲂу҆̀ вѣ́дѧще красоты̀ дꙋшѝ твоеѧ̀. Мы́ же, помина́юще свѣтлѣ́йшыѧ па́че со́лнца добродѣ́тєли твоѧ̀, пои́мъ гдⷭ҇еви, дарова́вшемꙋ тебѣ̀ бл҃года́ть свою̀: А҆ллилꙋ́їа.

І҆́косъ в҃

Мꙋ́дрости вмѣсти́лище па́че ᲂу҆ма̀ мїрски́хъ мꙋдрецє́въ ꙗ҆ви́ласѧ є҆сѝ, ѻ҆трокови́це непоро́чнаѧ, и҆змла́да ᲂу҆клони́вшисѧ ѿ любвѐ къ мі́рꙋ и҆ ѿве́ргшисѧ всегѡ̀ ꙗ҆̀же въ мі́рѣ, все́ю полното́ю любвѐ твоеѧ̀ возлюби́ла є҆сѝ нбⷭ҇нагѡ жениха̀ хрⷭ҇та̀, цр҃ѧ̀ сла́вы, є҆мꙋ́же, ꙗ҆́кѡ вѣ́рнаѧ раба̀, въ житїѝ твое́мъ а҆пⷭ҇льски послꙋжи́ла є҆сѝ, жи́вши ст҃ѡ средѝ невѣ́рныхъ и҆ безбоѧ́зненнѡ проповѣ́давши и҆̀мъ хрⷭ҇та̀ бг҃а. Таково́мꙋ твоемꙋ̀ ра́зꙋмꙋ дивѧ́щесѧ, сїѧ̑ похвалы̑ тебѣ̀ восписꙋ́емъ:

Ра́дꙋйсѧ, премꙋ́драѧ є҆ѵⷢ҇льскаѧ дѣ́во, во свѣ́тѣ вѣ́ры и҆ дѣ́лъ бл҃ги́хъ ходи́вшаѧ: ра́дꙋйсѧ, хрⷭ҇та̀ гдⷭ҇а, бж҃їю си́лꙋ и҆ бж҃їю премꙋ́дрость, па́че всегѡ̀ возлюби́вшаѧ.

Ра́дꙋйсѧ, па́че мꙋдрецє́въ мі́ра сегѡ̀ мꙋдрѣ́йшаѧ: ра́дꙋйсѧ, па́че ста́рєцъ і҆дѡлослꙋжи́тєльныхъ разꙋ́мнѣйшаѧ.

Ра́дꙋйсѧ, невѣ́рныхъ свѣ́томъ вѣ́ры просвѣща́ющаѧ: ра́дꙋйсѧ, ча̑дъ цр҃кве хрⷭ҇то́вы въ вѣ́рѣ ᲂу҆твержда́ющаѧ.

Ра́дꙋйсѧ, любо́вїю твое́ю ко хрⷭ҇тꙋ̀ а҆́гг҃льскаѧ ликостоѧ̑нїѧ возвеселѧ́ющаѧ: ра́дꙋйсѧ, дє́мѡнскїѧ лꙋка̑вствїѧ ѻ҆рꙋ́жїемъ крⷭ҇та̀ гдⷭ҇нѧ ѿгонѧ́ющаѧ.

Ра́дꙋйсѧ, въ проповѣ́данїи вѣ́ры бг҃оглаго́ливаѧ ᲂу҆ста̀ а҆пⷭ҇льскаѧ: ра́дꙋйсѧ, дѣ́въ хрⷭ҇тїа́нскихъ ᲂу҆краше́нїе.

Ра́дꙋйсѧ, вѣ́рнаѧ ко хрⷭ҇тꙋ̀ бг҃ꙋ мл҃твеннице ѡ҆ на́шемъ сп҃се́нїи: ра́дꙋйсѧ, всѣ́хъ скорбѧ́щихъ крѣ́пкое застꙋпле́нїе и҆ ѡ҆гражде́нїе.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ г҃

Си́лою хрⷭ҇то́вою соблюда́ема, всесла́внаѧ мꙋ́ченице параске́ѵо, ѡ҆ болѣ́знехъ тѣле́сныхъ небрегла̀ є҆сѝ, по́двигомъ до́брымъ подвиза́тисѧ хотѧ́щи. Мꙋ́жескимъ смы́сломъ воѻрꙋжи́вшисѧ, сла́бость же́нскꙋю ѿве́ргла є҆сѝ, ᲂу҆пова́нїемъ же ᲂу҆крѣпи́вшисѧ, ра́достнѡ предста́ла є҆сѝ на сꙋди́ще, и҆дѣ́же ꙗ҆́снѡ вѣ́рꙋ въ трⷪ҇цꙋ бж҃е́ственнꙋю проповѣ́дала є҆сѝ, бг҃ꙋ вопїю́щи: А҆ллилꙋ́їа.

І҆́косъ г҃

Слы́шавъ ѿ тебє̀, мꙋ́драѧ дще́рь, непра́ведный сꙋдїѧ̀ неслы́ханнаѧ словеса̀ ѡ҆ твое́мъ рожде́нїи, ꙗ҆́кѡ бл҃гочести́вїи роди́тели твоѝ, стра̑сти хрⷭ҇тѡ́вы почита́юще, знамени́тагѡ днѐ тезоимени́тꙋ тѧ̀ нареко́ша, параске́ѵою, въ предзнаменова́нїе, ꙗ҆́кѡ хрⷭ҇то́выхъ страсте́й и҆́маши бы́ти прича́стницею. Не разꙋмѣ̀ же сегѡ̀ нечести́вый и҆ге́мѡнъ, но вѣща́ше тѝ безстꙋ̑днаѧ словеса̀ и҆ повелѣ̀ би́ти тѧ̀ сꙋро́выми жи́лами и҆ полꙋме́ртвꙋ тѧ̀ сꙋ́щꙋ вве́ргнꙋти въ темни́цꙋ. Ты́ же до́блественнѣ претерпѣ́вши жесточа̑йшїѧ мꙋ̑ки, въ темни́цѣ, а҆́ки въ черто́зѣ свѣ́тлѣ ликꙋ́ющи, вопїѧ́ла є҆сѝ: никогда́же ѿлꙋчꙋ́сѧ тебє̀, гдⷭ҇и, но послѝ мѝ по́мощь твою̀ и҆ сп҃си́ мѧ вели́кїѧ ра́ди твоеѧ̀ млⷭ҇ти. Тѣ́мже, ᲂу҆блажа́юще тѧ̀, вопїе́мъ тѝ такова̑ѧ:

Ра́дꙋйсѧ, неѕло́биваѧ голꙋби́це, ѿ и҆скꙋше́нїй лꙋка́вагѡ врага̀ свободи́вшаѧсѧ. ра́дꙋйсѧ, слове́снаѧ а҆́гнице, ѿ ѕла́гѡ во́лка мꙋчи́телѧ къ до́бромꙋ па́стырю хрⷭ҇тꙋ̀ бг҃ꙋ прибѣ́гшаѧ.

Ра́дꙋйсѧ, во дво́ръ слове́сныхъ ѻ҆ве́цъ, ѡ҆деснꙋ́ю є҆го̀ стоѧ́щихъ, вше́дшаѧ: ра́дꙋйсѧ, на бра́къ а҆́гнчїй ра́достнѡ текꙋ́щаѧ.

Ра́дꙋйсѧ, ꙗ҆́кѡ тебѣ̀ ᲂу҆гото́вано є҆́сть бл҃гъ вѣ́чныхъ сокро́вище: ра́дꙋйсѧ, ꙗ҆́кѡ тебѣ̀ ѡ҆бѣтова́но є҆́сть бл҃же́нство црⷭ҇тва нбⷭ҇нагѡ.

Ра́дꙋйсѧ, премꙋ́драѧ є҆ѵⷢ҇льскаѧ дѣ́во, свѣ́тлѡ горѧ́щїй свѣти́льникъ и҆мꙋ́щаѧ: ра́дꙋйсѧ, дерзнове́нїе ве́лїе ко хрⷭ҇тꙋ̀ бг҃ꙋ стѧжа́вшаѧ.

Ра́дꙋйсѧ, во́лею свое́ю бл҃го́е и҆́го хрⷭ҇то́во на сѧ̀ под̾ѧ́вшаѧ: ра́дꙋйсѧ, се́рдце своѐ ѿ всѧ́кїѧ ле́сти дꙋшевре́дныѧ чи́стѡ сохра́ншаѧ.

Ра́дꙋйсѧ, и҆́стиннаѧ хрⷭ҇то́выхъ страсте́й прича́стнице: ра́дꙋйсѧ, во страда́нїѧхъ твои́хъ бл҃года́тнꙋю по́мощь ѿ хрⷭ҇та̀ гдⷭ҇а полꙋчи́вшаѧ.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ д҃

Бꙋ́рю тѧ́жкихъ и҆скꙋше́нїй воздвиго́ша вразѝ проти́вꙋ тебє̀, многострада́льнаѧ параске́ѵо: ты́ же ѿ твои́хъ крове́й трꙋдолю́бнѡ ча́шꙋ страда́нїй и҆спила̀ є҆сѝ, жела́ющи по хрⷭ҇тѣ̀, женисѣ̀ твое́мъ, во слѣ́дъ потещѝ, прехва́льнаѧ мч҃нце, и҆ ꙗ҆́кѡ ла́стовица доброгла́снаѧ, пѣ́снь воспѣва́ла є҆сѝ хрⷭ҇тꙋ̀ бг҃ꙋ: А҆ллилꙋ́їа.

І҆́косъ д҃

И҆мѣ́ѧ всегда̀ пред̾ ѻ҆ча́ми свои́ми гдⷭ҇а, за и҆сповѣ́данїе вѣ́ры па́лицами неми́лостивнѡ ѿ мꙋчи́телей бїе́ма, ра́доваласѧ є҆сѝ, приснопа́мѧтнаѧ мч҃нце параске́ѵо, вопїю́щи: ничто́же мѧ̀ разлꙋчи́тъ ѿ любвѐ твоеѧ̀, хрⷭ҇тѐ, и҆ та́кѡ подвиза́ѧсѧ во сла́вꙋ бж҃їю, ᲂу҆годи́ла є҆сѝ гдⷭ҇ꙋ. Тѣ́мже, помина́юще честна̑ѧ твоѧ̑ страда̑нїѧ, съ ᲂу҆миле́нїемъ зове́мъ тѝ:

Ра́дꙋйсѧ, а҆́гнице вседо́блѧѧ, пастыренача́льникꙋ хрⷭ҇тꙋ̀ прине́сшаѧсѧ, ꙗ҆́кѡ же́ртва бл҃гоꙋха́ннаѧ: ра́дꙋйсѧ, безсме́ртномꙋ женихꙋ̀ хрⷭ҇тꙋ̀ непоро́чное мꙋче́нїе твоѐ, ꙗ҆́кѡ вѣ́но пречестно́е, предста́вившаѧ.

Ра́дꙋйсѧ, ѻ҆трокови́це чⷭ҇таѧ, и҆́стинное и҆сповѣ́данїе вѣ́ры правосла́вныѧ пред̾ невѣ́рными ꙗ҆ви́вшаѧ: ра́дꙋйсѧ, пра́веднаѧ ѡ҆бличи́тельнице, непра́вдꙋ нечести́вагѡ сꙋдїѝ ꙗ҆́вѣ ѿкры́вшаѧ.

Ра́дꙋйсѧ, ꙗ҆́кѡ тобо́ю посрами́сѧ лꙋка́вый вра́гъ, ви́дѧщь себє̀ ѿ ю҆́ной дѣ́вы побѣжде́нна: ра́дꙋйсѧ, ꙗ҆́кѡ ра́дꙋютсѧ ѡ҆ тебѣ̀ и҆ си̑лы нбⷭ҇ныѧ, ви́дѧще тѧ̀ не́мощнꙋ и҆ мла́дꙋ сꙋ́щꙋ, побѣжда́ющꙋю лю́тыхъ мꙋчи́телей.

Ра́дꙋйсѧ, голꙋби́це чⷭ҇таѧ и҆ непоро́чнаѧ се́рдцемъ: ра́дꙋйсѧ, смире́ннаѧ а҆́гнице, благоꙋспѣ́шнѡ чтⷭ҇нѣ́й и҆ бл҃же́ннѣй стра́сти гдⷭ҇ней ᲂу҆подо́бльшаѧсѧ.

Ра́дꙋйсѧ, ꙗ҆́кѡ принесла́сѧ є҆сѝ зижди́телю твоемꙋ̀, ꙗ҆́кѡ кади́ло бл҃гово́нное: ра́дꙋйсѧ, ꙗ҆́кѡ зри́тъ на тѧ̀ пресвѣ́тлое со́лнце пра́вды, тридне́внѡ возсїѧ́вшее ѿ гро́ба и҆ ᲂу҆крѣпи́вшее тѧ̀ къ по́двигꙋ страда́льческомꙋ.

Ра́дꙋйсѧ, ꙗ҆́кѡ за пресла̑внаѧ твоѧ̑ страда̑нїѧ сподо́биласѧ є҆сѝ вни́ти въ черто́гъ хрⷭ҇та̀ цр҃ѧ̀ нбⷭ҇нагѡ: ра́дꙋйсѧ, ꙗ҆́кѡ та́мѡ вкꙋ́пѣ со ст҃ы́ми наслажда́ешисѧ неизрече́нною ра́достїю.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ є҃

Бг҃оте́чною ѕвѣздо́ю прешла̀ є҆сѝ въ мі́рѣ, страстоте́рпице сла́внаѧ параске́ѵо, ꙗ҆́снѡ вѣ́рꙋ во хрⷭ҇та̀ всѣ̑мъ проповѣ́дающи. Страда̑нїѧ мнѡ́га и҆ лю̑та мꙋ́жески претерпѣ́вши, мꙋчи́телѧ посрами́ла є҆сѝ и҆ ко хрⷭ҇тꙋ̀ гдⷭ҇ꙋ, ꙗ҆́кѡ свѣ́тꙋ незаходи́момꙋ, ра́достнѡ востекла̀ є҆сѝ. Є҆мꙋ́же предстоѧ́щи съ ли́ки пра́ведныхъ, вы́нꙋ вопїе́ши: А҆ллилꙋ́їа.

І҆́косъ є҃

Ви́дѧще си̑лы нбⷭ҇ныѧ пло́тїю стра́ждꙋщꙋю содѣ́телѧ ра́ди страстоте́рпицꙋ параске́ѵꙋ, є҆гѡ̀ си́лою крѣпѧ́щꙋюсѧ, глаго́лахꙋ: сѐ, и҆ дѣ̑вы на землѝ просла́виша гдⷭ҇а. Чл҃вѣ́цы же, тре́петомъ ѡ҆держи́ми, ᲂу҆жаса́хꙋсѧ, и҆ ᲂу҆дивлѧ́ющесѧ, пѣ́сньми прославлѧ́хꙋ, глаго́люще: ѽ, чꙋдесѐ, дѣ́ва врага̀ побѣдѝ и҆ мо́литсѧ ми́лостивомꙋ влⷣцѣ за сп҃се́нїе мі́ра. Сегѡ̀ ра́ди и҆ мы̀, помина́юще и҆спо́лненное вѣ́ры мꙋ́жество твоѐ, пресла́внаѧ мч҃нице, ᲂу҆блажа́емъ тѧ̀, глаго́люще:

Ра́дꙋйсѧ, до́блественнаѧ страстоте́рпице, въ защи́тꙋ вѣ́ры правосла́вныѧ подвиза́вшаѧсѧ: ра́дꙋйсѧ, навѣ́тѡвъ вра́жїихъ мꙋ́драѧ разори́тельнице.

Ра́дꙋйсѧ, і҆коні́йскагѡ гра́да ᲂу҆чи́тельнице: ра́дꙋйсѧ, і҆́дѡльскїѧ сꙋ́етныѧ ле́сти ѡ҆бличи́тельнице.

Ра́дꙋйсѧ, вѣ́рныхъ смы́слы вонѧ́ми добродѣ́телей твои́хъ бл҃гово́нствꙋющаѧ: ра́дꙋйсѧ, смра́дъ стра́стный бл҃года́тїю, свы́ше тѝ да́нною, ѿгонѧ́ющаѧ.

Ра́дꙋйсѧ, є҆́ллинскїѧ кꙋмі́ры, ꙗ҆́кѡ пра́хъ, ᲂу҆ничижи́вшаѧ: ра́дꙋйсѧ, твои́ми по́двиги, и҆̀же къ бг҃ꙋ, тмы̀ нача́льника низложи́вшаѧ.

Ра́дꙋйсѧ, го́рнѧѧ, па́че до́льнихъ, восхождє́нїѧ въ се́рдцѣ твое́мъ положи́ти возлюби́вшаѧ: ра́дꙋйсѧ, хрⷭ҇тꙋ̀ гдⷭ҇ꙋ, чл҃вѣколю́бцꙋ, всю̀ себє̀ преда́вшаѧ.

Ра́дꙋйсѧ, подо́бнѡ первомч҃нице ѳе́клѣ, мнѡ́гъ наро́дъ сло́вомъ бж҃їимъ просвѣти́вшаѧ: ра́дꙋйсѧ, невѣ́рныхъ къ бжⷭ҇твеннѣй вѣ́рѣ приве́дшаѧ.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ ѕ҃

Проповѣ́дницꙋ чꙋде́съ и҆ сла́вы бж҃їѧ ꙗ҆ви́ла є҆сѝ себѐ, до́блестнаѧ мч҃нице параске́ѵо, по́слѣ пресла́внагѡ и҆сцѣле́нїѧ въ темни́цѣ, ѿ хрⷭ҇та̀ гдⷭ҇а тебѣ̀ дарова́ннагѡ. Є҆мꙋ́же возсыла́ѧ бл҃года́рствєннаѧ молє́нїѧ, ра́достнѡ мы̀ вопїе́мъ: А҆ллилꙋ́їа.

І҆́косъ ѕ҃

Возсїѧ́ла є҆сѝ, ꙗ҆́кѡ свѣтоза́рнаѧ ѕвѣзда̀, ѡ҆багри́вшисѧ ка́плѧми кро́вными, и҆ бж҃е́ственною бл҃года́тїю ѿгна́ла є҆сѝ безбо́жїѧ тмꙋ̀, мч҃нце параске́ѵо, просвѣти́вши вѣ̑рныѧ, чтꙋ́щыѧ твоѧ̀ до́блествєнныѧ пѡ́двиги. Тѣ́мже восхвалѧ́юще тѧ̀, ᲂу҆се́рднѡ вопїе́мъ тѝ:

Ра́дꙋйсѧ, бг҃омꙋ́драѧ дѣ́во, хрⷭ҇то́выхъ стрⷭ҇те́й ѻ҆́бщнице: ра́дꙋйсѧ, въ темни́цѣ тѝ сꙋ́щей, а҆́гг҃льскагѡ посѣще́нїѧ сподо́бльшаѧсѧ.

Ра́дꙋйсѧ, въ ѿра́дꙋ болѣ́зней твои́хъ ѻ҆рꙋ̑дїѧ страсте́й хрⷭ҇то́выхъ созерца́вшаѧ: ра́дꙋйсѧ, чтⷭ҇ны́й крⷭ҇тъ и҆ терно́вый вѣне́цъ нетлѣ́ннагѡ жениха̀ твоегѡ̀ хрⷭ҇та̀ ᲂу҆зрѣ́вшаѧ.

Ра́дꙋйсѧ, ꙗ҆́звы гдⷭ҇а на тѣ́лѣ твое́мъ носи́вшаѧ: ра́дꙋйсѧ, ѿ всѣ́хъ ꙗ҆́звъ тѣ́мъ же гдⷭ҇емъ чрез̾ а҆́гг҃ла и҆сцѣле́ннаѧ.

Ра́дꙋйсѧ, ꙗ҆́кѡ то́йже гдⷭ҇ь дарова́лъ тебѣ̀ крѣ́пость и҆ премꙋ́дрость, є҆́йже не возмого́ша проти́витисѧ всѝ противлѧ́ющїисѧ и҆́стинѣ: ра́дꙋйсѧ, ѿ крове́й твои́хъ свѣ́тлꙋю себѣ̀ ри́зꙋ и҆стка́вшаѧ.

Ра́дꙋйсѧ, ꙗ҆́кѡ тобо́ю ѿ мно́гихъ ра̑нъ грѣ́шнїи и҆сцѣлѧ́ютсѧ: ра́дꙋйсѧ, ꙗ҆́кѡ тобо́ю ѿ разли́чныхъ болѣ́зней съ вѣ́рою тѧ̀ призыва́ющїи здра́вїе прїе́млютъ.

Ра́дꙋйсѧ, ᲂу҆́зъ грѣхѡ́вныхъ ско́раѧ рѣши́тельнице: ра́дꙋйсѧ, ѡ҆ всѣ́хъ хрⷭ҇тїа́нахъ пред̾ прⷭ҇то́ломъ бж҃їимъ вѣ́рнаѧ мл҃твеннице.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ з҃

Хотѧ́щꙋ безꙋ́мномꙋ мꙋчи́телю и҆ге́мѡнꙋ жела́нїе своѐ ᲂу҆лꙋчи́ти и҆ па́ки покꙋша́ющꙋсѧ ласка́тельными словесы̀ тебѐ, ст҃а́ѧ мч҃нице параске́ѵо, ѿ и҆́стиннагѡ бг҃а ѡ҆брати́ти къ поклоне́нїю і҆́дѡлѡмъ: ты́ же, ꙗ҆́кѡ бг҃омꙋ́драѧ дѣ́ва, вразꙋмлѧ́ѧ є҆го̀ въ сꙋ́етствѣ і҆́дѡлѡвъ, рекла̀ є҆сѝ є҆мꙋ̀: покажи́ ми, и҆ге́мѡне, богѡ́въ, и҆̀хже ты̀ мни́ши и҆сцѣли́вшихъ мѧ̀ ѿ ра̑нъ, и҆ по велѣ́нїю мꙋчи́телѧ прише́дши въ хра́мъ і҆́дѡльскїй, помоли́ласѧ є҆сѝ є҆ди́номꙋ и҆́стинномꙋ бг҃ꙋ, ѿ є҆го́же ст҃а́гѡ и҆́мене всѝ і҆́дѡли падо́ша и҆ разсы́пашасѧ въ пра́хъ, во ᲂу҆вѣре́нїе, ꙗ҆́кѡ є҆ди́нъ є҆́сть бг҃ъ, прославлѧ́емый во ст҃ѣ́й трⷪ҇цѣ, є҆мꙋ́же вкꙋ́пѣ со ст҃ы́ми а҆́гг҃лами вы́нꙋ вопїе́ши: А҆ллилꙋ́їа.

І҆́косъ з҃

Но́вꙋю показа̀ безчл҃вѣ́чїѧ ꙗ҆́рость ѕвѣроѻбра́зный мꙋчи́тель, є҆гда̀ тебє̀, ст҃а́ѧ мч҃нице параске́ѵо, повелѣ̀ на дре́вѣ повѣ́сити и҆ свѣща́ми горѧ́щими ѡ҆палѧ́ти твоѧ̑ дѣви́чєскаѧ ре́бра. Сїѐ пачеєсте́ственное терпѣ́нїе твоѐ бл҃гоговѣ́йнѡ воспомина́юще, похвала́ми бл҃жи́мъ тѧ̀ сицевы́ми:

Ра́дꙋйсѧ, многоѻбра̑зныѧ болѣ́зни за цр҃ѧ̀ хрⷭ҇та̀ бг҃а претерпѣ́вшаѧ: ра́дꙋйсѧ, ꙗ҆́кѡ пред̾ лице́мъ чл҃вѣ́ческимъ а҆́ще и҆ мꙋ́кꙋ прїѧ́ла є҆сѝ, ᲂу҆пова́нїе же твоѐ безсме́ртїѧ и҆спо́лнено є҆́сть.

Ра́дꙋйсѧ, ꙗ҆́кѡ повѣ́шена была̀ є҆сѝ на дре́вѣ хрⷭ҇та̀ ра́ди, на крⷭ҇тѣ̀ распѧ́тагѡ, да вѣнце́мъ нетлѣ́нїѧ ѿ негѡ̀ ᲂу҆вѧзе́шисѧ: ра́дꙋйсѧ, ꙗ҆́кѡ стро́гана была̀ є҆сѝ по ребрѡ́мъ, і҆и҃са ра́ди, копїе́мъ въ ребро̀ прободе́ннагѡ, да црⷭ҇твїемъ є҆гѡ̀ нбⷭ҇нымъ наслади́шисѧ.

Ра́дꙋйсѧ, ꙗ҆́кѡ ѻ҆́гнь любвѐ къ бг҃ꙋ въ се́рдцѣ твое́мъ возжгла̀ є҆сѝ: ра́дꙋйсѧ, ꙗ҆́кѡ за тогѡ̀ свѣща́ми ѻ҆́гненными пали́ма была̀ є҆сѝ.

Ра́дꙋйсѧ, твердѣ́йшаѧ а҆дама́нта въ терпѣ́нїи твое́мъ показа́вшаѧсѧ: ра́дꙋйсѧ, въ вѣ́рѣ во хрⷭ҇та̀ гдⷭ҇а крѣпча́е па́че ка́мене въ мꙋ́жествѣ непоколеби́мѣмъ пребы́вшаѧ.

Ра́дꙋйсѧ, ꙗ҆́кѡ ѻ҆гне́мъ ѡ҆палѧ́ема, ѻ҆́гненною мꙋ́дростїю пла́мень ᲂу҆гаси́ла є҆сѝ є҆сте́ственный: ра́дꙋйсѧ, ꙗ҆́кѡ свѣщꙋ̀ неꙋгаси́мꙋ дꙋше́внꙋю соблю́дши, вошла̀ є҆сѝ со хрⷭ҇то́мъ женихо́мъ твои́мъ въ черто́гъ нбⷭ҇ный.

Ра́дꙋйсѧ, ꙗ҆́кѡ чꙋде́сными и҆́скрами стра̑сти ᲂу҆мертви́вши, дє́мѡнскїѧ полкѝ страда́льчески побѣди́ла є҆сѝ: ра́дꙋйсѧ, ꙗ҆́кѡ страда́нїѧми твои́ми мно́гъ наро́дъ къ позна́нїю и҆́стиннагѡ бг҃а привела̀ є҆сѝ.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ и҃

Стра́нное и҆ стра́шное ст҃ы́ѧ мч҃ницы параске́ѵы страда́нїе ви́дѧще, вѣ́рнїи ᲂу҆дивлѧ́хꙋсѧ ѕѣлѡ̀: ка́кѡ мла́да ѻ҆трокови́ца сꙋ́щи, въ ю҆́ностнѣмъ тѣлесѝ такѡва́ѧ мꙋ́жественнѡ за хрⷭ҇та̀ терпи́тъ мꙋ̑ки, сле́знагѡ и҆спо́лнишасѧ ᲂу҆миле́нїѧ: невѣ́рнїи же, тре́петомъ ѡ҆держи́ми и҆ чꙋде́сными и҆́скрами ѡ҆палѧ́еми ѿ а҆́гг҃ла, бѣжа́хꙋ: мы́ же, прославлѧ́юще ди́внагѡ во ст҃ы́хъ бг҃а, вопїе́мъ: А҆ллилꙋ́їа.

І҆́косъ и҃

Ве́сь сладча́йшїй і҆и҃се сла́дость, ве́сь жела́нїе тебѣ̀ бы́сть, ст҃а́ѧ мч҃нице параске́ѵо: сла́дцѣ бо є҆го̀ ра́ди гѡ́рькїѧ терпѣ́ла є҆сѝ мꙋ̑ки, глаго́лющи къ мꙋчи́телю: вра́же нечести́вый и҆ге́мѡне, что̀ неи́стовствꙋеши на хрⷭ҇тїа́ны: ни ца́рства ᲂу҆ тебє̀ ѿ̾ѧ́хъ, ни гра́да твоегѡ̀ разори́хъ, но бꙋ́ими словесы̀ ᲂу҆вѣща́ти мѧ̀ помышлѧ́еши. А҆́зъ пло́ти моеѧ̀ не щаждꙋ̀ за хрⷭ҇та̀ моегѡ̀, занѐ ѻ҆́нъ лю́битъ мѧ̀: къ немꙋ̀ пойдꙋ̀ и҆ тогѡ̀ бꙋ́дꙋ невѣ́ста. То́й менє̀ сп҃се́тъ ѿ рꙋ́къ вра̑гъ мои́хъ и҆ да́рꙋетъ мѝ жи́знь вѣ́чнꙋю. Помина́юще сицева̑ѧ твоѧ̑ словеса̀ и҆ до́блествєнныѧ пѡ́двиги твоегѡ̀ и҆сповѣ́дничества, вопїе́мъ тѝ:

Ра́дꙋйсѧ, ѕло́бы невѣ́рныхъ не ᲂу҆страши́вшаѧсѧ: ра́дꙋйсѧ, тва́ри па́че созда́вшагѡ не послꙋжи́вшаѧ.

Ра́дꙋйсѧ, во є҆́же сопротивлѧ́тисѧ врагѡ́мъ бж҃їимъ, въ дх҃о́вное всеѻрꙋ́жїе бл҃года́ти бж҃їей ѡ҆бле́кшаѧсѧ: ра́дꙋйсѧ, і҆́дѡлѡмъ нѣмы̑мъ и҆ глꙋхи̑мъ въ ка́пищѣ і҆́дѡльстѣмъ не поклони́вшаѧсѧ.

Ра́дꙋйсѧ, и҆́менемъ всеси́льнагѡ гдⷭ҇а и҆ твое́ю къ немꙋ̀ мл҃твою всѧ̑ і҆́дѡлы та́мѡ сокрꙋши́вшаѧ: ра́дꙋйсѧ, де́монѡвъ кова̑рствїѧ бж҃е́ственною си́лою ᲂу҆праздни́вшаѧ.

Ра́дꙋйсѧ, томлє́нїѧ мꙋчи́телей крⷭ҇то́мъ гдⷭ҇нимъ, ꙗ҆́кѡ держа́внымъ ѻ҆рꙋ́жїемъ, мꙋ́жески побѣди́вшаѧ: ра́дꙋйсѧ, ѻ҆́гненное ѡ҆пале́нїе и҆ жже́нїе дѣ́вственнагѡ тѣлесѐ твоегѡ̀ въ воню̀ мѵ́ра хрⷭ҇тꙋ̀ бг҃ꙋ прине́сшаѧ.

Ра́дꙋйсѧ, вѣ́рꙋ, наде́ждꙋ и҆ любо́вь къ бг҃ꙋ сохра́ншаѧ: ра́дꙋйсѧ, побѣ́ды вѣне́цъ ѿ рꙋкѝ хрⷭ҇та̀ жизнода́вца прїе́мшаѧ.

Ра́дꙋйсѧ, рѣко̀, и҆спо́лненнаѧ бл҃года́ти бж҃їѧ вода́ми: ра́дꙋйсѧ, и҆сто́чниче кипѧ́щїй чꙋде́съ и҆злїѧ́нїи.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ ѳ҃

Всѣ́ми бг҃окра́сными лѣ́потами добродѣ́телей ᲂу҆краси́вши себє̀, прехва́льнаѧ мч҃нице параске́ѵо, ꙗ҆ви́ласѧ є҆сѝ тве́рда и҆ непоколеби́ма во и҆сповѣ́данїи вѣ́ры хрⷭ҇то́вы. Сегѡ̀ ра́ди а҆́гг҃льское є҆стество̀ ве́лїею возра́довасѧ ра́достїю, ᲂу҆зрѣ́вши мꙋ́жественнꙋю крѣ́пость твою̀ и҆ тве́рдое твоѐ ᲂу҆пова́нїе. И҆ мы̀ слы́шавше, ка́кѡ посрами́сѧ лꙋка́вый вра́гъ, ѿ дѣ́вы побѣжда́емь, и҆ ка́кѡ са́мъ хрⷭ҇то́съ бг҃ъ досто́йнѡ вѣнча́етъ тѧ̀ мч҃ницꙋ, кꙋ́пнѡ съ тобо́ю ра́достнѡ вопїе́мъ прославлѧ́ющемꙋ тѧ̀ гдⷭ҇ꙋ: А҆ллилꙋ́їа.

І҆́косъ ѳ҃

Вѣті́йствꙋющїй ѧ҆зы́къ не возмо́жетъ восхвали́ти дѣла̀ твоѧ̀ и҆ вели́кїѧ страда́льческїѧ твоѧ̀ по́двиги по достоѧ́нїю, сла́внаѧ мч҃нице параске́ѵо: кто́ бо повѣ́сть страда̑нїѧ твоѧ̑ и҆ добродѣ́тєли: на сꙋди́щи бо и҆сповѣ́давши и҆́стиннагѡ бг҃а, ѿ безчеловѣ́чныхъ мꙋчи́телей претерпѣ́ла є҆сѝ лю̑таѧ болѣ́знєннаѧ страда̑нїѧ: и҆ въ си́хъ жесто́кихъ болѣ́знехъ бы́вши па́лицами бїе́ма, желѣ́зными ноготьмѝ строга́ема и҆ ѻ҆гне́мъ пали́ма, ничто́же и҆́но вѣща́ла є҆сѝ къ созда́телю твоемꙋ̀, то́кмѡ сїѐ: сп҃сѝ мѧ̀, гдⷭ҇и, недосто́йнꙋю рабꙋ̀, не разлꙋчѝ менѐ, хрⷭ҇тѐ, ѿ твоегѡ̀ жела́нїѧ. Смире́ннѡ помина́юще сицева̑ѧ твоѧ̀ страда̑нїѧ, ᲂу҆миле́ннꙋю пѣ́снь прино́симъ тѝ, глаго́люще:

Ра́дꙋйсѧ, кро́вїю страда́нїѧ твоегѡ̀ хрⷭ҇тꙋ̀ бг҃ꙋ ᲂу҆невѣ́стившаѧсѧ: ра́дꙋйсѧ, стрⷭ҇тє́мъ хрⷭ҇то́вымъ подража́вшаѧ.

Ра́дꙋйсѧ, любвѐ ра́ди гдⷭ҇ни жестѡ́кїѧ мꙋчє́нїѧ претерпѣ́вшаѧ: ра́дꙋйсѧ, ѿ нбⷭ҇нагѡ цр҃ѧ̀ бл҃голѣ́пный вѣне́цъ воспрїѧ́вшаѧ.

Ра́дꙋйсѧ, ꙗ҆́кѡ всѣ̑мъ вѣ̑рнымъ воспомина́нїе твоѐ пресла́дко: ра́дꙋйсѧ, ꙗ҆́кѡ все́й цр҃кви хрⷭ҇то́вой и҆́мѧ твоѐ пречтⷭ҇нѡ.

Ра́дꙋйсѧ, досточꙋ́дное а҆́гг҃лѡмъ и҆ чл҃вѣ́кѡмъ зрѣ́лище бы́вшаѧ: ра́дꙋйсѧ, и҆ самѣ́хъ мꙋчи́телей непобѣди́мымъ терпѣ́нїемъ твои́мъ ᲂу҆диви́вшаѧ.

Ра́дꙋйсѧ, ꙗ҆́кѡ са́мъ гдⷭ҇ь свы́ше призрѣ̀ на твоѧ̑ страда̑нїѧ: ра́дꙋйсѧ, ꙗ҆́кѡ са́мъ то́й подвигополо́жникъ похвалѝ твоѧ̑ пѡ́двиги.

Ра́дꙋйсѧ, дѣ́вамъ добро́то и҆ похвале́нїе: ра́дꙋйсѧ, мч҃никѡмъ красото̀ и҆ вѣ̑рнымъ ᲂу҆тѣше́нїе.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ і҃

Сп҃стѝ хотѧ̀ дꙋ́шꙋ твою̀, ѡ҆ тѣ́лѣ твое́мъ всѧ́чески небрегла̀ є҆сѝ, ст҃а́ѧ мч҃нице параске́ѵо: є҆гда́ бо на тѧ̀ и҆ ме́чное на сме́рть ѡ҆сꙋжде́нїе и҆зы́де ѿ беззако́ннагѡ мꙋчи́телѧ, ты̀ под̾ ме́чь ѻ҆́стрый, а҆́ки под̾ вѣне́цъ кра́сный, ра́достнѡ потекла̀ є҆сѝ: и҆ во главꙋ̀ ᲂу҆сѣкнове́на бы́вши, дꙋше́ю твое́ю воспари́ла є҆сѝ въ черто́гъ жениха̀ твоегѡ̀ безсме́ртнагѡ, хрⷭ҇та̀ бг҃а, є҆мꙋ́же вы́нꙋ на нб҃сѣ́хъ ны́нѣ воспѣва́еши: А҆ллилꙋ́їа.

І҆́косъ і҃

Стѣна̀ была̀ є҆сѝ крѣ́пка и҆ непоколеби́ма во и҆сповѣ́данїи вѣ́ры въ трїеди́наго бг҃а: сегѡ̀ ра́ди многоболѣ́знєннаѧ страда̑нїѧ ѿ мꙋчи́телѧ претерпѣ́ла є҆сѝ, и҆ до́брѣ сконча́вши тече́нїе твоѐ, вѣне́цъ ѿ хрⷭ҇та̀ бг҃а прїѧ́ла є҆сѝ, и҆ а҆́гг҃льскихъ ликостоѧ́нїй на нб҃сѝ сподо́биласѧ є҆сѝ. Тѣ́мже воспомина́юще твоѧ̑ пѡ́двиги, ᲂу҆бл҃жа́емъ тѧ̀, многострада́льнаѧ:

Ра́дꙋйсѧ, тече́нїе мч҃ническагѡ пꙋтѝ до́брѣ сконча́вшаѧ: ра́дꙋйсѧ, вѣ́рꙋ безсме́ртномꙋ женихꙋ̀ хрⷭ҇тꙋ̀ до сме́рти сохра́ншаѧ.

Ра́дꙋйсѧ, въ житїѝ твое́мъ бг҃оꙋго́дными дѣ́лы гдⷭ҇еви послꙋжи́вшаѧ: ра́дꙋйсѧ, за любо́вь ко хрⷭ҇тꙋ̀ бг҃ꙋ всю̀ мїрскꙋ́ю сꙋетꙋ̀ ѿве́ргшаѧ.

Ра́дꙋйсѧ, си́лою свы́ше на бра́нь проти́вꙋ си́лъ преиспо́днихъ препоѧ́саннаѧ: ра́дꙋйсѧ, побѣдоно́сною сла́вою въ вы́шнихъ ѿ хрⷭ҇та̀ побѣди́телѧ ѡ҆дѣ́ѧннаѧ.

Ра́дꙋйсѧ, ѻ҆рꙋ́жїемъ бл҃говоле́нїѧ бж҃їѧ вѣнча́ннаѧ на землѝ: ра́дꙋйсѧ, цвѣ́томъ неꙋвѧда́емымъ ᲂу҆кра́шеннаѧ на нб҃сѝ.

Ра́дꙋйсѧ, хрⷭ҇тїа́нѡмъ крѣ́пкое прибѣ́жище: ра́дꙋйсѧ, вѣ̑рнымъ тве́рдое застꙋпле́нїе.

Ра́дꙋйсѧ, безпомо́щныхъ защи́тительнице: ра́дꙋйсѧ, си́рыхъ покрови́тельнице.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ а҃і

Пѣ́нїе на́ше всѧ́кое побѣжда́етсѧ, и҆ мно́гое мно́жество хвалє́бныхъ пѣ́сней, восписꙋ́емыхъ тѝ, нѣ́сть дово́льнѡ по достоѧ́нїю восхвали́ти тѧ̀, прехва́льнаѧ мч҃нице параске́ѵо: ѻ҆ба́че мл҃твами твои́ми полꙋча́юще ѿ хрⷭ҇та̀ бг҃а неисчє́тнаѧ бл҃годѣѧ̑нїѧ, бл҃года́рни сꙋ́ще, пое́мъ ѡ҆ тебѣ̀ є҆мꙋ̀: А҆ллилꙋ́їа.

І҆́косъ а҃і

Возсїѧ́вши на́мъ, ꙗ҆́кѡ свѣти́ло свѣтоза́рное, мра́къ де́мѡнскїй ѿ чл҃вѣ̑къ твои́ми мольба́ми ѿгонѧ́еши, ст҃а́ѧ мч҃нице параске́ѵо, прїе́мши бо бл҃года́ть цѣли́ти недꙋ̑ги, всѣ̑мъ вѣ̑рнымъ, притека́ющымъ къ тебѣ̀ съ мл҃твою, подае́ши и҆сцѣле́нїе: кровоточи́вїи бо и҆ прокаже́ннїи прикоснове́нїемъ къ ра́цѣ моще́й твои́хъ ѡ҆чища́ютсѧ, глꙋсі́и слы́шатъ, разсла́бленнїи здра́ви быва́ютъ призыва́нїемъ ст҃а́гѡ твоегѡ̀ и҆́мене. Мы́ же, помина́юще ско́рое застꙋпле́нїе твоѐ, вопїе́мъ тѝ:

Ра́дꙋйсѧ, бл҃гово́ннаѧ смѵ́рно, цр҃ковь хрⷭ҇то́вꙋ бл҃гоꙋха́ющаѧ: ра́дꙋйсѧ, бл҃гонаде́жнаѧ мл҃твеннице, ѳѷмїа́мъ мл҃твы ѡ҆ на́съ къ бг҃ꙋ приносѧ́щаѧ.

Ра́дꙋйсѧ, мѷрополо́жнице и҆сцѣле́нїй неѡскꙋ́днаѧ: ра́дꙋйсѧ, сокро́вище бж҃їихъ дарѡ́въ неиждива́емое.

Ра́дꙋйсѧ, ча́ше, ѿ ѻ҆би́лїѧ до́мꙋ бж҃їѧ че́рплющаѧ ра́дость: ра́дꙋйсѧ, сосꙋ́де, ѿ и҆сполне́нїѧ хрⷭ҇то́ва прїе́млющїй всѣ́хъ бл҃гъ нбⷭ҇ныхъ сла́дость.

Ра́дꙋйсѧ, бл҃года́тнꙋю ро́сꙋ и҆сцѣле́нїй всѣ̑мъ вѣ̑рнымъ и҆сточа́ющаѧ: ра́дꙋйсѧ, скѡ́рбныѧ сердца̀ недꙋ́жныхъ дарова́нїемъ и҆сцѣле́нїй ѡ҆бодрѧ́ющаѧ.

Ра́дꙋйсѧ, ꙗ҆́кѡ хрⷭ҇то́съ бг҃ъ за до́блественнаѧ твоѧ̑ страда̑нїѧ сла́вꙋ и҆ велелѣ́пїе на тѧ̀ возложи́лъ є҆́сть: ра́дꙋйсѧ, ꙗ҆́кѡ тебѣ̀ цр҃ь ца́рствꙋющихъ и҆ гдⷭ҇ь гдⷭ҇ствꙋющихъ бл҃же́нство црⷭ҇твїѧ своегѡ̀ дарова́лъ є҆́сть.

Ра́дꙋйсѧ, црⷭ҇твїѧ хрⷭ҇то́ва сонаслѣ́днице: ра́дꙋйсѧ, сла́вы бж҃їѧ соприча́стнице.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ в҃і

Бл҃года́ть ѿ бг҃а дана̀ тѝ є҆́сть подава́ти и҆сцѣлє́нїѧ всѣ̑мъ тре́бꙋющимъ, ꙗ҆́кѡ ѿ и҆сто́чника пребога́тагѡ, храни́ти же и҆ соблюда́ти ѿ разли́чныхъ болѣ́зней, бѣ́дъ и҆ скорбе́й всѧ́каго чл҃вѣ́ка, вѣ́рою, любо́вїю и҆ бл҃гоговѣ́нїемъ чтⷭ҇на̑ѧ твоѧ̑ страда̑нїѧ воспомина́ющагѡ и҆ почита́ющагѡ. Мл҃твеннагѡ твоегѡ̀ ѡ҆ на́съ предста́тельства и҆ бл҃года́тныхъ дарова́нїй не лишѝ и҆ на́съ, многострада́льнаѧ хрⷭ҇то́ва страстоте́рпице, да и҆ мы̀, здра́ви сꙋ́ще тѣ́ломъ и҆ дꙋ́хомъ, въ ны́нѣшней и҆ бꙋ́дꙋщей жи́зни ѡ҆ тебѣ̀ пое́мъ бг҃ꙋ: А҆ллилꙋ́їа.

І҆́косъ в҃і

Пое́мъ твоѧ̑ крѣ̑пкїѧ пѡ́двиги, почита́емъ страда̑нїѧ, хва́лимъ долготерпѣ́нїе, ᲂу҆блажа́емъ ст҃ꙋ́ю твою̀ кончи́нꙋ, сла́вимъ твоѐ въ не́мощнѣмъ тѣ́лѣ непобѣди́мое мꙋ́жество, и҆́мже на землѝ и҆ на нб҃сѝ просла́виласѧ є҆сѝ, ст҃а́ѧ и҆ добропобѣ́днаѧ мч҃нице параске́ѵо: и҆ въ че́сть твои́хъ побѣдоно́сныхъ по́двигѡвъ и҆ страда́нїй похва̑льнаѧ восписꙋ́емъ тѝ сїѧ̑:

Ра́дꙋйсѧ, ѿ а҆́гг҃льскихъ чинѡ́въ въ сожи́тельство и҆̀хъ любе́знѡ прїѧ́таѧ: ра́дꙋйсѧ, ѿ дѣ́вственныхъ ликѡ́въ въ черто́гъ нбⷭ҇ный ра́достнѡ введе́ннаѧ.

Ра́дꙋйсѧ, ѿ мч҃ническихъ полкѡ́въ под̾ вѣне́цъ сла́вы провожда́емаѧ во гла́сѣ ра́дованїѧ: ра́дꙋйсѧ, ѿ нбⷭ҇ныхъ жи́телей прїе́млющаѧ ѡ҆ гдⷭ҇ѣ цѣлова́нїе.

Ра́дꙋйсѧ, ꙗ҆́кѡ мзда̀ твоѧ̀ мно́га є҆́сть на нб҃сѣ́хъ: ра́дꙋйсѧ, ꙗ҆́кѡ ра́дость твоѧ̀ вѣ́чна є҆́сть во свѣ́тлости ст҃ы́хъ.

Ра́дꙋйсѧ, въ нбⷭ҇номъ черто́зѣ бж҃е́ственнагѡ жениха̀ твоегѡ̀ со а҆́гг҃лы є҆гѡ̀ веселѧ́щаѧсѧ: ра́дꙋйсѧ, лицезрѣ́нїемъ всебл҃га́гѡ гдⷭ҇а та́мѡ вкꙋ́пѣ со ст҃ы́ми наслажда́ющаѧсѧ.

Ра́дꙋйсѧ, дꙋше́вныхъ и҆ тѣле́сныхъ недꙋ́гѡвъ на́шихъ цѣли́тельнице: ра́дꙋйсѧ, дꙋшесп҃си́тельныхъ бл҃гъ и҆ нбⷭ҇ныхъ дарѡ́въ пода́тельнице.

Ра́дꙋйсѧ, ꙗ҆́кѡ тобо́ю ѿ неча́ѧнныѧ сме́рти сохрани́тисѧ ᲂу҆пова́емъ: ра́дꙋйсѧ, ꙗ҆́кѡ твои́мъ застꙋпле́нїемъ вѣ́чнꙋю жи́знь ѿ хрⷭ҇та̀ бг҃а ᲂу҆лꙋчи́ти бл҃гонаде́жнѡ ча́емъ.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ г҃і

Ѽ, ст҃а́ѧ, премꙋ́драѧ и҆ всехва́льнаѧ мч҃нице, невѣ́сто хрⷭ҇то́ва параске́ѵо. Ѿ бл҃гоговѣ́йныхъ сердє́цъ приноси́мꙋю тѝ, а҆́ще и҆ недосто́йнꙋю, хвале́бнꙋю пѣ́снь сїю̀ прїимѝ ѿ на́съ, ꙗ҆́кѡ ᲂу҆се́рднꙋю же́ртвꙋ сердє́цъ, лю́бѧщихъ тѧ̀ и҆ чествꙋ́ющихъ ст҃ꙋ́ю па́мѧть твою̀. Ѡ҆хранѧ́й на́съ мл҃твами твои́ми ст҃ы́ми, и҆ всѧ̑ лю́ди, притека́ющыѧ къ чтⷭ҇нѣ́й і҆кѡ́нѣ твое́й и҆ съ любо́вїю лобыза́ющыѧ ю҆̀, и҆збавлѧ́й ѿ всѧ́кагѡ ѕла́гѡ ѡ҆бстоѧ́нїѧ и҆ ско́рби: да ти́хое и҆ безмо́лвное житїѐ пожи́вше въ ны́нѣшнемъ вѣ́цѣ, бл҃же́нство вѣ́чное наслѣ́димъ и҆ кꙋ́пнѡ съ тобо́ю и҆ всѣ́ми ст҃ы́ми вы́нꙋ сподо́бимсѧ воспѣва́ти бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡмъ чтⷭ҇нꙋ́ю и҆ вселюбе́знꙋю чⷭ҇тотꙋ̀ твоегѡ̀ се́рдца, многострада́льнаѧ параске́ѵо, непоро́чнѡ сохра́нши, а҆́гг҃лѡмъ собесѣ́дница бы́ти сподо́биласѧ є҆сѝ. Съ ни́миже воспѣва́ѧ трист҃ꙋ́ю пѣ́снь бг҃ꙋ на нб҃сѝ, ᲂу҆слы́ши и҆ на́съ, вѣ́рою и҆ любо́вїю чтꙋ́щихъ тѧ̀ и҆ вопїю́щихъ тѝ хвалє́нїѧ сїѧ̑ на землѝ:

Ра́дꙋйсѧ, ѻ҆трокови́це, бг҃омъ ѻ҆ц҃е́мъ пред̾ꙋста́вленнаѧ бы́ти соѻбра́зной въ страда́нїи ѻ҆́бразꙋ сн҃а є҆гѡ̀: ра́дꙋйсѧ, и҆ сн҃омъ бж҃їимъ ᲂу҆крѣпле́ннаѧ на по́двиги страда́льческїѧ.

Ра́дꙋйсѧ, и҆́стиннꙋю вѣ́рꙋ въ животворѧ́щꙋю и҆ є҆диносꙋ́щнꙋю трⷪ҇цꙋ ст҃ѡ соблю́дшаѧ: ра́дꙋйсѧ, ст҃о́е цѣломꙋ́дрїе и҆ дѣ́вственнꙋю непоро́чность до́брѣ сохра́ншаѧ.

Ра́дꙋйсѧ, ꙗ҆́кѡ ра́достнѡ ᲂу҆невѣ́стиласѧ є҆сѝ безсме́ртномꙋ нбⷭ҇номꙋ женихꙋ̀ хрⷭ҇тꙋ̀: ра́дꙋйсѧ, земна́гѡ ѡ҆брꙋ́чника па́че нбⷭ҇нагѡ зна́ти не восхотѣ́вшаѧ.

Ра́дꙋйсѧ, ꙗ҆́кѡ цвѣ́тъ чⷭ҇тоты̀, въ неꙋвѧда́емой сла́вѣ цвѣтꙋ́щаѧ: ра́дꙋйсѧ, ꙗ҆́кѡ крі́нъ, вонѧ́ми твои́хъ добродѣ́телей на́мъ бл҃гоꙋха́ющаѧ.

Ра́дꙋйсѧ, въ нбⷭ҇номъ вертогра́дѣ неизрече́нною ра́достїю наслажда́ющаѧсѧ: ра́дꙋйсѧ, краснѣ́йшагѡ па́че сынѡ́въ чл҃вѣ́ческихъ зрѣ́нїемъ та́мѡ ᲂу҆тѣша́ющаѧсѧ.

Ра́дꙋйсѧ, ᲂу҆бѣли́вшаѧ ри̑зы твоѧ̀ въ кро́ви а҆́гнчей на землѝ: ра́дꙋйсѧ, въ ли́кѣ дѣ́вственницъ предстоѧ́щаѧ бж҃їемꙋ а҆́гнцꙋ на нб҃сѝ.

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Конда́къ а҃

И҆збра́нной бг҃омъ ѿ ро́да бл҃горо́днагѡ, і҆коні́йскагѡ гра́да, премꙋ́дрой и҆ всехва́льной невѣ́стѣ хрⷭ҇то́вѣ, ꙗ҆́кѡ и҆збавлѧ́емїи тобо́ю ѿ и҆скꙋше́нїй и҆ бѣ́дъ, бл҃года́рствєннаѧ пѣ̑нїѧ и҆ хвалє́нїѧ восписꙋ́емъ тѝ мл҃твенницы твоѝ, ст҃а́ѧ и҆ многострада́льнаѧ мч҃нице параске́ѵо. Ты́ же, и҆мѣ́ѧ дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, да со ᲂу҆миле́нїемъ и҆ ра́достїю зове́мъ тѝ:

Ра́дꙋйсѧ, параске́ѵо, невѣ́сто хрⷭ҇то́ва всехва́льнаѧ.

Моли́твы

Ст҃а́ѧ невѣ́сто хрⷭ҇то́ва, многострада́льнаѧ мч҃нице параске́ѵо. Вѣ́мы, ꙗ҆́кѡ ѿ ю҆́ности твоеѧ̀ ты̀ все́ю дꙋше́ю твое́ю и҆ всѣ́мъ се́рдцемъ твои́мъ возлюби́ла є҆сѝ цр҃ѧ̀ сла́вы, хрⷭ҇та̀ сп҃си́телѧ, и҆ є҆мꙋ̀ є҆ди́номꙋ ᲂу҆невѣ́стиласѧ є҆сѝ, разда́вши и҆мѣ̑нїѧ твоѧ̀ неимꙋ́щымъ и҆ бѣ̑днымъ. Ты̀ си́лою бл҃гоче́стїѧ твоегѡ̀, твои́мъ цѣломꙋ́дрїемъ и҆ пра́ведностїю, ꙗ҆́кѡ лꙋча́ми со́лнечными, просїѧ́ла є҆сѝ, жи́вши ст҃ѡ средѝ невѣ́рныхъ и҆ безбоѧ́зненнѡ проповѣ́давши и҆̀мъ хрⷭ҇та̀ бг҃а. Ты̀, ѿ дне́й ю҆́ности твоеѧ̀, наꙋче́ннаѧ твои́ми роди́телѧми, всегда̀ бл҃гоговѣ́йнѡ че́ствовала днѝ и҆скꙋпи́тельныхъ страсте́й гдⷭ҇а на́шегѡ і҆и҃са хрⷭ҇та̀, є҆гѡ́же ра́ди и҆ сама̀ доброво́льнѡ пострада́ла є҆сѝ. Ты̀, десни́цею а҆́гг҃ла бж҃їѧ ѿ неисцѣ́льныхъ ра̑нъ ди́внѡ и҆сцѣле́ннаѧ и҆ воспрїѧ́вшаѧ неизрече́ннꙋю свѣ́тлость, и҆зꙋми́ла є҆сѝ невѣ́рныхъ мꙋчи́телей. Ты̀, и҆́менемъ гдⷭ҇а на́шегѡ і҆и҃са хрⷭ҇та̀ и҆ си́лою мл҃твы твоеѧ̀ въ ка́пищѣ ꙗ҆зы́честѣмъ всѣ́хъ і҆́дѡлѡвъ до́лꙋ пове́ргши, въ пра́хъ сокрꙋши́ла є҆сѝ ѧ҆̀. Ты̀, ѡ҆палѧ́емаѧ свѣща́ми, є҆ди́ною мл҃твою твое́ю ко всеси́льномꙋ гдⷭ҇ꙋ ᲂу҆гаси́ла є҆сѝ ѻ҆́гнь є҆сте́ственный, и҆ тѣ́мъ же пла́менемъ, чꙋде́снѣ возжже́ннымъ чрез̾ а҆́гг҃ла бж҃їѧ, попали́вши неи́стовыхъ беззако́нникѡвъ, мно́гъ наро́дъ привела̀ є҆сѝ къ позна́нїю и҆́стиннагѡ бг҃а. Ты̀, во сла́вꙋ гдⷭ҇а прїѧ́вши ме́чное главы̀ твоеѧ̀ ᲂу҆сѣче́нїе ѿ мꙋчи́телей, до́блественнѡ сконча́ла є҆сѝ страда́льческїй тво́й по́двигъ, возше́дши дꙋше́ю твое́ю на нб҃са̀, въ черто́гъ вожделѣ́ннагѡ твоегѡ̀ жениха̀ хрⷭ҇та̀ цр҃ѧ̀ сла́вы, ра́достнѡ срѣ́тшагѡ тѧ̀ си́мъ нбⷭ҇нымъ гла́сомъ: ра́дꙋйтесѧ, пра́веднїи, ꙗ҆́кѡ мч҃ница параске́ѵа ᲂу҆вѣнча́сѧ. Тѣ́мже и҆ мы̀ дне́сь привѣ́тствꙋемъ тѧ̀, многострада́льнаѧ, и҆, взира́юще на ст҃ꙋ́ю твою̀ і҆кѡ́нꙋ, со ᲂу҆миле́нїемъ вопїе́мъ тѝ: всечестна́ѧ параске́ѵо, вѣ́мы, ꙗ҆́кѡ ве́лїе и҆́маши дерзнове́нїе ко гдⷭ҇ꙋ: ᲂу҆молѝ ᲂу҆́бѡ є҆го̀ чл҃вѣколю́бца и҆ ѡ҆ на́съ, предстоѧ́щихъ и҆ молѧ́щихсѧ тѝ. Да пода́стъ ѻ҆́нъ и҆ на́мъ, ꙗ҆́кѡже тебѣ̀, терпѣ́нїе и҆ бл҃годꙋ́шїе въ бѣда́хъ и҆ ско́рбныхъ ѡ҆бстоѧ́нїихъ: да да́рꙋетъ ѻ҆́нъ на́мъ, хода́тайствомъ твои́мъ и҆ застꙋпле́нїемъ, ра́достное, бл҃годе́нственное и҆ ми́рное житїѐ, здра́вїе же и҆ сп҃се́нїе, и҆ во всѣ́мъ бл҃го́е поспѣше́нїе. Возлю́бленномꙋ на́шемꙋ ѻ҆те́чествꙋ, да ниспо́слетъ ст҃о́е своѐ бл҃гослове́нїе и҆ ми́ръ, и҆ всѣ̑мъ правосла̑внымъ хрⷭ҇тїа́нѡмъ да пода́стъ твои́ми ст҃ы́ми мл҃твами ᲂу҆твержде́нїе въ вѣ́рѣ, бл҃гоче́стїи и҆ ст҃ости, преспѣ́ѧнїе же въ хрⷭ҇тїа́нстѣй любвѝ и҆ всѧ́кой добродѣ́тели: да ѡ҆чи́ститъ на́съ грѣ́шныхъ ѿ всѧ́кїѧ скве́рны и҆ поро́ка, да ѡ҆гради́тъ на́съ ст҃ы́ми свои́ми а҆́гг҃лами, да застꙋ́питъ, сохрани́тъ и҆ поми́лꙋетъ всѣ́хъ ст҃о́ю свое́ю бл҃года́тїю и҆ содѣ́лаетъ наслѣ́дниками и҆ прича́стниками нбⷭ҇нагѡ своегѡ̀ црⷭ҇твїѧ. И҆ та́кѡ ᲂу҆лꙋчи́вше сп҃се́нїе твои́ми ст҃ы́ми мл҃твами, предста́тельствомъ и҆ застꙋпле́нїемъ, всесла́внаѧ невѣ́сто хрⷭ҇то́ва параске́ѵо, просла́вимъ всѝ прест҃о́е и҆ великолѣ́пое и҆́мѧ ди́внагѡ во ст҃ы́хъ свои́хъ и҆́стиннагѡ бг҃а, ѻ҆ц҃а̀ и҆ сн҃а и҆ ст҃а́гѡ дх҃а, всегда̀, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.