Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ а҆рхїепі́скопꙋ стефа́нꙋ сꙋ́рожскомꙋ, и҆сповѣ́дникꙋ

Свт. Стефана исповедника, архиеп. Сурожского (790-795) 28 декабря 2026

Конда́къ а҃

И҆збра́нный чꙋдотво́рче и҆ преди́вный и҆сповѣ́дниче хрⷭ҇то́въ, мл҃твенниче ѡ҆ дꙋша́хъ на́шихъ, ст҃и́телю стефа́не, ты́ же ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ и҆ напа́стей свободѝ зовꙋ́щихъ:

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

І҆́косъ а҃

А҆́гг҃лѡвъ собесѣ́дниче и҆ человѣ́кѡвъ наста́вниче ны́нѣ, ꙗ҆́кѡ бж҃їй слꙋжи́телю, предстоѧ̀ съ вы́шними си́лами, ст҃и́телю стефа́не, мо́лиши ѡ҆ всѣ́хъ на́съ хрⷭ҇та̀ бг҃а на́шего, сегѡ̀ ра́ди бл҃года́рнѡ во ᲂу҆миле́нїи зове́мъ тѝ:

Ра́дꙋйсѧ, чистото́ю и҆ свѧты́нею а҆́гг҃лѡмъ ᲂу҆подо́бивыйсѧ: ра́дꙋйсѧ, посто́мъ и҆ бдѣ́нїемъ безстра́стїѧ дости́гнꙋвый.

Ра́дꙋйсѧ, вѣ́рныхъ непрело́жное ᲂу҆твержде́нїе: ра́дꙋйсѧ, невѣ́рныхъ бг҃омꙋ́дренное ѡ҆бличе́нїе.

Ра́дꙋйсѧ, а҆пⷭ҇льскихъ преда́нїй вѣ́рный храни́телю: ра́дꙋйсѧ, непоколеби́мый правосла́вїѧ сто́лпе.

Ра́дꙋйсѧ, тве́рдое ѡ҆гражде́нїе хрⷭ҇то́вой цр҃кви: ра́дꙋйсѧ, дѣ́лателю до́брый вертогра́да гдⷭ҇нѧ.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ в҃

Бꙋ́рю мїрска́гѡ житїѧ̀ и҆ тѧжелоно́сныхъ страсте́й во́лны проше́дъ, ѡ҆брѣ́лъ є҆сѝ ти́хое приста́нище и҆ въ пꙋсты́ню всели́всѧ, нелѣ́ностнѡ хрⷭ҇тꙋ̀ порабо́талъ є҆сѝ, во мно́зѣ долготерпѣ́нїи, ᲂу҆мерщвлѧ́ѧ по́хѡти плотскі́ѧ бг҃а ра́ди и҆ поѧ̀ є҆мꙋ̀: А҆ллилꙋ́їа.

І҆́косъ в҃

Ра́зꙋмъ свы́ше просвѣще́ннымъ и҆ дх҃омъ ст҃ы́мъ ѡ҆заре́ннымъ невѣ́рныхъ люде́й сꙋ́рожскихъ вѣ́рою хрⷭ҇то́вою просвѣти́лъ є҆сѝ, сегѡ̀ ра́ди вопїе́мъ тѝ:

Ра́дꙋйсѧ, трꙋдѡ́въ а҆пⷭ҇льскихъ ревни́телю: ра́дꙋйсѧ, бг҃осло́вїѧ и҆́стиннагѡ премꙋ́дрый ᲂу҆чи́телю.

Ра́дꙋйсѧ, дрꙋгѡ́мъ твои̑мъ сп҃се́нїѧ жела́вый: ра́дꙋйсѧ, во дво́ръ хрⷭ҇то́вы цр҃кве си́хъ призва́вый.

Ра́дꙋйсѧ, ꙗ҆́кѡ нбⷭ҇ными стезѧ́ми невозвра́тнѡ ше́ствовалъ є҆сѝ: ра́дꙋйсѧ, ꙗ҆́кѡ на высотꙋ̀ добродѣ́телей возше́лъ є҆сѝ.

Ра́дꙋйсѧ, страны̀ сꙋ́рожскїѧ просвѣти́телю: ра́дꙋйсѧ, хрⷭ҇тїа́нъ страны̀ сїѧ̀ нбⷭ҇ный покрови́телю.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ г҃

Ви́дѧ въ творе́нїихъ бж҃їихъ, а҆́ки въ зерца́лѣ, премꙋ́дрость и҆ сла́вꙋ творца̀, къ немꙋ̀ дꙋ́хомъ вы́нꙋ возноси́лсѧ є҆сѝ, бг҃омꙋ́дре. свѣ́томъ бг҃оразꙋ́мїѧ твоегѡ̀ и҆ на́съ ѡ҆зарѝ, да вопїе́мъ кꙋ́пнѡ съ тобо́ю бг҃ꙋ: А҆ллилꙋ́їа.

І҆́косъ г҃

И҆мѣ́ѧ въ се́рдце свое́мъ ѻ҆́гнь любвѐ бжⷭ҇твенныѧ, сп҃се́нїѧ ра́ди дꙋ́шъ человѣ́ческихъ па́стырски подвиза́лсѧ є҆сѝ, бг҃омꙋ́дре, проти́вꙋ ко́знемъ дїа́вѡльскимъ и҆ побѣди́тельнымъ крⷭ҇та̀ ѻ҆рꙋ́жїемъ, ꙗ҆́кѡ паꙋчи́нꙋ лꙋка́вагѡ сѣ̑ти разсѣка́лъ є҆сѝ. тѣ́мже прїимѝ ѿ на́съ пѣ́снь сїю̀:

Ра́дꙋйсѧ, ра́бе бж҃їй, благі́й и҆ вѣ́рный: ра́дꙋйсѧ, ᲂу҆чи́телю смире́нїѧ и҆ цѣломꙋ́дрїѧ.

Ра́дꙋйсѧ, ѡ҆́бразе кро́тости и҆ послꙋша́нїѧ: ра́дꙋйсѧ, наста́вниче дѣ́лъ до́брыхъ.

Ра́дꙋйсѧ, ѻ҆гневи́дный сто́лпе, наставлѧ́ѧй на пꙋ́ть сп҃се́нїѧ: ра́дꙋйсѧ, свѣти́льниче свѣтоза́рный, вѣ́рныѧ просвѣща́ѧй.

Ра́дꙋйсѧ, неисчерпа́емый сосꙋ́де блгⷣти хрⷭ҇то́вы: ра́дꙋйсѧ, чи́стое прїѧ́телище дх҃а ст҃а́гѡ.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ д҃

Ст҃ы́й ге́рманъ, на мл҃твѣ стоѧ̀, пред̾извѣще́нъ бы́сть ѿ а҆́гг҃ла ѡ҆б̾ и҆збра́нїи тѧ̀ бг҃омъ во ст҃и́телѧ гра́да сꙋ́рожа, ты́ же ѻ҆́ч҃е стефа́не со смире́нїемъ тꙋ́юже вѣ́сть принѧ́лъ є҆сѝ, поѧ̀ бг҃ꙋ: А҆ллилꙋ́їа.

І҆́косъ д҃

Ви́дѣвше въ тебѣ̀ сꙋ́рожстїи лю́дїе ст҃и́телѧ, ꙗ҆́кѡ а҆́гг҃ла, зна́менїе блгⷣти нбⷭ҇ныѧ носѧ́ща, возра́довашасѧ ра́достїю неизглаго́ланною: ты́ же до́брѣ внима́лъ себѣ̀ и҆ всемꙋ̀ ста́дꙋ, въ не́мъ же тѧ̀ дх҃ъ ст҃ы́й поста́ви є҆пⷭ҇копа, ᲂу҆се́рднѡ па́слъ є҆сѝ цр҃ковь гдⷭ҇а и҆ бг҃а, ꙗ҆́кѡ сло́во возда́ти хотѧ̀: сегѡ̀ ра́ди ᲂу҆бл҃жа́емъ тѧ̀, ѻ҆́ч҃е стефа́не, зовꙋ́ще:

Ра́дꙋйсѧ, человѣ́че бж҃їй, прпⷣбїемъ а҆́ки по́ѧсомъ златы́мъ препоѧ́санный: ра́дꙋйсѧ, дрꙋ́же хрⷭ҇то́въ, ст҃и́тельствомъ, а҆́ки би́серомъ драги́мъ преꙋкраше́нный.

Ра́дꙋйсѧ, во́ине хрⷭ҇то́въ, непобѣди́мый: ра́дꙋйсѧ, стра́же до́мꙋ бж҃їѧ неꙋсы́пный.

Ра́дꙋйсѧ, мздꙋ̀ трꙋдѡ́въ свои́хъ ѿ хрⷭ҇та̀ воспрїѧ́вый: ра́дꙋйсѧ, ꙗ҆́кѡ воше́лъ є҆сѝ въ ра́дость гдⷭ҇а своегѡ̀.

Ра́дꙋйсѧ, страны̀ таври́ческой свѣ́тлое ᲂу҆краше́нїе: ра́дꙋйсѧ, преди́вное ѡ҆сїѧ́нїе нбⷭ҇ныѧ сла́вы.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ є҃

Сп҃сти́сѧ всѣ̑мъ хотѧ̀ пребл҃гі́й гдⷭ҇ь ꙗ҆вѝ тѧ̀, ст҃и́телю ѻ҆́ч҃е стефа́не, ѡ҆́бразъ житїѧ̀ пра́веднагѡ: кто́ бо не ᲂу҆мили́тсѧ, ви́дѧ твоѐ безмѣ́рное ко всѣ̑мъ бл҃госе́рдїе; тѣ́мже ве́лїю къ на́мъ млⷭ҇ть бж҃їю сла́вѧща вопїе́мъ: А҆ллилꙋ́їа.

І҆́косъ є҃

Стѣна̀ была̀ є҆сѝ по́мощи и҆ застꙋпле́нїѧ всѣ̑мъ безпомѡ́щнымъ и҆ напа́ствꙋємымъ, ст҃и́телю стефа́не, и҆ милосе́рдїѧ неистощи́мое сокро́вище. сегѡ̀ ра́ди ди́внагѡ во ст҃ы́хъ свои́хъ бг҃а сла́вѧще ᲂу҆бл҃жа́емъ тѧ̀ си́це:

Ра́дꙋйсѧ, а҆рхїере́ю, ѿ самогѡ̀ гдⷭ҇а прорече́нный: ра́дꙋйсѧ, мꙋ́жꙋ жела́нїй, пастѝ ста́до хрⷭ҇то́во свы́ше и҆збра́нный.

Ра́дꙋйсѧ, пастыренача́льника і҆и҃са хрⷭ҇та̀ бл҃говоле́нїе: ра́дꙋйсѧ, многосвѣ́тлый цр҃кве свѣти́льниче.

Ра́дꙋйсѧ, а҆пⷭ҇лѡвъ соприча́стниче: ра́дꙋйсѧ, ст҃и́телей вели́кихъ сопресто́льниче.

Ра́дꙋйсѧ, чистоты̀ серде́чныѧ сокро́вище: ра́дꙋйсѧ, смире́нїѧ хрⷭ҇то́ва зерца́ло.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ ѕ҃

Хотѧ̀ человѣколю́бецъ гдⷭ҇ь ꙗ҆ви́ти въ тебѣ̀, ст҃и́телю, неизрече́нное къ лю́демъ милосе́рдїе, показа̀ тѧ̀ ꙗ҆́кѡ вои́стиннꙋ свѣти́ло бг҃освѣ́тлое, дѣ́лы бо и҆ словесы̀ твои́ми всѣ́хъ приводи́лъ є҆сѝ ко бл҃гоче́стїю. тѣ́мже сїѧ́нїемъ по́двигѡвъ твои́хъ просвѣще́нїи, тебѣ̀ ᲂу҆се́рднѡ велича́емъ и҆ просла́вльшемꙋ тѧ̀ хрⷭ҇тꙋ̀ вопїе́мъ: А҆ллилꙋ́їа.

І҆́косъ ѕ҃

Ви́дѧ себѐ поста́влена на степе́нь а҆рхїере́йства, ст҃и́телю ѻ҆́ч҃е стефа́не, не да́лъ є҆сѝ ѻ҆чи́ма твои́ма сна̀, нижѐ вѣ́ждома твои́ма дрема́нїѧ, поставлѧ́ѧ па́ствѣ твое́й па́стыри смы́слены и҆ всѧ̀ лю́ди ᲂу҆правлѧ́ѧ ко сп҃се́нїю. мы́ же вѣ́дꙋще тѧ̀ бы́ти пастыренача́льника бг҃омꙋ́дренна и҆ строи́телѧ до́мꙋ бж҃їѧ до́бра, взыва́емъ къ тебѣ̀ си́це:

Ра́дꙋйсѧ, крѣ́пкое корми́ло хрⷭ҇то́вы це́ркви: ра́дꙋйсѧ, ни́вы гдⷭ҇ни ᲂу҆се́рдный жа́телю.

Ра́дꙋйсѧ, вѣ́рныхъ крѣ́пкое ᲂу҆твержде́нїе: ра́дꙋйсѧ, невѣ́рныхъ бг҃омꙋ́дренное ѡ҆бличе́нїе.

Ра́дꙋйсѧ, вѣ́рный та́йнъ ст҃ы́хъ строи́телю: ра́дꙋйсѧ, ꙗ҆́кѡ па́стырємъ твои̑мъ благовре́менное и҆ безвре́менное проповѣ́дати заповѣ́далъ є҆сѝ.

Ра́дꙋйсѧ, безстра́стїѧ сосꙋ́де чи́стый: ра́дꙋйсѧ, и҆змла́да хрⷭ҇та̀ возлюби́вый.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ з҃

Бг҃оте́чнаѧ ѕвѣзда̀ ꙗ҆ви́лсѧ є҆сѝ въ странѣ̀ на́шей, наставлѧ́ѧ всѣ́хъ на пꙋ́ть сп҃се́нїѧ: призыва́ющихъ бо тѧ̀ вско́рѣ предварѧ́еши и҆ ѿ всѧ́кихъ бѣ́дъ и҆ напа́стей и҆збавлѧ́еши, вѣ́рныѧ же наꙋча́еши сп҃са́ющемꙋ тобо́ю бг҃ꙋ взыва́ти: А҆ллилꙋ́їа.

І҆́косъ з҃

Бжⷭ҇твеннымъ дх҃омъ просвѣще́нъ, проповѣ́далъ є҆сѝ со дерзнове́нїемъ правосла́вїѧ преда́нїе, всебл҃же́нне стефа́не, и҆ мꙋчи́телѧ своегѡ̀ беззако́нна посрами́лъ є҆сѝ, въ заточе́нїе непра́веднѡ посыла́емъ. мы́ же вѣ́дꙋще такова́ѧ, вопїе́мъ тебѣ̀ си́це:

Ра́дꙋйсѧ, за хрⷭ҇та̀ пострада́вый и҆ мꙋ́чимый: ра́дꙋйсѧ, тве́рдѡ є҆гѡ̀ и҆сповѣ́давый.

Ра́дꙋйсѧ, всѣ́хъ наꙋчи́вый непосра́мленнѡ покланѧ́тисѧ честны̑мъ і҆кѡ́намъ: ра́дꙋйсѧ, предста́телю пред̾ прⷭ҇то́ломъ бж҃їимъ, за на́съ грѣ́шныхъ.

Ра́дꙋйсѧ, весе́лїе землѝ сꙋ́рожскїѧ: ра́дꙋйсѧ, царѧ̀ нечести́ваго ѡ҆бличи́телю.

Ра́дꙋйсѧ, правосла́вїѧ ревни́телю: ра́дꙋйсѧ, нечести́выхъ є҆ресе́й ѡ҆бличи́телю.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ и҃

ѻ҆́тче ѻ҆ц҃є́въ, бг҃оно́сный стефа́не, сꙋ́рожꙋ ᲂу҆твержде́нїе, рабы̑ твоѧ̑ соблюдѝ ѿ всѧ́кагѡ прегрѣше́нїѧ, ви́димыхъ же вра̑гъ и҆ неви́димыхъ, воспѣва́ющихъ бг҃ꙋ: А҆ллилꙋ́їа.

І҆́косъ и҃

Твоегѡ̀ чи́стагѡ и҆ непоро́чнагѡ житїѧ̀, вели́кїй чꙋдотво́рче, человѣ́ческїй ѧ҆зы́къ восхвали́ти и҆ воспѣ́ти, преподо́бїе твоѐ стефа́не, не возмо́жетъ: во всѣ́хъ бо по́двизѣхъ до́бльственнѣ подвиза́лсѧ є҆сѝ, нечести́ваго царѧ̀ ѡ҆бличи́лъ є҆сѝ, че́сти же і҆кѡ́ны наꙋчи́лъ є҆сѝ и҆ ѻ҆тцє́въ догма́ты, всемꙋ́дре, и҆сповѣ́далъ є҆сѝ, сегѡ̀ ра́ди ᲂу҆бл҃жа́емъ тѧ̀ си́це:

Ра́дꙋйсѧ, а҆́гг҃лѡвъ сожи́телю: ра́дꙋйсѧ, а҆пⷭ҇лѡвъ ᲂу҆добре́нїе.

Ра́дꙋйсѧ, и҆́нокѡвъ ᲂу҆краше́нїе: ра́дꙋйсѧ, ст҃и́телей сла́во.

Ра́дꙋйсѧ, мꙋ́ченикѡвъ похвало̀: ра́дꙋйсѧ, сщ҃е́ннаѧ главо̀, ѿ пеле́нъ ѡ҆чи́стивый дх҃омъ.

Ра́дꙋйсѧ, ꙗ҆́кѡ ѕвѣзда̀ свѣ́тлаѧ возсїѧ́вый: ра́дꙋйсѧ, ѿ среды̀ тмы̀ мнѡ́гїѧ и҆зведы́й.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ ѳ҃

ты̀ сꙋ́рожꙋ бы́въ просвѣти́тель и҆ живꙋ́щихъ въ не́мъ застꙋ́пникъ, ѡ҆бꙋрева́емыхъ же въ напа́стехъ сꙋ́щихъ, ти́хое приста́нище, вра́чъ страсте́й дꙋше́вныхъ же вкꙋ́пѣ и҆ тѣле́сныхъ, ѿню́дꙋже всѧ̑ ча̑да твоѧ̑ при́снѡ взыва́ютъ бг҃ꙋ: А҆ллилꙋ́їа.

І҆́косъ ѳ҃

Вѣті̑и многовѣща́нныѧ не возмо́гꙋтъ по достоѧ́нїю и҆зрещѝ твои́хъ бл҃годѣѧ́нїй мно́жєства, ст҃и́телю ѻ҆́ч҃е стефа́не, щедрода́тельнаѧ бо десни́ца твоѧ̀ всю́дꙋ досѧза́ше. мы́ же бл҃госе́рдїю твоемꙋ̀ дивѧ́щесѧ, со ᲂу҆миле́нїемъ взыва́емъ тѝ:

Ра́дꙋйсѧ, лꙋчꙋ̀ любвѐ бж҃їѧ пресвѣ́тлаѧ: ра́дꙋйсѧ, сокро́вище милосе́рдїѧ сп҃сова неистощи́мое.

Ра́дꙋйсѧ, бли̑жнїѧ своѧ̑ па́че себє̀ возлюби́вый: ра́дꙋйсѧ, въ ме́ньшихъ бра́тїѧхъ твои́хъ самогѡ̀ хрⷭ҇та̀ ви́дѣвый.

Ра́дꙋйсѧ, си́рыхъ пита́телю и҆ призрѣ́нїе: ра́дꙋйсѧ, скорбѧ́щихъ ᲂу҆тѣше́нїе.

Ра́дꙋйсѧ, страда́льцєвъ ᲂу҆крѣпле́нїе: ра́дꙋйсѧ, ѡ҆би́димыхъ застꙋ́пниче.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ і҃

Бꙋ́рю ѕлы́хъ напа́стей ᲂу҆тиша́ѧ, проше́лъ є҆сѝ ве́сь пꙋ́ть тѣ́сный и҆ ско́рбный и҆́ноческагѡ житїѧ̀, несѧ̀ ꙗ҆ре́мъ пꙋсты́ннагѡ по́двига, всено́щнагѡ бдѣ́нїѧ, моли́твы, тѣ́ла ᲂу҆мерщвле́нїѧ и҆ ст҃и́тельскагѡ слꙋже́нїѧ. и҆ та́кѡ блгⷣтїю бж҃їею ѿ си́лы въ си́лꙋ восходѧ̀ и҆ ѿ дѣ́ѧнїѧ къ бг҃овѣ́дѣнїю, во ѡ҆би́тєли гѡ́рнїѧ пресели́лсѧ є҆сѝ. и҆дѣ́же со а҆́гг҃лы вы́нꙋ воспѣва́еши бг҃ꙋ: А҆ллилꙋ́їа.

І҆́косъ і҃

Кто̀ не блажи́тъ тебѣ̀, пребл҃же́нне стефа́не, слы́ша сла́вное житїѐ твоѐ, ты́ бо є҆сѝ жи́въ є҆́сть дꙋше́ю, мы́ же си́це тебѣ̀ воспѣва́емъ:

Ра́дꙋйсѧ, вели́кїй бг҃ꙋ ᲂу҆го́дниче: ра́дꙋйсѧ, ꙗ҆́кѡ во вре́меннѣй жи́зни се́й любвѐ ра́ди ко гдⷭ҇ꙋ вы́нꙋ во сп҃се́нїи дꙋшѝ твоеѧ̀ подвиза́лсѧ є҆сѝ.

Ра́дꙋйсѧ, ꙗ҆́кѡ є҆гѡ̀ по́мощїю, ѡ҆ста́вль тлѣ̑ннаѧ, нетлѣ́ннаѧ стѧжа́лъ є҆сѝ: ра́дꙋйсѧ, ꙗ҆́кѡ блгⷣтїю бж҃їею сподо́билсѧ є҆сѝ стоѧ́ти ᲂу҆ прⷭ҇то́ла влады́чнѧ.

Ра́дꙋйсѧ, ꙗ҆́кѡ та́кѡ сподо́билсѧ є҆сѝ прича́стникомъ бы́ти вѣ́чной сла́вы: ра́дꙋйсѧ, та́кѡ полꙋчи́вый бл҃года́ть хода́тайствовати ѡ҆ на́съ.

Ра́дꙋйсѧ, ско́рый помо́щниче призыва́ющихъ тѧ̀: ра́дꙋйсѧ, правосла́вномꙋ ца́рствꙋ на́шемꙋ защи́тителю.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ а҃і

Бл҃года́ть чꙋде́съ многоѡбра́зныхъ, всели́всѧ въ нб҃сѝ, принѧ́лъ є҆сѝ ѿ гдⷭ҇а, пребл҃же́нне стефа́не, сегѡ̀ ра́ди подае́ши и҆сцѣле́нїѧ всѣ̑мъ, притека́ющымъ къ тебѣ̀ съ вѣ́рою. мы́ же си́лѣ чꙋде́съ твои́хъ чꙋдѧ́щесѧ, вопїе́мъ бг҃ꙋ: А҆ллилꙋ́їа.

І҆́косъ а҃і

Зна́менїй чꙋдесы̀ тебѐ гдⷭ҇ь просла́ви, пребл҃же́нне стефа́не, прого́ниши бо дꙋ́хи и҆ врачꙋ́еши стра̑сти, дꙋ́ши же просвѣща́еши вѣ́рныхъ, си́це тебѣ̀ вопїю́щихъ:

Ра́дꙋйсѧ, по трꙋдѣ́хъ стра́нствїѧ земна́гѡ въ нбⷭ҇ныхъ селе́нїихъ сла́дцѣ почи́вый: ра́дꙋйсѧ, ꙗ҆́кѡ сме́рть прїѧ́вый, тлѣ́нїѧ же не позна́вый.

Ра́дꙋйсѧ, со хрⷭ҇то́мъ, є҆гѡ̀ же возлюби́лъ є҆сѝ: ра́дꙋйсѧ, со хрⷭ҇то́мъ, на вѣ́ки совокꙋпи́выйсѧ.

Ра́дꙋйсѧ, црⷭ҇твїѧ нбⷭ҇нагѡ и҆ сла́вы вѣ́чныѧ наслѣ́дниче: ра́дꙋйсѧ, си́льнымъ мі́ра сегѡ̀ небоѧ́зненный сꙋда̀ бж҃їѧ провозвѣ́стниче.

Ра́дꙋйсѧ, ꙗ҆́кѡ за и҆́стинꙋ претерпѣ́лъ є҆сѝ ско́рби: ра́дꙋйсѧ, ꙗ҆́кѡ стѧжа́лъ є҆сѝ и҆згна́нныхъ пра́вды ра́ди.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ в҃і

Бл҃года́ть свы́ше тѝ да́ннꙋю позна́вше, бл҃гоговѣ́йнѡ лобыза́емъ свѣтолѣ́пное всечестна́гѡ лица̀ твоегѡ̀ и҆з̾ѡбраже́нїе и҆ бл҃года́рственнѡ вопїе́мъ хрⷭ҇тꙋ̀ бг҃ꙋ на́шемꙋ: А҆ллилꙋ́їа.

І҆́косъ в҃і

Ве́сь є҆сѝ въ вы́шнихъ, но и҆ ни́жнихъ не ѡ҆ставлѧ́еши, ст҃и́телю ѻ҆́ч҃е стефа́не, при́снѡ со хрⷭ҇то́мъ ца́рствꙋеши и҆ ѡ҆ на́съ грѣ́шныхъ мл҃твы къ немꙋ̀ возсыла́еши. тѣ́мже во ᲂу҆миле́нїи зове́мъ тѝ:

Ра́дꙋйсѧ, прибѣ́жище на́ше въ ско́рбехъ: ра́дꙋйсѧ, ско́рый помо́щниче въ бѣда́хъ сꙋ́щихъ.

Ра́дꙋйсѧ, на неви̑димыѧ врагѝ на́шъ побо́рниче: ра́дꙋйсѧ, посѣти́телю въ не́мощехъ лежа́щихъ.

Ра́дꙋйсѧ, ꙗ҆́кѡ хрⷭ҇тꙋ̀ до́блественнѡ послѣ́довалъ є҆сѝ: ра́дꙋйсѧ, ꙗ҆́кѡ сладча́йшемꙋ і҆и҃сꙋ до конца̀ послꙋжи́лъ є҆сѝ.

Ра́дꙋйсѧ, ꙗ҆́кѡ наслажда́ешисѧ лицезрѣ́нїѧ бж҃їѧ: ра́дꙋйсѧ, ꙗ҆́кѡ сподо́билсѧ є҆сѝ зрѣ́ти невече́рнїй де́нь црⷭ҇твїѧ хрⷭ҇то́ва.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ г҃і

Ѽ, вели́кїй и҆ пресла́вный чꙋдотво́рче, ст҃и́телю ѻ҆́ч҃е стефа́не, прїимѝ сїѐ похва́льное пѣ́нїе ѿ на́съ недосто́йныхъ во ᲂу҆миле́нїи тебѣ̀ приноси́мое и҆ твои́мъ те́плымъ предста́тельствомъ ᲂу҆ прⷭ҇то́ла цр҃ѧ̀ сла́вы и҆спросѝ на́мъ въ вѣ́рѣ и҆ до́брыхъ дѣла́хъ ᲂу҆твержде́нїе, въ жи́зни се́й ѿ всѣ́хъ бѣ́дъ и҆ напа́стей и҆збавле́нїе, въ сме́ртномъ же ᲂу҆спе́нїи на́шемъ бл҃гꙋ́ю наде́ждꙋ сп҃се́нїѧ, да сподо́бимсѧ въ ра́дости вѣ́чнѣй воспѣва́ти ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ собесѣ́дниче и҆ человѣ́кѡвъ наста́вниче ны́нѣ, ꙗ҆́кѡ бж҃їй слꙋжи́телю, предстоѧ̀ съ вы́шними си́лами, ст҃и́телю стефа́не, мо́лиши ѡ҆ всѣ́хъ на́съ хрⷭ҇та̀ бг҃а на́шего, сегѡ̀ ра́ди бл҃года́рнѡ во ᲂу҆миле́нїи зове́мъ тѝ:

Ра́дꙋйсѧ, чистото́ю и҆ свѧты́нею а҆́гг҃лѡмъ ᲂу҆подо́бивыйсѧ: ра́дꙋйсѧ, посто́мъ и҆ бдѣ́нїемъ безстра́стїѧ дости́гнꙋвый.

Ра́дꙋйсѧ, вѣ́рныхъ непрело́жное ᲂу҆твержде́нїе: ра́дꙋйсѧ, невѣ́рныхъ бг҃омꙋ́дренное ѡ҆бличе́нїе.

Ра́дꙋйсѧ, а҆пⷭ҇льскихъ преда́нїй вѣ́рный храни́телю: ра́дꙋйсѧ, непоколеби́мый правосла́вїѧ сто́лпе.

Ра́дꙋйсѧ, тве́рдое ѡ҆гражде́нїе хрⷭ҇то́вой цр҃кви: ра́дꙋйсѧ, дѣ́лателю до́брый вертогра́да гдⷭ҇нѧ.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Конда́къ а҃

И҆збра́нный чꙋдотво́рче и҆ преди́вный и҆сповѣ́дниче хрⷭ҇то́въ, мл҃твенниче ѡ҆ дꙋша́хъ на́шихъ, ст҃и́телю стефа́не, ты́ же ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ и҆ напа́стей свободѝ зовꙋ́щихъ:

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Моли́твы

Ѽ, сщ҃е́ннаѧ главо̀, крѣ́пкїй на́шъ мл҃твенниче и҆ застꙋ́пниче, ст҃и́телю ѻ҆́ч҃е на́шъ стефа́не, ᲂу҆слы́ши на́съ съ вѣ́рою и҆ любо́вїю призыва́ющихъ тѧ̀. помина́й на́съ ᲂу҆ прⷭ҇то́ла вседержи́телева и҆ не преста́й моли́тисѧ ѡ҆ на́съ. и҆спросѝ предста́тельствомъ твои́мъ ᲂу҆ всеми́лостивѣйшагѡ сп҃са на́шегѡ ми́ръ цр҃кви, є҆гѡ̀ па́стырємъ, бж҃їю ре́вность и҆ си́лꙋ, правосла́вной странѣ̀ на́шей ми́ръ и҆ сп҃се́нїе. ᲂу҆молѝ нбⷭ҇нагѡ ѻ҆ц҃а̀ на́шего всѣ̑мъ пода́ти коемꙋ́ждо бл҃гопотре́бенъ да́ръ: вѣ́рꙋ и҆́стиннꙋю, наде́ждꙋ тве́рдꙋю, любо́вь неѡскꙋ́днꙋю, градѡ́въ на́шихъ ᲂу҆твержде́нїе, мі́ра ᲂу҆мире́нїе, ѿ гла́да и҆ гꙋби́тельства и҆збавле́нїе, ѿ наше́ствїѧ и҆ноплемє́нникъ сохране́нїе, ю҆́нымъ бл҃го́е въ вѣ́рѣ возраста́нїе, ста̑рымъ и҆ немощны̑мъ ᲂу҆тѣше́нїе и҆ ᲂу҆крѣпле́нїе, болѧ́щымъ и҆сцѣле́нїе, си̑рымъ и҆ вдови́цамъ ми́лость и҆ застꙋпле́нїе, бѣ́дствꙋющымъ по́мощь. не посрамѝ на́съ во ᲂу҆пова́нїи на́шемъ, споспѣ́шствꙋй, ꙗ҆́кѡ ѻ҆тє́цъ чадолюби́вый, и҆ на́мъ понестѝ благо́е и҆́го хрⷭ҇то́во во благодꙋ́шїи и҆ терпѣ́нїи и҆ всѣ́хъ на́съ ᲂу҆пра́ви въ ми́рѣ и҆ покаѧ́нїи непосты́днѡ живо́тъ сво́й ѡ҆конча́ти и҆ црⷭ҇твїѧ бж҃їѧ наслѣ́дницы бы́ти, и҆дѣ́же ты̀ ны́нѣ водворѧ́ешисѧ со а҆́гг҃лы и҆ всѣ́ми ст҃ы́ми, вы́нꙋ хвалѧ̀ бг҃а, въ трⷪ҇цѣ сла́вимаго, ѻ҆ц҃а̀ и҆ сн҃а и҆ ст҃а́гѡ дх҃а. А҆ми́нь.