Канон святой великомученице Евфимии Всехвальной

Влече́т к песнопе́нию преми́рных во́инства и земны́х ли́ки всехва́льная отрокови́ца чудесы́.

Ро́д презре́вши, и ю́же от бога́тства све́тлость честна́я Евфи́мия вме́сто все́х Христа́ стяжа́.

Добро́ты возжела́в Влады́ка все́х красне́йшаго твоего́ се́рдца, всехва́льная, Небе́сных черто́гов сподо́би тя́.

Яви́лася еси́ на суди́щи му́жественну ду́шу нося́щи, и врага́, я́коже нему́жественна, победи́ла еси́, всехва́льная.

Поро́к в добро́те твое́й, ниже́ вра́ска души́ бы́сть, и тя́ Христо́с неве́сту в нетле́нныя черто́ги прия́т.

Исцели́, всехва́льная, души́ моея́ стру́пы, му́ченице Христо́ва, и ути́ши твои́ми моли́твами, жи́зни моея́ бу́рю.

Нескве́рное зерца́ло Боже́ственных разуме́ний тебе́ саму́ю устро́ивши, я́ко свети́льник зелоле́потнейший, страда́лиц посреде́, му́ченице, возсия́ла еси́.

Мра́чному не принесла́ еси́ де́мону же́ртвы, непобеди́мая му́ченице: жизноно́сную бо возлюби́ла еси́ за благоче́стие сме́рть прия́ти.

Я́ко неболе́зненно нося́щи со страстоно́сцы те́ло, непоро́чная, ра́нами нечу́вственна пребыла́ еси́ Боже́ственныя любве́ раче́нием.

Терпели́во стра́ждущу твоему́ лицу́, му́ченице, ра́нами све́тло украша́шеся, мо́лниею же Боже́ственнаго ду́ха враго́в омрача́ше помышле́ния.

Дне́ и ми́ра противополо́жное уве́девши, ратолю́бнаго де́мона люби́ти не восхоте́ла еси́.

Мне́в твою́ осла́бити Боже́ственную, му́ченице, кре́пость, сме́х яви́ся, козньми́ вселука́вый.

Пода́ждь ми́ просвеще́ние и ми́р, всехва́льная, реша́щи моли́твами твои́ми многомяте́жное смуще́ние.

Му́жественное в же́нстей пло́ти души́ мудрова́ние нося́щи, сла́вная, о зве́рех су́щих в вода́х, неради́ла еси́.

Победи́ла еси́ мучи́телей горды́ню без вре́да в вода́х, му́ченице непобеди́мая, со зверьми́ я́ко Ио́на пребы́вши.

Изба́ви звери́наго растле́ния, услы́шав Госпо́дь твоя́ моли́твы, я́ко из ро́ва Дании́ла, тя́, всехва́льная.

Па́че ума́ яви́шася боже́ственных му́чеников благому́жества, Зижди́тель бо все́х, тва́рь покаря́ет во страда́ниих зову́щим: отце́в на́ших Бо́же, благослове́н еси́.

Скве́рная загради́ преслову́щая отрокови́ца уста́ мучи́телей и горды́ню пребеззако́нных Ду́хом Святы́м, боже́ственно воспева́ющи: отце́в на́ших Бо́же, благослове́н еси́.

Тро́ица преподо́бных разже́гшия пе́щь дре́вле попали́, ны́не же богому́драя, Тро́ицу пою́щи, слуги́ улови́, отце́в Бо́га пою́щия: Бо́же, благослове́н еси́.

Та́инственно Жени́х ко всечи́стей неве́сте в пе́щь прише́д, Ду́ха росо́ю, Отца́ благоволе́нием, сохрани́ пою́щую: отце́в на́ших Бо́же, благослове́н еси́.

Блаже́ннейшая в жена́х, Вы́шняго возме́здную иму́щи благода́ть, поя́ше, хва́лящи Христа́ во ве́ки вся́.

Укрепле́на по́мыслом Неве́стника, невеще́ственным раче́нием, те́ло предала́ еси́ на сме́рть и живе́ши во ве́ки вся́.

На ле́сть, я́коже на зве́ря, вооружи́вшися Святы́м Ду́хом, му́ченица взя́ше мзду́ во вся́ ве́ки.

Не душетле́нную сме́рть прия́ла еси́ чи́стая, но благодерзнове́нно зве́ря угрызе́нием нестаре́ющую непоро́чная, измени́ла еси́ жи́знь во ве́ки вся́.

Тече́ние живы́я кро́ве зна́мение нетле́нныя, свы́ше дарова́нныя тебе́ жи́зни, му́ченице всехва́льная, целе́ний бо сокро́вище непреста́нное ве́рою че́рплющим яви́лася еси́.

Косне́ся тебе́ сме́рть естества́ зако́ном, богому́драя, в живоно́сную же ме́ртвость нестра́стно оде́ялася еси́, е́юже, я́ко одушевле́нное, твое́ те́ло поло́жши всечестно́е, живе́ши нетле́нно, и свиде́телствуют твоя́ кровотече́ния.

Зако́ны страда́ния венча́вшися, му́ченице, христопропове́днице, сви́ток благочести́вых вве́ренный, Евфи́мие, догма́тов честны́х, от ру́к собо́ра, его́же я́ко сто́лп, держа́щи, живы́й Правосла́вия показу́еши.

Влече́тъ къ пѣснопѣ́нїю премі́рныхъ вѡ́инства, и҆ земны́хъ ли́ки, всехва́льнаѧ ѻ҆трокови́ца чꙋдесы̀.

Ро́дъ презрѣ́вши, и҆ ю҆́же ѿ бога́тства свѣ́тлость честна́ѧ є҆ѵфи́мїа, вмѣ́стѡ всѣ́хъ хрⷭ҇та̀ стѧжа̀.

Добро́ты возжела́въ влⷣка всѣ́хъ краснѣ́йшагѡ твоегѡ̀ се́рдца всехва́льнаѧ, нбⷭ҇ныхъ черто́гѡвъ сподо́би тѧ̀.

Ꙗ҆ви́ласѧ є҆сѝ на сꙋди́щи мꙋ́жественнꙋ дꙋ́шꙋ носѧ́щи, и҆ врага̀ ꙗ҆́коже немꙋ́жественна побѣди́ла є҆сѝ всехва́льнаѧ.

Поро́къ въ добро́тѣ твое́й, нижѐ вра́ска дꙋшѝ бы́сть, и҆ тѧ̀ хрⷭ҇то́съ невѣ́стꙋ въ нетлѣ̑нныѧ черто́ги прїѧ́тъ.

И҆сцѣлѝ, всехва́льнаѧ, дꙋшѝ моеѧ̀ стрꙋ́пы, мч҃нице хрⷭ҇то́ва, и҆ ᲂу҆ти́ши твои́ми моли́твами, жи́зни моеѧ̀ бꙋ́рю.

Нескве́рное зерца́ло бжⷭ҇твенныхъ разꙋмѣ́нїй тебѐ самꙋ́ю ᲂу҆стро́ивши, ꙗ҆́кѡ свѣти́льникъ ѕѣлолѣ́потнѣйшїй страда́лицъ посредѣ̀, мч҃нице, возсїѧ́ла є҆сѝ.

Мра́чномꙋ не принесла̀ є҆сѝ де́мѡнꙋ же́ртвы, непобѣди́маѧ мч҃нице: жизноно́снꙋю бо возлюби́ла є҆сѝ за благоче́стїе сме́рть прїѧ́ти.

Ꙗ҆́кѡ неболѣ́зненно носѧ́щи со страстоно́сцы тѣ́ло непоро́чнаѧ, ра́нами нечꙋ́вственна пребыла̀ є҆сѝ бжⷭ҇твенныѧ любвѐ раче́нїемъ.

Терпѣли́вѡ стра́ждꙋщꙋ твоемꙋ̀ лицꙋ̀, мч҃нице, ра́нами свѣ́тлѡ ᲂу҆краша́шесѧ, мо́лнїею же бжⷭ҇твеннагѡ дх҃а врагѡ́въ ѡ҆мрача́ше помышлє́нїѧ.

Днѐ и҆ ми́ра противополо́жное ᲂу҆вѣ́дѣвши, ратолю́бнаго де́мѡна люби́ти не восхотѣ́ла є҆сѝ.

Мнѣ́въ твою̀ ѡ҆сла́бити бжⷭ҇твеннꙋю мч҃нице крѣ́пость, смѣ́хъ ꙗ҆ви́сѧ, козньмѝ вселꙋка́вый.

Пода́ждь мѝ просвѣще́нїе и҆ ми́ръ, всехва́льнаѧ, рѣша́щи моли́твами твои́ми многомѧте́жное смꙋще́нїе.

Мꙋ́жественное въ же́нстѣй пло́ти дꙋшѝ мꙋдрова́нїе носѧ́щи сла́внаѧ, ѡ҆ ѕвѣ́рехъ сꙋ́щихъ въ вода́хъ, неради́ла є҆сѝ.

Побѣди́ла є҆сѝ мꙋчи́телей горды́ню безъ вре́да въ вода́хъ, мч҃нице непобѣди́маѧ, со ѕвѣрьмѝ ꙗ҆́кѡ і҆ѡ́на пребы́вши.

И҆зба́ви ѕвѣри́нагѡ растлѣ́нїѧ, ᲂу҆слы́шавъ гдⷭ҇ь твоѧ̑ моли̑твы, ꙗ҆́кѡ и҆зъ ро́ва данїи́ла, тѧ̀ всехва́льнаѧ.

Па́че ᲂу҆ма̀ ꙗ҆ви́шасѧ бжⷭ҇твенныхъ мч҃никѡвъ благомꙋ́жєства: зижди́тель бо всѣ́хъ, тва́рь покарѧ́етъ во страда́нїихъ зовꙋ́щымъ: ѻ҆тцє́въ на́шихъ бж҃е, бл҃гослове́нъ є҆сѝ.

Блѧдꙋ̑щаѧ заградѝ пресловꙋ́щаѧ ѻ҆трокови́ца ᲂу҆ста̀ мꙋчи́телей, и҆ горды́ню пребеззако́нныхъ дх҃омъ ст҃ы́мъ, бжⷭ҇твеннѡ воспѣва́ющи: ѻ҆тцє́въ на́шихъ бж҃е, бл҃гослове́нъ є҆сѝ.

Тро́ица преподо́бныхъ разже́гшыѧ пе́щь дре́вле попалѝ: ны́нѣ же бг҃омꙋ́драѧ трⷪ҇цꙋ пою́щи, слꙋги̑ ᲂу҆ловѝ, ѻ҆тцє́въ бг҃а пою́щыѧ: бж҃е, бл҃гослове́нъ є҆сѝ.

Та́инственнѡ жени́хъ ко всечи́стѣй невѣ́стѣ въ пе́щь прише́дъ, дх҃а росо́ю, ѻ҆ц҃а̀ благоволе́нїемъ, сохранѝ пою́щꙋю: ѻ҆тцє́въ на́шихъ бж҃е, бл҃гослове́нъ є҆сѝ.

Блаже́ннѣйшаѧ въ жена́хъ, вы́шнѧго возме́зднꙋю и҆мꙋ́щи бл҃года́ть, поѧ́ше хва́лѧщи хрⷭ҇та̀ во вѣ́ки всѧ̑.

Оу҆крѣпле́на по́мысломъ невѣ́стника, невеще́ственнымъ раче́нїемъ, тѣ́ло предала̀ є҆сѝ на сме́рть, и҆ живе́ши во вѣ́ки всѧ̑.

На ле́сть, ꙗ҆́коже на ѕвѣ́рѧ, воѡрꙋжи́вшисѧ ст҃ы́мъ дх҃омъ мч҃ница, взѧ́ше мздꙋ̀ во всѧ̑ вѣ́ки.

Не дꙋшетлѣ́ннꙋю сме́рть прїѧ́ла є҆сѝ чи́стаѧ, но благодерзнове́ннѡ ѕвѣ́рѧ ᲂу҆грызе́нїемъ, нестарѣ́ющꙋю непоро́чнаѧ и҆змѣни́ла є҆сѝ жи́знь во вѣ́ки всѧ̑.

Тече́нїе живы́ѧ кро́ве, зна́менїе нетлѣ́нныѧ свы́ше дарова́нныѧ тебѣ̀ жи́зни, мч҃нице всехва́льнаѧ: цѣле́нїй бо сокро́вище непреста́нно, вѣ́рою че́рплющымъ ꙗ҆ви́ласѧ є҆сѝ.

Косне́сѧ тебѣ̀ сме́рть є҆стества̀ зако́номъ, бг҃омꙋ́драѧ, въ живоно́снꙋю же ме́ртвость нестра́стнѡ ѡ҆дѣ́ѧласѧ є҆сѝ, є҆́юже ꙗ҆́кѡ ѡ҆дꙋшевле́нное твоѐ тѣ́ло поло́жши всечестно́е, живе́ши нетлѣ́ннѡ, и҆ свидѣ́телствꙋютъ твоѧ̑, кровотечє́нїѧ.

Зако́нами страда́нїѧ вѣнча́вшисѧ, мч҃нице, хрⷭ҇топроповѣ́днице, сви́токъ благочести́выхъ ввѣ́ренный, є҆ѵфи́мїе, догма́тѡвъ честны́хъ, ѿ рꙋ́къ собо́ра, є҆го́же ꙗ҆́кѡ сто́лпъ держа́щи живы́й правосла́вїѧ, показꙋ́еши.