Кондак 1
Избра́нный чудотво́рче и изря́дный уго́дниче Христо́в, Росто́ва просвети́телю, и усе́рдный о душа́х на́ших моли́твенниче, святи́телю о́тче Лео́нтие! Восхваля́ем тя́ с любо́вию, засту́пника на́шего: ты́ же, я́ко име́яй дерзнове́ние ко Го́споду, моли́ся вы́ну о спасе́нии на́с гре́шных и от вся́ких бе́д избавля́й зову́щих ти́:
Ра́дуйся, Лео́нтие, Росто́вский чудотво́рче.
Икос 1
Ангелонра́вное житие́ возлюби́в, о́тче Лео́нтие, в оби́тель Ки́ево-Пече́рскую прише́л еси́, и от преподо́бных оте́ц Анто́ниа и Феодо́сиа во и́ночество прия́в постриже́ние, свя́то и богоуго́дно пожи́л еси́, подвиза́яся в посте́, бде́нии и моли́твах непреста́нных. Те́мже слы́шиши от на́с благохвале́ния такова́я:
Ра́дуйся, земны́й а́нгеле, во пло́ти небе́сно пожи́вый; ра́дуйся, небе́сный челове́че, о го́рних вы́ну помышля́вый.
Ра́дуйся, во мра́це пеще́рнем све́т боговиде́ния сниска́вый; ра́дуйся, по́двиги вели́кими пло́ть твою́ обузда́вый.
Ра́дуйся, смире́нием высо́кая стяжа́вый; ра́дуйся, терпе́нием вся́ искуше́ния диа́вольския победи́вый.
Ра́дуйся, посто́м ду́шу твою́ просвети́вый; ра́дуйся, моли́твами непреста́нными се́рдце твое́ освяти́вый.
Ра́дуйся, сосу́де избра́нный Бо́жия благода́ти; ра́дуйся, селе́ние непоро́чное Ду́ха Свята́го.
Ра́дуйся, свети́льниче, сия́яй да́ры боже́ственными; ра́дуйся, луче́ пресве́тлаго Со́лнца Пра́вды Христа́.
Ра́дуйся, Лео́нтие, Росто́вский чудотво́рче.
Кондак 2
Ви́дев Госпо́дь ду́шу твою́, святи́телю Лео́нтие, доброде́тельми благоукраше́нну, благоволи́ поста́вити тя́ во епи́скопа гра́ду Росто́ву, идолослуже́нием язы́ческим потемне́нному: да пра́во пра́виши в не́м сло́во и́стины, и приво́диши ко Христу́ заблу́ждшыя челове́ки, неве́дущыя пе́ти Триипоста́сному Бо́гу: Аллилу́иа.
Икос 2
Ра́зум небе́сный тебе́ дарова́ся, свя́тче Бо́жий, от Христа́ Бо́га, И́же посла́ тя́ в страну́ Росто́вскую пропове́дати лю́дем Ева́нгелие Христо́во, и приводи́ти к позна́нию ве́ры и́стинныя идолослуже́нием одержи́мыя челове́ки. Мы́ же тя́, равноапо́стольнаго пропове́дника ве́дуще, приве́тствуем ра́достно си́ми достодо́лжными хвале́нии:
Ра́дуйся, первопресто́льниче святы́я Росто́вския Це́ркве; ра́дуйся, Правосла́вия сто́лпе непоколеби́мый.
Ра́дуйся, кра́сныя но́зе твои́ напра́вивый к боре́нию со враги́ спасе́ния челове́ческаго; ра́дуйся, апо́стольски подвиза́выйся во гра́де Росто́ве.
Ра́дуйся, терпели́во преноси́вый гоне́ние ве́лие от идолослужи́телей; ра́дуйся, любо́вию оте́ческою зло́бу и́х побежда́вый.
Ра́дуйся, му́жеством души́ твоея́ вся́ злохи́трости и́х посрами́вый; ра́дуйся, благовре́менно и безвре́менно па́ству твою́ благоче́стию поуча́вый.
Ра́дуйся, ста́рцев идолослужи́тельных богому́дрый обличи́телю; ра́дуйся, младе́нцев благи́й научи́телю.
Ра́дуйся, неутоми́мо подвиза́выйся о спасе́нии ду́ш челове́ческих; ра́дуйся, просвети́вый Росто́в све́том позна́ния Христо́ва.
Ра́дуйся, Лео́нтие, Росто́вский чудотво́рче.
Кондак 3
Си́лою Христо́вою преиспо́лненный, святи́телю Лео́нтие, не убоя́лся еси́ противуста́ти со́нмищу идолослужи́телей, со ору́жием и дреко́льми на тя́ прише́дшему, к ни́мже, в святи́тельския ри́зы облече́нный, из хра́ма Бо́жия кро́тко изше́л еси́, и с любо́вию и́х увещава́л еси́, обрати́тися ко Христу́ Бо́гу, и вку́пе с тобо́ю пе́ти Ему́: Аллилу́иа.
Икос 3
Име́л еси́ лице́, я́ко а́нгельское, све́том небе́сным сия́ющее, святи́телю Лео́нтие, его́же не терпя́ще зре́ти идолослужи́тели, о́ви ослепо́ша, о́ви же разсла́блени на земли́ падо́ша, и зело́ устраше́ннии не дерзну́ша озло́бити тя́, пропове́дника боже́ственныя и́стины, вои́стинну досто́йнаго похва́л таковы́х:
Ра́дуйся, светоза́рный Бо́жия благода́ти таи́нниче; ра́дуйся, ангелоподо́бный челове́че.
Ра́дуйся, безору́жный вооруже́нных победи́вый; ра́дуйся, небоя́зненно сло́во Бо́жие пропове́давый.
Ра́дуйся, я́ко лице́ адама́нтово свы́ше тебе́ дарова́ся; ра́дуйся, я́ко тобо́ю ли́ца идолослужи́телей посрами́шася.
Ра́дуйся, я́ко а́нгел Бо́жий, све́том лица́ твоего́ идолослужи́телей устраши́вый; ра́дуйся, я́ко со зло́бою на тя́ устреми́вшихся кро́тостию твое́ю смири́вый.
Ра́дуйся, осле́пших и разсла́бленных моли́твою твое́ю исцели́вый; ра́дуйся, бла́гостию зло́бу победи́вый.
Ра́дуйся, апо́столе земли́ Росто́вския; ра́дуйся, па́стырю до́брый ста́да Христо́ва.
Ра́дуйся, Лео́нтие, Росто́вский чудотво́рче.
Кондак 4
Бу́ря гоне́ния язы́ческаго па́ки возшуме́ на тя́, святи́телю Лео́нтие, и изгна́ тя́ из гра́да Росто́ва на предгра́дие его́, иде́же ты́ посели́лся еси́, и хра́м Бо́жий во и́мя Архистрати́га Си́л Небе́сных та́мо созда́в, при не́м подвиза́лся еси́ в труде́х апо́стольских, зовы́й еди́ному могу́щему спасти́ заблу́ждшыя челове́ки Христу́, Царю́ и Бо́гу: Аллилу́иа.
Икос 4
Слы́шавше благи́я твоя́ глаго́лы, святи́телю Христо́в, ма́лыя де́ти прихожда́ху к тебе́, на предгра́дии Росто́ва живу́щему, и́хже ты́ пшени́цею с ме́дом пита́я, насажда́л еси́ в ни́х уче́ние Христо́во, да от у́ст младе́нцев соверши́ши хвалу́ Бо́гу, внуша́ющему на́м зва́ти тебе́:
Ра́дуйся, озари́вый све́том Христо́вым лю́ди во тме́ и се́ни сме́ртней седя́щыя; ра́дуйся, призва́вый ко Христу́ о́вцы заблу́ждшыя.
Ра́дуйся, гоне́ние и изгна́ние Христа́ ра́ди мно́гажды претерпе́вый; ра́дуйся, терпе́нием твои́м гони́телей твои́х препобеди́вый.
Ра́дуйся, христоподража́тельно младе́нцы возлюби́вый; ра́дуйся, сердца́ и́х неви́нныя Христо́вым позна́нием украси́вый.
Ра́дуйся, сла́дким бра́шном и́х пита́я, ду́шы и́х в любо́вь Пресла́дкаго Иису́са плени́вый; ра́дуйся, му́дро и́х в мре́жу Ева́нгелиа Христо́ва улови́вый.
Ра́дуйся, чрез ча́да роди́телей ко спасе́нию призва́вый; ра́дуйся, мно́гих ко Христу́ обрати́вый.
Ра́дуйся, де́лателю до́брый виногра́да небе́снаго; ра́дуйся, сла́дкия плоды́ де́лания твоего́ Христу́ принесы́й.
Ра́дуйся, Лео́нтие, Росто́вский чудотво́рче.
Кондак 5
Боготе́чное свети́ло бы́в, святи́телю о́тче Лео́нтие, мра́к идолослуже́ния во гра́де Росто́ве просвети́л еси́, сия́нием немерца́ющим Со́лнца Пра́вды Христа́, и мре́жею про́поведи ева́нгельския улови́л еси́ во спасе́ние мно́гия челове́ки, научи́в и́х правосла́вно ве́ровати во еди́наго Бо́га, в Тро́ице Святе́й сла́вимаго и покланя́емаго, и благоприя́тно пе́ти Ему́: Аллилу́иа.
Икос 5
Ви́девше тя́ лю́дие Росто́встии, святи́телю Лео́нтие, терпели́во поуча́ющаго и́х Ева́нгелию Христо́ву, и ни во что́ же вменя́ющаго гоне́ние, изгна́ние и ско́рби, нача́ша приходи́ти к тебе́ и послу́шати твои́х поуче́ний душеспаси́тельных: ты́ же, свя́те, хвалу́ о се́м Бо́гу возда́в, от предгра́дия во гра́д Росто́в возврати́лся еси́, и при собо́рнем его́ хра́ме водвори́вся, неле́ностно учи́л еси́ лю́ди твоя́ благоче́стию христиа́нскому. О се́м тя́ хва́лим и зове́м:
Ра́дуйся, те́рние неве́рия язы́ческаго в Росто́ве посека́вый; ра́дуйся, лозу́ позна́ния Христо́ва та́мо насади́вый.
Ра́дуйся, де́нь и но́щь труди́выйся на ни́ве Госпо́дней; ра́дуйся, приведы́й Го́сподеви лю́ди пакибытие́м обновле́нныя.
Ра́дуйся, во и́мя Отца́, и Сы́на, и Свята́го Ду́ха крести́вый язы́чники ожесточе́нныя; ра́дуйся, тро́ическою благода́тию укроти́вый идолослужи́тели озло́бленныя.
Ра́дуйся, первопа́стырю Росто́вския Це́ркве; ра́дуйся, звездо́ немерца́ющая, све́том Христо́вым все́х просвеща́ющая.
Ра́дуйся, моли́твенниче усе́рдный о па́стве твое́й земне́й; ра́дуйся, Бо́га зело́ просла́вивый по́двиги твои́ми равноапо́стольными.
Ра́дуйся, от Бо́га просла́вленный мно́гими чудесы́; ра́дуйся, си́ми утверди́вый и́стину твоея́ про́поведи боже́ственныя.
Ра́дуйся, Лео́нтие, Росто́вский чудотво́рче.
Кондак 6
Пропове́дником ева́нгельския и́стины, апо́столом Христо́вым, ве́рно подража́л еси́, святи́телю о́тче на́ш Лео́нтие, и подо́бно и́м труди́лся еси́ во благове́стии Христо́ве, лю́ди Росто́вския поуча́я правосла́вно ве́ровати во Святу́ю Тро́ицу и Боже́ственную Еди́ницу, Творца́ и Созда́теля вся́ческих, Ему́же при́сно пе́л еси́ а́нгельскую пе́снь: Аллилу́иа.
Икос 6
Возсия́л еси́ во гра́де Росто́ве све́том до́брых де́л твои́х, святи́телю приснопа́мятне, о ни́хже прославля́ху лю́ди Отца́ Небе́снаго Бо́га, укрепи́вшаго тя́ на по́двиги апо́стольския, и дарова́вшаго ти́ си́лу и вла́сть на ду́хи нечи́стыя, от и́хже влия́ния па́губнаго свобожда́л еси́ челове́ки, тебе́ зову́щыя и глаго́лющыя:
Ра́дуйся, Христу́ уневе́стивый мно́гия ду́шы челове́ческия; ра́дуйся, от Христа́ обогаще́нный мно́гими благода́тными да́ры.
Ра́дуйся, кри́не благоуха́нный небе́снаго прозябе́ния; ра́дуйся, ма́слино благопло́дная са́да Иису́сова.
Ра́дуйся, гра́да Росто́ва сла́во и похвало́; ра́дуйся, ве́ры Христо́вой в не́м кре́пкое утвержде́ние.
Ра́дуйся, благоче́стия учи́телю; ра́дуйся, правосла́вия наста́вниче.
Ра́дуйся, неду́гов душе́вных и теле́сных цели́телю; ра́дуйся, ни́щих и убо́гих пита́телю.
Ра́дуйся, свяще́нников рукополага́телю; ра́дуйся, и́ноков покрови́телю.
Ра́дуйся, Лео́нтие, Росто́вский чудотво́рче.
Кондак 7
Хоте́ние еди́но име́л еси́, свя́тче Бо́жий, е́же Бо́гу угожда́ти и спасе́нию люде́й твои́х служи́ти: те́мже не да́л еси́ сна́ очи́ма твои́ма, ни ве́ждома дрема́ния, но при́сно подвиза́лся еси́ во бла́го святы́я Росто́вския Це́ркве, стяжа́вшия тя́, столпа́ Правосла́вия непоколеби́маго, и стра́жа до́му Бо́жию ве́рнаго, приме́ром твои́м и на́с поуча́ющаго неле́ностно возноси́ти пе́снь хвалы́ Христу́ Бо́гу: Аллилу́иа.
Икос 7
Но́ваго тя́ Никола́а Мирлики́йскаго, стяжа́ гра́д Росто́в, святи́телю о́тче Лео́нтие, чудесы́ твои́ми зело́ и́мя Христо́во в не́м просла́вльшаго, и ко Христо́ву позна́нию лю́ди заблу́ждшыя приве́дшаго, твои́м уче́нием боже́ственным, ему́же внима́юще, лю́ди Росто́встии научи́шася пе́ти тебе́:
Ра́дуйся, благи́й ра́бе и ве́рный, да́нный тебе́ от Го́спода тала́нт не сокры́вый; ра́дуйся, мно́гу ку́плю духо́вную и́м приобреты́й.
Ра́дуйся, сотвори́вый и научи́вый, и ве́лий нарече́нный в Ца́рствии Небе́снем; ра́дуйся, вели́чием чуде́с на земли́ просла́вленный.
Ра́дуйся, зна́мения ди́вная рука́ма твои́ма соверши́вый; ра́дуйся, ту́не прия́вый, ту́не подава́вый.
Ра́дуйся, исполне́ние обетова́ний ева́нгельских получи́вый; ра́дуйся, милосе́рдия Спа́сова подража́телю.
Ра́дуйся, щедрода́тельный ми́лостыни пода́телю; ра́дуйся, любвеоби́льный скорбя́щих уте́шителю.
Ра́дуйся, орга́не Ду́ха Свята́го; ра́дуйся, ми́ро Христо́ва благоуха́ния на земли́.
Ра́дуйся, Лео́нтие, Росто́вский чудотво́рче.
Кондак 8
Стра́нствие земно́е му́ченическою кончи́ною соверши́л еси́, святи́телю Лео́нтие, Христа́ ра́ди от идолослужи́телей ожесточе́нных да́же до кро́ве пострада́в, пе́рвый священному́ченик Росси́йския Земли́ я́влься, гра́д Росто́в освяти́л еси́ излия́нием кро́ве твоея́, и Христу́ приусво́ил еси́, да просвеще́ннии тобо́ю лю́ди, честву́юще по́двиг тво́й апо́стольский, зову́т Бо́гу: Аллилу́иа.
Икос 8
Ве́сь в же́ртву Бо́гу прине́слся еси́, святи́телю достоблаже́нный, и со дерзнове́нием мно́гим Христу́ предста́л еси́ во сла́ве Ца́рствия Небе́снаго, иде́же не забу́ди и на́с, земны́х, усе́рдно с любо́вию тя́ почита́ющих, но при́сно моли́ся о спасе́нии на́шем, да тебе́ зове́м хвале́бно:
Ра́дуйся, пе́рвый священному́чениче земли́ Росси́йския; ра́дуйся, кро́ве обагре́нием украси́вый ри́зу твою́ святи́тельскую.
Ра́дуйся, со страстоте́рпцы вше́дый в ра́дость Го́спода твоего́; ра́дуйся, А́гнцу Бо́жию по́двигом земны́м подража́вый.
Ра́дуйся, за о́вцы твоя́ слове́сныя ду́шу твою́ положи́вый; ра́дуйся, и́мя Христо́во кончи́ною твое́ю просла́вивый.
Ра́дуйся, сме́рть му́ченическую прия́вый, но тле́ния не позна́вый; ра́дуйся, чудесы́ мно́гими свя́тость твою́ ознаменова́вый.
Ра́дуйся, во гро́б соше́дый и от него́ заре́ю безсме́ртия возсия́вый; ра́дуйся, во оде́жду благода́тнаго нетле́ния облече́нный.
Ра́дуйся, воскресе́ния Христо́ва си́лу в ме́ртвенном телеси́ твое́м прояви́вый; ра́дуйся, во благоуха́нии святы́ни опочи́вый.
Ра́дуйся, Лео́нтие, Росто́вский чудотво́рче.
Кондак 9
Все́м те́лом це́л и неруши́мь, с лице́м сия́ющим, лежа́щ во гро́бе я́ко жи́в, по ле́тех мно́зех в земли́ обре́тен бы́л еси́, святи́телю Лео́нтие, и чуде́с мно́жество от нетле́нных и многоцеле́бных моще́й твои́х источи́л еси́, и́ми свя́тость твою́ зна́менуя, и подвиза́я ве́рныя благода́рственно взыва́ти Ди́вному во святы́х свои́х Бо́гу: Аллилу́иа.
Икос 9
Вети́йство челове́ческое не довле́ет к прославле́нию мно́гих и пресла́вных чудотворе́ний твои́х, святи́телю Лео́нтие, и́миже Це́рковь Росто́вская благоукраси́ся, и сего́ ра́ди гла́сы хвале́бными усе́рдно тя́ сла́вим, я́ко своего́ первосвяти́теля, просвети́теля и предста́теля ко Го́споду, зову́ще к тебе́ благода́рственно и хвале́бно:
Ра́дуйся, алава́стре целе́бный ми́ра Христо́ва преиспо́лненный; ра́дуйся, реко́ чуде́с многово́дная.
Ра́дуйся, исто́чниче кипя́й исцеле́ньми; ра́дуйся, кла́дезю, от него́же боля́щии здра́вие почерпа́ют.
Ра́дуйся, нетле́ния цве́те благоуха́нный и прекра́сный; ра́дуйся, безсме́ртия заре́ присносия́ющая.
Ра́дуйся, би́сере драги́й Бо́жия благода́ти, в не́дрех земны́х обре́тенный; ра́дуйся, со сла́вою и че́стию во хра́ме Бо́жием положе́нный.
Ра́дуйся, я́ко к тебе́ слепи́и приходя́ще, зря́щии возвраща́хуся; ра́дуйся, я́ко к тебе́ хро́мии и нича́щия ползу́ще, прямоходя́ще отхожда́ху.
Ра́дуйся, разсла́бленных благода́тный укрепи́телю; ра́дуйся, беснова́тых от наси́лия диа́вольскаго свободи́телю.
Ра́дуйся, Лео́нтие, Росто́вский чудотво́рче.
Кондак 10
Спасе́ния душе́внаго хода́тай явля́ешися ве́рным, святи́телю Лео́нтие, и при́сно мо́лишися Бо́гу о па́стве твое́й земно́й, усе́рдно тя́ почита́ющей. Сие́ уверя́я в чу́дном виде́нии яви́лся еси́ в нощи́, в собо́рнем хра́ме Росто́ва, с подъя́тыми горе́ дла́ньми у престо́ла Бо́жия усе́рдно моля́йся и све́том небе́сным сия́яй, е́же ви́дев му́ж, такова́го виде́ния досто́йный, возопи́ ко Го́споду: Аллилу́иа.
Икос 10
Царя́ Небе́снаго Христа́ ве́рный ра́бе и уго́дник бы́л еси́, святи́телю Лео́нтие, и от Него́ нетле́нием и чудесы́ просла́вленный, от вели́каго кня́зя Андре́а Боголю́бскаго по́честь посме́ртную восприя́л еси́ в моще́х твои́х святы́х, и́мже покланя́ющеся с ве́рою и любо́вию, пе́сненно тебе́ вопие́м:
Ра́дуйся, Правосла́вия утвержде́ние; ра́дуйся, архиере́ев красото́.
Ра́дуйся, в со́ниих и виде́ниих ве́рныя посеща́яй; ра́дуйся, явле́нием твои́м больны́м нездра́вие во здра́вие претворя́яй.
Ра́дуйся, ско́рый помо́щниче моли́твенно тя́ призыва́ющих; ра́дуйся, усе́рдный засту́пниче тя́ почита́ющих.
Ра́дуйся, правове́рных благонаде́жное прибе́жище; ра́дуйся, по Бо́зе и Богоро́дице кре́пкое на́ше упова́ние.
Ра́дуйся, врачу́ безме́здный, еди́ныя ве́ры то́кмо тре́буяй; ра́дуйся, бли́жним и да́льним щедро́ты целе́бныя подава́яй.
Ра́дуйся, Росто́ва храни́телю неотсту́пный; ра́дуйся, всея́ Росси́и предста́телю, Бо́гом да́нный.
Ра́дуйся, Лео́нтие, Росто́вский чудотво́рче.
Кондак 11
Пе́ние моле́бное от ле́т дре́вних и доны́не не умолче́ у гро́ба твоего́, святи́телю о́тче на́ш Лео́нтие, и свеща́ неугаси́мо пребыва́ет та́мо, ея́же погаше́ние еди́ным от кли́рик собо́рныя це́ркве ты́ гро́зно покара́л еси́, разслабле́нием теле́сным вино́внаго наказа́в, до́ндеже не вразуми́ся, и с покая́нием не обрати́ся к тебе́ целе́бнику благода́тному, зовы́й тя́ прославля́ющему Бо́гу: Аллилу́иа.
Икос 11
Све́тлостию чуде́с сия́яй, святи́телю преподо́бне, благода́тно озаря́еши ду́шы на́ша, страстьми́ грехо́вными потемне́нныя, и вся́ ны́ приво́диши на стезю́ покая́ния и спасе́ния. Сего́ ра́ди ублажа́ем тя́, наста́вника душеспаси́тельнаго и по сме́рти, от гро́ба твоего́ чуде́сно на́с поуча́ющаго, и во умиле́нии глубо́цем воспева́ем в похвалу́ тебе́:
Ра́дуйся, дру́же Христо́в, до конца́ ве́рен Ему́ пребы́вый; ра́дуйся, уго́дниче Бо́жий, на небеси́ и земли́ просла́вленный.
Ра́дуйся, в со́нме святи́телей сия́ющая звездо́; ра́дуйся, со святи́тели моско́вскими в виде́нии, во дни́ обложе́ния тата́рами Москвы́, та́инственно предста́вый.
Ра́дуйся, Пресвяте́й Влады́чице Богоро́дице, в друго́м виде́нии, спу́тник бы́вый; ра́дуйся, Ея́ во́лю святу́ю в жи́зни и по сме́рти усе́рдно творя́й.
Ра́дуйся, свеще́, в моли́твах к Бо́гу возжже́нная; ра́дуйся, вождю́, пу́ть ко спасе́нию все́м показу́ющий.
Ра́дуйся, па́ству твою́ моли́твенно назира́яй; ра́дуйся, с ве́рою к тебе́ прибега́ющих проше́ния исполня́яй.
Ра́дуйся, Це́ркве Правосла́вныя благода́тная ле́пото; ра́дуйся, лю́бящих и чту́щих тя́ при́сное ра́дование.
Ра́дуйся, Лео́нтие, Росто́вский чудотво́рче.
Кондак 12
Благода́ти Бо́жией сокро́вище, свята́я и всечестна́я ра́ка твоя́, святи́телю о́тче на́ш Лео́нтие, но́вая купе́ль Силоа́мская для неду́жных яви́ся: к не́й бо не еди́ножды то́кмо в ле́то, но на вся́кое вре́мя, с ве́рою приходя́щии, исцеле́ние боле́знем свои́м прие́млют, и тя́ прославля́ют, ми́лостиваго и безме́зднаго цели́теля, зову́ще благи́х пода́телю Бо́гу: Аллилу́иа.
Икос 12
Пою́ще по́двиги твоя́ равноапо́стольныя, и мно́гая пресла́вная чудотворе́ния твоя́, чудотво́рче святы́й Лео́нтие, мо́лим тя́, ми́лостиваго предста́теля на́шего: моли́ся с на́ми и о на́с ко Христу́ Бо́гу, да проба́вит к на́м ми́лость свою́, и яви́т на́м вели́кия своя́ щедро́ты, да возмо́жем благоприя́тно приноси́ти тебе́ от усе́рдия на́шего сия́ пе́сненныя похвалы́:
Ра́дуйся, Пресвяты́я Тро́ицы ве́рный испове́дниче; ра́дуйся, Пресвяты́я Богоро́дицы досто́йный избра́нниче.
Ра́дуйся, а́нгельских во́инств собесе́дниче; ра́дуйся, все́х святы́х сожи́телю.
Ра́дуйся, в ра́йских оби́телех пребыва́яй; ра́дуйся, от го́рних высо́т к земноро́дным ми́лостивно приника́яй.
Ра́дуйся, любо́вь к па́стве твое́й неизме́нно сохрани́вый; ра́дуйся, чуде́с мно́жеством и по сме́рти ча́да твоя́ озари́вый.
Ра́дуйся, в вы́шних живы́й и о ни́жних промышля́яй; ра́дуйся, гра́д Росто́в от вся́каго зла́ соблюда́яй.
Ра́дуйся, теле́с на́ших немздоприи́мный целе́бниче; ра́дуйся, о душа́х на́ших благоприя́тный к Бо́гу моли́твенниче.
Ра́дуйся, Лео́нтие, Росто́вский чудотво́рче.
Кондак 13
О пресвяты́й и преди́вный чудотво́рче, святи́телю о́тче Лео́нтие, Росто́ва первопа́стырю и все́х ве́рных предста́телю! Приими́ ми́лостиво сие́ ма́лое моле́ние на́ше в похвалу́ тебе́ приноси́мое, и благоприя́тными моли́твами твои́ми ко Го́споду Бо́гу, сотвори́ на́с насле́дники бы́ти всесве́тлаго Ца́рствия Христо́ва: да предста́тельством твои́м муче́ний ве́чных изба́вльшеся, сподо́бимся в ра́дости святы́х, вку́пе с тобо́ю пе́ти ве́чно Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
Ангелонра́вное житие́ возлюби́в, о́тче Лео́нтие, в оби́тель Ки́ево-Пече́рскую прише́л еси́, и от преподо́бных оте́ц Анто́ниа и Феодо́сиа во и́ночество прия́в постриже́ние, свя́то и богоуго́дно пожи́л еси́, подвиза́яся в посте́, бде́нии и моли́твах непреста́нных. Те́мже слы́шиши от на́с благохвале́ния такова́я:
Ра́дуйся, земны́й а́нгеле, во пло́ти небе́сно пожи́вый; ра́дуйся, небе́сный челове́че, о го́рних вы́ну помышля́вый.
Ра́дуйся, во мра́це пеще́рнем све́т боговиде́ния сниска́вый; ра́дуйся, по́двиги вели́кими пло́ть твою́ обузда́вый.
Ра́дуйся, смире́нием высо́кая стяжа́вый; ра́дуйся, терпе́нием вся́ искуше́ния диа́вольския победи́вый.
Ра́дуйся, посто́м ду́шу твою́ просвети́вый; ра́дуйся, моли́твами непреста́нными се́рдце твое́ освяти́вый.
Ра́дуйся, сосу́де избра́нный Бо́жия благода́ти; ра́дуйся, селе́ние непоро́чное Ду́ха Свята́го.
Ра́дуйся, свети́льниче, сия́яй да́ры боже́ственными; ра́дуйся, луче́ пресве́тлаго Со́лнца Пра́вды Христа́.
Ра́дуйся, Лео́нтие, Росто́вский чудотво́рче.
Кондак 1
Избра́нный чудотво́рче и изря́дный уго́дниче Христо́в, Росто́ва просвети́телю, и усе́рдный о душа́х на́ших моли́твенниче, святи́телю о́тче Лео́нтие! Восхваля́ем тя́ с любо́вию, засту́пника на́шего: ты́ же, я́ко име́яй дерзнове́ние ко Го́споду, моли́ся вы́ну о спасе́нии на́с гре́шных и от вся́ких бе́д избавля́й зову́щих ти́:
Ра́дуйся, Лео́нтие, Росто́вский чудотво́рче.
Молитвы
О свяще́нная главо́, пресла́вный чудотво́рче, первопа́стырю святы́я Росто́вския Це́ркве, святи́телю о́тче на́ш Лео́нтие! К тебе́ припа́даем и мо́лимся мы́ смире́ннии и гре́шнии, и я́ко отца́ чадолюби́ваго про́сим: всели́ в сердца́ на́ша любо́вь твою́, е́юже к Бо́гу и бли́жним твои́м, при жи́зни твое́й преиспо́лнен бы́л еси́, я́ко и ду́шу твою́ за па́ству твою́ положи́л еси́, му́ченически пострада́в от идолослужи́телей. Научи́ на́с, о́тче, тебе́ подража́ти ве́рно, Бо́га и бли́жних на́ших люби́ти и́скренно, и за́поведи Госпо́дни соверша́ти непогреши́тельно: да бу́дем и мы́ ча́да твоя́, не по и́мени то́кмо, но са́мым де́лом и все́м житие́м на́шим. Моли́ся, уго́дниче Бо́жий, ко Христу́ Бо́гу о святе́й правосла́вней Це́ркви и Держа́ве Росси́йстей: да пребу́дут в ми́ре и благостоя́нии, и процвета́ют в благоче́стии христиа́нстем непоколеби́мы. Влады́ку все́х умоли́: стра́ждущую страну́ Росси́йскую от лю́тых безбо́жник и вла́сти и́х да свободи́т, и да возста́вит престо́л правосла́вных прави́телей; ве́рных рабо́в Его́, в ско́рби и печа́ли де́нь и но́щь вопию́щих к Нему́, многоболе́зненных во́пль да услы́шит и да изведе́т от поги́бели живо́т на́ш. Соблюди́ гра́д тво́й Росто́в, и вся́ гра́ды и ве́си страны́ Росси́йския невреди́мы от вся́каго зла́. При́зри благоутро́бно на вся́ку ду́шу христиа́нскую, ми́лости и по́мощи от тебе́ и́щущую: бу́ди все́м на́м в боле́знех цели́тель, в ско́рбех уте́шитель, в печа́лех изба́витель, в беда́х помо́щник, в ча́с сме́ртный покрови́тель; да при по́мощи моли́тв твои́х святы́х, сподо́бимся и мы́ гре́шнии спасе́ние ве́чное получи́ти и Ца́рствие Небе́сное унасле́довати. Е́й, святи́телю Христо́в! Не посрами́ упова́ния на́шего, е́же по Бо́зе и Пресвяте́й Богоро́дице на тя́ кре́пко возлага́ем, но яви́ на́м твое́ многомо́щное заступле́ние: да хва́лим, сла́вим и велича́ем вели́кое человеколю́бие ди́внаго во святы́х свои́х Бо́га, Отца́, и Сы́на, и Свята́го Ду́ха, во ве́ки веко́в. Ами́нь.
Конда́къ а҃
И҆збра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, росто́ва просвѣти́телю, и҆ ᲂу҆се́рдный ѡ҆ дꙋша́хъ на́шихъ мл҃твенниче, ст҃и́телю ѻ҆́ч҃е лео́нтїе! восхвалѧ́емъ тѧ̀ съ любо́вїю, застꙋ́пника на́шего: ты̀ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, моли́сѧ вы́нꙋ ѡ҆ сп҃се́нїи на́съ грѣ́шныхъ и҆ ѿ всѧ́кихъ бѣ́дъ и҆збавлѧ́й зовꙋ́щихъ тѝ:
Ра́дꙋйсѧ, лео́нтїе, росто́вскїй чꙋдотво́рче.
І҆́косъ а҃
А҆гг҃лонра́вное житїѐ возлюби́въ, ѻ҆́ч҃е лео́нтїе, въ ѡ҆би́тель кїевопече́рскꙋю прише́лъ є҆сѝ, и҆ ѿ прпⷣбныхъ ѻ҆тє́цъ а҆нтѡ́нїа и҆ ѳеодо́сїа во и҆́ночество прїѧ́въ постриже́нїе, свѧ́тѡ и҆ бг҃оꙋго́днѡ пожи́лъ є҆сѝ, подвиза́ѧсѧ въ постѣ̀, бдѣ́нїи и҆ мл҃твахъ непреста́нныхъ. тѣ́мже слы́шиши ѿ на́съ бл҃гохвалє́нїѧ такѡва́ѧ:
Ра́дꙋйсѧ, земны́й а҆́гг҃ле, во пло́ти нбⷭ҇но пожи́вый: ра́дꙋйсѧ, нбⷭ҇ный человѣ́че, ѡ҆ го́рнихъ вы́нꙋ помышлѧ́вый.
Ра́дꙋйсѧ, во мра́цѣ пеще́рнѣмъ свѣ́тъ бг҃овидѣ́нїѧ сниска́вый: ра́дꙋйсѧ, по́двиги вели́кими пло́ть твою̀ ѡ҆бꙋзда́вый.
Ра́дꙋйсѧ, смире́нїемъ высѡ́каѧ стѧжа́вый: ра́дꙋйсѧ, терпѣ́нїемъ всѧ̑ и҆скꙋшє́нїѧ дїа́вѡльскїѧ побѣди́вый.
Ра́дꙋйсѧ, посто́мъ дꙋ́шꙋ твою̀ просвѣти́вый: ра́дꙋйсѧ, мл҃твами непреста́нными се́рдце твоѐ ѡ҆ст҃и́вый.
Ра́дꙋйсѧ, сосꙋ́де и҆збра́нный бж҃їѧ бл҃года́ти: ра́дꙋйсѧ, селе́нїе непоро́чное дх҃а ст҃а́гѡ.
Ра́дꙋйсѧ, свѣти́льниче, сїѧ́ѧй да̑ры бжⷭ҇твенными: ра́дꙋйсѧ, лꙋчѐ пресвѣ́тлагѡ сл҃нца пра́вды хрⷭ҇та̀.
Ра́дꙋйсѧ, лео́нтїе, росто́вскїй чꙋдотво́рче.
Конда́къ в҃
Ви́дѣвъ гдⷭ҇ь дꙋ́шꙋ твою̀, ст҃и́телю лео́нтїе, добродѣ́тельми бл҃гоꙋкраше́ннꙋ, бл҃говолѝ поста́вити тѧ̀ во є҆пⷭ҇копа гра́дꙋ росто́вꙋ, і҆дѡлослꙋже́нїемъ ꙗ҆зы́ческимъ потемне́нномꙋ: да пра́во пра́виши въ не́мъ сло́во и҆́стины, и҆ приво́диши ко хрⷭ҇тꙋ̀ заблꙋ́ждшыѧ человѣ́ки, невѣ́дꙋщыѧ пѣ́ти трїѷпоста́сномꙋ бг҃ꙋ: А҆ллилꙋ́їа.
І҆́косъ в҃
Ра́зꙋмъ нбⷭ҇ный тебѣ̀ дарова́сѧ, ст҃че бж҃їй, ѿ хрⷭ҇та̀ бг҃а, и҆́же посла̀ тѧ̀ въ странꙋ̀ росто́вскꙋю проповѣ́дати лю́демъ є҆ѵⷢ҇лїе хрⷭ҇то́во, и҆ приводи́ти къ позна́нїю вѣ́ры и҆́стинныѧ і҆дѡлослꙋже́нїемъ ѡ҆держи̑мыѧ человѣ́ки. мы́ же тѧ̀, равноапⷭ҇льнагѡ проповѣ́дника вѣ́дꙋще, привѣ́тствꙋемъ ра́достнѡ си́ми достодо́лжными хвалє́нїи:
Ра́дꙋйсѧ, первопресто́льниче ст҃ы́ѧ росто́вскїѧ цр҃кве: ра́дꙋйсѧ, правосла́вїѧ сто́лпе непоколеби́мый.
Ра́дꙋйсѧ, кра̑сныѧ но́зѣ твоѝ напра́вивый къ боре́нїю со врагѝ сп҃се́нїѧ человѣ́ческагѡ: ра́дꙋйсѧ, а҆пⷭ҇льски подвиза́выйсѧ во гра́дѣ росто́вѣ.
Ра́дꙋйсѧ, терпѣли́вѡ преноси́вый гоне́нїе ве́лїе ѿ і҆дѡлослꙋжи́телей: ра́дꙋйсѧ, любо́вїю ѻ҆те́ческою ѕло́бꙋ и҆́хъ побѣжда́вый.
Ра́дꙋйсѧ, мꙋ́жествомъ дꙋшѝ твоеѧ̀ всѧ̑ ѕлохи́трѡсти и҆́хъ посрами́вый: ра́дꙋйсѧ, бл҃говре́меннѡ и҆ безвре́меннѡ па́ствꙋ твою̀ бл҃гоче́стїю поꙋча́вый.
Ра́дꙋйсѧ, ста́рцєвъ і҆дѡлослꙋжи́тельныхъ бг҃омꙋ́дрый ѡ҆бличи́телю: ра́дꙋйсѧ, младе́нцєвъ бл҃гі́й наꙋчи́телю.
Ра́дꙋйсѧ, неꙋтоми́мѡ подвиза́выйсѧ ѡ҆ сп҃се́нїи дꙋ́шъ человѣ́ческихъ: ра́дꙋйсѧ, просвѣти́вый росто́въ свѣ́томъ позна́нїѧ хрⷭ҇то́ва.
Ра́дꙋйсѧ, лео́нтїе, росто́вскїй чꙋдотво́рче.
Конда́къ г҃
Си́лою хрⷭ҇то́вою преиспо́лненный, ст҃и́телю лео́нтїе, не ᲂу҆боѧ́лсѧ є҆сѝ противꙋста́ти со́нмищꙋ і҆дѡлослꙋжи́телей, со ѻ҆рꙋ́жїемъ и҆ дреко́льми на тѧ̀ прише́дшемꙋ, къ ни̑мже, въ ст҃и́тєльскїѧ ри̑зы ѡ҆блече́нный, и҆з̾ хра́ма бж҃їѧ кро́ткѡ и҆зше́лъ є҆сѝ, и҆ съ любо́вїю и҆́хъ ᲂу҆вѣщава́лъ є҆сѝ, ѡ҆брати́тисѧ ко хрⷭ҇тꙋ̀ бг҃ꙋ, и҆ вкꙋ́пѣ съ тобо́ю пѣ́ти є҆мꙋ̀: А҆ллилꙋ́їа.
І҆́косъ г҃
И҆мѣ́лъ є҆сѝ лицѐ, ꙗ҆́кѡ а҆́гг҃льское, свѣ́томъ нбⷭ҇нымъ сїѧ́ющее, ст҃и́телю лео́нтїе, є҆го́же не терпѧ́ще зрѣ́ти і҆дѡлослꙋжи́тели, ѻ҆́ви ѡ҆слѣпо́ша, ѻ҆́ви же разсла́блени на землѝ падо́ша, и҆ ѕѣлѡ̀ ᲂу҆страше́ннїи не дерзнꙋ́ша ѡ҆ѕло́бити тѧ̀, проповѣ́дника бжⷭ҇твенныѧ и҆́стины, вои́стиннꙋ досто́йнаго похва́лъ таковы́хъ:
Ра́дꙋйсѧ, свѣтоза́рный бж҃їѧ блгⷣти таи́нниче: ра́дꙋйсѧ, а҆гг҃лоподо́бный человѣ́че.
Ра́дꙋйсѧ, без̾ѡрꙋ́жный воѡрꙋже́нныхъ побѣди́вый: ра́дꙋйсѧ, небоѧ́зненнѡ сло́во бж҃їе проповѣ́давый.
Ра́дꙋйсѧ, ꙗ҆́кѡ лицѐ а҆дама́нтово свы́ше тебѣ̀ дарова́сѧ: ра́дꙋйсѧ, ꙗ҆́кѡ тобо́ю ли́ца і҆дѡлослꙋжи́телей посрами́шасѧ.
Ра́дꙋйсѧ, ꙗ҆́кѡ а҆́гг҃лъ бж҃їй, свѣ́томъ лица̀ твоегѡ̀ і҆дѡлослꙋжи́телей ᲂу҆страши́вый: ра́дꙋйсѧ, ꙗ҆́кѡ со ѕло́бою на тѧ̀ ᲂу҆стреми́вшихсѧ кро́тостїю твое́ю смири́вый.
Ра́дꙋйсѧ, ѡ҆слѣ́пшихъ и҆ разсла́бленныхъ мл҃твою твое́ю и҆сцѣли́вый: ра́дꙋйсѧ, бл҃гостїю ѕло́бꙋ побѣди́вый.
Ра́дꙋйсѧ, а҆пⷭ҇ле землѝ росто́вскїѧ: ра́дꙋйсѧ, па́стырю до́брый ста́да хрⷭ҇то́ва.
Ра́дꙋйсѧ, лео́нтїе, росто́вскїй чꙋдотво́рче.
Конда́къ д҃
Бꙋ́рѧ гоне́нїѧ ꙗ҆зы́ческагѡ па́ки возшꙋмѣ̀ на тѧ̀, ст҃и́телю лео́нтїе, и҆ и҆згна̀ тѧ̀ и҆з̾ гра́да росто́ва на предгра́дїе є҆гѡ̀, и҆дѣ́же ты̀ посели́лсѧ є҆сѝ, и҆ хра́мъ бж҃їй во и҆́мѧ а҆рхїстрати́га си́лъ нбⷭ҇ныхъ та́мѡ созда́въ, при не́мъ подвиза́лсѧ є҆сѝ въ трꙋдѣ́хъ а҆пⷭ҇льскихъ, зовы́й є҆ди́номꙋ могꙋ́щемꙋ сп҃стѝ заблꙋ́ждшыѧ человѣ́ки хрⷭ҇тꙋ̀, цр҃ю̀ и҆ бг҃ꙋ: А҆ллилꙋ́їа.
І҆́косъ д҃
Слы́шавше бл҃гі̑ѧ твоѧ̑ глаго́лы, ст҃и́телю хрⷭ҇то́въ, ма́лыѧ дѣ́ти прихожда́хꙋ къ тебѣ̀, на предгра́дїи росто́ва живꙋ́щемꙋ, и҆́хже ты̀ пшени́цею съ ме́домъ пита́ѧ, насажда́лъ є҆сѝ въ ни́хъ ᲂу҆че́нїе хрⷭ҇то́во, да ѿ ᲂу҆́стъ младе́нцєвъ соверши́ши хвалꙋ̀ бг҃ꙋ, внꙋша́ющемꙋ на́мъ зва́ти тебѐ:
Ра́дꙋйсѧ, ѡ҆зари́вый свѣ́томъ хрⷭ҇то́вымъ лю́ди во тмѣ̀ и҆ сѣ́ни сме́ртнѣй сѣдѧ́щыѧ: ра́дꙋйсѧ, призва́вый ко хрⷭ҇тꙋ̀ ѻ҆́вцы заблꙋ́ждшыѧ.
Ра́дꙋйсѧ, гоне́нїе и҆ и҆згна́нїе хрⷭ҇та̀ ра́ди мно́гажды претерпѣ́вый: ра́дꙋйсѧ, терпѣ́нїемъ твои́мъ гони́телей твои́хъ препобѣди́вый.
Ра́дꙋйсѧ, хрⷭ҇топодража́тельнѡ младе́нцы возлюби́вый: ра́дꙋйсѧ, сердца̀ и҆́хъ неви́нныѧ хрⷭ҇то́вымъ позна́нїемъ ᲂу҆краси́вый.
Ра́дꙋйсѧ, сла́дкимъ бра́шномъ и҆̀хъ пита́ѧ, дꙋ́шы и҆́хъ въ любо́вь пресла́дкагѡ і҆и҃са плѣни́вый: ра́дꙋйсѧ, мꙋ́дрѡ и҆́хъ въ мре́жꙋ є҆ѵⷢ҇лїа хрⷭ҇то́ва ᲂу҆лови́вый.
Ра́дꙋйсѧ, чрез̾ ча̑да роди́телей ко сп҃се́нїю призва́вый: ра́дꙋйсѧ, мно́гихъ ко хрⷭ҇тꙋ̀ ѡ҆брати́вый.
Ра́дꙋйсѧ, дѣ́лателю до́брый вїногра́да нбⷭ҇нагѡ: ра́дꙋйсѧ, сла̑дкїѧ плоды̀ дѣ́ланїѧ твоегѡ̀ хрⷭ҇тꙋ̀ принесы́й.
Ра́дꙋйсѧ, лео́нтїе, росто́вскїй чꙋдотво́рче.
Конда́къ є҃
Бг҃оте́чное свѣти́ло бы́въ, ст҃и́телю ѻ҆́ч҃е лео́нтїе, мра́къ і҆дѡлослꙋже́нїѧ во гра́дѣ росто́вѣ просвѣти́лъ є҆сѝ, сїѧ́нїемъ немерца́ющимъ сл҃нца пра́вды хрⷭ҇та̀, и҆ мре́жею про́повѣди є҆ѵⷢ҇льскїѧ ᲂу҆лови́лъ є҆сѝ во сп҃се́нїе мнѡ́гїѧ человѣ́ки, наꙋчи́въ и҆̀хъ правосла́внѡ вѣ́ровати во є҆ди́наго бг҃а, въ трⷪ҇цѣ ст҃ѣ́й сла́вимаго и҆ покланѧ́емаго, и҆ бл҃гопрїѧ́тнѡ пѣ́ти є҆мꙋ̀: А҆ллилꙋ́їа.
І҆́косъ є҃
Ви́дѣвше тѧ̀ лю́дїе росто́встїи, ст҃и́телю лео́нтїе, терпѣли́вѡ поꙋча́ющаго и҆̀хъ є҆ѵⷢ҇лїю хрⷭ҇то́вꙋ, и҆ ни во что̀ же вменѧ́ющаго гоне́нїе, и҆згна́нїе и҆ скѡ́рби, нача́ша приходи́ти къ тебѣ̀ и҆ послꙋ́шати твои́хъ поꙋче́нїй дꙋшесп҃си́тельныхъ: ты́ же, ст҃е, хвалꙋ̀ ѡ҆ се́мъ бг҃ꙋ возда́въ, ѿ предгра́дїѧ во гра́дъ росто́въ возврати́лсѧ є҆сѝ, и҆ при собо́рнѣмъ є҆гѡ̀ хра́мѣ водвори́всѧ, нелѣ́ностнѡ ᲂу҆чи́лъ є҆сѝ лю́ди твоѧ̑ бл҃гоче́стїю хрⷭ҇тїа́нскомꙋ. ѡ҆ се́мъ тѧ̀ хва́лимъ и҆ зове́мъ:
Ра́дꙋйсѧ, те́рнїе невѣ́рїѧ ꙗ҆зы́ческагѡ въ росто́вѣ посѣка́вый: ра́дꙋйсѧ, лозꙋ̀ позна́нїѧ хрⷭ҇то́ва та́мѡ насади́вый.
Ра́дꙋйсѧ, де́нь и҆ но́щь трꙋди́выйсѧ на ни́вѣ гдⷭ҇ней: ра́дꙋйсѧ, приведы́й гдⷭ҇еви лю́ди пакибытїе́мъ ѡ҆бновлє́нныѧ.
Ра́дꙋйсѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а крести́вый ꙗ҆зы́чники ѡ҆жесточє́нныѧ: ра́дꙋйсѧ, трⷪ҇ческою блгⷣтїю ᲂу҆кроти́вый і҆дѡлослꙋжи́тели ѡ҆ѕло́блєнныѧ.
Ра́дꙋйсѧ, первопа́стырю росто́вскїѧ цр҃кве: ра́дꙋйсѧ, ѕвѣздо̀ немерца́ющаѧ, свѣ́томъ хрⷭ҇то́вымъ всѣ́хъ просвѣща́ющаѧ.
Ра́дꙋйсѧ, мл҃твенниче ᲂу҆се́рдный ѡ҆ па́ствѣ твое́й земнѣ́й: ра́дꙋйсѧ, бг҃а ѕѣлѡ̀ просла́вивый по́двиги твои́ми равноапⷭ҇льными.
Ра́дꙋйсѧ, ѿ бг҃а просла́вленный мно́гими чꙋдесы̀: ра́дꙋйсѧ, си́ми ᲂу҆тверди́вый и҆́стинꙋ твоеѧ̀ про́повѣди бжⷭ҇твенныѧ.
Ра́дꙋйсѧ, лео́нтїе, росто́вскїй чꙋдотво́рче.
Конда́къ ѕ҃
Проповѣ́дникѡмъ є҆ѵⷢ҇льскїѧ и҆́стины, а҆пⷭ҇лѡмъ хрⷭ҇то́вымъ, вѣ́рнѡ подража́лъ є҆сѝ, ст҃и́телю ѻ҆́ч҃е на́шъ лео́нтїе, и҆ подо́бнѡ и҆́мъ трꙋди́лсѧ є҆сѝ во бл҃говѣ́стїи хрⷭ҇то́вѣ, лю́ди росто́вскїѧ поꙋча́ѧ правосла́внѡ вѣ́ровати во ст҃ꙋ́ю трⷪ҇цꙋ и҆ бжⷭ҇твеннꙋю є҆ди́ницꙋ, творца̀ и҆ созда́телѧ всѧ́ческихъ, є҆мꙋ́же при́снѡ пѣ́лъ є҆сѝ а҆́гг҃льскꙋю пѣ́снь: А҆ллилꙋ́їа.
І҆́косъ ѕ҃
Возсїѧ́лъ є҆сѝ во гра́дѣ росто́вѣ свѣ́томъ до́брыхъ дѣ́лъ твои́хъ, ст҃и́телю приснопа́мѧтне, ѡ҆ ни́хже прославлѧ́хꙋ лю́ди ѻ҆ц҃а̀ нбⷭ҇нагѡ бг҃а, ᲂу҆крѣпи́вшагѡ тѧ̀ на по́двиги а҆пⷭ҇льскїѧ, и҆ дарова́вшагѡ тѝ си́лꙋ и҆ вла́сть на дꙋ̑хи нечи́стыѧ, ѿ и҆́хже влїѧ́нїѧ па́гꙋбнагѡ свобожда́лъ є҆сѝ человѣ́ки, тебѣ̀ зовꙋ́щыѧ и҆ глаго́лющыѧ:
Ра́дꙋйсѧ, хрⷭ҇тꙋ̀ ᲂу҆невѣ́стивый мнѡ́гїѧ дꙋ́шы человѣ́чєскїѧ: ра́дꙋйсѧ, ѿ хрⷭ҇та̀ ѡ҆богаще́нный мно́гими бл҃года́тными да̑ры.
Ра́дꙋйсѧ, крі́не бл҃гоꙋха́нный нбⷭ҇нагѡ прозѧбе́нїѧ: ра́дꙋйсѧ, ма́слино бл҃гопло́днаѧ са́да і҆и҃сова.
Ра́дꙋйсѧ, гра́да росто́ва сла́во и҆ похвало̀: ра́дꙋйсѧ, вѣ́ры хрⷭ҇то́вой въ не́мъ крѣ́пкое ᲂу҆твержде́нїе.
Ра́дꙋйсѧ, бл҃гоче́стїѧ ᲂу҆чи́телю: ра́дꙋйсѧ, правосла́вїѧ наста́вниче.
Ра́дꙋйсѧ, недꙋ́гѡвъ дꙋше́вныхъ и҆ тѣле́сныхъ цѣли́телю: ра́дꙋйсѧ, ни́щихъ и҆ ᲂу҆бо́гихъ пита́телю.
Ра́дꙋйсѧ, свѧще́нникѡвъ рꙋкополага́телю: ра́дꙋйсѧ, и҆́нокѡвъ покрови́телю.
Ра́дꙋйсѧ, лео́нтїе, росто́вскїй чꙋдотво́рче.
Конда́къ з҃
Хотѣ́нїе є҆ди́но и҆мѣ́лъ є҆сѝ, свѧ́тче бж҃їй, є҆́же бг҃ꙋ ᲂу҆гожда́ти и҆ сп҃се́нїю люде́й твои́хъ слꙋжи́ти: тѣ́мже не да́лъ є҆сѝ сна̀ ѻ҆чи́ма твои́ма, ни вѣ́ждома дрема́нїѧ, но при́снѡ подвиза́лсѧ є҆сѝ во бл҃го ст҃ы́ѧ росто́вскїѧ цр҃кве, стѧжа́вшїѧ тѧ̀, столпа̀ правосла́вїѧ непоколеби́маго, и҆ стра́жа до́мꙋ бж҃їю вѣ́рнаго, примѣ́ромъ твои́мъ и҆ на́съ поꙋча́ющаго нелѣ́ностнѡ возноси́ти пѣ́снь хвалы̀ хрⷭ҇тꙋ̀ бг҃ꙋ: А҆ллилꙋ́їа.
І҆́косъ з҃
Но́вагѡ тѧ̀ нїкола́а мѷрлѷкі́йскагѡ, стѧжа̀ гра́дъ росто́въ, ст҃и́телю ѻ҆́ч҃е лео́нтїе, чꙋдесы̀ твои́ми ѕѣлѡ̀ и҆́мѧ хрⷭ҇то́во въ не́мъ просла́вльшаго, и҆ ко хрⷭ҇то́вꙋ позна́нїю лю́ди заблꙋ́ждшыѧ приве́дшаго, твои́мъ ᲂу҆че́нїемъ бжⷭ҇твєннымъ, є҆мꙋ́же внима́юще, лю́ди росто́встїи наꙋчи́шасѧ пѣ́ти тебѣ̀:
Ра́дꙋйсѧ, бл҃гі́й ра́бе и҆ вѣ́рный, да́нный тебѣ̀ ѿ гдⷭ҇а тала́нтъ не сокры́вый: ра́дꙋйсѧ, мно́гꙋ кꙋ́плю дꙋхо́внꙋю и҆́мъ приѡбрѣты́й.
Ра́дꙋйсѧ, сотвори́вый и҆ наꙋчи́вый, и҆ ве́лїй нарече́нный въ црⷭ҇твїи нбⷭ҇нѣмъ: ра́дꙋйсѧ, вели́чїемъ чꙋде́съ на землѝ просла́вленный.
Ра́дꙋйсѧ, зна́мєнїѧ ди̑внаѧ рꙋка́ма твои́ма соверши́вый: ра́дꙋйсѧ, тꙋ́не прїѧ́вый, тꙋ́не подава́вый.
Ра́дꙋйсѧ, и҆сполне́нїе ѡ҆бѣтова́нїй є҆ѵⷢ҇льскихъ полꙋчи́вый: ра́дꙋйсѧ, млⷭ҇рдїѧ сп҃сова подража́телю.
Ра́дꙋйсѧ, щедрода́тельный ми́лостыни пода́телю: ра́дꙋйсѧ, любвеѡби́льный скорбѧ́щихъ ᲂу҆тѣ́шителю.
Ра́дꙋйсѧ, ѻ҆рга́не дх҃а ст҃а́гѡ: ра́дꙋйсѧ, мѵ́ро хрⷭ҇то́ва бл҃гоꙋха́нїѧ на землѝ.
Ра́дꙋйсѧ, лео́нтїе, росто́вскїй чꙋдотво́рче.
Конда́къ и҃
Стра́нствїе земно́е мч҃ническою кончи́ною соверши́лъ є҆сѝ, ст҃и́телю лео́нтїе, хрⷭ҇та̀ ра́ди ѿ і҆дѡлослꙋжи́телей ѡ҆жесточе́нныхъ да́же до кро́ве пострада́въ, пе́рвый сщ҃енномч҃нкъ рѡссі́йскїѧ землѝ ꙗ҆́вльсѧ, гра́дъ росто́въ ѡ҆ст҃и́лъ є҆сѝ и҆злїѧ́нїемъ кро́ве твоеѧ̀, и҆ хрⷭ҇тꙋ̀ прїꙋсво́илъ є҆сѝ, да просвѣще́ннїи тобо́ю лю́ди, чествꙋ́юще по́двигъ тво́й а҆пⷭ҇льскїй, зовꙋ́тъ бг҃ꙋ: А҆ллилꙋ́їа.
І҆́косъ и҃
Ве́сь въ же́ртвꙋ бг҃ꙋ прине́слсѧ є҆сѝ, ст҃и́телю достобл҃же́нный, и҆ со дерзнове́нїемъ мно́гимъ хрⷭ҇тꙋ̀ предста́лъ є҆сѝ во сла́вѣ црⷭ҇твїѧ нбⷭ҇нагѡ, и҆дѣ́же не забꙋ́ди и҆ на́съ, земны́хъ, ᲂу҆се́рднѡ съ любо́вїю тѧ̀ почита́ющихъ, но при́снѡ моли́сѧ ѡ҆ сп҃се́нїи на́шемъ, да тебѣ̀ зове́мъ хвале́бнѡ:
Ра́дꙋйсѧ, пе́рвый сщ҃енномч҃ниче землѝ рѡссі́йскїѧ: ра́дꙋйсѧ, кро́ве ѡ҆багре́нїемъ ᲂу҆краси́вый ри́зꙋ твою̀ ст҃и́тельскꙋю.
Ра́дꙋйсѧ, со стрⷭ҇тоте́рпцы вше́дый въ ра́дость гдⷭ҇а твоегѡ̀: ра́дꙋйсѧ, а҆́гнцꙋ бж҃їю по́двигомъ земны́мъ подража́вый.
Ра́дꙋйсѧ, за ѻ҆́вцы твоѧ̑ словє́сныѧ дꙋ́шꙋ твою̀ положи́вый: ра́дꙋйсѧ, и҆́мѧ хрⷭ҇то́во кончи́ною твое́ю просла́вивый.
Ра́дꙋйсѧ, сме́рть мч҃ническꙋю прїѧ́вый, но тлѣ́нїѧ не позна́вый: ра́дꙋйсѧ, чꙋдесы̀ мно́гими ст҃ость твою̀ ѡ҆знаменова́вый.
Ра́дꙋйсѧ, во гро́бъ соше́дый и҆ ѿ негѡ̀ заре́ю безсме́ртїѧ возсїѧ́вый: ра́дꙋйсѧ, во ѡ҆де́ждꙋ бл҃года́тнагѡ нетлѣ́нїѧ ѡ҆блече́нный.
Ра́дꙋйсѧ, воскрⷭ҇нїѧ хрⷭ҇то́ва си́лꙋ въ ме́ртвенномъ тѣлесѝ твое́мъ проѧви́вый: ра́дꙋйсѧ, во бл҃гоꙋха́нїи ст҃ы́ни ѡ҆почи́вый.
Ра́дꙋйсѧ, лео́нтїе, росто́вскїй чꙋдотво́рче.
Конда́къ ѳ҃
Всѣ́мъ тѣ́ломъ цѣ́лъ и҆ нерꙋши́мь, съ лице́мъ сїѧ́ющимъ, лежа́щъ во гро́бѣ ꙗ҆́кѡ жи́въ, по лѣ́тѣхъ мно́зѣхъ въ землѝ ѡ҆брѣ́тенъ бы́лъ є҆сѝ, ст҃и́телю лео́нтїе, и҆ чꙋде́съ мно́жество ѿ нетлѣ́нныхъ и҆ многоцѣле́бныхъ моще́й твои́хъ и҆сточи́лъ є҆сѝ, и҆́ми ст҃ость твою̀ зна́менꙋѧ, и҆ подвиза́ѧ вѣ́рныѧ бл҃года́рственнѡ взыва́ти ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.
І҆́косъ ѳ҃
Вѣті́йство человѣ́ческое не довлѣ́етъ къ прославле́нїю мно́гихъ и҆ пресла́вныхъ чꙋдотворе́нїй твои́хъ, ст҃и́телю лео́нтїе, и҆́миже цр҃ковь росто́вскаѧ бл҃гоꙋкраси́сѧ, и҆ сегѡ̀ ра́ди гла́сы хвале́бными ᲂу҆се́рднѡ тѧ̀ сла́вимъ, ꙗ҆́кѡ своегѡ̀ первост҃и́телѧ, просвѣти́телѧ и҆ предста́телѧ ко гдⷭ҇ꙋ, зовꙋ́ще къ тебѣ̀ бл҃года́рственнѡ и҆ хвале́бнѡ:
Ра́дꙋйсѧ, а҆лава́стре цѣле́бный мѵ́ра хрⷭ҇то́ва преиспо́лненный: ра́дꙋйсѧ, рѣко̀ чꙋде́съ многово́днаѧ.
Ра́дꙋйсѧ, и҆сто́чниче кипѧ́й и҆сцѣле́ньми: ра́дꙋйсѧ, кла́дезю, ѿ негѡ́же болѧ́щїи здра́вїе почерпа́ютъ.
Ра́дꙋйсѧ, нетлѣ́нїѧ цвѣ́те бл҃гоꙋха́нный и҆ прекра́сный: ра́дꙋйсѧ, безсме́ртїѧ зарѐ присносїѧ́ющаѧ.
Ра́дꙋйсѧ, би́сере драгі́й бж҃їѧ блгⷣти, въ нѣ́дрѣхъ земны́хъ ѡ҆брѣ́тенный: ра́дꙋйсѧ, со сла́вою и҆ че́стїю во хра́мѣ бж҃їемъ положе́нный.
Ра́дꙋйсѧ, ꙗ҆́кѡ къ тебѣ̀ слѣпі́и приходѧ́ще, зрѧ́щїи возвраща́хꙋсѧ: ра́дꙋйсѧ, ꙗ҆́кѡ къ тебѣ̀ хро́мїи и҆ нича́щыѧ ползꙋ́ще, прѧмоходѧ́ще ѿхожда́хꙋ.
Ра́дꙋйсѧ, разсла́бленныхъ бл҃года́тный ᲂу҆крѣпи́телю: ра́дꙋйсѧ, бѣснова́тыхъ ѿ наси́лїѧ дїа́вольскагѡ свободи́телю.
Ра́дꙋйсѧ, лео́нтїе, росто́вскїй чꙋдотво́рче.
Конда́къ і҃
Сп҃се́нїѧ дꙋше́внагѡ хода́тай ꙗ҆влѧ́ешисѧ вѣ̑рнымъ, ст҃и́телю лео́нтїе, и҆ при́снѡ мо́лишисѧ бг҃ꙋ ѡ҆ па́ствѣ твое́й земно́й, ᲂу҆се́рднѡ тѧ̀ почита́ющей. сїѐ ᲂу҆вѣрѧ́ѧ въ чꙋ́дномъ видѣ́нїи ꙗ҆ви́лсѧ є҆сѝ въ нощѝ, въ собо́рнѣмъ хра́мѣ росто́ва, съ под̾ѧ́тыми горѣ̀ дла́ньми ᲂу҆ прⷭ҇то́ла бж҃їѧ ᲂу҆се́рднѡ молѧ́йсѧ и҆ свѣ́томъ нбⷭ҇нымъ сїѧ́ѧй, є҆́же ви́дѣвъ мꙋ́жъ, такова́гѡ видѣ́нїѧ досто́йный, возопѝ ко гдⷭ҇ꙋ: А҆ллилꙋ́їа.
І҆́косъ і҃
Цр҃ѧ̀ нбⷭ҇нагѡ хрⷭ҇та̀ вѣ́рный ра́бе и҆ ᲂу҆го́дникъ бы́лъ є҆сѝ, ст҃и́телю лео́нтїе, и҆ ѿ негѡ̀ нетлѣ́нїемъ и҆ чꙋдесы̀ просла́вленный, ѿ вели́каго кнѧ́зѧ а҆ндре́а бг҃олю́бскагѡ по́честь посме́ртнꙋю воспрїѧ́лъ є҆сѝ въ мощѣ́хъ твои́хъ ст҃ы́хъ, и҆̀мже покланѧ́ющесѧ съ вѣ́рою и҆ любо́вїю, пѣ́сненнѡ тебѣ̀ вопїе́мъ:
Ра́дꙋйсѧ, правосла́вїѧ ᲂу҆твержде́нїе: ра́дꙋйсѧ, а҆рхїере́євъ красото̀.
Ра́дꙋйсѧ, въ со́нїихъ и҆ видѣ́нїихъ вѣ́рныѧ посѣща́ѧй: ра́дꙋйсѧ, ꙗ҆вле́нїемъ твои́мъ больны̑мъ нездра́вїе во здра́вїе претворѧ́ѧй.
Ра́дꙋйсѧ, ско́рый помо́щниче моли́твеннѡ тѧ̀ призыва́ющихъ: ра́дꙋйсѧ, ᲂу҆се́рдный застꙋ́пниче тѧ̀ почита́ющихъ.
Ра́дꙋйсѧ, правовѣ́рныхъ бл҃гонаде́жное прибѣ́жище: ра́дꙋйсѧ, по бз҃ѣ и҆ бцⷣѣ крѣ́пкое на́ше ᲂу҆пова́нїе.
Ра́дꙋйсѧ, врачꙋ̀ безме́здный, є҆ди́ныѧ вѣ́ры то́кмѡ тре́бꙋѧй: ра́дꙋйсѧ, бли̑жнимъ и҆ да̑льнимъ щедрѡ́ты цѣлє́бныѧ подава́ѧй.
Ра́дꙋйсѧ, росто́ва храни́телю неѿстꙋ́пный: ра́дꙋйсѧ, всеѧ̀ рѡссі́и предста́телю бг҃омъ да́нный.
Ра́дꙋйсѧ, лео́нтїе, росто́вскїй чꙋдотво́рче.
Конда́къ а҃і
Пѣ́нїе моле́бное ѿ лѣ́тъ дре́внихъ и҆ доны́нѣ не ᲂу҆молчѐ ᲂу҆ гро́ба твоегѡ̀, ст҃и́телю ѻ҆́ч҃е на́шъ лео́нтїе, и҆ свѣща̀ неꙋгаси́мо пребыва́етъ та́мѡ, є҆ѧ́же погаше́нїе є҆ди́нымъ ѿ кли̑рїкъ собо́рныѧ це́ркве ты̀ гро́знѡ покара́лъ є҆сѝ, разслабле́нїемъ тѣле́снымъ вино́внаго наказа́въ, до́ндеже не вразꙋми́сѧ, и҆ съ покаѧ́нїемъ не ѡ҆брати́сѧ къ тебѣ̀ цѣле́бникꙋ бл҃года́тномꙋ, зовы́й тѧ̀ прославлѧ́ющемꙋ бг҃ꙋ: А҆ллилꙋ́їа.
І҆́косъ а҃і
Свѣ́тлостїю чꙋде́съ сїѧ́ѧй, ст҃и́телю прпⷣбне, бл҃года́тнѡ ѡ҆зарѧ́еши дꙋ́шы на́ша, страстьмѝ грѣхо́вными потемнє́нныѧ, и҆ всѧ̑ ны̀ приво́диши на стезю̀ покаѧ́нїѧ и҆ сп҃се́нїѧ. сегѡ̀ ра́ди ᲂу҆бл҃жа́емъ тѧ̀, наста́вника дꙋшесп҃си́тельнагѡ и҆ по сме́рти, ѿ гро́ба твоегѡ̀ чꙋде́снѡ на́съ поꙋча́ющаго, и҆ во ᲂу҆миле́нїи глꙋбо́цѣмъ воспѣва́емъ въ похвалꙋ̀ тебѣ̀:
Ра́дꙋйсѧ, дрꙋ́же хрⷭ҇то́въ, до конца̀ вѣ́ренъ є҆мꙋ̀ пребы́вый: ра́дꙋйсѧ, ᲂу҆го́дниче бж҃їй, на нб҃сѝ и҆ землѝ просла́вленный.
Ра́дꙋйсѧ, въ со́нмѣ ст҃и́телей сїѧ́ющаѧ ѕвѣздо̀: ра́дꙋйсѧ, со ст҃и́тели москѡ́вскими въ видѣ́нїи, во дни̑ ѡ҆бложе́нїѧ тата́рами москвы̀, та́инственнѡ предста́вый.
Ра́дꙋйсѧ, прест҃ѣ́й влⷣчцѣ бцⷣѣ, въ дрꙋго́мъ видѣ́нїи, спꙋ́тникъ бы́вый: ра́дꙋйсѧ, є҆ѧ̀ во́лю ст҃ꙋ́ю въ жи́зни и҆ по сме́рти ᲂу҆се́рднѡ творѧ́й.
Ра́дꙋйсѧ, свѣщѐ, въ мл҃твахъ къ бг҃ꙋ возжже́ннаѧ: ра́дꙋйсѧ, вождю̀, пꙋ́ть ко сп҃се́нїю всѣ̑мъ показꙋ́ющїй.
Ра́дꙋйсѧ, па́ствꙋ твою̀ мл҃твеннѡ назира́ѧй: ра́дꙋйсѧ, съ вѣ́рою къ тебѣ̀ прибѣга́ющихъ прошє́нїѧ и҆сполнѧ́ѧй.
Ра́дꙋйсѧ, цр҃кве правосла́вныѧ бл҃года́тнаѧ лѣ́пото: ра́дꙋйсѧ, лю́бѧщихъ и҆ чтꙋ́щихъ тѧ̀ при́сное ра́дованїе.
Ра́дꙋйсѧ, лео́нтїе, росто́вскїй чꙋдотво́рче.
Конда́къ в҃і
Блгⷣти бж҃їей сокро́вище, ст҃а́ѧ и҆ всечестна́ѧ ра́ка твоѧ̀, ст҃и́телю ѻ҆́ч҃е на́шъ лео́нтїе, но́ваѧ кꙋпѣ́ль сїлѡа́мскаѧ длѧ недꙋ́жныхъ ꙗ҆ви́сѧ: къ не́й бо не є҆ди́ножды то́кмѡ въ лѣ́то, но на всѧ́кое вре́мѧ, съ вѣ́рою приходѧ́щїи, и҆сцѣле́нїе болѣ́знемъ свои̑мъ прїе́млютъ, и҆ тѧ̀ прославлѧ́ютъ, ми́лостиваго и҆ безме́зднаго цѣли́телѧ, зовꙋ́ще бл҃ги́хъ пода́телю бг҃ꙋ: А҆ллилꙋ́їа.
І҆́косъ в҃і
Пою́ще по́двиги твоѧ̑ равноапⷭ҇льныѧ, и҆ мнѡ́гаѧ пресла̑внаѧ чꙋдотворє́нїѧ твоѧ̑, чꙋдотво́рче ст҃ы́й лео́нтїе, мо́лимъ тѧ̀, ми́лостиваго предста́телѧ на́шего: моли́сѧ съ на́ми и҆ ѡ҆ на́съ ко хрⷭ҇тꙋ̀ бг҃ꙋ, да проба́витъ къ на́мъ млⷭ҇ть свою̀, и҆ ꙗ҆ви́тъ на́мъ вели̑кїѧ своѧ̑ щедрѡ́ты, да возмо́жемъ бл҃гопрїѧ́тнѡ приноси́ти тебѣ̀ ѿ ᲂу҆се́рдїѧ на́шегѡ сїѧ̑ пѣ́снєнныѧ похвалы̑:
Ра́дꙋйсѧ, прест҃ы́ѧ трⷪ҇цы вѣ́рный и҆сповѣ́дниче: ра́дꙋйсѧ, прест҃ы́ѧ бцⷣы досто́йный и҆збра́нниче.
Ра́дꙋйсѧ, а҆́гг҃льскихъ во́инствъ собесѣ́дниче: ра́дꙋйсѧ, всѣ́хъ ст҃ы́хъ сожи́телю.
Ра́дꙋйсѧ, въ ра́йскихъ ѡ҆би́телехъ пребыва́ѧй: ра́дꙋйсѧ, ѿ го́рнихъ высо́тъ къ земнорѡ́днымъ ми́лостивнѡ приника́ѧй.
Ра́дꙋйсѧ, любо́вь къ па́ствѣ твое́й неизмѣ́ннѡ сохрани́вый: ра́дꙋйсѧ, чꙋде́съ мно́жествомъ и҆ по сме́рти ча̑да твоѧ̑ ѡ҆зари́вый.
Ра́дꙋйсѧ, въ вы́шнихъ живы́й и҆ ѡ҆ ни́жнихъ промышлѧ́ѧй: ра́дꙋйсѧ, гра́дъ росто́въ ѿ всѧ́кагѡ ѕла̀ соблюда́ѧй.
Ра́дꙋйсѧ, тѣле́съ на́шихъ немздопрїи́мный цѣле́бниче: ра́дꙋйсѧ, ѡ҆ дꙋша́хъ на́шихъ бл҃гопрїѧ́тный къ бг҃ꙋ мл҃твенниче.
Ра́дꙋйсѧ, лео́нтїе, росто́вскїй чꙋдотво́рче.
Конда́къ г҃і
Ѽ прест҃ы́й и҆ преди́вный чꙋдотво́рче, ст҃и́телю ѻ҆́ч҃е лео́нтїе, росто́ва первопа́стырю и҆ всѣ́хъ вѣ́рныхъ предста́телю! прїимѝ ми́лостивѡ сїѐ ма́лое моле́нїе на́ше въ похвалꙋ̀ тебѣ̀ приноси́мое, и҆ бл҃гопрїѧ́тными мл҃твами твои́ми ко гдⷭ҇ꙋ бг҃ꙋ, сотворѝ на́съ наслѣ́дники бы́ти всесвѣ́тлагѡ црⷭ҇твїѧ хрⷭ҇то́ва: да предста́тельствомъ твои́мъ мꙋче́нїй вѣ́чныхъ и҆зба́вльшесѧ, сподо́бимсѧ въ ра́дости ст҃ы́хъ, вкꙋ́пѣ съ тобо́ю пѣ́ти вѣ́чнѡ бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆гг҃лонра́вное житїѐ возлюби́въ, ѻ҆́ч҃е лео́нтїе, въ ѡ҆би́тель кїевопече́рскꙋю прише́лъ є҆сѝ, и҆ ѿ прпⷣбныхъ ѻ҆тє́цъ а҆нтѡ́нїа и҆ ѳеодо́сїа во и҆́ночество прїѧ́въ постриже́нїе, свѧ́тѡ и҆ бг҃оꙋго́днѡ пожи́лъ є҆сѝ, подвиза́ѧсѧ въ постѣ̀, бдѣ́нїи и҆ мл҃твахъ непреста́нныхъ. тѣ́мже слы́шиши ѿ на́съ бл҃гохвалє́нїѧ такѡва́ѧ:
Ра́дꙋйсѧ, земны́й а҆́гг҃ле, во пло́ти нбⷭ҇но пожи́вый: ра́дꙋйсѧ, нбⷭ҇ный человѣ́че, ѡ҆ го́рнихъ вы́нꙋ помышлѧ́вый.
Ра́дꙋйсѧ, во мра́цѣ пеще́рнѣмъ свѣ́тъ бг҃овидѣ́нїѧ сниска́вый: ра́дꙋйсѧ, по́двиги вели́кими пло́ть твою̀ ѡ҆бꙋзда́вый.
Ра́дꙋйсѧ, смире́нїемъ высѡ́каѧ стѧжа́вый: ра́дꙋйсѧ, терпѣ́нїемъ всѧ̑ и҆скꙋшє́нїѧ дїа́вѡльскїѧ побѣди́вый.
Ра́дꙋйсѧ, посто́мъ дꙋ́шꙋ твою̀ просвѣти́вый: ра́дꙋйсѧ, мл҃твами непреста́нными се́рдце твоѐ ѡ҆ст҃и́вый.
Ра́дꙋйсѧ, сосꙋ́де и҆збра́нный бж҃їѧ бл҃года́ти: ра́дꙋйсѧ, селе́нїе непоро́чное дх҃а ст҃а́гѡ.
Ра́дꙋйсѧ, свѣти́льниче, сїѧ́ѧй да̑ры бжⷭ҇твенными: ра́дꙋйсѧ, лꙋчѐ пресвѣ́тлагѡ сл҃нца пра́вды хрⷭ҇та̀.
Ра́дꙋйсѧ, лео́нтїе, росто́вскїй чꙋдотво́рче.
Конда́къ а҃
И҆збра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, росто́ва просвѣти́телю, и҆ ᲂу҆се́рдный ѡ҆ дꙋша́хъ на́шихъ мл҃твенниче, ст҃и́телю ѻ҆́ч҃е лео́нтїе! восхвалѧ́емъ тѧ̀ съ любо́вїю, застꙋ́пника на́шего: ты̀ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, моли́сѧ вы́нꙋ ѡ҆ сп҃се́нїи на́съ грѣ́шныхъ и҆ ѿ всѧ́кихъ бѣ́дъ и҆збавлѧ́й зовꙋ́щихъ тѝ:
Ра́дꙋйсѧ, лео́нтїе, росто́вскїй чꙋдотво́рче.
Моли́твы
Ѽ сщ҃е́ннаѧ главо̀, пресла́вный чꙋдотво́рче, первопа́стырю ст҃ы́ѧ росто́вскїѧ цр҃кве, ст҃и́телю ѻ҆́ч҃е на́шъ лео́нтїе! къ тебѣ̀ припа́даемъ и҆ мо́лимсѧ мы̀ смире́ннїи и҆ грѣ́шнїи, и҆ ꙗ҆́кѡ ѻ҆тца̀ чадолюби́ваго про́симъ: вселѝ въ сєрдца̀ на̑ша любо́вь твою̀, є҆́юже къ бг҃ꙋ и҆ бли̑жнимъ твои̑мъ, при жи́зни твое́й преиспо́лненъ бы́лъ є҆сѝ, ꙗ҆́кѡ и҆ дꙋ́шꙋ твою̀ за па́ствꙋ твою̀ положи́лъ є҆сѝ, мꙋ́ченически пострада́въ ѿ і҆дѡлослꙋжи́телей. наꙋчѝ на́съ, ѻ҆́тче, тебѣ̀ подража́ти вѣ́рнѡ, бг҃а и҆ бли́жнихъ на́шихъ люби́ти и҆́скреннѡ, и҆ за́повѣди гдⷭ҇ни соверша́ти непогрѣши́тельнѡ: да бꙋ́демъ и҆ мы̀ ча̑да твоѧ̑, не по и҆́мени то́кмѡ, но са́мымъ дѣ́ломъ и҆ всѣ́мъ житїе́мъ на́шимъ. моли́сѧ, ᲂу҆го́дниче бж҃їй, ко хрⷭ҇тꙋ̀ бг҃ꙋ ѡ҆ ст҃ѣ́й правосла́внѣй цр҃кви и҆ держа́вѣ рѡссі́йстѣй: да пребꙋ́дꙋтъ въ ми́рѣ и҆ бл҃гостоѧ́нїи, и҆ процвѣта́ютъ въ бл҃гоче́стїи хрⷭ҇тїа́нстѣмъ непоколеби́мы. влⷣкꙋ всѣ́хъ ᲂу҆молѝ: стра́ждꙋщꙋю странꙋ̀ рѡссі́йскꙋю ѿ лю́тыхъ безбѡ́жникъ и҆ вла́сти и҆́хъ да свободи́тъ, и҆ да возста́витъ престо́лъ правосла́вныхъ прави́телей: вѣ́рныхъ рабѡ́въ є҆гѡ̀, въ ско́рби и҆ печа́ли де́нь и҆ но́щь вопїю́щихъ къ немꙋ̀, многоболѣ́зненныхъ во́пль да ᲂу҆слы́шитъ и҆ да и҆зведе́тъ ѿ поги́бели живо́тъ на́шъ. соблюдѝ гра́дъ тво́й росто́въ, и҆ всѧ̑ гра̑ды и҆ вє́си страны̀ рѡссі́йскїѧ невреди́мы ѿ всѧ́кагѡ ѕла̀. при́зри бл҃гоꙋтро́бнѡ на всѧ́кꙋ дꙋ́шꙋ хрⷭ҇тїа́нскꙋю, ми́лости и҆ по́мощи ѿ тебѣ̀ и҆́щꙋщꙋю: бꙋ́ди всѣ̑мъ на́мъ въ болѣ́знехъ цѣли́тель, въ ско́рбѣхъ ᲂу҆тѣ́шитель, въ печа́лехъ и҆зба́витель, въ бѣда́хъ помо́щникъ, въ ча́съ сме́ртный покрови́тель: да при по́мощи мл҃твъ твои́хъ ст҃ы́хъ, сподо́бимсѧ и҆ мы̀ грѣ́шнїи сп҃се́нїе вѣ́чное полꙋчи́ти и҆ црⷭ҇твїе нбⷭ҇ное ᲂу҆наслѣ́довати. є҆́й, ст҃и́телю хрⷭ҇то́въ! не посрамѝ ᲂу҆пова́нїѧ на́шегѡ, є҆́же по бз҃ѣ и҆ прест҃ѣ́й бцⷣѣ на тѧ̀ крѣ́пкѡ возлага́емъ, но ꙗ҆вѝ на́мъ твоѐ многомо́щное застꙋпле́нїе: да хва́лимъ, сла́вимъ и҆ велича́емъ вели́кое человѣколю́бїе ди́внагѡ во ст҃ы́хъ свои́хъ бг҃а, ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.