Православный календарь
Размер шрифта:

Ака́ѳістъ

А҆ка́ѳїстъ ст҃ы́мъ безсре́бренникѡмъ и҆ чꙋдотво́рцємъ космѣ̀ и҆ дамїа́нꙋ.

Мчч. и безсребр. Космы и Дамиана, Римских (284) 14 июля 2026

Конда́къ а҃

И҆збра́ннїи чꙋдотво́рцы, страстоте́рпцы хрⷭ҇тѡ́вы и҆ вра́чеве премꙋ́дрїи, тꙋ́не подаю́щїи здра́вїе въ болѣ́знехъ сꙋ́щымъ, похва̑льнаѧ восписꙋ́емъ ва́мъ, застꙋ́пникѡмъ на́шимъ, и҆ въ ско́рбехъ помо́щникѡмъ: вы́ бо сосꙋ́ди бл҃года́ти сꙋ́ще, и҆сцѣлѧ́ете дꙋшє́вныѧ и҆ тѣлє́сныѧ на́шѧ ꙗ҆́звы: тѣ́мже сла́вѧще бг҃а, ди́внаго во ст҃ы́хъ свои́хъ, ва́съ ᲂу҆се́рднѡ ᲂу҆бл҃жа́емъ:

Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.

І҆́косъ а҃

А҆́гг҃льскомꙋ жи́тельствꙋ поревнова́вше, всѧ̑ земна̑ѧ презрѣ́ли є҆стѐ, и҆ по́двигомъ мч҃нчества вѣнча́вшесѧ, лицезрѣ́нїѧ гдⷭ҇а си́лъ сподо́билисѧ є҆стѐ. Моли́тесѧ, ᲂу҆́бѡ, за ны̀ прилѣ́жнѡ, къ по́мощи ва́шей притека́ющихъ, и҆ похва̑льнаѧ ва́мъ вопїю́щихъ:

Ра́дꙋйтесѧ, моли́твенницы те́плїи ѡ҆ чтꙋ́щихъ ст҃ꙋ́ю па́мѧть ва́шꙋ: ра́дꙋйтесѧ, ѡ҆ста́вленныхъ врача́ми неѡскꙋ́днѡ и҆сцѣлѧ́ющїи.

Ра́дꙋйтесѧ, ꙗ҆́кѡ до́мъ, и҆мѣ́нїе и҆ всѧ̑ роди́телей стѧжа̑нїѧ ни во что́же вмѣни́ли є҆стѐ: ра́дꙋйтесѧ, ни́щыѧ млⷭ҇рдїемъ ва́шимъ препита́вшїи.

Ра́дꙋйтесѧ, стра́ждꙋщыѧ сердобо́лїемъ ᲂу҆тѣша́вшїи: ра́дꙋйтесѧ, чистото́ю и҆ ст҃остїю а҆́гг҃лѡмъ ᲂу҆подо́бившїисѧ.

Ра́дꙋйтесѧ, свѣти́льницы бж҃е́ственнагѡ свѣ́та: ра́дꙋйтесѧ, нбⷭ҇нїи человѣ́цы, земні́и а҆́гг҃ли.

Ра́дꙋйтесѧ, ꙗ҆́кѡ хрїстїа́нѡмъ є҆стѐ прибѣ́жище непосты́дное: ра́дꙋйтесѧ, всѐ житїѐ своѐ да́же до послѣ́днѧгѡ и҆здыха́нїѧ въ слꙋже́нїи гдⷭ҇ꙋ и҆стощи́вшїи.

Ра́дꙋйтесѧ, всесвѣ́тлое бл҃года́ти прїѧ́телище дх҃а ст҃а́гѡ сосꙋ́ди: ра́дꙋйтесѧ, всѣ̑мъ призыва́ющымъ ва́съ ско́рїи помѡ́щницы.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ в҃

Ви́дѧ гдⷭ҇ь бг҃ъ дѡ́браѧ ва́ша начина̑нїѧ, и҆ ве́лїе ко бл҃гоче́стїю ᲂу҆се́рдїе ва́ше, ꙗ҆́кѡ всѧ̑ земна̑ѧ и҆ блага̑ѧ мі́ра сегѡ̀ ᲂу҆ме́ты вмѣни́вше, въ непреста́ннѣмъ трꙋдѣ̀ любвѐ ра́ди бли́жнѧгѡ, пребы́сте, и҆ дꙋ́шы своѧ̑ бл҃ги́ми нра́вы ᲂу҆краси́ли є҆стѐ, преиспо́лни ва́съ дх҃а ст҃а́гѡ, є҆гѡ́же лꙋча́ми ѡ҆зари́тисѧ и҆ на́мъ и҆спроси́те ᲂу҆ хрⷭ҇та̀ бг҃а, да кꙋ́пнѡ съ ва́ми пое́мъ є҆мꙋ̀: А҆ллилꙋ́їа.

І҆́косъ в҃

Ра́зꙋмомъ и҆́стиннагѡ бг҃опозна́нїѧ царѧ̀ нечести́вагѡ наꙋчи́ли є҆стѐ, вразꙋми́въ того̀ си́лою слове́съ ва́шихъ, и҆́миже дерзнове́ннѡ хрⷭ҇та̀ проповѣ́дасте. Тѣ́мже дерзнове́нїе ва́ше похвалѧ́юще, взыва́емъ си́це:

Ра́дꙋйтесѧ, ле́стїю нечести́вагѡ царѧ̀ не ᲂу҆ловле́ннїи: ра́дꙋйтесѧ, и҆́стинꙋ хрⷭ҇то́вꙋ дерзнове́ннѡ пред̾ ни́мъ и҆сповѣ́давшїи.

Ра́дꙋйтесѧ преще́нїѧ є҆гѡ̀ не ᲂу҆боѧ́вшїисѧ: ра́дꙋйтесѧ, нечести́выхъ собѡ́рища посрами́вшїи.

Ра́дꙋйтесѧ, небоѧ́зненнїи проповѣ́дницы и҆́стины: ра́дꙋйтесѧ, слꙋже́нїѧ і҆́дѡльскагѡ потреби́телїе.

Ра́дꙋйтесѧ, вѣ́ры правосла́вныѧ побо́рницы: ра́дꙋйтесѧ, и҆сповѣ̑дницы непоколеби́мїи, дꙋ́ха терпѣ́нїѧ и҆ ре́вности ѡ҆ сла́вѣ бж҃їей и҆спо́лненнїи.

Ра́дꙋйтесѧ, немо́лчнїи велѣ́нїй гдⷭ҇нихъ провозвѣ̑стницы: ра́дꙋйтесѧ, вѣ́рнїи наста̑вницы бг҃омꙋ́дрїѧ.

Ра́дꙋйтесѧ, црⷭ҇твїѧ хрⷭ҇то́ва наде́жднїи на́мъ хода́таи: ра́дꙋйтесѧ, и҆ по сме́рти ва́шей на́съ не ѡ҆ставлѧ́ющїи.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ г҃

Си́лою вы́шнѧгѡ, да́нною ва́мъ є҆щѐ во вре́меннѣй жи́зни, прїѧ́ли є҆стѐ вла́сть чꙋде́снѡ и҆сцѣлѧ́ти всѧ̑кїѧ недꙋ́ги: по сме́рти же ва́шей наипа́че просла́ви ва́съ бг҃ъ мнѡ́гими чꙋдотворє́нїи, да всѝ притека́емъ къ ва́мъ, молѧ́щесѧ ѡ҆ и҆сцѣле́нїи ѿ недꙋ́гѡвъ тѣле́сныхъ, па́че же дꙋше́вныхъ, и҆ бг҃ꙋ велегла́снѡ вопїе́мъ: А҆ллилꙋ́їа.

І҆́косъ г҃

И҆мꙋ́ще ꙗ҆́кѡ многоцѣ́нное сокро́вище многоцѣлє́бныѧ мѡ́щи ва́шѧ, ра́дꙋемсѧ, и҆ любо́вїю воспѣва́юще да́ннꙋю ва́мъ ѿ бг҃а бл҃года́ть и҆сцѣле́нїй, бл҃года́рнѡ зове́мъ:

Ра́дꙋйтесѧ, те́плїи ѡ҆ на́съ къ бг҃ꙋ предста́телїе: ра́дꙋйтесѧ, є҆́ллинскаѧ мꙋдрова̑нїѧ ни во что́же вмѣни́вшїи.

Ра́дꙋйтесѧ, ри́ма свѣти́льницы всесвѣ́тлїи: ра́дꙋйтесѧ, ѡ҆мраче́нныхъ стра́нъ просвѣти́телїе.

Ра́дꙋйтесѧ, мꙋ́жества и҆ терпѣ́нїѧ наста̑вницы: ра́дꙋйтесѧ, ꙗ҆́кѡ непови́ннѣ ка́менное побїе́нїе претерпѣ́вше, кончи́нꙋ мч҃нческꙋю ᲂу҆лꙋчи́ли є҆стѐ.

Ра́дꙋйтесѧ, любвѐ ра́ди хрⷭ҇то́вы пострада́вшїи, и҆ на́съ нбⷭ҇ныхъ бла̑гъ прича́стники прїими́те: ра́дꙋйтесѧ, рабѝ бж҃їи, ѿ гдⷭ҇а хрⷭ҇та̀ вѣнцы̀ побѣ́ды прїе́мшїи.

Ра́дꙋйтесѧ, ди́вный и҆ прекра́сный смире́нїѧ и҆ кро́тости ѡ҆́бразъ всѣ̑мъ показа́вшїи: ра́дꙋйтесѧ, непоколеби́мое правосла́вїѧ ѡ҆снова́нїе.

Ра́дꙋйтесѧ, свѣ́тлаѧ страстоте́рпцєвъ сла́во: ра́дꙋйтесѧ, до́брїи цѣле́бницы, ни ѿ когѡ́же мзды̀ за и҆сцѣлє́нїѧ взе́мшїи.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ д҃

Бꙋ́рѧ ꙗ҆́рости ве́лїѧ царѧ̀ карі́на, не возмо́же поколеба́ти дꙋшѝ ва́шеѧ, и҆ є҆гда̀ вѣ́рнїи въ нѣ́коей пеще́рѣ ва́съ скры́ша ѿ ꙗ҆́ти ва́съ и҆́щꙋщыхъ, во́лею во́инѡмъ предста́ли є҆стѐ, вопїю́ща: на́съ поими́те, мы́ бо є҆смы̀, и҆̀хже и҆́щете, непови́нныхъ же ѿпꙋститѐ. Та́же вери́гами ѡ҆бложе́ни бы́вше, въ ри́мъ ѿведо́стесѧ. Мы̀ же вѣ́рꙋ ва́шꙋ и҆ вери̑ги лобыза́юще, пое́мъ бг҃ꙋ: А҆ллилꙋ́їа.

І҆́косъ д҃

Слы́шавше ри́мстїи лю́дїе ве́лїю ва́шꙋ ко стра́ждꙋщымъ любо́вь и҆ чꙋде́сное врачева́нїе ва́ше, ѿвсю́дꙋ ᲂу҆стремлѧ́хꙋсѧ къ ва́мъ съ вѣ́рою въ цѣле́бнꙋю бл҃года́ть бж҃їю, въ ва́съ дѣ́йствꙋющꙋю: прїе́млюще же ско́рое и҆сцѣле́нїе, прославлѧ́хꙋ бг҃а, ва́съ же, млⷭ҇рдыхъ цѣли́телей свои́хъ, велича́хꙋ, воспѣва́ѧ си́це:

Ра́дꙋйтесѧ, бг҃а и҆́стиннагѡ непреѡбори́мїи проповѣ̑дницы: ра́дꙋйтесѧ, ѻ҆рꙋ́жїе крⷭ҇та̀ хрⷭ҇то́ва добропобѣ́днѡ взе́мшїи.

Ра́дꙋйтесѧ, блазі́и вра́чеве, стра́ждꙋщымъ ско́рїи помо́щницы: ра́дꙋйтесѧ, всѧ̑ немощны́ѧ тꙋ́не врачꙋ́ющїи.

Ра́дꙋйтесѧ, и҆ ны́нѣ и҆сцѣлє́нїѧ ѻ҆би́льнѡ и҆сточа́ющїи: ра́дꙋйтесѧ, млⷭ҇тивїи ᲂу҆те́шителїе, въ бѣда́хъ и҆ ско́рбѣхъ сꙋ́щымъ.

Ра́дꙋйтесѧ, во всѧ́кихъ ѡ҆бстоѧ́нїихъ на́съ защища́ющїи: ра́дꙋйтесѧ, безпомо́щныхъ сп҃си́тельное призрѣ́нїе.

Ра́дꙋйтесѧ, првⷣныхъ пресла́вное ᲂу҆краше́нїе: ра́дꙋйтесѧ, предста́тельство на́ше крѣ́пкое.

Ра́дꙋйтесѧ, прилѣ́жнїи ѡ҆ на́съ къ бг҃ꙋ моли́твєнницы: ра́дꙋйтесѧ, всѣ̑мъ вѣ́рою призыва́ющымъ ва́съ ско́рїи помѡ́щницы.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ є҃

Бг҃оте́чнымъ вои́стиннꙋ пꙋте́мъ ше́ствовасте рабѝ хрⷭ҇тѡ́вы, є҆гда̀ во ᲂу҆́захъ въ ри́мъ ведо́ми, за є҆́же і҆́дѡлѡмъ не послꙋжи́сте, хрⷭ҇то́ви же є҆ди́номꙋ порабо́тастѣ, гѡ́рькаѧ и҆спыта̑нїѧ терпѣ́ли є҆стѐ ст҃і́и, но всѧ̑ претерпѣ́сте за возлю́бльшагѡ ва́съ хрⷭ҇та̀. Тѣ́мже вели́комꙋ терпѣ́нїю и҆ крѣ́пцѣй любвѝ ва́шей ко гдⷭ҇ꙋ дивѧ́щесѧ, кꙋ́пнѡ съ ва́ми пое́мъ є҆мꙋ̀: А҆ллилꙋ́їа.

І҆́косъ є҃

Ви́дѣвъ ца́рь, ꙗ҆́кѡ си́лою хрⷭ҇то́вою и҆сцѣлѣ̀, хвалꙋ̀ томꙋ̀ воздадѐ: мы̀ же, сла́вѧще бг҃а, ᲂу҆блажа́емъ ва́съ, сла́вныхъ ᲂу҆го́дникѡвъ є҆гѡ̀, вопїю́ще си́це:

Ра́дꙋйтесѧ, гѡ́рнѧѧ па́че до́льнихъ возлюби́вшїи: ра́дꙋйтесѧ, а҆́гг҃льскомꙋ житїю̀ на землѝ поревнова́вшїи.

Ра́дꙋйтесѧ, ꙗ҆́кѡ многобо́жїе ѿри́нꙋвше, роди́тельскагѡ бл҃гоче́стїѧ не ѿстꙋпи́ли є҆стѐ: ра́дꙋйтесѧ, ꙗ҆́кѡ всѧ̑ и҆мѣ̑нїѧ своѧ̑, по словесѝ гдⷭ҇ню, ни́щымъ разда́ли є҆стѐ, да хрⷭ҇та̀ прїѡбрѧ́щете.

Ра́дꙋйтесѧ, не сло́вомъ то́чїю, но мно́жае па́че дѣ́ломъ и҆ непреста́нною къ бг҃ꙋ мл҃твою и҆ны́хъ поꙋчи́вшїи: ра́дꙋйтесѧ, неѡскꙋ́дный и҆сто́чникъ и҆сцѣле́нїй и҆ ны́нѣ ꙗ҆влѧ́ющїи.

Ра́дꙋйтесѧ, и҆злїѧ́нїемъ чꙋде́съ, да́нныхъ ва́мъ ѿ бг҃а, на́съ ѡ҆богаща́ющїи: ра́дꙋйтесѧ, въ сами́хъ себѣ̀ хра́мъ бг҃ꙋ ᲂу҆гото́вавшїи.

Ра́дꙋйтесѧ, ско́рое ни́щыхъ ᲂу҆слы́шанїе: ра́дꙋйтесѧ, ско́рбныхъ прїѧ́тное попече́нїе.

Ра́дꙋйтесѧ, ненаде́ждныхъ и҆звѣ́стное надѣ́ѧнїе: ра́дꙋйтесѧ, болѧ́щыхъ ско́рое врачева́нїе.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ ѕ҃

Проповѣ̑дницы и҆́мене хрⷭ҇то́ва въ животѣ̀ свое́мъ бы́вше, и҆ ны́нѣ си́лꙋ тогѡ̀ свидѣ́тельствꙋете чꙋдесы̑, ѿ і҆кѡ́ны ва́шеѧ и҆сточа́емыми: и҆ ꙗ҆́коже вѣ́ры и҆ногда̀ жены̀ нѣ́кїѧ не презрѣ́сте, но во снѣ̀ ꙗ҆́вльшесѧ є҆́й, ѡ҆блегче́нїе въ недꙋ́зѣ дарова́ли є҆стѐ, си́це и҆ на́шихъ моле́нїй и҆ пѣ́нїй гла́сы ᲂу҆слы́шите, ѽ ст҃і́и безсре́брєнницы! Вѣ́рѣ же и҆ любвѝ люде́й ва́шихъ внемли́те и҆ покро́въ на́мъ свы́ше да́рꙋйте хва́лѧщымъ ва́съ и҆ пою́щымъ бг҃ꙋ: А҆ллилꙋ́їа.

І҆́косъ ѕ҃

Возсїѧ̀ ꙗ҆́кѡ свѣ́тъ пра́вда ва́шѧ, є҆гда̀ ᲂу҆корѧ́ема на сꙋди́щи царѧ̀, дерзнове́ннѡ реко́сте къ немꙋ̀: не волше́бною хи́тростїю врачꙋ́емъ болѣ́зни, но си́лою сп҃са на́шегѡ, і҆и҃са хрⷭ҇та̀, ꙗ҆́коже то́й заповѣ́да, глаго́лѧ: болѧ́щыѧ и҆сцѣлѧ́йте, прокажє́нныѧ ѡ҆чища́йте, тꙋ́не прїѧ́сте, тꙋ́не дади́те. Тѣ́мже дерзнове́нїю ва́шемꙋ дивѧ́щесѧ, ᲂу҆бл҃жа́емъ ва́съ си́ми:

Ра́дꙋйтесѧ, ѡ҆́бразъ тве́рдости и҆ вѣ́ры на́мъ показа́вшїи: ра́дꙋйтесѧ, ра́йскїѧ ра́дости при́снѡ наслажда́ющїисѧ.

Ра́дꙋйтесѧ, премꙋ́дрїи сѣ́ѧтелїе бл҃гоче́стїѧ: ра́дꙋйтесѧ, сла́внїи проповѣ̑дницы правосла́вїѧ.

Ра́дꙋйтесѧ, ᲂу҆чи́телїе, къ нб҃сѝ наставлѧ́ющїи: ра́дꙋйтесѧ, чи́стагѡ и҆ непоро́чнагѡ житїѧ̀ неꙋсы́пнїи храни́телїе.

Ра́дꙋйтесѧ, те́плїи послꙋ́шателїе молѧ́щыхсѧ ва́мъ: ра́дꙋйтесѧ, ко сп҃се́нїю и҆зѧ́щнїи и҆ вѣ́рнїи пꙋтеводи́телїе.

Ра́дꙋйтесѧ, бл҃гоче́стнѡ и҆ бг҃оꙋго́днѡ жи́ти хотѧ́щымъ блазі́и наста̑вницы: ра́дꙋйтесѧ, хода́таи бл҃ги́хъ всѣ̑мъ, почита́ющымъ па́мѧть ва́шꙋ.

Ра́дꙋйтесѧ, до́брѣ тече́нїе своѐ сконча́вшїи: ра́дꙋйтесѧ, вѣнцы̀ пра́вды ѿ влⷣки хрⷭ҇та̀ прїѧ́вшїи.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ з҃

Хотѧ́ще си́лꙋ хрⷭ҇то́вꙋ ѕлочести́вомꙋ царю̀ ѿкры́ти, дх҃а ст҃а́гѡ и҆спо́лнени, реко́сте: бꙋ́ди посра́мленъ, ѽ карі́не, съ бога́ми твои́ми! И҆ а҆́бїе є҆мꙋ̀ лицѐ и҆змѣни́сѧ, и҆ вы́ѧ соврати́сѧ, и҆ молѧ́щесѧ къ ва́мъ глаго́лѧ: сѐ, ны́нѣ ви́ждꙋ, ꙗ҆́кѡ рабѝ є҆стѐ и҆́стиннагѡ бг҃а. Молю̀ ᲂу҆́бѡ ва́съ, да ꙗ҆́коже и҆ны́хъ ᲂу҆врачева́сте, си́це и҆сцѣли́те и҆ менѐ, да и҆ а҆́зъ, кꙋ́пнѡ съ ва́ми воспою̀ бг҃ꙋ: А҆ллилꙋ́їа.

І҆́косъ з҃

Ди́внїи ѡ҆ на́съ мл҃твєнницы, цѣли́телїе дꙋ́шъ и҆ тѣле́съ на́шихъ, и҆ хода́таи сп҃се́нїѧ вѣ́чнагѡ, бл҃года́рнымъ се́рдцемъ воспѣва́юще хвале́бнꙋю пѣ́снь бг҃ꙋ, дарова́вшемꙋ на́мъ таковы́хъ вели́кихъ чꙋдотво́рцєвъ, прино́симъ и҆ ва́мъ похвалы̑ сицевы̑ѧ:

Ра́дꙋйтесѧ, а҆́гг҃лѡвъ терпѣ́нїемъ ва́шимъ ᲂу҆диви́вшїи: ра́дꙋйтесѧ, бжⷭ҇твеннымъ сїѧ́нїемъ чꙋде́съ свои́хъ всѧ̑ просвѣти́вшїи.

Ра́дꙋйтесѧ, ско́рїи ѿ всѧ́кихъ болѣ́зней безме́зднїи вра́чеве: ра́дꙋйтесѧ, застꙋпле́нїемъ ва́шымъ разсла́блєнныѧ и҆сцѣлѧ́ющїи.

Ра́дꙋйтесѧ, ѿ неисцѣ́льныхъ болѣ́зней здра̑вы воздвиза́ющїи: ра́дꙋйтесѧ, досто́йнѣ соверши́вшїи земны́й по́двигъ житїѧ̀ ва́шегѡ.

Ра́дꙋйтесѧ, ѡ҆ на́съ, ѡ҆бнаже́нныхъ до́брыхъ дѣ́лъ, при́снѡ къ бг҃ꙋ предста́тельствꙋющїи: ра́дꙋйтесѧ, ꙗ҆́кѡ сїѧ́нїемъ премꙋ́дрости, ѿ гдⷭ҇а ва́мъ да́нныѧ, всѣ́хъ вѣ́рныхъ просвѣща́ете.

Ра́дꙋйтесѧ, моли́твєнницы ѡ҆ на́съ, и҆ застꙋ́пницы на́ши преди́внїи: ра́дꙋйтесѧ, до́блїи страстоте́рпцы хрⷭ҇тѡ́вы.

Ра́дꙋйтесѧ, кровмѝ свои́ма зе́млю ѡ҆свѧти́вшїи: ра́дꙋйтесѧ, і҆́дѡльское безꙋ́мїе ѡ҆бличи́вшїи.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ и҃

Стра́нное мі́рови житїѐ ва́ше ви́дѧще, ᲂу҆страни́мсѧ и҆ мы̀ тогѡ̀ сꙋє́тъ, и҆ ᲂу҆́мъ на нб҃са̀ прело́жше, возопїи́мъ къ ва́мъ, ст҃і́и безсре́брєнницы: ᲂу҆толи́те болѣ̑зни, и҆сточа́ѧ бл҃года̑тнаѧ врачева̑нїѧ всѣ̑мъ, ᲂу҆се́рднѡ къ по́мощи ва́шей притека́ющымъ, и҆ вопїю́щымъ бг҃ꙋ: А҆ллилꙋ́їа.

І҆́косъ и҃

Всѐ житїѐ ва́ше на землѝ любо́вїю къ бг҃ꙋ и҆ къ бли̑жнимъ и҆спо́лнивше, ст҃і́и безсре́брєнницы космо̀ и҆ дамїа́не, ско́рїи и҆ ны́нѣ помо́щники ꙗ҆влѧ́етесѧ всѣ̑мъ, съ вѣ́рою призыва́ющымъ ва́съ: не то́чїю бо бли́зъ притека́ющымъ ко ст҃ы̑мъ мощє́мъ ва́шымъ, но и҆ дале́че сꙋ́щымъ и҆сцѣлє́нїѧ и҆сточа́ете. Тѣ́мже прино́симъ ва́мъ похвалы̑ сїѧ̑:

Ра́дꙋйтесѧ, є҆ди́номꙋ бг҃ꙋ, въ трⷪ҇цѣ сла́вимомꙋ, вѣ́рнѡ послꙋжи́вшїи: ра́дꙋйтесѧ, є҆ди́ное, є҆́же є҆́сть на потре́бꙋ, премꙋ́дрѣ и҆збра́вшїи.

Ра́дꙋйтесѧ, ꙗ҆́кѡ въ неꙋста́ннѣмъ трꙋдѣ̀ и҆ по́двизѣ днѝ и҆ но́щи ва́шѧ без̾ всѧ́кагѡ ᲂу҆ны́нїѧ препроводи́ли є҆стѐ: ра́дꙋйтесѧ, ꙗ҆́кѡ сицевы́мъ ва́шымъ тѣ́снымъ и҆ ско́рбнымъ житїе́мъ сла́вꙋ бж҃їю въ человѣ́цѣхъ ᲂу҆мно́жили є҆стѐ.

Ра́дꙋйтесѧ, до́блїи хрⷭ҇то́вы послѣ́дователїе: ра́дꙋйтесѧ, ꙗ҆́кѡ наꙋчи́тели и҆ творцы̀ хрⷭ҇то́выхъ за́повѣдей ꙗ҆ви́лисѧ є҆стѐ.

Ра́дꙋйтесѧ, ꙗ҆́кѡ и҆мена́ми ве́лїихъ въ црⷭ҇твїи нбⷭ҇нѣмъ нарече́ни бы́сте: ра́дꙋйтесѧ, сла́вою хрⷭ҇то́вою ве́сь мі́ръ ѡ҆зари́вшїи.

Ра́дꙋйтесѧ, ꙗ҆́кѡ страда́нїемъ ва́шимъ безстра́стїе прїѧ́ли є҆стѐ: ра́дꙋйтесѧ, ꙗ҆́кѡ мꙋ́ченическою сме́ртїю безсме́ртїе стѧжа́ли є҆стѐ.

Ра́дꙋйтесѧ, ꙗ҆́кѡ а҆́гг҃ли на нб҃сѝ и҆ на землѝ просла́вленнїи: ра́дꙋйтесѧ, ꙗ҆́кѡ бг҃ꙋ ны́нѣ вѣнцено́снїи предстои́те.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ ѳ҃

Всѧ́кое є҆стество̀ человѣ́ческое ᲂу҆диви́сѧ сїѧ́нїю въ ва́съ бл҃года́ти бж҃їей, ст҃і́и космо̀ и҆ дамїа́не, є҆гда̀ нечести́вый ца́рь карі́нъ, ᲂу҆зрѣ́въ чꙋдеса̀ ѡ҆ и҆́мени гдⷭ҇а і҆и҃са хрⷭ҇та̀ ва́ми твори̑маѧ, ᲂу҆вѣ́рова и҆ просла́ви бг҃а. Тѣ́мже и҆ мы̀, сла́вѧще да́вшаго ва́мъ сицевꙋ́ю си́лꙋ, пое́мъ є҆мꙋ̀: А҆ллилꙋ́їа.

І҆́косъ ѳ҃

Вѣті̑ѧ многовѣща̑нныѧ недоꙋмѣ́ютъ дово́льнѡ и҆зѻбрази́ти ѻ҆би́лїе любвѐ ва́шеѧ, є҆́юже преиспо́лнени бы́сте, ст҃і́и ᲂу҆гѡ́дницы, къ человѣ́кѡмъ ѡ҆ гдⷭ҇ѣ. Сегѡ̀ ра́ди, и҆з̾ глꙋбины̀ серде́цъ на́шихъ, вопїе́мъ къ ва́мъ:

Ра́дꙋйтесѧ, гдⷭ҇ꙋ своемꙋ̀ да́же до сме́рти порабо́тавшїи: ра́дꙋйтесѧ, ѻ҆гне́мъ любвѐ бж҃їѧ воспалѧ́еми, ѻ҆́гнь же́ртвъ і҆́дѡльскихъ ᲂу҆гаси́вшїи.

Ра́дꙋйтесѧ, бли́жнѧго па́че сами́хъ себє̀ возлюби́вшїи: ра́дꙋйтесѧ, ꙗ҆́кѡ болѧ́щыѧ и҆ недꙋ̑жныѧ посѣща́ли є҆стѐ.

Ра́дꙋйтесѧ, нꙋ̑жды ᲂу҆бо́гихъ предварѧ́вшїи: ра́дꙋйтесѧ, печа́льныхъ ᲂу҆те́шителїе.

Ра́дꙋйтесѧ, ѿча́ѧнныхъ застꙋ́пницы: ра́дꙋйтесѧ, си́рыхъ пита́телїе.

Ра́дꙋйтесѧ, лю́тѣ стра́ждꙋщымъ помѡ́щницы: ра́дꙋйтесѧ, ᲂу҆гнете́нныхъ свободи́телїе.

Ра́дꙋйтесѧ, ꙗ҆́кѡ до́брѣ тече́нїе сконча́вше, ко хрⷭ҇тꙋ̀ вознесо́стесѧ: ра́дꙋйтесѧ, ꙗ҆́кѡ въ црⷭ҇твїи є҆гѡ̀ водворѧ́етесѧ.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ і҃

Сп҃стѝ хотѧ̀ мнѡ́гїѧ, ꙗ҆вѝ на́мъ гдⷭ҇ь вы̀, чꙋдотво́рцы своѧ̑, кто́ бо не ᲂу҆мили́тсѧ, ви́дѧ ва́ше безмѣ́рное ко всѣ̑мъ сострада́нїе: кто́ ли вы̀ не ᲂу҆бл҃жи́тъ, ꙗ҆́кѡ не то́кмѡ человѣ́ки ѿ недꙋ̑гъ и҆сцѣлѧ́ете, но и҆ скоты̀ ми́лꙋете, не ѿри́ните ᲂу҆̀бо и҆ на́шихъ мл҃твъ, но на всѧ̑ ны̀ неѡскꙋ́днѡ вели̑кїѧ и҆ бога̑тыѧ ва́шѧ ми́лѡсти и҆зле́йте, да вопїе́мъ бг҃ꙋ: А҆ллилꙋ́їа.

І҆́косъ і҃

Стѣ́ны є҆стѐ всѣ̑мъ, похвалѧ́ющымъ чꙋдеса̀ ва́шѧ, ѽ безмє́здницы, и҆ къ застꙋпле́нїю ва́шемꙋ прибѣга́ющымъ: стѣ́ны и҆ забра̑ла є҆стѐ, ѡ҆гражда́ющыѧ ѿ всѣ́хъ бѣ́дъ ᲂу҆се́рднѡ въ по́мощь ва́съ призыва́ющымъ. Тѣ́мже ᲂу҆́бѡ и҆ на́съ ѿ нищеты̀, напа́стей, недꙋ́гѡвъ, и҆ скорбе́й ѡ҆гради́те, мо́лимсѧ, и҆ те́плѣ вопїе́мъ къ ва́мъ:

Ра́дꙋйтесѧ, а҆дама́нтѡвъ крѣ́пость въ терпѣ́нїи превозше́дшїи: ра́дꙋйтесѧ, непови́ннѡ ѿ за́висти сребролю́бца пострада́вшїи.

Ра́дꙋйтесѧ, сла́внїи въ бѣда́хъ застꙋ̑пницы: ра́дꙋйтесѧ, немощны́хъ и҆ ѡ҆би́димыхъ ᲂу҆крѣпле́нїе.

Ра́дꙋйтесѧ, крѣ́пцыи въ напа́стехъ защи́тителїе: ра́дꙋйтесѧ, ᲂу҆бо́гихъ и҆ ни́щыхъ всеще́дрїи ѡ҆богати́телїе.

Ра́дꙋйтесѧ, а҆́лчꙋщыхъ ми́лостивїи корми́телїе: ра́дꙋйтесѧ, болѣ́зньми и҆ тѧ́жкими недꙋ̑ги ѡ҆держи́мыхъ премꙋ́дрїи ᲂу҆врачева́телїе.

Ра́дꙋйтесѧ, съ вѣ́рою къ ва́мъ притека́ющымъ, ѿ всѣ́хъ ско́рбныхъ ѡ҆бстоѧ́нїй те́плїи защи́тителїе: ра́дꙋйтесѧ, ꙗ҆́кѡ па́мѧть ва́шѧ всѣ́ми сла́вима на землѝ.

Ра́дꙋйтесѧ, ꙗ҆́кѡ и҆мена̀ ва́шѧ напи̑сана сꙋ́ть на нб҃сѣ́хъ: ра́дꙋйтесѧ, ꙗ҆́кѡ ѿ бг҃а препросла́влени є҆стѐ.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ а҃і

Пѣ́нїе всеꙋмиле́нное ны́нѣ на́ми приноси́мое, нѣ́сть дово́льно къ похвале́нїю пресла́вныхъ по́двигѡвъ и҆ трꙋдѡ́въ ва́шихъ, ꙗ҆́же хрⷭ҇та̀ ра́ди под̾ѧ́ли є҆стѐ въ животѣ̀ свое́мъ, ѻ҆ба́че, дерза́юще про́симъ: ᲂу҆се́рдное моле́нїе на́ше прїе́мше, и҆ на́съ ѿ бѣ́дъ свои́ми мл҃твами и҆зба́вите, да ᲂу҆миле́ннымъ се́рдцемъ воспои́мъ бг҃ꙋ: А҆ллилꙋ́їа.

І҆́косъ а҃і

Свѣтоза́рный и҆ нбⷭ҇ный ᲂу҆́мъ ꙗ҆ви́ли є҆стѐ и҆ногда̀ пред̾ карі́номъ, заблꙋжде́нїе тогѡ̀ ѡ҆блича́ѧ: ны́нѣ же нетлѣ́нїемъ моще́й ва́шихъ, и҆ мно́жествомъ чꙋде́съ правосла́вїе ᲂу҆твержда́ете. Тѣ́мже бл҃года́рственнѡ зове́мъ:

Ра́дꙋйтесѧ, ѵ҆поста́сное сло́во дерзнове́ннѡ проповѣ́давшїи: ра́дꙋйтесѧ, си́лꙋ і҆́дѡльскꙋю добропобѣ́днѡ ᲂу҆праздни́вшїи.

Ра́дꙋйтесѧ, ꙗ҆́кѡ ва́ми попра́сѧ слꙋже́нїе бѣсѡ́мъ: ра́дꙋйтесѧ, ꙗ҆́кѡ ва́ми поклоне́нїе хрⷭ҇тꙋ̀ проповѣ́дасѧ.

Ра́дꙋйтесѧ, ᲂу҆чи́телїе премꙋ́дрїи: ра́дꙋйтесѧ, всѣ́хъ добродѣ́телей нелѣ́ностнїи и҆сполни́телїе.

Ра́дꙋйтесѧ, ꙗ҆́кѡ по трꙋдѣ́хъ земны́хъ въ селе́нїихъ нбⷭ҇ныхъ ликовствꙋ́ете: ра́дꙋйтесѧ, ꙗ҆́кѡ и҆ по преставле́нїи свое́мъ на́съ не ѡ҆ставлѧ́ете.

Ра́дꙋйтесѧ, ꙗ҆́кѡ всѣ́мъ, съ вѣ́рою призыва́ющымъ ва́съ, ско́рꙋю по́мощь подае́те: ра́дꙋйтесѧ, ст҃і́и вра́чеве, ꙗ҆́кѡ болѣ́зни на́шѧ и҆сцѣлѧ́ете.

Ра́дꙋйтесѧ, мл҃твы вѣ́рныхъ не ѿрѣва́ющїи: ра́дꙋйтесѧ, и҆ ѡ҆ на́съ, недосто́йныхъ, ᲂу҆ прⷭ҇то́ла бж҃їѧ хода́тайствꙋющїи.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ в҃і

Благода́ть, ю҆́же дадѐ ва́мъ гдⷭ҇ь бг҃ъ, цѣли́ти всѧ̑ недꙋ́ги дꙋше́вныѧ же и҆ тѣлє́сныѧ, дне́сь собра̀ на́съ, да почти́мъ па́мѧть ва́шꙋ, ст҃і́и безсре́брєнницы космо̀ и҆ дамїа́не: бл҃гоговѣ́йнѡ ᲂу҆́бѡ взира́юще на чⷭ҇тнꙋ́ю і҆кѡ́нꙋ ва́шꙋ, и҆ со ᲂу҆миле́нїемъ се́рдца къ не́й припа́дающе, мо́лимъ и҆зба́витисѧ всѣ̑мъ на́мъ ѿ всѧ́кихъ ѕѡ́лъ и҆ болѣ́зней, да воспое́мъ всѝ бг҃ꙋ: А҆ллилꙋ́їа.

І҆́косъ в҃і

Пою́ще чꙋдеса̀ ва́шѧ, восхвалѧ́емъ трꙋды̀ и҆ по́двиги, ᲂу҆блажа́емъ мч҃нческꙋю кончи́нꙋ, почита́емъ хода́тайство и҆ си́льное застꙋпле́нїе ва́ше ѡ҆ всѣ́хъ тре́бꙋющыхъ по́мощи ва́шеѧ: велича́емъ пода́телѧ всѣ́хъ бла̑гъ бг҃а, дарова́вшаго на́мъ толи́кѡ ди́вныхъ мл҃твенникѡвъ, и҆ со ᲂу҆миле́нїемъ зове́мъ:

Ра́дꙋйтесѧ, і҆и҃са гдⷭ҇а вѣ́рнѡ проповѣ́давшїи: ра́дꙋйтесѧ, и҆́стины є҆гѡ̀ до́блїи свидѣ́телїе.

Ра́дꙋйтесѧ, те́плїи ѡ҆ на́съ ᲂу҆ прⷭ҇то́ла є҆гѡ̀ предста́тели: ра́дꙋйтесѧ, тѣле́съ на́шихъ бл҃госострада́тельнїи вра́чеве.

Ра́дꙋйтесѧ, црⷭ҇твїѧ нбⷭ҇нагѡ и҆ вѣ́чныхъ бл҃ги́хъ наслѣ̑дницы: ра́дꙋйтесѧ, по бз҃ѣ всѐ на́ше ᲂу҆пова́нїе.

Ра́дꙋйтесѧ, мѵ́ро бл҃гово́нное и҆сцѣле́нїй и҆сточа́ющїи: ра́дꙋйтесѧ, страсте́й ѕлосмра́дїе мл҃твами свои́ма ѿрѣва́ющїи.

Ра́дꙋйтесѧ, и҆сцѣле́нїй да́телїе и҆ чꙋде́съ и҆сто́чницы: ра́дꙋйтесѧ, свѣтоно́снїи столпѝ цр҃ко́внїи и҆ забра̑ла недви́жимаѧ.

Ра́дꙋйтесѧ, вїногра́да и҆́стиннагѡ бж҃е́ственныѧ лозы̀: ра́дꙋйтесѧ, дво́ице свѣтови̑днаѧ мꙋ́дрыхъ безсре́брєнникъ.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ г҃і

Ѽ, преди́внїи безсре́брєнницы, чꙋдотво́рцы, цѣли́телїе и҆ сла́внїи ᲂу҆го́дницы бж҃їи космо̀ и҆ дамїа́не, прїими́те молє́нїѧ сїѧ̑ на́шѧ, ѿ сокрꙋше́ннагѡ се́рдца возноси̑маѧ: и҆сцѣли́те многоѡбра̑зныѧ недꙋ́ги на́шѧ, и҆ те́плымъ предста́тельствомъ ва́шымъ и҆спроси́те на́мъ ѿ хрⷭ҇та̀ бг҃а и҆збавле́нїе ѿ всѣ́хъ бѣ́дъ и҆ напа́стей, проще́нїе прегрѣше́нїй на́шихъ, и҆ бл҃гꙋ́ю наде́ждꙋ вѣ́чнагѡ сп҃се́нїѧ, да сподо́бимсѧ съ ва́ми и҆ со всѣ́ми ст҃ы́ми въ безконє́чныѧ вѣ́ки воспѣва́ти бг҃ꙋ сп҃си́телю на́шемꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льскомꙋ жи́тельствꙋ поревнова́вше, всѧ̑ земна̑ѧ презрѣ́ли є҆стѐ, и҆ по́двигомъ мч҃нчества вѣнча́вшесѧ, лицезрѣ́нїѧ гдⷭ҇а си́лъ сподо́билисѧ є҆стѐ. Моли́тесѧ, ᲂу҆́бѡ, за ны̀ прилѣ́жнѡ, къ по́мощи ва́шей притека́ющихъ, и҆ похва̑льнаѧ ва́мъ вопїю́щихъ:

Ра́дꙋйтесѧ, моли́твенницы те́плїи ѡ҆ чтꙋ́щихъ ст҃ꙋ́ю па́мѧть ва́шꙋ: ра́дꙋйтесѧ, ѡ҆ста́вленныхъ врача́ми неѡскꙋ́днѡ и҆сцѣлѧ́ющїи.

Ра́дꙋйтесѧ, ꙗ҆́кѡ до́мъ, и҆мѣ́нїе и҆ всѧ̑ роди́телей стѧжа̑нїѧ ни во что́же вмѣни́ли є҆стѐ: ра́дꙋйтесѧ, ни́щыѧ млⷭ҇рдїемъ ва́шимъ препита́вшїи.

Ра́дꙋйтесѧ, стра́ждꙋщыѧ сердобо́лїемъ ᲂу҆тѣша́вшїи: ра́дꙋйтесѧ, чистото́ю и҆ ст҃остїю а҆́гг҃лѡмъ ᲂу҆подо́бившїисѧ.

Ра́дꙋйтесѧ, свѣти́льницы бж҃е́ственнагѡ свѣ́та: ра́дꙋйтесѧ, нбⷭ҇нїи человѣ́цы, земні́и а҆́гг҃ли.

Ра́дꙋйтесѧ, ꙗ҆́кѡ хрїстїа́нѡмъ є҆стѐ прибѣ́жище непосты́дное: ра́дꙋйтесѧ, всѐ житїѐ своѐ да́же до послѣ́днѧгѡ и҆здыха́нїѧ въ слꙋже́нїи гдⷭ҇ꙋ и҆стощи́вшїи.

Ра́дꙋйтесѧ, всесвѣ́тлое бл҃года́ти прїѧ́телище дх҃а ст҃а́гѡ сосꙋ́ди: ра́дꙋйтесѧ, всѣ̑мъ призыва́ющымъ ва́съ ско́рїи помѡ́щницы.

Ра́дꙋйтесѧ, космо̀ и҆ дамїа́не, ст҃і́и безсре́брєнницы и҆ пресла́внїи чꙋдотво́рцы.

Конда́къ а҃

И҆збра́ннїи чꙋдотво́рцы, страстоте́рпцы хрⷭ҇тѡ́вы и҆ вра́чеве премꙋ́дрїи, тꙋ́не подаю́щїи здра́вїе въ болѣ́знехъ сꙋ́щымъ, похва̑льнаѧ восписꙋ́емъ ва́мъ, застꙋ́пникѡмъ на́шимъ, и҆ въ ско́рбехъ помо́щникѡмъ: вы́ бо сосꙋ́ди бл҃года́ти сꙋ́ще, и҆сцѣлѧ́ете дꙋшє́вныѧ и҆ тѣлє́сныѧ на́шѧ ꙗ҆́звы: тѣ́мже сла́вѧще бг҃а, ди́внаго во ст҃ы́хъ свои́хъ, ва́съ ᲂу҆се́рднѡ ᲂу҆бл҃жа́емъ:

Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.

Моли́твы

Чꙋдотво́рцы сла́внїи, вра́чеве безме́зднїи, космо̀ и҆ дамїа́не! Вы̀ ѿ ю҆́ности хрⷭ҇та̀ бг҃а возлюби́вше и҆ тогѡ̀ повелѣ̑нїѧ всѣ́мъ се́рдцемъ соблюда́юще, а҆́ще и҆ вда́сте себє̀ ᲂу҆че́нїю враче́бномꙋ, но добродѣ́тельнагѡ ра́ди житїѧ̀ и҆ чⷭ҇тоты̀ дꙋше́вныѧ, си́лою хрⷭ҇та̀ бг҃а, не врачева́нїѧ то́кмо и҆скꙋ́сство, но па́че неѡскꙋ́днꙋю блгⷣть и҆сцѣле́нїѧ всѧ́кихъ недꙋ́гѡвъ ѿ бг҃а прїѧ́ли є҆стѐ. Ѿѻнꙋ́дꙋже любо́вїю и҆ милосе́рдїемъ къ недꙋ́гꙋющымъ подвиза́еми, не то́кмо лю́демъ, но и҆ скотѡ́мъ и҆сцѣлє́нїѧ болѣ́зней подава́ете, неисче́тнымъ мно́жествѡмъ чꙋде́съ ва́шихъ ве́сь мі́ръ наполнѧ́ете, и҆ не тѣлє́сныѧ то́кмо недꙋ̑ги и҆сцѣлѧ́ете, но и҆ вѣ́рою хрⷭ҇то́вою дꙋ́ши просвѣща́ете, въ терпѣ́нїи болѣ́зней ᲂу҆крѣплѧ́ете, въ тѧ́жкихъ недꙋ́зѣхъ ѡ҆ и҆справле́нїи житїѧ̀ вразꙋмлѧ́ете и҆ ко хрⷭ҇тꙋ̀ покаѧ́нїемъ привлека́ете. Тѣ́мже ны́нѣ и҆ на́съ, припа́дающихъ къ ва́мъ пред̾ чⷭ҇тно́ю і҆кѡ́ною ва́шею, ско́ро ᲂу҆слы́шите, ю҆́ныѧ дѣ́ти, ва́шей по́мощи во ᲂу҆чє́нїи кни́жнѣмъ просѧ́щыѧ, ва́шими моли́твами наста́вите, да ва́шемꙋ житїю̀ ревнꙋ́юще, не земно́е то́чїю наꙋче́нїе прїѡбрѧ́щꙋтъ, но па́че во бл҃гоче́стїи и҆ пра́вой вѣ́рѣ вы́нꙋ да преꙋспѣ́ютъ. На ѻ҆дрѣ̀ болѣ́зни лежа́щимъ, человѣ́ческїѧ по́мощи ѿча̑ѧннымъ, къ ва́мъ же те́плѣ съ вѣ́рою и҆ ᲂу҆се́рдною моли́твою прибѣга́ющымъ, и҆сцѣле́нїе болѣ́зней ва́шимъ ми́лостивымъ, чꙋдодѣ́йственнымъ посѣще́нїемъ да́рꙋйте. Мно́гажды въ болѣ̑зни впа́дающыѧ и҆ ѿ лю́тыхъ недꙋ́гѡвъ въ ᲂу҆ны́нїе, малодꙋ́шїе и҆ ропта́нїе прише́дшїѧ, да́нною ва́мъ ѿ бг҃а бл҃года́тїю въ терпѣ́нїи ᲂу҆тверди́те и҆ наста́вите, да ᲂу҆разꙋмѣ́ютъ во́лю ѡ҆ ни́хъ бж҃їю ст҃ꙋ́ю и҆ бл҃гꙋ́ю и҆ са́ми себє̀ и҆ живо́тъ сво́й во́ли хрⷭ҇та̀ бг҃а предаю́тъ. Въ недꙋ́зѣхъ сꙋ́щихъ, ѡ҆ и҆справле́нїи же житїѧ̀ нерадѧ́щихъ, во грѣсѣ́хъ не раска́ивающихсѧ, се́рдцемъ ѡ҆жесточе́нныхъ сокрꙋши́те во спⷭ҇е́нїе и҆ къ покаѧ́нїю призови́те, да не́мощни сꙋ́ще тѣ́ломъ, здра́ви пребꙋ́дꙋтъ дꙋше́ю, и҆ прича́стницы содѣ́лаютсѧ бж҃їѧ сп҃си́тельныѧ благода́ти. Бра́тїю ст҃а́гѡ хра́ма сегѡ̀, ва́шемꙋ свѧто́мꙋ застꙋпле́нїю ѿ бг҃а врꙋче́ннꙋю, и҆ всѣ́хъ къ ва́мъ ᲂу҆се́рднѡ прибѣга́ющихъ невреди́мы сохрани́те ѿ долгонедꙋ́жїѧ, ѿ болѣ́зней лю́тыхъ и҆ неисцѣ́льныхъ, ѿ разслаблє́нїѧ тѣ́ла, ѿ и҆стꙋпле́нїѧ ᲂу҆ма̀, ѿ смертоно́сныѧ ꙗ҆́звы, ѿ внеза́пныѧ сме́рти, и҆ всемо́щнымъ хода́тайствомъ ва́шимъ къ бг҃ꙋ соблюди́те въ пра́вой вѣ́рѣ тве́рдыхъ, во бл҃гоче́стїи преспѣва́ющихъ, въ до́брыхъ дѣ́лѣхъ ᲂу҆се́рдныхъ, въ мл҃твѣ къ бг҃ꙋ приле́жныхъ, да съ ва́ми вкꙋ́пѣ сподо́бѧтсѧ въ бꙋ́дꙋщемъ вѣ́цѣ прⷭ҇нѡ воспѣва́ти и҆ сла́вити всест҃о́е и҆ великолѣ́пое и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.

Къ ва́мъ, ст҃і́и безсре́брєнницы и҆ чꙋдотво́рцы космо̀ и҆ дамїа́не, ꙗ҆́кѡ къ скѡ́рымъ помо́щникѡмъ и҆ тє́плымъ моли́твенникѡмъ ѡ҆ сп҃се́нїи на́шемъ мы̀, недосто́йнїи, прекло́ньше колѣ̑на, прибѣга́емъ, и҆ припа́дающе ᲂу҆се́рднѡ вопїе́мъ: не пре́зрите молє́нїѧ на́съ грѣ́шныхъ, немощны́хъ, во мнѡ́гїѧ беззакѡ́нїѧ впа́дшихъ, и҆ по всѧ̑ днѝ и҆ часы̀ согрѣша́ющихъ. Оу҆моли́те гдⷭ҇а, да проба́витъ на́мъ, недостѡ́йнымъ рабѡ́мъ свои̑мъ, вели́кїѧ и҆ бога́тыѧ своѧ̀ млⷭ҇ти: и҆зба́вите на́съ ѿ всѧ́кїѧ ско́рби и҆ болѣ́зни, вы̀ бо прїѧ́ли є҆стѐ ѿ гдⷭ҇а и҆ сп҃са на́шегѡ і҆и҃са хрⷭ҇та̀ неѡскꙋ́днꙋю бл҃года́ть и҆сцѣле́нїй, ра́ди тве́рдыѧ вѣ́ры, безме́зднагѡ врачева́нїѧ и҆ мч҃ническїѧ кончи́ны ва́шеѧ. Оу҆слы́шите на́съ, молѧ́щихсѧ, и҆ бл҃гопрїѧ́тнымъ хода́тайствомъ ва́шимъ и҆спроси́те ᲂу҆ хрⷭ҇та̀ бг҃а правосла́внымъ лю́демъ на враги̑ побѣ́дꙋ и҆ ѡ҆долѣ́нїе. Па́ки припа́дающе прилѣ́жнѡ мо́лимъ: и҆спроси́те на́мъ ѿ гдⷭ҇а всѧ̑ бл҃гополє́знаѧ ꙗ҆̀же въ животѣ̀ на́шемъ вре́меннѣмъ, наипа́че же ко сп҃се́нїю вѣ́чномꙋ слꙋжа̑щаѧ, да сподо́бимсѧ моли́твами ва́шими ᲂу҆лꙋчи́ти кончи́нꙋ хрїстїа́нскꙋю, безболѣ́зненнꙋ, непосты́днꙋ, ми́рнꙋ и҆ да и҆зба́вимсѧ ѿ ко́зней дїа́вольскихъ и҆ вѣ́чныѧ мꙋ́ки: безконе́чнагѡ же и҆ бл҃же́ннагѡ црⷭ҇твїѧ нбⷭ҇нагѡ наслѣ̑дницы бꙋ́демъ. Є҆́й, ᲂу҆гѡ́дницы бж҃їи, не преста́йте, молѧ́щесѧ за ны̀, съ вѣ́рою къ ва́мъ притека́ющыѧ: а҆́ще бо по мно́жествꙋ грѣхѡ́въ на́шихъ и҆ нѣ́смы досто́йни млⷭ҇рдїѧ ва́шегѡ, ѻ҆ба́че вы̀, вѣ́рнїи подража́телїе чл҃вѣколю́бїѧ бж҃їѧ сꙋ́ще, сотвори́те, да принесе́мъ плоды̀ достѡ́йны покаѧ́нїѧ и҆ въ вѣ́чный поко́й дости́гнемъ хва́лѧще, и҆ бл҃гословѧ́ще ди́внаго во ст҃ы́хъ свои́хъ гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, и҆ пречⷭ҇тꙋю мт҃рь є҆гѡ̀, и҆ ва́ше те́плое застꙋпле́нїе всегда̀, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.