Православный календарь
Размер шрифта:

Ака́ѳістъ

А҆ка́ѳїстъ преѡбраже́нїю гдⷭ҇ню.

Преображение Господа Бога и Спаса нашего Иисуса Христа 19 августа 2026

Конда́къ а҃

Возбра́нный воево́до и҆ цр҃ю̀ сла́вы, тебѣ̀ нб҃сѝ и҆ землѝ созда́телѧ, зрѧ́щи на горѣ̀ ѳавѡ́рстѣй преѡбрази́вшасѧ со сла́вою, всѧ̀ тва́рь ᲂу҆диви́сѧ, нб҃са̀ вострепета́ша, и҆ всѝ земноро́днїи возра́довашасѧ, мы́ же недосто́йнїи твоемꙋ̀ на́съ ра́ди преѡбраже́нїю бл҃года́рственнѡ поклоне́нїе приносѧ́ще, съ петро́мъ ѿ дꙋшѝ вопїе́мъ тѝ:

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

І҆́косъ а҃

А҆́гг҃лѡмъ недовѣ́домое и҆ чл҃вѣ́кѡмъ непристꙋ́пное твоѐ, свѣтода́вче хрⷭ҇тѐ, бж҃ество̀, незаходи́тельными мо́лнїѧми и҆ лꙋча́ми невече́рнѧгѡ свѣ́та твоегѡ̀, ꙗ҆ви́лъ є҆сѝ на горѣ̀ ѳавѡ́рстѣй нача́льнѣйшимъ ᲂу҆ченикѡ́мъ твои́мъ, ті́и же бж҃е́ственнымъ и҆змѣни́шасѧ ᲂу҆́жасомъ, ѻ҆́блакомъ ѡ҆сїѧ́вшесѧ свѣ́тлымъ и҆ гла́съ ѻ҆ч҃ь слы́шавше, разꙋмѣ́ша твоегѡ̀ вочл҃вѣ́ченїѧ та́инство, вопїю́ще тебѣ̀ такова́ѧ:

І҆и҃се, сн҃е бж҃їй безсме́ртный, просвѣтѝ на́съ свѣ́томъ лица̀ твоегѡ̀ ѡ҆сїѧ́ннагѡ: і҆и҃се, бл҃гі́й бж҃е всеси́льный, возбꙋдѝ на́съ спѧ́щихъ и҆з̾ глꙋбины̀ тьмы̀ сна̀ грѣхо́внагѡ.

І҆и҃се, во свѣ́тѣ живы́й непристꙋ́пнѣмъ, и҆з̾ ѻ҆́бласти те́мныѧ и҆зведѝ на́съ: і҆и҃се, сла́вою твое́ю и҆спо́лнивый ве́сь мі́ръ, во ѡ҆би́тєли ра̑йскїѧ введѝ на́съ.

І҆и҃се, свѣ́те мі́ра, ѿ мі́ра лꙋка́вагѡ свободѝ на́съ во тьмѣ̀ сѣдѧ́щихъ: і҆и҃се, со́лнце пра́вды, си́лою и҆ пра́вдою ѡ҆блецы̀ на́съ, въ сѣ́ни сме́ртнѣй спѧ́щихъ.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ в҃

Ви́дѧ, ꙗ҆́кѡ ᲂу҆ченицы̀ твоѝ, чл҃вѣколю́бче гдⷭ҇и, непросвѣще́нни є҆щѐ сꙋ́ще, не разꙋмѣ́ютъ, ꙗ҆́кѡ подоба́етъ тебѐ и҆дтѝ во і҆ерⷭ҇ли́мъ и҆ та́мѡ мно́гѡ пострада́ти и҆ ᲂу҆бїе́нꙋ бы́ти. Ты̀ ѿто́лѣ нача́лъ є҆сѝ ска́зовати и҆́мъ, ꙗ҆́кѡ всѧ̑ сїѧ̑ належи́тъ тебѣ̀ во́лею претерпѣ́ти на́шегѡ ра́ди сп҃се́нїѧ. Ѻ҆ба́че ті́и не возмого́ша є҆щѐ мы́слити, ꙗ҆́же сꙋ́ть бж҃їѧ, но ꙗ҆́же сꙋ́ть чл҃вѣ́ческаѧ, сегѡ̀ ра́ди по дне́хъ шести́хъ поѧ́лъ є҆сѝ петра̀, і҆а́кѡва и҆ і҆ѡа́нна и҆ возве́лъ є҆сѝ ѧ҆̀ на го́рꙋ ѳавѡ́рскꙋю показа́ти и҆́мъ пре́жде крⷭ҇та̀ бж҃е́ственнꙋю сла́вꙋ твою̀, да и҆ во вре́мѧ страда́нїй твои́хъ разꙋ́мнѡ воспою́тъ тебѣ̀: А҆ллилꙋ́їа.

І҆́косъ в҃

Ра́зꙋма неꙋразꙋмѣ́нна во́льнагѡ твоегѡ̀ страда́нїѧ не разꙋмѣ́ша ᲂу҆ч҃нцы̀ твоѝ, гдⷭ҇и. Сегѡ̀ ра́ди пре́жде крⷭ҇та̀ твоегѡ̀ но́щїю глꙋбо́кою возве́лъ є҆сѝ на го́рꙋ высокꙋ̀ лꙋ́чшїѧ ᲂу҆ч҃нкѝ твоѧ̀, да ви́дѧтъ чꙋ́до стра́шнагѡ преѡбраже́нїѧ твоегѡ̀ и҆ нестерпи́мое бж҃е́ственнагѡ прише́ствїѧ твоегѡ̀ и҆здале́ча присносꙋ́щное бл҃голѣ́пїе, да є҆гда̀ тѧ̀ ᲂу҆́зрѧтъ распина́ема, страда́нїе ᲂу҆́бѡ твоѐ, да ᲂу҆разꙋмѣ́ютъ во́льное. Сегѡ̀ ра́ди вопїе́мъ тебѣ̀ си́це:

І҆и҃се, ѿ ᲂу҆до́лїй на го́рꙋ высокꙋ̀ возведы́й твоѧ̑ ᲂу҆чн҃ки̑, возведѝ и҆ на́съ горѣ̀, да го́рнихъ наꙋчи́мсѧ и҆ска́ти наслажде́нїй: і҆и҃се, ѿ жите́йскихъ попече́нїй и҆ мно́жества наро́днагѡ ѿлꙋчи́вый петра̀ и҆ зеведе́овыхъ, ѿлꙋчѝ на́шъ ᲂу҆́мъ ѿ бла́гъ земны́хъ, да до́льныхъ навы́кнемъ и҆збѣга́ти пристра́стїй.

І҆и҃се, мнѡ́гими трꙋды̑ на преве́лїю высотꙋ̀ вознесы́й дрꙋ́ги своѧ̀, и҆ на́съ мнѡ́гими трꙋды̑ и҆ пѡ́ты наꙋчѝ по всѧ̑ дни̑ подвиза́тисѧ: і҆и҃се, въ молча́нїи нѡщны́ѧ моли̑твы преѡбраже́нїе твоѐ ᲂу҆чн҃кѡ́мъ показа́вый, и҆ ны́нѣ вѣ̑рнымъ твои̑мъ сподо́би сла́достїю слове́съ твои́хъ въ нощѝ просвѣща́тисѧ.

І҆и҃се, тре́хъ то́чїю свидѣ́телей сла́вы твоеѧ̀ въ тишинѣ̀ ѳавѡ́рстѣй ꙗ҆ви́вый, и҆ ны́нѣ безмѡ́лвнымъ и҆ пꙋсты̑ннымъ да́ждь сла́вꙋ твою̀ всегда̀ созерца́ти: і҆и҃се, ѳавѡ́ръ и҆ є҆рмѡ́нъ ѡ҆ и҆́мени твое́мъ возвесели́вый, да́ждь на́мъ призыва́нїемъ сладча́йшагѡ и҆́мени твоегѡ̀ восхо́дъ горѣ̀ соверша́ти.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ г҃

Си́лою свы́ше и҆збра́нныѧ твоѧ̀ а҆пⷭ҇лы ѡ҆блекі́й, і҆и҃се, на ѳавѡ́ръ возве́лъ є҆сѝ ѧ҆̀, да навы́кнꙋтъ вы́шнихъ и҆ска́ти и҆ гѡ́рнѧѧ мꙋ́дрствовати, а҆ не земна̑ѧ, ѡ҆блецы̀ и҆ на́съ, до́лꙋ пони́кшихъ и҆ не́мощїю пло́ти всегда̀ побѣжда́емыхъ, си́лою и҆ сла́вою твое́ю, да си́ла твоѧ̀ въ не́мощи на́шей соверши́тсѧ, чесѡ̀ ра́ди съ любо́вїю воспое́мъ тебѣ̀: А҆ллилꙋ́їа.

І҆́косъ г҃

И҆мѣ́ѧй пре́жде крⷭ҇та̀ и҆ во́льнагѡ страда́нїѧ твоегѡ̀ ꙗ҆ви́ти ᲂу҆ченикѡ́мъ ѿча́сти бж҃ества̀ сла́вꙋ твою̀, хрⷭ҇тѐ сп҃се на́шъ, ты̀ тре́хъ то́чїю ѿ живꙋ́щихъ на землѝ и҆збира́еши, да зри́телїе бж҃е́ственныѧ твоеѧ̀ сла́вы бꙋ́дꙋтъ, и҆́бо ті́и трѝ пред̾ ѻ҆чи́ма твои́ма лꙋ́чши бѧ́хꙋ па́че всѣ́хъ наро́дѡвъ и҆ ꙗ҆зы̑къ: пе́тръ, ꙗ҆́кѡ па́че и҆ны́хъ тебѐ возлюби́вый, и҆ ꙗ҆́кѡ пе́рвый ѿ всѣ́хъ сн҃а бж҃їѧ тебѐ и҆сповѣ́давый, і҆а́кѡвъ, ꙗ҆́кѡ пе́рвый во а҆пⷭ҇лѣхъ наде́жды ра́ди бꙋ́дꙋщихъ бл҃гъ под̾ ме́чь главꙋ̀ свою̀ преклони́вый и҆ та́кѡ нача́ло мꙋ́ченикѡмъ твои̑мъ положи́вый, і҆ѡа́ннъ же, ꙗ҆́кѡ дѣ́вственникъ и҆ па́че всѣ́хъ чⷭ҇тотꙋ̀ пло́ти и҆ дꙋ́ха цѣломꙋ́дреннѡ сохрани́вый и҆ сегѡ̀ ра́ди бл҃года́ть ѻ҆со́бнꙋю па́че и҆ны́хъ полꙋчи́вый къ зрѣ́нїю неизрече́нныхъ ѿкрове́нїй и҆ бж҃е́ственныѧ сла́вы твоеѧ̀. Съ ни́миже прїимѝ и҆ ѿ на́съ похвалы̑ тебѣ̀ сицевы̑ѧ:

І҆и҃се, ѿ петра̀ пре́жде преѡбраже́нїѧ твоегѡ̀ и҆сповѣ́данїе вѣ́ры прїе́мый, прїимѝ и҆ моѐ те́плое и҆сповѣ́данїе: і҆и҃се, томꙋ̀ же петрꙋ̀ на ѳавѡ́рѣ дерзнове́нїе дарова́вый глаго́лати съ тобо́ю, возглаго́ли бл҃га̑ѧ и҆ ми̑рнаѧ въ се́рдцѣ мое́мъ.

І҆и҃се, сынѡ́въ зеведе́овыхъ за пла́мень любвѝ и҆̀хъ сына́ми гро́мовыми нарекі́й, гро́момъ гнѣ́ва твоегѡ̀ не поразѝ мѧ̀: і҆и҃се, тѣ̑мъ же ᲂу҆чн҃кѡ́мъ ѻ҆́гнь съ нб҃сѐ на самарѧ́нъ низвестѝ не попꙋсти́вый, ѻ҆́гнь страсте́й ᲂу҆гасѝ во мнѣ̀.

І҆и҃се, съ дѣ́вственнымъ і҆ѡа́нномъ въ чⷭ҇тотѣ̀ пло́ти и҆ дꙋ́ха на ѳавѡ́ръ го́рнїй возведѝ мѧ̀: і҆и҃се, съ мꙋ́жественнымъ і҆а́кѡвомъ, пе́рвѣе ча́шꙋ твою̀ и҆спи́вымъ, въ ра́й введѝ мѧ̀.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ д҃

Бꙋ́рѧ бг҃оѧвле́нїѧ твоегѡ̀ на горѣ̀ сїна́йстѣй бы́сть, є҆гда̀ во гро́мѣхъ и҆ мѡ́лнїѧхъ дарова́лъ є҆сѝ зако́нъ ᲂу҆го́дникꙋ твоемꙋ̀ мѡѷсе́ови, та́кожде и҆ на горѣ̀ хори́вѣ бы́сть дꙋ́хъ крѣ́покъ, разорѧ́ѧй го́ры, трꙋ́съ и҆ ѻ҆́гнь, є҆гда̀ и҆лїа̀ прⷪ҇ро́къ хотѧ́ше зрѣ́ти тѧ̀, ѻ҆ба́че не въ ви́хрѣ бꙋ́рнѣ, не въ трꙋ́сѣ и҆ не во ѻ҆гнѣ̀ гдⷭ҇ь, но во гла́сѣ хла́да то́нка ты̀ показа́лъ є҆сѝ и҆́мъ лицѐ своѐ и҆ сла́вꙋ бж҃ества̀ своегѡ̀, є҆гда̀ на горѣ̀ ѳавѡ́рстѣй ты̀ предста́лъ є҆сѝ и҆́мъ, съ ра́достїю вопїю́щымъ тебѣ̀: А҆ллилꙋ́їа.

І҆́косъ д҃

Слы́шавше мѡѷсе́й и҆ и҆лїа̀ на ѳавѡ́рѣ глаго́лы твоѧ̀ ѡ҆ и҆схо́дѣ твое́мъ, є҆го́же хотѧ́ше сконча́ти во і҆ерⷭ҇ли́мѣ, бы́ша всемꙋ̀ мі́рꙋ свидѣ́телїе твоѝ, гдⷭ҇и, ꙗ҆́кѡ ты̀ є҆сѝ вои́стиннꙋ сн҃ъ бж҃їй на сп҃се́нїе люде́й ѿ бг҃а ѻ҆ц҃а̀ по́сланный и҆ гла́сомъ съ нб҃сѐ тѣ́мъ пока́занный. Мѡѷсе́й ᲂу҆́бѡ ѿ ме́ртвыхъ при́званъ бы́сть да свидѣ́тельствꙋетъ во а҆́дѣ держи́мымъ твоѐ въ мі́ръ прише́ствїе. И҆лїа́ же ѿ раѧ̀ при́званъ бы́сть, да ска́жетъ є҆нѡ́хꙋ сла́вꙋ твою̀ въ преѡбраже́нїи пречⷭ҇тыѧ пло́ти твоеѧ̀ ви́дѣннꙋю. Мы́ же, чꙋдѧ́щесѧ та́йнѣ прⷪ҇рѡ́къ твои́хъ на ѳавѡ́рѣ ꙗ҆вле́нїѧ, со ᲂу҆миле́нїемъ зове́мъ тебѣ̀:

І҆и҃се, бг҃ови́дцꙋ мѡѷсе́ю, лицѐ твоѐ ᲂу҆зрѣ́ти восхотѣ́вшемꙋ, на ѳавѡ́рѣ лице́мъ къ лицꙋ̀ ꙗ҆ви́выйсѧ, ꙗ҆вѝ на́мъ въ грѧдꙋ́щемъ вѣ́цѣ лица̀ твоегѡ̀ сла́дость превожделѣ́ннꙋю: і҆и҃се, въ бг҃овидѣ́нїи за́днихъ твои́хъ дре́вле мѡѷсе́ю сїѧ́нїе сла́вы твоеѧ̀ показа́вый, покажѝ на́мъ во црⷭ҇твїи твое́мъ лице́мъ къ лицꙋ̀ зра́ка твоегѡ̀ добро́тꙋ неизрече́ннꙋю.

І҆и҃се, въ тишинѣ̀ и҆ гла́сѣ хла́да то́нка и҆лїю̀ ѿкрове́нїемъ свои́мъ наста́вивый, наста́ви мѧ̀ чꙋ́днѡ въ тишинѣ̀ безстра́стїѧ бж҃е́ственнагѡ: і҆и҃се, на ѻ҆́гненнѣй колесни́цѣ неѡпа́льнагѡ нб҃оше́ственника твоегѡ̀ и҆лїю̀ въ ра́й возведы́й, возведѝ мѧ̀ ди́внѡ на высотꙋ̀ житїѧ̀ соверше́ннѣйшагѡ.

І҆и҃се, дре́влѣ съ прⷪ҇ро́ки многоѡбра́знѡ глаго́лавый, и҆ на ѳавѡ́рѣ и҆схо́дъ сво́й и҆́мъ возвѣсти́вый, глаго́лами живота̀ вѣ́чнагѡ напита́й а҆́лчꙋщꙋю дꙋ́шꙋ мою̀: і҆и҃се, при ᲂу҆стѣ́хъ двою̀ свидѣ́телей та́йнꙋ преѡбраже́нїѧ ᲂу҆чн҃кѡ́мъ твои̑мъ ѿкры́вый, воздыха́ньми неизглаго́ланными ст҃а́гѡ дх҃а воспламенѝ хла́днꙋю вѣ́рꙋ мою̀.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ є҃

Бг҃оте́чнѣй ѕвѣздѣ̀ въ нощѝ возсїѧ́вшей, ᲂу҆подо́бисѧ, свѣтода́вче гдⷭ҇и, неизрече́нное ѡ҆сїѧ́нїе пречⷭ҇тыѧ пло́ти твоеѧ̀, є҆гда̀ ᲂу҆чн҃кѡ́мъ спѧ́щымъ и҆ но́щи, ᲂу҆жѐ ко ᲂу҆́трꙋ приближа́ющейсѧ, ты̀ возноси́лъ є҆сѝ ѻ҆ц҃ꙋ̀ твоемꙋ̀ на высотѣ̀ горы̀ премі́рнꙋю мл҃твꙋ свою̀. Тогда̀ просвѣти́сѧ лицѐ твоѐ, ꙗ҆́кѡ со́лнце, и҆ ри̑зы твоѧ̑ бы́ша блеща́щасѧ, бѣлы̀ ѕѣлѡ̀, ꙗ҆́кѡ снѣ́гъ. А҆пⷭ҇ли же ѿ наше́дшїѧ бж҃е́ственный си́лы ᲂу҆бꙋди́шесѧ, ᲂу҆ви́дѣша сла́вꙋ твою̀, ꙗ҆́кѡ є҆диноро́днаго ѿ ѻ҆ц҃а̀, и҆спо́лнь бл҃года́ти и҆ и҆́стины, и҆ стоѧ́хꙋ тре́петни, пою́ще тебѣ̀: А҆ллилꙋ́їа.

І҆́косъ є҃

Ви́дѣвше а҆пⷭ҇ли тѧ̀ на ѳавѡ́рѣ во ѻ҆́бразѣ чл҃вѣ́честѣмъ сꙋ́щагѡ, сла́вою же бж҃е́ственною преѡбрази́вшасѧ и҆ съ мѡѷсе́омъ и҆ и҆лїе́ю ѡ҆ и҆схо́дѣ твое́мъ бесѣ́дꙋюща, разꙋмѣ́ша присносꙋ́щнꙋю си́лꙋ твою̀ и҆ бж҃ество̀ под̾ покро́вомъ пло́ти сокрыва́емо, и҆ ᲂу҆жа́сни бы́ша, послꙋ́шающе глаго́лемыхъ и҆ наслажда́ющесѧ зрѣ́нїѧ твоеѧ̀ бж҃е́ственныѧ сла́вы, ю҆́же толи́кѡ ви́дѣша, є҆ли́ка тѣле́сныхъ ѻ҆че́съ зрѣ́нїе и҆̀хъ вмѣсти́ти можа́ше. Съ ни́миже и҆ мы̀ пое́мъ тебѣ̀ такова́ѧ:

І҆и҃се, возсїѧ́вый ᲂу҆чн҃кѡ́мъ твои́мъ неизрече́ннꙋю и҆ бг҃осїѧ́ннꙋю сла́вꙋ твою̀, возсїѧ́й въ дꙋша́хъ на́шихъ свѣ́тъ тво́й прⷭ҇носꙋ́щный: і҆и҃се, причасти́вый первостоѧ́тєли зако́на и҆ бл҃года́ти премі́рнагѡ свѣ́та твоегѡ̀, причаще́нїемъ тогѡ̀ соберѝ ᲂу҆́мъ на́шъ приснозаблꙋ́ждшїй.

І҆и҃се, сокрове́ннꙋю во пло́ти мо́лнїю бж҃ества̀ твоегѡ̀ на ѳавѡ́рѣ ма́ло ѡ҆бнажи́вый, ѡ҆бнажѝ сокровє́нныѧ грѣхопадє́нїѧ въ ᲂу҆бо́гой со́вѣсти мое́й: і҆и҃се, несозда́ннагѡ свѣ́та твоегѡ̀ лꙋча́ми и҆з̾ пло́ти твоеѧ̀ ст҃ꙋ́ю го́рꙋ ѡ҆зари́вый, ѡ҆зарѝ свѣ́тъ за́повѣдей твои́хъ во мра́чнѣй дꙋшѝ мое́й.

І҆и҃се, преѡбраже́нїемъ пречⷭ҇тыѧ пло́ти твоеѧ̀ просвѣти́вый мі́ра концы̀, просвѣтѝ и҆ ᲂу҆красѝ на́съ помраче́нныхъ: і҆и҃се, блиста́нїемъ ѳавѡ́рскагѡ свѣ́та твоегѡ̀ ѡ҆чи́стивый, ꙗ҆́кѡ снѣ́гъ, твоѧ̑ ᲂу҆чн҃кѝ, ѡ҆чи́сти и҆ ѡ҆бновѝ на́съ потемнє́нныхъ.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ ѕ҃

Ви́дѣвше пребл҃гостное и҆ сп҃си́тельное собесѣ́дованїе твоѐ, хрⷭ҇тѐ бж҃е на́шъ, со мѡѷсе́омъ и҆ и҆лїе́ю на горѣ̀ ѳавѡ́рстѣй, возра́довашесѧ ѕѣлѡ̀ ᲂу҆чн҃цы̀ твоѧ̑: пе́тръ, і҆а́кѡвъ и҆ і҆ѡа́ннъ. Пе́тръ же гла́сомъ любвѐ бж҃е́ственнѣй и҆спо́лненнымъ речѐ: гдⷭ҇и, добро̀ є҆́сть на́мъ здѣ̀ бы́ти: а҆́ще хо́щеши, сотвори́мъ здѣ̀ трѝ сѣ́ни, тебѣ̀ є҆ди́нꙋ, и҆ мѡѷсе́ови є҆ди́нꙋ, и҆ є҆ди́нꙋ и҆лїѝ. Мы́ же недосто́йнїи, не дерза́емъ прѧ́мѡ тебѐ вопроша́ти, ѻ҆ба́че смире́ннѡ ѡ҆ поми́лованїи мо́лимъ тѧ̀ и҆ гла́сомъ тре́петнѣмъ вопїе́мъ тѝ: А҆ллилꙋ́їа.

І҆́косъ ѕ҃

Возсїѧ̀ на ѳавѡ́рѣ во зна́менїе все́й вселе́ннѣй ѻ҆́блакъ свѣ́телъ, петрꙋ̀ ѡ҆ сѣ́нѣхъ вопроша́ющꙋ, ѿкрове́нїе гла́са ѻ҆ч҃ескагѡ возвѣща́ющъ и҆ дх҃а ст҃а́гѡ прише́ствїе, и҆ є҆гда̀ ѡ҆сѣнѝ а҆пⷭ҇лы, ве́рхъ горы̀ ѡ҆крꙋжа́юще, ті́и па́че ᲂу҆боѧ́шасѧ и҆ во ѻ҆́блакъ со стра́хомъ встꙋпи́вше, ѡ҆щꙋти́ша твоѐ непристꙋ́пное бж҃ество̀, и҆ со дерзнове́нїемъ мно́гимъ возопи́ша къ тебѣ̀ такова́ѧ:

І҆и҃се, і҆и҃лѧ дре́влѣ столпо́мъ ѻ҆́блачнымъ въ пꙋсты́нѣ пꙋтеводи́вый, са́мъ и҆ ны́нѣ пꙋ́ть во црⷭ҇твїе твоѐ на́мъ ᲂу҆кажѝ: і҆и҃се, а҆пⷭ҇лы твоѧ̀ во ѻ҆́блацѣ свѣ́тлѣ на ѳавѡ́рѣ ѡ҆сѣни́вый, росо́ю дх҃а твоегѡ̀ ст҃а́гѡ на́съ ѡ҆сѣнѝ.

І҆и҃се, во хра́мѣ нерꙋкотворе́ннѣмъ живы́й на нб҃сѝ, хра́мъ свѣтови́дѣнъ и҆ сѣ́нь пречⷭ҇тꙋю покажѝ мѝ твоегѡ̀ бж҃ества̀: і҆и҃се, ски́нїй рꙋкотворе́нныхъ не восхотѣ́вый на землѝ, внꙋ́треннюю благоѻбра́знꙋю ски́нїю дх҃а твоегѡ̀ сотворѝ мѧ̀, во є҆́же взы́ти на нб҃са̀.

І҆и҃се, ѡ҆дѣѧ́йсѧ свѣ́томъ, ꙗ҆́кѡ ри́зою, ѡ҆блецы̀ мѧ̀ ѡ҆бнаже́ннагѡ въ бг҃отка́нныѧ ри̑зы цѣломꙋ́дрїѧ и҆ чистоты̀: і҆и҃се, простира́ѧй нб҃о, ꙗ҆́кѡ ко́жꙋ, ѻ҆де́ни мѧ̀ ѡ҆стрꙋпле́ннагѡ въ снѣгосвѣ́тлыѧ ѻ҆дє́жды твоеѧ̀ нбⷭ҇ныѧ красоты̀.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ з҃

Хотѧ̀ ѿкры́ти сокрове́ннꙋю ѿ вѣ́ка та́йнꙋ твоегѡ̀, хрⷭ҇тѐ, бж҃ества̀, ѻ҆ц҃ъ тво́й нбⷭ҇ный па́ки ꙗ҆́коже пре́жде на і҆ѻрда́нѣ во вре́мѧ кр҃ще́нїѧ твоегѡ̀, бг҃осыно́вство твоѐ возвѣстѝ и҆ та́кѡ гла́сомъ и҆з̾ ѻ҆́блака бы́вшимъ свидѣ́тельствова, глаго́лѧ: се́й є҆́сть сн҃ъ мо́й возлю́бленный, тогѡ̀ послꙋ́шайте. А҆пⷭ҇ли же ѿ вели́кагѡ ᲂу҆́жаса крѣ́пости своеѧ̀ лиши́вшисѧ, падо́ша ни́цъ на зе́млю, вопїю́ще тебѣ̀: А҆ллилꙋ́їа.

І҆́косъ з҃

Нѡ́ваѧ ви́дѣвше и҆ пресла̑внаѧ на ѳавѡ́рѣ бы̑вшаѧ, словесѐ твоегѡ̀, влⷣко гдⷭ҇и, самови́дцы и҆ слꙋги̑, и҆ гла́съ ѻ҆ч҃ескїй и҆ шꙋ́мъ и҆з̾ ѻ҆́блака слы́шавше, ᲂу҆жа́сни бы́ша и҆ но́вымъ свѣтоли́тїемъ внеза́пꙋ ѡ҆свѣща́хꙋсѧ, дрꙋ́гъ дрꙋ́га зрѧ́хꙋ, ᲂу҆дивлѧ́ющесѧ и҆ къ землѝ па́дше ни́цъ, тебѣ̀ влⷣцѣ всѧ́ческихъ поклони́шасѧ, похвалы̑ тебѣ̀ возсыла́ѧ таковы́ѧ:

І҆и҃се, ѻ҆́бразе пресвѣ́тлыѧ ѵ҆поста́си ѻ҆́ч҃їѧ, преѡбразѝ мра́чное и҆ нечи́стое житїѐ моѐ: і҆и҃се, сла́вы ѻ҆́ч҃їѧ сїѧ́нїе, просвѣтѝ па́дшꙋю и҆ во тьмꙋ̀ воглꙋ́бльшꙋюсѧ дꙋ́шꙋ мою̀.

І҆и҃се ди́вный и҆ стра́шный во сла́вѣ бж҃е́ственнагѡ зра́ка твоегѡ̀, тлѣ́нїемъ растлѣ́нный дꙋше́вный на́шъ зра́къ ѡ҆бновѝ: і҆и҃се ти́хїй, любвѝ по́лный, неизрече́нною свѣ́тлостїю пло́ти твоеѧ̀ всю̀ нечистотꙋ̀ пло́ти моеѧ̀ па́че снѣ́га ᲂу҆бѣлѝ.

І҆и҃се, свѣ́те безнача́льный, во свѣ́тѣ твое́мъ, на ѳавѡ́рѣ ꙗ҆вле́ннѣмъ, свѣ́тъ покажѝ на́мъ ѻ҆ц҃а̀: і҆и҃се, свѣ́те неизмѣ́нный, въ незри́мѣмъ свѣ́тѣ црⷭ҇тва твоегѡ̀, свѣ́тъ покажѝ на́мъ и҆ дх҃а.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ и҃

Ди́внѡ и҆ стра́ннѡ ꙗ҆ви́стасѧ тебѣ̀ мѡѷсе́й и҆ и҆лїа̀ на ѳавѡ́рѣ, влⷣко гдⷭ҇и, начерта́нїе бж҃е́ственныѧ ѵ҆поста́си ви́дѣвше, и҆ глаго́ласта ѡ҆ во́льномъ страда́нїи твое́мъ, сщ҃еннолѣ́пнѡ предстоѧ́ще тебѣ̀. Ѡ҆сѣни́вшꙋ же и҆̀хъ ѻ҆́блакꙋ свѣ́тлꙋ и҆ гла́сꙋ съ нб҃сѐ бы́вшꙋ, взѧ́тсѧ сла́ва гдⷭ҇нѧ ѿ видѣ́нїѧ ᲂу҆чєни́къ твои́хъ, взѧ́шасѧ же и҆ прⷪ҇ро́цы во своѧ̀ мѣ́ста, пою́ще тебѣ̀: А҆ллилꙋ́їа.

І҆́косъ и҃

Ве́сь бы́лъ є҆сѝ ѿ вы́шнихъ, неисче́тный сло́ве бж҃їй, є҆гда̀ пречⷭ҇таѧ пло́ть твоѧ̀ преѡбража́шасѧ на ѳавѡ́рѣ, но и҆ ѿ ни́жнихъ ника́коже ѿстꙋпи́лъ є҆сѝ, є҆гда̀ ѿше́дшымъ прⷪ҇ро́кѡмъ и҆ видѣ́нїю ᲂу҆жѐ сконча́вшꙋсѧ, ты̀ пристꙋпи́лъ є҆сѝ къ лежа́щимъ стра́ха ра́ди на землѝ твои́мъ ᲂу҆ченикѡ́мъ, и҆ рꙋко́ю коснꙋ́всѧ и҆̀хъ, глаго́лалъ є҆сѝ и҆́мъ: воста́ните, не бо́йтесѧ. Оу҆чн҃цы̀ же, возве́дше ѻ҆́чи своѝ и҆ никого́же ви́дѣвше, то́чїю тебѐ є҆ди́наго съ ни́ми сꙋ́щаго, возра́довахꙋсѧ ѕѣлѡ̀ и҆ возбл҃годари́ша бг҃а, пою́ще тебѣ̀ такова́ѧ:

І҆и҃се, и҆мѣ́ѧй глаго́лы живота̀ вѣ́чнагѡ, всегда̀ пребꙋ́ди съ на́ми во стра́нствїи земно́мъ: і҆и҃се, насы́тивый на́съ зра́комъ твоегѡ̀ бж҃ества̀, не ѡ҆ста́ви на́съ си́рыхъ на слꙋже́нїи твое́мъ.

І҆и҃се, пре́жде крⷭ҇та̀ твоегѡ̀ та́йнꙋ во́льнагѡ страда́нїѧ ᲂу҆ѧсни́вый, пода́ждь на́мъ всегда̀ па́мѧтовати твоѐ на́съ ра́ди и҆стоща́нїе: і҆и҃се, пре́жде є҆́же ᲂу҆мре́ти, на́мъ сла́вꙋ твою̀ показа́вый, пода́ждь на́мъ всегда̀ да разꙋмѣ́ти твоеѧ̀ пло́ти ѡ҆боже́нїе.

І҆и҃се, ѻ҆́бразе непремѣ́нный сꙋ́щагѡ, ѡ҆бновѝ въ дꙋшѝ мое́й вожделѣ́ннагѡ зра́ка твоегѡ̀ ѻ҆́бразъ и҆ подо́бїе: і҆и҃се, печа́те равноѻбра́знаѧ ѻ҆ц҃а̀, запечатлѣ́й во пло́ти мое́й неизрече́нныѧ добро́ты твоеѧ̀ бл҃гоѡбра́зїе.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ ѳ҃

Всѐ є҆стество̀ смѧте́сѧ, зрѧ̀ твоѐ пресла́вное на ѳавѡ́рѣ преѡбраже́нїе, хрⷭ҇тѐ сп҃се: а҆́гг҃ли, незри́мѡ предстоѧ́ще, со стра́хомъ и҆ тре́петомъ слꙋжа́хꙋ тебѣ̀, нб҃са̀ ᲂу҆боѧ́шасѧ, подви́жесѧ и҆ тре́петна бы́сть всѧ̀ землѧ̀, ви́дѧщи сла́вꙋ гдⷭ҇а, гора̀ ѳавѡ́ръ, пре́жде мра́чна и҆ ды́мна, свѣ́тлымъ ѻ҆́блакомъ покрыва́шесѧ, на не́йже пречи́стїи но́зѣ твоѝ стоѧ́сте, ᲂу҆ченицы̀ же твоѝ, гдⷭ҇и, не терпѧ́ще зрѣ́ти нестерпи́магѡ зра́ка твоегѡ̀, поверго́ша себѐ до́лꙋ на зе́млю, ли̑ца покрыва́юще, до́ндеже ты̀ са́мъ, видѣ́нїю сконча́вшꙋсѧ, воздви́глъ є҆сѝ ѧ҆̀, тебѣ̀ вопїю́щихъ: А҆ллилꙋ́їа.

І҆́косъ ѳ҃

Вѣті̑и сꙋемꙋ́дреннїи, бл҃года́тїею непросвѣще́ннїи, не мо́гꙋтъ разꙋмѣ́ти твоегѡ̀ пресла́внагѡ преѡбраже́нїѧ та́инства, гдⷭ҇и. Сегѡ̀ ра́ди, є҆гда̀ со ᲂу҆чн҃кѝ сходи́лъ є҆сѝ съ горы̀, дню̀ возсїѧва́ти начина́ющꙋ, ты̀ заповѣ́далъ є҆сѝ дрꙋгѡ́мъ твои́мъ, да никомꙋ́же повѣ́дѧтъ видѣ́нїѧ бы́вшаго, до́ндеже по прїѧ́тїи страда́нїѧ и҆ сме́рти воскрⷭ҇неши въ тре́тїй де́нь ѿ гро́ба. И҆ ті́и ᲂу҆молча́ша, и҆ никомꙋ́же возвѣсти́ша въ ты́ѧ днѝ ничесо́же ѿ тѣ́хъ, ꙗ҆́же ви́дѣша и҆ слы́шаша, ѻ҆ба́че то́чїю въ се́рдцѣ свое́мъ вопїѧ́хꙋ тебѣ̀ си́це:

І҆и҃се, во всегѡ̀ а҆да́ма ѡ҆болкі́йсѧ, ѡ҆чернѣ́вшее дре́вле є҆стество̀ чл҃вѣ́че просвѣтѝ: і҆и҃се, во ѻ҆́блацѣ, ѻ҆гнѝ и҆ мра́цѣ носи́мый, твое́ю свѣ́тлостїю ве́сь мра́къ дꙋше́вный въ на́съ потребѝ.

І҆и҃се, сїѧ́нїемъ бж҃е́ственнагѡ шꙋ́ма а҆пⷭ҇лы твоѧ̀ ᲂу҆слади́вый, ᲂу҆слажда́й на́съ всегда̀ глаго́лами бж҃е́ственнагѡ твоегѡ̀ ѿкрове́нїѧ: і҆и҃се, росода́тельнымъ ѻ҆́блакомъ ᲂу҆чн҃кѝ твоѝ просвѣти́вый, просвѣща́й на́съ всегда̀ зарѧ́ми пресла́внагѡ твоегѡ̀ преѡбраже́нїѧ.

І҆и҃се, пречи́стыми нога́ми твои́ми го́рꙋ ѳавѡ́рскꙋю ѡ҆ст҃и́вый, напра́ви но́зѣ на̑ша на прⷭ҇ное слꙋже́нїе тебѣ̀: і҆и҃се, съ непови́нными рꙋка́ми на го́рꙋ твою̀ восходи́ти повелѣ́вый, возбꙋдѝ рꙋ́цѣ на́ши на мл҃твенное воздѣѧ́нїе горѣ̀.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ і҃

Спⷭ҇тѝ хотѧ́й мі́ръ, на ѳавѡ́рѣ преѡбрази́лсѧ є҆сѝ на́съ ра́ди, гдⷭ҇и, да сотвори́ши ны̀ досто́йны ᲂу҆гото́ванныѧ и҆збра́ннымъ твои́мъ нбⷭ҇ныѧ сла́вы и҆ да преѡбрази́ши тѣ́ло смире́нїѧ на́шегѡ, ꙗ҆́кѡ бы́ти є҆мꙋ̀ соѻбра́знꙋ тѣ́лꙋ сла́вы твоеѧ̀ во ѻ҆́бщее всѣ́хъ воскр҃се́нїе и҆ въ безконе́чнѣмъ твое́мъ црⷭ҇твїи, є҆́же ᲂу҆гото́валъ є҆сѝ ѿ сложе́нїѧ мі́ра лю́бѧщимъ тѧ̀, въ не́мже да сподо́биши и҆ на́съ, ꙗ҆́кѡ мѡѷсе́а и҆ и҆лїю̀ на ѳавѡ́рѣ лице́мъ къ лицꙋ̀ лицезрѣ́ти тѧ̀ и҆ со всѣ́ми ст҃ы́ми воспѣва́ти тебѣ̀ вѣ́чнꙋю пѣ́снь: А҆ллилꙋ́їа.

І҆́косъ і҃

Цр҃ю̀ превѣ́чный! Всѧ̑ твори́ши на́шегѡ ра́ди сп҃се́нїѧ. Менѐ ра́ди воспрїѧ́лъ є҆сѝ пло́ть пречⷭ҇тꙋю ѿ прест҃ы́ѧ дв҃ы мр҃і́и и҆ въ зра́цѣ раба̀ прише́лъ є҆сѝ въ мі́ръ се́й. Та́кожде и҆ преѡбрази́лсѧ є҆сѝ на ст҃ѣ́й горѣ̀, не себѣ̀ ᲂу҆гожда́ѧ, не тре́бꙋетъ бо свѣ́тъ просвѣще́нїѧ, но на́съ ра́ди ѡ҆сꙋжде́нныхъ, да на́шꙋ просвѣти́ши тьмꙋ̀ и҆ на́съ, во тьмѣ̀ сѣдѧ́щихъ и҆ средѝ сѣ́ни сме́ртныѧ, ѿ сынѡ́въ гнѣ́ва въ возлю́блєнныѧ ча́да твоѧ̀ да преѡбрази́ши. Сегѡ̀ ра́ди бл҃года́рственнѡ вопїе́мъ тебѣ̀ такова́ѧ:

І҆и҃се, зра́къ ра́бїй на ѳавѡ́рѣ преѡбрази́вый, да на́съ и҆з̾ рабѡ́въ грѣха̀ ча̑да бж҃їѧ сотвори́ши: і҆и҃се, да́же до пло́ти себѐ и҆стощи́вый, да на́ше па́дшее є҆стество̀ съ собо́ю преѡбрази́ши.

І҆и҃се, неизрече́нное бл҃голѣ́пїе црⷭ҇тва твоегѡ̀ на ѳавѡ́рѣ ꙗ҆ви́вый, ра́дость, ми́ръ и҆ пра́вдꙋ ѡ҆ дс҃ѣ ст҃ѣ въ на́съ ᲂу҆твердѝ: і҆и҃се, бж҃е́ственнымъ блиста́нїемъ пло́ти твоеѧ̀ всю̀ тва́рь ѡ҆бж҃и́вый, ѡ҆боже́нїемъ пло́ти во второ́мъ прише́ствїи твое́мъ на́съ ѡ҆бновѝ.

І҆и҃се, ѻ҆́гнь бж҃ества̀ твоегѡ̀ на ѳавѡ́рѣ ꙗ҆ви́вый, ѻ҆гне́мъ невеще́ственнымъ грѣхи̑ моѧ̑ попалѝ: і҆и҃се, сладча́йшею бесѣ́дою твое́ю та́мѡ ᲂу҆чн҃кѝ своѧ̑ напита́вый, ст҃ы́ми та́йнами твои́ми гла́днꙋю дꙋ́шꙋ мою̀ ѡ҆ст҃ѝ.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ а҃і

Пѣ́нїе всеꙋмиле́нное приношꙋ̀ тѝ недосто́йный, твоегѡ̀ преѡбраже́нїѧ соверша́ѧ свѣ́тлое торжество̀ и҆ вопїю̀ тебѣ̀: высотꙋ̀ нбⷭ҇нагѡ житїѧ̀ и҆ сла́вы присносꙋ́щныѧ бж҃е́ственное сїѧ́нїе да́рꙋй ны́нѣ рабѡ́мъ твои́мъ, се́рдцемъ же чи́стымъ сподо́би на́съ мы́сленнѡ взы́ти на го́рꙋ ст҃ꙋ́ю твою̀, ви́дѣти разꙋ́мными ѻ҆чесы̀ пресла́вное преѡбраже́нїе твоѐ, да свѣ́тлѡ воспое́мъ тебѣ̀: А҆ллилꙋ́їа.

І҆́косъ а҃і

Свѣ́тъ сы́й непристꙋ́пенъ и҆ свѣ́та пода́тель, і҆и҃се, безнача́льный и҆ присносꙋ́щный свѣ́те, свѣ́тъ тво́й въ мі́ръ прине́слъ є҆сѝ, є҆гда̀ съ пречⷭ҇тою пло́тїю твое́ю вше́лъ є҆сѝ на го́рꙋ ѳавѡ́рскꙋю и҆ та́мѡ несозда́нный и҆ бж҃е́ственный свѣ́тъ ꙗ҆ви́лъ є҆сѝ ᲂу҆чн҃кѡ́мъ твои́мъ, сла́вы ѻ҆́ч҃їѧ показꙋ́ѧ ѻ҆́бразъ. Сегѡ̀ свѣ́та твоегѡ̀ преесте́ственнагѡ прича́стники бы́ти жела́юще, и҆з̾ глꙋбины̀ дꙋшѝ вопїе́мъ тебѣ̀ такова́ѧ:

І҆и҃се хрⷭ҇тѐ, свѣ́те и҆́стинный, пѡ́мыслы до́брыми дꙋ́шꙋ мою̀ живѝ во всѧ̑ дни̑ земна́гѡ стра́нствїѧ моегѡ̀: і҆и҃се цр҃ю̀, свѣ́те безнача́льный, ᲂу҆га́сшїй свѣти́льникъ дꙋшѝ моеѧ̀ па́ки возжзѝ до днѐ сконча́нїѧ моегѡ̀.

І҆и҃се, свѣ́те ти́хїй, живо́тъ даѧ́й, свѣ́тъ и҆ живо́тъ низпослѝ дꙋшѝ мое́й въ ча́съ ᲂу҆жа́сный сме́рти моеѧ̀: і҆и҃се, свѣ́те ст҃ы́й, свѣтѧ́й и҆ горѧ́й, и҆з̾ ѻ҆гнѧ̀ неꙋгаси́магѡ и҆ тьмы̀ кромѣ́шныѧ и҆схи́ти мѧ̀ тогда̀.

І҆и҃се, сладча́йшїй и҆ ст҃ѣ́йшїй свѣ́те, къ свѣ́тꙋ нбⷭ҇нагѡ черто́га твоегѡ̀ средѝ го́рькихъ мыта́рствъ воздꙋ́шныхъ проведѝ мѧ̀: і҆и҃се, со́лнца всѧ́кагѡ свѣтлѣ́йшїй свѣ́те, во свѣ́тлостехъ ст҃ы́хъ твои́хъ въ невече́рнемъ днѝ црⷭ҇твїѧ твоегѡ̀ просвѣтѝ мѧ̀.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ в҃і

Блгⷣть твою̀ пода́ждь мнѣ̀, і҆и҃се бж҃е мо́й, ю҆́же на ѳавѡ́рѣ дарова́лъ є҆сѝ и҆збра́ннымъ ᲂу҆чн҃кѡ́мъ твои́мъ петрꙋ̀, і҆ѡа́ннꙋ и҆ і҆а́кѡвꙋ, и҆ прїимѝ на́съ, ꙗ҆́коже ѻ҆́ныхъ, да ѡ҆блече́ннїи си́лою твое́ю свы́ше и҆ дх҃омъ ст҃ы́мъ просвѣще́ннїи, се́рдце же чи́сто и҆мꙋ́щи и҆ дꙋ́хъ ѡ҆бновле́нъ, взы́демъ на мы́сленный ѳавѡ́ръ, восходѧ́ще ѿ си́лы въ си́лꙋ, наипа́че же въ постѣ̀ и҆ моли́твѣ подвиза́ющесѧ, въ цѣломꙋ́дрїи же и҆ въ чистотѣ̀ пребыва́юще, и҆ та́мѡ да воспое́мъ тебѣ̀: А҆ллилꙋ́їа.

І҆́косъ в҃і

Пою́ще пречⷭ҇тыѧ пло́ти твоеѧ̀ пресла́вное преѡбраже́нїе, прославлѧ́емъ бж҃е́ственнꙋю сла́вꙋ твою̀ на ѳавѡ́рѣ ꙗ҆вле́ннꙋю, покланѧ́емсѧ присносꙋ́щнѣй си́лѣ твое́й и҆ бж҃ествꙋ̀, є҆го́же зарю̀ ма́лꙋю та́мѡ ѡ҆бнажи́лъ є҆сѝ, хрⷭ҇тѐ, и҆ вѣ́рꙋемъ съ петро́мъ, ꙗ҆́кѡ ты̀ є҆сѝ вои́стиннꙋ хрⷭ҇то́съ, сн҃ъ бг҃а жива́го, прише́дый въ мі́ръ грѣ̑шныѧ спⷭ҇тѝ, тѣ́мже и҆ вопїе́мъ съ ни́мъ и҆з̾ глꙋбины̀ дꙋшѝ: добро̀ на́мъ здѣ̀ бы́ти съ тобо́ю. Сегѡ̀ ра́ди не посрамѝ на́съ въ тѧ̀ пра́вѡ вѣ́рꙋющихъ, ѻ҆ба́че немощны́хъ и҆ пло́тїю ѡ҆бложе́нныхъ и҆ покры́й на́съ свѣ́томъ бг҃осїѧ́нныѧ пло́ти твоеѧ̀, съ любо́вїю зовꙋ́щихъ тебѣ̀ си́це:

І҆и҃се, со́лнце незаходи́мое, на ѳавѡ́рѣ возше́дшее, твои́мъ бж҃е́ственнымъ сїѧ́нїемъ ѡ҆сїѧ́й мѧ̀: і҆и҃се, свѣ́те несокрыва́емый въ преѡбраже́нїи ꙗ҆вле́нный, твоеѧ̀ бл҃года́ти причаще́нїемъ согрѣ́й мѧ̀.

І҆и҃се, хра́ме предвѣ́чный нбⷭ҇нагѡ і҆ерⷭ҇ли́ма, въ ски́нїю бж҃їю съ чл҃ки вселѝ мѧ̀: і҆и҃се, цвѣ́те бл҃гово́нный раѧ̀ всест҃а́гѡ, нбⷭ҇ными а҆рѡма̑ты ст҃ы́ни и҆ чтⷭ҇оты̀ ѡ҆бл҃гоꙋха́й мѧ̀.

І҆и҃се, ѻ҆гню̀ чисти́тельный, нб҃о и҆ зе́млю ѿ всѧ́кїѧ скве́рны ѡ҆чи́стити хотѧ́й, ѿ скве́рны пло́ти и҆ дꙋ́ха ѡ҆чи́сти мѧ̀: і҆и҃се, ка́меню вседрагі́й, го́рнїй сїѡ́нъ вмѣ́стѡ со́лнца красото́ю бж҃е́ственною ѡ҆свѣща́ти и҆мѣ́ѧй, ѿ зрѣ́нїѧ и҆ны́ѧ красоты̀ па́че тебѐ и҆зба́ви мѧ̀.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ г҃і

Ѽ пресла́дкїй и҆ всеще́дрый і҆и҃се, на ѳавѡ́рѣ бж҃е́ственною сла́вою просїѧ́вый. Прїимѝ ны́нѣ ма́лое моле́нїе сїѐ на́ше, и҆ ꙗ҆́коже прїѧ́лъ є҆сѝ ѿ ᲂу҆ч҃ни̑къ твои́хъ на ст҃ѣ́й горѣ̀ поклоне́нїе, та́кѡ и҆ на́съ сподо́би пресла́вномꙋ преѡбраже́нїю твоемꙋ̀ поклони́тисѧ, во свѣ́тѣ до́брыхъ дѣ́лъ сїѧ́юще, да просвѣти́тсѧ тобо́ю тьма̀ грѣхо́внаѧ въ на́съ живꙋ́щаѧ, и҆ да ꙗ҆ви́мсѧ достѡ́йны бы́ти наслѣ́дники безконе́чнагѡ црⷭ҇твїѧ твоегѡ̀ на нб҃сѝ, и҆дѣ́же со всѣ́ми ст҃ы́ми сподо́би и҆ на́мъ воспѣва́ти тебѣ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡмъ недовѣ́домое и҆ чл҃вѣ́кѡмъ непристꙋ́пное твоѐ, свѣтода́вче хрⷭ҇тѐ, бж҃ество̀, незаходи́тельными мо́лнїѧми и҆ лꙋча́ми невече́рнѧгѡ свѣ́та твоегѡ̀, ꙗ҆ви́лъ є҆сѝ на горѣ̀ ѳавѡ́рстѣй нача́льнѣйшимъ ᲂу҆ченикѡ́мъ твои́мъ, ті́и же бж҃е́ственнымъ и҆змѣни́шасѧ ᲂу҆́жасомъ, ѻ҆́блакомъ ѡ҆сїѧ́вшесѧ свѣ́тлымъ и҆ гла́съ ѻ҆ч҃ь слы́шавше, разꙋмѣ́ша твоегѡ̀ вочл҃вѣ́ченїѧ та́инство, вопїю́ще тебѣ̀ такова́ѧ:

І҆и҃се, сн҃е бж҃їй безсме́ртный, просвѣтѝ на́съ свѣ́томъ лица̀ твоегѡ̀ ѡ҆сїѧ́ннагѡ: і҆и҃се, бл҃гі́й бж҃е всеси́льный, возбꙋдѝ на́съ спѧ́щихъ и҆з̾ глꙋбины̀ тьмы̀ сна̀ грѣхо́внагѡ.

І҆и҃се, во свѣ́тѣ живы́й непристꙋ́пнѣмъ, и҆з̾ ѻ҆́бласти те́мныѧ и҆зведѝ на́съ: і҆и҃се, сла́вою твое́ю и҆спо́лнивый ве́сь мі́ръ, во ѡ҆би́тєли ра̑йскїѧ введѝ на́съ.

І҆и҃се, свѣ́те мі́ра, ѿ мі́ра лꙋка́вагѡ свободѝ на́съ во тьмѣ̀ сѣдѧ́щихъ: і҆и҃се, со́лнце пра́вды, си́лою и҆ пра́вдою ѡ҆блецы̀ на́съ, въ сѣ́ни сме́ртнѣй спѧ́щихъ.

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Конда́къ а҃

Возбра́нный воево́до и҆ цр҃ю̀ сла́вы, тебѣ̀ нб҃сѝ и҆ землѝ созда́телѧ, зрѧ́щи на горѣ̀ ѳавѡ́рстѣй преѡбрази́вшасѧ со сла́вою, всѧ̀ тва́рь ᲂу҆диви́сѧ, нб҃са̀ вострепета́ша, и҆ всѝ земноро́днїи возра́довашасѧ, мы́ же недосто́йнїи твоемꙋ̀ на́съ ра́ди преѡбраже́нїю бл҃года́рственнѡ поклоне́нїе приносѧ́ще, съ петро́мъ ѿ дꙋшѝ вопїе́мъ тѝ:

І҆и҃се, превѣ́чный бж҃е, добро̀ на́мъ всегда̀ бы́ти под̾ кро́вомъ бл҃года́ти твоеѧ̀.

Моли́твы

Гдⷭ҇и і҆и҃се хрⷭ҇тѐ, бж҃е на́шъ, во свѣ́тѣ живы́й непристꙋ́пнѣмъ, сїѧ́нїе сы́й сла́вы ѻ҆́ч҃їѧ и҆ ѻ҆́бразъ ѵ҆поста́си є҆гѡ̀. Є҆гда̀ прїи́де и҆сполне́нїе време́нъ, ты̀ за млⷭ҇рдїе неизрече́нное къ па́дшемꙋ ро́дꙋ чл҃вѣ́ческомꙋ себє̀ ᲂу҆ма́лилъ є҆сѝ, зра́къ раба̀ прїѧ́лъ є҆сѝ, смири́лъ є҆сѝ себє̀, послꙋшли́въ бы́сть да́же до сме́рти. Ѻ҆ба́че пре́жде крⷭ҇та̀ и҆ во́льныѧ стра́сти твоеѧ̀ на горѣ̀ ѳавѡ́рстѣй преѡбрази́лсѧ є҆сѝ въ бж҃е́ственнѣй сла́вѣ свое́й пред̾ ст҃ы́ми твои́ми ᲂу҆чн҃кѝ и҆ а҆пⷭ҇лы, ма́ло скры́въ пло́ти воспрїѧ́тїе, да є҆гда̀ тѧ̀ ᲂу҆́зрѧтъ распина́ема, и҆ сме́рти предава́ема, ᲂу҆разꙋмѣ́ютъ ᲂу҆́бѡ страда́нїе твоѐ во́льное и҆ бж҃ество̀. Да́рꙋй же и҆ на́мъ всѣ́мъ, пречⷭ҇тыѧ пло́ти твоеѧ̀ преѡбраже́нїе пра́зднꙋющымъ, чи́стымъ се́рдцемъ и҆ нескве́рными ᲂу҆мы̑ взы́ти на ст҃ꙋ́ю го́рꙋ твою̀, въ селє́нїѧ ст҃ы́ѧ сла́вы твоеѧ̀, и҆дѣ́же гла́съ чи́стъ пра́зднꙋющихъ, гла́съ несказа́ннагѡ ра́дованїѧ, да та́мѡ кꙋ́пнѡ съ ни́ми лице́мъ къ лицꙋ̀ ᲂу҆́зримъ сла́вꙋ твою̀ въ невече́рнемъ днѝ црⷭ҇твїѧ твоегѡ̀, и҆ со всѣ́ми ст҃ы́ми, ѿ вѣ́ка тебѣ̀ бл҃гоꙋгоди́вшими просла́вимъ всест҃о́е и҆́мѧ твоѐ со безнача́льнымъ твои́мъ ѻ҆ц҃е́мъ и҆ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ ны́нѣ и҆ при́снѡ и҆ во вѣ́ки вѣкѡ́въ. А҆ми́нь.