СЛУЖБА
Святому благоверному страстотерпцу-мученику  Императору  Всероссийскому  Павлу  Первому

По  благословению  Архиерейского Собора  Российской Православной Церкви. На  Велицей  Вечерни:  На Господи  воззвах стихиры глас 6:

Наста  всечестный  праздник и  священное торжество святаго страстотерпца императора  Павла, ангелов  сожителя  и  человеков  заступника;  да  возликует  страна  Российская  и  люди  православнии, имея  славного  угодника  Божия;  непрестанно  молящегося  о  спасении  душ наших.

Приидите  православных  собори,  воспоим  угодника  Божия,  царственнаго рода  отрасль  прекрасную,  престола  Российскаго  украшение,  той  бо избавит нас от всяких искушений и бед,  и  молится о душах наших.

Днесь  священное  торжество  в  прославлении  Боговенчаннаго  царя  Павла,  избиение  тяжкое  от  обезумевших  подданных  и  смерть  лютую  приявшаго. Приидите  вернии  в  память  его возопим:  молися  Госповеди, царю - страстотерпче,  спастися  душам  нашим.

Слава,  глас 6:

Днесь  вся  страна  Российская  просвещается  зарями  и  Божия  Церковь цветы  украшаема,  Боговенчанный  Царю  народа  православнага  и  великий мучениче  страстотерпче  Павле,  вопиет  ти:  угодниче  Христов  и предстателю  теплейший  не  престай  молити  о  рабех  твоих.

И ныне,  глас 6:  (Богородичен  воскресный):  Кто тебе не ублажит: Вход.  Прокимен дня. Чтения мученическая. На  литии  стихиры, глас 7:

Приидите, ублажим  Боговенчаннаго  монарха  Российскаго, за  веру  и  отечество  живот  свой  положившаго, царский  венец  на  терновный сменившаго, православныя  веры  светильника, егоже  нам  Христос  Бог яви, имеяй  велию  милость.

Слава, и  ныне: глас  тойже: 

Под  кров Твой, Владычице, вси  земнороднии  прибегающе, вопием  Ти:  Богородице, упование наше, избави  нас  от  безмерных  прегрешений  и спаси  души  наша.

На  стиховне  стихиры,  глас 5:

Аще  и  маловременно  бысть  житие  твое  и  правление, Боговенчанный  царю  народа  Божия  и  великий  страстотерпче  Павле, обаче  селений  Господних достигл  еси, память  же  вечную  у  Бога  обрел еси. Стих:  Вознесох избраннаго от  людей  моих. Страстотерпче мучениче  Павле,  молим  тя:  призри  на  Русь  и  посети  ю молитвою:  Господи, да  исчезнут  врази  Руси, яко  дым  и  яко  воск  от  лица огня  да  погибнут. Стих:  Елеем  святым  памазах  его. Молися  о  людех  твоих угодниче  изрядне, святе  Павле, сый  в  селениих  светлых  Господа  твоего, Егоже  в  житии  твоем  тепле  возлюбил  еси, сего  ради  даже  до  смерти  за  други  твоя  подвизался  еси.

Слава,  глас 5:  

Радуйся  и  веселися  земле Российская, таковаго  заступника  себе  стяжавшая,  славна  и  мужественна, и  духом  крепка  царя  Павла, еще  же  и  предстателя  скораго  о  людех  пред  Господем.

И ныне,  глас  тойже:  

Святейшая  Херувим  и  высшая  Серафим,  воистину,  Богородице,  Ты  еси. Вемы,  Тя,  заступницу  рода  христианскаго, Ты  же  не  престай  о  нас молящи,  Державо  и  прибежище  душам  нашим.

На  благословении хлебов  тропарь, глас 6: Благоверный  императоре  страстотерпче - мучениче  Павле,  житием благочестивым,  правлением богомудрым  и  мученическою  кончиною угодил  еси  Христу  Спасу  нашему;  молися  Ему  о  спасении  страждущия  земли Российския,  да  избавит  люди  своя  от  безбожных  и  злых,  да воздвигнет  самодержца  православнаго  и  спасет  душы  наша,  яко  Преблагий.

Сей тропарь поем  дважды  и  Богородице  Дево:  единожды. На  утрени,  на  Бог  Господь:  тропарь  дважды; Слава,  и  ныне:  Богородичен:  Благословенную  нарекий:  

По  первом  стихословии  седален,  глас  4: Светлую  твою  память  днесь  творяща, Спаса и  Господа  молити  прилежно  тя  молим, страстотерпче  Павле, заступися  данной  ти  от  Бога  благодатию за Святую  Русь, зане  время  заступничества  твоего  нам возсия.

Слава,  и  ныне:  глас  тойже: Теплое  заступление  сущым  в  бедах, и  помощницу  нашу,  Еюже  рабства иноземнаго  избавихомся, Богородицу  верни,  ублажаем.

По  втором  стихословии  седален,  глас 3: Памазанниче  Божий, моли  Человеколюбца Бога,  да  избавит  нас  от  всяких  бед  и  напастей, и дарует  нам  живот  вечный.

Слава, и  ныне: глас  тойже: Богородице  Дево,  упование  христиан,  покрый  и  соблюди  нас  Твоими  к  Сыну  Твоему  и Богу  молитвами  от  всякия  нужды  и  печали.

По  Хвалите  имя  Господне:  Величание:  Величаем  тя,  святый  страстотерпче  императоре  Павле,  и  чтем  честная  страдания  твоя,  яже  за  Христа  претерпел  еси.

Псалом избранный:  Бог  нам  прибежище  и  сила:   

По полиелеи  седален, глас 8: Яко  воистину  божественная  и  честная,  возсиявши память  твоя Российским  странам  днесь,  славный  Павле,  царскаго  корене святая  отрасль,  Христа  возлюбив,  Егоже  ради  неправедное  убиение претерпел  еси. Тем  моли,  страстотерпче,  даровати  душам  нашим  очищение  согрешений,  мир  и велию  милость.

Слава,  и  ныне: глас  тойже:  Небесная  поют  Ти,  Обрадованная,  Мати  Богоневестная,  и  мы  славословим  неиследованныя  Твоя  милости, Богородице,  темже  моли  спастися  душам  нашим.

Степенна, 1-й антифон  4-го гласа. Прокимен, глас 4: Тебе  ради, Господи, умерщвляеми  есмы весь день. Стих:  Вменихомся  яко  овцы  заколения. Всякое дыхание: Евангелие  от  Матфея  зачало  36.

Слава:  Молитвами  святаго  страстотерпца  императора  Павла,  Милостиве очисти,  множество  согрешений  наших.

И  ныне: Молитвами Богородицы:

По  50-м  псалме  стихира, глас 6: Днесь  верных  собори,  лик  духовный составльше,  в  памяти  святаго  страстотерпца  святолепно  ликовствуем;  днесь  веселием  прославим  Господа,  прославльшаго  императора  Павла,  сему  абие  учувствившеся; днесь  кланяещеся  чудотворному  его гробу  возопим:  радуйся,  за  веру  и  отечество  живот  свой  положивый;  радуйся, царскую порфиру  кровию  своею обагривый;  радуйся,  цвете  благовонный,  неувядаемый  Российский;  не  престай  моляся Христу  помиловати  и  спасти  светоносную  память твою празднующих.

Канон,  глас  1,  егоже  краегранесие: Императора Павла  любовию восхвалим. Ирмос:  Твоя победительная десница: Стих:  Святый страстотерпче  императоре  Павле,  моли  Бога  о  нас.

Измлада  воспитан  в  добрем  научении,  разум богопросвещенный стяжал  еси, угодниче  Христов,  чтением Божественных  писаний;  от  юности  бо  твоея  напитал  еси  душу  твою  сладкою  пищею  словес  Божиих  и  соделался  еси  верным исполнителем  заповедей  Христовых.

Многомилостивыя  Твоея,  Христе, прошу помощи, страстотерпца  Твоего  Павла  молитвами  отверзи  ми  устне  и  просвети  разум,  да  воспою  светоносную  его  память  честно.

Приими  похвалу  от  раб  недостойных  и  молитву  о  нас  сотвори  к  Богу,  честно  творящих  твою  память,  да  от  бед  и  печалей  и  грех  лютых  свободимся,  тя  величающе.

Богородичен:  Едину  Тя,  Всенепорочная,  от  родов  Пречистую  обрет,  вселися  в  Тя  и  человеки  обожи,  темже,  яко  матернее  дерзновение  к  Нему  стяжавши,  моли  о  иже  верою  Богородицу  именующих  Тя.

Песнь  3.

Ирмос:  Единый  ведый:

Разреши  наши  пленицы  согрешений  молитвами  твоими,  яко  бо  непобедим  мученик  дерзновение  имаши  ко  Владыце,  и  буди  нам  прибежище  и  покров,  святе  Павле.

Аще  и  на  небеси  пребываеши,  обаче  и  земных  не  оставляеши, богоблаженне  царю  Павле;  мы  же чада  твоя,  любовию  движимы,  венец  похвалы  тебе  приносим  и  в  день  памяти  твоея  Христа  Бога  и  Пречистую  Матерь  Его  величаем.

Тесным  и  прискорбным  шествовал  путем,  не  убоялся  ни  мучителей,  ни  смерти.  Слыша  изволение  Божие  о  себе  из  уст  праведнаго  Авеля, смиренно  рекл  еси:  се  слуга  Господень,  буди  же  мне  по  глаголу  твоему.

Богородичен: О,  Всепетая  Мати,  умилосердися  на  моление  наше,  Твое  бо  есмы достояние,  всех  спаси  и  помилуй,  да  Тя  вси  роди  непрестанно  величаем.

Седален, глас  4.

Доблему  страдальцу  и  воину  крепкому  всецарюющаго  Христа  похваления  приносим:  радуйся,  светильниче  Господень,  державу  твою  озаряющий;  радуйся,  царское  служение  со  страхом  Божиим  совершивый; святый  царю - мучениче  Павле,  тя  поющия  спасай  от  всех  навет  вражиих  и  молитвами  твоими  ко  Господу,  Царствия  Его  сподоби  нас.

Слава,  и  ныне: глас  тойже.

Дево  Всенепорочная,  пребогатаго  Бога  рождшая, со  страстотерпцы Того моли  непрестанно оставление  согрешений  и  исправление  жития  дати  нам  прежде  конца,  верою  и  любовию  поющим  Тя  по  долгу,  едина  Всепетая.

Песнь 4.

Ирмос:  Гору  тя  благодатиею  Божиею:

Российское  удобрение, и  правоверному  народу  нашему  похвалу  и  крепость  твой  показав  доброумный  смысл,  Богомудре  Павле – императоре  досточудне.

Алкал  и  жаждал  еси  правды,  тленная  будущими  изменил  еси,  яко  меч  обоюдуостр,  вооружився  страхом  Христовым,  горькую  смерть  в  ничтоже  вменил  еси,  славы  вышния  желая.

Поем  Христа  Бога  нашего,  прославльшаго  помазанника  Своего;  Емуже,  царю – Павле,  молися  помиловати  нас,  рабы  Твоя.

Богородичен:  Ангелов  похвало  и  человеков  спасение,  и  Споручница  буди  нам,  Мати  Божия:  яко  да  обрящем  и  приимем  разрешение  прежде  согрешенных  в  ведении  и  не  в  ведении.

Песнь 5.

Ирмос:  Просветивый  сиянием:

Всенародный  глас  ти  приносим  и  мольбу:  заступися  данной  ти  от  Бога  благодатию  за  Святую  Русь,  о  страстотерпче  царю  Павле,  и  умягчи  неправыя  и  жестокия  сердца  возстающия  на  ню.

Ликовствуим,  празднолюбцы,  днесь,  наста  всечестный  праздник  и  священное  торжество  Павла  славнаго  страстотерпца,  носящаго  нам  радость  вечную,  в  ней  же  славим  Господа,  прославльшаго  его.

Богородичен:  Ангелов  Сладосте,  скорбящих  Радосте,  христиан  Предстательнице  и  веры  православныя  утверждение  Ты  еси,  Мати  Господня,  заступи  нас  и  избави  вечных  мук.

Песнь 6.

Ирмос: Обыде  нас  последняя  бездна:

Любовию  ко  Христу  привязаемь,  тем  и  дара  сподоблься  страсти  различныя  исцеляти.  Сего  ради  твое  совершаем  праздненство,  Богомудре  императоре.

Юношски  в  лютых  непобедим  явился  еси,  Боговенчанный  царю  народа  Божия,  раздери  узы  прегрешений  тя  поющих,  страстотерпче,  устави  страстей  прилоги,  молву  разори  ересей,  и  напастей  утиши  бурю  молитвами  твоими.

Божественную  благодать  прияти  сподобился  еси,  егда  венчан  был  еси  на  царствие  российское;  мнози  труды  твоя  положил  еси  на  благо  народа  и  державы  твоея,  скорый  помощниче  нам  и  преславный  чудотворче.

Богородичен:  О,  Владычице,  убогия  хвалы  нашея  не  отвержи  и  греховныя  нищеты  не  возгнушайся,  но  припадающия  люди  приими,  яко  Благая,  Благаго  же  Родительнице.

Кондак,  глас 5.

Возсия  днесь  преславная  память  твоя,  благородне  страстотерпче  императоре  Павле,  созывающи  нас  к  похвалению  Христа  Бога  нашего.  Темже  к  тебе  днесь  притекающе  смиренно  молим  тя,  услыши  и  прими  сие  моление  нас  грешных,  прибегающих  к  предстательству  и  заступлению  твоему;  да  избавимся  от всех  бед  и  скорбей,  иже  присно  память  твою  почитающи.

Икос:

Велий  чудотворец  явился  еси  Российския  земли,  боговенчанный  царю,  невидимо  Христовы  люди  посещая  и  исцеления  подавая  богатно  всем  от  души  приходящим  и  согласно  вопиющим  сице:  радуйся,  страждущим  и  скорбящим  вспоможение;  радуйся,  унывающих  всерадостное  утешение;  радуйся,  недугов  телесных  и  душевных  исцеление;  радуйся,  крестоношением  священный  сан  почтивый;  радуйся,  попечение  велие  о  церкви  Христовой  явивый;  радуйся,  яко  молитвами  твоими  восстановление  престола  русскаго  царя  страны  Российския  во  дни  апостасии  преуготовляеши;  радуйся,  святый  царю – мучениче  Павле,  скорый  помощниче  и  преславный  чудотворче.

Песнь 7.

Ирмос:  Тебе  умную,  Богородице,  пещь:

Вси  помолимся  Христу,  творяще  память  днесь  царю – мученику  Павлу.  О  коль  велика  милость  Твоя  к  нам,  в  Троице  хвалимый  Боже,  приими  молитву  страстотерпца  и  подаждь  нам  в  добрых  делех  утверждение  во  славу  Пресвятаго  Твоего  имени.

Имея  дерзновение,  яко  праведно  царствовав  и  неправедно  пострадав,  стаду  твоему  от  Бога  проси  смирения.

Юже  ти  раболепно  принесохом,  песнь  приими,  страстотерпче, и  воздаждь  свыше  благодать,  недугов  избавляя  и  искушений,  внегда  же  судитися  нам,  предстани,  избави  мучения,  собеседниче  Ангелов.

Богородичен:  Вышняго  освященное  Божие  селение,  радуйся,  Тобою  бо  дадеся  радость,  Богородице,  вопиющим  Ти:  благословенна  Ты  в женах  еси,  Всенепорочная  Владычице.

Песнь 8.

Ирмос:  В  пещи  отроцы  Израилевы:

Обои  убо  на  тебе  венцы,  страстотерпче,  стекошася,  царствия  купно  и  мученичества:  обоих  бо  чин  соблюл  еси.  Темже  царей  еси  похвало  и  мучеников  красото,  земли  Российския  звезда  многосветлая.

Сирот  и  вдов  заступника  и  в  бедах  непоборимаго  помощника,  песньми  Павла  ублажим  славяще:  празднующих  бо  память  его  весело  от бед  избавляет  и  скорбей.

Христе  Боже,  приими  от  нас  молебную  песнь  сию,  юже  Ти  приносим, чтуще  память  страстотерпца  Твоего  и  подаждь  оставление грехом,  да  Тя  непрестанно  Христе,  песньми возпевающе,  возвеличим.

Богородичен:  Высочайшаго  рождши, Пресвятая  Богоневесто, доле  лежащее  естество  наше  к  небеси  возведши. Темже  по  долгу  Тя  славим  во  вся  веки.

Песнь 9.

Ирмос:  Образ  чистаго  Рождества  Твоего:

Ангельстии  чини  хвалят  тя,  преславне,  и  человечестии  роди  поют  непрестанно,  творяще верно  память  твою,  Павле  великоимените.

Люди  вси,  тебе  ведущия  и  заступления  твоего  чающия,  не  презри, страстотерпче,  но,  елико  мощно, предстательствуй,  всем  полезная  прося  молитвами  твоими.

Источник  чудес  гроб  твой  явися  неисчерпаемый, от  негоже  реки  исцелений  изливаеши,  верно  память  твою  творящим,  страстотерпче.

Богородичен:  Мысленная  врата  Жизни,  Пречистая  Богородице, притекающия  к  Тебе  верно  избави  от  бед:  да  славим  пресвятое  Рождество  Твое  во  спасение  душ  наших.

Светилен:

Позлащенныма  крылома  добродетелей  к  Богу  возлетев,  великий  страстотерпец  Павел  нас  назирает,  иже  память  его  творящих,  и  света  исполняет  невещественнаго.

Слава, и  ныне:

Приидите,  вси  верни,  и  купно  собори сотворше,  возопиим Державней  Владычице  и  тако  к  Ней  возглаголем:  вси  неключимы  есмы,  и  того  ради  припадаем  Ти,  и  молим  Тя  со  дерзновением  и  верою,  зовуще:  не  презри  нас,  окаянных,  потщися  на  умоление  и  спаси  вся  православныя.

На  хвалитех  стихиры,  глас 1:

Светозарна и  свята, и  благообразна  царя  же  мученика  всепразднственная  память,  яже,  всю  землю  просвещающи  и  мрак  греховный  отгоняющи,  врачеваний  благодать  источает.

Удивишася  Ангели,  паче  естественное  зряще,  на  тебе  бываемо,  от  царствия  преходяща  в  Небесная  Царствия:  ужасошася  бесове,  венценосца  тя  видяще,  егоже  бо  мняху  страданьми  низложити,  сим  посрамльшеся, падоша;  иже  сего  тогда  укрепивый,  просвети  души  наша.

Днесь  страстотерпец  благоверный  царь  Павел  предстоит  Божией  Матери  и  невидимо  за  ны  молится  с  нами:  Заступнице  Усердная, заступи, спаси  и  помилуй  Русь  Православную  и  сохрани  ю  покровом  твоея благости.

Слава, глас 8:

Красуйся  и  веселися  земле  Российская, радуйся  и  светло  торжествуй  Церковь  Божия, прославляя  страстотерпца  благовернаго  императора  Павла, иже  на  небеси  пребывает  благодатию  и  милость  чадам  своим  являет,  с верою  приходящим  и  чтущим  любовию  святую  память  его.

И  ныне,  Богородичен  глас  тойже:

Владичице,  приими молитвы  раб  Твоих  и  избави  нас  от  всякия  нужды  и  печали.

На  Литургии: Блаженны  от  канона  песнь  3-я  и  6-я. Прокимен,  глас 7:  Возвеселится  праведник  о  Господе  и  уповает  на  Него. Стих:  Услыши, Боже, глас  мой, внегда  молитимися  к  Тебе. Апостол: Деяний  зачало  29. Аллилуия,  глас 4:  Праведник,  яко  финикс,  процветет,  и  яко  кедр,  иже  в  Ливане,  умножится. Стих:  Насаждени  в  дому  Господни  во  дворех  Бога  нашего  процветут. Евангелие  от  Иоанна,  зачало  52. Причастен:  В  память вечную: Молитва  святому  Страстотерпцу  императору  Павлу  Первому.

О, великий  угодниче  Божий,  страстотерпче,  царю - мучениче  Павле!  Приими  сие  моление  нас  грешных, прибегающих  к  предстательству  и  заступлению  твоему.  Призри  на  ны,  недостойныя  чада  твоя,  умиленною  душею  и  сокрушенным  сердцем  тебе  призывающия.  Крепость  бо  наша  в  нас  оскуде  и  вражия  ловления  и  сети,  ереси  и  расколы  обыдоша  нас.  Буди  щит  несокрушим  Святей  Церкви  Православней  и  Отечеству  нашему.  Молися  о  нас,  святче  Божий!  Да  сподобит  нас  Господь  благодать  спасения  стяжати,  в  Страсе  Божиим  пред  искушениями  дней  апостасии  устояти;  умоли  Господа  даровати  нам  Царя  православнаго  наследника  дому  Русскому.  Осени  горним  благословением  нас,  чад  твоих,  и  подаждь  нам  скорбящим  утешение,  болящим  здравие,  гонимым  защищение.  Буди  всем  нам  благосердный  отец  и  за  вся  теплый  молитвенник,  яко  да  предстательством  твоим  ограждаеми,  непрестанно  воспеваем  и  прославляем  Всесвятое  имя  Живоначальныя  Троицы,  Отца  и  Сына  и  Святаго  Духа,  во  веки  веков.  Аминь.